1. ¿Imatataj Ezequiel mosqoypi jina rikorqa?

 PROFETA Ezequiel jina rikukusqaykipi tʼukuriy. Payqa 2.500 watas ñaupajta jina, may jatun kʼancharishaj temploman yaykorqa, chaypitaj uj ángel suyasharqa, chay kʼacha lugarta rejsichinanpaj. Qanchis patillasta wicharispa, temploj kinsa jatun punkusninmanta ujninman chayarqa, chay punkusqa pampamanta techokama 30 metros jina miderqa. Chaypitaj sapa ladopi qhawajkunaj cuartosninta rikorqa, chantá palma sachʼaman rijchʼakoj sayantastawan (Eze. 40:1-4, 10, 14, 16, 22; 41:20).

2. 1) ¿Imawantaj chay templo ninakun? (Sutʼinchaynintawan qhawariy.) 2) ¿Imawantaj temploj punkusnin ninakun?

² Chayqa, Ezequiel mosqoypi jina Diospa templonta rikusqan karqa. Ezequielqa chay rikusqanmanta tukuy imata sutʼincharqa, Ezequiel libropi 40 capitulomanta 48 capitulokama. Chay temploqa, imaynatachus Jehovata munasqanman jina yupaychaywan ninakun. Chay templomanta sutʼinchakusqanqa, kay qhepa pʼunchaykunapi Diosta yupaychasqanchejwan kikinchakun. a ¿Imawantaj temploj jatun punkusnin ninakun? Chayqa yuyarichiwanchej, Diosta yupaychayta qallarejkunaqa kamachiykunasninman jina kausananku kasqanta. Palma sachʼas kasqanpis kikillantaj niyta munan, imaraykuchus Bibliapeqa wakin kuti chay sachʼasmanta parlan cheqan kaywan kikinchananpaj (Sal. 92:12). Qhawajkunapaj cuartos kasqantaj rikuchin, Diospa kamachiykunasninta pisipaj qhawajkunaqa chay temploman mana yaykuyta atisqankuta, nisunman Diosta yupaychayta mana atisqankuta (Eze. 44:9).

3. ¿Imaraykutaj Cristoj yachachisqasnin llimphuchasqallapuni kananku karqa?

³ ¿Imaynatá Ezequiel mosqoypi jina rikusqan juntʼakun? Kay libroj 2 yachaqananpi yachakorqanchej jina, Jehovaqa Cristonejta llajtanta llimphucharqa 1914 watamanta 1919 wata qallariykama. ¿Chaykamallachu llimphuchasqan karqa? Mana. Cristoqa, watas pasasqanman jina Diospa kamachiykunasninman jina kausana kasqanta yachachillarqapuni. Yachachisqasninpis llimphuchasqa kayta necesitallarqankupuni. ¿Imaraykú? Kay pachaj chʼichi kausayninmanta orqhosqa kasqankurayku, watejmanta chʼichichakunankupajtaj Satanás tukuy imata ruwasqanrayku (2 Pedro 2:20-22 leey). Kunanqa, cheqa cristianos imaspichus llimphuchasqallapuni  kasqankuta qhawarisun. Uj kaj, imaynatachus kausananku kasqanta, iskay kaj, qotuchakuy llimphullapuni kananpaj imatachus ruwakusqanta, kinsa kaj, familiapi imastachus ruwananku kasqanta.

4, 5. ¿Imawantaj Satanás unaymantapacha runasta urmachin?

⁴ Uj kaj, Jehovaj llajtanmanta kajkunaqa llimphu, cheqan kausayniyojtaj kanankupaj mayta kallpachakunku. Chayrayku llimphu kausayniyoj kanankumanta aswan sutʼita yachaspa kasukunkupacha. Wakinta qhawarina.

⁵ Khuchichakuy. Jehovaqa munarqa, casarasqa kajkuna qhariwarmi jina puñuykusqanku allin, llimphutaj kananta. Satanastaj, Jehová chayta casarasqasman qosqanta mana allinman tukuchin, Jehovaj kamachisnintapis chaywan urmachiyta munan, Diospa ñaupaqenpi niña allinpaj qhawasqa kanankupaj. Satanasqa Balaampa tiemponpi ashkha runasta chaywan urmacherqaña, kay qhepa pʼunchaykunapitaj astawanraj chayta ruwashan (Núm. 25:1-3, 9; Apo. 2:14).

6. Torremanta Qhawaj revistapi, ¿imatataj uj kamachiyta jina orqhokorqa? ¿Imatá ashkhas nerqanku, chantá imaraykutaj chayta niña valechikorqachu? (Sutʼinchaynintawan qhawariy.)

⁶ Kay 1908 watapi 15 junio killamanta Torremanta Qhawaj revistapi, Satanaspa kallpachakusqan qhasilla kasqanta rikuchinanpaj, uj kamachiyta jina orqhokorqa, chaypitaj jinata nerqa: “Imaynachus kasaj tukuy rikunankuta, kikillantaj kasaj sapallaypi uj qhariwan chayri uj warmiwan kashaspa”, nispa. b Mana chaypi nisqanman jinapunichu ruwakunan kajtinpis, ashkhas chay revistapi nisqanman jina ruwanankuta nerqanku, sutisninkutataj willarqanku chay revistapi llojsinanpaj. Watasninmantaj, Diospa llajtanqa, chay revistapi nisqan ashkhasta yanapajtinpis, costumbre jinalla kasqanta repararqa, chayrayku niña valecherqachu. Chaywanpis, Diospa llajtanqa llimphu kausayniyojllapuni karqa.

7. ¿Ima chʼampaymantataj 1935 watapi Torremanta Qhawaj revistapi parlarqa, chantá imatataj sutʼincharqa?

⁷ Satanasqa sinchʼita churanakullarqapuni. Kay 1935 watapi, agosto killamanta Torremanta Qhawaj revistapi, ima chʼampaypichus Diospa kamachisnin rikukushasqankumanta parlarqa. Wakenqa Diosmanta willasqankurayku, sapallankupi kashaspa Diospa kamachiykunasninta mana kasunankupunichu kasqanta yuyarqanku. Chay revistapitaj sutʼita nerqa: “Mana willanallanchejchu tiyan, mana chayllachu ruwayninchejqa. Astawanpis Jehovaj testigosnin kasqanchejrayku, sutinmanta, reinonmantawan sutʼinchajkuna jina kausakunanchej tiyan”, nispa. Chay revistapeqa sumaj yuyaychaykuna kallarqataj casarasqaspaj, llimphu kausayniyoj kanapaj ima. Ajinamanta Diospa llajtanta mana khuchichakuypi urmananpaj yanaparqa (1 Cor. 6:18).

8. ¿Imatataj Torremanta Qhawaj revistapi kutin kutita sutʼinchakorqa?

⁸ Griegopi Qhelqasqaspi khuchichakuymanta parlanapaj pornéia palabrata oqharikusqan imapunichus niyta munasqanta,  kay ñaupaj watasllapi, kutin kutita Torremanta Qhawaj revistapi sutʼinchakorqa. Chay palabrataqa mana qhariwarmi jina puñuykuymanta parlanallapajchu oqharikun, astawanpis tukuy laya khuchichakuykunamanta parlanapaj, ujnintaj kanman khuchichakunapaj wasispi millay imasta ruwakusqan. Chay sutʼinchaykunaqa, ashkha cheqa cristianosta jarkʼan, chay millay ruwaykunapi urmaymanta, mayqenpichus Jallpʼantinpi ashkha runas urmanku (Efesios 4:17-19 leey).

9, 10. 1) ¿Imamantataj parlarqa 1935 watapi Torremanta Qhawaj revista? 2) ¿Imatataj Biblia machaykuymanta yachachin?

⁹ Machayman qokuy. Kay 1935 watapi agosto killamanta Torremanta Qhawaj revistapi, waj ruwaymanta jinata nillarqataj: “Wakenqa machachina ujyanasta ujyaspapis, willaj rillanku, Diospa llajtanpi waj ruwaykunatapis ruwallanku. Biblia nisqanman jina, ¿maykʼajllataj vinota ujyay allin? ¿Señorpa llajtanpi ruwanasninchejta saqechinawanchejkamachu vinota ujyana kanman?”, nispa.

¹⁰ Chay revistapi nerqa, Biblia nisqanman jina machachej ujyanasta maychus kajllata qhawana kasqanta. Bibliaqa vinota chayri waj machachina ujyanasta pisillata ujyayta mana juchachanchu. Astawanqa machaykuyta juchachan (Sal. 104:14, 15; 1 Cor. 6:9, 10). ¿Pisillatapis ujyaspa Diospa llajtanpi ima ruwayllatapis ruway allillanchu? Diospa kamachisnintaqa unaymantapachaña yuyarichikun Aaronpa wawasninwan imachus kasqanmanta. Paykunataqa Dios wañuracherqa mana kamachisqan “ninata[...]” jaywasqankurayku. Aswan qhepaman, Diosqa kamacherqa sacerdotes templopi ruwanasninkuta ruwashaspa, ama ujyanankuta. Aaronpa wawasnenqa ichá machasqa kashasqankurayku Diospa kamachisqanta pʼakerqanku (Lev. 10:1, 2, 8-11). Cristoj yachachisqasnenqa, chay yuyaychayta kasukuspa, Diospa ruwanasninkuta ruwashaspa mana uj chhikallatapis ujyankuchu.

11. ¿Imaynatataj cheqa cristianosta yanaparqa machachej ujyanasman qokuymanta aswan sutʼita entiendesqanku?

¹¹ Kay pasaj watasllapi, cheqa cristianosqa aswan sutʼita entienderqanku machachej ujyanasman qokuymanta, nisunman vicioman tukuchiymanta. Chantapis Diosmanta yachachiykunata mikhunata jina horanpi japʼisqanchejrayku, ashkhas chay chʼampayta atipaspa kausayninkuta allinchanku. Wakintataj manaña chaypi urmanankupaj yanaparqa. Machaspaqa, allinpaj qhawasqa kayta, familianchejta, astawanqa Diosta yupaychayninchejta chinkachisunman. Chaytataj ni imarayku saqenachu.

12. ¿Imaynatataj Diospa kamachisnin niraj qhepa pʼunchaykuna qallarishajtin tabacota qhawarqanku?

¹² Tabaco. Tabacoqa uj planta, mayqenmantachus cigarrillosta ruwakun. Diospa kamachisnintaj, kay qhepa pʼunchaykuna niraj qallarishajtinña tabacota mana allinpajchu qhawarqanku. Kay pasaj wataspi, hermano Charles Capen yuyarikorqa, hermano Charles Taze Russellwan 1800 watas tukukuyta ñaupaj kutirayku parlarisqanmanta. Hermano Charles Capenqa, chay kutipi 13 watayoj kasharqa, kinsa  hermanosninwantaj Allegheny llajtapi (Pensilvania, Estados Unidos) Casa Bíblica nisqaj gradasninpi kasharqa. Hermano Russelltaj chaynejta pasashaspa nerqa: “¿Pitashankichejchu? Tabacollaman qʼapashan”, nispa. Paykunataj mana pitashasqankuta nerqanku. Imatachus hermano Russell tabacomanta yuyasqanta sutʼitachá repararqanku. Kay 1895 watapi 1 agosto killamanta Torremanta Qhawaj revistapi, hermano Russell 2 Corintios 7:1 versiculopi nisqanta ajinata sutʼincharqa: “Reparasqayman jina tabacota hojaspi chayri wakichisqataña apaykachayqa cristianota mana yanapanchu, nitaj Diosta jatunchanchu. [...] Mana yuyallasunmanpischu Señorninchej tabacollaman qʼapashasqanta chayri millay imasta siminman churakushasqanta”, nispa.

13. ¿Imaynatataj 1973 watapi Diospa llajtan llimphuchasqallapuni karqa?

¹³ Kay 1935 watapi Torremanta Qhawaj revistapi tabaco “millay qhora” kasqanta nerqa. Chantapis nillarqataj, pichus tabacota pijchaj, pitaj imaqa manaña Betelpi llankʼayta atisqanta chayri Diospa llajtanpi precursor kayta chayri qotuchakuykunata waturej kayta. Kay 1973 watapi Diospa llajtanqa llimphuchasqallapuni karqa. Chayrayku chay watallapitaj 15 octubre killamanta Torremanta Qhawaj revistapi sutʼincharqa, chay chʼichipaj, mana allinpajtaj qhawasqa viciota mana saqeyta atej Testigosqa, niña qotuchakuymanta jinachu qhawasqa kanankuta. Manapuni tabacota saqeyta atejtaqa, qharqokunan karqa. c Cristoqa chay jinamanta yachachisqasninta llimphuchashallarqapuni.

14. ¿Imatataj Dios yawarmanta kamachin, imaynamantá Jallpʼantinpi yawarta churayman yachaykukorqanku?

¹⁴ Yawar. Diosqa, Noej tiemponpi yawarta mana mikhunankuta kamacherqa. Aswan qhepamantaj, Israel llajtaman Leyta qosqanpi kikillantataj kamacherqa. Apostolespa tiemponmanta cristianosmanpis kamacherqa “yawarmanta[...] tʼakacunancuta” (Hech. 15:20, 29, Mosoj Testamento, 1956; Gén. 9:4; Lev. 7:26). Chayraykuchá, Satanasqa kay tiempopi Diospa kamachisnin chay kamachiyta kasukunankuta mana munanchu. Kay 1800 watas chaynejpi doctoresqa, jampispa yawarta churayta qallarerqankuña, yawarqa mana uj rejllachu kasqanta yachaspataj, astawanraj chayta ruwarqanku. Kay 1937 watamantapacha, yawarta tantaspa waqaycharqanku. Iskay kaj Guerra Mundialpitaj, ashkha runas yawarta churachikorqanku. Pisi tiemponmanqa Jallpʼantinpiña chayta ruwakoj.

15, 16. 1) ¿Imatataj Jehovaj testigosnin nerqanku yawarta churachikuymanta? 2) Mana yawarllawan jampichikuymanta, ¿ima yanapastaj Cristoj yachachisqasninpaj tiyan, imaynatá chay yanapawanchej?

¹⁵ Kay 1944 watapiña Torremanta Qhawaj revistapi sutʼinchakorqa, yawarta churachikoyqa mikhuykuy jina kasqanta (castellanopi La Atalaya 15 abril 1945). Killasninmantaj yawarta churachikuymanta, astawan sutʼinchakorqa. Kay 1951 watapitaj tapuykunasniyoj, kutichiykunasniyoj listata orqhokorqa, chayqa Diospa kamachisninta doctoreswan parlanankupaj yanaparqa. Jallpʼantinmanta hermanos, yawarmanta imatachus creesqankupi sinchʼita sayarqanku, wajkuna asipayajtinkupis,  churanakojtinkupis, qhatiykachajtinkupis. Chaywanpis Cristoqa llajtannejta paykunata yanaparqa, orqhokorqataj sumaj wakichisqa yachaqanas, folletos ima.

¹⁶ Kay 1979 watapi, wakin ancianosqa hospitalesman doctoreswan parlaj riyta qallarerqanku. ¿Imapaj? Imapichus creesqanchejta, chaytaj Bibliaman jinapuni kasqanta doctores entiendenankupaj, mana yawarllawantaj jampiyta atikusqanta yachanankupaj. Kay 1980 watapitaj, Estados Unidos suyoj 39 llajtasninmanta ancianosta wakichikorqa, doctoreswan parlanankupaj. Tiemponman, Diospa Llajtanta kamachejkunaqa, Comités de Enlace con los Hospitales nisqa Jallpʼantinpi kananta nerqanku. ¿Imaspitaj chay yanaparqa? Kay tiempopeqa may chhika doctores Jehovaj testigosninta yanapanku, yawarmanta imatachus yuyasqankutapis jatunpaj qhawanku. Ashkha hospitalespiña, mana yawarllawan operashanku, wakinpitaj chay jinamanta jampiy allin kasqanta reparanku. Jesús yachachisqasninta Satanás chʼichichayta munasqanmanta jarkʼasqanqa, ¡may sumaj! (Efesios 5:25-27 leey.)

17. ¿Imaynatá Cristo yachachisqasninta llimphuchashasqanta jatunpaj qhawasqanchejta rikuchinchej?

¹⁷ Tukuy tapurikusunman: “¿Jatunpajchu qhawani Cristo llimphuchawasqanchejta, Diospa kamachiykunasninta  kasukunata yachachiwasqanchejtapis?”, nispa. Satanasqa Diospa kamachiykunasninta pisipaj qhawananchejta munan, ajinamanta Jehovamanta, Jesusmanta ima karunchakunanchejpaj. Chayta munasqan qhasilla kasqanta rikuchinanpajtaj, Jehovaqa llajtannejta yuyaychawanchej, yuyarichiwanchejtaj imayna kausaytachus mana allinpaj qhawasqanta. Chayrayku wakichisqallapuni kana, chay sumaj yuyaychaykunatataj kasukunallapuni (Pro. 19:20).

18. ¿Imatataj Ezequiel mosqoypi jina rikusqan yuyarichiwanchej?

¹⁸ Iskay kaj, qotuchakuypis llimphuchasqallataj kanan tiyan. ¿Imaraykú? Imaraykuchus Jehovaj kamachiykunasninta japʼejkunaqa, mana tukuychu kasukunku, nitaj payman tukuy qokojkunachu nisqankuta juntʼanku. Wakenqa waj jinatañataj yuyaspa, Diospa kamachiykunasninta manaña kasukunkuchu. ¿Imatá chay runaswan ruwakun? Chayta yachanapajqa yanapawanchej, kay yachaqanaj qallariyninpi Ezequiel mosqoypi jina rikusqan templomanta ukhuncharisqanchej. ¿Yuyarikunkichu jatuchaj punkusninmanta? Sapa yaykunapeqa kinsa qhawajkunaj cuartosnin kasharqa. Qhawajkunaqa, templota qhawaj kanku, “sonqompi[...] mana circuncidasqa” kajkuna mana yaykunankupaj (Eze. 44:9). Chaytaj yuyarichiwanchej, Jehová kamachiykunasninman jina kausanankupaj kallpachakojkunalla, payta yupaychayta atisqankuta. Hermanosninchejwan khuska yupaychayta atisqanchejwanpis kikillantaj, imajtinchus mana tukuychu chayta ruwayta atinku.

19, 20. 1) ¿Imaynatá Cristo yachachisqasninta yanaparqa, uj hermano jatun juchapi urmajtin imatachus ruwananku kasqanta aswan allinta entiendenankupaj? 2) ¿Imaraykutaj mana pesachikojkunata qotuchakuymanta qharqokun?

¹⁹ Kay 1892 watapi, Torremanta Qhawaj revistapi jinata sutʼincharqa: “Ruwayninchejqa, noqanchejrayku Cristo kausayninta [...] qosqanta sutʼimanta chayri mana reparayllata qhesachajkunata qharqoy”, nispa (2 Juan 10 leey). Kay 1904 watapi La nueva creación (The New Creation) nisqa libropi nerqa, juchallikuspallapuni kausajkunaqa qotuchakuyta chʼichichasqankuta. Chay tiempopeqa, wakin kutilla “tribunales de la iglesia” nisqata wakichikoj, chaypitaj tukuy hermanos qhawarej kanku uj hermano jatun juchapi urmasqanta. Kay 1944 watapitaj Torremanta Qhawaj revistapi sutʼincharqa, qotuchakuyta ñaupajman apajkunalla chayta ruwayta atisqankuta. Kay 1952 watapi Torremanta Qhawaj revistapi nikorqa, juchallikojta imaynatachus Bibliaman jina juzganankuta, mana pesachikuyta munajtataj qotuchakuy llimphullapuni kananpaj qharqonankuta.

²⁰ Aswan qhepamantaj, Cristoqa yachachisqasninta yanaparqa aswan allinta entiendenankupaj, uj hermano jatun juchapi urmajtin imatachus ruwanankuta. Ancianostaqa sumajta wakichikun, Jehová munasqanman jina juchallikojta juzganankupaj, imaraykuchus Jehovaqa cheqan, khuyakuyniyojtaj.  Kay tiempopeqa, sutʼita reparanchej juchankumanta mana pesachikojkunata imaraykuchus qotuchakuymanta qharqokusqanta, 1) Jehovaj sutin mana chʼichichakunanpaj, 2) qotuchakuy llimphu kananpaj, 3) juchayoj runa pesachikunanpaj.

21. ¿Imaraykutaj Diospa llajtanpaj may sumaj, mana pesachikojkunata qotuchakuymanta qharqokusqan?

²¹ Juchankumanta mana pesachikojkunata qharqokusqanqa, kay tiempo cristianospaj sumajpuni, ¿icharí? Israel llajtapeqa, juchallikojkuna llajtantinta juchallichej kanku. Wakin kuteqa Jehovata yupaychajkunamanta, allin kajta ruwayta munajkunamantapis, aswan ashkharaj kaj kanku. Chayrayku, Israel llajtaqa Diospa sutinta pisipaj qhawacherqa, Jehovaj ñaupaqenpitaj niña allinpaj qhawasqachu karqa (Jer. 7:23-28). Kay tiempopirí Diospa llajtanqa mana uj suyuchu, manaqa tukuy lugaresmanta Payta yupaychaj runas. Chayrayku mana pesachikojkunata qotuchakuymanta qharqokojtin, Satanasqa mana chay runanejta qotuchakuyta chʼichichayta atinchu, nitaj Diosmantapis karunchachiyta atinchu. Qotuchakuypi juchallikoj runas manaña kasqankuraykutaj, Jehovaqa qotuchakuyta allillanpajpuni qhawan. Payqa jinata nerqa: “Mana mayqen arma ruwasqankupis qanta chinkachisunampaj jina kanqachu”, nispa (Isa. 54:17). Ancianosqa juchallikojta juzganku, ¿sumajpajchu chay ruwasqankuta qhawanchej?

22, 23. ¿Imamantataj 1900 watas qallariynejmanta hermanosta agradecekunchej? ¿Imaraykutaj allin kanman karqa familiankutapis yanapananku?

²² Kinsa kaj, Cristoqa cheqa cristianosta qhariwarmi kausaypi, familiapi ima yanapallarqataj. Sutʼincharinapaj, 1900 watas qallariynejpi Diospa kamachisnin munayninta ruwanankupaj kallpachakusqankumanta leerispa tʼukushaj qhepakunchej. Diospa Reinonta ñaupajman churasqankumantaqa mayta agradecekunchej. Jinapis mana chayllatachu ruwananku karqa. ¿Imaraykú?

²³ Hermanosqa, wasinkumanta karu lugaresman willaj chayri qotuchakuykunata waturej rinankuta nejtinku, ashkha killasta rillaj kanku. Wakin kuteqa mana casarakunankuta astawan yuyaychakoj, chaytaj mana Bibliaman jinachu karqa. Cristianos jina casarasqa kausaypi imaynatachus kausakunamantataj pisillata yuyaychakoj. Kay tiempopirí mana jinachu.

24. ¿Imaynatá Jesucristo yachachisqasninta yanaparqa qhariwarmi kausaypi, familiapi ima allinta kausakunankupaj?

²⁴ Kunanqa yachanchej Jehovapaj llankʼasqanchej, tata jina chayri mama jina ruwayninchejta mana saqechinawanchejchu kasqanta (1 Timoteo 5:8 leey). Chantapis, Jesucristoqa Bibliaman jina sumajta yuyaychawanchej qhariwarmi kausaypi, familiapi ima allinta kausakunapaj (Efe. 3:14, 15). Sutʼincharinapaj, 1978 watapi Cómo lograr felicidad en su vida familiar nisqa libro orqhokorqa. Chantá 18 watasninman jina, Imaynatá familiaykipi kusisqa kawsakuwaq librotañataj orqhokorqa. Torremanta Qhawaj revistapitaj ashkha yachaqanasta orqhokorqa, casarasqa kajkuna qhariwarmi kausayninkupi Biblia yuyaychasqanman jina kausakunankupaj.

25-27. ¿Imastataj watas pasasqanman jina wawaspaj, jovenespaj ima orqhokun?

 ²⁵ Watas pasasqanman jina, wawaspaj, jovenespajpis ashkha yanapas orqhokorqa. Unaymantapachaña Diospa llajtanqa tukuy edadniyoj wawaspaj yanapasta orqhorqa, kunankamataj ashkhaña. Sutʼincharinapaj, 1919 watamanta 1921 watakama ¡Despertad! revistapi Estudio bíblico para los jóvenes (“Juvenile Bible Study”) nisqa yachaqanata orqhokorqa. Kay 1920 watapi The Golden Age ABC nisqa dibujosniyoj folletota orqhokorqa, 1942 watapitaj Hijos nisqa librotañataj. Kay 1970 watas chaynejpirí Escuchando al Gran Maestro, Tu juventud... aprovechándola de la mejor manera chantá Biblia yachachisqanmanta librituy librosta orqhokorqa. Kay 1982 watapi ¡Despertad! revistapi “Los jóvenes preguntan” nisqa yachaqanas orqhokuyta qallarerqa. Chaymanta wakin yachaqanastataj Waynaspata sipaskunapta tapukuyninku nisqa libropi orqhokorqa, 1989 watapi.

²⁶ Kunanqa Waynaspata sipaskunapta tapukuyninku nisqa libro iskay tiyan, quechuapeqa ujnillan tiyan. Chantapis jw.org nisqapi jovenespaj orqhokushallanpuni. Aprendamos del Gran Maestro nisqa librotapis orqhokullarqataj. Internetpi jw.org  nisqapi wawaspaj, jovenespaj ashkha yachaqanas tiyan. Chaykunataj ñaupa tiempo runasmanta fichas, Bibliata ukhunchanapaj yanapas, videos, dibujoswan yachakunapaj, kinsa watitayojkama kaj wawas Bibliamanta yachakunankupaj ima. d Jesusqa Jallpʼapi kashaspa munakuywan wawasta marqʼariykukorqa, kunanpis munakullanpuni (Mar. 10:13-16). Payqa munan, wawaspis jovenespis munasqa kanankuta, Diosmantataj sumajta yachakunankuta.

²⁷ Chantapis Jesusqa wawasta jarkʼayta munan. Kay sajra pachapeqa, wawasta abusay astawan yapakushan. Chayrayku tatasta yanapanapaj ashkha sumaj yachaqanasta orqhokun, wawasninkuta chay sajra ruwaymanta jarkʼanankupaj. e

28. 1) Ezequiel rikusqanman jina, ¿imatataj ruwananchej tiyan Jehovaj mana rikukoj templonman yaykunapaj? 2) ¿Imapajtaj kallpachakunallanchejpuni tiyan?

²⁸ Cristoqa yachachisqasninta llimphuchashallanpuni. ¿Imaynamantá? Jehovaj kamachiykunasninta jatunpaj qhawanankupaj, kasukunankupaj ima yachachispa, allinninkupaj kasqanta reparanankupajtaj yanapaspa. ¡Chaytaj may sumajpuni! Profeta Ezequiel mosqoypi jina rikusqan templopi, jatuchaj punkusninpi ima tʼukurinallataj. Chay templota mana rikuspapis, ¿rikushasunmanpis jinachu qhawanchej? Chay templomanqa mana Tantakuna Wasiman rispallachu yaykunchej, nitaj Bibliata kicharispallachu nitaj willaypi punkuta takaspallachu. Chay ruwaykunaqa sutʼi reparay. Chaykunataqa puraj uya runaspis ruwayta atillankuman, ni jaykʼaj Jehovaj templonman yaykuspapis. Chayrayku, chay santo kaj cheqamanqa nisunman Jehová munasqanman jina yupaychaymanqa yaykusunman chaykunata ruwaspa, chantapis Jehovaj kamachiykunasninman jina kausaspa, tukuy sonqowantaj yupaychaspa. Jehovata yupaychayta atisqanchejta jatunllapajpuni qhawana. Kallpachakunallapuni Jehovaj santo kayninta rikuchinapaj, cheqan kamachiykunasninta jatunpaj qhawaspa.