KAPITLU 11
Irfinar morali—Jirrifletti l-qdusija t’Alla
Immaġinak dieħel mill-bieb tal-bitħa taʼ barra tat-tempju spiritwali kbir taʼ Ġeħova
1. Eżekjel x’ra li jimliena bi stagħġib?
XI NGĦIDU li kieku kellek esperjenza bħal dik tal-profeta Eżekjel xi 2,500 sena ilu? Immaġina dan: Tinsab riesaq lejn tempju enormi li qed jiddi. Anġlu setgħan jiġi biex idawrek maʼ dan il-post meraviljuż! Titlaʼ s-sebaʼ tarġiet li jwasslu għal wieħed mit-tliet bibien. Dawn il-bibien jimlewk bi stagħġib. Huma għoljin xi 30 metru. Ġod-daħliet tara li hemm kmamar tal-għassa. U fuq il-pilastri hemm tinqix mill-isbaħ taʼ siġar tal-palm.—Eżek. 40:1-4, 10, 14, 16, 22; 41:20.
2. (a) It-tempju fil-viżjoni x’jirrappreżenta? (Ara wkoll in-nota addizzjonali.) (b) X’nistgħu nitgħallmu minn ċerti aspetti fit-tempju?
2 Din hi viżjoni tat-tempju spiritwali. Eżekjel tant jiddeskrivih bid-dettall li juża kapitli 40 sa 48 tal-ktieb profetiku tiegħu biex jagħmel dan. Dan it-tempju jirrappreżenta l-arranġament taʼ Ġeħova għall-qima pura. Kull aspett jirrappreżenta xi ħaġa fil-qima tagħna f’dawn l-aħħar jiem. a Il-bibien għoljin taʼ xiex jagħtu stampa? Dawn ifakkruna li dawk li jidħlu fl-arranġament taʼ Ġeħova għall-qima pura jridu jgħixu fi qbil mal-livelli għoljin u sewwa t’Alla. Anke t-tinqix tas-siġar tal-palm jirrappreżenta xi ħaġa simili, għax fil-Bibbja s-siġar tal-palm kultant jirrappreżentaw il-ġustizzja, jew is-sewwa. (Salm 92:12) U xi ngħidu dwar il-kmamar tal-għassa? Jidher ċar li dawk li ma jirrispettawx il-livelli t’Alla ma jitħallewx jidħlu f’dan l-arranġament tant sabiħ tal-qima pura li jagħti l-ħajja.—Eżek. 44:9.
3. Is-segwaċi taʼ Kristu għala baqaʼ jkollhom bżonn jiġu rfinuti?
3 Il-viżjoni t’Eżekjel kif twettqet? Kif innotajna f’Kapitlu 2 taʼ dan il-ktieb, Ġeħova uża lil Kristu biex jgħaddi lin-nies tiegħu minn proċess taʼ rfinar speċjali mill-1914 sal-bidu tal-1919. Imbagħad waqaf jirfinahom? Le! Matul l-aħħar 100 sena, Kristu baqaʼ jagħmel ċert li s-segwaċi tiegħu jżommu mal-livelli qaddisin taʼ Ġeħova. B’hekk, dawn is-segwaċi baqaʼ jkollhom bżonn jiġu rfinuti. Għala? Għax Kristu qed jiġbor lis-segwaċi tiegħu minn din id-dinja b’morali baxxi u Satana dejjem jipprova jiġbidhom lura lejn ħajja bla morali. (Aqra t-2 Pietru 2:20-22.) Ejja neżaminaw tliet oqsma li fihom il-Kristjani veri ġew irfinuti bil-mod il-mod. L-ewwel, se nikkunsidraw xi rfinar morali, imbagħad, provvediment vitali biex il-kongregazzjoni tinżamm nadifa, u fl-aħħar, l-arranġament tal-familja.
Irfinar morali tul is-snin
4, 5. Liema nassa ilu juża Satana, u x’suċċess kellu biha?
4 In-nies taʼ Ġeħova minn dejjem kienu interessati ferm f’li jkollhom kondotta morali u retta. Għaldaqstant, aċċettaw istruzzjonijiet iktar ċari li ngħataw fuq dan is-suġġett. Ejja naraw ftit eżempji.
5 L-immoralità sesswali. Ġeħova għamel is-sess biex jitgawda mill-imseħbin fiż-żwieġ bħala xi ħaġa nadifa u mill-isbaħ. Hi l-għaxqa taʼ Satana li jgħawweġ dan ir-rigal prezzjuż minn kif inhu xieraq billi jdawru f’xi ħaġa maħmuġa, biex b’hekk iħajjar lin-nies taʼ Ġeħova ħalli jitilfu l-approvazzjoni t’Alla. Satana uża din in-nassa lura fi żmien Balgħam u sfortunatament kellu suċċess biha. Hu qed jużaha iktar minn qatt qabel issa f’dawn l-aħħar jiem.—Num. 25:1-3, 9; Riv. 2:14.
6. (a) Liema wegħda ġiet stampata fit-Torri tal-Għassa? (Ara n-nota addizzjonali.) (b) Għala ma baqgħetx issir il-wegħda?
6 Sabiex jgħinna nissieltu kontra l-isforzi taʼ Satana, It-Torri tal-Għassa tal-15 taʼ Ġunju 1908 kien fih wegħda li inkludiet dan li ġej: “Meta nkun maʼ dawk tas-sess oppost fil-privat, f’kull ħin u f’kull post se nġib ruħi l-istess bħal meta nkun magħhom fil-pubbliku.” b Għalkemm il-wegħda ma kinitx xi ħaġa li l-aħwa bilfors kellhom jagħmlu, ħafna xorta għamluha u bagħtu isimhom biex jidher fit-Torri tal-Għassa. Snin wara, deher ċar li filwaqt li din il-wegħda kienet t’għajnuna għall-ewwel li ħarġet, kienet qed issir sempliċi rutina; għalhekk ma baqgħetx issir. Però, l-aħwa xorta baqgħu jimxu fi qbil mal-prinċipji morali għoljin li l-wegħda rrappreżentat.
7. Fl-1935, It-Torri tal-Għassa tkellem dwar liema problema, u x’saħaq?
7 Satana iktar ħadha qatta bla ħabel kontrina. It-Torri tal-Għassa tal-1 taʼ Marzu 1935, bla kantunieri tkellem dwar problema li kienet qed tikber fost il-poplu t’Alla. Xi wħud milli jidher ħasbu li l-fatt li jieħdu sehem fil-ministeru jagħtihom il-lala biex ma jżommux mal-livelli morali taʼ Ġeħova fil-ħajja privata tagħhom. It-Torri tal-Għassa bla tlaqliq qal: “Għandna niftakru li mhux biżżejjed li sempliċement nieħdu sehem fl-ippritkar. Ix-Xhieda taʼ Ġeħova huma r-rappreżentanti tiegħu u hu d-dmir tagħhom li jirrappreżentaw b’mod xieraq lil Ġeħova u s-Saltna tiegħu.” Imbagħad l-artiklu ta parir dirett dwar iż-żwieġ u s-sess, u b’hekk għen lin-nies t’Alla ‘jaħarbu miż-żína.’—1 Kor. 6:18.
8. It-Torri tal-Għassa għala enfasizza darba wara l-oħra xi tfisser eżatt il-kelma Griega użata għall-immoralità sesswali?
8 F’dawn l-aħħar għaxriet taʼ snin, It-Torri tal-Għassa darba wara l-oħra enfasizza xi tfisser eżatt il-kelma użata fl-Iskrittura Griega għall-immoralità sesswali—pornea. Din il-kelma ma tirreferix biss għall-att innifsu tas-sess. Minflok, pornea tinkludi varjetà kbira t’atti immorali, bħall-atti indeċenti kollha li jsiru f’dar tal-prostituzzjoni. B’hekk, is-segwaċi taʼ Kristu ġew protetti milli jsiru wħud perverti sesswalment bħalma huma ħafna nies fid-dinja tal-lum.—Aqra Efesin 4:17-19.
9, 10. (a) Fl-1935, It-Torri tal-Għassa tkellem dwar liema kwistjoni morali? (b) Il-Bibbja x’tgħallem b’mod bilanċjat dwar l-użu tal-alkoħol?
9 L-abbuż tal-alkoħol. It-Torri tal-Għassa tal-1 taʼ Marzu 1935, qajjem kwistjoni morali oħra: “Ġie nnotat ukoll li xi wħud qed jieħdu sehem fis-servizz tal-għalqa u jwettqu inkarigi oħra fl-organizzazzjoni waqt li jkunu taħt l-influwenza tal-alkoħol. L-Iskrittura meta tgħid li hu xieraq li tixrob l-inbid? Ikun xieraq li tixrob l-inbid sal-punt li jeffettwa s-servizz tiegħek fl-organizzazzjoni tal-Mulej?”
10 It-tweġiba ddiskutiet il-ħarsa bilanċjata li nsibu fil-Kelma t’Alla dwar ix-xorb alkoħoliku. Il-Bibbja ma tikkundannax l-użu bilanċjat tal-inbid jew xorb alkoħoliku ieħor, imma tikkundanna b’mod sod is-sokor. (Salm 104:14, 15; 1 Kor. 6:9, 10) Rigward li jieħdu sehem fis-servizz sagru waqt li jkunu taħt l-influwenza tal-alkoħol, il-qaddejja t’Alla ilhom jiġu mfakkrin fir-rakkont dwar ulied Aron. Alla qatel lil dawn għax offrew nar projbit fuq l-artal t’Alla. Ftit wara dan, ir-rakkont juri x’kien dak li x’aktarx wassal lil dawn l-irġiel biex jagħmlu din il-ħaġa tant mhix xierqa. Alla kien ta liġi li pprojbiet lill-qassisin kollha milli jużaw l-alkoħol waqt li jkunu għaddejjin bid-dmirijiet sagri tagħhom. (Lev. 10:1, 2, 8-11) Illum, is-segwaċi taʼ Kristu japplikaw dan il-prinċipju u jagħmlu ċert li ma jkunux taħt l-influwenza tal-alkoħol waqt li jkunu għaddejjin bis-servizz sagru tagħhom.
11. Għala kienet barka għan-nies t’Alla li jiksbu fehma aħjar dwar l-alkoħoliżmu?
11 F’dawn l-aħħar għaxriet taʼ snin, is-segwaċi taʼ Kristu tbierku wkoll billi kisbu fehma aħjar dwar l-alkoħoliżmu, kundizzjoni li fiha xi ħadd jibqaʼ jabbuża mill-alkoħol tant li jibda jiddependi minnu. Grazzi għall-ikel spiritwali f’waqtu, ħafna ġew megħjunin jittrattaw maʼ din il-kundizzjoni b’mod tajjeb u jerġgħu jiksbu kontroll taʼ ħajjithom. Ħafna nies oħra ġew megħjunin jevitaw il-problema għalkollox. Ħadd m’għandu għalfejn iħalli l-abbuż tal-alkoħol jisraqlu d-dinjità, ir-relazzjoni li jkollu mal-familja, u iktar importanti minn hekk, il-privileġġ li jieħu sehem fil-qima pura taʼ Ġeħova.
“Lanqas jgħaddilna minn moħħna li l-Mulej tagħna kien ikollu riħa taʼ tabakk fuqu jew xi ħaġa tant diżgustanti f’ħalqu.” —C. T. Russell
12. Il-qaddejja taʼ Kristu kif qiesu l-użu tat-tabakk anke qabel ma bdew l-aħħar jiem?
12 L-użu tat-tabakk. Il-qaddejja taʼ Kristu bdew jiskuraġġixxu l-użu tat-tabakk anke qabel ma bdew l-aħħar jiem. Għadd taʼ snin ilu, ħu mdaħħal fiż-żmien, Charles Capen, ftakar fl-ewwel darba li ltaqaʼ maʼ Charles Taze Russell lejn l-aħħar tas-seklu 19. Capen, li dak iż-żmien kellu 13-il sena, u tlieta minn ħutu kienu fit-taraġ tad-Dar tal-Bibbja (Betel) f’Allegheny, Pennsylvania. Russell għadda minn ħdejhom u staqsiehom: “Jaqaw qed tpejpu? Qed inxomm riħa taʼ tabakk.” Huma serrħulu moħħu li ma kinux qed ipejpu. Din l-esperjenza wriethom biċ-ċar kif Russell ħassu dwar it-tabakk. Fit-Torri tal-Għassa tal-1 t’Awwissu 1895, Ħuna Russell tkellem dwar it-2 Korintin 7:1, u qal: “Ma nistax nara kif jistaʼ jkun għall-glorja t’Alla, jew għall-profitt tiegħu stess, jekk Kristjan juża t-tabakk. . . . Lanqas jgħaddilna minn moħħna li l-Mulej tagħna kien ikollu riħa taʼ tabakk fuqu jew xi ħaġa tant diżgustanti f’ħalqu.”
13. Liema rfinar morali kien hemm fl-1973?
13 Fl-1935, It-Torri tal-Għassa qal li kull min jagħżel li jomgħod jew ipejjep it-tabakk ma jistax jibqaʼ jaqdi bħala membru tal-familja Betel jew jaqdi bħala rappreżentant tal-organizzazzjoni t’Alla—jiġifieri bħala pijunier jew indokratur li jivvjaġġa. Kien hemm iktar irfinar morali fl-1973. It-Torri tal-Għassa tal-1 taʼ Ġunju spjega li l-ebda Xhud taʼ Ġeħova ma setaʼ jibqaʼ jkollu waqfa tajba fil-kongregazzjoni waqt li jkompli b’dan il-vizzju maħmuġ, egoistiku, u qerried. Dawk li ma ridux jieqfu jużaw it-tabakk kellhom jiġu maqtugħin mis-sħubija. c Kristu kien ħa pass importanti ieħor f’li jirfina lis-segwaċi tiegħu.
14. (a) Alla x’qal dwar id-demm? (b) It-trasfużjoni tad-demm kif saret xi ħaġa komuni?
14 L-użu ħażin tad-demm. Fi żmien Noè, Alla qal li jkun ħażin jekk wieħed jiekol id-demm. Hu kkonferma dan meta ta l-Liġi lill-ġens t’Iżrael, u bl-istess mod ikkmanda l-kongregazzjoni Kristjana biex ‘titbiegħed mid-demm.’ (Atti 15:20, 29; Ġen. 9:4; Lev. 7:26) Ma niskantawx li fi żminijiet moderni Satana sab mod kif iġiegħel lil ħafna nies jinjoraw dan il-livell t’Alla. It-tobba kienu qed jesperimentaw bit-trasfużjoni tad-demm fis-seklu 19, imma wara li ġew skoperti t-tipi differenti tad-demm, din il-prattika saret iktar magħrufa. Fl-1937, id-demm beda jinġabar u jinħażen f’banek tad-demm, u mbagħad it-Tieni Gwerra Dinjija tat spinta lit-trasfużjonijiet tad-demm. It-trasfużjonijiet ma damux ma saru xi ħaġa komuni madwar id-dinja.
15, 16. (a) Ix-Xhieda taʼ Ġeħova x’waqfa ħadu rigward it-trasfużjoni tad-demm? (b) X’appoġġ ingħata lis-segwaċi taʼ Kristu dwar it-trasfużjoni u l-kura mingħajr demm, u x’kien ir-riżultat?
15 Sa mill-1944, It-Torri tal-Għassa wera li trasfużjoni tad-demm fir-realtà hu mod ieħor kif jittiekel id-demm. Is-sena taʼ wara, din il-waqfa Skritturali ġiet imsaħħa u ċċarata. Sal-1951, ġiet ippubblikata lista taʼ mistoqsijiet u tweġibiet biex tgħin lill-aħwa jirraġunaw maʼ nies fil-qasam tal-mediċina. Madwar id-dinja, is-segwaċi leali taʼ Kristu kienu qed jieħdu waqfa kuraġġuża, avolja spiss kellhom iħabbtu wiċċhom maż-żebliħ, l-oppożizzjoni, u anke l-persekuzzjoni sfaċċata. Imma Kristu baqaʼ jmexxi l-organizzazzjoni tiegħu ħalli din tipprovdi l-appoġġ meħtieġ. Pereżempju, ħarġet browxers u artikli dettaljati li tħejjew wara ħafna riċerka.
16 Fl-1979, xi anzjani bdew iżuru xi sptarijiet biex jgħinu lit-tobba jifhmu aħjar il-waqfa tagħna, ir-raġunijiet Skritturali għall-waqfa tagħna, u l-alternattivi tad-demm li hemm disponibbli. Fl-1980, anzjani f’39 belt fl-Istati Uniti rċivew taħriġ speċifikament fuq dan ix-xogħol. Maż-żmien, il-Ġemgħa li Tiggverna tat il-permess biex jiġu stabbiliti Kumitati taʼ Koordinazzjoni mal-Isptarijiet madwar id-dinja kollha. Għamlu progress dawn l-isforzi tul is-snin? Illum, ħafna għaxriet t’eluf fil-qasam tal-mediċina—fosthom tobba, kirurgi, u anestesjoloġi—qed jikkooperaw mal-pazjenti li huma Xhieda, u b’hekk jirrispettaw l-għażla tagħna li nieħdu kura mingħajr demm. Iktar u iktar sptarijiet qed joffru kura mingħajr demm, u xi wħud saħansitra jħarsu lejha bħala l-ogħla livell taʼ kura medika. Ma taqbilx li hu eċċitanti li taħseb fil-modi kif Ġesù pproteġiena mill-isforzi taʼ Satana biex iħammiġna?—Aqra Efesin 5:25-27.
Iktar u iktar sptarijiet qed joffru kura mingħajr demm, u xi wħud saħansitra jħarsu lejha bħala l-ogħla livell taʼ kura medika
17. Kif nistgħu nuru li ngħożżu l-mod kif Kristu jirfina lis-segwaċi tiegħu?
17 Nagħmlu tajjeb jekk insaqsu lilna nfusna, ‘Ngħożżu aħna l-mod kif Kristu qed jirfina s-segwaċi tiegħu u jħarriġna biex inżommu mal-livelli morali għoljin taʼ Ġeħova?’ Jekk iva, mela ejja niftakru li Satana l-ħin kollu qed jipprova jbegħedna minn Ġeħova u Ġesù billi jħassar ir-rispett li għandna għal-livelli t’Alla. Biex tgħinna niġġieldu kontra din l-influwenza, l-organizzazzjoni taʼ Ġeħova bi mħabba tibqaʼ twissina u tfakkarna dwar in-nuqqas taʼ morali taʼ din id-dinja. Ejja nibqgħu għassa għal pariri t’għajnuna bħal dawn u nkunu pronti biex nobduhom.—Prov. 19:20.
Il-kongregazzjoni tinżamm nadifa moralment
18. Il-viżjoni t’Eżekjel xi tfakkarna b’mod ċar dwar dawk li minn jeddhom jirribellaw kontra l-livelli t’Alla?
18 It-tieni qasam taʼ rfinar morali jinvolvi l-passi li jittieħdu ħalli l-kongregazzjoni tinżamm nadifa. B’sogħba, mhux kull min jiddedika ruħu lil Ġeħova u jaċċetta l-livelli tiegħu jżomm b’lealtà mad-deċiżjoni li jkun ħa. Xi wħud eventwalment ibiddlu fehmithom u minn jeddhom jirribellaw kontra dawk il-livelli. X’għandu jsir b’uħud bħal dawn? Nistgħu nsibu ħjiel taʼ x’għandu jsir fil-viżjoni t’Eżekjel tat-tempju spiritwali li ddiskutejna fil-bidu taʼ dan il-kapitlu. Tiftakar il-bibien għoljin li semmejna? Fid-daħla taʼ kull wieħed kien hemm il-kmamar tal-għassa. L-għassiesa kienu jipproteġu t-tempju, milli jidher biex ma jħallux lil dawk li ‘mhumiex ċirkonċiżi fil-qalb’ jidħlu. (Eżek. 44:9) Dan ifakkarna b’mod ċar li l-qima pura hi privileġġ li jingħata biss lil dawk li jħabirku biex jgħixu fi qbil mal-livelli puri taʼ Ġeħova. B’mod simili, illum il-ġurnata, il-privileġġ li nassoċjaw maʼ Kristjani sħabna fil-qima mhux offrut lil kulħadd.
19, 20. (a) Kristu kif għen lis-segwaċi tiegħu biex bil-mod il-mod jirfinaw kif jittrattaw maʼ dnubiet serji? (b) X’inhuma tliet raġunijiet għala midneb li ma jindimx jiġi maqtugħ mis-sħubija?
19 Lura fl-1892, It-Torri tal-Għassa qal li hu “d-dmir tagħna li naqtgħu mis-sħubija (bħala Kristjani) lil dawk li, b’mod sfaċċat jew minn taħt, jiċħdu li Kristu ta lilu nnifsu bħala fidwa għal kulħadd.” (Aqra t-2 Ġwanni 10.) Fl-1904, il-ktieb The New Creation irrikonoxxa li dawk li jibqgħu jġibu ruħhom b’mod li ma jkunx xieraq ikunu tassew taʼ periklu għall-kongregazzjoni. Lura f’dak iż-żmien il-kongregazzjoni kollha kienet tieħu sehem f’li teżamina każijiet meta jkun sar xi dnub serju. Però, rari kien ikun hemm każijiet bħal dawn. Fl-1944, It-Torri tal-Għassa wera li aħwa responsabbli biss kellhom jieħdu ħsieb każijiet bħal dawn. Fl-1952, ġiet ippubblikata fit-Torri tal-Għassa proċedura bbażata fuq il-Bibbja biex jieħdu ħsieb kwistjonijiet ġudizzjarji. L-artiklu enfasizza raġuni ewlenija għala wħud mhux nedmin jiġu maqtugħin mis-sħubija—jiġifieri, biex il-kongregazzjoni tibqaʼ nadifa.
20 Minn dak iż-żmien ’l hawn, Kristu għen lis-segwaċi tiegħu jiċċaraw u jirfinaw il-mod kif għandhom jiġu trattati każijiet taʼ dnub serju. L-anzjani Kristjani huma mħarrġin bir-reqqa biex jieħdu ħsieb kwistjonijiet ġudizzjarji bil-mod kif irid Ġeħova, b’bilanċ xieraq taʼ ġustizzja u ħniena. Illum biċ-ċar naraw minn tal-inqas tliet raġunijiet għala midneb li ma jindimx jiġi maqtugħ mis-sħubija fil-kongregazzjoni: (1) biex isem Ġeħova ma jiġix immaqdar, (2) biex il-kongregazzjoni tiġi protetta mill-effetti taʼ dnub serju li jistgħu jinfluwenzaw lil ħaddieħor, u (3) biex jekk ikun possibbli l-midneb jitqanqal biex jindem.
21. L-arranġament taʼ qtugħ mis-sħubija, b’liema mod wera li kien barka għan-nies t’Alla?
21 Tistaʼ tara kif l-arranġament taʼ qtugħ mis-sħubija wera li kien barka għas-segwaċi taʼ Kristu llum? F’Iżrael tal-qedem, il-midinbin spiss influwenzaw b’mod negattiv lill-ġens. Kultant, tant kienu jinfluwenzawhom li kien ikun hemm iktar nies li qed jagħmlu l-ħażen milli kien hemm nies li jħobbu lil Ġeħova u li qed jipprovaw jagħmlu s-sew. B’hekk, il-ġens spiss ġab tkażbir fuq isem Ġeħova u tilef l-approvazzjoni tiegħu. (Ġer. 7:23-28) Imma llum, Ġeħova qed jittratta maʼ grupp taʼ rġiel u nisa spiritwali. Peress li l-midinbin li ma jridux jindmu jitneħħew minn fostna, ma jistgħux isiru għodda f’idejn Satana biex ikompli jħassar lill-kongregazzjoni u l-waqfa nadifa tagħha. Minflok, l-influwenza taʼ dawn il-midinbin ma titħalliex tinfirex. B’hekk, bħala grupp żgur li nżommu l-approvazzjoni taʼ Ġeħova. Ftakar li Ġeħova jwiegħed: “Kwalunkwe arma li tissawwar kontrik ma tirnexxix.” (Is. 54:17) Nappoġġaw aħna b’lealtà lill-anzjani, li għandhom ir-responsabbiltà serja li jieħdu ħsieb każijiet ġudizzjarji?
Dak li għamel l-arranġament tal-familja jiġi glorifikat
22, 23. Għala aħna grati lejn Kristjani sħabna fil-bidu tas-seklu 20, imma għala kien hemm bżonn taʼ iktar bilanċ fejn tidħol il-familja?
22 It-tielet qasam li fih is-segwaċi taʼ Kristu bbenefikaw mill-irfinar kontinwu għandu x’jaqsam maż-żwieġ u l-ħajja tal-familja. Il-ħarsa tagħna lejn il-familja, ġiet irfinuta matul is-snin? Iva. Pereżempju, meta naqraw dwar il-qaddejja t’Alla fil-bidu tas-seklu 20, lanqas nistgħu ma nibqgħux impressjonati u saħansitra mgħaġġbin b’kemm kienu lesti jagħmlu sagrifiċċji persunali. Aħna tassew grati għall-mod kif poġġew is-servizz sagru qabel kull ħaġ’oħra f’ħajjithom. Imma, fl-istess ħin nistgħu naraw li kellhom bżonn iktar bilanċ. F’liema sens?
23 L-aħwa kultant kienu jieħdu inkarigi fil-ministeru jew fix-xogħol tal-ivvjaġġar li żammhom ’il bogħod mid-dar għal xhur sħaħ. Kultant iż-żwieġ kien jiġi skuraġġit b’iktar enfasi milli hemm fl-Iskrittura, u ftit li xejn kien ikun hemm pariri dwar kif tibni żwiġijiet Kristjani b’saħħithom. Għadu jiġri l-istess ħaġa fost is-segwaċi taʼ Kristu llum? Le!
M’għandniex naċċettaw inkarigi teokratiċi jekk naħsbu li l-obbligi tal-familja se jmorru minn taħt
24. Kristu kif għen lin-nies leali tiegħu jiksbu ħarsa iktar bilanċjata lejn iż-żwieġ u l-familja?
24 Illum, m’għandniex naċċettaw inkarigi teokratiċi jekk naħsbu li l-obbligi tal-familja se jmorru minn taħt. (Aqra l-1 Timotju 5:8.) Iktar minn hekk, Kristu għamel ċert li s-segwaċi leali tiegħu fuq l-art jirċievu fuq bażi regulari pariri Bibliċi li huma bilanċjati u taʼ għajnuna dwar iż-żwieġ u l-ħajja tal-familja. (Efes. 3:14, 15) Fl-1978, ġie ppubblikat il-ktieb Making Your Family Life Happy. Xi 18-il sena wara ħareġ il-ktieb Is-Sigriet taʼ l-Hena fil-Familja. Minbarra dawn, It-Torri tal-Għassa jkollu diversi artikli li jinħarġu bl-għan li jgħinu lil koppji miżżewġin japplikaw prinċipji Skritturali fir-relazzjoni tagħhom.
25-27. Matul is-snin, kif ingħatat iktar attenzjoni għall-bżonnijiet tat-tfal taʼ diversi etajiet?
25 U xi ngħidu għaż-żgħażagħ? Matul is-snin, ingħatat iktar u iktar attenzjoni għall-bżonnijiet tagħhom. L-organizzazzjoni taʼ Ġeħova ilha tipprovdi affarijiet tajbin għat-tfal taʼ diversi etajiet, imma fejn qabel ftit li xejn kellna letteratura għalihom issa għandna bl-abbundanza. Pereżempju, is-serje t’artikli “Studju tal-Bibbja għaż-żgħażagħ” dehret f’The Golden Age mill-1919 sal-1921. Ukoll, kien hemm il-browxer The Golden Age ABC li ħareġ fl-1920 u l-ktieb Children li ħareġ fl-1941. Wara l-1970, ħarġu l-kotba Listening to the Great Teacher, Your Youth—Getting the Best out of It, u Il-Ktieb Tiegħi taʼ Stejjer mill-Bibbja. Fl-1982, is-serje “Iż-Żgħażagħ Jistaqsu” bdiet tidher fi Stenbaħ! bl-Ingliż, u din wasslet għall-ktieb Iż-Żgħażagħ Jistaqsu—Tweġibiet Prattiċi għall-Mistoqsijiet Tagħhom, li ġie ppubblikat bl-Ingliż fl-1989.
Kien hemm ħafna ferħ meta l-browxer Nitgħallem mill-Bibbja ħareġ f’din il-konvenzjoni fil-Ġermanja
26 Illum, għandna żewġ volumi aġġornati tal-kotba Iż-Żgħażagħ Jistaqsu, filwaqt li s-serje tkompli fil-Websajt tagħna, jw.org/mt. Ukoll, għandna l-ktieb Tgħallem mill-Għalliem il-Kbir. Il-Websajt tagħna għandha ħafna affarijiet għaż-żgħar, fosthom kards tal-karattri tal-Bibbja, attivitajiet għal studju tal-Bibbja għat-tfal żgħar u t-tfal akbar fl-età, logħob, vidjows, u stejjer tal-Bibbja bl-istampi, kif ukoll lezzjonijiet tal-Bibbja għal tfal minn tliet snin ’l isfel. Jidher ċar li l-ħarsa taʼ Kristu lejn iż-żgħar ma nbidlitx minn meta ħaddan lit-tfal miegħu fl-ewwel seklu. (Mk. 10:13-16) Hu jrid li ż-żgħar fostna jħossuhom maħbubin u mitmugħin sew spiritwalment.
27 Ġesù jrid ukoll li t-tfal jiġu protetti mill-ħsara. Hekk kif din id-dinja moqżieża kompliet titħassar moralment, l-abbuż tat-tfal sar iktar komuni. Għalhekk, ġie ppubblikat materjal ċar u dirett biex jgħin lill-ġenituri jipproteġu lil uliedhom minn din il-prattika mill-agħar. d
28. (a) X’inhu mistenni minna jekk irridu nieħdu sehem fil-qima pura, kif jidher fil-viżjoni tat-tempju t’Eżekjel? (b) X’int determinat li tagħmel?
28 Ma taqbilx li hu eċċitanti li taħseb fuq kif Kristu baqaʼ jirfina u jħarreġ lis-segwaċi tiegħu biex jirrispettaw il-livelli morali għoljin taʼ Ġeħova, jgħixu fi qbil magħhom, u jibbenefikaw minnhom? Erġaʼ aħseb dwar it-tempju li Eżekjel ra f’viżjoni. Ftakar fil-bibien għoljin. M’għandniex xi ngħidu, dan it-tempju mhuwiex post fiżiku imma post spiritwali. Minkejja dan, inqisuh aħna bħala post reali? Ma nistgħux nidħlu fih sempliċement billi mmorru fis-Sala tas-Saltna, niftħu l-Bibbja, jew noħorġu fil-ministeru. Dawn huma atti fiżiċi li jinvolvu affarijiet letterali. Anke ipokrita jistaʼ jagħmel dawn l-affarijiet mingħajr ma qatt jidħol fit-tempju taʼ Ġeħova. Imma minbarra li nagħmlu dawn l-affarijiet, irridu wkoll ngħixu fi qbil mal-livelli morali għoljin taʼ Ġeħova u nieħdu sehem fil-qima pura b’attitudni xierqa tal-qalb. Jekk nagħmlu hekk, se nkunu dħalna u nkunu qed naqdu fl-iktar post sagru—fl-arranġament għall-qima pura t’Alla Ġeħova! Ejja dejjem ngħożżu dan il-privileġġ prezzjuż. Ukoll, ejja nibqgħu nagħmlu l-almu tagħna biex nirriflettu l-qdusija taʼ Ġeħova billi nżommu mal-livelli ġusti tiegħu!
a Fl-1932, it-tieni volum tal-ktieb Vindication għall-ewwel darba wera li l-profeziji dwar kif in-nies t’Alla kienu se jerġgħu jinġiebu f’art twelidhom kellhom twettiq modern għal Iżrael spiritwali u mhux għal Iżrael letterali. Dawk il-profeziji jippontaw lejn it-tiġdid tal-qima pura. It-Torri tal-Għassa tal-1 taʼ Marzu 1999, spjega li l-viżjoni tat-tempju t’Eżekjel hi waħda minn dawn il-profeziji dwar it-tiġdid u li għalhekk għandha twettiq spiritwali matul l-aħħar jiem.
b Il-wegħda żammet lil raġel u mara milli jkunu waħedhom fl-istess kamra sakemm il-bieb ma jinżammx miftuħ—jew sakemm ma kinux miżżewġin lil xulxin jew membri tal-familja immedjata. Għal xi snin, il-wegħda kienet tingħad bħala parti mill-programm taʼ Qima taʼ Filgħodu ġewwa Betel.
c Tkun qed tuża ħażin it-tabakk jekk tpejpu, tomogħdu, jew tkabbru bl-iskop li tużah b’dan il-mod.
d Pereżempju, ara kapitlu 32 tal-ktieb Tgħallem mill-Għalliem il-Kbir; ukoll ara l-ħarġa taʼ Stenbaħ! taʼ Jannar 2008 paġni 3-11.