1. Wanem nao Ezekiel lukim wea mekem iumi sapraes fogud?

 TINGIM sapos iu kasem sem experience olsem profet Ezekiel lo bifor. Iu wakabaot go klosap lo wanfala big temple wea shaen fogud. Wanfala angel standap lo there for showim iu datfala nambawan ples! Iu followim ladder wea garem sevenfala step for kasem wanfala lo thrifala gate. Taem iu kasem olketa gate hia, iu barava sapraes. Hae blo door for go insaed hem samting olsem 30 meter. Taem iu go insaed, iu lukim olketa rum blo olketa gard. Iu lukim olketa bigfala post wea olketa designim wea luk olsem palm tree.—Esikiel 40:1-4, 10, 14, 16, 22; 41:20.

2. (a) Temple wea Ezekiel lukim lo vision piksarem wanem? (Lukim tu footnote.) (b) Wanem nao iumi savve lanem from olketa difren samting wea stap front lo temple?

² Diswan hem vision abaotem spiritual temple. Lo Ezekiel chapter 40 go kasem chapter 48, Ezekiel storyim gud evri samting wea hem lukim lo datfala vision. Disfala temple piksarem arrangement blo Jehovah for tru worship. Evri part lo temple hia garem mining lo worship blo iumi lo olketa last day. a Olketa gate wea hae tumas hem piksarem wanem? Olketa gate hia remindim iumi hao olketa wea kam insaed arrangement blo Jehovah for tru worship, mas obeyim olketa haefala standard blo God wea stret. Nomata olketa post wea garem design blo olketa palm tree tu piksarem sem samting, bikos samfala taem Bible savve iusim palm tree for piksarem stretfala fasin. (Sams 92:12) And olketa rum blo olketa gard piksarem wanem? Pipol wea no tinghae lo olketa standard blo God no kam insaed tru worship wea barava nambawan, wea savve mekem man laef olowe.—Esikiel 44:9.

3. Why nao olketa follower blo Christ need for gohed kamap klin?

³ Hao nao vision wea Ezekiel lukim kamap tru? Olsem iumi storyim lo Chapter 2 blo disfala buk, start lo 1914 go kasem start blo 1919, Jehovah iusim Christ for gohed mekem pipol blo hem kamap klin. Waswe, diswan minim waka for mekem pipol klin hem stop nao? Barava nomoa! Lo handred year wea go pas, Christ gohed for mekhae lo olketa standard blo Jehovah wea holy. Olketa follower blo hem need for gohed kamap klin. Why nao olsem? Bikos Christ gohed hipimap olketa follower blo hem from nogud fasin blo pipol lo world, and Satan no stop for trae pullim olketa go bak for duim olketa nogud fasin. (Readim 2 Peter 2:20-22.) Iumi bae storyim thrifala samting wea olketa tru Christian gohed for kamap klin lo hem. First samting, bae iumi storyim hao for klin lo fasin blo iumi, then wanfala  important arrangement for mekem kongregeson klin, and last samting, arrangement insaed famili.

4, 5. For longtaem finis, wanem trap nao Satan iusim, and waswe, hem win?

⁴ Pipol blo Jehovah evritaem traem best for garem fasin wea klin and stret. Dastawe, taem olketa kasem klia direction abaotem wei for klin lo fasin, olketa hapi for followim. Iumi bae storyim samfala example.

⁵ Wei for durong. Plan blo Jehovah lo firstaem, hem for man and woman wea marit nomoa for duim sex. Diswan hem klin and hem stret. Satan laek for tanem datfala nambawan present for kamap samting wea dirty, and iusim datwan for trapim pipol blo Jehovah mekem Hem no hapi lo olketa. Lo taem blo Balaam, Satan iusim datfala trap and staka nao foldaon lo hem, and hem iusim datfala sem trap lo olketa last day winim enitaem bifor.—Nambas 25:1-3, 9; Rev. 2:14.

6. Wanem promis nao Watch Tower pablisim and hao nao olketa followim datwan, and why nao olketa stop for duim datwan? (Lukim tu footnote.)

⁶ For winim trap blo Satan, Watch Tower blo June 15, 1908, pablisim wanfala promis wea garem olketa toktok hia: “Lo enitaem or lo eni ples, mi bae no switim samwan lo opposite sex, nomata lo pablik ples or lo ples wea no eniwan lukim.” b Nomata hem no samting wea olketa mas duim, samfala mekem datfala promis and givim nem blo olketa for pablisim lo Zion’s Watch Tower. Samfala year bihaen, organization luksavve datfala promis hem helpem samfala lo datfala taem bat gogo hem kamap wanfala kastom nomoa, so olketa stop for duim datwan. Nomata olsem olketa gohed followim olketa principle insaed datfala promis.

7. The Watchtower blo 1935 story abaotem wanem problem, and wanem kaonsel tu hem givim?

⁷ Olketa attak blo Satan kamap big go moa. The Watchtower blo March 1, 1935 tok stret abaotem wanfala problem wea gohed midolwan pipol blo God. Samfala tingse from olketa preach olowe, olketa no need for followim olketa haefala standard blo Jehovah lo laef blo olketa. The Watchtower tok stret olsem: “For duim preaching waka hem no inaf. Olketa Jehovah’s witness karem nem blo Jehovah, and olketa garem bigfala responsibility for mek sure fasin blo olketa hem fitim datfala nem and kingdom blo hem.” Article hia storyim klia olketa kaonsel abaotem marit and hao man savve deal witim narawan lo opposite sex, diswan helpem pipol blo God for ‘ranawe from eni samting wea savve switim olketa for durong.’—1 Cor. 6:18.

8. Why nao The Watchtower staka taem storyim stret mining blo datfala Greek toktok, wei for durong?

⁸ Lo taem blo iumi, Wastaoa staka taem storyim stret mining blo datfala toktok (por·neiʹa) wea stap lo olketa Greek Scripture wea iumi transleitim olsem wei for durong. Por·neiʹa no minim nomoa wei for duim sex bat hem minim tu, evri difren kaen rabis wei for duim sex wea pipol wea olobaot olketa duim. So olketa follower blo Christ kasem protection from olketa nogud samting wea kamaot from wei for durong wea staka pipol lo world distaem kasem.—Readim Ephesus 4:17-19.

9, 10. (a) Wanem kaen wei nao The Watchtower blo 1935 story abaotem? (b) Wanem balance tingting nao Bible storyim abaotem wei for drinkim alcohol?

 ⁹ Wei for drinkim tumas alcohol. The Watchtower blo March 1, 1935, storyim nara samting, hem sei: “Samfala savve drinkim [alcohol] taem olketa go aot lo ministry or duim samfala nara waka insaed organization. Wanem nao Bible talem abaotem wei for drinkim wine? Waswe, hem stret for man gohed duim waka lo organization blo Lord sapos hem man for drink tumas?”

¹⁰ The Watchtower hia storyim balance tingting abaotem wei for drinkim alcohol wea stap insaed Bible. Bible no stopem wei for drinkim lelebet wine and olketa nara drink wea garem alcohol insaed, bat hem barava againstim wei for drunk. (Sams 104:14, 15; 1 Cor. 6:9, 10) Pipol blo God wea duim holy waka and drinkim alcohol, shud tingim story blo tufala son blo Aaron, wea God killim tufala dae bikos tufala mekem fire lo altar, samting Jehovah nating talem tufala for duim. Olketa verse bihaen storyim wanem nao maet mekem tufala for duim samting hia wea no stret. God givim wanfala law wea stopem evri priest for mas no drinkim alcohol taem olketa duim holy waka. (Levitikas 10:1, 2, 8-11) Distaem tu olketa follower blo Christ followim datfala principle, and stap klia lo wei for drinkim alcohol taem olketa duim holy waka.

11. Why nao hem gud for pipol blo God, kasem moa savve abaotem wei for no ova tumas for drinkim alcohol?

¹¹ Lo taem blo iumi, olketa follower blo Christ kasem moa savve abaotem wei for drinkim tumas alcohol, wea minim for addict lo alcohol. From olketa pablikeson blo iumi kam lo barava taem, staka nao kasem help lo wanem for duim for kontrolem datwan and for stap klia lo hem. Staka narawan kasem help for stop for drinkim alcohol. No eniwan bae letem wei for ova tumas for drink for spoelem famili blo hem, wei wea pipol respectim hem, and tu, spoelem privilege wea hem garem for worshipim Jehovah.

12. Nomata bifor olketa last day start, hao nao olketa servant blo Christ ting lo wei for iusim tobacco?

¹² Wei for iusim tobacco. Bifor olketa last day start, isisi olketa follower blo Christ start for discouragem wei for iusim tobacco. Samfala year go finis, wanfala olo brata wea nem blo hem Charles Capen, tingim bak firstaem wea hem meetim Charles Taze Russell. Lo datfala taem hem 13 years old, and hem witim thrifala brata blo hem standap followim ladder lo Bible House lo Allegheny, Pennsylvania. Taem Russell kam pasim olketa, hem askem olketa: “Hao olketa boy, iufala smoke? Mi smelem tobacco.” Olketa talem hem, olketa no smoke. Olketa luksavve nao lo tingting blo Russell abaotem wei for iusim tobacco. Lo Watch Tower blo August 1, 1895, Brata Russell storyim 2 Corinth 7:1. Hem sei: “Mi tingim, for eni Christian iusim tobacco hem no mekhae lo God, or for hem kasem eni gud samting. . . . Hem hard tumas for iumi tingim Lord blo iumi hem putim lo mouth blo hem eni samting wea savve mekem body dirty, and for smelem smoke lo body blo hem.”

13. Lo 1973, wanem change nao kamap wea mekem pipol blo God klin moa?

 ¹³ The Watchtower blo 1935, kolem tobacco lo “dirty grass” and sei eniwan wea chus for kaikaim or smokem tobacco, bae no stap lo Bethel or duim olketa waka lo organization blo God olsem pioneer or duim traveling waka. Lo 1973, God klinim moa pipol blo hem. The Watchtower blo June 1 explainim wanfala Witness blo Jehovah bae no showimaot love and savve lusim privilege blo hem insaed kongregeson sapos hem gohed for iusim samting wea dirty, and wea savve killim man dae. Olketa wea no laek for stop for iusim tobacco savve disfellowship. c Diswan hem nara important samting wea Christ duim for mekem olketa follower blo hem kamap klin.

14. Wanem nao standard blo God abaotem blood, bat why nao staka pipol iusim blood transfusion?

¹⁴ Wei for iusim blood lo rong wei. Lo taem blo Noah, God sei hem rong for kaikaim blood. God talem moa taem hem givim Law lo nation blo Israel, and hem talem sem samting lo Christian kongregeson for “stap klia . . . long blood.” (Acts 15:20, 29; Jenesis 9:4; Levitikas 7:26) Lo taem blo iumi, Satan faendem wei for mekem staka for no tinghae lo disfala komand blo God. Lo mek-19 century, olketa doctor duim samfala experiment witim blood transfusion, and olketa luksavve blood blo samfala man hem semsem, staka doctor nao iusim blood transfusion for treatim man wea short lo blood. Lo 1937, olketa start for kolektem blood and putim lo olketa ples wea olketa kolem blood bank, then taem World War II kamap datwan mekem blood transfusion kamap moa big. Gogo blood transfusion hem main treatment wea olketa doctor raonem full world iusim.

15, 16. (a) Wanem nao tingting blo olketa Jehovah’s Witness abaotem wei for tekem blood transfusion? (b) Olketa follower blo Christ kasem wanem help saed lo blood transfusion and olketa nara treatment wea no iusim blood, and wanem gud samting nao kamaot from datwan?

¹⁵ Lo start blo 1944, The Watchtower sei wei for tekem blood transfusion hem semsem olsem wei for kaikaim blood. Lo year bihaen, direction abaotem wanem Bible talem for no tekem blood hem kamap moa klia. Lo 1951, olketa garem wanfala list blo olketa kwestin and ansa for helpem pipol blo God savve hao for story witim olketa doctor. Raonem world, olketa follower blo Christ gohed faithful, nomata pipol tok spoelem olketa, againstim olketa, and persecutim olketa. And Christ gohed iusim organization blo hem for givim sapot wea olketa needim. Organization studyim gud and duim research and pablisim olketa brochure and olketa magasin abaotem blood.

¹⁶ Lo 1979, samfala elder start for visitim olketa hospital for helpem olketa doctor for minim wanem Bible talem abaotem why iumi no acceptim blood, and olketa nara treatment wea no iusim blood. Lo 1980, olketa elder lo 39-fala taon lo United States kasem wanfala spesol training for duim disfala waka. Gogo, Governing Body appruvim for evriwea lo world garem olketa Hospital Liaison Komiti. Waswe, gud samting kamaot from diswan lo olketa year wea go pas? Distaem, staka thousand doctor wea waka tugeta witim olketa Witness wea sik, respectim disison blo iumi for iusim eni medical treatment wea no  iusim blood. Staka hospital agree for iusim olketa treatment wea no iusim blood, and samfala narawan luksavve treatment hia hem best wan. Iumi barava hapi taem iumi tingim olketa samting wea Jesus duim for protectim olketa follower blo hem, nomata Satan trae for mekem olketa no klin.—Readim Ephesus 5:25-27.

17. Hao nao iumi showimaot iumi tinghae lo wanem Christ duim for mekem olketa follower blo hem klin?

¹⁷ Hem gud for iumi askem iumiseleva, ‘Waswe, iumi tinghae lo wanem Christ duim for mekem olketa follower blo hem klin, and trainim iumi for followim olketa haefala standard blo Jehovah?’ Sapos olsem, hem gud for tingim hao Satan hem gohed for lukaotem chance for separatem iumi from Jehovah and Jesus, lo wei for isisi mekem iumi no respectim olketa standard blo God. For Satan no spoelem iumi, organization blo Jehovah evritaem warnim and remindim iumi abaotem olketa nogud wei blo disfala world. Iumi mas gohed lukaot and kwiktaem obeyim olketa nambawan kaonsel olsem.—Provebs 19:20.

18. Vision blo Ezekiel givim iumi wanem klia direction saed lo olketa wea laek for againstim olketa standard blo God?

¹⁸ Mek-tu wei for klin lo fasin hem for duim olketa samting wea bae keepim kongregeson klin. Sorre samting nao, staka wea  disaed for followim olketa standard blo Jehovah and dedicate lo hem, olketa no followim wanem olketa disaedem. Gogo samfala olketa change and barava againstim olketa standard hia. Wanem nao bae happen lo olketa olsem? Vision blo Ezekiel abaotem spiritual temple wea iumi storyim lo start blo disfala chapter, bae ansarem kwestin hia. Tingim olketa gate wea hae tumas. Lo each door hem garem olketa rum blo olketa gard. Olketa gard savve protectim temple from eniwan wea “no circumcise long heart” for go insaed. (Ezek. 44:9, NW) Datwan showimaot klia privilege for man followim tru worship hem for olketa wea obeyim olketa standard blo Jehovah lo laef blo olketa. Lo sem wei distaem, privilege for followim tru worship witim olketa nara Christian hem no samting wea eniwan nomoa savve kasem.

19, 20. (a) Hao nao Christ isisi helpem olketa follower blo hem for savve lo wanem for duim taem eniwan duim bigfala sin? (b) Wanem nao thrifala reason for disfellowshipim man wea no repent?

¹⁹ Watch Tower lo 1892, storyim “iumi garem responsibility for disfellowshipim wanfala Christian wea talem or duim samting wea showim hem no tinghae lo ransom wea Christ givim . . . for baem bak staka pipol.” (Readim 2 John 10.) Lo 1904, datfala buk The New Creation storyim hao olketa wea gohed nomoa for duim nogud samting savve spoelem olketa narawan lo kongregeson. Lo datfala taem, full kongregeson nao savve lukluk lo case blo olketa wea duim serious sin, olketa kolem diswan lo “kot case blo church.” Bat diswan no happen evritaem. The Watchtower blo 1944, storyim olketa brata wea garem responsibility insaed kongregeson nomoa savve deal witim kaen case olsem. Lo 1952, The Watchtower storyim hao for deal witim olketa judicial case followim wanem Bible talem. Magasin hia talem klia main reason why olketa disfellowshipim man wea no repent, hem for keepim kongregeson klin.

²⁰ Lo olketa year bihaen, Christ helpem olketa follower blo hem for kasem stretfala savve lo hao for deal witim olketa wea duim serious sin. Olketa elder kasem training for followim tingting blo Jehovah, lo wei for balance and showimaot mercy taem olketa deal witim olketa judicial case. Distaem iumi luksavve lo thrifala reason why samwan wea no repent hem savve disfellowship from kongregeson: (1) for mekem pipol no tok daonem nem blo Jehovah, (2) for protectim kongregeson mekem nogud samting wea samwan duim no spoelem kongregeson, and (3) for helpem man wea duim sin for repent.

21. Lo wanem wei nao disfala arrangement for disfellowshipim man hem helpem pipol blo God?

²¹ Waswe, iu lukim gud samting wea olketa follower blo Christ kasem distaem from arrangement for disfellowshipim samwan? Lo nation blo Israel bifor, olketa wea duim bigfala sin olketa spoelem olketa narawan lo datfala nation. Samfala taem olketa staka winim olketa narawan wea lovem Jehovah and wea laek for duim stret samting. Dastawe, staka taem datfala nation spoelem nem blo Jehovah and hem no hapi lo olketa. (Jeremaea 7:23-28)  Distaem, Jehovah no deal witim wanfala nation nomoa, bat hem deal witim pipol from olketa difren kantri wea chus for worshipim hem and followim olketa standard blo hem. Taem kongregeson aotem olketa wea duim bigfala sin wea no laek for repent, Satan bae no iusim olketa for spoelem moa kongregeson and wei wea kongregeson hem klin. And wanem olketa duim bae no affectim tumas olketa narawan lo kongregeson. Olsem wanfala kongregeson, iumi laek for gohed mekem Jehovah hapi lo iumi. Tingim promis wea Jehovah talem: “Eni weapon wea pipol wakem for againstim iufala bae no spoelem iufala.” (Isa. 54:17, NW) Waswe, iumi faithful for sapotim olketa elder wea garem bigfala responsibility for deal witim olketa judicial case?

22, 23. Why nao iumi tinghae lo olketa brata and sista blo iumi lo bifor, and wanem pruv nao showimaot olketa needim moa balance tingting saed lo famili?

²² Mek-thri samting wea Christ gohed duim for klinim olketa follower blo hem mekem olketa kasem gud samting, hem saed lo marit and famili arrangement. Lo olketa year wea go pas, savve blo iumi saed lo famili arrangement hem kamap moa klia. Olsem example, iumi tinghae and hapi taem iumi read abaotem willing fasin blo olketa servant blo God lo start blo mek-20 century. Iumi tinghae lo wei wea olketa putim waka blo God first samting lo laef blo olketa. Nomata olsem, iumi luksavve olketa need for garem balance tingting. Lo wanem wei?

²³ Lo bifor, staka brata savve agree for go from famili blo olketa for staka month for preach and for visitim olketa kongregeson wea stap farawe. And samfala taem olketa pablikeson blo iumi encouragem olketa brata and sista for no marit, nomata diswan hem no wanem Bible talem, and tu, olketa no givim staka advaes for olketa wea marit lo hao for strongim marit blo olketa. Waswe, olketa sem advaes hia tu olketa follower blo Christ followim distaem? Nomoa!

24. Hao nao Christ helpem pipol blo hem for garem balance tingting abaotem marit and famili?

²⁴ Distaem, organization no encouragem olketa brata for duim olketa assignment wea bae mekem olketa for no lukaftarem famili. (Readim 1 Timothy 5:8.) And tu, Christ mek sure olketa follower blo hem lo earth kasem staka advaes lo Bible abaotem marit and famili laef wea savve helpem olketa. (Eph. 3:14, 15) Lo 1978, wanfala buk wea garem title Make-im Family Life Belong You Happy hem release. Samting olsem 18 year bihaen, nara buk Secret for Kasem Hapi Famili hem release. And tu, Wastaoa magasin garem staka article wea savve helpem olketa wea marit for followim olketa Bible principle lo marit blo olketa.

25-27. Lo olketa year wea go pas, wanem nao organization duim wea showimaot olketa tingim need blo olketa pikinini?

²⁵ Waswe, lo olketa young wan? Lo olketa year wea go pas, olketa kasem staka samting wea savve helpem olketa. For longtaem kam, organization blo Jehovah provaedem staka gud samting for olketa pikinini nomata wanem age nao olketa, and firstaem, hem olsem wata wea isisi drop, bat distaem hem kamap  wata wea ran big. Olsem example, lo 1919 go kasem 1921, The Golden Age garem article wea garem title “Juvenile Bible Study.” And lo 1920, The Golden Age ABC brochure hem release, then lo 1941, datfala buk Children, hem release. Lo olketa year blo 1970, olketa buk Listening to the Great Teacher, Your Youth—Getting the Best out of It, and Bible Story Buk Bilong Mi hem release. Lo 1982, Awake! garem olketa article “Young People Ask,” and then lo 1989 organization pablisim wanfala buk wea garem title Questions Young People Ask—Answers That Work.

²⁶ Distaem, iumi garem tufala volume blo Young People Ask, and olketa nara part blo hem gohed kamaot lo jw.org Website. And iumi garem tu datfala buk Lane From Datfala Nambawan Teacher. Website blo iumi garem staka interesting samting for olketa young wan, olsem olketa Bible card, olketa Bible study leson for olketa pikinini and olketa teenager, olketa piksa, olketa video, and olketa Bible story wea garem olketa piksa, and tu, olketa Bible leson for olketa pikinini wea no winim thri years. Diswan mekem iumi luksavve tingting blo Christ abaotem olketa  pikinini taem hem hipimap olketa kam lo hem lo first century, hem no change. (Mark 10:13-16) Jesus laekem olketa young wan blo iumi for savve hem lovem olketa and for olketa kaikai gud lo spiritual wei.

²⁷ And tu, Jesus laekem olketa pikinini for kasem protection from olketa nogud samting. Taem nogud wei blo pipol lo world kamap worse distaem, child abuse hem kamap moa big. Dastawe, organization pablisim olketa article wea talem klia wanem olketa parents savve duim for protectim pikinini from disfala nogud samting. d

28. (a) Wanem nao iumi need for duim, sapos iumi laek gohed stap insaed tru worship, olsem tokpiksa lo vision blo Ezekiel talem? (b) Wanem nao iu disaed strong for duim?

²⁸ Tru nao, iumi hapi for savve Christ gohed for mekem olketa follower blo hem klin, hem trainim olketa for respectim, for followim, and kasem gud samting from olketa haefala standard blo Jehovah. Tingim moa temple wea Ezekiel lukim lo vision. Tingim olketa haefala gate. Hem tru, temple hia hem no wanfala really temple, bat hem wanfala spiritual temple. Nomata olsem, waswe, iumi lukim temple hia olsem wanfala really temple? For iumi go insaed lo temple, hem no inaf for go lo olketa meeting lo Kingdom Hall, readim Bible, or preach lo haos tu haos. Olketa samting hia, hem olketa samting wea pipol savve lukim nomoa. Wanfala hypocrite savve duim olketa samting hia tu, nomata hem no go insaed lo temple blo Jehovah. Bat sapos iumi duim olketa samting hia, and lo semtaem iumi followim olketa standard blo Jehovah lo laef blo iumi, and join insaed tru worship witim heart wea klin, iumi savve go insaed and duim olketa holy waka lo temple, wea hem arrangement blo tru worship blo Jehovah God! Iumi laek for evritaem tinghae lo disfala nambawan privilege. And tu, iumi laek for evritaem traem best blo iumi for keepim olketa haefala standard blo Jehovah. Lo wei olsem iumi showimaot Jehovah hem holy!