1. Ki Ezekyel ti vwar ki enpresyonn nou?

 KI OU ti pou fer si ou ti annan sa sans pour ganny menm leksperyans ki Ezekyel apepre 25 syek pase? Mazin sa: Ou al ver en gran tanp ki pe klate. En lanz pwisan i la pe montre ou sa zoli landrwa! Ou mont sa set mars peron ki anmenn ou kot enn sa trwa baro. Ou enpresyonnen ler ou get zot larantre. Sa bann baro i apepre 30 met oter. Dan larantre ou vwar bann lasanm gard. I annan bann zoli laform pye palm lo bann pilye.​—Ezek. 40:1-4, 10, 14, 16, 22; 41:20.

2. (a) Ki sa tanp dan vizyon Ezekyel i reprezante? (Vwar osi not.) (b) Ki nou kapab aprann avek bann laspe larantre sa tanp?

² Ezekyel ti pe vwar en vizyon tanp spirityel. I ti dekrir li sitan an detay ki dan son liv profetik, sa lenformasyon i depi sapit 40 ziska sapit 48. Sa tanp i reprezant laranzman Zeova pour ladorasyon pir. Sak laspe sa vizyon i annan son sinifikasyon pour nou ki pe ador Bondye dan sa bann dernyen zour. a Ki sa bann gran baro i reprezante? Zot fer nou rapel ki sa bann ki oule swiv laranzman Zeova pour vre ladorasyon i bezwen viv an armoni avek bann standar drwat e o nivo Bondye. Menm sa bann dekorasyon pye palm i met lanfaz lo sa pwen akoz palm i souvan ganny servi dan Labib pour reprezant sa ki drwat. (Ps. 92:12) Me ki sa bann lasanm gard i reprezante? I kler ki sa bann ki pa respekte standar Bondye pa kapab antre dan son zoli tanp pour ganny lavi.​—Ezek. 44:9.

3. Akoz bann disip Kris i bezwen kontinyelman ganny rafinen?

³ Ki mannyer vizyon Ezekyel in ganny akonplir? Parey nou ti vwar dan Sapit 2 sa liv, Zeova ti servi Kris pour rafin son pep depi 1914 ziska bann premye mwan 1919. Eski i’n aret rafin zot? Definitivman non! Diran sa syek ki’n pase, Kris in kontinyen siport standar sen Zeova an rapor avek kondwit. I’n neseser pour son bann disip kontinyen ganny rafinen. Akoz? Parski Kris in rasanble son bann disip par tir zot dan sa lemonn koronpi e Satan i ankor pe kontinyen atir zot ver imoralite. (Lir 2 Pyer 2:20-22.) Annou egzamin trwa domenn kot bann vre Kretyen in kontinyelman  ganny rafinen. Premyerman, nou pou egzamin dan domenn moralite, epi en provizyon enportan ki’n ganny fer pour gard kongregasyon prop e finalman dan domenn familyal.

4, 5. Ki taktik Satan in servi depi byen lontan e avek ki rezilta?

⁴ Pep Zeova in touzour enterese pour annan en bon kondwit ek standar moral o nivo. Sanmenm sa zot pare pour touzour aksepte bann lenstriksyon kler lo sa size. Annou vwar detrwa legzanp.

⁵ Imoralite seksyel. Dapre plan Zeova, relasyon seksyel ant en msye ek en madanm marye i devret prop e satisfezan. Satan i anvi sali sa kado, i pa oule ki dimoun i pratik li dan sa fason ki Bondye i aksepte, plito i oule ki i vin en keksoz sal e i servi sa pour tant pep Zeova pour ki zot perdi laprouvasyon Bondye. Satan ti reisi byen servi sa taktik menm dan letan Balaam e i pe servi li plis ki zanmen la pandan sa bann dernyen zour.​—Nom. 25:1-3, 9; Rev. 2:14.

6. Ki serman ki ti ganny pibliye dan Watch Tower, ki mannyer i ti ganny servi e akoz i ti aret ganny servi? (Vwar osi not.)

⁶ Pour lalit avek latak Satan, Watch Tower le 15 Zen 1908 ti pibliy en serman ouswa ve ki ti enplik sa langazman: “Dan tou moman ek landrwa, mon konportman avek en dimoun lot sèks an prive pou touzour parey i ti pou leka an piblik.” b Menm si sa ve pa ti en lobligasyon, bokou ti fer li e zot ti pare pour met zot non lo en lalis ki ti ganny pibliye dan Zion’s Watch Tower. Pli tar, i ti vin kler ki sa serman, menm si i ti paret efikas dan son letan, ti’n vin zis en routin, alor dimoun ti aret fer li. Par kont, sa standar moral o nivo ki i ti reprezante i touzour ganny respekte.

7. An 1935, ki problenm The Watchtower ti adrese e ki standar i ti remet lanfaz lo la?

⁷ Latak Satan ti kontinyen entansifye. The Watchtower le 1 Mars 1935 ti koz fran lo en problenm ki ti pe ogmante parmi pep Bondye. Serten ti aparaman panse ki lefet ki zot ti pe partisip dan predikasyon, zot pa ti neseserman bezwen aplik serten standar moral Zeova dan zot lavi. The Watchtower ti fer resorti sa pwen: “En dimoun i devret rapel ki senpleman partisip dan predikasyon i pa sifi. Temwen Zeova i bann reprezantan Zeova e i en lobligasyon pour zot reprezant Zeova ek son Rwayonm dan en fason apropriye a tou moman.” Apre sa, sa lartik ti donn zot en konsey kler lo maryaz ensi ki bann standar moral dan domenn seksyel pour ki pep Bondye i “elwanny zot avek bann pratik imoral.”​—1 Kor. 6:18.

8. Akoz The Watchtower in touzour met lanfaz lo vre sinifikasyon sa mo Grek pour imoralite seksyel?

⁸ Pli resaman, The Watchtower in kontinyelman met lanfaz lo vre definisyon sa mo Grek por·neiʹa dan Labib ki ganny tradwir imoralite seksyel. Sinifikasyon sa mo i pa zis pe refer avek relasyon seksyel. Plito, por·neiʹa, i enplik tou sort kalite form bann aksyon imoral, ki an zeneral pe refer  avek tou bann aksyon endesan ki ganny fer dan bann lakaz prostitisyon. Alor, bann disip Kris in ganny proteze avek bann vis seksyel ki bokou dimoun pe pratike dan sa lemonn ozordi.​—Lir Efezyen 4:17-19.

9, 10. (a) Ki size an rapor avek moralite The Watchtower ti koz lo la an 1935? (b) Ki lansennyman ekilibre Labib i annan lo lalkol?

⁹ Labi lalkol. The Watchtower le 1 Mars 1935 ti lev en lot pwen relye avek en lot standar moral: “Pareyman, nou’n remarke ki serten i partisip dan predikasyon e desarz lezot responsabilite dan lorganizasyon anba lenfliyans [lalkol]. Dapre Labib, dan ki sirkonstans en dimoun i kapab servi diven? Eski i byen pour bwar diven ziska en degre ki i afekte servis en dimoun dan lorganizasyon Senyer?”

¹⁰ Larepons sa de kestyon ti enplik en pwennvi ekilibre lo lalkol an armoni avek Parol Bondye. Labib pa defann bwar diven ouswa lalkol avek moderasyon, me i defann bwar pour sou. (Ps. 104:14, 15; 1 Kor. 6:9, 10) Konsernan partisip dan servis sakre anba lenfliyans lalkol, depi byen lontan bann serviter Bondye in etidye sa resi konsernan bann garson Aaron ki Bondye ti met amor akoz zot ti ofer dife devan lotel dan en fason ki pa ti apropriye. En pe pli tar, sa resi i eksplike kwa ki ti’n kapab fer sa bann zonm azir dan sa fason, parski Bondye ti pas en lalwa ki ti enterdi bann pret pour servi lalkol ler zot ti pe fer servis sakre. (Lev. 10:1, 2, 8-11) Bann disip Kris i tir en leson e aplik sa prensip ozordi, zot fer sir ki zot pa partisip dan servis sakre anba lenfliyans lalkol.

11. Akoz i’n en benediksyon pour pep Bondye ganny plis konprenezon o size vin alkolik?

¹¹ Pandan sa bann dernyen deseni, bann disip Kris in ganny plis konprenezon ankor konsernan vin alkolik, en leta kot en dimoun i kontinyelman bwar en bon pe lalkol ouswa i adikt avek bwar. Gras a bann nouritir spirityel ki nou gannyen a ler, en kantite dimoun in ganny led pour sirmont sa problenm e repran kontrol lo zot lavi. Bokou lezot ankor in ganny led pour evit sa problenm an zeneral. Personn pa devret les labi lalkol sali zot repitasyon, gat zot fanmir e pli move ankor, fer zot perdi zot privilez pour partisip dan vre ladorasyon pir.

12. Ki mannyer bann serviter Kris ti konsider servi taba avan bann dernyen zour ti konmanse?

¹² Servi taba. Bann serviter Bondye ti ganny ankouraze pour aret servi taba menm avan ki bann dernyen zour ti konmanse. Plizyer lannen pase, en frer aze ki apel Charles Capen ti rapel premye fwa ki i ti zwenn Charles Russell tar dan diznevyenm syek. Sa letan, Frer Capen ti annan 13 an e li ek trwa son bann frer ti dan peron Bible House, Allegheny, Pennsylvania. Letan ki Frer Russell ti pas o bor zot, i ti demande: “Manrmay, zot pe fimen zot? Mon santi loder sigaret.” Zot ti asir li ki zot pa ti pe fimen. Sirman zot ti’n konpran tre byen son pwennvi lo sa size. Dan Watch Tower  le 1 Out 1895, Frer Russell ti fer sa komanter lo 2 Korentyen 7:1 an dizan: “Mon pa kapab konpran ki mannyer fimen oubyen servi taba i kapab pour laglwar Bondye ouswa ki byenfe i annan pour en Kretyen servi taba, dan nenport ki fason. . . . Nou pa kapab mazin nou Senyer pi sigaret ouswa met okenn keksoz ki sali lekor dan son labous.”

13. Ki standar moral ki ti ganny rafinen an 1973?

¹³ An 1935, The Watchtower ti dekrir taba konman en “zerb degoutan” e i ti montre ki sa bann ki swazir pour sik taba ouswa fim li pa ti devret reste en manm fanmir Betel ouswa servi konman en reprezantan lorganizasyon Zeova konman pionye ouswa sirveyan ki vizit bann kongregasyon. An 1973, pep Bondye ti ganny rafinen plis ankor moralman. The Watchtower le 1 Zen ti eksplike ki en Temwen Zeova ki fer sa pratik sal ki kapab anmenn lanmor e ki demontre en mank lanmour, napa en plas dan kongregasyon. Sa bann ki ti refize aret servi taba ti pou ganny ekskli. c Kris ti’n pran en lot pa enportan pour rafin son bann disip.

14. Ki standar Bondye konsernan disan e kwa ki’n fer transfizyon disan vin sitan popiler?

¹⁴ Mal servi disan. Dan lepok Noe, Bondye ti dir ki i ti mal pour manz disan. I ti konfirm son pozisyon dan Lalwa ki i ti donn nasyon Izrael e pareyman i ti demann kongregasyon Kretyen pour pa servi disan. (Akt 15:20, 29; Zen. 9:4; Lev. 7:26) I pa drol alor ki Satan in trouv en fason dan nou letan pour fer bokou dimoun dezobei sa lord sorti kot Bondye. Dan diznevyenm syek, bann dokter ti pe fer bann tes an rapor avek transfizyon disan e zot ti dekouver ki i annan diferan group disan e lanmenm ler ki transfizyon disan ti vin pli popiler. An 1937, disan ti konmans ganny anmase e stoke e pandan Dezyenm Lager Mondyal, sa pratik ti vin popiler. I pa ti tarde pour lemonn antye aksepte transfizyon disan.

15, 16. (a) Ki pozisyon Temwen Zeova ti pran an rapor avek disan? (b) Ki sipor bann disip Kris in gannyen konsernan transfizyon disan ek lezot tretman san disan e avek ki rezilta?

¹⁵ Depi byen boner an 1944, The Watchtower ti montre ki pran en transfizyon disan ti parey avek manz disan. Son lannen answit, plis detay ti ganny donnen pour eklersi sa pozisyon baze lo Labib. Ver 1951, en lalis kestyon ek larepons ti ganny pibliye pour ed pep Bondye konnen ki pour dir avek bann dokter. Dan lemonn antye, bann disip fidel Kris ti pe pran en pozisyon ferm avek kouraz, menm si souvan zot ti ganny meprize, opoze e menm persekite. Me, Kris ti kontinyen pous son lorganizasyon pour donn pep Bondye sa sipor ki zot ti bezwen. Bann brosir byen detaye ek bann lartik byen reserse ti ganny pibliye.

¹⁶ An 1979, serten ansyen ti konmans al dan bann lopital pour ed bann dokter pli byen konpran nou pozisyon ek rezon baze lo Labib e osi pour koz konsernan bann tretman medikal ki disponib dan plas servi disan. An 1980,  bann ansyen dan 39 lavil Leta-z-ini ti ganny bann formasyon spesyalize dan sa travay. Avek letan, Konsey Direkter ti donn laprouvasyon pour etablir bann Komite Lyezon Lopital dan lemonn antye. Eski sa bann zefor ti anmenn okenn rezilta dan bann lannen ki’n pase? Ozordi, plizyer dizenn milye profesyonnel medikal enkli dokter, sirizyen ek anestezyolozis pe korpere avek bann pasyan Temwen. Zot respekte nou swa pour pa servi disan. Deplizanpli, plis lopital pe ofer swen medikal san servi disan e serten i konsider li konman sa swen medikal pli o nivo. Eski pa i enkrwayab pour mazin lo sa bann fason ki Zezi in protez son bann disip kont zefor ki Satan pe fer pour sali zot?​—Lir Efezyen 5:25-27.

17. Ki mannyer nou kapab montre ki nou apresye lafason ki Kris in rafin son bann disip?

¹⁷ I byen nou demann nou lekor, ‘Eski mon apresye lafason ki Kris in rafin son bann disip e form zot pour obei bann standar Zeova ki tre o nivo?’ Si wi, annou kontinyen gard antet ki Satan i determinen pour fer nou elwannyen avek Zeova ek Zezi par fer nou mank respe pour standar moral Bondye. Pour pa les li enfliyans nou, lorganizasyon  Zeova in regilyerman donn bann bon lavertisman ek rapel lo latitid imoral sa lemonn. Annou touzour reste vizilan, aksepte e obei sa bann bon konsey.​—Prov. 19:20.

18. An rapor avek sa bann ki volonterman rebel kont standar Bondye, ki rapel kler vizyon Ezekyel i donn nou?

¹⁸ En lot domenn kot pep Bondye in ganny rafinen moralman i enplik bann laranzman ki’n ganny pran pour gard kongregasyon prop. Malerezman, pa tou sa ki aksepte standar Zeova lo kondwit e ki dedye zot lekor avek Bondye ki fidelman gard zot promes. Serten in finalman sanze e zot volonterman rebel kont sa bann standar. Ki arive avek sa bann dimoun? Nou kapab trouv en lendikasyon dan vizyon Ezekyel lo tanp spirityel parey i’n ganny diskite o konmansman sa sapit. Ou rapel sa bann gran baro! Dan sak larantre, i ti annan bann lasanm gard. Bann gard ti pou protez tanp pour anpes sa bann ki zot “leker pa ti’n sirkonsi” pour antre. (Ezek. 44:9) Sa i en rapel kler ki partisip dan vre ladorasyon i en privilez ki zis bann ki oule viv dapre standar pir Zeova i annan. Dan menm fason, pa tou dimoun ki annan sa privilez pour asosye avek lezot Kretyen dan ladorasyon.

19, 20. (a) Ki mannyer Kris in gradyelman ed son bann disip pour rafin lafason ki pese grav i ganny trete? (b) Ki sa trwa rezon i annan pour ekskli en peser ki pa repantir?

¹⁹ Depi dan bann lannen 1892, Watch Tower ti dir ki i “nou devwar pour ekskli sa bann ki’n direkteman ouswa endirekteman renye ki Kris ti donn son lekor konman en ranson [oubyen pri] pour tou dimoun.” (Lir 2 Zan 10.) An 1904, sa liv The New Creation ti rekonnet ki sa bann ki persiste dan sa ki mal i en gran danze akoz zot en move lenfliyans pour leres manm kongregasyon. Sa letan, kongregasyon antye ti partisip dan sa ki nou ti apel “church trials,” (zizman legliz) pour egzamin sityasyon dimoun ki’n fer bann fot grav. Toudmenm, bann ka parey ti rar. An 1944, The Watchtower ti montre ki zis bann frer responsab ki ti merit tret sa bann sityasyon. An 1952, The Watchtower ti etablir en prosedir baze lo Labib pour rezourd bann kestyon disiplin. I ti met lanfaz lo en rezon enportan pour ekskli sa bann ki pa repantir e sa se pour kit kongregasyon prop.

²⁰ Plizyer deseni depi sa, Kris in ed son bann disip pour klarifye e rafin lafason ki serten fot grav ti ganny trete. Bann ansyen i ganny byen formen pour donn disiplin dan lafason ki Zeova i oule, avek en pwennvi ekilibre lo lazistis ek mizerikord. Ozordi, nou vwar klerman omwen trwa rezon ki en dimoun ki pa repantir i ganny ekskli dan kongregasyon: (1) pour pa sali non Zeova, (2) pour protez kongregasyon e anpes li ganny kontaminen avek pese grav e (3) motiv sa enn ki’n fer pese pour repantir si sa i posib.

21. Dan ki fason sa laranzman pour ekskli en peser i en benediksyon pour pep Bondye?

 ²¹ Eski ou vwar ki mannyer sa laranzman konsernan ekskli en dimoun dan kongregasyon in en benediksyon pour bann disip Kris ozordi? Dan letan lontan, se bann ki ti pe fer sa ki mal ki ti enfliyans nasyon Izrael pour fer parey zot, par ler i ti annan plis zot ki sa bann ki ti kontan Zeova e ki ti pe fer zefor pour fer sa ki drwat. Alor, sa nasyon ti souvan anmenn repros lo non Zeova e perdi son laprouvasyon. (Zer. 7:23-28) Me ozordi, se bann zonm ek fanm spirityel ki form parti pep Zeova. Lefet ki bann ki kontinyelman fer sa ki mal i ganny retire parmi nou, dan en sans, Satan pa kapab servi zot pour enfliyans lezot dan kongregasyon e sali li. Plito, zot napa bokou lenfliyans. Dan sa fason, Zeova i kontinyen beni nou konman en group. Pa oubliye, Zeova ti promet: “Napa en zarm ki pou ganny formen kont ou ki pou reisi.” (Iza. 54:17) Eski ou fidelman siport bann ansyen ki annan sa gro responsabilite pour donn disiplin?

22, 23. Akoz nou rekonesan anver nou bann frer ek ser Kretyen o konmansman ventyenm syek e ki levidans i annan ki i ti neseser pour annan en balans an rapor avek lafanmir?

²² En trwazyenm domenn kot disip Kris in ganny rafinen pour zot prop byennet se an rapor avek maryaz ek lavi fanmir. Eski nou pwennvi lo fanmir in ganny rafinen diran bann lannen ki’n pase? Wi. Par egzanp, kan nou lir konsernan bann serviter Bondye o konmansman dan ventyenm syek, nou zis enpresyonnen e menm sirprann par zot leta lespri sakrifis. Nou vreman rekonesan par lafason ki zot ti met zot servis sakre premye dan zot lavi. Me, an menm tan, nou’n kapab vwar ki i ti neseser pour annan en balans. Ki mannyer?

²³ I pa ti drol pour bann frer aksepte bann privilez dan predikasyon ouswa dan servis sirveyan ki ti fer zot lwen avek zot lakour pour plizyer mwan alafwa. Par ler, dimoun ti ganny ankouraze pour pa marye, menm avek plis lanfaz ki sa ki Labib i vreman dir e i ti napa gran lenformasyon lo konman pour fer en maryaz Kretyen vin pli for. Eski sanmenm sa ki egziste parmi bann disip Kris ozordi? Non!

24. Ki mannyer Kris ti ed son bann disip pour ganny en pli bon pwennvi lo maryaz ek lafanmir?

²⁴ Ozordi, bann privilez teokratik pa devret pli enportan ki responsabilite familyal. (Lir 1 Timote 5:8.) Deplis, Kris in fer sir ki son bann disip fidel lo later i ganny konsey ek led spirityel efikas e ekilibre an rapor avek maryaz ek lavi fanmir. (Efe. 3:14, 15) An 1978, liv Making Your Family Life Happy ti sorti an Angle. Apepre 18 an pli tar, sa liv Sekre pour en Fanmir ere ti sorti. An plis ki sa, dan Latour Veyer, i’n annan plizyer lartik ki’n ganny fer pour ed bann koup marye aplik bann prensip Labib dan zot relasyon.

25-27. Ki mannyer bann zanfan diferan laz in ganny pran swen avek diran bann lannen ki’n pase?

 ²⁵ Me ki pour dir konsernan bann zenn? Diran bann lannen ki’n pase zot pa’n ganny oubliye. Depi bokou lannen, lorganizasyon Zeova in pibliy bann bon nouritir spirityel pour bann zenn diferan laz. Sa ki oparavan ti en pti gout in ozordi zour vin en gro larivyer. Par egzanp, i ti annan sa seri lartik “Juvenile Bible Study” ki ti sorti dan The Golden Age depi 1919 ziska 1921. Apre sa, i ti annan brosir The Golden Age ABC an 1920 e liv Children an 1941. Dan bann lannen 1970, sa liv Listening to the Great Teacher, Your Youth​—Getting the Best out of It ek Mon liv Zistwar Labib ti sorti an Angle. An 1982, dan Awake! i ti konmans annan lartik “Young People Ask” e finalman, sa liv Questions Young People Ask​—Answers That Work ti ganny pibliye an 1989.

²⁶ Konmela, nou annan de volim liv Young People Ask, ki adapte avek nou lepok e sa seri i touzour pe ganny mete lo nou sit jw.org. Nou osi annan sa liv Ekout sa Gran Ansennyan. Lo nou sit Enternet i annan bann diferan led pour bann zenn, enkli kart bann personnaz dan Labib, bann aktivite lo Labib  pour bann pti zanfan ek bann pli gran, bann puzzle, video ek lenformasyon dan laform desen ensi ki bann leson pour bann zanfan trwa-z-an e mwens. I kler ki pwennvi Kris lo bann zanfan pa’n sanze depi ki i ti pran zot dan son lebra dan premye syek. (Mark 10:13-16) I oule ki bann zenn parmi nou i santi zot byen nouri spirityelman e ki nou kontan zot.

²⁷ Zezi i osi oule ki bann zanfan i ganny proteze. Anmezir sa move lemonn degradan in vin pli imoral, i’n annan bokou plis labi zanfan. Pour sa rezon, bann sours lenformasyon kler e direk in ganny pibliye pour ed bann paran protez zot zanfan avek sa pratik visye. d

28. (a) Parey vizyon Ezekyel lo tanp i montre, kwa ki neseser si nou oule partisip dan ladorasyon pir? (b) Ki ou determinen pour fer?

²⁸ Eski pa i gou pour mazinen ki mannyer Kris in kontinyen rafin son bann disip, form zot pour respekte, viv annakor e benefisye avek bann standar moral Zeova ki o nivo? Ou ankor rapel sa tanp ki Ezekyel ti vwar dan en vizyon? Eski ou rapel sa bann gran larantre? I vre, sa tanp i pa fizik, me i enn spirityel. Toudmenm, eski nou vwar li reel? Nou antre dan sa tanp, pa zis ler nou al Lasal Rwayonm ouswa par ouver Labib ouswa tap laport en dimoun dan predikasyon. Tousala i bann aksyon ki nou kapab vwar. En dimoun ipokrit i kapab fer sa bann keksoz san ki i antre dan tanp Zeova. Par kont, si nou fer bann keksoz parey e an menm tan viv an armoni avek standar moral o nivo Zeova e partisip dan vre ladorasyon avek en bon kondisyon leker, savedir nou pou’n antre e servi dan sa landrwa pli sakre, sa laranzman pour vre ladorasyon Zeova. Annou touzour apresye sa privilez spesyal ki nou annan. Annou kontinyen fer tou sa ki nou kapab pour reflekte sentete Zeova par obeir son bann standar drwat!