1. Yehezekele uvua mumone tshinyi?

 UDI mua kumvua bishi wewe mutuilangane ne bualu buvua bufikile muprofete Yehezekele kukadi bidimu 2500? Fuanyikija ne: udi wenda usemena pabuipi ne ntempelo munene udi ubalakana ne muikale ne bibambalu bia bungi. Muanjelu wa bukole bua bungi udi wenda ukuleja muaba muimpe menemene eu. Nudi nubanda ku tubandilu muanda mutekete tudi tufikisha ku tshimue tshia ku biibi bisatu. Bibuelelu ebi bidi bikukemesha bikole ne bikuenza buôwa. Bidi bule bua metre matue ku 30. Munda, udi umona tuzubu tua balami. Mbenze makunji bu mabue a ngaji.—Yeh. 40:1-4, 10, 14, 16, 22; 41:20.

2. a) Ntempelo udi uleja tshinyi? (Tangila kabidi note.) b) Bintu bidi ku bibuelelu bia ntempelo bidi bitulongesha tshinyi?

² Tshikena kumona etshi ntshia ntempelo wa mu nyuma tshidi Yehezekele muleje mu mukanda wende wa buprofete mu nshapita wa 40 too ne wa 48. Ntempelo eu udi tshimfuanyi tshia malu adi Yehowa mulongolole bua ntendelelu mukezuke. Tshintu tshionso tshia mu ntempelo tshidi ne diumvuija bua ntendelelu wetu mu matuku a ku nshikidilu aa. a Biibi binene bidi biumvuija tshinyi? Bidi bituvuluija ne: aba badi babuela mu ntendelelu mukezuke badi ne bua kutumikila mikenji minene ne miakane ya Nzambi. Bimfuanyi bia mabue a ngaji bidi pabi bileja lungenyi lua muomumue bualu imue misangu batu bakula mu Bible bua mabue bua kuleja buakane. (Mus. 92:12) Tuzubu tua balami tudi patu tuleja tshinyi? Bidi bimueneka patoke ne: badi babengela bantu badi kabayi batumikila mikenji ya Nzambi bua kubuela mu njila muimpe wa mu ntendelelu mukezuke udi ufikisha ku muoyo.—Yeh. 44:9.

3. Bua tshinyi bivua bikengela kutungunuka ne kulengeja bayidi ba Kristo?

³ Mmushindu kayi uvua tshikena kumona tshia Yehezekele tshikumbane? Anu mutuvua bamone mu Nshapita 2 wa mukanda eu, Yehowa mmuenze mudimu ne Kristo bua kulengeja bantu bende mu mushindu wa pa buawu kumbukila mu 1914 too ne ku ntuadijilu kua 1919. Mudimu wa dilengeja uvuaku mushikile anu tshikondo atshi anyi? Tòo. Mu bidimu lukama bishale ebi, Kristo mmutungunuke ne kubingisha mikenji ya Yehowa minsantu ya bikadilu bimpe. Nunku bivua bikengela atungunuke ne kulengeja bayidi bende. Bua tshinyi? Bualu Kristo udi wenda usangisha bayidi bende bua kubapatula mu ndongoluelu eu udi munyanguke mu malu a bikadilu; ne Satana udi utungunuka ne kudienzeja bua kubapingaja mu bikadilu bia  bukoya. (Bala 2 Petelo 2:20-22.) Tukonkononayi nsombelu isatu idibu balengeje bena Kristo balelela ku kakese ku kakese eyi: dibalengeja mu bikadilu, mu tshisumbu ne mu dîku.

4, 5. Mbuteyi kayi budi Satana ukuata nabu mudimu katshia ku kale? Mmunyi muvuaye mukumbaje tshipatshila tshiende?

⁴ Bantu ba Yehowa batu misangu yonso baditatshisha bua kuikala ne bikadilu bimpe. Nunku, mbitabe ne disanka mushindu udibu babalengeje mu nsombelu eu. Tukonkononayi ndambu wa bilejilu.

⁵ Tshiendenda tshia masandi. Yehowa uvua mulongolole bua dimanyangana dia mulume ne mukaji badi baselangane dikale bualu buimpe budi kabuyi bua bukoya. Kadi Satana udi ujinga kunyanga dipa dia mushinga edi, ujinga bua kudivuija tshintu tshia bukoya ne wenza nadi mudimu bua kuteka batendeledi ba Yehowa mu diteta bua kujimijabu dianyisha diende. Satana wakakumbaja tshipatshila tshiende mu mushindu wa dikema pavuaye muenze mudimu ne buteyi ebu mu matuku a Balama ne udi wenza nabu mudimu bikole menemene mu matuku a ku nshikidilu aa.—Nom. 25:1-3, 9; Buak. 2:14.

6. Mmutshipu kayi uvuabu bapatule mu Tshibumba tshia Nsentedi? Bavua bakuate nawu mudimu mushindu kayi? Bua tshinyi bakalua kulekela kuenza nawu mudimu? (Tangila kabidi note.)

⁶ Bua kupangisha tshipatshila tshia Satana etshi, Tshibumba tshia Nsentedi tshia dia 15 ngondo 6 wa 1908 (Angl.) tshiakapatula mutshipu uvua ne mêyi aa: “Ndi nditshipa ne: misangu yonso ne muaba wonso nengikale mua kuenzela muntu udi kayi mulume anyi mukaji nanyi malu patudi pa nkayetu anu mundi mua kumuenzelawu muaba udi bantu.” b Nansha muvuabu kabayi benzeja bantu bua kuenza mutshipu eu, ba bungi bakawenza ne kufilabu mêna abu bua baapatule mu Tshibumba tshia Nsentedi tshia Siona. Panyima pa bidimu, pakamonabu ne: mutshipu eu kawutshivua kabidi ne mushinga nansha muvuawu muambuluishe bantu ba bungi tshikondo tshivuabu bawenza atshi, bakalekela kuenza nawu mudimu. Kadi, bavua anu batumikila mikenji minene ya bikadilu bimpe ivuawu wakuila.

7. Mu 1935, Tshibumba tshia Nsentedi tshiakakula bua tshilumbu kayi? Mmubelu kayi uvuatshi tshifile?

⁷ Satana uvua muvudije bikole buluishi buende. Tshibumba tshia Nsentedi tshia dia 1 ngondo 3 wa 1935 (Angl.), tshiakaleja patoke lutatu luvua luenda luvula munkatshi mua bantu ba Nzambi. Bamue bavua bela meji ne: bu muvuabu benza mudimu wa kuyisha lumu luimpe, kabavua benzejibue bua kutumikila mikenji ya bikadilu bimpe ya Yehowa mu nsombelu wabu to. Tshibumba tshia Nsentedi atshi tshiakaleja ne: “Mbimpe kuvuluka ne: kuenza mudimu wa kuyisha ki ntshionso tshidibu batulombe to. Bantemu ba Yehowa mbaleji mpala bende, ne badi ne bua kuenza mudimu bu baleji mpala ba Yehowa ne ba bukalenge buende mu mushindu muimpe.” Pashishe, tshibejibeji etshi tshiakafila mubelu mutoke bua dibaka ne malu a dimanyangana dia mulume ne mukaji uvua muambuluishe bantu ba Nzambi bua ‘kunyema masandi.’—1 Kol. 6:18.

8. Bua tshinyi Tshibumba tshia Nsentedi tshivua tshiakule ku musangu ne musangu bua diumvuija dia muaku wa mu tshiena Greke udi uleja tshiendenda tshia masandi?

⁸ Mu makumi a bidimu bishale ebi, Tshibumba tshia Nsentedi ntshileje bikole diumvuija dia muaku porneia udibu benza nawu mudimu mu Mifundu ya tshiena Greke bua kuakula bua tshiendenda tshia masandi. Kawena anu umvuija dimanyangana dia mulume ne mukaji patupu to. Kadi porneia udi ukongoloja bienzedi  bionso bia bukoya bia mishindu mishilashilangane, kusangisha ne bienzedi bionso bia bundu bitubu benza mu nzubu ya bandumba. Nunku Kristo mmukube bayidi bende ku tshipupu tshia dinyanguka dia malu a dimanyangana dia mulume ne mukaji tshidi tshitampakane kudi bantu ba bungi mu bulongolodi ebu lelu.—Bala Efeso 4:17-19.

9, 10. a) Mu 1935 Tshibumba tshia Nsentedi tshiakakula bua bualu kayi budi butangila bikadilu bimpe? b) Ntshinyi tshidi Bible ulongesha ne nkatshinkatshi bua dinua dia maluvu makole?

⁹ Dikuatshika dia maluvu. Tshibumba tshia Nsentedi tshia dia 1 ngondo 3 wa 1935 (Angl.), tshiakakula bua tshilumbu tshikuabu tshidi tshitangila bikadilu bimpe. Tshiakamba ne: “Tudi bamone kabidi ne: bamue bantu badi benza mudimu wa buambi ne midimu mikuabu ya mu bulongolodi bikale banue maluvu makole. Mmu nsombelu kayi mudi Mifundu yanyishila muntu bua kunua maluvu? Bidiku bimpe bua muntu kunua maluvu, bimupangisha too ne bua kuenza mudimu mu bulongolodi bua Yehowa bimpe anyi?”

¹⁰ Tshibejibeji etshi tshiakaleja mmuenenu wa nkatshinkatshi udi mu Dîyi dia Nzambi bua bidi bitangila dinua dia maluvu makole. Bible kena ukandika dinua dia mvinyo ne dia maluvu makuabu makole ne nkatshinkatshi to, kadi udi ubenga bikole dikuatshika dia maluvu. (Mus. 104:14, 15; 1 Kol. 6:9, 10) Bua bidi bitangila kunua maluvu kumpala kua kuenza mudimu wa tshijila, bavua bavuluije batendeledi ba Nzambi muyuki wa bana ba Alona bavua Nzambi mushipe bua muvuabu balambule Nzambi kapia kavua kakayi kanyishibue pa tshioshelu. Muyuki eu udi uleja pashishe tshivua tshifikishe bantu aba bua kuenza bualu buvua kabuyi buanyishibue. Nzambi uvua muele mukenji uvua ukandika bakuidi bonso bua kunua maluvu pavuabu benza midimu yabu ya tshijila. (Lew. 10:1, 2, 8-11) Bu mudi bayidi ba Kristo batumikila pabu dîyi dinene edi lelu, badi bepuka ne budimu bua kunua maluvu kumpala kua kuenza midimu ya tshijila.

11. Bua tshinyi bivua bimpe bua muvua bantu ba Nzambi bapete lumvu luimpe bua dilua bapika ba maluvu?

¹¹ Mu bidimu makumi a bungi bishale ebi, Kristo mmuambuluishe kabidi bayidi bende bua kuikala ne mmuenenu muimpe pa bidi bitangila kunua maluvu kupitshisha anyi kuikala mupika wawu. Ku diambuluisha dia mibelu idibu bafile mu tshikondo tshiayi, bavua bambuluishe bantu ba bungi bua kupita bimpe ne nsombelu eu ne kupetulula lungenyi luimpe mu tshilumbu etshi. Bavua bambuluishe kabidi bantu bakuabu ba bungi bua kubenga kukuluka mu buteyi ebu. Muntu nansha umue kena ne bua kulekela dikuatshika dia maluvu dimunyangila lumu luende, lua dîku diende ne kupita bionso diakalenga diende dia kuenzela Yehowa mudimu wa tshijila to.

12. Bayidi ba Kristo bavua bangata makanya mushindu kayi katshia kumpala kua matuku a ku nshikidilu kutuadija?

¹² Makanya. Bayidi ba Kristo bakatuadija kubenga makanya kumpala kua matuku a ku nshikidilu kutuadijawu. Kukadi bidimu bia bungi, muanetu wa balume mukuabu diende Charles Capen ukavua mukulakaje wakavuluka muvuabu bapetangane ne Charles Russell bua musangu wa kumpala mu Allegheny mu Pennsylvanie ku ndekelu kua bidimu bia 1800. Capen uvua ne bidimu 13 uvua muimane ne bana babu ba balume basatu pa tubandilu tua nzubu wa Bible. Pavua Russell upita muaba uvuabu, wakabebeja ne: “Nudi nunua makanya anyi? Ndi ngumvua muishi wa makanya ununka.” Bakamujadikila ne: kabavua banua  makanya to. Kakuyi mpata, bakamanya lungenyi luvuaye nalu bua makanya. Muanetu Russell wakumvuija 2 Kolinto 7:1 mu Tshibumba tshia Nsentedi tshia dia 1 ngondo wa 8 wa 1895 (Angl.) ne: “Padi muena Kristo wenza mudimu ne makanya mu mushindu kayi wonso, tshiena mmona mudi bualu ebu butumbisha Nzambi anyi butuambuluisha to. . . . Katuena mua kudifuanyikijila Mukalenge wetu ununka makanya peshi wela tshintu kayi tshionso tshia bukoya mukana muende musangu nansha umue to.”

13. Ndilengejibua kayi dia mu bikadilu diakenzeka mu 1973?

¹³ Mu 1935, Tshibumba tshia Nsentedi tshiakabikila makanya ne: “mutshi wa bukoya” ne tshiakaleja ne: muntu yonso udi udia mutshi eu anyi unua makanya kena mua kushala muena mu dîku dia Betele anyi kuenza mudimu bu muleji mpala wa bulongolodi bua Nzambi pa kuikala mpanda-njila peshi mutangidi muena ngendu nansha. Bakalengeja kabidi bayidi ba Kristo mu bikadilu mu 1973. Tshibumba tshia Nsentedi tshia dia 1 ngondo 6 tshiakaleja ne: Ntemu wa Yehowa nansha umue kavua mua kushala ne lumu luimpe mu tshisumbu pavuaye wenza tshienzedi tshidi tshinyanga muntu, tshimushipa ne tshiteka bakuabu mu njiwu etshi to. Bavua ne bua kuipata mu tshisumbu bantu bavua babenge kulekela dienza mudimu ne makanya. c Bushuwa, Kristo uvua ufuma ku dienza bualu bua mushinga bua kulengeja bayidi bende.

14. Mmukenji kayi udi Nzambi muele bua mashi? Mmunyi mudi dielangana mashi difike ku dimuangalaka pa buloba bujima?

¹⁴ Dienza mudimu bibi ne mashi. Mu matuku a Nowa, Nzambi wakaleja ne: bivua bibi bua kudia mashi. Wakajadika kabidi bualu ebu mu Mikenji ivuaye mupeshe bena Isalele ne uvua kabidi mulombe bena Kristo ba kumpala bualu bua muomumue bua ‘kulekela mashi.’ (Bien. 15:20, 29; Gen. 9:4; Lew. 7:26) Kabiena bitukemesha bua mudi Satana mupete mushindu mu matuku etu aa bua kufikisha bantu ba bungi bua kubenga kunemeka mukenji wa Nzambi eu to. Mu bidimu bia 1800, baminganga bavua balonga bikole tshilumbu tshia diela bantu mashi, kadi bakatuadija kubelawu bikole pakamanyabu groupe ya mashi a bantu. Mu 1937, bakatuadija kusangisha mashi ne kualamina miaba kampanda mu mpitadi ne pashishe, Mvita mibidi ya buloba bujima yakenza bua diela bantu mashi divule. Katupa kîpi pashishe, diela bantu mashi diakamuangalaka pa buloba bujima.

15, 16. a) Bantemu ba Yehowa bakangata dipangadika kayi bua diedibua dia mashi? b) Mmunyi muakambuluishabu bayidi ba Kristo mu tshilumbu tshia diedibua dia mashi ne tshia ngondapilu udi kayi ulomba mashi? Mbipeta kayi bidi bipatuke?

¹⁵ Ku ntuadijilu kua 1944, Tshibumba tshia Nsentedi tshiakaleja ne: diedibua mashi divua mushindu mukuabu wa didia dia mashi. Tshidimu tshiakalonda, bakakolesha ne kutokesha bimpe lungenyi lua mu Bible alu. Mu 1951, bakapatula liste wa nkonko ne mandamuna bua kuambuluisha bantu ba Nzambi bua kumanyabu mua kuyukila ne baminganga. Pa buloba bujima, bayidi ba Kristo ba lulamatu bavua bashala balamate dipangadika diabu ne dikima nansha pavuabu kabayi babangata ne mushinga, babakengesha anyi pavuabu kumpala kua buluishi bukole. Kadi Kristo wakatungunuka ne kusaka bulongolodi buende bua kufilabu diambuluisha divua dikengela. Bakapatula malu makuabu ne makebulula avuabu benze mu broshire ne mu biena-bualu bikuabu.

 ¹⁶ Mu 1979 bamue bakulu bakatuadija kuya mu mpitadi bua kuambuluisha ba minganga bua kumvuabu bimpe dipangadika dietu bua mashi, bua tshidi Bible wamba ne bua mishindu mikuabu ya luondapu pamutu pa kuela bantu mashi. Mu 1980, bakulu ba mu bimenga 39 bia mu États-Unis bakabuela mu kalasa ka pa buaku bua mudimu eu. Mu bungi bua matuku, Kasumbu kaludiki kakitaba bua kuenza Komite ya diumvuangana ne mpitadi pa buloba bujima. Malu aa avuaku mapatule bipeta bimpe mu bidimu biakalonda anyi? Lelu baminganga bapiluke binunu bia bungi kusangisha ne badoktere, bapandianganyi ne batuanganyi ba manga adi enza bua muntu kumvu bisama padibu bamondopa anyi bamupanda batu bayukila ne Bantemu badi basama ne batu banemeka dipangadika diabu dia kubenga kubela mashi. Bena mu mpitadi ya bungi bakadi bondopa bantu kabayi babela mashi ne bamue batu bamona kuenza nunku bu ngondapilu mutambe buimpe. Kabienaku bituenza disanka bua kuela meji bua mishindu idi Yezu mukube bayidi bende ku mateta adi Satana ubela bua kubanyanga mu bikadilu anyi?—Bala Efeso 5:25-27.

17. Ntshinyi tshitudi mua kuenza bua kuleja ne: tudi tuangata ne mushinga mushindu udi Kristo ulengeja bayidi bende?

¹⁷ Mbimpe tudiebeje ne: ‘Tutuku tuangata ne mushinga mushindu udi Yezu mulengeje bayidi bende, ne mutulongeshe bua kutumikila mikenji ya Yehowa minene ya bikadilu anyi?’  Bikalabi nanku, mbimpe tumanye ne: Satana udi utungunuka anu ne kuenza muende muonso bua kutusemeja kule ne Yehowa ne Yezu pa kutusaka bua kupepeja mikenji ya Nzambi ya bikadilu bilenga. Bua kuepuka buteyi ebu, bulongolodi bua Yehowa butu misangu yonso butudimuija ne butuvuluija bua bidi bitangila bikadilu bibi bia mu bulongolodi ebu. Nunku tuikalayi badimuke, tuitabe ne tutumikile mibelu ya mushinga eyi.—Nsu. 19:20.

18. Tshikena kumona tshia Yehezekele tshidi tshitulongesha bualu kayi bua bidi bitangila aba badi batombokela mikenji ya Yehowa ku bukole?

¹⁸ Nsombelu muibidi uvuabu ne bua kulengeja mu bikadilu uvua utangila bukezuke bua tshisumbu. Bia dibungama, munkatshi mua bantu batu bitaba mikenji ya Yehowa ya bikadilu ne badilambula kudi Nzambi, ki mbonso batu bashala ne lulamatu to. Bamue batu bashintuluka ne batombokela mikenji eyi. Ntshinyi tshidibu ne bua kuenzela bantu ba nunku? Tshikena kumona tshivua Yehezekele mumone tshitudi batele ku ntuadijilu kua nshapita eu tshidi tshituleja bualu bumue. Vuluka biibi binene bituvua batele. Ku tshibueledi tshionso kuvua tuzubu tua balami. Balami bavua ne bua kukuba ntempelo nangananga bua kupangisha bantu bavua ‘kabayi batengula mu mitshima’ bua kubuelamu. (Yeh. 44:9) Bualu ebu budi butuleja ne: kubuela mu ntendelelu mukezuke ndiakalenga didibu bapeshe anu aba badi badienzeja bua kunemeka mikenji ya Yehowa mikezuke ya bikadilu. Mu mushindu wa muomumue, ki mmuntu yonso udi ne diakalenga dia kudisangisha ne bena Kristo netu bua kutendelela to.

19, 20. a) Mmunyi mudi Kristo muambuluishe bayidi bende ku kakese ku kakese bua kukosa bilumbu binene? b) Mmalu kayi asatu adi enza bua bipate muntu udi muenze bubi kayi unyingalala?

¹⁹ Mu 1892, Tshibumba tshia Nsentedi (Angl.) tshiakaleja ne: “Tudi ne bukenji bua kuipata mu tshisumbu bantu badi babenga kuitaba buludiludi anyi muinshi muinshi ne: Kristo uvua mudifile bu mulambu udi upikula bua bantu bonso.” (Bala 2 Yone 10.) Mu 1904, mukanda wa La Nouvelle Création (Angl.) wakaleja ne: bantu badi batungunuka ne kuenza malu mabi badi njiwu bua tshisumbu. Tshikondo atshi, bavua mua kulumbuluisha muntu uvua muenze bubi bunene “kumpala kua tshisumbu tshijima” ne muntu yonso uvua mua kuakula. Kadi bilumbu bia nunku bivua bikese. Mu 1944, Tshibumba tshia Nsentedi tshiakaleja ne: anu bana betu ba balume bavua ne majitu ke bavua ne bua kukosa bilumbu mu tshisumbu. Mu 1952, bavua baleje mu Tshibumba tshia Nsentedi mishindu ya kukosa bilumbu bilondeshile Bible, kulejabu bualu bunene buvua mua kuenza bua bipate bantu badi kabayi banyingalala, mmumue ne: bua kulama bukezuke bua tshisumbu.

²⁰ Katshia anu tshikondo atshi, Kristo mmuambuluishe bayidi bende bua kutokesha ne kulengeja mushindu wa kukosa bilumbu binene bia bantu badi benze bubi. Mbalongeshe bakulu bena Kristo bimpe bua kukosa bilumbu mu mushindu udi Yehowa wanyisha, bikale ne buakane ne luse. Mpindieu, tudi tumona patoke malu matue ku asatu adi afikisha ku dipata mu tshisumbu muntu udi kayi unyingalala aa: 1) bua kubenga kupendesha dîna dia Yehowa, 2) bua kukuba bena mu tshisumbu ku  bipeta bia bubi bunene, ne 3) bua kusaka muntu udi muenze bibi bua kunyingalalaye pikalaku mushindu.

21. Mmunyi mudi kuipata muntu mu tshisumbu kuambuluisha bantu ba Nzambi?

²¹ Udiku umona mudi kuipata muntu mu tshisumbu kuikale dibenesha kudi bayidi ba Kristo lelu anyi? Mu Isalele wa kale, bantu bavua benza malu mabi bavua ne buenzeji bubi pa tshisamba tshijima, pamuapa bapita bantu bavua banange Yehowa ne bavua benza malu makane ku bungi. Nunku, tshisamba tshivua tshipendesha dîna dia Yehowa ne tshijimija dianyishibua diatshi kudiye. (Yel. 7:23-28) Kadi lelu, Yehowa udi ne tshisumbu tshia bantu ba mu nyuma balume ne bakaji. Bu mudibu bipata benji ba malu mabi munkatshi muetu, kabena balua biamu bidi Satana wenza nabi mudimu bua kunyanga tshisumbu ne bukezuke buatshi to. Nunku kabena mua kunyanga bantu bikole to. Bu mutudi tshisumbu tshimue, tudi bajadike ne: Yehowa udi utuanyisha. Vuluka mulayi wa Yehowa wa ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele.’ (Yesh. 54:17) Tutuku tuelesha bakulu diboko bua mudibu ne bujitu bunene bua kukosa bilumbu mu buakane anyi?

22, 23. Bua tshinyi tudi ne dianyisha bua bena Kristo netu ba ku ntuadijilu kua bidimu bia 1900? Ntshinyi tshidi tshileja ne: bavua ne bua kuikala ne ndambu wa nkatshinkatshi bua mêku abu?

²² Nsombelu muisatu uvuabu balengeje bayidi ba Kristo ku musangu ne ku musangu udi utangila dibaka ne nsombelu wa mu dîku. Mbalengejaku mu bungi bua bidimu mushindu utudi tumona dibaka anyi? Eyowa. Tshilejilu, patudi tubala miyuki ya batendeledi ba Nzambi ba ku ntuadijilu kua bidimu bia 1900, bidi bitukemesha bua muvuabu ne lungenyi lua didifila. Tudi ne dianyisha dia bungi bua muvuabu bateka mudimu wa tshijila pa muaba wa kumpala mu nsombelu wabu. Kadi tudi kabidi mua kumona ne: bivua bikengela bikale ne nkatshinkatshi. Bua tshinyi?

²³ Bana betu ba balume bavua bitaba bua kuenza mudimu wa kuyisha peshi bua kulua batangidi bena ngendu, midimu ivua ibalomba bua kumbuka ku mabu ne kuya kule munkatshi mua ngondo ya bungi. Imue misangu bavua babela bantu bikole bua kubenga kubuela mu dibaka kupita ne mudi Mifundu yamba, ne bapesha bena Kristo bavua mu mabaka mibelu mikese bua mushindu wa kukoleshabu mabaka abu. Bitshidiku bienzeka nunku munkatshi mua bayidi ba Kristo lelu anyi? Nansha kakese.

24. Mmunyi mudi Kristo muambuluishe bantu bende ba lulamatu bua kumona dibaka ne dîku mu mushindu muimpe?

²⁴ Lelu katuena tuangata midimu ya mu tshisumbu ne mushinga wa bungi kupita majitu a mu dîku to. (Bala 1 Timote 5:8.) Kabidi, Kristo mmuenze bua bayidi bende ba lulamatu badi pa buloba bapete mibelu ya mu Mifundu bua dibaka ne nsombelu wa mu dîku. (Ef. 3:14, 15) Mu 1978, bakapatula mukanda wa Mushindu wa kuikala ne nsombelu wa disanka mu dîku. Bidimu 18 pashishe bakapatula mukanda wa Nsapi wa disanka mu dîku. Bakapatula kabidi biena-bualu bikuabu mu Tshibumba tshia Nsentedi bua kuambuluisha bena mabaka bua kutumikilabu mêyi a mu Mifundu mu nsombelu wabu.

25-27. Mmunyi mudibu bakumbajile bana ba bidimu bishilashilangane majinga abu munkatshi mua bidimu?

²⁵ Kadi netuambe tshinyi bua bana? Munkatshi mua bidimu, bakabakumbajila majinga abu. Bulongolodi bua Yehowa  mbupatuile bana ba bidimu bishilashilangane bintu bimpe, kadi tshintu tshivua tshienze bu kamusulu kakese etshi ntshilue musulu munene. Tshilejilu, kumbukila mu 1919 too ne mu 1921 bavua bapatula tshiena-bualu tshia ne: “Étude biblique pour les jeunes gens” mu tshibejibeji tshia L’Âge d’Or (Angl.). Mu 1920 bakapatula broshire wa ABC de l’Âge d’Or (Angl.) ne mu 1941 bakapatula mukanda wa Enfants (Angl.). Mu bidimu bia 1970 bakapatula mukanda wa Telejayi Mulongeshi munene, wa Votre jeunesse — comment en tirer le meilleur parti, ne wa Miyuki ya mu Mukanda wa Nzambi. Mu 1982 bakatuadija kupatula mu Réveillez-vous ! biena-bualu bia “Les jeunes s’interrogent” biakafikisha ku dipatula mukanda wa Les jeunes s’interrogent. Réponses pratiques mu 1989.

²⁶ Lelu, tudi ne volime ibidi ya mukanda wa Les jeunes s’interrogent ne badi batungunuka ne kupatula biena-bualu bikuabu mu site wetu wa jw.org. Tudi kabidi ne mukanda wa Longa malu kudi Mulongeshi Munene. Mu site wetu wa Enternete mudi biena-bualu bia bungi bua bansonga bu mudi: bimfuanyi bia bantu badibu batele mu Bible, malu a kulonga mu Bible bua bana ne bantu bakulumpe, manaya, filme, bimfuanyi bidi ne miyuki ya mu  Bible ne malongesha a mu Bible bua bana ba bidimu kutuadijila ku bisatu too ne muinshi. Bidi bimueneka patoke ne: Kristo ki mmushintulule mushindu wende wa kumona bana katshia ku tshikondo tshivuaye mubambule mu maboko ende mu bidimu lukama bia kumpala to. (Mâko 10:13-16) Mmusue bua bana badi munkatshi muetu bumvue ne: mbabanange ne badi badia bimpe mu nyuma.

²⁷ Yezu mmusue kabidi bua bakube bana. Bu mudi bulongolodi ebu budi bunyanguke mu bikadilu buenda anu bunyanguka bikole, dinyanga bana didi dienda divula. Nunku mbafile mibelu mitoke idi yambuluisha baledi bua kukuba bana babu ku njiwu eyi. d

28. a) Bilondeshile tshikena kumona tshia Yehezekele tshia ntempelo, ntshinyi tshitudi ne bua kuenza tuetu basue kubuela mu ntendelelu mukezuke? b) Udi mudisuike bua kuenza tshinyi?

²⁸ Kabienaku bitukolesha patudi tumona mudi Kristo utungunuka ne kulengeja bayidi bende, ne ubalongesha bua kunemeka, kutumikila ne kupeta masanka adi afumina ku mikenji minene ya Yehowa ya bikadilu anyi? Vuluka kabidi ntempelo uvua Yehezekele mumone mu tshikena kumona ne bibuelelu biende binene. Bushuwa, ntempelo eu mmuaba wa mu nyuma kadi ki mmuaba wetu muena dîna eu to. Nansha nanku, tudiku tumumona bu muaba mulelela anyi? Katuena tubuela mu ntempelo eu anu patudi tuya ku Nzubu wa Bukalenge peshi tubulula Bible anyi tukokola ku nzubu kua muntu patudi mu buambi to. Aa mmalu adi muntu wenza adi amueneka ne mêsu. Muena lubombo udi mua kuenza malu aa, kadi kayi mubuele mu ntempelo wa Yehowa to. Nunku, tuetu tuenza malu aa, tutumikila kabidi mikenji ya Yehowa minene ya bikadilu mu nsombelu wetu ne tuenza malu a mu ntendelelu mulelela ne meji mimpe, tudi babuele mu muaba wa tshijila eu ne tudi tuenzamu mudimu, mmumue ne: ndongoluelu muenza bua ntendelelu mukezuke wa Yehowa Nzambi. Tutungunukayi ne kuleja dianyisha bua diakalenga edi dinene. Tutungunukayi kabidi ne kuenza muetu muonso bua kuleja bukezuke bua Yehowa patudi tutumikila mikenji yende miakane.