1. Finshi Esekiele amwene ifingatupapusha?

KUTI mwacita shani nga mwamwene ifyo kasesema Esekiele amwene imyaka 2500 iyapita? Elenganyeni ukuti mwamona itempele ilikalamba kabili ilyabengeshima. Cilya mwapalama mwasanga pali na malaika uwa kumutandasha! Ili itempele lili ne mpongolo shitatu. Pa numa ya kunina amatabo 7 mwafika pa mpongolo imo. Ishi impongolo shamupapusha icine cine. Impongolo shalepa amamita 30 ukuya mu muulu. Mu mbali ya mpongolo muli imiputule ya balinshi kabili pa nceshi balilengapo utuncindu utusuma.—Esek. 40:1-4, 10, 14, 16, 22; 41:20.

2. (a) Bushe itempele lya mampalanya limininako cinshi? (Moneni na futunoti.) (b) Finshi twingasambilila ku fyali pa bwingililo bwe tempele?

² Ifi twalanda e fyali ne tempele ilyo Esekiele amwene mu cimonwa. Esekiele alilondolwele fyonse pali ili itempele, ifyo amwene fyalilembwa mu fipandwa 40 ukufika ku 48 mwi buuku lyakwe ilya kusesema. Ili itempele limininako ifyo Yehova apekanya ukupepa kwasanguluka. Fyonse ifyo Esekiele amwene ifyali mwi tempele fyalikwata ifyo fimininako mu kupepa kwesu muno nshiku. * Bushe impongolo ishitali shilangilila cinshi? Shilangilila ukuti ababa mu kupepa kwasanguluka bafwile ukulakonka amafunde ya kwa Lesa ayalungama. Ifi fine e fyo no tuncindu balengele pa nceshi twimininako, pantu limo mu Baibolo utuncindu twimininako ubulungami. (Amalu. 92:12) Inga imiputule ya balinshi ilangilila cinshi? Ilangilila ukuti abakaana ukukonka amafunde ya kwa Lesa tababasuminisha ukwingila mu kupepa kwasanguluka ukukalenga abantu bakekale umuyayaya.—Esek. 44:9.

3. Mulandu nshi Kristu atwalilila ukusangulula abantu ba kwa Lesa?

³ Bushe icimonwa ca kwa Esekiele cafikilishiwa shani? Nga fintu twasambilile mu Cipandwa 2, Yehova abomfeshe Kristu ukusangulula sana abantu bakwe ukufuma mu 1914 ukufika ku kutampa kwa 1919. Bushe apa pene e papwilile ukusangululwa kwa bantu ba kwa Lesa? Awe nakalya! Kristu alafwaya sana abantu ba kwa Yehova ukuba ne mibele iisuma, ne ci calenga ukuti atwalilile ukulabasangulula. Mulandu nshi? Pantu Kristu afumya abasambi bakwe mu calo umwaba imibele iyabipa icine cine, kabili Satana na o atwalilila fye ukwesha ukubabwesesha mu kucita ifyabipa. (Belengeni 2 Petro 2:20-22.) Natulande pa fintu fitatu umo Kristu atwalilila ukusangulula  Abena Kristu ba cine. Intanshi twalalanda pa kusangululwa mu mibele, ifyo atantika pa kuti icilonganino ciletwalilila ica busaka, e lyo ne fya kusunga indupwa.

4, 5. Citeyo nshi Satana aabomfya pa myaka iingi, kabili finshi fifumamo?

⁴ Abantu ba kwa Yehova balafwaya sana ukuba ne mibele iisuma. Ici calenga balekonka fyonse ifyo babafunda pa mibele isuma. Natumone ifya kumwenako fimo fimo.

⁵ Ubulalelale. Yehova ateyenye ukuti abaupana e bafwile fye ukulayampana mu cupo. Satana ena alenga abantu balemona ukuti ukwampana kwa mwaume no mwanakashi te kwa baupana fye epela, kabili alakubomfya nge citeyo ku bantu ba kwa Yehova pa kuti Lesa aleke ukubapaala. Mu nshiku sha kwa Balaamu, Satana alibeleleke abantu ba kwa Lesa abengi ku kucita ubulalelale, kabili muno nshiku alabeleleka sana abantu ku kucita ubulalelale.—Impe. 25:1-3, 9; Ukus. 2:14.

6. Mulapo nshi balembele mu Ulupungu lwa kwa Kalinda ulwa mu ciNgeleshi kabili baleubomfya shani, kabili cinshi balekeele ukuubomfya? (Moneni na futunoti.)

⁶ Pa kwafwa abantu ba kwa Lesa ukukanacita ubulalelale, mu Ulupungu lwa kwa Kalinda ulwa mu ciNgeleshi ulwa mu June 1908 balilembelemo umulapo uwaleti: “Konse fye uko ndi nampo nga ni pa bantu nelyo iyo, nshakulasengasenga abaume nelyo abanakashi.” * Nangu ca kuti magazini tayatile Abasambi ba Baibolo balingile ukulapa uyu mulapo, abengi balilapile kabili batumine amashina yabo pa kuti yakafume muli magazini ya Zion’s Watch Tower. Nangu ca kuti uyu mulapo walyafwile abantu abengi, ilyo papitile imyaka, bamo balilekele ukuukonka; ici calengele ukuti baufumyepo. Lelo icilonganino ca kwa Lesa calitwalilile ukumona ukuti ukuba ne mibele iisuma kwalicindama.

7. Bwafya nshi bwali mu cilonganino kabili finshi Ulupungu lwa kwa Kalinda ulwa mu ciNgeleshi ulwa mu 1935 lwalandilepo?

⁷ Satana alitwalilile ukwesha sana abantu ba kwa Lesa. Ulupungu lwa kwa Kalinda ulwa March 1, 1935, lwalandile pa bwafya ubwaleya bulekulilako mu cilonganino ca kwa Lesa. Bamo baletontonkanya ukuti nangu tabalekonka amafunde ya kwa Yehova cili fye bwino, cikulu fye baleshimikila imbila nsuma. Lelo Ulupungu lwa kwa Kalinda lwalandile ukuti: “Ukushimikila imbila nsuma, te kufwaikwa fye kweka. Ba Nte bemininako Yehova, kanshi bafwile ukuba ne mibele iisuma pa kuti tabaleseebanya Yehova no bufumu bwakwe.” Lyena icipande calandile pa fyo Abena Kristu balingile ukulamona icupo, e lyo no kwampana kwa mwaume no mwanakashi. Uku kufunda kwalyafwile abantu ba kwa Lesa ‘ukufulumuka ubulalelale.’—1 Kor. 6:18.

8. Mulandu nshi magazini ya Ulupungu lwa kwa Kalinda yakomailapo imiku ne miku pa kwishiba ubupilibulo bwakumanina ubwe shiwi lya kuti por·neiʹa?

⁸ Mu myaka ya nomba line, ifipande ifingi ifya mu Ulupungu lwa kwa Kalinda fyalilondolola bwino umwalola ishiwi lya kuti por·neiʹa, ilyo bapilibula ukuti ubulalelale ukulingana na malembo ya ciGriki. Ili shiwi lisanshamo ukwampana ukwalekanalekana ukwabipa, ukusanshako na kulya ukuba mu fiyanda umo bacitilamo ubulalelale. Ubu ubulondoloshi bwalilenga  Abena Kristu ukucingililwa ku mibele ya musango yu iyo abantu abengi muno calo baibimbamo.—Belengeni Abena Efese 4:17-19.

9, 10. (a) Bwafya nshi Ulupungu lwa kwa Kalinda ulwa mu 1935 lwalandilepo? (b) Finshi Baibolo yalanda pa kunwa ubwalwa?

⁹ Ukunwesha ubwalwa. Ulupungu lwa kwa Kalinda ulwa March 1, 1935, lwalandile pa mibele na imbi iyabipa. Lwatile: “Bamunyinefwe bamo balaya mu kushimikila nelyo mu kubomba imilimo imbi iya mu cilonganino ninshi na banwamo. Ukulingana na Baibolo, ni lilali cingalinga umuntu ukunwa ubwalwa? Bushe kuti caba fye bwino ukunwamo ubwalwa ilyo umuntu alebomba imilimo ya kwa Shikulu?”

¹⁰ Icipande cayaswike aya mepusho ukulingana ne fyo Icebo ca kwa Lesa calanda. Baibolo tayakaanya ukunwa ubwalwa ubwalinga, lelo ico yakaanya kukolwa. (Amalu. 104:14, 15; 1 Kor. 6:9, 10) Ababomfi ba kwa Lesa ukufuma na kale balibacinkulako ukuti tabalingile ukulanwamo ubwalwa ilyo balebomba imilimo ya kwa Lesa. Balishiba bwino ilyashi lya bana ba kwa Aarone abo Lesa aipeye pa mulandu wa kubika umulilo pa cipailo uo bashabasuminishe. Icalengele ukuti aba baume bacite ifyo bashabebele ni co nalimo balinwenemo, pantu pa numa ya mfwa yabo Lesa apeele bashimapepo bonse ifunde lya kuti nga balebomba imilimo ya mushilo tabalingile ukunwamo ubwalwa. (Lebi 10:1, 2, 8-11) Ababomfi ba kwa Lesa muno nshiku, balakonka uku ukufunda, tabanwamo ubwalwa ilyo balebomba imilimo ya kwa Lesa.

11. Busuma nshi bwafumamo pali ifi abantu ba kwa Lesa babasambilisha pa kukananwesha ubwalwa?

¹¹ Mu myaka ya nomba line sana, Abena Kristu balisambilila na fimbi pa kunwesha ubwalwa. Balisambilila ukuti bucakolwa kunwesha ubwalwa ica kuti te kuti umuntu e kale fye ukwabula ukunwapo. Ifi basambilila fyalyafwa abengi ukukanatekwa ubusha ku bwalwa e lyo bambi bena balilekelela fye no kunwa. Balishiba ukuti ubwalwa tabulingile ukubonawila ulupwa, ukulenga abantu babasuula, e lyo no kulenga bafilwa ukupepa Yehova mu nshila iyasanguluka.

12. Bushe Abena Kristu balemona shani ukupeepa fwaka ilyo ne nshiku sha kulekelesha shishilatendeka?

¹² Ukupeepa Fwaka. Ilyo ne nshiku sha kulekelesha shishilatendeka, ababomfi ba kwa Kristu bale-eba abantu ukuti ukupeepa fwaka kuubi. Inshita imo munyinefwe Charles Capen aibukishe icacitike ilyo akumene na munyinefwe Charles Taze Russell pa muku wa kubalilapo. Ici cali ku kupwa kwaba 1800 ninshi ba Capen bali fye ne myaka 13. Ba Capen baali pamo na ba ndume nabo batatu, lyena bakumenye ba Russell pa matabo ya cikuulwa ico baleita abati Bible House icali mu Allegheny, mu Pennsylvania. Ilyo ba Russell balepita babepwishe ukuti: “Bushe mulepepa fwaka? Naumfwa fwaka ilenunka.” Ba Capen pamo na ba ndume nabo balikeene. Ici calengele aba bamunyina beshibe bwino bwino ifyo ba Russell balemona ukupeepa fwaka. Muli magazini ya Zion’s Watch Tower iya August 1, 1895, munyinefwe Russell alandile pe lembo lya 2 Abena Korinti 7:1  ukuti: “Imona ukuti Umwina Kristu nga alepeepa fwaka mu musango uuli onse ninshi talepeela Lesa umucinshi pantu fwaka ibi ku bumi bwa muntu. . . . Takuli umuntu nangu umo uwingalatontonkanya ukuti Shikulwifwe Yesu alenunka icushi ca fwaka, nelyo alebika mu kanwa icintu icishasanguluka.”

13. Finshi fyayalwike mu 1973?

¹³ Mu 1935, Ulupungu lwa kwa Kalinda lwatile, fwaka yalibipa sana kabili takwali nangu umo uwalepepa fwaka uwali no kutwalilila ukuba pa Bethel, ukuba painiya nelyo ukuba kangalila enda. Lyena mu 1973 kwali ukwaluka na kumbi. Ulupungu lwa kwa Kalinda ulwa June 1, lwalondolwele ukuti, takwali uwali no kutwalilila ukuba mu cilonganino ca kwa Lesa nga ca kuti atwalilila ukupeepa fwaka pantu ilonaula ubumi, ilakowesha umubili kabili uulepeepa talanga ukuti alitemwa abantu banankwe. Bonse abashali na kuleka ukupeepa fwaka, bali no kubatamfya mu cilonganino. * Kristu alicitile icintu na cimbi icacindama pa kuti abantu ba kwa Lesa babe abasanguluka.

14. Cinshi Baibolo yalandapo pa mulopa, kabili cinshi calengele ukuti abantu baleubomfya sana pa kundapa?

¹⁴ Ukubomfya umulopa ukwabipa. Mu nshiku sha kwa Noa Lesa alikeenye abantu ukulya umulopa. Na mwi Funde lya kwa Mose, Lesa alyebele abena Israele ukuti tabalingile ukulalya umulopa, kabili ifi fine e fyo aebele na Bena Kristu, ukuti bafwile ‘ukulataluka . . . ku mulopa.’ (Imil. 15:20, 29; Ukute. 9:4; Lebi 7:26) Apo Satana alishiba ukuti Lesa alicindika ili ifunde, muno nshiku alisanga inshila ya kulenga abantu ukukanakonka ili ifunde. Muli ba 1800, badokota batendeke ukwesha ukundapa abantu ukubomfya umulopa. Ilyo baishibe ukuti kwaliba abantu abakwata umulopa uwapalana, batendeke ukubika sana umulopa mu bantu pa kubondapa. Mu 1937, badokota batendeke ukupoka umulopa ku bantu no kulausunga. Lyena ilyo Inkondo ya Calo iya Bubili yatendeke calengele balebomfya sana umulopa pa kundapa abantu. Tapapitile na nshita, mu fyalo fyonse batendeke ukubomfya umulopa.

15, 16. (a) Finshi Inte sha kwa Yehova balondolwele pa mulopa? (b) Bushe ukuteyanya kwayafwa shani abantu ba kwa Lesa ukutaluka ku mulopa, kabili finshi fyafumamo?

¹⁵ Mu kutendeka kwa 1944, Ulupungu lwa kwa Kalinda ulwa mu ciNgeleshi lwatile ukubikwamo umulopa cimo cine no kulya umulopa. Mu mwaka wakonkelepo, ukuteyanya kwalilondolwele bwino na fimbi ifyo Baibolo ilanda pa mulopa. Mu 1951, basabankenye amepusho ne fyasuko pa kuti abantu ba kwa Lesa bengeshiba ifya kwasuka aba ku fipatala pa mulopa. Abena Kristu ba cishinka mwi sonde fye lyonse balikonkele uku kufunda nangu ca kuti balebapumya, balibapatiilepo, no kubacushishapo. Lelo Kristu alitwalilile ukutungilila ukuteyanya kwakwe pa kuti kuleafwa abantu ba kwa Lesa. Balembele amabroshuwa ne fipande umwali ifyebo ifyo bafwailishe bwino sana.

¹⁶ Mu 1979, baeluda bamo batendeke ukulaya mu fipatala balelondolwela badokota umulandu tukaanina ukutubikamo umulopa, ifyo Baibolo yalandapo e lyo ne nshila shimbi isho  bengondapilamo ba Nte ukwabula ukubomfya umulopa. Mu 1980, baeluda mu misumba 39 iya mu United States balibasambilishe ifya kulondolwela bwino badokota pali ili lyashi. Mu kupita kwa nshita, Ibumba Litungulula lyalisuminishe ukuti Amakomiti ya Kumfwaninamo ne Fipatala yapangwe mwi sonde lyonse. Bushe aya amakomiti yaliwamyako ifintu? Pali ino nshita aba mu fipatala abengi nga nshi ukusanshako na badokota abondapa mu nshila shalekanalekana, tabapatikisha ba Nte ukubabikamo umulopa. Kabili mu fipatala ifingi nomba balasumina ukundapa abalwele ukwabula ukubabikamo umulopa. Kabili bamo basanga ukuti ukundapa kwa musango yu e kwawama sana. Ala tulatemwa icine cine nga twatontonkanya pa fyo Yesu atucingilila kuli Satana uufwaya ukutukowesha!—Belengeni Abena Efese 5:25-27.

17. Kuti twalanga shani ukuti twalitemwa pa fyo Kristu atusangulula?

¹⁷ Kanshi kuti cawama ukuipusha ukuti, ‘Bushe nalicindika ifyo Kristu atusambilisha no kutwafwa ukulakonka amafunde ya kwa Yehova ayalanda ukuti tufwile ukuba ne mibele iisuma?’ Nga twalicindika ninshi cisuma sana, lelo twilalaba no kuti Satana lyonse fye alatwesha pa kuti atufumye kuli Yehova na Yesu. Inshila imo iyo abomfya kutulenga twasuula  amafunde ya kwa Yehova. Pa kutucingilila, ukuteyanya kwa kwa Yehova lyonse kulatusoka pa mibele yabipa iyaba muli cino calo. E ico natutwalilile ukuba abalola no kulaumfwila Yehova.—Amapi. 19:20.

18. Ukulingana ne cimonwa ca kwa Esekiele, cinshi icilonganino cifwile ukucita ku batoba amafunde ya kwa Lesa ku mufulo?

¹⁸ Inshila yalenga bubili iyo Kristu asangulwilamo abantu bakwe ni mu kusunga icilonganino cakwe ica busaka. Ku ca bulanda, te bonse abaipeela kuli Yehova abatwalilila ukukonka ifyo atufunda pa mibele iisuma. Bamo ku mufulo fye balaleka ukukonka amafunde ya kwa Lesa. Bushe tufwile ukulamona shani abantu ba musango uyu? Ifyo Esekiele amwene mu cimonwa kuti fyatwafwa ukwishiba ifyo twingalamona aba musango yu. Ibukisheni shilya impongolo ishitali ishali mu cimonwa. Pa mpongolo imo na imo pali imiputule ya balinshi. Abalinshi balecingilila itempele pa kuti ‘abashasembulwilwe imitima’ belaingilamo. (Esek. 44:9) Ici cilanga ukuti abalingile ukuba mu kupepa kwa cine bantu fye abakonka amafunde yasanguluka aya kwa Yehova. E fyo caba na mu cilonganino ca Bena Kristu, abantu fye abasanguluka e bafwile ukula-ampana na Bena Kristu banabo.

19, 20. (a) Bushe Kristu ayafwa shani abantu ba kwa Lesa ukwishiba bwino ifya kupingula imilandu mu cilonganino? (b) Milandu nshi itatu iilenga ukuti abashilapila baletamfiwa mu cilonganino?

¹⁹ Mu 1892, magazini ya Zion’s Watch Tower yatile “tulingile ukutamfya Umwina Kristu mu cilonganino nga akaana ukuti Kristu uwatutuulile umweo wakwe nge cilubula [icalinganako] pa membu shesu.” (Belengeni 2 Yohane 10.) Lyena mu 1904, icitabo ca The New Creation calandile ukuti abatwalilila ukucita ifyabipa kuti balenga na bambi mu cilonganino ukulacita ifyabipa. Muli ilya myaka, umuntu mu cilonganino nga acita ulubembu, bonse mu cilonganino balepingulako umulandu. Lelo ifya musango yu te lingi fyalecitika. Mu 1944, Ulupungu lwa kwa Kalinda lwatile abakulapingula fye imilandu nomba ni bamunyinefwe abatungulula mu cilonganino. Mu 1952, Ulupungu lwa kwa Kalinda lwalilondolwele bwino ifya kubombela pa milandu mu cilonganino ukulingana ne fyo Baibolo ilanda. Lwalilondolwele no kuti umulandu uukalamba uwa kutamfisha abashilapila mu cilonganino, kufwaya ukusunga icilonganino pa kuti caba ica busaka.

²⁰ Ukufuma lilya ukufika na lelo, Kristu alitwalilila ukwafwa abantu bakwe ukwishiba ifya kupingula bwino imilandu. Baeluda balibasambilisha sana ifya kupingula imilandu ukulingana ne fyo Yehova afwaya, kabili pa kupingula balaba no mulinganya e lyo no luse. Kwaba imilandu itatu maka maka iyalenga ukuti abashilapila baletamfiwa mu cilonganino: (1) pa kuti ishina lya kwa Yehova lilapontelwa, (2) bafwaya ukucingilila aba mu cilonganino ukuti belakonkelela uulufyenye mu kucita ifyabipa, e lyo na (3) pa kuti uutamfiwe alapile nga ailuka ukuti ifyo acitile fyalibipile.

21. Busuma nshi bwaba mu kutamfya abashilapila mu cilonganino?

 ²¹ Bushe mwamona ubusuma bwaba mu kutamfya umuntu uushilapila mu cilonganino? Abena Israele abalebembuka ilingi line balelenga na bantu na bambi ukulabembuka, limo abalecita ifyabipa balefula ukucila abatemenwe Yehova. E ico ilingi line abena Israele baleleta umuseebanya pe shina lya kwa Yehova kabili aleleka ukubapaala. (Yer. 7:23-28) Lelo muno nshiku, Yehova akwata abantu abatemwa amafunde yakwe. Apo abashilapila balabatamfya, Satana tababomfya ku kulenga na bambi ukulabembuka mu cilonganino, ne ci cilenga icilonganino ukutwalilila ukuba icasanguluka, kabili Yehova alatupaala. Twilalaba filya Yehova atulaya ukuti: “Icanso conse ico bakupangila tacakabombe.” (Esa. 54:17) Bushe tulatungilila baeluda ababomba umulimo uukalamba uwa kupingula imilandu?

22, 23. Cinshi twingatashisha bamunyinefwe abaliko muli ba 1900, lelo cinshi cilanga ukuti baalingile ukubika amano na ku kusakamana indupwa shabo?

²² Inshila yalenga butatu iyo Kristu asangulwilamo abantu bakwe yakuma icupo e lyo ne ndupwa. Bushe ino nshita twalicindika sana icupo no lupwa ukucila ifyo cali kale? Ee, natulangilile: Nga twabelenga pa babomfi ba kwa Lesa aba muli ba 1900, tulatemwa nga nshi ukumona ifyo baipeeleshe mu kubombela Lesa. Balicindike sana imilimo ya kwa Lesa ukucila ifintu fyonse. Lelo balekabila ukubika amano na ku ndupwa shabo. Cinshi twalandila ifi?

²³ Bamunyinefwe abengi baleipeelesha ukuya mu kushimikila ukutali nelyo ukubomba umulimo wa kutandalila ifilonganino mu ncende sha kutali, kabili balesha indupwa shabo pa myeshi iingi. Mu nshita ya kulakonka sana ifyo Amalembo yalanda pa cupo, balekomaila pa kukanaupa nelyo ukuupwa, kabili tabalelanda sana pa fyo Abena Kristu bafwile ukucita pa kukosha indupwa shabo. Bushe ifi e fyo caba na muno nshiku? Awe nakalya!

24. Bushe Kristu ayafwile shani ababomfi ba kwa Lesa ukulakonka ifyo Baibolo ilanda pa cupo no lupwa?

²⁴ Muno nshiku, ababomfi ba kwa Lesa tabalekelesha indupwa shabo pa mulandu wa milimo ya kwa Lesa, e lyo na ku ndupwa shabo. (Belengeni 1 Timote 5:8.) E lyo kabili Kristu alasambilisha ababomfi bakwe aba cishinka ukubika amano ku cupo na ku ndupwa shabo ukulingana ne fyo Amalembo yalanda. (Efes. 3:14, 15) Mu 1978, bafumishe icitabo ca kuti, Ukulenga Ubumi bwa Lupwa Lobe Ubwa Nsansa. Pa numa ya myaka 18, basabankenye icitabo na cimbi icitila Icaba Inkaama ku Nsansa sha Lupwa. E lyo kabili mu Ulupungu lwa kwa Kalinda mulaba ifipande ifingi ifyafwa ababa mu fyupo ukulakonka ifyo Baibolo ilanda.

25-27. Finshi icilonganino casabankanya ku kwafwa abana aba mishinku yalekanalekana?

²⁵ Natulande nomba pa bacaice, bushe kwaliba ifyo basabankanya ifya kubafwa? Pa myaka iingi, icilonganino ca kwa Lesa calibika sana amano ku bacaice. Balilemba ifyebo ifisuma nga nshi ifyafwa abana ba mishinku yalekanalekana, kanshi ino nshita kwaliba impapulo ishingi sana isha bacaice. Ku ca  kumwenako, muli magazini ya The Golden Age (iyo twita ati Loleni!) iyo balelemba ukutula mu 1919 ukufika mu 1921, mwaleba icipande ca bacaice icaleti, “Juvenile Bible Study” (Isambililo lya Baibolo Ilya Bacaice.) Muli ba 1970, ifitabo fyakonkapo fyalisabankanishiwe: Ukukutika kuli Kasambilisha Mukalamba, Ubwaice Bobe—Ukukwatilamo Ifyawamisha, na Icitabo ca Malyashi ya mu Baibolo. Mu 1982, muli Loleni! mwatendeke ukuba icipande caleti “Abacaice Bepusha Ukuti,” ne ci calengele ukuti mu 1989 balembe icitabo icitila Ifipusho Abacaice Bepusha ne Fyasuko Ifingabafwa.

²⁶ Ino nshita twakwata ifitabo fibili ifitila, Ifipusho Abacaice Bepusha, ibuuku 1 na 2, kabili ici cipande ca bacaice cilaba pa Webu saiti yesu iya jw.org. Twalikwata ne citabo citila Sambilila Kuli Kasambilisha Mukalamba. Pa Webu saiti yesu paliba ifipande ifingi ifya bacaice, pamo nga amakardi pa bantu abo Baibolo yalandapo, ifya kucita pa kusambilila Baibolo ifya abana abanono sana na bakulileko, amepusho ya fyaba mu Baibolo, amavidio, amalyashi ya mu Baibolo umuba ifikope, e lyo na masambililo  ya mu Baibolo aya bana abali ne myaka itatu no kucepako. Kanshi Yesu alibika sana amano ku bana abanono ukutula fye lilya line abetile no kubafukatila ilyo ali pano isonde. (Marko 10:13-16) Afwaya ukuti abana abanono balemona ukuti balitemwikwa, kabili afwaya ukuti basambilile ifya kwa Lesa.

²⁷ Yesu afwaya no kuti abana bacingililwe. Imibele ya bantu mu calo naibipa sana, ne ci cilelenga abantu ukulaulungana abana. E ico ukuteyanya kwalisabankanya ifyebo ifyakwafwa abafyashi ukucingilila abana kuli ici cimusango cabipisha. *

28. (a) Nge fyo icimonwa ce tempele cilanga, cinshi cikabilwa pa kuti tube mu kupepa kwasanguluka? (b) Cinshi mulefwaisha ukulacita?

²⁸ Bushe tamwatemwa pali ifi Kristu atwalilila ukusangulula abantu bakwe no kubasambilisha ukulakonka amafunde ya kwa Yehova ayalungama? Tontonkanyeni na kabili pali lilya itempele Esekiele amwene mu cimonwa. Ibukisheni impongolo ishitali isho lyakwete. Lilya itempele talyali lya cine cine, lyali lya mampalanya. Lelo bushe ifyo ili itempele limininako fyalicindama kuli imwe? Tatwingila fye muli ili itempele lya mampalanya nga tuleya ku Ng’anda ya Bufumu mu kulongana, nelyo ukulabelenga Baibolo, nangu nga tuleya lyonse mu kushimikila. Pantu umuntu fye uuli onse ukubikako na bacita ifyabipa kuti balecita ifi fintu, lelo ukwabula ukwingila muli ili itempele lya kwa Yehova. Nomba nga ca kuti tulaya mu kulongana, tulabelenga Baibolo, tulashimikila, e lyo tulakonka na mafunde ya kwa Yehova ayalungama no mweo onse, ninshi twalingila muli ili itempele lya mushilo, e kutila ukupepa kwasanguluka ukwa kwa Yehova Lesa! Natutwalilile ukulamona ukuti lishuko nga nshi ukuba muli uku ukupepa kwasanguluka. Kabili natutwalilile ukulakonka amafunde ya kwa Yehova no kulaesha na maka yesu yonse ukuba aba mushilo nge fyo Yehova aba!