1. ¿Imatataq Ezequielqa qawarqa?

 ¿IMAYNATAQ tarikuwaq yaqa 2500 wata ñawpaqta Diosmanta willakuq Ezequielta hina pasasuptiki? Paymi rikchachkaspallan sueñoyninpi hina sumaqllaña llipipipichkaq hatunllay-hatun temploman asuykurqa, chaypiñataqmi huk angel suyachkarqa templota riqsichinanpaq. Qanchis gradasta siqaspanmi hatunllay-hatun punkuman chayarurqa, chay punkupa sayayninmi karqa yaqa 30 metro. Chaypim rikurqa templota cuidaqkunapaq sapa lawninpi cuartokunata, chaynataq palmera sachaman rikchakuq templota takyachiq hatun pilarkunatapas (Ezeq. 40:1-4, 10, 14, 16, 22; 41:20).

2. (1) ¿Imawantaq tupan temploqa? (Qaway willakuytapas.) (2) ¿Imawanmi tupan hatunllay-hatun punkuqa?

² Ezequielpa chay rikusqan temploqa tupanmi imaynata yupaychanapaq Jehova Diospa tanteasqankunawan. Chay templo imayna kasqanmantam Ezequielpa qillqasqan libro 40-48 capitulonkunapi willakun. Chay templopa sapa partenmi tupan kay tukupay tiempopi Diosta imayna yupaychasqanchikwan. a ¿Imawantaq tupan hatunllay-hatun punkunkuna? Diospa kamachikuyninkunawanmi. Chayqa yuyarichiwanchikmi Jehova Diosta yupaychaqkunaqa paypa kamachisqanman hina kawsanankumanta. Palmera sachaman rikchakuq pilarkunapas chaytam yuyarichiwanchik, bibliapim wakinpiqa tupachin Dios kasukuyta palmera sachawan (Sal. 92:12). ¿Imawantaq tupan templota cuidaqpa cuartonkunaqa? Chayqa yuyarichiwanchikmi Diospa kamachisqankunata mana kasukuspa kawsaqkunaqa paypa llaqtanman mana yaykunankupaq kasqanta (Ezeq. 44:9).

3. ¿Imanasqataq Jesucristopa qatiqninkunaqa Dios yupaychayninkupi hinalla chuyanchananta necesitarqaku?

³ ¿Imaynatam Ezequielpa sueñoyninpi hina qawasqanqa cumplikurun? Kay libropa 2 kaq yachachikuyninpi yachamusqanchikman hinam Jehova Diosqa churinta kamachirqa llaqtanta yupaychayninkupi chuyanchananpaq 1914 watamanta 1919 watapa qallariyninkama.  ¿Chayllapichu tukururqa chayna chuyanchasqanqa? Manam. Jesucristoqa hinallam tiempo pasasqanman hina qatiqninkunataqa chuyancharqa necesitasqankuman hina. ¿Imanasqa? mana allin runakunamanta akllasqanraykum hinaspa paykunata Satanas kaqmanta huchallichiyta munasqanraykum (leey 2 Pedro 2:20-22). Qatiqninpiyá yachasun Dios yupaychayninchikpi chuyanchasqa kasqanchikmanta. Puntatam yachasun imayna kawsanapaq yanapawasqanchikmanta, chaymantañataq Diosta pinqaypi mana churanapaq imayna yanapawasqanchikmanta hinaspa wasinchikpi imayna kawsanapaq yanapawasqanchikmantapas.

4, 5. (1) ¿Imatam Satanasqa servichikun ñawpa tiempomantaraq? (2) ¿Imanasqam chay tuqllamanta cuidakunanchik?

⁴ Jehova Diosta serviqkunaqa mana huchallikuspa kawsanankupaqmi hinalla kallpanchakunku. Chaymi tukuy sunqunkuwan chaskikunku allinta kawsanankupaq yanapaqnin yachachikuykunataqa. Chaykunamantayá qatiqninpi yachasun.

⁵ Millakuypaq huchapakuykunamanta. Jehova Diosqa munarqa casado vidallapi warmi-qari puñuspa kusikunankutam. Satanasmi ichaqa chay sumaq regalota yanqacharuyta munaspan Jehova Dios serviqkunata tentan millay huchapakuykunata ruwanankupaq, chaynapi Diosmanta karunchakunankupaq. Chaywanmi Balaampa tiempopi Dios serviq achka runakunata huchallichirqa, kay tukupay tiempopipas astawanraqmi Dios serviqkunata pierdekunankupaq tentachkan (Num. 25:1-3, 9; Apoc. 2:14).

6. (1) ¿Imapaq prometekusqankutam Willakuq qillqapi qillqarqaku? (2) ¿Imatam nirqaku prometekusqankuta cumplinankupaq? (3) ¿Imanasqataq yanqachakururqa? (Qawaytaq willakuytapas.)

⁶ Dios serviqkunata Satanas mana huchallichinanpaqmi 1908 watapi 15 junio killapaq Willakuq qillqapi hurqurqaku kaynata prometekunankupaq: “Maypipas hinaspa imay horapipas huk warmiwan utaq huk qariwan sapallaypi tarikuspayqa hukkunapa qayllanpipas kachkayman hinam allinta portakusaq”, nispa. b Chaypaqqa manam exigesqachu karqaku, ichaqa achkam chaynata prometekurqaku hinaspapas paykunapa sutinku listapi hina chay qillqapi qillqasqa kananpaqmi nirqaku. Chayqa achka iñiqmasinchikkunatam yanaparqa. Ichaqa tiempo pasasqanman hinam enteron pachapi Diospa llaqtanpi punta apaqkuna cuentata qukururqaku wakin iñiqmasinchikkunaqa imayna prometekusqankuman hina mana kawsasqankumanta, chaywanmi chayna  prometekusqankuqa yanqachakururqa. Imayna kawsakunapaq Diospa kamachisqankunaqa manam cambiarqachu.

7. ¿Ima piensasqankutam Willakuq qillqa 1935 watapi sutillata qawachirqa mana allin kasqanta, hinaspa imaynatam corregirqa?

⁷ Satanasqa astawanraqmi Dios yupaychaqkunata tentarqa. Wakinqa piensarqakum Diosta serviyninkupi ima ruwayninkutapas astawan cumplispaqa huchapakusqankumanta pampachasqa kasqankuta. Chaymi 1935 watapi agosto killapaq Willakuq qillqapi Jehova Dios yupaychaqkunata nirqa: “Diosta agradanapaqqa manam paymanta astawan willakuyllachu”, nispa. Chaymantapas nirqataqmi, runakunapa qayllanpi Jehova Diospa testigonkuna kasqanchikraykum “imayna kawsakusqanchikwanmi Jehova Diosta chaynataq kamachiwaqninchik Jesucristota hatunchananchik”, nispa. Hinaspapas chay qillqapim yachachikuykuna karqa casarasqakunapas chaynataq mana casarasqakunapas mana huchallikuspa kawsakunankupaq. Chaykunam Diospa llaqtanpi kaqkunata yanaparqa millay huchapakuykunaman mana wichiykunankupaq (1 Cor. 6:18).

8. ¿Imapaqtaq yanapawanchik millakuypaq huchapakuykunamanta entiendesqanchikqa?

⁸ Watakuna pasasqanman hinam Willakuq qillqa sapa kutilla allinta entiendechiwarqanchik millay huchapakuykuna ima ruwaykuna kasqanmanta. Chaykunaqa manam warmiwan utaq qariwan pierdekuyllachu, aswanqa warmi kayninkuwan utaq qari kayninkuwan tukuy mana allin millakuypaq kaqkuna ruwasqankum, tukuy chaykunatam aychankupa munasqanman hina ruwanku. Chayna millakuypaq huchapakuykunamanta yachasqankum Jehova Dios yupaychaqkunata yanapan chayna huchakunaman mana wichiykunankupaq (leey Efesios 4:17-19).

9, 10. (1) ¿Imatam 1935 watapi Willakuq qillqa trago tomaymanta entiendechirqa? (2) ¿Ima nintaq bibliaqa haykapi tomaymanta utaq mama tomaymanta?

⁹ Trago tomayman hapipakuymanta. 1935 watapim agosto killapaq kaq Willakuq qillqa nirqa: “Wakinqa tragota tomaruspam Diosmanta willakuq lluqsinku utaq Diosta serviyninkupi imatapas ruwanku. ¿Ima nintaq bibliaqa haykapi vino tomaymanta utaq mana tomaymanta? ¿Allinchu kanman vinota tomaruspa Señorta serviyqa?”, nispa.

¹⁰ Chay qillqaqa tomaymanta bibliapa ima nisqawanmi piensarichirqa. Bibliaqa sutillatam yachachin hampillapaq utaq pisillata ima tragotapas tomayqa mana hucha kasqanmanta, ichaqa ninmi machanakama tomayqa hucha kasqanta (Sal. 104:14, 15; 1 Cor. 6:9, 10). ¿Allinchu kanman tragota tomaykuspa Diosta serviyninchikpi ima ruwayninchiktapas ruwayqa? Chay mana allin  kasqanmanta yachanapaqmi Jehova Diosqa willawanchik Aaronpa churinkunata ima pasasqanmanta, paykunataqa ‘Diospa mana kamachisqanman’ hina ofrendata kañaptinkum Diosqa wañurachirqa. Chaymanta qipallatam Diosqa sacerdotekunata kamachirqa payta serviyninkupi ruwayninkuta ruwaspankuqa ama tomanankupaq. Chaywanmi cuentata qukunchik, ichapas Aaronpa churinkunaqa tomasqankurayku mana allin ruwasqankumanta (Lev. 10:1, 2, 8-11). Jesucristopa qatiqninkunaqa bibliapa nisqanta kasukuspam Dios serviyninkupi imapas ruwayninkuta ruwaspaqa mana tomankuchu.

11. ¿Imaynatam iñiqmasinchikkunata yanaparqa tomaymanta astawan entiendesqankuqa?

¹¹ Tiempo pasasqanman hinam Jesucristopa qatiqninkunaqa astawan yacharqanchik sapa kutilla tomayqa vicio kasqanmanta, chayna tomayman qukuruqqa manam hawkachu kanku mana tomaspankuqa. Tiempollanpi yachachikuykunata chaskisqanchikwanmi achka iñiqmasinchikkuna chayna viciomanta controlakuyta atirunku. Chaymantapas achka iñiqmasinchikkunatam qillqanchikkunapi yachachikuykunaqa yanapan chayna vicioman mana wichinankupaq. Amayá tomayman qukuruspaqa pinqaypi qipasunchu, amataqyá yanqachasunchu ayllunchiktapas nitaq Jehova Diosta yupaychanapaq favorecesqa kasqanchiktapas.

12. ¿Imamantam Jehova Diosta yupaychaqkunaqa 1914 watamanta ñawpaq watakunapiraq cuentata qukurqaku?

¹² Cigarro pitaymanta. Jehova Diosta serviqkunaqa 1914 watamanta ñawpaq watakunapiraqmi cuentata qukurqaku tabaco utaq cigarro pitayqa mana allin kasqanmanta. Yaqa 1900 watapi Charles Taze Russellwan tupaptinku paypa ima nisqanmantam Charles Capen sutiyuq iñiqmasinchik willakurqa: “13 wataypim kimsa wawqiykunapiwan Allegheny (Pensilvania, Estados Unidos). llaqtapi betel wasiman rirqaniku, chay wasipa gradasninta siqachkaspaykum iñiqmasinchik Russellwan tuparurqaniku. Chaymi pay niwarqaku: ‘Warmakuna, ¿pitachkankichikchus? Cigarrollañam asnaykuwan’”, nispa. Paykunañataqmi nirqaku mana pitasqankumanta. Chaywanqa chayllam cuentata qukururqaku cigarro pitaymanta iñiqmasinchik Russell ima piensasqanta. 1895 kaq watapim 1 agostopaq Willakuq qillqapi iñiqmasinchik Russellqa 2 Corintios 7:1 nisqanmanta allinta yachachirqa, chaypim nirqa: “Cigarro pitayqa manam imapipas yanapawanchikmanchu nitaqmi Diospa agradonpaqchu. Manam piensayllapas-piensachwanchu señorninchik Jesucristo cigarrollaña asnarisqantaqa nitaq ima millakuypaq kaqtapas siminman winakusqantaqa”, nispa.

13. ¿Imata saqinapaqmi 1973 watapi kallpanchawarqanchik?

 ¹³ Willakuq qillqam 1935 watapi tabacota suticharqa “millakuypaq mana allin qura”, nispa. Chaymantapas willakurqam cigarrota pitaqqa betel wasipi manaña llamkananpaq, precursor manaña kananpaq chaynataq iñiqmasinchikkunata llaqtan-llaqtan watukuq ancianopas manaña watukuq kananpaq. 1973 watapim astawanraq yachachiwarqanchik chayna viciokunata saqinapaq. 15 octubre killapaq Willakuq qillqapim yachachirqa pipas testigoña kachkaspan kikinta chaynataq runamasinta dañaq cigarrota hinalla pitaqqa manaña testigo kananmanta. Chaymi chay viciota saqinankupaq tiempota qurqaku, chay tiempo pasayta cigarrota hinalla pitaqkunaqa Diospa llaqtanmantam qarqusqa kananku karqa. c Chaywanmi Jesucristoqa qatiqninkunata astawanraq Dios yupaychayninkupi chuyancharqa.

14. (1) ¿Imatam Diosqa kamachirqa yawarmanta? (2) ¿Imatam tiempo pasasqanman hina tantearurqaku yawar servichikuymanta?

¹⁴ Yawarta servichikunamanta. Noeypa tiemponpiraqmi Diosqa kamachirqa yawarta mana mikunankupaq. Tiempo pasaytapas israelitakunamanmi Leyta quspan kamachirqa yawarta mana mikunankupaq, cristianokunamanpas nirqam: “Amam mikunkichikchu yawartaqa”, nispa (Hech. 15:20, 29; Gen. 9:4; Lev. 7:26). Satanasmi ichaqa engañakuqllaña kaspan tantearun Diosta mana kasukuspa yawarta servichikunapaq. Doctorkunam 1800 watamantaraq unquqkunata hampiyta qallaykurqaku yawarta churaspa, sapa runapa yawarnin huk niraq kasqanmanta yacharuspankum yawartaqa astawanraq servichikuyta qallaykurqaku. 1937 watapim runapa yawarninta huñuyta qallaykurqa “bancos de sangre” nisqankupi waqaychanankupaq. Enteron pachapi iskay kaq hatun guerrapim astawanraq yawar churayta qallaykurqaku. Chaymanta qipataqa enteron pachapim yawar churayta qallaykurqaku.

15, 16. (1) ¿Imatam yawar churachikuymanta Testigokunaqa tantearqaku? (2) ¿Ima yanapakuytam chaskirqanchik yawarta mana churachikunapaq hinaspa imanasqam chayqa allinpaq karqa?

¹⁵ Willakuq qillqam 1944 watapi sutillata yachachirqa yawarta churachikuyqa mikuruy hina kasqanta. Chaymanta killakuna pasaytam bibliapa yachachisqanman hina astawanraq iñiqmasinchikkuna yacharurqaku. 1951 watapim huk listapi hurqurqaku tapukuykunatawan kutichiyninta, chayqa Jehova Dios yupaychaqkunatam yanaparqa doctorkunawan imaynata rimanankupaq. Iñiqmasinchikkunaqa enteron pachapim sapakama tanteakururqaku yawarta mana churachikunankupaq, chayraykum chiqniqninkunaqa asipayarqaku, ñakarichirqaku chaynataq chiqnispa qatikacharqaku. Ichaqa Jesucristom enteron pachapi Diospa llaqtanpi punta apaqkunata valekurqa,  qillqakunapi chaynataq folletokunapi yawarta imanasqa mana churachikunapaq allin yachachikuykunata hurqunankupaq.

¹⁶ Wakin ancianokunam 1979 watapi hospitalkunaman riyta qallaykurqaku imanasqa yawarta mana churachikusqanchikmanta doctorkunaman entiendechinankupaq chaynataq yawarpa rantinpi huk hampikuna chaskiy munasqanchikmanta willanankupaq. Chay ruwayninkupi astawan allinta yanapawananchikpaqmi qatiqnin watapi Estados Unidospa 39 llaqtankunapi ancianokunata astawan allinta yachachirqaku. Chaymanta tiempo pasayllatam enteron pachapi Diospa llaqtanpi punta apaqkuna tantearurqaku hospitalpi yawarta mana churachikuspa hampichikunapaq yanapakuq ancianokuna enteron pachapi kananpaq. Chaynata yanapakusqankuwanmi kay tiempopiqa wara-waranqantin doctorkuna yawarta mana churachikunapaq tanteakusqanchikta respetanku. Chaymantapas yawarta mana churaspalla hampiy munaq  hospitalkunam astawan yapakuchkan, wakin doctorkunaqa piensankum chaynata hampiyqa astawan allin kasqanta. Satanas mana huchallichiwananchikpaq Jesucristo cuidawasqanchikmanta yachasqanchikqa maynatam kusichiwanchik (leey Efesios 5:25-27).

17. ¿Imaynatam qawachichwan Jesucristopa yachachiwasqanchikkunata allinpaq qawasqanchikta?

¹⁷ Llapallanchikmi tapukunanchik: “¿Riqsikunichu Diospa kamachisqanman hina kawsanaypaq Jesucristo yachachiwasqanmanta?”, nispa. Chayna kaptinqa amayá qunqasunchu, Satanasqa munachkanmi Diospa kamachisqankunata mana kasukuspa paymanta chaynataq churinmanta karunchakunanchikta. Satanaspa makinman mana wichiykunapaqmi enteron pachapi Diospa llaqtanpi punta apaqkuna sapa kutilla willawanchik Jehova Diospa kamachisqanman hina kawsakunapaq. Qawan-qawanllayá kasun, imayna kawsakunapaq niwasqanchikkunata kasukuspa (Prov. 19:20).

18. (1) ¿Pikunataq Ezequielpa qawasqan temploman mana yaykunankuchu karqa? (2) ¿Imatam chayqa yachachiwanchik?

¹⁸ Diospa llaqtanpi kaqkuna pinqaypi mana kananchikpaqmi Jesucristoqa yanapakuykunata quwarqanchik. Llakikuypaqmi Jehova Diosman qukuspa bautizakuqkunapas manam lliwchu paypa kamachisqanman hina kawsayta munanku. Wakinqa munasqankuman hina piensasqankuwanmi Diospa kamachisqankunata mana kasukunkuchu. ¿Imatataq ruwananku karqa chayna mana kasukuqkunawanqa? Kay yachachikuypa qallariyninpi Ezequielpa qawasqan templomanta yachasqanchikmi yanapawasun imata ruwanankupaq kasqanmanta yachanapaq. ¿Yuyachkankichu hatunllay-hatun punkunkunamanta? Sapa yaykunapim karqa templota cuidaqkunapaq kimsa cuartokuna. Templota cuidaqkunaqa Diosta mana kasukuqkuna temploman mana yaykunankupaqmi harkaqku (Ezeq. 44:9). Chaywanmi cuentata qukunchik, Jehova Diosta yupaychanapaqqa tukuy sunqunchikwanmi kallpanchakuna paypa kamachisqanman hina kawsakunapaq.

19, 20. (1) ¿Imaynatam Jesucristoqa qatiqninkunata yanaparqa huchallikuqkunata juzganankupaq? (2) ¿Ima razonkunataq kan mana wanakuqta Diospa llaqtanmanta qarqunankupaq?

¹⁹ Willakuq qillqam 1892 watapi nirqa: “Ñuqanchikrayku Jesucristopa wañusqanpi mana creeqkunataqa qarqunanchikmi”, nispa (leey 2 Juan 10). 1904 watapim huk libropi sutillata qawachirqa hinalla huchallikuqkunaqa wakin iñiqkunata pinqaypi churasqankuta (The New Creation). Chaymi huchallikuqtaqa paywan huñunakuq llapallan iñiqmasinkuna juzgaqku. Ichaqa 1944 watapim Willakuq qillqa yachachirqa huchallikuqtaqa  huñunakusqan lawpi kaq ancianokunalla juzganankupaq kasqanta. 1952 watapiñataqmi Willakuq qillqapi hurqurqaku bibliapa nisqanman hina juzganankupaq. Chaymantapas sutillatam qawachirqa Diospa llaqtanta pinqaypi mana churanapaq mana wanakuqkunataqa qarqunankumanta.

²⁰ Tiempo pasasqanman hinam Jesucristoqa qatiqninkunata yanaparqa llumpay huchallikuqkunata imaynata juzganankupaq. Ancianokunatam allinta yachachinku kuyapayakuq chaynataq Jehova Dios hina justiciawan juzganankupaq. Kunan tiempopiqa allintam yachanchik huchallikuqtaqa imanasqa Diospa llaqtanmanta qarqusqankuta, chaypaqqa kimsa razonkunam kan: 1) Jehova Diospa sutin pinqaypi mana kananpaq, 2) Diosman sunqu iñiqmasinchikkuna huchallikuqkunata mana qatipakunankupaq, 3) huchallikuqtam kallpanchan wanakunanpaq.

21. ¿Imanasqataq huchankumanta mana wanakuqkunata Diospa llaqtanmanta qarqusqankuqa allinpaq?

²¹ Diosta mana kasukuq israelitakunam pinqaypaq huchallikusqankuwan Diosman sunqu kaqkunatapas enteron Israel nacionpi huchallichirqaku, wakinpiqa Diosta mana kasukuqkunam astawan achka karqaku kasukuqkunamantaqa. Chayna kasqankuwanmi Jehova Diospa sutinta achka kutipi pinqaypi churarqaku, chaymi Diosqa paykunamanta karunchakururqa (Jer. 7:23-28). Kay tiempopiqa manam israelitakuna hinachu huk nacionllapi kanchik, aswanqa enteron pachapim huk sunqulla Diosta yupaychanchik. Huchankumanta mana wanakuqkunata Diospa llaqtanmanta qarqusqankuqa allinpaqmi, ¿imanasqa? Mana wanakuqkunatam Satanasqa valekun Diosman sunqu kaqkunata huchallichinanpaq chaynataq Dioswan amistadninchikta yanqachananpaq, mana chayna pasananpaqmi mana wanakuqkunataqa Diospa llaqtanmanta qarqunku. Chayqa mayna allinmi Jehova Diospa favorninpi hinalla takyanapaq. Manam qunqananchikchu Diospa kayna nisqanta: ‘Contraykipi armakuna ruwasqankuqa manam imanasunkichu’, nispa (Is. 54:17, CQ12). ¿Tukuy sunqunchikmantachu ancianokunata yanapanchik?, paykunaqa huchallikuqkunata juzganankupaqmi kamachisqa kanku.

22, 23. (1) ¿Diosta imayna yupaychasqankumantam ñawpa watakunapi kaq iñiqmasinchikkunata agradecekunchik? (2) ¿Imanasqataq wakinkuqa wasinkupi kaqkunata saqirqaku?

²² Jesucristopa qatiqninkunaqa casado vidapipas chaynataq ayllunchikwanpas Diosta chuya sunqu servinanchikpaqmi yanapasqa kanchik. Kay tiempomanta yaqa  100 wata ñawpaqta iñiqmasinchikkuna Diosta serviyninkupi tukuy ruwasqankumanta yachasqanchikqa anchatam admirachiwanchik. Paykunatam anchata agradecekunchik ima ruwayninkumantapas puntata Diospa munaynin ruwasqankumanta.

²³ Ichaqa wakin iñiqmasinchikkunam Diospa llaqtanpi punta apaqkunapa kamachisqanta kasukuspanku Diosmanta willakunankupaq utaq iñiqmasinchikkunata watukunankupaq huk law llaqtakunaman rispa achka killakuna warmintawan churinkunata saqiqku. Wakinpiqa bibliapa mana kamachisqanman hinam mana casarakunankupaq niqku, ichaqa manam imatapas nirqakuchu casado vidapi takyanankupaq imayna kawsanankumantaqa. Kay tiempopim ichaqa mana chaynachu.

24. ¿Imaynatam Jesusqa qatiqninkunata yanapan casado vidapi chaynataq wasinkupi kaqkunawan kusisqalla kawsakunankupaq?

²⁴ Kay tiempopiqa Diosta yupaychayninchikpi ruwayninchikkunata ruwaspapas wasinchikpi kaqkunata cuidananchikpaqmi sapa kutilla yuyarichiwanchik (leey 1 Timoteo 5:8). Chaymantapas Jesucristom qatiqninkunamanqa casado vidapi chaynataq ayllunkuwan imayna kawsakunapaq consejokunata sapa kutilla quchiwanchik (Efes. 3:14, 15). 1978 watapim hurqumurqaku Cómo lograr felicidad en su vida familiar niq librota. 2010 watapiñataq Familiaykiwan kusisqa kawsakuy niq librota. Chaymantapas yaqa sapa kutillam Willakuq qillqapi hurqumunku bibliapa kamachisqanman hina casado vidapi imaynata kawsanankupaq.

25-27. ¿Imatam watakuna pasasqanman hina warmachakunapaq, jovenkunapaq hinaspa sipaskunapaq ruwarqaku?

²⁵ ¿Ima nichwantaq warmachakunamanta, jovenkunamanta hinaspa sipaskunamanta? Paykunapaqpas tiempo pasasqanman hinam kachkan necesitasqankuman hina achka yachachikuykuna. Ñawpaq watakunamantaraqmi enteron pachapi Diospa llaqtanpi punta apaqkunaqa warmachakunapaq wiñasqankuman hina yanapakuykunata hurqumuchkanku, ñawpaq watakunapiqa asllam karqa, kay tiempopim ichaqa achka kachkan. 1919 watamanta 1921 watakamam ¡Rikchariy! (inglespi) qillqapi hurqumuyta qallaykurqaku “Mozo-sipaskuna bibliata estudianankupaq” niq yachachikuyta. 1920 watapim hurqumurqaku dibujoyuq qillqata (The Golden Age ABC) hinaspa 1942 watapiñataq Hijos niq qillqata. 1970 watamantañataq Escuchando al Gran Maestro niq qillqata, Tu juventud... aprovechándola de la mejor manera niq qillqata hinaspa Bibliamanta willakuq libroy niq qillqata. 1982 watamantañataqmi ¡Rikchariy! (castellanopi)  qillqapi hurqumuyta qallaykurqaku “Mozo-sipaskunapa tapukuynin” niq yachachikuykunata, chaymanta wakiqnin yachachikuykunatam 1989 watapi hurqumurqaku Lo que los jóvenes preguntan. Respuestas prácticas niq qillqapiña.

²⁶ Kay tiempopiqa chay librokunam 2 kachkan, chayna yachachikuykunatam hinalla hurquchkanku internetpi jw.org nisqanpi. Chaskirqanchiktaqmi Aprendamos del Gran Maestro niq librotapas. Jw.org nisqanpiqa kachkantaqmi warmachakunapaq chaynataq jovenkunapaq hinaspa sipaskunapaq kay yachachikuykuna: Diosman sunqu runakunamanta bibliapi willakusqankuna, biblia estudianankupaq yanapakuykuna, videokuna, bibliapi willakuykunamanta dibujokuna. Iskay-kimsa watachayuq warmachakunapaqpas kachkanmi bibliamanta yachachikuykuna. Imaynam Jesusqa kay pachapi kaspan warmachakunata marqakuykuspan kuyaykurqa, chaynatam  kay tiempopipas warmachakunata kuyan (Mar. 10:13-16). Payqa munanmi warmachakuna, jovenkuna hinaspa sipaskunapas kuyasqa tarikunankuta, chaynataq Diosmanta allinta yachanankutapas.

²⁷ Jesusqa manam munanchu warmachakunata imapas pasananta. Kunan tiempopiqa enteron pachapim astawanraq yapakuchkan warmachakunata violaqkuna. Chayna mana allin runakunamanta tayta-mamakuna wawa-churinkuta allinta cuidanankupaqmi enteron allpa pachapi Diospa llaqtanpi punta apaqkunaqa qillqanchikkunapi achka consejokunata hurqumunku. d

28. (1) ¿Imaynatam Jehova Diosta yupaychana? (2) ¿Imapaqtaq qamqa tanteakurunki?

²⁸ Mayna allinmi Jehova Diospa kamachisqanman hina chuya sunqu kawsanapaq Jesucristopa yanapawasqanchikqa. Kaqmanta piensay sueñoyninpi hina Ezequielpa qawasqan templopi, chayqa tupan Jehova Diospa munasqanman hina yupaychayninchikwanmi. Ichaqa manamá huñunakuyman rispallachu, bibliata leespallachu nitaq Diosmanta willakunapaq wasin-wasin rispallachu chaynataqa yupaychanchik. Chaykunataqa iskay uya runakunapas hinaspa Diosta mana kasukuqkunapas ruwanmankum. Jehova Diospa munasqanman hina yupaychanapaqqa paypa kamachisqanman hinam kawsakunanchik hinaspa tukuy sunqunchikwan payta yupaychanapaq kallpanchakunanchik. ¡Diosta yupaychanapaq favorecesqa kasqanchiktayá chaninchasun! Chaynaqa imayna kawsasqanchikwanyá qawachisun Jehova Diosqa chuya kasqanta chaynataq kamachikuyninkunaqa allinninchikpaq kasqanta.