1. Kai si niidah Esekiel si erbahanca kita jengang?

 UGA perasanndu adi banci igejapkenndu pengalamen nabi Esekiel kira-kira 25 abad si nggo lewat? Bayangken: Ideherindu sada kompleks rumah pertoton si mbelin kal dingen mulia. Lit malekat si mbisa si nemani kam guna erdalan-dalan bas ingan si luar biasa enda! Inangkihindu pitu anak tangga gelah seh ku salah sada i bas telu gerbangna. Jengang kam paksa bengket ku bas. Gerbang e lebih 30 meter ganjangna. Idahndu lit kamar-kamar jaga i bas gerbang e. Janah lit ukiren gambar batang kurma si mejile.​—Esek. 40:1-4, 10, 14, 22.

2. (a) Kai si igambarken rumah pertoton i bas pengenehenen? (Nehen ka cataten i teruh.) (b) Kai si banci sipelajari i bas erbage hal si lit bas dalan bengket ku rumah pertoton?

² Enda me pengenehenen kerna rumah pertoton rohani. Penjelasen Esekiel seh kal tangkasna, si ituriken bas bindu 40 seh ku bindu 48 bas bukuna si risiken nubuat. Rumah pertoton e nggambarken pengaturen Jahwe guna ibadat si murni. Kerina baginna lit ertina man ibadatta bas wari-wari pendungi enda. a Kai si igambarken gerbang-gerbangna si meganjang? Enda ngingetken kita maka kalak si masuk ku bas pengaturen Jahwe guna ibadat si murni arus nggeluh sentudu ras patoken Dibata si meganjang dingen bujur. Ukiren batang kurma enda pe ngertiken hal si seri, erkiteken batang kurma maun-maun igunaken bas Pustaka si Badia guna ngertiken kebujuren. (Msm. 92:13) Uga kerna kamar-kamar jaga? Jelas me, kalak si la ngergai patoken Dibata la iijinken masuk ku bas ibadat murni si mejile enda, si mereken kegeluhen.​—Esek. 44:9.

3. Engkai maka pengikut Kristus perlu terus imurniken?

³ Uga pengenehenen Esekiel enda igenepi? Bagi si ituriken bas Pasal 2 buku enda, Jahwe nggunaken Kristus guna ngelakoken proses pemurnin khususna man umatNa mulai tahun 1914 ngasa pemena 1919. Ngasa jenda saja nge pemurnin e ilakoken? Lang! Sedekah abad si nggo lewat, terus idalanken Kristus patoken lagu langkah si badia bas Jahwe nari. Pengikut Jesus perlu terus imurniken. Engkai? Erkiteken nggo ipepulung Kristus pengikutna i bas doni si moralna la mehuli enda janah terus iusahaken Setan narik kalak enda  mulihi ku kubangen perbahanen si amoral. (Oge 2 Petrus 2:20-22.) Mari sipereksa i bas telu bagin kai saja kalak Kristen situhu-tuhu terus imurniken. Si pemena, sibahas piga-piga pemurnin moral. Si peduaken, persedian si seh kal pentingna guna njaga runggun tetap bersih, janah si pendungi eme pengaturen kerna keluarga.

4, 5. Kai cara si nggo ndekah igunaken Setan, janah kai hasilna?

⁴ Terus iusahaken umat Jahwe gelah perbahanenna bujur dingen ermoral. Erkiteken e, ialokenna petunjuk si reh tangkasna kerna si e. Perdiateken piga-piga contohna.

⁵ Perbahanen seksual si amoral. Ibahan Jahwe gelah hubungen seksual i bas kalak si nggo erjabu tetap bersih ras mehuli. Meriah iakap Setan nalahgunaken pemere si meherga enda i bas tujunna si patut e ras igantikenna alu hal-hal si meluat janah igunakenna i bas nggoda umat Jahwe gelah lanai ndatken ngena ate Dibata. Setan nggo berhasil nggunaken taktik e bas jaman Bilham ras ngeri kal akibatna, janah ipebelinna ka upayana e bas wari-wari pendungi enda.​—Bil. 25:1-3, 9; Ket. 2:14.

6. Padan kai si iterbitken bas Watch Tower, uga si e igunaken, janah ngkai maka padan e dungna lanai ipake? (Nehen ka cataten i teruh.)

⁶ Guna ngelawan upaya Setan e, iterbitken Watch Tower 15 Juni 1908 sada janji si risiken: ”Ndigan pe ras i japa pe, tetap seri perbahanenku man lawan jenis ntah bas ingan si mesuni bage pe bas ingan jelma si nterem.” b Amin gia janji e labo sada kearusen, melala kalak si ngalokenca janah ipindona gelah gelarna iterbitken bas Zion’s Watch Tower. Ertahun-tahun kenca si e, amin gia erguna man nterem jelma i bas paksa si e, kepeken janji e terjeng jadi kebiasan ngenca; emaka lanai ipake. Tapi, prinsip moralna si meganjang terus denga ipake.

7. Bas tahun 1935, masalah kai si ibahas The Watchtower, janah patoken kai si itegasken mulihi?

⁷ Serangen Setan terus reh buena. Alu terus terang ibahas The Watchtower 1 Maret 1935, masalah si terjadi i bas umat Dibata. Banci saja, lit si erpengakap maka sedekah kalak e ikut bas pelayanen, la perlu ikutina patoken moral Jahwe i bas kegeluhenna. Alu tegas ikataken The Watchtower, ”Perlu iinget maka terjeng ikut bas pendahin kesaksin labo ertina nggo ngelakoken kerina peraten Dibata. Saksi-Saksi Jahwe eme wakil-wakilNa, janah kalak e wajip ngewakili Jahwe ras kinirajanNa alu sepatutna.” Kenca si e, ibereken artikel e ka pedah si jelas kerna perjabun ras moralitas seks guna nampati umat Dibata ’nilahken perbahanen erlagu la mehuli’, ntah pe perbahanen seksual si amoral.​—1 Kor. 6:18.

8. Engkai maka megati ijelasken Menara Pengawal erti lengkap kata Junani kerna perbahanen seksual si amoral?

⁸ Bas piga-piga puluh tahun enda, Menara Pengawal megati mbahas erti si tepat kerna kata si igunaken bas Kitap-Kitap Junani guna perbahanen seksual si amoral, eme por·neiʹa. Erti kata e labo ngenca maksudna hubungen seks, tapi por·neiʹa termasuk ka erbage-bage perbahanen si amoral, eme  kerina perbahanen si nggesuh bas rumah-rumah pelacuren. Alu bage, pengikut Kristus ilindungi i bas wabah perbahanen seksual si la mehuli si nggo ngelangketi nterem jelma i doni enda gundari.​—Oge Epesus 4:17-19.

9, 10. (a) Masalah moral kai si ibahas The Watchtower 1935? (b) Kai ajaren Pustaka si Badia si seimbang kerna alkohol?

⁹ Nalahgunaken alkohol. The Watchtower 1 Maret 1935 mbahas masalah moral si debanna: ”Kepeken lit kalak si sangana i bas pengaruh [alkohol] erberita bage pe ngelakoken erbage tugas bas organisasi. Kai nina Pustaka si Badia kerna minem inemen si lit alkoholna? Patut nge nginem inemen si lit alkoholna adi e erpengaruh ku dinas sekalak jelma bas organisasi Tuan?”

¹⁰ Kata Dibata mereken pendapat si seimbang kerna inemen si lit alkoholna. Labo ilarang Pustaka si Badia nggunaken anggur ras inemen si debanna si lit alkoholna alu la erlebihen, tapi alu tegas ilarangna mabuk-mabuk. (Msm. 104:14, 15; 1 Kor. 6:9, 10) Kerna ngelakoken dinas si badia i bas pengaruh alkohol, nggo ndekah juak-juak Dibata iingetken kerna kai si terjadi man anak-anak Harun. Kalak e ndatken ukumen mate bas Dibata nari erkiteken mpersembahken api si la badia i datas batar-batar Dibata. La ndekah kenca si e teridah arah kisah e kai si banci saja erbahanca dilaki-dilaki e ngelakoken perbahanen si tuhu-tuhu la patut, erkiteken ibereken Dibata hukum si ngelarang kerina imam minem inemen si lit alkoholna paksa ngelakoken dinas si badia. (Im. 10:1, 2, 8-11) Gundari pengikut Kristus arus metenget alu ndalanken prinsip dasar e gelah ula sempat i bas pengaruh alkohol paksa ngelakoken dinas si badia.

11. Engkai maka ikataken sada pasu-pasu man umat Dibata erkiteken pengertin si ertangkasna kerna alkoholisme?

¹¹ Sedekah puluhen tahun enda, pengikut Kristus terus ipasu-pasu alu ndatken pengertin si reh tangkasna kerna alkoholisme, eme kecandun alkohol. Erkiteken pangan rohani si tepat waktu enda, melala kalak tersampati guna ngatasi keadan e alu cara si patut janah banci ikuasaina mulihi kegeluhenna. Melala ka si tersampati guna tuhu-tuhu mpedauh si e. Ise pe la banci nalahgunaken alkohol, sabap enda banci ngerampas erga diri, keluarga, ras si pentingna, hak istimewana guna mereken ibadat si murni man Jahwe.

12. Uga pengakap juak-juak Kristus kerna penggunan mbako sope wari-wari pendungi ibenaken?

¹² Penggunan mbako. Juak-juak Kristus pe nggo mulai sangsi kerna penggunan mbako sope wari-wari pendungi ibenaken. Piga-piga tahun si nggo lewat, sekalak turang seninanta si nggo metua, Charles Capen, nginget mulihi perjumpanna si pemena ras Charles Taze Russell bas pendungi abad pesepuluh siwahken. Paksa si e umur Capen 13 tahun, ia ras telu kaka-agina bas tangga Bible House i Allegheny, Pennsylvania. Paksa jumpa ras kalak e, isungkun Russell, ”Ngisap kena me? Kuanggeh bauna.” Ijelasken kalak e maka ia la ngisap. Sitik pe kalak e la sangsi nandangi pendapat turang seninanta Russell kerna si e. Bas Watch Tower 1 Agustus 1895,  ikomentari turang seninanta Russell kerna 2 Korinti 7:1, alu ngataken, ”Menurutku tep-tep kalak Kristen si nggunaken mbako i bas bentuk kai pe, la banci ipebadiakenna Dibata, ntah pe la lit gunana man bana. . . . La banci sibayangken Tuanta bau asap mbako ntah pe itamana kai si meluat bas babahna.”

13. Kai pemurnin moral si lit bas tahun 1973?

¹³ Bas tahun 1935, The Watchtower nggelari mbako ”sesa si tercemar”, janah ikatakenna maka ise pe si nalahgunaken mbako la banci tetap jadi anggota keluarga Betel ntah pe ngelayani selaku wakil organisasi Dibata i bas dahin perintis ntah pe dahin dinas keliling. Bas tahun 1973, lit denga ka pemurnin moral. Ijelasken The Watchtower 1 Juni maka Saksi Jahwe si tetap denga ngelakoken perbahanen si banci ngerehken kematen e, si ncemari, janah si la perkeleng e la banci ndatken keduduken si mehuli bas runggun. Mulai si e nari, ise pe si la nggit ngadi i bas nalahgunaken mbako banci ipedarat bas runggun nari. c Enda me salah sada tindaken Kristus si penting guna erban murni pengikutna.

14. Kai patoken Dibata kerna dareh, janah uga praktek transfusi dareh nggo jadi hal si biasa?

¹⁴ Nalahgunaken dareh. Bas jaman Nuah, ikataken Dibata maka dareh la banci ipan. IpetangkasNa ka larangen enda bas Hukum si iberekenNa man bangsa Israel, janah ibimbingNa ka runggun Kristen gelah ’mpedauh diri bas dareh nari’. (Perb. 15:20, Terjemahan Dunia Baru [NW], 29; Kej. 9:4; Im. 7:26) La ateta mamang ngidah Setan meteh uga carana bas jaman modern guna erbahan nterem jelma ngelanggar patoken Dibata enda. Iuji coba dokter transfusi dareh bas abad pesepuluh siwahken, tapi reh buena praktek enda kenca nggo ieteh kerna golongen dareh. Bas tahun 1937, dareh mulai ipepulung janah isimpan bas bank dareh, kenca si e Perang Doni II erbahan praktek enda jadi reh buena. Transfusi mis jadi hal si biasa i belang-belang doni.

15, 16. (a) Kai prinsip Saksi-Saksi Jahwe kerna transfusi dareh? (b) Uga pengikut Kristus isampati kerna masalah transfusi bage pe perawaten si la make dareh, janah kai hasilna?

¹⁵ Mulai tahun 1944, nggo icidahken The Watchtower maka ngaloken transfusi dareh situhuna cara si deban i bas man dareh. Bas tahun seterusna, prinsip si erpalasken Pustaka si Badia e itegasken ras ipetangkas. I bas tahun 1951, sada daftar si risiken penungkunen ras jabapenna iterbitken guna nampati umat Dibata erurusen ras kalak si erdahin bas bidang medis. I belang-belang doni, pengikut Kristus si setia mpertahanken keputusenna alu la mbiar amin gia megati itokohi, imusuhi, bage pe ianiaya. Tapi, terus itegu-tegu Kristus organisasina guna nikapken dukungen si iperluken. Janah nggo iterbitken erbage brosur bage pe artikel si risiken keterangen si jelas ras iriset alu mehuli.

¹⁶ Bas tahun 1979, mulai idahi piga-piga pertua melala rumah sakit guna nampati dokter gelah lebih iangkaina keputusenta ras alasen si erpalasken Pustaka si Badia, bage pe  kerna pengganti dareh si banci igunaken. Bas tahun 1980, pertua bas 39 kota i Amerika Serikat ndatken pelatihen khusus guna dahin enda. Dungna, isetujui Badan Pinpinen guna erbahan Panitia Penghubung Rumah Sakit i belang-belang doni. Lit nge kemajun si idatken kenca si e? Gundari, puluhen ribu ahli medis, termasuk dokter, ahli bedah, ras dokter anestesi, nggit nampati pasien Saksi alu ngergai pilihenta kerna perawaten si la make dareh. Reh buena rumah sakit si mereken perawaten alu la make dareh, janah lit si nganggap enda sada patoken perawaten medis si mehulina. Tuhu-tuhu luar biasa adi siukuri cara-cara si igunaken Jesus i bas ngelindungi pengikutna arah upaya Setan guna ncemari kalak e!​—Oge Epesus 5:25-27.

17. Uga banci sicidahken pengerganta nandangi cara Kristus erban murni pengikutna?

¹⁷ Perlu sisungkuni dirinta, ’Siergai nge cara Kristus i bas erban pengikutna murni, alu mereken pelatihen man banta gelah ndalanken patoken moral Jahwe si meganjang?’ Adi ue, ingetlah lalap maka terus iusahaken Setan mpedauh kita bas Jahwe ras Jesus nari alu ngkurangi pengerganta nandangi nilai-nilai moral si mehuli. Guna ngelawan pengaruh e, alu perkeleng terus ibereken organisasi Jahwe persinget  kerna dalan-dalan doni enda si amoral. Emaka tetaplah kita metenget, janah alu patuh mis sialoken pedah si erguna e.​—Kua. 19:20.

18. Pengenehenen Esekiel mereken persinget si jelas kai man banta kerna kalak si alu sengaja mberontak man patoken Dibata?

¹⁸ Bagin si peduaken i bas pemurnin moral lit hubungenna ras tindaken-tindaken si ibahan guna njaga runggun tetap bersih. Tapi sayangna, la kerina kalak si ngaloken patoken Jahwe kerna lagu langkah janah si erbakti man Dibata tetap setia man keputusenna. Dungna piga-piga kalak sambar ukurna janah alu sengaja mberontak man patoken e. Kai si arus ilakoken nandangi kalak si bage? Banci sidatken sada penjelasen i bas pengenehenen Esekiel kerna rumah pertoton rohani si ibahas bas bena-bena pasal enda. Ingetlah gerbang si meganjang e. Bas tiap dalan bengket lit kamar-kamar jaga. Rumah pertoton e ijagai penjaga-penjaga, tujunna guna mastiken gelah kalak si la ngikutken hukum Dibata la banci masuk. Enda persinget si jelas maka ibadat si murni sada hak istimewa si ibereken man kalak si iusahakenna nggeluh sentudu ras patoken Jahwe kerna lagu langkah si murni. Alu cara si seri, hak istimewa guna eribadat radu ras turang senina Kristen la terbuka man kerina jelma.

19, 20. (a) Uga Kristus alu manjar-anjar nampati pengikutna guna erbahan murni proses i bas ndungi perbahanen salah si mekelek? (b) Turiken telu alasen ngkai maka kalak si ngelakoken kesalahen si la nggit robah ipedarat bas runggun nari.

¹⁹ Bas tahun 1892, ikomentari Watch Tower maka ”nggo jadi tugasta mpedarat bas runggun nari (selaku kalak Kristen) kalak si langsung ntah pe lang, mersoken maka Kristus nggo mereken dirina jadi tebusen [erga si sebanding] man kerina jelma”. (Oge 2 Johanes 10.) Bas tahun 1904, ikataken buku The New Creation maka kalak si tetap ngelakoken perbahanen si salah banci erbahan bahaya si ncedai moral runggun. Paksa si e, kerina runggun ikut bas ”pengadilen gereja” guna mereksa perkara-perkara kerna perbahanen salah si mekelek. Tapi, si e sekali-sekali ngenca terjadi. Bas tahun 1944, icidahken The Watchtower maka si ertanggung jabap ngurus masalah si bage eme turang senina si dilaki ngenca. Bas tahun 1952, cara-cara ngurus masalah pengadilen si erpalasken Pustaka si Badia iterbitken bas The Watchtower, si mbahas kerna alasen utama mpedarat kalak si la ertobat bas runggun nari eme guna njaga runggun tetap bersih.

²⁰ Puluhen tahun kenca si e, nggo isampati Kristus pengikutna guna mpetangkas janah erban murni cara ndungi perkara-perkara kerna perbahanen salah si mekelek. Pertua Kristen ndatken pelatihen si megermet kerna uga carana ngurus masalah pengadilen si sentudu ras cara Jahwe, eme seimbang i bas ncidahken keadilen ras perkuah ate. Gundari, banci sieteh alu jelas silang-langna telu alasen ngkai maka kalak si ngelakoken kesalahen si la nggit robah ipedarat bas runggun nari: (1) njaga gelah gelar Jahwe la ihina, (2) ngelindungi runggun  i bas pencemaren erkiteken dosa si mekelek, janah (3) ngiahken kalak si ngelakoken kesalahen e gelah robah adi banci.

21. Uga pengaturen kerna mpedarat kalak bas runggun nari jadi pasu-pasu man umat Dibata?

²¹ Idahndu nge uga pengaturen e terbukti jadi pasu-pasu man pengikut Kristus gundari enda? Bas jaman Israel, kalak si ngelakoken kesalahen megati mereken pengaruh si ngerugiken man bangsa e, maun-maun jumlah kalak e buen asangken kalak si ngkelengi Jahwe ras si ngupayaken ngelakoken kai si mehuli. Akibatna, bangsa e megati erbahan gelar Jahwe ihina janah lanai ndatken ngena ate Dibata. (Jer. 7:23-28) Tapi gundari, Jahwe erurusen ras terpuk dilaki ras diberu rohani. Erkiteken kalak si tetap ngelakoken kesalahen ipedarat i bas kita nari, kalak e la iijinken jadi senjata bas tan Setan guna terus ncedai runggun si bersih. Sebalikna, pengaruh kalak e tuhu-tuhu kal ibatasi. Alu bage, selaku sada terpuk, tek kita maka banci terus sidatken ngena ate Jahwe. Ingetlah, Jahwe erjanji, ”La lit senjata si banci nakiti kam.” (Jes. 54:17) Sidukung nge alu setia pertua-pertua si ndalanken tanggung jabap si mberat i bas ndungi perkara-perkara pengadilen?

22, 23. Engkai maka sikataken bujur man turang senina Kristenta bas bena-bena abad pe-20ken, tapi ngkai maka perlu lebih seimbang kerna keluarga?

²² Bagin si peteluken si erban pengikut Kristus ndatken kegunan i bas pemurnin si terus ilakoken lit hubungenna ras perjabun bage pe keluarga. Payo nge cara rukurta si sedekah enda kerna keluarga nggo imurniken? Ue. Misalna, sanga ngoge kerna juak-juak Dibata i bas pemena abad si pedua puluhken, luar biasa kal siakap semangat kalak enda si nggit erkorban. Ngata bujur kal kita nandangi cara kalak e mpelebe dinas si badia i bas kegeluhenna. Tapi, banci ka mis siidah kerna perluna lebih seimbang. Engkai?

²³ Megati ialoken turang seninanta si dilaki tugas pelayanen ntah pe pendahin keliling si erbanca arus itadingkenna rumahna erbulan-bulan dekahna. Maun-maun, nasehat guna la erjabu itegasken lebihen asangken kai si ikataken i bas Pustaka si Badia, tapi sitik ngenca keterangen kerna carana mpegegehi perjabun Kristen. Bage denga nge keadan si terjadi bas pengikut Kristus si gundari? Lang!

24. Uga Kristus nampati rayatna si setia guna ndatken cara rukur si lebih seimbang kerna perjabun ras keluarga?

²⁴ Gundari, kewajipen keluarga la banci ikorbanken guna ndahiken tugas-tugas teokratis. (Oge 1 Timotius 5:8.) Janah, ipastiken Kristus ka gelah pengikutna si setia i doni terus ndatken pedah Pustaka si Badia si erguna ras seimbang kerna perjabun ras keluarga. (Ep. 3:14, 15) Bas tahun 1978, lit buku Membina Keluarga Bahagia. Kira-kira 18 tahun kenca si e, iterbitken buku Rahasia Kebahagiaan Keluarga. Selain si e, melala artikel i bas Sora Ermomo si ibahan guna nampati perbulangen ras ndehara ndalanken prinsip Pustaka si Badia i bas kegeluhenna.

25-27. Asum erdalanna waktu, uga kebutuhen anak-anak i bas erbage umur lebih iperdiateken?

 ²⁵ Uga kerna singuda-nguda ras anak perana? Asum waktu terus erdalan, keperlun kalak e lebih iperdiateken. Organisasi Jahwe nggo ndekah nikapken hal-hal si mehuli man anak-anak bas erbage umur. Tapi, kai si mbarenda bagi sada paleren si kitik ngenca gundari nggo jadi lau si mbelin. Misalna, artikel ”Juvenile Bible Study” lit i bas The Golden Age mulai tahun 1919 nari ngasa 1921. Kenca si e, iterbitken brosur The Golden Age ABC bas tahun 1920 ras buku Children bas tahun 1941. Bas tahun 1970-en, lit buku Mendengar kepada Guru yang Agung, Masa Remaja—Manfaatkanlah Sebaik-baiknya, ras Buku Cerita Alkitab. Bas tahun 1982, Sadarlah! mulai erbahan artikel ”Kaum Remaja Bertanya”, si ngasilken buku Pertanyaan Kaum Muda—Jawaban yang Praktis, bas tahun 1989.

²⁶ Gundari, lit dua jilid buku Kaum Muda si mbaru, janah artikel-artikelna terus itamaken bas situs Web jw.org. Lit ka buku Belajarlah dari sang Guru Agung. Situs Web e risiken melala artikel man singuda-nguda ras anak perana, termasuk kartu tokoh Pustaka, kegiaten erlajar Pustaka man anak-anak  si nggo galang ras si kitik denga, teka-teki, video, komik Pustaka, bage pe pelajaren Pustaka man danak-danak si umurna telu tahun ku teruh. Jelas me, ukur Kristus nandangi singuda-nguda ras anak perana lenga berubah mulai i bas paksa idakepna anak-anak bas abad si pemena. (Mrk. 10:13-16) Ate Jesus gelah singuda-nguda ras anak perana ikelengi janah ndatken keperlun rohani si mehuli.

²⁷ Ate Jesus pe gelah anak-anak ikawali i bas bahaya nari. Asum moral doni si la mehuli enda reh kelekna, reh buena pelecehen anak. Erkiteken si e, penjelasen si tangkas dingen terus terang nggo iterbitken guna nampati orang tua njagai anak-anakna i bas perbahanen si jahat e nari. d

28. (a) Bagi si lit i bas pengenehenen Esekiel kerna rumah pertoton, kai si perlu silakoken adi ateta ndalanken ibadat si murni? (b) Kai tekadndu?

²⁸ Luar biasa kal siakap ngukuri uga Kristus terus erban pengikutna murni, terus mereken pelatihen man kalak e gelah ngergai patoken moral Jahwe si meganjang, nggeluh sentudu ras si e, janah ndatken gunana! Bayangken ka rumah pertoton bas pengenehenen Esekiel. Ingetlah gerbangna si meganjang. Payo, rumah pertoton e labo bangunen si tuhu-tuhu, tapi bangunen rohani. Tapi, nyata nge e man banta? Bengket ku bas, labo terjeng lawes ku Bale Kinirajan ntah mbuka Pustaka si Badia ntah pe nuktuk pintun paksa erberita. Si e kerina perbahanen si banci iidah. Kalak si pekulah-kulah banci saja ngelakoken si enda tapi la tuhu-tuhu bengket ku bas rumah pertoton Jahwe. Tapi, adi silakoken e janah nggeluh sentudu ras patoken moral Jahwe si meganjang dingen ndalanken ibadat si murni alu perukuren si benar, kita nggo bengket guna ngelayani i bas ingan si seh kal badiana eme pengaturen ibadat si murni man Dibata Jahwe! Marilah terus siergai hak istimewa enda. Marilah terus siusahaken asa ngasupta ncidahken kebadian Jahwe alu terus ndalanken patokenNa si adil dingen benar!