1. Chumanyi chamweniyi Ezekeli chatuhayamishaña?

MWADI kwila ñahi neyi yenu mwamweni chuma chamweniyi kaprofwetu Ezekeli kunyaka? Fwikijenu chumichi: Muneñili mutembeli yeneni yatuñawu nalubanji. Mudi kañelu wañovu wunakuyilombola muniyi tembeli yalubanji! Himukukandama jintampu jitanu najiyedi kulonda mwiñili muchisu chimu hayiisu yisatu. Iyi yiisu yinayihayamishi chikupu. Yaleha jimita 30 kuya mwiwulu. Muyiisu yakuwiñililu mwejima mudi tumatala twawatulama. Kuyishimi abazilaku nyitondu yanyikoma yayiwahi.—Ezek. 40:1-4, 10, 14, 16, 22; 41:20.

2. (a) Indi iyi tembeli yakuspiritu yamweniyi muchimwenu yemenañaku kwodi? (Talenu cheñi tumazu twaheshina.) (b) Twadizilañaku kwodi kuyuma yekala kuwiñililu watembeli?

² Iyi diyi tembeli yakuspiritu yamweniyi muchimwenu. Ezekeli wayilumbulula iyi nsañu chiwahi chakwila yekala mukapetulu 40 nakushika mu 48 mumukanda windi wawuprofwetu. Iyi tembeli yemenañaku ntanjikilu yaYehova yakudifukula kwalala. Yuma yejima yinashimuniwu muniyi tembeli yikweti muyalumbulukila mukudifukula kwetu munanu mafuku akukuminina. * Indi yiisu yayilehi yalumbulukadi? Yatwanukishaña nawu antu eñilaña mukudifukula kwaYehova kwalala atela kwovwahila nshimbi jaNzambi jaloña. Nyitondu yanyikoma yabazawu niyena yatwanukishaña chikuma chochimu, muloña mpinji yikwawu muBayibolu nyikoma yemenañaku kuloña. (Mas. 92:12) Indi matala awatulama amwekeshañadi? Amwekeshaña nawu antu akañanyaña kwovwahila nshimbi jaNzambi jajiwahi ayikaanishaña kwiñila mukudifukula kwalala kwahandishaña antu.—Ezek. 44:9.

3. Muloñadi Kristu chinatwalekihu kutookesha atumbanji twindi?

³ Indi chimwenu chaEzekeli chinashikijewi ñahi? Neyi chitwashimwini mukapetulu 2 kawunu mukanda, Yehova wamuzatishili Kristu kulonda yazakasi antu jindi kufuma mu 1914 nakushika kumatachikilu a 1919. Komana iku kuzakasa dikwadiña kwamakumishilu? Kwakulehi! Hayaaka 100 yinahituhu, Kristu natwalekihu kulemesha nshimbi jaYehova jajila. Dikwila nawu atumbanji twindi anatwalekihu kuyitookesha. Muloñadi? Muloña Kristu natwalekihu kupompesha atumbanji twindi kufuma mukaayi katama ilaña Satana niyena natwalekihu kuyikokela mumajilu. (Tañenu 2 Petulu 2:20-22.)  Tushinshikenu njila jisatu mwayitookeshelawu akwaKristu alala. Tukusambila kushinshika chayitookeshawu muyilwilu, tukushinshika cheñi njila yakwashaña chipompelu kwikala chitooka nintanjikilu yachisaka.

4, 5. Kafutanyi kazatishañayi Satana nawa mwafumaña yumanyi?

⁴ Antu jaYehova afwilaña kwikala nayilwilu yayiwahi. Dichi ovwahilaña nshimbi jahoshaña haniyi nsañu. Shinshikenu yakutalilahu yantesha.

⁵ Wuvumbi. Yehova wafuukwili nindi antu adisumbula adikameña munjila yatelela nawa adiluñisheña. Satana watiyaña kuwaha kubalumuna iyi ntanjikilu yakudikama kwawantu adisumbula kwikala chuma chamajilu kuhitila mukuzatisha wuvumbi kulonda yeseki antu jaYehova ajimbeshi wuselewa wawu naNzambi. Nimumafuku aBalami Satana wazatishili wuvumbi hakuluwañesha antu jaNzambi nawa nakuzatisha chuma chochimu munanu mafuku.—Kuch. 25:1-3, 9; Chim. 2:14.

6. Kusanyikanyi kwasonekeliwu muKaposhi Kakutalila nawa antu amavulu elili ñahi naniku kusanyika, chumanyi chaletesheli akumoni nawu kwalema wanyi? (Talenu cheñi tumazu twaheshina.)

⁶ Hakwila nawu ashindi aka kafuta kaSatana, muKaposhi Kakutalila kachizungu kaJune 15, 1908, mwadiña nsañu yakusanyika yasonekeliwu nawu: “Mpinji yejima, kumaluña kwejima neyi nidi namuntu wunabula kwikala nindi muwulu nukudihembaña neyi chinadihembaña hakachi kawantu amavulu.” * Hela chakwila hiyadiña nakuyikanjikija kusanyika muniyi njilaku, amavulu ovwahilili nawa asonekeli majinawu kulonda ayidishi mumagazini yaZion’s Watch Tower. Chimwahitili yaaka yayivulu, amweni nawu hela chakwila iku kusanyika kwakwashileña antu amavulu, ilaña atachikili kukumona neyi kwalema wanyi dichi alekeli kukuzatisha. Hela chakwila alekeli, ilaña ovwahilileña nshimbi yayiwahi yiyemeneneñaku.

7. Mu 1935, Kaposhi Kakutalila kahosheli hakukalanyi, nawa kakonkomweneni hachumanyi?

⁷ Satana watwalekelihu nakuyilukuka. Kaposhi Kakutalila kaMarch 1, 1935, kashimwini hatooka to-o kukala kwatachikili kumonawu antu jaNzambi. Antu amakwawu atachikili kutoñojoka nawu chineli adiñi nakushimwina, hiyateleli kwovwahila nshimbi jaYehova muchihandilu chawuku. Akana Kaposhi Kakutalila kashimwini nawu: “Muntu watela kwanuka nindi kuzata mumudimu wakushimwina hidichi chuma chakeñekaña hohuku. A Yinsahu jaYehova amwimenañaku Yehova nawa akweti mudimu wakumwimenaku Yehova niWanta windi munjila yayiwahi.” Aka kaposhi kafumbili chachiwahi hansañu yamawulu niwuvumbi nawa kayikwashili antu jaNzambi ‘kutemuka wuvumbi.’—1 Kor. 6:18.

8. Muloñadi Kaposhi Kakutalila chikakonkomwenaña nankashi mwatalisha izu dachiGiriki dahosha hawuvumbi?

⁸ Haniyi yaaka yinahiti, Kaposhi Kakutalila kanakonkomweni nankashi mwatalisha izu dahosha hawuvumbi dazatishawu munyikanda yachiGiriki dakwila nawu por·neiʹa. Idi izu hidatalisha  hohu mukudikamaku. Ilaña, por·neiʹa yabombelamu yilwilu yayivulu yatama, nankashi yilwilu yawukapwa nsonyi yakoñañawu mumatala awanyatulwalu. Dichi, atumbanji twaKristu ayikiña kuniwu musoñu wawuvumbi munadiñiji antu amavulu makonu mukaayi.—Tañenu Aefwesesa 4:17-19.

9, 10. (a) Mu 1935, Kaposhi Kakutalila kahosheli hakukalanyi kukwawu? (b) Bayibolu yatañishaña nawudi hansañu yakunwa walwa?

⁹ Kusweja kunwa walwa. Kaposhi Kakutalila kaMarch 1, 1935, kahosheli cheñi hakukala kukwawu kwakunwa walwa nawu: “Chinamwekani nawu amakwawu ayaña nakushimwina nikuzata nyidimu yikwawu mukuloñesha henohu anasheti. Kwesekeja naBayibolu, muntu nateli kunwa walwa mpinjinyi? Komana muntu watela kunwa walwa iku wunakuzata mudimu waMwanta?”

¹⁰ Aka Kaposhi kahosheli nankashi hakunwa walwa kwatelela kwawanikaña Mwizu daNzambi. Bayibolu hiyakaanishaña kunwa walwaku, ilaña yakaanisha kusheta walwa. (Mas. 104:14, 15; 1 Kor. 6:9, 10) Kutalisha hakuzata nyidimu yaNzambi henohu muntu nanwi walwa, ambuña Nzambi kakavulu ayanukishaña nsañu yahosha hadi anyana kaAroni awamayala, ajahiliwu kudi Nzambi muloña alambwili mulambu hakameña chakadi kuyinka lusesa. Kuhiñahu, iyi nsañu yahoshaña chaletesheli awa amayala kwila chuma chabula kushikilamu, muloña Nzambi waheni lushimbi lwakaanishili atupristu ejima kunwa walwa neyi anakuzata mudimu wajila. (Lev. 10:1, 2, 8-11) Atumbanji twaKristu niwena makonu atela kuzatisha ilu lushimbi, hiyatela kunwa walwa hampinji yinakuzatawu mudimu wajilaku.

11. Antu jaNzambi ayikwasha ñahi kwiluka nsañu yayivulu yahosha hakuteñuka nawalwa?

¹¹ Haniyi yaaka yinahiti, atumbanji twaKristu ayikwasha kwiluka nsañu yayivulu yahosha hakuteñuka dikwila nawu kukeña kunwa walwa mpinji yejima. Yakuda yakuspiritu yahanañawu yinakwashi antu amavulu kumanisha iku kukala muchihandilu chawu. Antu amakwawu ayikwasha nawa aleka iku kukala. Kwosi muntu watela kwiteja kusheta walwa kumusawishi, kuluwañeshi chisaka chindi, nikukooleka kukwetiyi kwakudifukula kudi Yehova.

12. Indi ambuña Kristu amweneña ñahi nsañu yakunwa makanya henohu mafuku akukuminina kanda?

¹² Kunwa makanya. Ambuña Kristu atachikili dehi kukaanisha kunwa makanya henohu mafuku akukuminina kanda. Hayaaka yayivulu yinahituhu, manakwetu wachikulumpi Charles Capen, wanukili hadimweniyi naCharles Taze Russell katachi kukumana kwayaaka yamuma 1800. Manakwetu Capen hadiñayi nayaaka 13 washakamini hamasitepusi amwitala daBible House muAllegheny, Pennsylvania, hamu niamanakwindi asatu muyasemukilawu. Manakwetu Russell chahitiliyi wayihwili nindi: “Enu atwansi munakunwa makanya? Natiyi ivumba damakanya.” Akaanini chikupu nawu anwineña makanya wanyi. Chakadi nikujina elukili nawu wahela makanya. MuKaposhi Kakutalila kaAugust 1, 1895, Manakwetu Russell wahosheli ha 2 Akorinda 7:1, nindi: “Nakañanyi kumona  chichinateli kumulemesha Nzambi, hela kumukwasha mukwaKristu yomweni neyi yazatishaña makanya munjila yidi yejima. . . . Hitunateli nikumufwikija Mwanta nakununka makanya hela kusha chuma chejima chatama mukanwa kindiku.”

13. Indi mu 1973 ambuña Nzambi ayikwashili ñahi kwikala nayilwilu yayiwahi?

¹³ Mu 1935, Kaposhi Kakutalila kateneni makanya nawu “himbutu yatama” nawa kahosheli nawu muntu wejima wukuda hela kunwa makanya hateleli kwikala muchisaka chaBeteli hela kuzata mudimu waNzambi wudi neyi wupayiniya hela mudimu wakwendaku. Mu 1973 ambuña Nzambi ayikwashili cheñi kwikala nayilwilu yayiwahi. Kaposhi Kakutalila kaJune 1 kalumbulwili nawu kwosi Chinsahu chaYehova watela kwikala mukuloñesha iku nakuzatisha ichi chuma chakisaña nakutamisha mujimbaku. Ana antu ejima akaanini kuleka kuzatisha makanya ayihañili muchipompelu. * Kristu wazatishili njila yikwawu yalema yakutookeshelamu atumbanji twindi.

14. Nzambi wahosha nindidi hansañu yamashi, nawa chaaku chakusha mashi mumujimba chatandili ñahi?

¹⁴ Kusha mashi mumujimba. Mumafuku aNowa, Nzambi washimwini nindi kuda mashi kwatama. Iyi nsañu yakubula kuda mashi wayihosheli cheñi muLushimbi lwenkeliyi muza wawaIsarela nawa walejeli cheñi chipompelu chawakwaKristu ‘kutondolwela . . . mashi.’ (Yil. 15:20, 29; Kutach. 9:4; Lev. 7:26) Dihafumini Satana kukojeja antu amavulu kubula kwovwahila ilu lushimbi lwahaniniyi Nzambi. Muyaaka yamuma 1800, andotolu akeñeleña kwiluka neyi chakwila muntu nateli kuhanda neyi amusha mashi mumujimba, ilaña chelukiliwu nawu mashi ekala munyitapu, chaaku chakusha mashi mumujimba chatandili kwejima. Mu 1937, atachikili kusenda mashi nakuyihemba, dichi chatachikili Njita Yakaayi Yamuchiyedi, antu amavulu adiñi nakuyisha mashi mumujimba. Hashimbwili wanyi, ichi chaaku chakusha mashi mumujimba chatandili mukaayi kejima.

15, 16. (a) Indi aYinsahu jaYehova elilidi hansañu yakusha mashi mumujimba? (b) Atumbanji twaKristu anayikwashi ñahi hansañu yakusha mashi mumujimba nikuyuuka chakadi kuzatisha mashi nawa mwafumadi?

¹⁵ Mu 1944, Kaposhi Kakutalila kashimwini nawu kusha mashi mumujimba chochimu nakuda mashi. Chaaka chalondelelihu, ilu lushimbi lwamuNsona alulumbulwili chiwahi nikulukolesha. Chashikileña chaaka cha 1951, edishili mukanda mwadiña malwihu niñakwilu akwashili antu jaNzambi kwiluka mwakwakwila andotolu. Atumbanji twaKristu ashinshika mukaayi kejima, ovwahilileña iwu wunlomboli hela chakwila adiñi nakuyidimbulula nikuyikabisha. Nawa Kristu watwalekelihu kukwasha kuloñesha kwindi kulonda kwidishi nsañu yayivulu yakeñekaña. Edishili mabuloshuwa niyibaaba yashimwini chachiwahi hansañu yamashi.

¹⁶ Mu 1979, aeluda atachikili kwendela yipatela kulonda aleji andotolu chitwakaaninaña mashi nichahosha Nsona, nikuyikwasha kwiluka njila jikwawu jakuukilamu chakadi kuzatisha mashi. Mu 1980, aeluda amunyisumba 39 mwituña  daUnited States ayidizishili chakuzata iwu mudimu. Mukuhita kwampinji, Izanvu Dalombolaña detejeli kutuña nyitayi yaHospital Liaison Committee mukaayi kejima. Komana muniku kudikita mwafuma yuma yayiwahi? Andotolu amavulu makonu alemeshaña mwafuukulañawu aYinsahu nawa ayuukaña chakadi kuzatisha mashi. Yipatela yayivulu yinakuuka ayeji chakadi kuzatisha mashi, nawa andotolu amakwawu ahoshaña nawu kwosi njila yikwawu yinateli kwesekana naniyiku. Yesu wakiñaña atumbanji twindi kudi Satana kulonda yabuli kuyitamisha, nawa chumichi chatuzañaleshaña nankashi.—Tañenu Aefwesesa 5:25-27.

17. Tunateli kumwekesha ñahi netu twalemesha Kristu chakwashañayi atumbanji twindi kwikala nayilwilu yayiwahi?

¹⁷ Twatela kudihula netu, ‘Komana twalemesha chatookeshañayi Kristu atumbanji twindi, chanatukwashiyi kulondela nshimbi jaYehova jahosha hayilwilu yayiwahi?’ Neyi twalemesha, twatela kwiluka netu Satana nakufwila kutwambula kudi Yehova niYesu kuhitila mukukisañana yilwilu yetu yayiwahi. Hakwila tumushindi, kuloñesha kwaYehova kwatusoñamishaña mpinji yejima hayilwilu yatama yamukanu kaayi. Twatela kwikala asoñama, kutiya kukufumba, nikwiteja mwejima munakutufumbawu.—Yish. 19:20.

18. Chimwenu chamumwekesheleluwu Ezekeli chatwanukishaña chumanyi kutalisha hadi antu adikañaña mumushikila nanshimbi jaNzambi?

¹⁸ Njila yamuchiyedi yakukwashilamu antu jaNzambi kwikala nayilwilu yayiwahi hikuhemba chipompelu chikali chitooka. Chawushona, bayi neyi antu ejima ovwahilaña nshimbi jaYehova nikudihana kudi Nzambi atwalekañahu kwila mwafuukulañawuku. Amakwawu adikañaña nakuleka kwovwahila nshimbi jeniji mumushikila. Antu amuchidiwu ayilaña ñahi? Chimwenu chamumwekesheleluwu Ezekeli chahosha hatembeli yakuspiritu chidi kumatachikilu, chikutukwasha kwiluka chayilañawu. Anukenu yina yiisu yayilehi. Hachiisu nichiisu hekala tumatala twawatulama. Atulama akiñileña tembeli kulonda akañeshi antu adiña ‘ayidima munyichima’ kwiñila mutembeli. (Ezek. 44:9) Chumichi chatwanukishaña nawu antu ovwahilaña nshimbi jaYehova jajiwahi diwu atela kwikala nakukooleka kwakwikala mukudifukula kwalala. Munjila yoyimu, antu adikañaña nanshimbi jaNzambi hiyayitejaña kudikunda nawakwawu akwaKristuku.

19, 20. (a) Indi Kristu nakwashi ñahi atumbanji twindi kwiluka mwakusompela nyiloña yakala? (b) Yikumanyi yisatu yaleteshaña ahañi muntu wabulaña kubalumuka mumuchima?

¹⁹ Mu 1892, Kaposhi Kakutalila kahosheli nawu “tukweti mudimu wakuhaña akwaKristu akaanaña mumushikila hela chakadi kwiluka nawu Kristu wadiheni kwikala ifutu danyiloña [desekana] dawantu dejima.” (Tañenu 2 Yowanu 10.) Mu 1904, mukanda wateneneñawu nawu The New Creation washimwini nawu antu akakelaña kuyilwilu yatama anateli kuleta wufwinda muchipompelu. Hayina mpinji, chipompelu chejima chahumañeneña “nakusompesha muchechi” nyiloña yakala. Hela chochu, hiyasompeleña mpinji yejimaku. Mu 1944, Kaposhi Kakutalila kashimwini nawu amanakwetu alombweleña hohu diwu atela kusompa nyiloña yamuchidiwu. Mu 1952, muKaposhi Kakutalila asonekelimu nsañu yashindamena haBayibolu yahosheleña hakusompesha nyiloña, nawa kashimwini muloña watela kuhañilawu antu abulaña kubalumuka munyichima kulonda ahembi chipompelu chikali chitooka.

²⁰ Kufuma tuhu hayina mpinji, Kristu nakwashi atumbanji twindi kwiluka mwakusompela nyiloña yamuchidiwu. Aeluda akwaKristu ayidizishaña nakanañachima kulonda eluki chakusompa nyiloña munjila yakeñañayi Yehova, dikwila nawu kumwekesha luwi niwuñanji. Makonu tweluka chikupu yikuma yisatu yaleteshaña ahañi muntu muchipompelu wabulaña kubalumuka mumuchima: (1) kulonda ijina daYehova dibuli kusawuka, (2) kukiña chipompelu kudi antu avulumunaña nshidi yahamesu bwi-i, (3) kukwasha muntu wunavulumuni yabalumuki mumuchima neyi chinatwesheki.

21. Indi kuhaña antu abulaña kubalumuka munyichima kunakwashi ñahi antu jaNzambi?

²¹ Komana munamoni kuhaña muntu wabulaña kubalumuka mumuchima chikunakwashi atumbanji twaKristu makonu? Mumpinji yawaIsarela, kakavulu neyi muntu wudi nayilwilu yatama, waletesheleña muza wejima kwikala nayilwilu  yatama, mpinji yikwawu antu wenawa avulileña kubadika antu amukeñeli Yehova nawa afwilileña kwila mwaloña. Dichi iwu muza waleteli kasawuntu hejina daYehova nawa Nzambi walekeli kuyikwasha. (Yere. 7:23-28) Ilaña makonu, Yehova nakuzatisha antu akunyuza yashiyashana atondahu kumukalakela nikulondela nshimbi jindi. Chineli antu abulaña kubalumuka munyichima ayihañaña, hiyaluwañeshaña chipompelu hela kwikala chitwa chinateli kuzatishayi Satana kuleta majilu muchipompeluku. Yilwilu yawu yatama yasambukilaña wanyi antu amavulu. Dichi, Yehova wukutwalekahu kutukwasha wejima wetu hamu neyi izanvu. Anukenu nenu, Yehova wahosheli nindi: “Hikwakekala chitwa, chakachilawu nawu akukatishi nachu, chakakolaku.” (Isa. 54:17) Komana twovwahilaña aeluda akweti mudimu weneni wakusompa nyiloña?

22, 23. Chumanyi chaleteshaña tusakilileña amanakwetu adiñaku muma 1900, nawa wunsahwinyi wamwekeshaña nawu hiyateleleli kusha hohu maana nankashi hayuma yakuspirituku?

²² Njila yamuchisatu yinakwashilimu Kristu atumbanji twindi kwikala nayilwilu yayiwahi hinsañu yawulu nichisaka. Komana atukwasha kulonda tumoneña yisaka munjila yatelela? Eña. Chakutalilahu, neyi tutaña nsañu yahosha hadi ambuña Nzambi amuyaaka yamuma 1900, tunateli kuhayama chadihanineñawu. Twasakililaña nankashi chiyatwamijiliku mudimu wajila muchihandilu chawu. Hela chochu, hiyateleleli kusha maana nankashi hayuma yakuspiritu nakudiwula yisaka yawuku. Muloñadi?

²³ Amanakwetu amavulu azatileña nyidimu yamukuloñesha hela mudimu wakwenda ashileña yisaka yawu hadi tukweji twatuvulu. Chatela alondeleña chahosha Nsona, nyikanda yetu yakaanishileña amanakwetu niahela kusumbula hela kusumbuka nawa hiyalejeleña akwaKristu adiña muwulu chinateli kukolesha wulu wawuku. Komana yumiyi yinakumwekana kudi atumbanji twaKristu makonu? Inehi.

24. Indi Kristu wakwashili ñahi antu jindi ashinshika kwiluka nsañu yayiwahi yahosha hawulu nichisaka?

²⁴ Makonu, amanakwetu hiyatela kudiwula yisaka yawu muloña wakwakamena nyidimu yakuspirituku. (Tañenu 1 Timotewu 5:8.) Dichi, mpinji yejima Kristu wenkaña atumbanji twindi nsañu yayiwahi yinateli kuyikwasha muwulu nichakuhemba yisaka yawu. (Efwes. 3:14, 15) Mu 1978, kwedikili mukanda wakwila nawu Making Your Family Life Happy. (Kwashenu Chisaka Chenu Chikali Chamuzañalu) Chimwahitili yaaka 18 mukanda wakwila nawu Chakwikala naMuzañalu muChisaka wedikili. Kubombelahu, MuKaposhi Kakutalila avula kusonekamu yibaaba yahoshaña hawulu kulonda yikwashi adisumbula kuzatisha yishina yamuNsona muwulu wawu.

25-27. Indi atwansi ashiyashana yaaka anakuyakamena ñahi makonu?

²⁵ Indi atwansi wena? Hayaaka yinahiti, atwansi niwena ayisonekelaña nsañu yayikwashaña. Kuloñesha kwaYehova  kwatachikili dehi kuloñeshela anyana adi nayaaka yashiyashana nsañu yayiwahi yakuyikwasha. Chakutalilahu, kufuma mu 1919 kushika mu 1921, mumagazini yaGolden Age asonekeleñamu chibaaba chahosheleña nawu “Juvenile Bible Study”. Chimwahitili mpinji, broshuwa yaThe Golden Age ABC yedikili mu 1920 nimukanda wakwila nawu Children mu 1941. Muyaaka yamuma 1970, kwedikili nyikanda yidi neyi, Listening to the Great Teacher, Your Youth—Getting the Best out of It, niMukanda Wami waMpanji Jamu Bayibolu. Mu 1982, yibaaba yakwila nawu “Young People Ask” atachikili kuyisoneka muAwake! nkumininaku 1989 kwedikili mukanda wakwila nawu Questions Young People Ask—Answers That Work.

²⁶ Chayinu mpinji, tukweti nyikanda yiyedi yamukuma yakwila nawu Young People Ask, nawa yibaaba yikwawu yinatwalekuhu kwidika haWebu Sayiti yetu ya jw.org. Tukweti cheñi mukanda wukwawu wakwila nawu Learn From the Great Teacher. HaWebu sayiti yetu hekala nsañu yayivulu yinateli kukwasha atwansi, yidi neyi makaadi hadi antu atenawu muBayibolu, yuma yakuzatisha hakudiza Bayibolu yawakulumpi,  atwansi, mapazo, vidiyo ninyevulu yampanji jamuBayibolu, kushilahu nimpanji jamuBayibolu jawatwansi adi nayaaka yisatu kufunta mwishina. Chakadi nikujina, Kristu wuchidi wakeña atwansi neyi chochu chayikeñeliyi hampinji yayakatiliyi mumpinji yawapostolu. (Maku 10:13-16) Nakukeña atwansi eluki nawu twayikeña nawa ekali nawubwambu wawuwahi naNzambi.

²⁷ Yesu nakukeña cheñi nindi atwansi ekali akiñewa kuwubanji. Chineli kanu kaayi kanasweji kwikala nayilwilu yatama, chaaku chakukabisha atwansi nichena chinaswejeliku. Dichi, nsañu yahoshaña haniku kukala, ayisonekaña munyikanda kulonda yikwashi anvwali kukiña anyanawu kuniwu wubanji. *

28. (a) Chumanyi chakeñekaña neyi tunakukeña kwikala mukudifukula kwalala neyi chamwekeshaña chimwenu chaEzekeli chatembeli? (b) Chumanyi chimunakufwila kwila?

²⁸ Komana hitwazañalalañaku chitwatoñojoka Kristu chinakwashiyi atumbanji twindi, kuyidizisha kulemesha nikulondela nshimbi jaYehova jahosha hayilwilu yayiwahi? Toñojokenu cheñi hatembeli yamweniyi Ezekeli muchimwenu. Anukenu yina yiisu yayilehi. Eña, yina tembeli hiyadiña yayeniku, ilaña yadiña yakuspiritu. Hela chochu, komana twayimonaña netu yalala? Hitweñilañamu hohu hakuya Kwitala daWanta, kubakula Bayibolu hela kudondomwena hetala dawantu mumudimu wakushimwinaku. Iyi hiyuma yitwelaña muchihandilu. Nfwikiji nateli kwila yumiyi chakadi kwiñila mutembeli yaYehova. Ilaña neyi twilaña yumiyi hampinji yoyimu nikwovwahila nshimbi jaYehova jajiwahi, nikudifukula namuchima wawuwahi dikwila nawu tuneñili mutembeli nawa tunakukalakela munidi iluña dajila, ntanjikilu yakudifukula kwalala kwaYehova Nzambi. Dichi tulemeshenuña iku kukooleka kwabadika. Tutwalekenuhu kuzata nañovu kulonda tumwekesheña netu Yehova wajila kuhitila mukulemesha nshimbi jindi jaloña.