1. Se a te mea ne lavea ne Esekielu telā e ōfo ei tatou?

E A MĀFAI ne tupu ki a koe se mea e pelā mo te mea ne tupu ki te pelofeta ko Esekielu i se 25 senitenali ko ‵teka? Mafaufau ki te mea tenei: Ko fanatu koe ki se faletapu lasi kae matilotilo. E fakaasi atu ne se agelu malosi ki a koe a te koga gali tenei! E kake aka koe i sitepu e fitu telā e fanatu ki se mataloa e tasi mai i mataloa e tolu. E ofo malosi eiloa koe i mataloa konei. E nofo loa pelā ki te 100 futu te ma‵luga. I mataloa konā e isi eiloa ne tamā potu mō tino leoleo mataloa. E tā i ei se lakau ko te pāma gali ‵ki e pelā me se pou.​—Eseki. 40:1-4, 10, 14, 16, 22; 41:20.

2. (a) Se a te mea e fakaata mai i te faletapu i te fakaasiga fakavaloaga? (Ke onoono foki ki te fakamatalaga mai lalo.) (e) Se a te mea e mafai o tauloto ne tatou mai i vaega kese‵kese o auala i loto i te faletapu?

² A te mea tenei se fakaasiga fakavaloaga o te faletapu faka-te-agaga. Ne fakamatala likiliki mai eiloa ne Esekielu a te mea tenei telā ne ‵fonu eiloa a te mataupu e 40 ki te 48 o tena tusi fakapelofeta i tena tala. E fakaata mai i te faletapu tenei a te fakatokaga a Ieova mō te tapuakiga ‵ma. E isi eiloa se fakauigaga o vaega katoa o te faletapu mō te ‵tou tapuakiga i aso fakaoti konei. * Se a te mea e fakauiga ki ei a mataloa ma‵luga o te faletapu? E fakamasaua mai i ei me i tino kolā e ulu atu ki loto i te fakatokaga a Ieova mō te tapuakiga ‵ma e ‵tau o ola e ‵tusa mo tulaga ma‵luga kae amiotonu o te Atua. Ke oko foki eiloa ki lakau ko pama kolā ne tā ki luga i te ‵pui, e isi foki sena fakauigaga tai ‵pau, me e fakaaoga sāle a lakau ko pama i te Tusi Tapu ki te amiotonu. (Sala. 92:12) Kae ko potu o tino leoleo? E manino ‵lei, me i tino kolā e fakata‵mala o fakaasi atu te āva ki tulaga o te Atua, e se talia ke ulu atu ki loto i te auala gali kae maua i ei te ola, ko te tapuakiga ‵ma.​—Eseki. 44:9.

3. Kaia e ‵tau ei o tumau a te faka‵maga o soko o Keliso?

³ Ne fakataunu pefea te fakaasiga a Esekielu? E pelā mo te mea ne lavea atu ne tatou i te Mataupu e 2 o te tusi tenei, ne fakaaoga ne Ieova a Keliso ke faka‵ma ne ia i se auala fakapito mai te 1914 ki te kamataga o te 1919. E mata, ne gata atu i konā a te faka‵maga? Ikai, e se tāitāi loa! I te senitenali kātoa ko teka, ne tumau eiloa a Keliso i te fakamaluga aka ne ia o tulaga tapu o Ieova i mea tau amioga. Ne manakogina eiloa ke tumau ana soko i te faka‵maga. Kaia? Ona ko te mea ne aumai ne Keliso ana soko mai te lalolagi amio masei tenei kae e se mafai o fakagata ne Satani tena taumafai ke toe ‵futi mai latou ke fai a amioga ma‵sei. (Faitau te 2 Petelu 2:20-22.) Ke iloilo aka ne tatou a auala e tolu kolā ne faka‵ma faeloa i ei a Kelisiano ‵tonu. Muamua la, ka mafau‵fau  tatou ki nisi taimi ne faka‵ma aka ei latou i mea tau amioga, mo se fakatokaga tāua i te tausiga o te fakapotopotoga ke ‵ma, kae ko te ‵toe mea, ko te fakatokaga i te kāiga.

4, 5. Se a te togafiti telā ko leva ne fakaaoga ne Satani, kae ne iku manuia pefea ana taumafaiga?

⁴ Ko leva ne fia‵fia faeloa a tino o Ieova ki amioga ‵ma kae amio‵tonu. Tela la, ne fakatāua malosi ne latou a fakatonuga manino e uiga ki te mataupu tenā. Mafaufau ki nai fakaakoakoga.

⁵ Amioga fakatauavaga sē ‵tau. Ne fakatoka ne Ieova ke ‵ma kae ‵gali a faifaiga fakatauavaga i va o tino fua kolā ko oti ne fakaipoipo. E fiafia eiloa a Satani o fakamasei a te meaalofa gali tenā, mai te fakaaogaga tonu kae ‵fuli ne ia ke fai mo fai se faifaiga lailai, kae fakaaoga foki ne ia ke tofotofo aka ei a tino o te Atua ko te mea ke galo i a latou te taliaga a te Atua. Ne fakaaoga eiloa mo te manuia ne Satani a te togafiti tenā i aso o Palaamo, kae ko gasolo aka foki te fakaaoga malosi ne ia i aso fakaoti konei.​—Nume. 25:1-3, 9; Faka. 2:14.

6. Se a te tautoga ne ‵lomi i te Watch Tower, te auala ne fakaaoga ei, kae kaia ne taofi fakamuli aka ei tena fakaaogaga? (Ke onoono ki te fakamatalaga mai lalo.)

⁶ Ke ‵teke atu ki taumafaiga a Satani, ne ‵lomi mai i te Watch Tower i a Iuni 15, 1908 se tautoga telā ne aofia i ei a te fakaikuga tenei: “Ka taumafai eiloa au o fai faka‵lei aku amioga ki se tino telā e se ko taku avaga i taimi katoa mo koga katoa i taimi e seai ne tino e kilo‵kilo mai, kae penā foki loa i mua o tino.” * E tiga eiloa e seki fai te tautoga tenā e pelā me se tulafono, ne talia ne tino e tokouke kae fai ke ‵lomi olotou igoa i te Zion’s Watch Tower. I te fia o tausaga mai tua ifo, ne lavea faka‵lei atu ei me i te tautoga tenei, ne fai mo fai se faiga matea fua; telā ne fakagata aka ei tena fakaaogaga. Kae ne fakamaluga aka ei a akoakoga fakavae ma‵luga i mea tau amioga.

7. I te 1935, se a te fakalavelave ne fakasino atu ki ei The Watchtower, kae se a te tulaga telā ne toe fakamaina faka‵lei mai i ei?

⁷ Ne momea aka fua i ei o ma‵losi a osomaiga a Satani. Ne fakasino tonu atu eiloa a te lōmiga o The Watchtower i a Mati 1, 1935 ki se fakalavelave telā ne gasolo aka eiloa o lauiloa i tino o te Atua. Ne fakamaoni mai i ei me ne mafau‵fau a nisi tino me i te ‵kau atu o latou ki te galuega talai e mafai ei o fakasaoloto latou mai te puke ‵mau ki tulaga o Ieova i mea tau amioga i olotou olaga totino. Ne fai ‵tonu mai The Watchtower: “E ‵tau o masaua ne te tino me i te kau atu fua ki te galuega talai e se ko te mea e tasi e ‵tau o fai. E sui ne molimau a Ieova a ia, kae e panaki eiloa mo latou a te tiute ke fakaata faka‵lei atu ne latou a Ieova mo tena malo.” Ne tuku mai i ei ne te mataupu a pati fakatonutonu manino e uiga ki te fakaipoipoga mo amioga fakatauavaga ‵lei, telā ne fesoasoani atu ki tino o te Atua ke “‵tele keatea mai i amioga fakatauavaga sē ‵tau.”​—1 Koli. 6:18.

8. Kaia ne faka‵mafa mai faeloa ne Te Faleoleoleo Maluga a te uiga kātoa o te pati Eleni mō amioga fakatauavaga sē ‵tau?

⁸ I se sefulu tausaga fakamuli nei, ne faka‵mafa mai faeloa ne Te Faleleoleo Maluga a te uiga tonu o te pati ne fakaaoga i te Tusi Tapu Eleni mō amioga fakatauavaga sē ‵tau​—ko te por·neiʹa. E se fakauiga fua ki faifaiga fakatauavaga sē ‵tau. I lō te fai penā, e aofia i te por·neiʹa a amioga ma‵sei kese‵kese e uke, telā e masani o aofia i ei a faifaiga matagā katoa kolā e fai i fale o fāfine talitāgata. Tela la, ne puipui eiloa a soko o Keliso mai i ikuga fakalogo‵mae  o amioga fakatauavaga sē ‵tau, kolā ko logo‵fio eiloa i ei a tino e tokouke i te lalolagi i aso nei.​—Faitau te Efeso 4:17-19.

9, 10. (a) Se a te amioga telā ne fakasino atu ki ei The Watchtower i te 1935? (e) Se a te akoakoga paleni a te Tusi Tapu e uiga ki te fakaaogaga o te kava?

⁹ Te fakaaogaga ‵se o te kava. Ne fakasae aka ne The Watchtower i a Mati 1, 1935 a te suā mataupu i mea tau amioga: “Ko oti ne lavea atu me e isi ne tino kolā e ‵kau atu ki te galuega talai kae fai foki a nisi tiute i te fakapotopotoga i te taimi e ko‵na ei latou. Ne a tulaga ‵lei kolā e talia i te Tusi Tapu e uiga ki te fakaaogaga o te uaina? E mata, se mea ‵lei ke fakaaoga a te uaina i se auala telā e pokotia ei te taviniga a se tino i te fakapotopotoga a te Aliki?”

¹⁰ E fakamatala mai i te tali a te kilokiloga paleni ki te kava telā e maua i te Muna a te Atua. E se taku fakamasei ne te Tusi Tapu a te fakaaogaga o te uaina mo nisi meainu ma‵losi, kae e taku fakamasei malosi mai eiloa i ei a te kōna. (Sala. 104:14, 15; 1 Koli. 6:9, 10) Kae ko te aofia i te taviniga tapu mai lalo i te malosi o te kava, ko leva ne fakamasaua atu ki tavini a te Atua e uiga ki te tala o tama tagata a Alona kolā ne tamate ne te Atua ona ko te mea ne ofo atu ne lāua i luga i te fatafaitaulaga a te Atua se taulaga afi sē ‵malu. Mai tua ifo i ei, ne fakaasi mai i te tala a te pogai ne fai ei ne tāgata konā se mea sē ‵lei penā, me ne tuku atu ne te Atua se tulafono telā e fakatapu ei a faitaulaga katoa ma fakaaoga a te kava i te taimi e aofia ei latou i olotou tiute ‵malu. (Levi. 10:1, 2, 8-11) A te fakagalue aka o te akoakoga fakavae mai tua o te tala tenā, ne fakaeteete eiloa a soko o Keliso e auala i te ‵kalo keatea mai te fakaaogaga o te kava i te taimi e aofia ei latou i te lotou taviniga tapu.

11. Kaia ne fai ei mo fai se fakamanuiaga ki tino o te Atua a te momea aka o te lotou malamalama e uiga ki te kava?

¹¹ E sila atu i se sefulu tausaga fakamuli nei, ne toe fakamanuia malosi atu a soko o Keliso ki te momea aka o te malamalama e uiga ki te kava, se tulaga telā e aofia i ei a te fakaaogaga ‵se faeloa o te kava. E fakafetai ki mea‵kai faka-te-agaga i te taimi tonu, me ko oti ne fesoasoani atu ki tino e tokouke ke iloa ne latou o fakafesagai faka‵lei atu ki te tulaga tenā kae ke toe pule faka‵lei atu ki olotou olaga. Ne fesoasoani atu ki tino e tokouke atu ke ‵kalo katoatoa keatea mai te fakalavelave tenā. E seai eiloa se tino e ‵tau o talia ne ia a te fakaaogaga ‵se o te kava ke ave keatea i ei te tulaga ‵malu o latou, olotou kāiga, kae e silia atu i ei, ko olotou tauliaga kolā e aofia ei latou i te tapuakiga ‵ma ki a Ieova.

12. Ne pefea te kilokiloga a tavini a Keliso ki te fakaaogaga o te paka kae koi tuai eiloa o kamata a aso fakaoti?

¹² Te fakaaogaga o te paka. Ne kamata o fakatuka atu a tavini a Keliso ki te fakaaogaga o te paka kae koi tuai foki eiloa o kamata a aso fakaoti. I te fia o tausaga ko ‵teka, ne masaua ne se taina ko matua ‵ki, ko Charles Capen, tena fetauiga muamua eiloa mo Charles T. Russell i te fakaotiotiga o te 19 senitenali. A Capen, ko 13 fua ana tausaga i te taimi tenā, fakatasi mo ana taina e tokotolu ne olo atu ki te Bible House i Allegheny, i Pennsylvania. I te taimi ne fanatu ei a Russell i olotou tafa, ne fesili atu a ia: “A koutou e ‵pusi? E ‵sogi ne au te manogi ‵pusi.” Ne fakatalitonu atu latou me i a latou ne seki ‵pusi. Ne fakamautinoa atu eiloa ki a latou e aunoa mo te fakalotolotolua tena kilokiloga e uiga ki te mataupu. I te Watch Tower i a Aokuso 1, 1895, ne fai mai a te Taina ko Russell e uiga ki te 2 Kolinito 7:1: “E se lavea ne au a te auala e  tuku atu ei a tavaega ki te Atua, io me e maua ne te tino a mea aoga, māfai e fakaaoga ne so se Kelisiano a te paka i so se auala. . . . E se mafai o fakaataata ne matou a te ‵tou Aliki e fakaauau a te paka io me e tuku atu ki tena gutu so se mea lailai.”

13. Se a te faka‵maga i mea tau amioga ne oko mai i te 1973?

¹³ I te 1935, ne taku ne The Watchtower a te paka ki “se mouku lailai” kae ne fakailoa atu me e seai se tino e filifili ke lamulamu io me e ‵pusi ne ia, e mafai o tumau i te fai mo fai se sui o te kāiga Peteli io me e tavini atu e pelā me se sui i te fakapotopotoga a te Atua i te galuega fakapaenia io me ko te galuega a ovasia faima‵laga. Ne momea aka te manino mai o nisi fakamatalaga i mea tau amioga i te 1973. Ne fakamatala mai ne The Watchtower i a Iuni 1, me e seai se Molimau a Ieova e mafai o tumau i se tulaga ‵ma i te fakapotopotoga māfai e tumau latou i te faifaiga tamate tino, lailai, kae se alofa tenei. Ko latou kolā ne ita fitifiti ma taofi aka a te fakaaogaga ‵se o te paka ne faka‵tea. * Ne toe fai eiloa ne Keliso a te suā faifaiga tāua i te faka‵maga o ana soko.

14. Se a te tulaga o te Atua e uiga ki te toto, kae ne kamata pefea o lauiloa a te ‵sukiga ki te toto?

¹⁴ Te fakaaogaga ‵se o te toto. I aso o Noa, ne fai atu te Atua me e se ‵tau o ‵kai ki te toto. Ne toe fakamautinoa mai ne ia te tulaga tenā i te Tulafono ki te fenua o Isalaelu, kae ne fakatonu atu a ia ki te fakapotopotoga Kelisiano ke “‵kalo keatea [latou] mai . . . te toto.” (Galu. 15:20, 29; Kene. 9:4; Levi. 7:26) E sē se mea fakapoi me ne maua eiloa ne Satani se auala i aso nei ke fai a tino ke fakaseaoga ne latou a tulaga o te Atua. Ne tofotofo a tokita ki te ‵sukiga ki te toto i te 19 o senitenali, kae i te taimi ne iloa aka ei a vaega kese‵kese o te toto, ne momea aka te lauiloa o te faifaiga tenā. I te 1937, ne kamata o ‵teu sāle aka a toto i taga, kae ne kamata o lasi tena fakaaogaga i te taimi o te Taua i te Lua a te Lalolagi. E seki leva kae ne kamata o masani a tino ki te ‵sukiga ki te toto i te lalolagi kātoa.

15, 16. (a) Se a te tulaga ne puke ‵mau ki ei a Molimau a Ieova e uiga ki te ‵sukiga ki te toto? (e) Se a te fesoasoani ne tuku atu ki soko o Keliso e uiga ki te ‵sukiga ki te toto mo te sē fakaaogaga o te toto, kae ne a mea ne iku mai i ei?

¹⁵ I te kamataga o te 1944, ne fakaasi mai i The Watchtower me i te ‵suki ki te toto ko te suā auala eiloa o te kai ki te toto. I te tausaga mai tuai ifo i ei, ne fakamalosi aka kae toe fakamaina faka‵lei mai a te tulaga tenā i te Tusi Tapu. I te 1951, ne ‵lomi aka ei se fakasologa o fesili mo tali ke fesoasoani atu ki tino o te Atua ke iloa o fakafesagai atu ki tokita ‵poto eiloa. I te lalolagi kātoa, ne puke ‵mau eiloa a soko fakamaoni o Keliso mo te loto malosi ki te tulaga tenā, kae ne masani sāle o fakatauemu, kaitaua, kae ke oko foki eiloa ki te fakasaua atu ki a latou. Kae ne tumau eiloa i te tuku atu ne Keliso ki tena fakapotopotoga a te fesoasoani telā e manakogina. Ne ‵lomi mai a polosiua kolā e aofia i ei a fakamatalaga likiliki mo mea kolā ne sukesuke faka‵lei ki ei mo mataupu foki.

¹⁶ I te 1979, ne kamata o āsi atu a nisi toeaina ki fa‵kaimasaki ko te mea ke fesoasoani atu ki tokita e tokouke ke momea aka te lotou malamalama i te ‵tou tulaga, te pogai faka-te-Tusi Tapu, mo te fakaaogaga o nisi togafiti fakatokita. I te 1980, ne fakamasani a toeaina i fa‵kai e 39 i te Iunaite Sitete ki te faiga o te galuega tenei. E se leva kae ne talia ne te Potukau Pule ke faka‵tu aka a Komiti mō Fa‵kaimasaki i te lalolagi kātoa. E mata, ne aoga eiloa a  taumafaiga konei i te fia o tausaga ko ‵teka? I aso nei, e lau i sefulu afe o tokita ‵poto eiloa​—⁠e aofia i ei a tokita, tokita tipitipi, mo tokita faka‵moe​—⁠ko ga‵lue fakatasi mo tino ma‵saki Molimau, kae fakaasi atu foki ne latou a te āva ki te ‵tou filifiliga ke se fakaaoga te toto. Ko gasolo aka foki eiloa o uke a fa‵kaimasaki kolā ko se fakaaoga te toto, kae ko ‵kilo atu foki a nisi tino ki ei e pelā me ko te ‵toe togafiti fakatokita ‵lei eiloa. E a, e sē se mea fakafiafia ke mafaufau ki auala ne puipui ei ne Iesu ana soko mai i taumafaiga a Satani ke fakamasei latou?​—Faitau te Efeso 5:25-27.

17. E mafai pefea o fakaasi atu me e fakatāua ne tatou a te auala ne faka‵ma aka ei ne Keliso ana soko?

¹⁷ Se mea ‵lei ke fesili ifo tatou, ‘E mata, e fakatāua ne tatou a te auala ne faka‵ma aka ei ne Keliso ana soko, fakamasani latou ke faka‵logo ki tulaga ma‵luga o Ieova i mea tau amioga?’ Kafai e penā loa, ke na masaua ne tatou me ko gasolo aka foki a taumafaiga a Satani ke ‵vae ne ia tatou mai i a Ieova mo Iesu e auala i te fakamaseiga o te ‵tou āva ki amioga fakaatua. Ke ‵teke atu ki te fakamalosiga tenā, e tumau eiloa a te fakapotopotoga a Ieova i te tukumaiga o fakailoaga mo fakamasauaga mo te alofa e uiga ki amioga ma‵sei o te lalolagi tenei. Ke na tumau eiloa i te matapula‵pula, ‵saga tonu atu, kae faka‵logo ki vaegā pati fakatonutonu fesoasoani penā.​—Faata. 19:20.

18. Se a te fakamasauaga manino i te fakaasiga a Esekielu e uiga ki tino kolā e ‵teke tonu atu ki tulaga o te Atua?

¹⁸ A te lua o auala e faka‵ma aka ei i mea tau amioga e aofia i ei a te faiga o mea ke fakatumau te ‵ma o te fakapotopotoga. Se mea fakafanoanoa, me e se ko tino katoa kolā ne talia ne latou a tulaga o Ieova i mea tau amioga kae fai te lotou tukuatuga ki te Atua, ne ‵piki ‵mau mo te a‵lofa fakamaoni ki te lotou fakaikuga. Ne ‵fuli a loto o nisi tino kae ‵teke atu mo te iloa tonu ki tulaga konā. Se a te mea ne ‵tau o fai ki vaegā tino penā? E mafai o maua ne tatou se mea e tasi i te fakaasiga a Esekielu e uiga ki te faletapu faka-te-agaga telā ne fakamatala mai i te kamataga o te mataupu tenei. Masaua a mataloa ma‵luga konā. I koga takitasi kolā ne ulu atu ki ei, e isi eiloa ne potu o tino leoleo. E puipui ne leoleo a te faletapu, e mautinoa eiloa me ne fai penā ke taofi aka ei a latou kolā e “seki pilitome” i te loto mai te ulu atu ki loto. (Eseki. 44:9) A te mea tenā se fakamasauaga manino me i te tapuakiga ‵ma se tauliaga fua mō tino kolā e taumafai o ola e ‵tusa mo tulaga ‵ma o Ieova i mea tau amioga. I se auala tai ‵pau, a te tauliaga ke ‵kau fakatasi mo taina Kelisiano i te tapuakiga e se ‵tala atu ki tino katoa i aso nei.

19, 20. (a) Ne fesoasoani malielie atu pefea a Keliso ki ana soko ke faka‵ma latou i faifaiga kolā e ‵tau o fai ki se tino fai agasala matagā? (e) Ne a pogai e tolu e fakatea ei se tino fai mea ‵se telā e se salamō?

¹⁹ I te 1892, ne fakamatala mai i te Watch Tower me i te “‵tou tiute ko te faka‵teaga (e pelā me ne Kelisiano) a latou kolā e fakaseaoga ne latou i so se auala, me ne tuku atu ne Keliso a ia mo fai se togiola [se ‵togi telā e fetaui ‵lei] mō tino katoa.” (Faitau te 2 Ioane 10.) I te 1904, ne fakaasi mai i te tusi ko The New Creation me i tino kolā e tumau i te faiga o amioga ma‵sei e tuku atu ne latou se tulaga fakamataku ki te fakamaseiga o te fakapotopotoga. I aso konā, ne ‵kau atu a te fakapotopotoga kātoa ki “fono tulafono fakalotu” ke fakamasino aka a agasala matagā. Kae seāseā ko fai a vaegā mea penā. I te 1944, ne fakaasi mai ne The Watchtower me ko taina fua kolā ne ‵tofi aka, e ‵tau o fai ne latou a vaegā mea penā. I te 1952, ne ‵lomi mai i ei i The Watchtower a faifaiga kolā e fakavae ki te Tusi Tapu mō te faiga o vaegā fakamasinoga penā, telā ne fakaasi mai i ei a te pogai tāua mō te faka‵teaga o tino sē salamō​—ke tausi ei te fakapotopotoga ke ‵ma.

²⁰ I te fia sefulu tausaga talu mai te taimi tenā, ne fesoasoani atu a Keliso ki ana soko ke maina kae fakafou aka a faifaiga e ‵tau o fai ki tino kolā e fai ne latou a agasala matagā. Ne fakamasani faka‵lei a toeaina Kelisiano ki te faiga o fono fakamasino i te auala o Ieova, telā e fakapaleni faka‵lei aka ei a te fakamasinoga mo te alofa fakamagalo. I aso nei, e lavea faka‵lei atu eiloa ne tatou a pogai e tolu e ‵tau ei o fakatea se tino fai mea ‵se telā e se salamo mai te fakapotopotoga: (1) ke fakatumau te ‵ma o te igoa o Ieova mai taku fakamaseiga, (2) ke puipui a te fakapotopotoga mai ikuga fakamasei o se agasala matagā, mo te (3) ke fakamalosi atu ki te tino fai mea ‵se ke salamo māfai e mafai.

21. Se a te auala ne fai ei a te fakatokaga o te fakateaga mo fai se fakamanuiaga ki tino o te Atua?

²¹ E mata, e lavea ne koe a te auala ne fai ei te fakatokaga o te fakateaga mo fai se fakamanuiaga ki soko o Keliso i aso nei? I Isalaelu mua, ne masani o fai a tino fai mea ‵se mo fai se fakamalosiga  masei ki te fenua, telā e mafai o tokouke atu latou i tino kolā e a‵lofa ki a Ieova kae taumafai o fai te mea tonu. Tela la, ne avatu sāle ne te fenua a fakamaseiga ki te igoa o Ieova kae ne galo atu ei te taliaga a te Atua. (Iele. 7:23-28) Kae i aso nei, ko fakafesagai atu eiloa a Ieova ki se fenua o tāgata mo fāfine faka-te-agaga. Ona ko te mea e ave faka‵tea a tino fai mea ‵se kae loto ma‵keke mai i a latou, ko se mafai ei o fakaaoga latou ne Satani, ke momea aka te lotou fakamasei ki te fakapotopotoga mo tena tulaga ‵ma. I lō te fai penā, e ‵tau o fakafoliki ifo olotou fakamalosiga sē ‵lei. E pelā me se potukau, e ‵tau o fakatumau ne tatou te taliaga a Ieova. Masaua, me ne tauto mai a Ieova: “Ka seai se meatau e mafai o fakapakia ne ia a koe.” (Isa. 54:17) E mata, e ‵lago atu tatou mo te a‵lofa fakamaoni ki toeaina, kolā e tauave ne latou se amoga ‵mafa i te faiga o fono fakamasino penā?

22, 23. Kaia e fia‵fia ei tatou ki ‵tou taina Kelisiano i te vaega muamua o te 20 senitenali, kae se a te fakamaoniga e maua atu i ei me e manakogina malosi a te paleni ‵lei e uiga ki te kāiga?

²² A te tolu o auala ne maua ei ne soko o Keliso a mea aoga mai te tumau i te faka‵maga tenei, e aofia i ei a te olaga avaga mo te olaga faka-te-kāiga. E mata, ko oti ne toe fakafou aka ‵tou kilokiloga e uiga kāiga i te fia tausaga ko ‵teka atu? Ao. E pelā mo te ‵tou fai‵tau e uiga ki tavini a te Atua i te kamataga o te 20 senitenali, e se mafai o taofi aka te ‵tou ‵poi mo te ōfo i te taliaga ne latou o mea faiga‵ta mō te taviniga. E fia‵fia malosi tatou ki te auala ne fakamuamua faeloa ne latou te lotou taviniga tapu i lō nisi mea katoa i te olaga. I te taimi foki loa tenā, e mafai o lavea faka‵lei atu ne tatou me e manakogina malosi a te paleni ‵lei. E pefea la?

²³ E sē se faifaiga masani mō taina ke talia ne latou a tōfiga i te galuega talai io me ko te galuega ko te faimalaga telā e avatu loa latou ki koga kolā e ‵mao latou mai i te lotou fenua i te fia o masina mō se taimi tai leva. I nisi taimi, e se fakamalosi atu ke avaga ko te mea ke ‵saga tonu atu ki te Tusi Tapu, i te taimi ne seki uke ei a fakamatalaga ne fai e uiga ki te atiakaga o se avaga Kelisiano malosi. E mata, e ‵pau eiloa te tulaga tenā i soko o Keliso i aso nei? Ikai!

24. Ne fesoasoani atu pefea a Keliso ki ana tino fakamaoni ke maua se kilokiloga paleni e uiga ki te avaga mo te kāiga?

²⁴ I aso nei, e se ‵tau o fakatāua a tōfiga faka-te-agaga kae fakaseaoga atu a tiute faka-te-kāiga. (Faitau te 1 Timoteo 5:8.) E se gata i ei, ne fakamautinoa aka ne Keliso ke maua ne ana soko fakamaoni i te lalolagi, se fakasologa o pati fakatonutonu mai te Tusi Tapu, kolā e fesoasoani kae paleni ‵lei e uiga ki te olaga avaga mo te olaga faka-te-kāiga. (Efe. 3:14, 15) I te 1978, ne ‵tala mai ei a te tusi ko te Making Your Family Life Happy. I se 18 tausaga mai tua ifo, ne ‵tala mai ei te tusi ko Te Auala e Maua ei ne te Kāiga te Fiafia Tonu. E se gata i ei, ne fakaaoga ne Te Faleleoleo Maluga a mataupu e uke kolā ne fakatoka ke fesoasoani ki tauavaga ke fakagalue aka a akoakoga fakavae i te Tusi Tapu i olotou fesokotakiga.

25-27. Ne momea aka pefea te ‵saga malosi atu ki manakoga o tama‵liki i te fia o tausaga ko ‵teka atu?

²⁵ Kae e a tama‵liki? Ne gasolo aka eiloa te ‵saga tonu atu ki  manakoga o latou. Ko leva eiloa ne tuku mai ne te fakapotopotoga a Ieova a mea ‵lei mō tama‵liki o tausaga kese‵kese, kae i te taimi ne kamata ei, ne fakatumau faeloa i ei te aumaiga o mea penā mō tamaliki. E pelā mo te “Juvenile Bible Study” telā ne sae mai i The Golden Age mai te 1919 ki te 1921. Mai tua o te taimi tenā, ne sae mai a te polosiua ko The Golden Age ABC i te 1920, mo te tusi ko te Children i te 1941. I tausaga talu mai te 1970, ne tuku mai i ei a te tusi ko te Ke Fakalogologo ki te Faiakoga Sili, Your Youth​—⁠Getting the Best out of It, mo te Taku Tusi o Tala o te Tusi Tapu. I te 1982, ne kamata mai i ei a mataupu faka‵soko i te Awake! “E Fesili Mai a Talavou”, kae ne iku atu ki te ‵lomiga o te tusi ko te Questions Young People Ask​—Answers That Work, telā ne ‵lomi i te 1989.

²⁶ I aso nei, ko lua ‵tou tusi i te Young People Ask, kae e tumau eiloa a mataupu faka‵soko i te ‵tou Web site, ko te jw.org. Ko oti foki ne maua ne tatou a te tusi ko te Ke Tauloto Mai te Faiakoga Sili. E uke a vaega o te ‵tou Web site mō talavou, e aofia i ei a tamā fakamatalaga e uiga ki tino i te Tusi Tapu, mo ata o tala i te Tusi Tapu, e pelā foki mo akoakoga i te Tusi Tapu mō tama‵liki kolā ko taki 3 tausaga ki lalo. E manino ‵lei i ei, me e seki ‵fuli eiloa te  kilokiloga a Keliso ki tama‵liki talu mai te taimi ne kopi sāle ei ne ia a tama‵liki ki ana lima i te senitenali muamua. (Male. 10:13-16) E manako a ia ko tamaliki a tatou ke maua foki ne latou se lagonaga alofagina kae ke fagai faka‵lei foki i te feitu faka-te-agaga.

²⁷ E manako foki a Iesu ke puipui a tama‵liki mai i mea fakalogo‵mae. E pelā mo te fanaifoga o amioga ‵lei ki te ‵lotoga eiloa o amioga ma‵sei, ko gasolo aka eiloa o lauiloa a te maneaneaga o tama‵liki. Tela la, ne ‵lomi mai a fakamatalaga manino ‵lei ke fesoasoani atu ki mātua ke puipui olotou tama‵liki mai i te faifaiga matagā tenei. *

28. (a) Se a te mea e manakogina māfai e fia ‵kau atu tatou ki te tapuakiga ‵ma, e pelā mo te mea e lavea atu i te fakaasiga a Esekielu e uiga ki te faletapu? (e) Se a te mea e fakaiku aka ne koe ke fai?

²⁸ E a, e sē se mea fakafiafia ke mafau‵fau ki te auala ne tumau eiloa a Keliso i te faka‵maga o ana soko, te akoakoga o latou ke iloa o āva, ke ola e tusa mo tulaga ma‵luga o Ieova i mea tau amioga kae ke maua foki ne latou a mea aoga mai i ei? Mafaufau foki ki te faletapu ne lavea ne Esekielu i te fakaasiga. Masaua te ma‵luga o mataloa. E tonu, a te faletapu tenā, e sē se fale tonu, kae se mea faka-te-agaga. E tiga eiloa te feitu tenā, e mata, e ‵kilo atu tatou ki ei e pelā me se mea tonu? E ulu atu tatou ki ei, e se mai te olo atu fua ki se Kingdom Hall io me ko te ‵suke atu ki te Tusi Tapu io me mai i te tukituki atu i se mataloa i te galuega talai. A mea konā ne mea faka-te-foitino kolā e aofia i mea e matea. E mafai eiloa fai ne se tino amio ‵pelo a mea konā e aunoa mo te ulu atu ki loto i te faletapu o Ieova. Kae kafai e fai ne tatou a mea konā kae ola foki e ‵tusa mo tulaga ma‵luga o Ieova i mea tau amioga kae ‵kau atu ki te tapuakiga ‵ma mo se kilokiloga ‵lei, ko mafai ei o ulu atu tatou ki loto kae tavini atu i te ‵toe koga tapu eiloa​—te fakatokaga mō te tapuakiga ‵ma ki a Ieova te Atua! Ke na fakatāua faeloa ne tatou a te tauliaga tāua tenā. Ke na tumau foki tatou i te ‵toe mea e mafai ne tatou o fai ke fakaasi atu te ‵malu o Ieova mai te puke ‵mau ki ana tulaga amio‵tonu!