1. Ano ang nakita ni Ezequiel nga nagpahayanghag sa aton?

 ANO abi kon maeksperiensiahan mo ang nakita ni propeta Ezequiel mga 2,500 na ka tuig ang nagligad? Handurawa nga nagapasulod ka sa daku kag nagabadlak nga templo. May anghel didto nga magalibot sa imo sa sining makahalawhaw nga lugar! Nagsaka ka sa pito ka halintang nga nagapadulong sa isa sa tatlo ka gawang. Nahayanghag ka sa sini nga mga gawang. Nagataas ini sing mga 30 ka metro. Sa sulod sang kada gawang, may hulot sang mga bantay. Ang mga haligi may matahom nga mga larawan sang palma.​—Ezeq. 40:1-4, 10, 14, 16, 22; 41:20.

2. (a) Ano ang ginarepresentar sang gintagna nga templo? (Tan-awa man ang footnote.) (b) Ano ang mahimo naton matun-an sa mga bahin sang mga gawang sang templo?

² Amo ini ang gintagna nga espirituwal nga templo. Ginlaragway ini sing detalyado ni Ezequiel sa kapitulo 40 asta 48 sang iya libro. Ini nga templo nagarepresentar sa kahimusan ni Jehova sa putli nga pagsimba. Ang kada bahin sini may kahulugan sa aton pagsimba sa sining katapusan nga mga adlaw. a Ano ang ginalaragway sang mataas nga mga gawang? Ginapahanumdom sini sa aton nga ang mga nagasulod sa kahimusan ni Jehova para sa putli nga pagsimba dapat magkabuhi nahisuno sa iya mataas kag matarong nga mga talaksan. Amo man sini ang ginarepresentar sang mga laragway sang palma, kay sa Biblia nagakahulugan man ini kon kaisa sang pagkatadlong. (Sal. 92:12) Kamusta naman ang hulot sang mga bantay? Maathag nga ginapakita sini nga ang mga wala nagatahod sa mga talaksan sang Dios wala ginapasulod sa sining matahom kag nagahatag-kabuhi nga dalanon sang putli nga pagsimba.—Ezeq. 44:9.

3. Ngaa ang mga sumulunod sang Cristo nagakinahanglan sing padayon nga pagpuro?

³ Paano natuman ang palanan-awon ni Ezequiel? Suno sa nakita naton sa Kapitulo 2, gingamit ni Jehova ang Cristo para puruhon ang iya katawhan halin sang 1914 asta sa temprano sang 1919. Nauntat na bala ang pagpuro pagkatapos sadto? Wala gid! Sa nagligad nga siglo, padayon nga ginapakataas sang Cristo ang balaan nga mga talaksan ni Jehova sa paggawi. Gani, kinahanglan sang iya mga sumulunod ang padayon nga pagpuro. Ngaa? Bangod samtang ginatipon sang Cristo ang iya sumulunod paggua sa sining mahigko sa moral nga kalibutan, wala man nagauntat si Satanas sa pagganyat sa ila nga magligidligid liwat sa  lunang sang imoralidad. (Basaha ang 2 Pedro 2:20-22.) Binagbinagon naton ang tatlo ka bahin diin ang matuod nga mga Cristiano sigesige nga ginapuro. Una, binagbinagon naton ang pila ka moral nga pagpuro, ikaduha, ang importante nga aman para huptan nga matinlo ang kongregasyon, kag ikatlo, ang kahimusan sang pamilya.

4, 5. Ano nga pahito ang madugay na nga ginagamit ni Satanas, kag daw ano sia ka madinalag-on?

⁴ Ang katawhan ni Jehova interesado gid sa moral kag matadlong nga paggawi. Gani, ginbaton nila ang mas maathag nga instruksion parte sa sini. Binagbinagon naton ang pila ka halimbawa.

⁵ Seksuwal nga imoralidad. Gintuyo ni Jehova nga mangin matinlo kag matahom ang seksuwal nga kaangtanan sang mag-asawa. Pero gusto gid ni Satanas nga gub-on ining hamili nga regalo paagi sa paghimo sini nga mahigko kag paggamit sini para sulayon ang katawhan ni Jehova agod madula nila ang iya kahamuot. Nangin madinalag-on si Satanas sa paggamit sini nga pahito sang panahon ni Balaam, kag labi niya ini nga ginagamit sa katapusan nga mga adlaw.—Num. 25:1-3, 9; Bug. 2:14.

6. Ano nga panaad ang ginbalhag sa Watch Tower, paano ini gingamit, kag ngaa gindula ini sang ulihi? (Tan-awa man ang footnote.)

⁶ Para mapamatukan ang mga pagsulay ni Satanas, ang Hunyo 15, 1908, nga Watch Tower nagbalhag sing isa ka panaad nga nagalakip sining mga tinaga: “Sa tanan nga tion kag sa tanan nga lugar, kon paano ko ginapakig-angutan ang isa nga tuhay sing sekso sa publiko, amo ko man sia pakig-angutan sa pribado.” b Bisan pa wala ginaobligar ang tanan nga tumanon ini nga panaad, madamo ang naghimo sini kag naghatag pa gani sang ila ngalan para ibalhag sa Zion’s Watch Tower. Pagligad sang mga tinuig, bisan pa ini nga panaad nakabulig sa madamo, natalupangdan nga nangin ritwal na lamang ini gani gindula sang ulihi. Pero, ang mataas nga mga prinsipio sa moral nga ginarepresentar sini padayon gihapon nga ginasunod.

7. Ano nga problema ang ginpatalupangod sang Watchtower sang 1935, kag ano nga talaksan ang ginpadaku sini liwat?

⁷ Labi nga nagbaskog ang mga pag-atake ni Satanas. Ang Marso 1, 1935, nga Watchtower prangka nga nagpatalupangod sang nagalala nga problema sa katawhan sang Dios. Abi sang iban, basta nagapakigbahin ang isa sa ministeryo indi na sia kinahanglan magsunod sa mga talaksan ni Jehova sa iya pribado nga kabuhi. Gani, ang Watchtower prangka nga nagsiling: “Dapat dumdumon sang isa nga indi lang basta pagbantala ang ginapatuman. Ang mga saksi ni Jehova mga tiglawas niya, amo nga may obligasyon sila nga irepresentar sing nagakaigo si Jehova kag ang iya ginharian.” Dayon naghatag man ini sing maathag nga laygay parte sa pag-asawahay kag moral, sa amo ang katawhan sang Dios nabuligan nga ‘malagyo sa seksuwal nga imoralidad.’—1 Cor. 6:18.

8. Ngaa sulitsulit nga ginapadaku sang Watchtower ang bug-os nga kahulugan sang Griegong tinaga para sa seksuwal nga imoralidad?

⁸ Sining nagligad lang nga mga dekada, sulitsulit nga ginpadaku sang Watchtower ang husto nga kahulugan sang tinaga nga gingamit sa Griegong Kasulatan para sa seksuwal nga imoralidad —por·neiʹa. Wala lamang ini nagakahulugan sing pagpakigsekso. Sa baylo, nalakip sa por·neiʹa ang nanuhaytuhay nga imoral nga buhat nga ginahimo sa balay sang prostitusyon. Sa amo, ang mga sumulunod sang Cristo ginaamligan batok sa seksuwal nga kahigkuan nga ginahimo sang madamo karon sa kalibutan.—Basaha ang Efeso 4:17-19.

9, 10. (a) Ano nga isyu ang ginpatalupangod sang Watchtower sang 1935? (b) Ano ang balanse nga panudlo sang Biblia sa pag-inom sang alkohol?

⁹ Pag-abuso sa alkohol. Ang Marso 1, 1935, nga Watchtower may ginpatalupangod pa nga isa ka isyu: “Natalupangdan man nga may pila nga nagapakigbahin sa pagbantala kag iban pa nga katungdanan sa organisasyon nga nakainom [sang makahulubog nga ilimnon]. Ano bala nga paggamit sang alak ang ginapahanugutan sa Kasulatan? Nagakaigo bala nga gamiton ang alak tubtob sa punto nga maapektuhan ang pag-alagad sang isa sa organisasyon sang Ginuo?”

¹⁰ Ginbinagbinag sa sabat ang balanse nga pagtamod sang Pulong sang Dios sa makahulubog nga mga ilimnon. Wala ginapakamalaut sang Biblia ang haganhagan nga pag-inom pero ginapakamalaut gid sini ang pagpahubog. (Sal. 104:14, 15; 1 Cor. 6:9, 10) May kaangtanan sa paghimo sang sagrado nga pag-alagad nga nakainom, ang mga alagad sang Dios madugay na nga ginapahanumdom parte sa mga anak ni Aaron nga ginpatay sang Dios bangod naghalad sila sang kalayo sa altar sang Dios nga indi tugot sa kasuguan. Sa masunod nga mga bersikulo, nangin maathag ang posible nga rason kon ngaa nakasala sila, kay naghatag ang Dios sing kasuguan nga nagadumili sa tanan nga saserdote sa pag-inom samtang nagahimo sang sagrado nga pag-alagad. (Lev. 10:1, 2, 8-11) Bilang pag-aplikar sa prinsipio sini, ang mga sumulunod sang Cristo karon nagahalong gid nga indi mag-inom samtang nagapakigbahin sa sagrado nga pag-alagad.

11. Paano ginpakamaayo ang katawhan sang Dios bangod sa ila nabaton nga dugang nga paathag parte sa alkoholismo?

¹¹ Sining nagligad lang nga mga dekada, ang mga sumulunod sang Cristo nakabaton pa gid sang dugang nga paathag parte sa alkoholismo, ang bisyo nga nagalakip sang sigesige kag sayop nga paggamit sang alkohol. Bangod sining suno sa tion nga espirituwal nga pagkaon, madamo ang nabuligan nga malandas ini nga bisyo kag nakontrol liwat ang ila kaugalingon. Madamo pa ang nabuligan nga mauntat sing bug-os ini nga bisyo. Indi dapat pagtugutan sang bisan sin-o ang pag-abuso sa alkohol nga magguba sang ila dignidad, pamilya, kag labaw sa tanan, sang ila pribilehiyo nga makapakigbahin sa putli nga pagsimba kay Jehova.

12. Paano gintamod sang mga alagad sang Dios ang paggamit sang tabako bisan antes pa magsugod ang katapusan nga mga adlaw?

¹² Paggamit sang tabako. Ang mga alagad sang Cristo may negatibo na nga pagtamod parte sa paggamit sang tabako bisan antes pa magsugod ang katapusan nga mga adlaw. Madamo nga tinuig ang nagligad, nadumduman pa sang tigulang nga utod nga si Charles Capen, ang ila una nga pagkitaay ni Charles Taze Russell sa ulihi nga bahin sang ika-19 nga siglo. Si Brother Capen, nga 13 anyos pa lang sadto, kag ang iya tatlo ka utod nga lalaki ara sa hagdan sang Bible House sa Allegheny, Pennsylvania. Sang  naglabay sa ila si Brother Russell, namangkot sia: “Nagapanigarilyo bala kamo? May napanimahuan ako nga aso.” Ginsilingan nila sia nga wala sila nagapanigarilyo. Nag-athag gid sa ila ang iya pagtamod sa sini. Sa Watch Tower sang Agosto 1, 1895, ginkomentuhan ni Brother Russell ang 2 Corinto 7:1: “Indi ko makita kon paano makahimaya sa Dios, ukon kon ano ang makuha sang isa ka Cristiano sa paggamit sang tabako. . . . Indi naton mahunahuna ang aton Ginuo nga nagapahubot ukon nagabutang sa iya baba sing bisan ano nga mahigko.”

13. Ano ang dugang pa nga pagpuro sa moral sang 1973?

¹³ Sang 1935, gintawag sang Watchtower ang tabako nga “mahigko nga tanom” kag nagsiling nga wala sing isa nga nagamaskada ukon nagapanigarilyo ang makapabilin nga katapo sang pamilya Bethel ukon magtiglawas sa organisasyon sang Dios subong payunir ukon nagalakbay nga ministro. May dugang pa gid nga pagpuro sa moral sang 1973. Ginpaathag sang Watchtower sang Hunyo 1 nga wala sing Saksi ni Jehova nga makapabilin nga may maayo nga tindog sa kongregasyon samtang nagahimo sining makamamatay, mahigko, kag indi mahigugmaon nga buhat. Ang mga wala nag-untat sa sayop nga paggamit sang tabako gin-disfellowship. c Isa pa ini ka importante nga tikang nga nahimo sang Cristo sa pagpuro sa iya mga sumulunod.

14. Ano ang talaksan sang Dios parte sa dugo, kag paano nangin kinaandan na lang ang pagtughong sang dugo?

¹⁴ Sayop nga paggamit sang dugo. Sang panahon ni Noe, nagsiling ang Dios nga sayop ang pagkaon sang dugo. Ginsulit niya ini sa Kasuguan sang pungsod sang Israel, kag ginsugo man niya ang Cristianong kongregasyon nga “maglikaw . . . sa dugo.” (Binu. 15:20, 29; Gen. 9:4; Lev. 7:26) Indi makapakibot nga sa sining moderno nga tion, nakakita gid sing paagi si Satanas para lapason sang madamo ining sugo sang Dios. Ginaeksperimentuhan na sang mga doktor ang pagtughong sang dugo sang ika-19 nga siglo, pero sang natukiban nga may lainlain nga blood type, naglapnag pa gid ini nga pamaagi. Sang 1937, nagsugod ang pagtipon kag pagtago sang dugo sa mga blood bank, kag ang pagtughong nangin popular na gid bangod sa Bug-os Kalibutan nga Inaway II. Wala magdugay, nangin kinaandan na lang ini.

15, 16. (a) Ano ang panindugan sang mga Saksi ni Jehova parte sa pagtughong sang dugo? (b) Ano nga bulig ang gin-aman sa mga sumulunod sang Cristo parte sa pagpatughong kag sa pagpabulong nga wala sing dugo, kag ano ang resulta?

¹⁵ Sang 1944 pa lang, ginpakita na sang Watchtower nga ang pagpatughong sang dugo isa man ka paagi sang pagkaon sang dugo. Sang masunod nga tuig, ini nga panindugan ginpalig-on kag ginpaathag pa gid. Sang 1951, may listahan sang pamangkot kag sabat nga ginbalhag para buligan ang katawhan sang Dios sa pagpakig-angot sa mga doktor. Sa bilog nga kalibutan, ang matutom nga mga sumulunod sang Cristo nagpanindugan sing maisog, bisan pa sa pagyaguta, kapintas, kag direkta nga paghingabot. Pero padayon nga ginapahulag sang Cristo ang iya organisasyon sa pag-aman sing bulig. Sa amo, ginbalhag ang detalyado kag na-research sing maayo nga mga brosyur kag mga artikulo.

¹⁶ Sang 1979, ginsugdan sang pila ka gulang ang pagduaw sa mga ospital para buligan ang mga doktor nga mahangpan ang  aton panindugan, ang basihan sini sa Biblia, kag kon ano ang puede nga mga tal-us sa dugo. Sang 1980, ang mga gulang sa 39 ka siudad sa United States nakabaton sing pinasahi nga paghanas parte sa sini nga hilikuton. Sang ulihi, gin-aprobahan sang Nagadumala nga Hubon ang pagporma sang mga Hospital Liaison Committee sa bilog nga kalibutan. Ano ang epekto sini pagligad sang mga tinuig? Subong, linibo ka espesyalista—lakip ang mga doktor, manug-opera, kag mga anesthesiologist—ang nagakooperar na sa mga Saksi nga pasyente kag nagatahod sa aton desisyon nga indi magpatughong sang dugo. Labi nga nagadamo ang ospital nga nagatanyag sing pagbulong nga wala sing dugo, kag ginkabig pa gani ini sang iban nga pinakamaayo nga pamaagi sang pagbulong. Indi bala makakulunyag hunahunaon kon paano gin-amligan ni Jesus ang iya mga sumulunod sa mga panikasog ni Satanas nga higkuan sila?—Basaha ang Efeso 5:25-27.

17. Paano naton mapakita nga ginapabaloran naton ang paagi sang pagpuro sang Cristo sa iya mga sumulunod?

¹⁷ Maayo nga pamangkuton naton ang aton kaugalingon, ‘Ginapabaloran bala naton ang paagi sang Cristo sa pagpuro kag paghanas sa iya mga sumulunod sa pagtuman sa mataas nga talaksan ni Jehova sa moral?’ Kon amo, dumdumon naton nga ginatinguhaan gid ni Satanas nga ipahilayo kita kay Jehova kag kay Jesus  paagi sa pagguba sang aton pagtahod sa moral nga mga talaksan. Agod mabatuan ini, ang organisasyon ni Jehova may ara pirme mahigugmaon nga mga paandam kag pahanumdom parte sa imoral nga dalanon sining kalibutan. Kabay nga mangin alisto kita, mabinatunon, kag matinumanon sa sining mga laygay.—Hulu. 19:20.

18. May kaangtanan sa mga hungod nga nagrebelde sa mga talaksan sang Dios, ano ang maathag nga ginapahanumdom sa aton sang palanan-awon ni Ezequiel?

¹⁸ Ang ikaduha nga bahin sang pagpuro sa moral amo ang paghupot sang kongregasyon nga matinlo. Makapasubo gid nga indi tanan nga nagbaton sa talaksan ni Jehova kag nagdedikar sa Dios nagpabilin nga matutom. Ang iban nagbag-o sang ulihi kag hungod nga nagrebelde sa sini nga mga talaksan. Ano ang ginahimo sa ila? May ginapahangop ang espirituwal nga templo sa palanan-awon ni Ezequiel nga ginbinagbinag sa umpisa sini nga kapitulo. Dumduma ang mataas nga mga gawang. Sa sulod sang kada gawang may hulot sang mga bantay. Ang mga bantay nagaamlig sa templo para indi makasulod ang mga “wala matuli ang tagipusuon.” (Ezeq. 44:9) Isa ini ka maathag nga pahanumdom nga ang putli nga pagsimba pribilehiyo lang sang mga nagapanikasog nga magkabuhi sa putli nga talaksan ni Jehova sang paggawi. Sing kaanggid, ang pribilehiyo nga magsimba subong upod sa masigka-Cristiano indi man bukas sa tanan.

19, 20. (a) Paano amat-amat nga ginbuligan sang Cristo ang iya mga sumulunod sa pagtatap sang mabug-at nga mga sala? (b) Ano ang tatlo ka rason sa pag-disfellowship sa mga indi mahinulsulon?

¹⁹ Sang 1892, ang Watch Tower nagkomento nga “katungdanan naton nga i-disfellowship (subong Cristiano) ang mga direkta ukon indi direkta nga nagapanghiwala nga ginhatag sang Cristo ang iya kaugalingon subong gawad [katumbas nga bili] para sa tanan.” (Basaha ang 2 Juan 10.) Sang 1904, ang libro nga The New Creation nagsiling nga ang mga nagapadayon sa sayop nga paggawi makatalagam sa kongregasyon. Sadto, ang bug-os nga kongregasyon nagapakigbahin sa “bista sang simbahan” para usisaon ang mga kaso sang mabug-at nga mga sala. Pero, talagsa lang ini ginahimo. Sang 1944, ginpakita sang Watchtower nga ang mga may katungdanan lamang sa kongregasyon ang dapat magtatap sa sini nga mga kaso. Sang 1952 ang base sa Biblia nga paagi sa pagtatap sa hudisyal nga mga kaso ginbalhag sa Watchtower, kag ginpadaku sini ang panguna nga rason sa pag-disfellowship sa mga wala nagahinulsol—para huptan nga matinlo ang kongregasyon.

²⁰ Pagligad sang mga tinuig, ginbuligan sang Cristo ang iya mga sumulunod sa pagtatap sang mabug-at nga mga kaso sang pagpakasala. Ginhanas sing maayo ang mga gulang sa pagtatap sa hudisyal nga mga kaso sa paagi ni Jehova, nga ginabalanse ang hustisya kag kaluoy. Sa karon, maathag na sa aton ang di-magkubos tatlo ka rason sa pag-disfellowship sa mga indi mahinulsulon: (1) para ang ngalan ni Jehova mahilway sa kahuy-anan, (2) para amligan ang kongregasyon sa makalalaton nga epekto sang mabug-at nga sala, kag (3) para pahulagon ang nakasala nga maghinulsol tubtob posible.

21. Sa ano nga paagi ang kahimusan sa pag-disfellowship isa ka pagpakamaayo sa katawhan sang Dios?

 ²¹ Nakita mo bala kon paano nangin isa ka pagpakamaayo ang kahimusan sang pag-disfellowship para sa mga sumulunod sang Cristo subong? Sa dumaan nga Israel, ang mga nagapakasala masami nga nagahigko sa pungsod, kag kon kaisa mas madamo pa sila sangsa mga nagahigugma kay Jehova kag nagahimo sang husto. Gani, ang pungsod masami nga nagapakahuya sa ngalan ni Jehova kag nadula nila ang iya kahamuot. (Jer. 7:23-28) Pero subong, ang katawhan ni Jehova ginahuman sang espirituwal nga mga babayi kag lalaki. Bangod ginasikway naton ang batinggilan nga mga makasasala, indi na sila magamit ni Satanas subong hinganiban para higkuan pa gid ang kongregasyon kag ang matinlo nga tindog sini. Sa baylo, nalimitehan ang ila impluwensia. Gani subong grupo, nahuptan naton ang kahamuot ni Jehova. Dumduma ang iya saad: “Wala sing ginhimo nga hinganiban nga magmadinalag-on batok sa imo.” (Isa. 54:17) Ginasuportahan bala naton ang mga gulang sa ila mabug-at nga salabton sa pagtatap sang hudisyal nga mga kaso?

22, 23. Ngaa nagapasalamat kita sa aton mga masigka-Cristiano sang temprano sang ika-20 nga siglo, pero ngaa kinahanglan mangin balanse parte sa pamilya?

²² Ang ikatlo nga bahin diin nakabenepisyo ang mga sumulunod sang Cristo sa padayon nga pagpuro amo ang parte sa pag-asawahay kag pamilya. Nabag-o bala ang aton pagtamod sa pamilya sa sulod sang mga tinuig? Huo. Halimbawa, kon basahon naton ang parte sa mga alagad sang Dios sang temprano sang ika-20 nga siglo, madayaw gid kita sa ila pagkamasinakripisyuhon. Nagapasalamat gid kita kay gin-una nila ang sagrado nga pag-alagad sa ila kabuhi. Pero, nakita man naton nga kinahanglan mangin balanse. Ngaa?

²³ Kinaandan lang sadto sa mga brother nga magbaton sing asaynment sa ministeryo ukon sa paglakbay nga hilikuton sa malayo nga lugar sing binulan. Kon kaisa, bisan wala man ginapamatukan sang Kasulatan ang pagminyo, sobra gid ang pagpalas-ay sa sini, samtang diutay lang ang ginalaygay parte sa pagpabakod sang Cristiano nga pag-asawahay. Amo bala sini ang nagakatabo sa mga sumulunod sang Cristo subong? Indi gid!

24. Paano ginbuligan sang Cristo ang iya matutom nga katawhan nga mangin balanse sa ila pagtamod sa pag-asawahay kag pamilya?

²⁴ Sa karon, wala naton ginasakripisyo ang mga obligasyon sa pamilya kabaylo sa teokratiko nga mga asaynment. (Basaha ang 1 Timoteo 5:8.) Dugang pa, ginapat-od gid sang Cristo nga ang iya matutom nga sumulunod sa duta makabaton pirme sang mabuligon kag balanse nga laygay halin sa Kasulatan para sa pag-asawahay kag pamilya. (Efe. 3:14, 15) Sang 1978, ginbalhag ang libro nga Making Your Family Life Happy. Pagligad sang 18 ka tuig, ginpagua ang libro nga Ang Sekreto sang Kalipay sa Pamilya. Ang Watchtower may mga artikulo man para buligan ang mga mag-asawa nga iaplikar ang mga prinsipio sa Biblia sa ila pag-asawahay.

25-27. Paano ang mga kinahanglanon sang mga kabataan nga lainlain ang edad ginhatagan sing dugang nga atension sa pagligad sang mga tinuig?

²⁵ Kamusta naman ang mga pamatan-on? Sa pagligad sang mga tinuig, ginhatagan sila sing dugang nga atension. Ang  organisasyon ni Jehova madugay na nga nagaaman sing maayong butang para sa kabataan nga lainlain ang edad. Sang una diutay lang ini pero amat-amat nga nagbugana. Halimbawa, ang “Juvenile Bible Study” (Pagtuon sang Biblia Para sa mga Pamatan-on) naggua sa Golden Age halin sang 1919 asta 1921. Ginpagua man ang brosyur nga The Golden Age ABC sang 1920 kag ang libro nga Children sang 1941. Sang dekada 1970, ang mga libro nga Pagpamati sa Daku nga Manunudlu, Your Youth—Getting the Best out of It, kag Ang Akon Libro sang mga Sugilanon sa Biblia ginbalhag man. Sang 1982, ginsugdan ang serye sa Awake! nga “Young People Ask,” kag nangin libro nga Questions Young People Ask—Answers That Work, sang 1989.

²⁶ Sa karon, may duha na kita ka bag-o nga volume sang Young People Ask, samtang ang serye sini padayon nga makita sa aton Web site nga jw.org. May libro man kita nga Magtuon Gikan sa Daku nga Manunudlo. Sa aton Web site madamo sing bahin para sa mga bata, lakip na ang mga Bible card, hilimuon parte sa Biblia para sa may buot na kag magagmay pa nga mga bata, puzzle,  video, kag komiks sang mga istorya sa Biblia, subong man leksion sa Biblia para sa mga bata nga tres anyos paubos. Maathag nga wala gid nagbag-o ang pagtamod sang Cristo sa mga bata halin sang ginhakos niya sila sang unang siglo. (Mar. 10:13-16) Gusto niya nga mabatyagan sang aton mga kabataan nga ginapalangga sila kag ginapakaon sing maayo sa espirituwal.

²⁷ Gusto man ni Jesus nga amligan ang mga bata sa kahalitan. Samtang nagalala ang imoralidad sa sining kalibutan, labi man nga nagalapnag ang pag-abuso sa bata. Gani, may maathag kag prangka nga mga materyal nga ginbalhag para buligan ang mga ginikanan nga maamligan ang ila kabataan batok sa sini. d

28. (a) Ano ang kinahanglan para makapakigbahin kita sa putli nga pagsimba, subong sang ginapakita sa gintagna nga templo ni Ezequiel? (b) Ano ang determinado mo nga himuon?

²⁸ Indi bala makakulunyag gid hunahunaon kon paano padayon nga ginapuro sang Cristo ang iya mga sumulunod, nga ginahanas sila sa pagtahod, pagkabuhi, kag pagbenepisyo sa mataas nga mga talaksan ni Jehova sa moral? Hunahunaa liwat ang templo nga nakita ni Ezequiel sa palanan-awon. Dumduma ang mataas nga mga gawang. Ina nga templo, indi pisikal, kundi espirituwal. Pero, nakita bala naton nga matuod ini? Nagasulod kita sa sini, indi lang paagi sa pagkadto sa Kingdom Hall, pagbukas sang Biblia, ukon pagpamalaybalay. Mga pisikal ina nga buhat. Puede ina himuon sang mga salimpapaw bisan wala sila nagasulod sa espirituwal nga templo. Pero, kon ginahimo naton ina kag sa amo man nga tion ginasunod ang mataas nga mga talaksan ni Jehova sa moral kag nagapakigbahin sa putli nga pagsimba nga may husto nga panimuot, nagasulod gid kita kag nagaalagad sa labing sagrado nga lugar—ang kahimusan ni Jehova nga Dios para sa putli nga pagsimba! Kabay nga pabaloran naton pirme ining hamili nga pribilehiyo. Himuon naton ang aton labing masarangan nga ipabanaag ang pagkabalaan ni Jehova paagi sa pagsunod sa iya matarong nga mga talaksan!