1. Vyuma muka amwene Ezekele vize vinahase kutukomwesa?

ACHISHINGANYEKENU muli nakumona chakumwenesa ngana chize vamwenesele kapolofweto Ezekele myaka 2,500 kunyima. Munakwingila mutembele yayinene yaupahu, kaha kulutwe lwenu kuli kangelo uze anakumitwaminyina nakumilweza chihela kana. Jino namunyina jindondelo 7 jakuya kuvikolo vitatu. Vikolo kana vyakukomwesa mwomwo vyavisuku kafwe jimita 30. Omu namulinga washa mukachi namumona muli tujizuvo twavaka-kulama, najipanda jakusona kanawa nge mitondo yamikoma.—Ezeke. 40:1-4, 10, 14, 16, 22; 41:20.

2. (a) Tembele yachifwanyisa yemanyinako ika? (Talenu nawa kwinyikila chamwishi.) (b) Vyuma muka natulinangula kujila vatungilamo vikolo vyatembele kana?

² Echi chakumwenesa chemanyinyineko tembele yakushipilitu. Ezekele alumbunwine kanawa eyi tembele kuputuka mukapetulu 40 swi naku 48 mumukanda wenyi waupolofweto. Tembele kana yemanyinako kulemesa Yehova chitoma. Vyuma vyosena vavuluka mutembele kana vyemanyinako vyuma vimwe mukulemesa chetu makumbi ano. * Uno evi vikolo vyavisuku vyemanyinako ika? Vyeji kutwanukisanga nge vaka-kulemesa Yehova vamwenemwene vatela kukavangiza jishimbi jaKalunga jakwoloka. Navifwanyisa vyamikoma vyemanyinako vyuma vyovimwe, mwomwo mikoma kakavulu muMbimbiliya yemanyinako kwoloka. (Samu 92:12) Nyi tuze tujizuvo twavaka-kulama twemanyinako ika? Vaze kavavumbika jishimbi jaKalungako kaveshi kuvetavisa kupwa mukulemesa chamwaza, chitoma chakutwala kukuyoyako.—Ezeke. 44:9.

3. Mwomwo ika vaka-kukavangiza Kulishitu vanasakiwilanga kuvatomesa?

³ Chakumwenesa chaEzekele chinatesamo ngachilihi? Ngana muze twamonanga muKapetulu 2, Yehova azachishile Kulishitu mangana ahehe nakutomesa vatu jenyi kufuma mu 1914 nakuheta mu 1919. Uno echi kuheha chakuminyine vene haze tahi? Nduma. Hamyaka 100 yinahichimo, Kulishitu nakundwizanga lika jishimbi jaYehova javilinga vyamwaza. Vaka-kumukavangiza vanasakiwanga kuvatomesa. Mwomwo ika? Mwomwo Kulishitu nakungululanga vaka-kumukavangiza kufuma mukaye kano kavilinga vyavipi, kaha nawa Satana anakutwalaho lika kuvakoka mangana vakinduluke kuvilinga  vyavo vyavipi. (Tangenu WaPetulu 2, 2:20-22.) Tukekesenu hajijila jitatu jize jinasolola omu vaka-Kulishitu vamuchano vanavatomeselangamo. Chatete, natushimutwila vilinga vize vaka-Kulishitu vatelele kumbila. Chamuchivali, jila vanatomeselemo chikungulwilo, kaha chamakumishilo omu vanatomeselamo jitanga.

4, 5. Satana nazachisanga kafuta muka, kaha vyuma muka vinafumumo?

⁴ Vatu jaYehova vanafwilanga kupwa navilinga vitoma. Kaha vanetavilanga jindongi vanavanangulanga hachihande kanechi. Talenu vyakutalilaho vino.

⁵ Ujila. Yehova ajinyine ngwenyi vapwevo nalunga valimbata vakiko kaha vatela kulisavalanga. Oloze Satana asaka kupihisa ou wana vahana vatu. Nalingisanga vatu vamone kulisavala chavatu vakuhona kulimbata kupwa chakwoloka, mangana ahungumwise navatu jaKalunga. Satana azachishile kafuta kana mumakumbi aMbalame, kaha anakukazachisa chikuma makumbi ano akukuminyina.—Kula. 25:1-3, 9; Kuso. 2:14.

6. Chivwasano muka vasonekele muKaposhi Kakutalila, vachizachishile ngachilihi, kaha mwomwo ika vachifumishilileko? (Talenu nakwinyikila chamwishi.)

⁶ Hakusaka kuhonesa kafuta kaSatana, Kaposhi Kakutalila waJune 15, 1908, vasonekelemo chivwasano chakwamba ngwavo: “Lwola lwosena kaha nawa kweshokwo nguli, vyuma nangulinga kumutu wausonyi weka kumeso avatu vikiko ngwatela kulinga nakupenge nawa.” * Numba tuhu kavakanjikijile vatu kulikasa echi chivwasanoko, oloze vavavulu vetavilile nakutuma majina avo mangana vawasoneke muKaposhi Kakutalila. Numba tuhu vandumbwetu vetavilile chivwasano kana, oloze vavavulu kavachikavangijileko, kaha kutwala muze vachifumishileko. Chipwe ngocho, vandumbwetu vavakolezezele vatwaleho kupwa navilinga vyamwaza.

7. Kaposhi Kakutalila wamu 1935 ahanjikile ika, kaha vyuma muka vatelele kukavangiza vatu jaKalunga?

⁷ Satana atwalileho lika kuhungumwisa vatu jaKalunga. Kaposhi Kakutalila waMarch 1, 1935, ahanjikile hatoma ukalu vapwile nawo vatu jaKalunga. Vamwe vashinganyekelenga ngwavo vanahase kuhokola jishimbi jaYehova kupenge chikalu kaha kuvanazate nangolo mumulimo wakwambulula. Ou kaposhi ahanjikile hatoma ngwenyi: “Mutu atela kwijiva ngwenyi kwazana mumulimo wakwambulula keshi chikiko kaha chasakiwako. Hakupwa tuvinjiho kaha nawa tuvatemesa jaYehova, twatela kupwa navilinga vyamwaza numbanyi twimanyineko Yehova nawangana wenyi.” Ou kaposhi avulukile hatoma jindongi vatela kukavangiza vatu jize jahanjika haulo naujila, ngocho akafwile vatu jaKalunga ‘vachine ujila.’—Koli. 1, 6:18.

8. Mwomwo ika Kaposhi Kakutalila nalumbununanga chikuma lizu lyachiHelase lyaujila?

⁸ Mumyaka yakalinwaha, Kaposhi Kakutalila nalumbununanga lizu vazachisa muVisoneka vyachiHelase lyaujila, por·neia. Eli lizu kalyatalisa kaha kukulisavala chavatu vaze kavalimbatako.  Oloze lyalumbununa vilinga vyaujila vyosena, kuhakilako vene navilinga vyakuzunguma vinalisale myaka yino. Ngachize vaka-kukavangiza Kulishitu vanavakingi kumuheto waujila uze vanandupukilamo vatu vavavulu mukaye kano.—Tangenu Wavaka-Efwesu 4:17-19.

9, 10. (a) Kaposhi Kakutalila wa 1935 ahanjikile vyuma muka? (b) Mbimbiliya yahanjika ika hakunwa wala?

⁹ Kupenda. Kaposhi Kakutalila waMarch 1, 1935, ahanjikile nawa hatato vatelele kumbila vatu jaKalunga, ngwenyi: “Vandumbwetu vamwe vanakwazananga mumulimo wamuwande chipwe kuzata milimo yeka yamuliuka oku vananu wala. Numba tuhu Visoneka vyetavisa kunwa wala, oloze lwola muka mutu atela kunwa? Uno nachipwa chakutamo kunwa wala oku munakuzata milimo yaMwata tahi?”

¹⁰ Jila vakumbulwililemo evi vihula yasolwele omu Mazu aKalunga ahanjika hakunwa wala. Mbimbiliya kayakanyisa mutu kunwa walako, oloze yakanyisa kupenda. (Samu 104:14, 15; Koli. 1, 6:9, 10) Vangamba jaKalunga vavakanyisa kuzata milimo yajila oku vanapende mwomwo vanahase kulimbenja ngana muze chapwile kuli vana vaAlone vaze ajihile Kalunga hakuwika kakahya halijiko lyakulumbila. Ou mujimbu wasolola vyuma vyalingishile ava malunga valinge chumechi chakuhenga. Kalunga ahanyine lushimbi ngwenyi, vapilishitu vosena kavatela kuzata milimo yavo yajila oku vananu walako. (Levi 10:1, 2, 8-11) Namakumbi ano vaka-Kulishitu veji kukavangizanga elu lushimbi hakulihenda kukunwa wala nge vanatachikiza ngwavo navaya nakuzata milimo yajila yaKalunga.

11. Mwomwo ika jindongi vanatambulanga vatu jaKalunga jinavakafwe mukuyoya chavo?

¹¹ Mumyaka yakalinwomu, vaka-kukavangiza Kulishitu vanavahanenga jindongi jakuvakafwa valihende kuutakwa. Kulya chakushipilitu vanatuhanenga halwola lwakutamo, chinakafwe vavavulu valihende kutato kana, kaha vanakuyoya jino kanawa. Veka vanalitwamina vene nakunwa wala. Tuvosena katwatela kwechelela wala utusawise hamwe kaha najitanga jetu, nakutulingisa tuhone kuzata kanawa milimo yaYehovako.

12. Putu vene kunyima, vangamba jaKulishitu vamona ngachilihi kunwa makanya?

¹² Kunwa makanya. Putu vene kunyima, vangamba jaKulishitu vanavahuhumunanga valihende kukunwa makanya. Ndumbwetu wakashinakaji Charles Capen anukile lwola lwatete alihumanganyine nandumbwetu Charles Taze Russell mumyaka yakukokela ku 1900. Halwola kana, ndumbwetu Capen apwile namyaka 13, kaha ayile navandumbwenyi vatatu kuzuvo vavulukilenga ngwavo Bible House muAllegheny, Pennsylvania. Omu ndumbwetu Russell apwile nakuhita, avahulishile ngwenyi: “Enu vanyike muli nakunwa makanya? Ngunevu livumba lyamakanya.” Vamukumbulwile ngwavo chiku. Ava vanyike vatachikijile ngwavo ndumbwetu Russell ketavishile kunwa makanyako. MuKaposhi Kakutalila  waAugust 1, 1895, ndumbwetu Russell ahanjikile hachisoneka chaWavaka-Kolinde 2, 7:1, ngwenyi: “Kachi nge muka-Kulishitu mwanwa makanya, keshi nakutohwesa Kalungako, kaha nawa nevi mwawanaho vene vyauchi. . . . Mwata wetu kanwinenga makanya chipwe kuhaka mukanwa kenyi vyuma vyakupihisa mujimbako.”

13. Vyuma muka vakanyishile vatu jaKalunga mu 1973?

¹³ Mu 1935, Kaposhi Kakutalila avulukile makanya kupwa “vyuma vyaunyengwe.” Ambile ngwenyi weshowo anwinenga chipwe kutafunya makanya katelemo kupwa haMbetele chipwe kwimanyinako liuka lyaKalunga hakuzata upayiniya chipwe kutambukila vikungulwiloko. Kuheta mu 1973 valumbunwine kanawa chihande kanechi. Kaposhi Kakutalila waJune 1 alumbunwine ngwenyi weshowo Chinjiho chaYehova apwile nakunwa makanya keshi kuhasa kupwa napuho yamwaza muchikungulwiloko. Vosena vaze vakanyine kumbila makanya vavafumishilenga muchikungulwilo. * Kulishitu alingile nawa vyuma vikwavo vize vyatomesele vaka-kumukavangiza.

14. Kalunga amona ngachilihi manyinga, kaha kuhaka vatu manyinga chatandakanyine ngachilihi?

¹⁴ Manyinga. Mumakumbi aNowa, Kalunga ahanjikile ngwenyi chapwile chakuhenga kulya manyinga. Ahanjikile nawa chuma kana hakuhana vaIsalele Jishimbi, kaha nawa alwezele chikungulwilo chavaka-Kulishitu ‘valihende kumanyinga.’ (Vili. 15:20, 29; Kupu. 9:4; Levi 7:26) Chaluvinda, makumbi ano Satana ali nakafuta kaze anakuzachisa mangana vatu jaKalunga vahokole elu lushimbi. Muji 1900, vandotolo vaputukile kwesejeka jijila jakukilamo vatu kuzachisa manyinga, kahomu vawanyine jila kana, yatandakanyine kumafuchi amavulu. Mu 1937, vaputukile kufumisa vatu manyinga nakuwalama, kahomu Jita yaKaye yamuchivali yepukile, vatu vavahakilenga chikuma manyinga. Kutwala muze, mukaye kosena vahakilenga vatu manyinga.

15, 16. (a) Vinjiho jaYehova valingile ngachilihi hachihande chakuhaka manyinga? (b) Jila muka Kulishitu nazachisa hakukafwa vaka-kumukavangiza, kaha yinafukila ngachilihi?

¹⁵ Mu 1944, Kaposhi Kakutalila ahanjikile hatoma ngwenyi kuhaka mutu manyinga chapwile hikulya manyinga. Mwaka wakavangijileho, chihande kana vachilumbunwine kanawa. Kuheta mu 1951, vasonekele chihande chavihula nakukumbulula chize vatu jaKalunga vazachishilenga hakushimutwila navandotolo. Vaka-kukavangiza Kulishitu mukaye kosena vomikilenga nakukana manyinga, numba tuhu vavahendelenga, nakuvahunga, nakuvayanjisa. Oloze Kulishitu atwalileho lika kuvakafwa kuhichila muliuka lyenyi. Vasonekele jimbuloshuwa namikanda yeka yakuvakafwa.

¹⁶ Mu 1979, tulama vamwe vaputukile kutambukila vipatela mangana vakafwe vandotolo vatachikize ovyo twakanyina kutuhaka manyinga, nakuvalweza jijila jeka jakutukilamo chakuzeneka kutuhaka manyinga. Mu 1980, tulama vakufuma mujinganda 39 muUnited States vavanangwile mwakuzachila ou mulimo. Kutwala muze, Lizavu Lyakutwaminyina  lyetavishile vandumbwetu vatunge jiKomiti jaKulivwasana naVipatela mukaye kosena. Uno ou mulimo unafukila tahi? Makumbi ano, vandotolo vavavulu navakuluwa veka valinangula vitumbo, vanalisuula kuka Vinjiho chakuzeneka kuvahaka manyinga. Vipatela vyavivulu jino vinakuka vaveji chakuzeneka kuvahaka manyinga, kaha vanawane nge jila kana yikiko yamwenemwene. Chapundu vene, tunakwivwa kuwaha hakumona omu Yesu anakutukingilamo kuli Satana ahone kutuhungumwisa.—Tangenu Wavaka-Efwesu 5:25-27.

17. Natusolola ngachilihi ngwetu twasakwilila hajila anakutukafwilamo Kulishitu?

¹⁷ Hakushinganyeka omu Kulishitu natomesa vaka-kumukavangiza, nakuvanangula vakavangize jishimbi jaYehova nakupwa navilinga vyamwaza, tulihulisenu ngwetu, ‘Uno nayami ngwamona mulimo anakuzata Kulishitu kupwa waulemu tahi?’ Nge mukiko, kaha twanukenu ngwetu Satana anakufwila lika kutuhandula kuli Yehova naYesu hakutukunyula tumone vilinga vyavipi kupwa vyamwaza. Hakusaka kuhonesa Satana, liuka lyaYehova linatuhuhumunanga nakutwanukisa tulihende kuvilinga vyavipi vyamukaye kano. Tupwenu lika vakuvanguluka, nakwitavila, nakwononoka vyuma vyosena vanakutuhuhumuna.—Vishi. 19:20.

18. Chakumwenesa chaEzekele chatukafwa ngachilihi tutachikize vyeji kusolokanga kuli vaka-kulikanga kujishimbi jaKalunga?

¹⁸ Jila yamuchivali natomeselamo Kulishitu vatu jenyi shina kutomesa chikungulwilo. Chaluvinda, vamwe vaze veji kwitavilanga jishimbi jaYehova nakulihana kuli Kalunga kaveshi kutwalaho lika kupwa vakushishikako. Vamwe veji kwalumukanga nakukana jishimbi kana. Vatu kana veji kuvalinganga ngachilihi? Tukekesenu chakumwenesa chaEzekele chatembele yakushipilitu chize twahanjikanga kumaputukilo akapetulu uno. Anukenu vize vikolo vyavisuku. Muchikolo hichikolo, mwapwile tujizuvo twavaka-kulama. Vaka-kulama valaminenga tembele, nakukanyisa ‘vaze vakuzeneka kujihana mumichima’ kwingilamo. (Ezeke. 44:9) Echi chinakulumbununa nge kulemesa chamuchano chapwa kaha chavatu vaze vafwila kukavangiza jishimbi jaYehova nakupwa navilinga vyamwaza. Namakumbi ano, vatu vamwe kaveshi nalisesa lyakulemesela hamwe Kalunga navakwavoko.

19, 20. (a) Kulishitu nakafwenga ngachilihi vaka-kumukavangiza vatachikize mwakusopela milonga yayinene? (b) Vyuma muka vitatu veji kufumishilanga mutu muchikungulwilo?

¹⁹ Mu 1892, Kaposhi Kakutalila ahanjikile ngwenyi, “wapwa himulimo wetu wakufumisa mutu (muka-Kulishitu) muchikungulwilo uze mwakana ndando yakusokola atuhanyine Kulishitu.” (Tangenu WaYowano 2, 10.) Mu 1904, mukanda waThe New Creation wahanjikile ngwawo vosena vaze navapwa lika navilinga vyavipi navaneha ukalu muchikungulwilo. Halwola kana, vandumbwetu vosena muchikungulwilo vatwaminenga hamwe nakusopa milonga yayinene vavulumwinenga vandumbwetu. Oloze milonga kana kayavulilengako. Mu 1944, Kaposhi Kakutalila avulukile ngwenyi tulama kaha vakiko vatela kusopanga milonga kana. Mu 1952, Kaposhi Kakutalila alumbunwine jila yamuMbimbiliya yakusopelamo milonga, kaha alumbunwine nawa nge veji kufumisanga mutu muchikungulwilo mangana chipwenga chitoma.

²⁰ Mumyaka yinahichimo, Kulishitu nakafwenga vaka-kumukavangiza vatachikize mwakusopela milonga yayinene. Vakulwane muchikungulwilo vavanangula vasopenga milonga mujila yakeke nachiyulo, kweseka nomu asaka Yehova. Makumbi ano kwatwama vyuma vitatu veji kufumishilanga mutu muchikungulwilo uze nakane kupihilila nakwalumuka: (1) mangana lijina lyaYehova vahone kulisaula, (2) mangana vakinge vatu muchikungulwilo vahone kulondezeza uze muka-shili, (3) mangana vakafwe uze navulumuna apihilile nakwalumuka nge chinahase.

21. Mujila muka kufumisa mutu muchikungulwilo chapwila kutokwa kuvatu jaKalunga?

²¹ Munamono omu kufumisa mutu muchikungulwilo chinakafwe vaka-kukavangiza Kulishitu makumbi ano nyi? Kushikulu muIsalele, vaka-kuhuka vahungumwishilenga vakwavo, kaha lwola lumwe vatu kana vavulile chikuma kuhambakana vaze vazangile Yehova nakufwila kulinga mwamwaza. Ngocho vatu kana vasawishilenga lijina lyaYehova,  kaha Yehova kavevwililenga uselewako. (Yele. 7:23-28) Makumbi ano, Yehova anakuzata navatu vakumiyachi yosena vaze vafwila kumukavangiza. Hakuwana nge vaka-kuhuka vaze kavasaka kupihilila nakwalumukako veji kuvafumisanga muchikungulwilo, ngocho Satana keshi kuhasa kuzachisa vatu kana mangana vahungumwise vatu muchikungulwilo nakuchipihisako. Yehova eji kutukinganga mwalizavu. Anukenu ngwenu Yehova atufwelelesa ngwenyi: “Vyeshovyo vitwa navakafula mangana vakakuzungise, kavyeshi kukafukilako.” (Isa. 54:17) Kutala tweji kukundwizanga vakulwane vaze vatwama namulimo waukalu wakusopa milonga nyi?

22, 23. Vyuma muka valingilenga vaka-Kulishitu vamuji 1900 vize navitulingisa tuvasakwilile, oloze vyuma muka vatelele kuzachilaho kutalisa kujitanga?

²² Jila yamuchitatu vananganyala vaka-kukavangiza Kulishitu shina kuvatomesa kuchiyoyelo chaulo natanga. Uno jila twamwenamo tanga vanayalumunanga tahi? Eyo. Chakutalilaho, omu tweji kutanganga mijimbu yavangamba jaKalunga vamuji 1900, tweji kulikomokelanga nakwivwa kuwaha hamuchima wavo wakulisuula. Tweji kwivwanga kuwaha hakumona omu vahakilenga mulimo wajila kulutwe mukuyoya chavo. Chipwe ngocho, kwapwile vyuma vimwe vatelele kuzachilaho. Mujila muka?

²³ Shimbu jimwe vandumbwetu vapwilenga nakuseza jitanga javo nakuya kujingalila jeka nakwambulula mujimbu chipwe kutambukila vikungulwilo hatukweji vavavulu. Lwola lumwe, vapwile nakukanyisa vandumbwetu kwingila muulo, numba tuhu Visoneka kavyahanjika ngochoko. Kaha nawa kakwapwile vihande vyavivulu vyahanjikilenga hakuzamisa malo avaka-Kulishituko. Uno evi vikiko vinakusoloka kuli vaka-kukavangiza Kulishitu makumbi ano nyi? Nduma.

24. Kulishitu nakafwe ngachilihi vangamba jenyi vatachikize jindongi jajivulu jamuVisoneka mangana vazamise malo najitanga javo?

²⁴ Makumbi ano, mutu katela kusuvilila tanga yenyi mwomwo yakuzakama milimo yakushipilituko. (Tangenu WaChimoteu 1, 5:8.) Kulishitu anakuhana vaka-kumukavangiza jindongi jajivulu jamuVisoneka mangana vazamise malo najitanga. (Efwe. 3:14, 15) Mu 1978, valowele mukanda waMaking Your Family Life Happy. Kahomu mwahichile myaka 18 valowele mukanda waJila Yakuwana Kuwahilila chaTanga. MuKaposhi Kakutalila nawa munapunga vihande vyavivulu vyakukafwa vaze valimbata vakavangize jindongi jamuVisoneka muulo wavo.

25-27. Vanyike navakweze vanavakafwenga ngachilihi kushipilitu?

²⁵ Nyi ngachilihi vanyike? Navakiko vanavazakamanga chikuma hamyaka yayivulu. Liuka lyaYehova linahanenga vanyike navakweze vyuma vyamwaza vyakushipilitu, kaha makumbi ano vinavulu nyi kuya muze. Chakutalilaho, kwapwilenga chihande chakwamba ngwavo, “Chilongesa chaMbimbiliya chaVanyike” chize chalovokelenga muTonenu! kufuma  mu 1919 swi namu 1921. Mu 1920 kwalovokele mbuloshuwa yaThe Golden Age ABC, kaha mu 1941 kwalovokele mukanda waChildren. Muji 1970, kwalovokele mukanda waListening to the Great Teacher, naYour Youth—Getting the Best out of It, naMukanda Wami waVihande VyamuMbimbiliya. Mu 1982, muTonenu! mwaputukile kulovoka chihande chakwamba ngwavo “Vakweze Veji Kuhulisa Ngwavo,” kaha kuheta mu 1989 valowele mukanda waQuestions Young People Ask—Answers That Work.

²⁶ Makumbi ano, kuli mikanda yivali yaYoung People Ask, kaha kuli vihande vyeka vali nakusonekanga hakeyala yetu ya jw.org. Tuli nawa namukanda waLinangule Kuli Mulongeshi Wamunene. Hakeyala yetu yahaInternet hali vyuma vyavivulu vyavakweze navanyike, vyakufwana nge jikati javatu vasoneka muMbimbiliya, omu vanyike navakweze vanahase kulinangula Mbimbiliya, vihula nakukumbulula, jivindiyo, mijimbu yamuMbimbiliya vafunjejeka hamivwimbimbi, navihande vyamuMbimbiliya vyavanyike vamyaka yitatu nakuneha mwishi. Pundu vene, Kulishitu amona vanyike kupwa vavalemu, shikaho avakungulwilile nakuvasata mulikulukaji lyamyaka lyakulivanga.  (Mako 10:13-16) Asaka vanyike navakweze valyenga kulya chakushipilitu chamwaza nakutachikiza ngwavo vavazanga.

²⁷ Yesu asaka nawa vanyike vavakinge kuvyuma vize vinahase kuvenyeka. Makumbi ano mukaye munazale navilinga vyavipi, kaha vanyike vanakuvapikanga chikuma. Ngocho kuli mijimbu najindongi jamwenemwene vanasoneka jakukafwa visemi vakinge vana vavo kuponde kaneyi. *

28. (a) Vyuma muka twatela kulinga numba tulemese Yehova mujila yitoma, kweseka natembele vamwenesele Ezekele? (b) Vyuma muka munakufwila kulinga?

²⁸ Tweji kwivwanga kuwaha hakushinganyeka omu Kulishitu natomesa vaka-kumukavangiza, nakuvanangula vakavangizenga jishimbi jaYehova jakupwa navilinga vyamwaza. Achishinganyekenu nawa hatembele yize amwene Ezekele muchakumumwenesa. Anukenu vize vikolo vyavisuku. Eyi kayapwa tembele yakutunga namavokoko, oloze yapwa yakushipilitu. Uno tweji kuyimonanga nge hitembele ivene tahi? Tweji kwingilanga mutembele kana, keshi nge hakuya kaha kuZuvo yaWangana, nahakutanga Mbimbiliya, nahakuyanga nakwambululako. Mwomwo kala mutu nahase kulinga vyuma kanevi. Mutu keshi kuhasa kwingila mutembele yaYehovako kachi nge apwa muka-kulyonga. Oloze nge katweshi kupwa vaka-kulyongako, nakukavangiza nawa jishimbi jaYehova, nakupwa navilinga vyamwaza nakumulemesa mujila yize asaka namuchima wetu wosena, kaha tunengila chikupu muchihela chajila chikuma nakuzachilamo, kulumbununa nge tunakulemesa Yehova Kalunga mujila yitoma yize asaka. Tumonenu kutokwa chetu chakupwa mutembele yakushipilitu kupwa chachilemu. Tufwilenu kuzata nangolo tupwenga vajila hakukavangiza jishimbi jaYehova jakwoloka mwomwo ivene apwa wajila.