1-3. Ano an ginbuhat ni Jesus han nakita niya nga ginhugawan an templo?

DAKU gud an pagtahod ni Jesus ha templo ha Jerusalem kay maaram hiya kon ano an ginrirepresentaran hito. An templo maiha na nga sentro han pagsingba dinhi ha tuna. Kondi ito nga pagsingba—an pagsingba ha baraan nga Dios, hi Jehova—sadang magin limpyo ngan putli. Salit hunahunaa la kon ano an gin-abat ni Jesus han kumadto hiya ha templo han Nisan 10, 33 C.E., ngan kumita nga ginhugawan ito. Ano an nahitabo didto?—Basaha an Mateo 21:12, 13.

² Ha Bungsaran han mga Hentil, ginsalingabot han bentahoso nga mga negosyante ngan parabalyo hin kwarta an mga magsiringba nga nakadto ha paghalad para kan Jehova. * “Ginpaiwas [ni Jesus] an ngatanan nga namamaligya ngan namamalit didto, ngan ginbalintong an mga lamesa han mga parabalyo hin kwarta.” (Itanding an Nehemia 13:7-9.) Iya ginkondenar iton hakog nga kalalakin-an nga naghimo han balay han iya Amay nga “lungib han mga kawatan.” Hini nga paagi, iya iginpakita an iya pagtahod ha templo ngan ha kon ano an ginrirepresentaran hito. Kinahanglan matipigan nga limpyo an pagsingba ha iya Amay!

³ Paglabay hin mga siglo, katapos mahitrono hi Jesus sugad nga Mesianiko nga Hadi, ha ikaduha nga higayon naglimpyo hiya hin usa pa nga templo—usa nga nag-uupod han ngatanan nga naruruyag pagsingba ha paagi nga inuuyonan ni Jehova. Ano ito nga templo?

4, 5. (a) Paonan-o ginpurog ngan gin-uray an dinihogan nga mga sumurunod ni Jesus tikang han 1914 tubtob han 1919? (b) Dida ba hito natapos an pag-uray ngan paglimpyo ha katawohan han Dios? Isaysay.

⁴ Sugad han aton hinbaroan ha Kapitulo 2, katapos mahitrono hi Jesus han 1914, inupod hiya ha iya Amay basi usisahon an espirituwal nga templo—an kahikayan para ha putli nga pagsingba. * Tungod hito, nakita han Hadi nga an dinihogan nga mga Kristiano, an “mga anak nga kalalakin-an ni Lebi,” nagkinahanglan hin pagpurog ngan pag-uray. (Mal. 3:1-3) Tikang han 1914 tubtob ha temprano han 1919, gintugotan ni Jehova—an Parapurog—an iya katawohan nga umatubang hin mga pagsari ngan kakurian basi mapurog ngan mauray. Makalilipay nga nalamposan  nira ito ngan hira nagin mas malimpyo ngan andam ha pagsuporta ha Mesianiko nga Hadi!

⁵ Natapos ba dida hito an pag-uray ngan paglimpyo ha katawohan han Dios? Waray. Hinin kataposan nga mga adlaw, padayon nga ginbubuligan ni Jehova pinaagi han Mesianiko nga Hadi an nag-aalagad ha iya nga magin limpyo basi makapabilin ha espirituwal nga templo. Ha sunod nga duha nga kapitulo, mahibabaroan naton kon paonan-o niya hira gin-uuray ha moral ngan ha organisasyonal nga paagi. Kondi siyahan, hisgotan anay naton an espirituwal nga paglimpyo. Makaparig-on ha pagtoo an paghisgot han mga ginbuhat ni Jesus—an nakikita ngan diri nakikita—ha pagbulig ha iya mga sumurunod nga magin limpyo ha espirituwal.

6. Paonan-o an mga sugo ni Jehova ha gindistyero nga mga Judio nabulig ha aton nga mahisabtan kon ano an nahiuupod ha espirituwal nga kalimpyo?

⁶ Ano an espirituwal nga kalimpyo? Basi mabaton ito, usisahon naton an ginyakan ni Jehova ha gindistyero nga mga Judio han tibaya na hira ha Babilonya han ika-unom ka siglo B.C.E. (Basaha an Isaias 52:11.) Mauli na hira ha Jerusalem, siyahan basi tukuron utro an templo ngan ipahiuli an tinuod nga pagsingba. (Esra 1:2-4) Karuyag ni Jehova nga bayaan han iya katawohan an ngatanan nga may kalabotan han relihiyon ha Babilonya. Tigamni nga gintagan niya hira hin damu nga sugo: “Ayaw kawkaw hin mahugaw,” “gawas tikang ha butnga niya,” ngan “maglinis kamo.” An putli nga pagsingba kan Jehova diri sadang mahugawan. Kon sugad, ano an sadang naton hunahunaon? An espirituwal nga kalimpyo nag-uupod ha pagin diri bahin han katutdoan ngan turumanon han buwa nga relihiyon.

7. Ano an ginagamit ni Jesus ha pagbulig ha iya mga sumurunod nga magin limpyo ha espirituwal?

⁷ Waray pag-iha katapos mahitrono, nagbutang hi Jesus hin masayon makilala nga grupo basi buligan an iya mga sumurunod nga magin limpyo ha espirituwal. Ito an matinumanon ngan maaramon nga uripon nga iya igintoka han 1919. (Mat. 24:45) Hito nga tuig, ginlimpyohan na han mga Estudyante han Biblia an ira kalugaringon tikang ha damu nga katutdoan han buwa nga relihiyon. Bisan pa hito, nagkinahanglan la gihap hira hin dugang nga paglimpyo ha espirituwal. Pinaagi han iya matinumanon nga uripon, hinay-hinay nga iginhayag han Kristo an magkalain-lain nga selebrasyon ngan tradisyon nga sadang nira isalikway. (Prob. 4:18) Tagdon naton an pipira hini.

8. Ano an maiha na nga hinbabaroan han mga Estudyante han Biblia mahitungod ha Pasko, kondi ano an waray nira masantop?

⁸ Maiha na nga maaram an mga Estudyante han Biblia nga an Pasko pagano an gintikangan, ngan an Disyembre 25 diri an adlaw nga natawohan ni Jesus. An Zion’s Watch Tower han Disyembre 1881, nagsiring: “Damu han nakasulod ha singbahan an tikang ha Paganismo. Kondi an pagbag-o kasagaran nga ha katawagan la, tungod kay an pagano nga mga padi nagin kristiano nga  mga padi ngan an pagano nga mga selebrasyon gintawag la ha kristiano nga ngaran—ngan an Pasko usa hito.” Han 1883, an artikulo ha Watch Tower nga “Kakan-o Natawo hi Jesus?” nagsiring nga hi Jesus natawo ha temprano han Oktubre. * Kondi, waray pa masantop han mga Estudyante han Biblia an panginahanglan ha pag-undang ha pagsaurog han Pasko. Padayon nga ginsaurog ito bisan han mga membro han pamilya han Bethel ha Brooklyn. Kondi katapos han 1926, nagbag-o an mga panhitabo. Kay ano?

9. Ano an nasantop han mga Estudyante han Biblia mahitungod ha Pasko?

⁹ Tungod han maopay ngan detalyado nga pag-usisa, nasantop han mga Estudyante han Biblia nga an gintikangan han Pasko ngan an mga kustomre may kalabotan hito nagpapasipara ha Dios. An artikulo nga “An Gintikangan han Pasko,” ha The Golden Age han Disyembre 14, 1927, nagsiring nga an Pasko pagano nga selebrasyon, nakasentro ha kalipayan, ngan nag-uupod hin pagsingba ha idolo. Ginklaro han artikulo nga ito nga selebrasyon waray isugo han Kristo, ngan prangka nga nagsiring: “Tungod kay an kalibotan, an unod, ngan an Yawa uyon ha pagsarang ngan pagselebrar hito . . . nagpapakita han marig-on nga argumento nga diri ito angay saurugon han mga dedikado ha pag-alagad kan Jehova.” Diri urusahon nga an pamilya han Bethel waray na gud magsaurog han Pasko tikang hito nga Disyembre!

10. (a) Ano nga mas detalyado nga pagbuhayhag mahitungod ha Pasko an iginpresenta han Disyembre 1928? (Kitaa liwat an kahon nga “ Ano an Gintikangan Ngan Katuyoan han Pasko?”) (b) Paonan-o ginpahamangnoan an katawohan han Dios may kalabotan han mga kapyestahan ngan selebrasyon nga sadang likyan? (Kitaa an kahon nga “ Iginbuhayhag an Iba Pa nga Kapyestahan Ngan Selebrasyon.”)

¹⁰ Han sumunod nga tuig, kinarawat an mga Estudyante han Biblia hin mas detalyado nga pagbuhayhag mahitungod han Pasko. Han Disyembre 12, 1928, hi Bugto Richard H. Barber nga membro han headquarters nagdiskurso ha radyo mahitungod  han mahugaw nga tinikangan hito. Ano an reaksyon han katawohan han Dios ha klaro nga giya han headquarters? Nahinunumdoman pa ni Bugto Charles Brandlein han hiya ngan an iya pamilya inundang pagsaurog han Pasko: “Nanganugon ba kami nga diri na namon sasaurugon ito nga pagano nga selebrasyon? Waray gud! . . . Sugad la ito ha paghukas hin mahugaw nga bado.” Ito liwat an panhunahuna ni Bugto Henry A. Cantwell nga nagin nagbibiyahe nga paramangno. Hiya nagsiring: “Nalipay kami nga bayaan ito basi pamatud-an an amon gugma kan Jehova.” An maunungon nga sumurunod han Kristo andam ha paghimo han ginkikinahanglan nga pagbag-o ngan ha paglikay ha selebrasyon nga tikang ha mahugaw nga pagsingba. *—Juan 15:19; 17:14.

11. Paonan-o naton maipapakita an pagsuporta ha Mesianiko nga Hadi?

¹¹ Maopay gud nga susbaranan an matinumanon nga mga Estudyante han Biblia! Samtang ginpapamalandong an ira susbaranan, pakianhan naton an aton kalugaringon: ‘Paonan-o ko gintatagad an giya tikang ha matinumanon nga uripon? Malipayon ko ba nga ginkakarawat ngan gin-aaplikar ito?’ An aton pagkamasinugtanon nagpapakita han aton suporta ha Mesianiko nga Hadi nga nagtatagana hin napapanahon nga espirituwal nga pagkaon pinaagi han matinumanon nga uripon.—Buh. 16:4, 5.

12. Ha sulod hin damu ka tuig, paonan-o gintagad han mga Estudyante han Biblia an krus?

¹² Ha damu ka tuig, gintagad han mga Estudyante han Biblia an krus nga angayan nga simbolo han Kristianidad. Sayod hira nga diri ito angay singbahon kay maaram hira nga sayop an  idolatriya. (1 Cor. 10:14; 1 Juan 5:21) Temprano pa han 1883, an Watch Tower prangka nga nagsiring nga an “ngatanan nga klase han idolatriya ginkakangalasan han Dios.” Pero ha tinikangan, waray nira hunahunaa nga sayop an paggamit han krus. Pananglitan, iginpasigarbo nira an pagsul-ot hin krus-ngan-korona nga bar pin sugad nga pangirilal-an. Para ha ira, nagpapasabot ito nga kon magmamatinumanon hira tubtob ha kamatayon, makakarawat nira an korona han kinabuhi. Tikang han 1891, an simbolo nga krus-ngan-korona makikita ha kobre han Watch Tower.

13. Ano nga kahayag may kalabotan ha paggamit han krus an nakarawat han mga sumurunod han Kristo? (Kitaa liwat an kahon nga “ Hinay-hinay nga Kahayag Mahitungod ha Paggamit han Krus.”)

¹³ Ginhigugma gud han mga Estudyante han Biblia an simbolo nga krus-ngan-korona. Kondi pag-ikatarapos ha dekada han 1920, hinay-hinay nga nagin matin-aw ha ira an may kalabotan ha paggamit han krus. Mahitungod han 1928 nga asembleya ha Detroit, Michigan, E.U.A., hi Bugto Grant Suiter, nga ha urhi nagin membro han Nagmamando nga Lawas, nagsiring: “Ginhisgotan ha asembleya nga an krus-ngan-korona nga simbolo diri la kay waray pulos kondi sayop.” Han sumunod nga pipira ka tuig, nagkaada dugang nga pagpatin-aw. Ginklaro nga an krus waray lugar ha putli ngan limpyo nga pagsingba.

14. Paonan-o ginkarawat han katawohan han Dios an hinay-hinay nga pagpatin-aw may kalabotan ha krus?

¹⁴ Paonan-o ginkarawat han katawohan han Dios an hinay-hinay nga pagpatin-aw may kalabotan han krus? Nagpadayon ba hira paggamit han krus-ngan-korona tungod la kay birilhon na ito ha ira? Hi Lela Roberts, nga maiha na nga nag-aalagad kan Jehova, nagsiring: “Amon dayon ginbayaan ito han masantop namon kon ano an ginsisimbolohan hito.” Usa pa nga matinumanon nga bugto, hi Ursula Serenco, an nagpahayag han pagbati han damu: “Nasantop namon nga pagano ngay-an an amon ginpabilhan nga simbolo han kamatayon han aton Ginoo ngan han aton debosyon sugad nga Kristiano. Uyon ha Proberbios 4:18, mapasalamaton gud kami nga an dalan nagigin mas malamrag.” An maunungon nga mga sumurunod han Kristo nadiri gud magkaada bahin ha mahugaw ngan buwa nga mga buhat han relihiyon!

15, 16. Paonan-o naton maipapakita nga determinado kita tipigan nga limpyo an tunan-on nga bungsaran han espirituwal nga templo ni Jehova?

¹⁵ Ito liwat an aton determinasyon yana. Maaram kita nga ginagamit han Kristo an iya matinumanon ngan maaramon nga uripon sugad nga masayon makilala nga instrumento ha pagbulig ha iya katawohan nga makapabilin nga limpyo ha espirituwal. Salit, kon nakakakarawat kita hin mga pahamangno may kalabotan ha mga selebrasyon, tradisyon, o kustomre nga may impluwensya han buwa nga relihiyon, nasunod dayon kita. Pariho han kabugtoan ha temprano nga bahin han presensya han Kristo, determinado kita tipigan nga limpyo an tunan-on nga bungsaran han espirituwal nga templo ni Jehova.

¹⁶ Hinin kataposan nga mga adlaw, nagios gihap an Kristo ha diri nakikita nga paagi basi panalipdan an mga kongregasyon ni Jehova tikang hadton mahimo makahugaw han espirituwalidad hito. Paonan-o niya ginbubuhat ito? Aton paghisgotan.

17, 18. Ha ilustrasyon han pukot, ano an kahulogan han (a) paghulog han pukot, (b) pagdakop “han ngatanan nga klase hin isda,” (c) pagtirok han “mag-opay nga isda ngadto ha mga surudlan,” ngan (d) paglabog han “diri mag-opay” nga isda?

¹⁷ Ginbabantayan gud han Hadi nga hi Jesu-Kristo an mga kongregasyon dinhi ha tuna. Hiya ngan an mga anghel naghihimo hin pagbulag-bulag nga buruhaton ha paagi nga diri naton bug-os nga hinsasabtan. Iya iginhulagway ini nga buruhaton ha iya ilustrasyon han pukot. (Basaha an Mateo 13:47-50.) Ano an iginpapasabot hito nga ilustrasyon?

¹⁸ Paghulog hin “pukot . . . ha dagat.” An pukot nagrirepresentar han pagsangyaw nga ginhihimo ha kadagatan han katawohan. Pagdakop “han ngatanan nga klase hin isda.” An maopay nga sumat nakakadani ha tanan nga klase hin tawo—ha mga ginios basi magin tinuod nga Kristiano, ngan ha mga nagin interesado ha tinikangan pero waray tindugi an putli nga pagsingba. * Pagtirok han “mag-opay nga isda ngadto ha mga surudlan.” An mga makinarawaton gintitirok ha mga kongregasyon nga iginpariho ha surudlan, diin limpyo nga nakakagsingba hira kan Jehova. Paglabog han “diri mag-opay” nga isda. Hinin kataposan nga mga adlaw, ginbubulag-bulag han Kristo ngan mga anghel “an magraot ha magtadong.” * Tungod hito, an mga diri makinarawaton—adton bangin diri andam pagbaya ha sayop nga katutdoan o turumanon—diri gintutugotan nga makahugaw ha mga kongregasyon. *

19. Ano an imo masisiring han ginbubuhat han Kristo ha pagpanalipod han kalimpyo han katawohan han Dios ngan han kaputli han tinuod nga pagsingba?

¹⁹ Diri ba makalilipay hibaroan nga ginpapanalipdan han aton Hadi nga hi Jesu-Kristo an iya mga sakop? Ngan diri ba nakakaliaw hibaroan nga an iya kadasig yana para ha tinuod nga pagsingba—ngan ha tinuod nga magsiringba—pariho han iya kadasig han ginlimpyohan niya an templo han siyahan nga siglo C.E.? Daku gud an aton pagpasalamat nga nagios an Kristo ha pagpanalipod han espirituwal nga kalimpyo han katawohan han Dios ngan han kaputli han tinuod nga pagsingba! Pinaagi ha paglikay ha ngatanan nga may kalabotan ha buwa nga relihiyon, maipapakita naton an aton suporta ha Hadi ngan han iya Ginhadian.