1. Ezekiyɛli ye mun lo ye min b’an kabakoya?

 KIRA Ezekiyɛli ye yelifɛn min ye a saan 2 500 ɲɔgɔn ye nin ye, miiri k’a filɛ ko i ɲɛɛ b’o la: I be donna Alabatoso belebeleba dɔ kɔnɔ min be manamanana. Mɛlɛkɛ barikaman dɔ be yen ani a b’o yɔrɔ kabakoman yirala i la! Donda saba lo be o batoso la. I be yɛlɛ yɛlɛyɛlɛnan wolonfila kan ka taga don donda kelen yɔrɔ la. O dondaw yenin b’i kabakoya kosɔbɛ! U kelen kelen bɛɛ be mɛtɛrɛ 30 ɲɔgɔn bɔ. I donna tuma min na, i ye soo kɔrɔsibagaw ka boonw ye. Samasen dɔw be yen minw bɔnin be tamarosun cɛɲumaninw ma.​—Ezek. 40:​1-4, 10, 14, 16, 22; 41:20.

2. a) Ezekiyɛli ye Alabatosoba min ye yelifɛn na, o ye mun lo tagamasiɲɛ ye? (jukɔrɔla kunnafoni fana lajɛ). b) An be kalan jumanw lo sɔrɔ Alabatosoba dondaw cogoya koo la?

² Kira Ezekiyɛli ye Alabatosoba min ye yelifɛn na, o tɛ batosoba yɛrɛ yɛrɛ ye. Nka, Jehova ye labɛn min kɛ batoli senuman kama, o Alabatoso ye o lo tagamasiɲɛ ye. Ezekiyɛli ye min ye, a y’o koo walawala kosɔbɛ a ka kitabu sapitiri 40 ka taga se 48nan na. O batosoba cogoya kelen kelen bɛɛ ɲɛsinna an ka batoli koo ma laban loon nunu na. a Donda belebeleba nunu be mun lo yira? U b’a yira ko minw ye batoli senuman sira ta, u ka ɲi ka Ala ka sariyaw labato, o minw kɔrɔtanin lo ani u tilennin lo. Samasen minw bɔnin be tamarosunw ma, olu fana b’o lo yira sabu Bibulu kɔnɔ, tamarosun ye tilenninya lo tagamasiɲɛ ye (Zab. 92:13). Soo kɔrɔsibagaw ka boonw ye mun lo tagamasiɲɛ ye? U b’a yira ka gwɛ ko mɔgɔ minw tɛ Jehova ka sariya labato, olu tɛ se ka batoli senuman sira ta. O batoli ye labɛn ɲumanw ye minw be ɲɛnamaya di mɔgɔ ma.—Ezek. 44:9.

3. Mun na Krista ka kalandenw mako b’a la ka saniya tuma o tuma?

³ Ezekiyɛli ye yelifɛn min ye, o kɛra tiɲɛnko ye cogo di? An y’a ye gafe nin sapitiri 2nan na ko Jehova tɛmɛna Krista fɛ k’a sagokɛlaw saniya cogo kɛrɛnkɛrɛnnin na. A y’o kɛ k’a ta saan 1914 ka taga se saan 1919 daminɛ na. Yala o saniyali danna o dɔrɔn lo ma wa? Ayi, a ma dan o ma. Saan kɛmɛkulu tɛmɛnin kuru bɛɛ la, Krista tora ka Jehova ka sariya senumanw lafasa a kɛtɔ k’a ka kalandenw saniya tagamacogo ta fan fɛ. Mun na o kɔrɔtanin lo? Sabu a b’u lajɛnna ka bɔ duniɲa nin kɔnɔ min  be tiɲɛna ka taga tagamacogo ta fan fɛ. Ka fara o kan, Sutana be Yezu ka kalandenw lasunna tuma o tuma walisa u k’u yɛrɛ nɔgɔ ni kakalayakow ye (2 Piyɛri 2:​20-​22 kalan). An ka koo saba lajɛ o minw na Krista tora k’a ka kalanden sɔbɛw saniya. A fɔlɔ, a y’u saniya tagamacogo ta fan fɛ. A filanan, a ye labɛn dɔ sigi sen kan walisa kafo saniyanin ka to. Ani a sabanan, a ye labɛn dɔ bila sen kan denbayamɔgɔw kama.

4, 5. Kabi saan caaman, Sutana be tɛmɛna fɛɛrɛ juman lo fɛ walisa ka Ala sagokɛlaw minɛ jaan kɔnɔ, ani mun lo sɔrɔla o la?

⁴ Jehova sagokɛlaw b’u jija tuma bɛɛ ka kɛ ni tagamacogo ɲuman ye. O kama, ni Ala ye cikan gwɛnin dɔ di o koo la, u be sɔn k’a sira tagama. An ka misali damanin lajɛ.

⁵ Kakalayakow. Jehova y’a latigɛ ko cɛnimusoko ka kɛ furuɲɔgɔnw dama lo cɛ. O cogo la, a bɛnnin lo ani o be furuɲɔgɔnw ninsɔn diya. Nka, Sutana b’a ɲini k’o nilifɛn ɲuman kɛ fɛɛn nɔgɔnin ye. A be Jehova sagokɛlaw lasun walisa u ka baara jugu kɛ n’o nilifɛn ye janko Jehova ka ban u la. Galen Balamu ka wagati la, o fɛɛrɛ ye sanga sɔrɔ Sutana bolo yɛrɛ le! Ani laban loon nunu na, a be baara kɛra n’o ye ka tɛmɛ sanga ni wagati bɛɛ kan.—Nɔnb. 25:​1-3, 9; Yir. 2:14.

6. Ŋaniya juman lo tun be sɔrɔ Kɔrɔsili Sangaso kɔnɔ? Mɔgɔw tun b’o ŋaniya jati cogo di ani mun na a laban, u tun t’a labato tugun? (jukɔrɔla kunnafoni fana lajɛ).

⁶ Walisa k’an yɛrɛ tanga Sutana ka jaanw ma, ŋaniya dɔ tara saan 1908, zuwɛnkalo tile 15 ka Kɔrɔsili Sangaso kɔnɔ (angilikan na). O ŋaniya yɔrɔ dɔ tun ko: “Minw tɛ n’ cɛɲɔgɔnw wala n’ musoɲɔgɔnw ye, n’ be n’ daa di ko ni n’ be n’ kelen ni n’ kelen n’u ye tuma o tuma ani yɔrɔ o yɔrɔ, n’ bena to ka koow kɛ i ko n’ b’a kɛ cogo min na jama cɛma.” b Hali ni waajibi tun tɛ k’o ŋaniya ta, balima caaman y’u daa di o koo la ani u ko u tɔgɔ ka sɛbɛ Kɔrɔsili Sangaso kɔnɔ. Nafa sɔrɔla o ŋaniya la saan caaman kɔnɔ. Nka kɔfɛ, mɔgɔw tun t’a labatora tugun sabu a kɛra dalakuma dama lo ye. O bɛɛ n’a ta, o ŋaniya tun basiginin lo sariyakolo minw kan tagamacogo ta fan fɛ, an tora k’u lafasa.

7. Saan 1935, Kɔrɔsili Sangaso kumana gwɛlɛya juman lo koo la, ani a segira sariyakolo juman lo kan?

⁷ Sutana tora ka kɔrɔbɔli gwan Ala sagokɛlaw kun. Saan 1935, zuwɛnkalo tile fɔlɔ ka Kɔrɔsili Sangaso kumana ka gwɛ koo dɔ la min tun be kɛra Ala sagokɛlaw cɛma. Dɔw tun b’a miiri ko n’u be u seen don waajuli baara la bɛrɛbɛrɛ, waajibi tɛ u ka Jehova ka sariyaw labato tagamacogo ta fan n’u b’u kelen na. A tun fɔra o Kɔrɔsili Sangaso kɔnɔ ko: “Ala t’a ɲini an fɛ dɔrɔn an k’an seen don waajuli baara la. Jehova Seerew y’a ka lasigidenw ye minkɛ, waajibi lo u fɛ u ka nɔɔrɔ la Ala n’a ka Masaya kan.” O kɔ, o barokun ye ladili gwɛninw di furuko ani cɛnimusoko la. O kuun tun ye ka Ala sagokɛlaw jija u ka “bori jatɔya ɲa!”—1 Kor. 6:​18, Biblu Ala ta Kuma.

8. Gɛrɛkikan kumaden min ɲɛsinna kakalayakow ma, mun na Kɔrɔsili Sangaso tora ka segi o kumaden kɔrɔ kan?

⁸ Gɛrɛkikan kumaden min bayɛlɛma ko kakalaya julakan na, o ye pɔrneya lo ye. A saan caaman ye nin ye, Kɔrɔsili Sangaso tora ka sinsin o kumaden kɔrɔ kan. O kumaden ma ɲɛsin cɛnimusoko yɛrɛ yɛrɛ dɔrɔn lo ma. A ɲɛsinna fana kɛwale  nɔgɔnin sifa bɛɛ ma, i n’a fɔ minw be kɛ jatɔyasow kɔnɔ. O cogo la, Krista y’a ka kalandenw latanga kakalayakow ma, o minw fanin lo duniɲa kɔnɔ bi.—Efɛzikaw 4:​17-​19 kalan.

9, 10. a) Saan 1935 ka Kɔrɔsili Sangaso kumana koo wɛrɛ juman koo la? b) Bibulu be mun lo fɔ dɔrɔmin koo la?

⁹ Dɔrɔmin kojugu. Saan 1935, mɛkalo tile 15nan ka Kɔrɔsili Sangaso kumana koo wɛrɛ koo la min ɲɛsinna an tagamacogo koo ma. A ko: “An y’a kɔrɔsi fana ko dɔw b’u seen don waajuli baara la wala u be kunkanbaara wɛrɛw dafa Jehova ka ɔriganisasiyɔn kɔnɔ k’a sɔrɔ u ye dɔrɔ min kojugu. Ka kɛɲɛ ni Bibulu ka fɔta ye, koo jumanw lo la dɔrɔmin daganin lo? Yala a bɛnnin lo kafoden dɔ ka dɔrɔ min fɔɔ a b’a bali k’a ka kunkanbaara dafa a ɲɛɛ ma Jehova ka ɔriganisasiyɔn kɔnɔ wa?”

¹⁰ Kɔrɔsili Sangaso basigira Bibulu kan k’o ɲiningali jaabi. A y’a yira Bibulu be dɔrɔ koo jati k’a dama kɛɲɛ cogo min na. Bibulu ka fɔta la, koo jugu tɛ ka diwɛn wala dɔrɔ wɛrɛ min k’a dama kɛɲɛ. Nka kojuguba lo k’a min k’a dama tɛmɛ (Zab. 104:14, 15; 1 Kor. 6:​9, 10). Yala Ala sagokɛlaw be se ka dɔrɔ min ani k’u seen don Ala ka baara la wa? Siɲɛ caaman na, u y’an hakili jigi Arɔn dencɛw koo la. Ala y’u faga sabu u ye wusulan jɛni a ɲakɔrɔ k’a sɔrɔ o tun bɛnnin tɛ. N’a sɔrɔ dɔrɔ lo tun y’o cɛɛw bila o la. Mun an b’o fɔ? Sabu dɔɔni o kɔ, Ala ye sariya dɔ di, o min na a y’a fɔ ko sarakalasebagaw man kan ka dɔrɔ min n’u be u ka baara kɛra (Lev. 10:​1, 2, 8-11). Bi, an b’o sariya ka miiriya jɔnjɔn sira tagama. O kama, an tɛ dɔrɔ min n’an ka ɲi ka Ala baara dɔ kɛ.

11. Ala sagokɛlaw ye faamuyali ɲuman sɔrɔ dɔrɔmin koo la minkɛ, o ye u nafa cogo di?

¹¹ A saan caaman ye nin ye, Krista ka kalandenw ye faamuyali ɲuman sɔrɔ dɔrɔmin kojugu koo la ani o y’u nafa. Ka dɔrɔ min kojugu, o kɔrɔ ko k’a min ka su, k’a min caaman, wala ka kɛ dɔrɔ ka jɔɔn ye. Jehova ka ɔriganisasiyɔn ye sɛbɛw bɔ wagati bɛnnin na minw ye mɔgɔ caaman dɛmɛ ka dɔrɔmin kojugu dabila ani ka ɲɛnamaya kɛ cogo ɲuman na. O ye mɔgɔ caaman dɛmɛ fana k’u yɛrɛ tanga dɔrɔmin kojugu ma. Mɔgɔ si man ɲi k’a to dɔrɔmin kojugu k’a ka danbe bɔ a kan ani k’a ka denbaya ka hɛɛrɛ nagasi. Min yɛrɛ kɔrɔtanin lo kosɔbɛ, o ye ko a man ɲi k’a to dɔrɔ k’a bali ka batoli senuman lase Jehova ma.

12. Sanni laban loonw ka daminɛ, Krista ka kalandenw tun be sigarɛtimin jati cogo di?

¹² Sigarɛtimin. Sanni laban loonw yɛrɛ ka daminɛ, Krista ka kalandenw tun tɛ sɔn sigarɛtimin ma. Balimacɛ cɛkɔrɔba dɔ min tɔgɔ ko Charles Capen, a saan caaman ye nin ye, ale hakili jigira siɲɛ fɔlɔ min na ale ni Charles Taze Russell ye ɲɔgɔn kunbɛn. O kɛra dɔɔni ka kɔn saan 1900 ɲɛ, Alegeni dugu la, Pɛnsilvani mara la. O y’a sɔrɔ balimacɛ Capen tun be ni saan 13 ye ani ale n’a kɔrɔcɛ n’a dɔgɔcɛ fila tun be “La Maison de la Bible” ka ɛskaliyew kan. Balimacɛ Russell tɛmɛtɔ, a y’u ɲininga ko: “Kanbeleninw, aw be sigarɛti lo minna wa? N’ be sigarɛti kasa mɛnna.” U ko ayi. Sisan, u tun b’a ka miiriya lɔn sigarɛtimin koo la. Saan 1895, utikalo tile fɔlɔ ka Kɔrɔsili Sangaso kɔnɔ (angilikan na) balimacɛ Russell ye 2 Korɛntikaw  7:1 ɲɛfɔ ko: “Ka sigarɛti min, n’ ɲɛɛ t’a la cogo min o be se ka kerecɛn nafa wala ka nɔɔrɔ la Ala kan. . . . An tɛ se k’a miiri ko sigarɛti kasa be se ka bɔ Yezu la, wala ko a be sɔn ka fɛɛn nɔgɔnin dɔ don a daa la.”

13. Saan 1973, mun lo tun yirala ka gwɛ Kɔrɔsili Sangaso kɔnɔ?

¹³ Saan1935, Kɔrɔsili Sangaso ye taba weele ko “biin nɔgɔnin” ani a y’a fɔ ko mɔgɔ min b’a latigɛ ka taba mugan wala ka sigarɛti min, o tigi tɛ se ka kɛ Betɛli ka denbayamɔgɔ dɔ ye. A tɛ se ka kɛ Ala ka ɔriganisasiyɔn ka lasigiden dɔ fana ye, i n’a fɔ piyɔniye wala kɔrɔsibaga tagamakɛla. Saan 1973, sɛtanburukalo tile fɔlɔ ka Kɔrɔsili Sangaso y’a yira ka gwɛ ko sigarɛtimin be mɔgɔ nɔgɔ, a be mɔgɔ faga ani a be bɔnɛ lase tɔɔw ma. O lo kama a y’a ɲɛfɔ ko ni Jehova Seere be to ka sigarɛti min, a tɛ ɲɛyirali ɲuman ye kafo kɔnɔ. Minw be ban ka sigarɛtimin wala tabamugan dabila, olu ka ɲi ka gwɛn ka bɔ kafo kɔnɔ. c Krista ye koo kɔrɔtaninba dɔ lo kɛ walisa k’a ka kalandenw saniya.

14. Ala ye sariya juman lo sigi joli koo la? Mun lo y’a to mɔgɔ caaman y’a daminɛ ka joli don u fari la?

¹⁴ Ka baara kɛ ni joli ye cogo bɛnbali la. Nuhun ka wagati la, Ala y’a fɔ ko koo jugu lo ka joli dumu. A segira k’o fɔ sariya kɔnɔ, a y’o min di Israɛldenw ma ani a y’a fɔ kerecɛnw ye fana ko u man kan ka “joli dumu.” (Kɛw. 15:20, 29; Zɛnɛzi 9:4; Lev. 7:​26). A tɛ bari an na k’a ye ko bi bi nin na, Sutana ye fɛɛrɛ dɔ sɔrɔ ka mɔgɔ caaman lasun u ka o sariya tiɲɛ. Saan 1800 wagati la, dɔgɔtɔrɔw tun man teli ka joli don mɔgɔ fari la sabu u tun b’o furakɛcogo kɛra k’a filɛ le. Nka tuma min na u bɔra a kala ma ko joli sifa dɔw be taga ɲɔgɔn fɛ, u y’a daminɛ ka joli don mɔgɔ caaman fari la. Saan 1937, u y’a daminɛ ka joli bɔ mɔgɔw fari la k’a mara ani kɛlɛba filanan wagati la, mɔgɔ caaman ye joli don u fari la. Dɔɔni o kɔ, o furakɛcogo jɛnsɛnna duniɲa kuru bɛɛ kɔnɔ.

15, 16. a) Ka joli don mɔgɔ fari la, Jehova Seerew ye mun lo latigɛ o koo la? b) Krista ka kalandenw ye dɛmɛ juman lo sɔrɔ ka ɲɛsin jolidon koo ma, ani nafa juman lo sɔrɔla o la?

¹⁵ Kabi saan 1944, a yirala Kɔrɔsili Sangaso kɔnɔ ko ni mɔgɔ ye joli don a fari la, a be komi o tigi y’a dumu le. O miiriya basiginin lo Bibulu kan. Saan 1945, u segira o miiriya kan ani u y’o ɲɛfɔ ka gwɛ. Saan 1951, Jehova ka ɔriganisasiyɔn ye ɲiningali dɔw n’u ka jaabiliw bɔ sɛbɛ dɔ kan walisa ka Ala sagokɛlaw dɛmɛ k’u ka lannakow ɲɛfɔ dɔgɔtɔrɔw ye joli koo la. Duniɲa kuru bɛɛ la, Krista ka kalanden kantigiw y’u jaa gwɛlɛya ka ban ka joli don u fari la, hali k’a sɔrɔ mɔgɔw tun b’u lɔgɔbɔ, k’u kɛlɛ wala ka fariyakow kɛ u la yɛrɛ. Nka, u mako tun be dɛmɛ min na, Krista tora ka tɛmɛ a ka ɔriganisasiyɔn fɛ k’o lase u ma. O ɔriganisasiyɔn ye kitabuninw ni barokun dɔw bɔ minw be joli koo ɲɛfɔ ka ɲɛ.

¹⁶ Saan 1979, diinan mɔgɔkɔrɔ dɔw y’a daminɛ ka taga bɔ dɔgɔtɔrɔw ye dɔgɔtɔrɔsow la walisa k’an ka miiriya ɲɛfɔ u ye bɛrɛbɛrɛ joli koo la. U tun be basigi Bibulu kan k’o kɛ ani u tun be baro kɛ furakɛcogo wɛrɛw koo la. Walisa k’o kunkanbaara dafa, saan 1980 Etazini mara la, dugu 39 ka diinan mɔgɔkɔrɔw ye fɔrɔmasɔn kɛrɛnkɛrɛnnin sɔrɔ. Kɔfɛ, Koow Ɲɛnabɔla Jɛnkulu  ye sira di walisa kɔmite dɔ ka sigi duniɲa kuru bɛɛ kɔnɔ min bena balimaw dɛmɛ jolintanya furakɛli ta fan fɛ (CLH). Yala nafa sɔrɔla o jijaliw la wa? Bi, dɔgɔtɔrɔ waa caaman lo sɔnnin be ka Jehova Seerew furakɛ ani u tɛ joli don u la. Dɔgɔtɔrɔso caaman kɔnɔ, u be sɔnna sisan ka mɔgɔw furakɛ ani u tɛ joli don u la. Dɔw yɛrɛ b’a jati ko o furakɛcogo lo ɲɔgɔn tɛ yen. Yezu y’a ka kalandenw latanga cogo min na walisa Sutana kana u nɔgɔ tagamacogo ta fan fɛ, n’an miirila o la, yala o t’an kabakoya wa?​—Efɛzikaw 5:​25-​27 kalan.

17. Krista b’a ka kalandenw saniyara cogo min na, an be se k’a yira cogo di ko an b’a waleɲuman lɔn o kosɔn?

¹⁷ A ka ɲi an k’an yɛrɛ ɲininga ko: “Krista b’a ka kalandenw saniyara cogo min na a kɛtɔ k’u dɛmɛ u ka tugu Jehova ka sariya tilenninw kɔ tagamacogo ta fan fɛ, yala ne b’a waleɲuman lɔn o kosɔn wa?” An k’a to an hakili la ko Sutana b’a ɲinina tuma bɛɛ ka an ni Jehova ani Yezu ka jɛnɲɔgɔnya nagasi. A b’o kɛ, a kɛtɔ k’an lasun ka Jehova ka sariyaw mafiɲɛya tagamacogo ta fan fɛ. Walisa Sutana kana se k’an lafili, Jehova ka ɔriganisasiyɔn be to k’an lasɔmi duniɲa nin ka kakalayakow la ani k’an ladi tuma o tuma. O la, an ka sɔn o ladili nafamanw ma ani an k’u sira tagama.​—Talenw 19:20.

18. Minw be ban ka Jehova ka sariyaw labato, Ezekiyɛli ka yelifɛn be mun lo yira an na olu koo la?

¹⁸ Koo filanan min na Krista y’a ka kalandenw saniya tagamacogo ta fan fɛ, o ɲɛsinna kafo saniyali koo lo ma. Minw be sɔn Jehova ka sariyaw ma tagamacogo ta fan fɛ ani u b’u yɛrɛkun di Jehova ma, a fɔ man di nka u dɔw tɛ to kantigiya la. A laban, u be u ka miiriya yɛlɛma ani u be tugu ka Ala ka sariyaw tiɲɛ. Mun lo ka ɲi ka kɛ o ɲɔgɔnna mɔgɔw la? Min ka ɲi ka kɛ u la, o dɔ be sɔrɔ yelifɛn dɔ la Ezekiyɛli ye min ye batosoba koo la. An kumana o batosoba lo koo la sapitiri nin daminɛ na. I hakili to o Alabatosoba donda jamanjanjanw na. O donda kelen kelen bɛɛ la, soo kɔrɔsibagaw ka boonw tun be yen. O kɔrɔsibagaw tun be Alabatosoba kɔrɔsi walisa minw “te [Ala] sago kɛ,” olu si kana don yen (Ezek. 44:9). O b’an hakili jigi ko minw b’u jija ka Jehova ka sariya senumanw labato tagamacogo ta fan fɛ, olu dɔrɔn lo be se ka batoli senuman sira tagama. O cogo kelen na, mɔgɔ bɛɛ lo tɛ se ka fara Yezu ka kalandenw kan ka Ala ka baara kɛ.

19, 20. a) Krista y’a ka kalandenw dɛmɛ cogo di dɔɔni dɔɔni walisa u ka se ka jurumubaw koo ɲɛnabɔ cogo fisaman na? b) Jurumukɛla minw tɛ nimisa, kuun saba jumanw lo kosɔn u be gwɛn ka bɔ kafo kɔnɔ?

¹⁹ A tun fɔra saan 1892 ka Kɔrɔsili Sangaso kɔnɔ (angilikan na) ko: “Mɔgɔ minw b’a fɔ daa la wala u b’a yira u ka kɛwalew fɛ ko u lanin t’a la ko Krista y’a niin di ka kɛ kunmabɔsara ye bɛɛ kosɔn, an ka kunkanbaara lo k’olu gwɛn ka bɔ kafo kɔnɔ.” (2 Zan 10 kalan). Saan 1916, a tun fɔra gafe La Nouvelle Création kɔnɔ ko minw tɛ u ka kɛwale juguw dabila, olu ka teli ka kafoden tɔɔw kunnatiɲɛ. O wagati la, ni mɔgɔ dɔ tun ye jurumuba kɛ, a ka “kitiko tun be ɲɛnabɔ legilizi ɲɛfɛ.” Kafoden bɛɛ b’a niin don o kitiko la. Nka o koow tun be kɛ tuma kelen kelen le. Saan 1945, a tun fɔra Kɔrɔsili Sangaso kɔnɔ ko kunkanbaara be balimacɛ minw fɛ kafo kɔnɔ, olu dɔrɔn lo ka ɲi k’o kitikow ɲɛnabɔ. Saan 1952, u basigira Bibulu kan k’a yira Kɔrɔsili Sangaso kɔnɔ kitikow ka ɲi ka ɲɛnabɔ cogo min na. Jurumukɛla minw tɛ nimisa, o Kɔrɔsili Sangaso y’a yira ka gwɛ kuun jɔnjɔn min kama u ka ɲi ka gwɛn ka bɔ kafo kɔnɔ. O be kɛ walisa kafo saniyanin ka to.

²⁰ Kabi o wagati, Krista y’a ka kalandenw dɛmɛ k’a faamu jurumubaw koo ka ɲi ka ɲɛnabɔ cogo min na ani a y’u dɛmɛ fana k’o kɛcogo fisaya. Diinan mɔgɔkɔrɔw be fɔrɔmasɔn ɲuman sɔrɔ walisa ka kitikow ɲɛnabɔ i ko Jehova b’a fɛ cogo min na. U b’o kɛ ni tilenninya ani makari ye. Jurumukɛla min nimisanin tɛ, an b’a faamu sisan ko o tigi be gwɛn ka bɔ kafo kɔnɔ kuun saba ɲɔgɔn kosɔn: 1) walisa Jehova tɔgɔ kana nɔgɔ, 2) walisa o jurumuba kana jɛnsɛn kafo kɔnɔ, ani 3) ka jurumukɛla dɛmɛ a ka nimisa n’a labɛnnin lo k’o kɛ.

21. Ka jurumukɛla gwɛn ka bɔ kafo kɔnɔ, mun na o be Ala sagokɛlaw nafa?

²¹ Ka jurumukɛla gwɛn ka bɔ kafo kɔnɔ, yala i ɲɛɛ b’a la fɛɛn min kama o be Krista ka kalandenw nafa bi wa? Galen Israɛl jamana na, kojugukɛlaw tun ka teli ka nɔɔ jugu to jamanadenw kan. Minw tun be Jehova kanu ani u tun b’a ɲini ka koo  tilennin kɛ, tuma dɔw la yɛrɛ o kojugukɛlaw tun be caya ka tɛmɛ olu kan. O kama, tuma caaman na, Israɛldenw tun be Jehova tɔgɔ nɔgɔ ani Jehova tun be ban u la (Zer. 7:​23-​28). Nka bi, Jehova ma siya tigitigi dɔ lo sugandi k’a kɛ a sagokɛlaw ye. Mɔgɔ minw b’a latigɛ k’a sago kɛ ani k’a ka cikanw labato, u bɔyɔrɔw n’u ka siyaw tɛ kelen ye. Jurumukɛla minw tɛ nimisa, olu be gwɛn ka bɔ kafo kɔnɔ. O la, Sutana tɛ se ka tɛmɛ o mɔgɔw fɛ tugun ka kafo nɔgɔ ani ka koo jugu wɛrɛ kɛ kafodenw na. O b’a to jurumukɛlaw tɛ nɔɔba to kafodenw kan. O cogo la, an lanin b’a la ko Jehova bele b’a sagokɛlaw jamakulu kanu. A ye layidu ta ko: “Kɛlɛkɛminan fɛɛn o fɛɛn dilanna i kama, o si tena foyi ɲa.” (Ezayi 54:17). Ka kitikow ɲɛnabɔ, o ye kunkanbaaraba lo ye diinan mɔgɔkɔrɔw fɛ. Yala an b’u dɛmɛ kantigiya la wa?

22, 23. An kerecɛnɲɔgɔn minw ye ɲɛnamaya kɛ saan 1900 fan fɛ, an b’u waleɲuman lɔn mun lo kosɔn? Nka, mun lo b’a yira ko u tun ka ɲi ka koow kɛ k’a dama kɛɲɛ denbaya koo la?

²² Krista y’a ka kalandenw saniya koo sabanan min na, o ɲɛsinna furu ani denbaya koo lo ma. An tun be denbaya koo jati cogo min na, yala yɛlɛmani donna o la wa? Ɔnhɔn. Misali la, Ala sagokɛla minw ye ɲɛnamaya kɛ saan 1900 fan fɛ, n’an y’u ka maana kalan, o b’an dusukun sɔrɔ ani o yɛrɛ b’an kabakoya. O balimaw tun be ni yɛrɛsaraka hakili ye. An b’u waleɲuman lɔn kosɔbɛ sabu u ye Ala sago kɛli kɛ u ɲɛnako fɔlɔ ye. Nka, a gwɛnin lo ko u tun ka ɲi ka koow kɛ k’a dama kɛɲɛ. Mun na do?

²³ Balimacɛw tun ka teli ka bɔ u ka denbayaw kɔrɔ kalo caaman kɔnɔ walisa ka taga waajuli baara wala kafokulu kɔrɔsili baara kɛ. Tuma dɔw la, an ka gafew fana tun be koo dɔw fɔ minw tun be mɔgɔw fari faga furu koo la k’a sɔrɔ Bibulu t’o lo fɔ. Ka fara o kan, u tun tɛ ladili bɛrɛ di furu sabatiko la. Nka koow be di bi do?

24. Krista y’a ka kalanden kantigiw dɛmɛ cogo di walisa u ka furu ani denbaya koo jati k’a dama kɛɲɛ?

²⁴ Bi, balimaw be ni kunkanbaara minw ye kafo kɔnɔ, u t’a jati k’o kɔrɔtanin lo ka tɛmɛ u ka kunkanbaaraw kan denbaya kɔnɔ (1 Timote 5:8 kalan). Ka fara o kan, tuma o tuma Krista b’a janto walisa a ka kalanden kantigiw ka ladili nafamanw sɔrɔ minw basiginin lo Bibulu kan. O ladiliw b’an dɛmɛ ka koow jati k’a dama kɛɲɛ furu ani denbaya koo la (Efɛz. 3:14, 15). Saan 1979, gafe Comment s’assurer une vie de famille heureuse bɔra. Saan 17 o kɔ, gafe wɛrɛ bɔra min tɔgɔ ko Le secret du bonheur familial. Ka fara o kan, barokun caaman be sɔrɔ Kɔrɔsili Sangaso kɔnɔ minw labɛnna walisa ka furuɲɔgɔnw dɛmɛ u ka Bibulu ka sariyakolow sira tagama u ka furu kɔnɔ.

25-27. Jehova ka ɔriganisasiyɔn tora ka denmisɛnw mako wasa bɛrɛbɛrɛ cogo di Alako ta fan fɛ?

²⁵ Nka denmisɛnw do? Saanw tɛmɛtɔ, Jehova ka ɔriganisasiyɔn tora k’u mako wasa bɛrɛbɛrɛ Alako ta fan fɛ. Kabi wagatijan, o ɔriganisasiyɔn be fɛɛn nafamanw labɛn  denmisɛnw ye. A daminɛ na, fɛɛn damanin dɔrɔn lo tun labɛnna u kama. Nka sisan, u ka ca kosɔbɛ. Saan 1919-1920, barokun nin tora ka bɔ L’Âge d’Or kɔnɔ angilikan na: Bibulukalan kanbelew ni sunguruw ye. Saan 1920, kitabunin nin bɔra: L’ABC de L’Âge d’Or (angilikan na). Saan 1942, gafe dɔ bɔra min barokun ko: Enfants. Saan 1970 ka taga se saan 1980, gafe nunu fana bɔra: Écoutez le grand Enseignant, Votre jeunesse : Comment en tirer le meilleur parti ani Bibulu ka maanaw. Saan 1982, barokun nin y’a daminɛ ka bɔ Réveillez-vous ! kɔnɔ: Les jeunes s’interrogent. Saan 1989, u basigira o barokunw kan ka gafe nin bɔ: Les jeunes s’interrogent. Réponses pratiques.

²⁶ Bi, gafe Les jeunes s’interrogent kitabu fila lo be yen. Ani, o barokun ɲɔgɔnna kuramanw be to ka bɔ an ka site jw.org kan. Gafe nin fana b’an fɛ: Écoute le grand Enseignant. An ka site web kan, fɛɛn caaman labɛnna denmisɛnw ye, i n’a fɔ: karti dɔw minw be fɔlɔfɔlɔ mɔgɔ dɔw kofɔ, baara kɛtaw denmisɛnw, kanbelew ani sunguruw ye. Fɛɛn nunu fana be sɔrɔ yen: tulonkɛfɛnw, videwow, desɛn animew ani denmisɛn minw  ma tɛmɛ saan saba kan, olu ka Bibulu kalansiraw. O b’a yira ka gwɛ ko Krista ka miiriya ma yɛlɛma denmisɛnw koo la, u bele koo ka gwɛlɛ a ma. O yɛrɛ lo tun y’a lasun k’u ta a bolo la saan kɛmɛkulu fɔlɔ la (Mariki 10:13-16). A b’a fɛ denmisɛnw, kanbelew ani sunguruw k’a ye ko ale ni Jehova b’u kanu ani u b’a fɛ u ka balo ka ɲɛ Alako ta fan fɛ.

²⁷ Yezu b’a fɛ fana denmisɛnw latanganin ka to. Duniɲa nin be tiɲɛna ka taga minkɛ, mɔgɔ caaman be ben denmisɛnw kan ka cɛnimusoko kɛ n’u ye. O kama, Jehova ka ɔriganisasiyɔn ma munumunu, a ye ladili gwɛninw di bangebagaw ma walisa u k’u deenw latanga o kojuguba ma. d

28. a) Ezekiyɛli ye min ye batosoba koo la, o b’a yira ko an ka ɲi ka mun ni mun lo kɛ walisa ka se k’an seen don batoli senuman na? b) I cɛsirinin lo ka mun lo kɛ?

²⁸ Krista tora k’a ka kalandenw saniya. Jehova ye sariyakolo kɔrɔtanin minw di tagamacogo ta fan fɛ, Krista tora k’an dɛmɛ walisa an k’u labato ani ka nafa sɔrɔ u la. N’an miirila o koo la, o b’an dusukun sɔrɔ yɛrɛ le! Ezekiyɛli ye Alabatosoba min ye yelifɛn na, miiri o la tugun. I hakili to a donda jamanjanjanw na. Tiɲɛn lo ko batosoba yɛrɛ yɛrɛ tɛ dugukolo kan. Nka, yala tiɲɛnko lo ele ɲɛɛ na wa? Ka taga Masaya Boon na, ka Bibulu dayɛlɛ, wala ka daaw kɔkɔ waajuli la, o dɔrɔn lo t’a yira ko an donna o batosoba kɔnɔ. O ye ɲɛnayeli koow dama lo ye, ani hali filankafo be se k’u kɛ. K’a sɔrɔ a tɛna don Jehova ka batoso kɔnɔ abada. Nka n’an b’o koow kɛ ani o wagati kelen na an be ɲɛnamaya kɛ ka kɛɲɛ ni Jehova ka sariyakolo kɔrɔtaninw ye, o lo b’a yira ko an donna yɔrɔw bɛɛ la senuman na ani ko an be Jehova batora yen! Ka fara o kan, an ka ɲi fana k’an sen don batoli senuman na ni ŋaniya ɲuman ye. Jehova Ala ye labɛn minw kɛ batoli senuman kama, o yɔrɔ y’o lo tagamasiɲɛ ye. An ka to k’a yira tuma bɛɛ ko an ninsɔn ka di kosɔbɛ ka kɛ n’o nɛɛmaba ye! An ka to k’an seko bɛɛ kɛ fana ka Jehova ka senumanya yira an kɛtɔ k’a ka sariyakolo tilenninw labato!