1. Nye Esekiele a mola okuti ci tu komõhisa?

 SOKOLOLA ndeci okuti wa pita lulandu ndowu wuprofeto Esekiele okuti toke cilo pa pita ale 2.500 kanyamo. Sokolola ndeci: O kasi oku pitĩla ocipepi lonembele yinene hayo yi komõhisa. Vonembele yaco muli ungelo umue o ku lekisa ocitumãlo caco ci komõhisa! Ove enda ananga epanduvali vosikata yenda toke pombundi yimue pokati kolombundi vitatu. Eci o mola olombundi viaco o komõha calua. Ombundi lombundi yi kuete 30 kolometulu koku lepa. Eci iñila vonembele o limbuka okuti, muli otulohondo tuolondavululi. Kolongunji viaco kua sonehiwa oviluvialuvia vioviti vieva via posoka.​—Esek. 40:1-4, 10, 14, 16, 22; 41:20.

2. (a) Onembele Esekiele a mola vocinjonde yi lomboloka nye? (Tangavo etosi pombuelo yemẽla.) (b) Nye tu pondola oku lilongisa kovina vi kasi polombundi vionembele?

² Eyi, onembele yespiritu ya tukuiwa vocinjonde Esekiele a mola. Esekiele wa lombolola ciwa ulandu waco kocipama 40 toke 48 velivulu a soneha. Onembele yaco yi lomboloka eliangiliyo lia Yehova liefendelo lia lipua. Onepa lonepa yonembele yaco yi kuete elomboloko kefendelo lietu koloneke vilo via sulako. a Olombundi vinene vi lomboloka nye? Vi tu ivaluisa okuti, omanu vana va yongola oku iñila veliangiliyo lia Yehova liefendelo lia lipua, va sukila oku kuama olonumbi viaye viesunga. Oviluvialuvia vioviti vieva via kapiwa kolongunji, vi kuete elomboloko limuamue, momo oviti viaco vieva olonjanja vimue Vembimbiliya, vi lomboloka esunga. (Osa. 92:12) Otulohondo tuolondavululi tu lomboloka nye? Ka citava okuti omanu vana ka va pokola kolonumbi via Yehova va iñila veliangiliyo liefendelo lia lipua li tuala komuenyo ko pui.​—Esek. 44:9.

3. Momo lie olondonge via Kristu via sukilile oku amamako oku yelisiwa?

³ Ocinjonde Esekiele a kuata ci kasi oku tẽlisiwa ndati? Ndomo tua lilongisa Vocipama ca 2 celivulu lilo, Yehova lekuatiso lia Kristu wa yelisa afendeli vaye lonjila yimue yilikasi oku upisa kunyamo wo 1914 toke kefetikilo liunyamo wo 1919. Anga hẽ ka kua kalele vali oku yelisiwa kukuavo? Kua kala! Vokuenda kuocita canyamo, Kristu wa amamako oku teyuila olonumbi via Yehova vi kola viatiamẽla kovituwa. Olondonge viaye via sukilile oku amamako oku yelisiwa. Momo lie? Momo, Kristu wongolola olondonge viaye vi kasi voluali lulo lua vĩha lua Satana una wa siata oku vi seteka oco vi linge ovina via vĩha. (Tanga 2 Petulu 2:20-22.) Tu konomuisa ovina vitatu Akristão vocili va sukilile oku yelisiwa vokuenda kuotembo. Catete, oku yelisiwa kovituwa Viakristão. Noke, tu ka konomuisavo eliangiliyo liatiamẽla koku  yelisiwa kuekongelo oco ka li ka vĩhisiwe. Tu ka malusula loku konomuisa oku yelisiwa kuatiamẽla kolohuela kuenda komuenyo wepata.

4, 5. Onjanjo yipi Satana akuãi, kuenda onima yipi a siata oku kuata?

⁴ Afendeli va Yehova va siata oku likolisilako oco va kuate ovituwa viwa. Omo liaco, va siata oku tava kolonumbi viatiamẽla kondaka yaco. Kũlĩhĩsa ovolandu amue.

⁵ Ukahonga. Yehova o yongola okuti, ulume lukãi waye va lipekela lonjila yimue ya sunguluka haiyo yi va nenela esanju. Satana wa siata oku vetiya omanu oco va lipekele lonjila yimue ka ya sungulukile oku kongelamo Akristão vocili oco va nyõle ukamba wavo la Yehova. Satana wa kuama onjanjo yaco koloneke via Baliame, kuenje wa kuata onima yiwa. Cimuamue haico a siata oku linga koloneke vilo via sulako okuti kosimbu ci sule.​—Ate. 25:1-3, 9; Esit. 2:14.

6. Ohuminyo yipi ya sandekiwile Vutala Wondavululi, kuenda ya kapiwileko ndati? Momo lie omanu va liwekelapo oku yi kuama? (Tangavo etosi pombuelo yemẽla.)

⁶ Oco Satana ka ka tẽlise onjongole yaye, Vutala Wondavululi 15 wosãi Yevambi yunyamo wo 1908, mua sandekiwa ohuminyo yimue ya popia hati: “Olonjanja viosi ndi ka lekisa ovituwa viwa kukãi ale kulume kuosi ñasi laye, ci kale pokolika ale pokati komanu kuenda si pongolola ekalo liange.” b Ndaño okuti ohuminyo yaco ka ya kisikiwile, omanu valua va yi linga kuenda va eca olonduko viavo oco vi sandekiwe Vutala Wondavululi. Noke lianyamo amue, va limbuka okuti ohuminyo yaco ndaño ya kuatisa omanu valua kotembo yaco, pole yeya oku linga ocihilahila, kuenje va liwekapo oku yi kuama. Pole, afendeli va Yehova va siata oku kakatela kolonumbi via velapo viatiamẽla koku lekisa ovituwa viwa.

7. Kunyamo wo 1935, Utala Wondavululi wa lombolola ocitangi cipi, kuenda onumbi yipi ya pituluiwa?

⁷ Olonjanjo via Satana vieya oku livokiya. Utala Wondavululi 1 wosãi Yelombo yunyamo wo 1935 kelimi Liongelesi wa lombolola ocitangi ca siatele calua pokati kafendeli va Yehova. Vamue va simĩle okuti, omo lioku panga onepa kupange woku kunda, ka va sukila vali oku kakatela kovihandeleko via Yehova komuenyo wavo. Utala Wondavululi wa popia ndoco: “Omunu o sukila oku ivaluka okuti, oku panga onepa kupange woku kunda hacoko lika ci kisikiwa. Olombangi via Yehova vi kuete ocikele coku lekisa ovituwa viwa, momo olonumiwa viaye kuenda Viusoma waye.” Ocipama caco ca eca elungulo liatiamẽla kolohuela kuenda koku lipekela, oco ci kuatise afendeli va Suku “oku tila ukahonga.”​—1 Va Kor. 6:18.

8. Momo lie Utala Wondavululi wa pituluila olonjanja vialua elomboloko liondaka yo Helasi yatiamẽla kukahonga?

⁸ Vokuenda kuanyamo a sulako, Utala Wondavululi wa pitulula olonjanja vialua elomboloko liondaka por·nei’a yatiamẽla kukahonga ya tukuiwa Vovisonehua vio Helasi. Ondaka yaco ka yi lombolola lika oku lipekela. Pole, vondaka yaco mua kongela ovina vialua via vĩha vioku tẽlisa onjongole yoku lipekela, omanu va siata oku lingila volonjo viupuepue. Olondonge via Kristu via siata oku teyuiwa kefengi liupuepue li kasi oku yapuisa omanu valua voluali koloneke vilo.​—Tanga Va Efeso 4:17-19.

9, 10. (a) Ulandu upi watiamẽla koku lekisa ovituwa viwa wa sandekiwa Vutala Wondavululi kunyamo wo 1935? (b) Nye Embimbiliya li popia catiamẽla koku nyua evi vi koluisa?

 ⁹ Uholua. Utala Wondavululi 1 wosãi Yelombo yunyamo wo 1935, wa lombolola ulandu ukuavo watiamẽla kovituwa omanu vamue va siata oku lekisa poku popia ndoco: “Vamanji vamue eci va enda kupange woku kunda ale va linga ovopange akuavo ekongelo va siata oku nyua ovina [vi koluisa.] Ndomo ci lekisiwa Vovisonehua, vepuluvi lipi ca sunguluka oku nyua ovinyu? Ca sunguluka hẽ oku nyua ovinyu okuti pamue ci tateka oku tẽlisa ocikele cimue vocisoko ca Ñala?”

¹⁰ Etambululo lia situlula ocisimĩlo ca sunguluka ci sangiwa Vondaka ya Suku catiamẽla koku nyua ovina vi koluisa. Embimbiliya ka li pisa oku nyua ovinyu ale ovinyua vikuavo vi koluisa nda ci lingiwa lonjila yimue ya sunguluka, pole li pisa uholua. (Osa. 104:14, 15; 1 Va Kor. 6:9, 10) Afendeli va Suku va kuete ocituwa coku nyua ovina vi koluisa poku linga upange wa Suku, va ivaluisiwa ulandu wa pita lomãla va Arone okuti va pondiwa la Suku omo lioku u lumbila ondalu ka ya sungulukile kutala waye. Ulandu waco u situlula ovina via vetiya alume vaco oku linga ovina ka via sungulukile, momo Suku wa eca ocihandeleko ca lekisa okuti, ovitunda poku linga ovopange a kola ka ci tava oku nyua ovina vi koluisa. (Ovis. 10:1, 2, 8-11) Koloneke vilo, olondonge via Kristu via siata oku kapako olonumbi viaco vioku yuvula oku nyua ovina vi koluisa osimbu va kasi oku linga ovopange a kola.

11. Momo lie tu popela tuti, afendeli va Suku va kuete esumũlũho omo lioku kuata elomboloko lia suapo liatiamẽla kuholua?

¹¹ Vokuenda kuanyamo a sulako, olondonge via Kristu via kuata esumũlũho lielomboloko liatiamẽla kovina vi koluisa, ca piãla enene ku vana va kuete ocituwa coku nyua calua. Omo lioku tambula okulia kuespiritu votembo ya sokiyiwa, valua va siata oku kuatisiwa oku yula ocituwa caco kuenda oku teyuila omuenyo wavo. Valua va siata oku kuatisiwa oco va yuvule onjanjo yuholua. Lomue ka ka ecelele okuti ovina vi koluisa vi nyõla ekalo liaye, epata liaye, ca piãla enene esumũlũho a kuete lioku panga onepa kefendelo liocili lia Yehova.

12. Ovisimĩlo vipi olondonge via Kristu via kuatele viatiamẽla koku sipa osimbu handi oloneke via sulako ka via fetikile?

¹² Oku Sipa. Olondonge via Kristu via fetika oku kuata ovisimĩlo vioku yuvula oku sipa, osimbu oloneke via sulako ka via fetikile. Vokuenda kuanyamo apita manji umue ukulu londuko Charles Capen, wa ivaluka eci a kũlĩha manji Charles Taze Russell kesulilo liocita 19. Eci manji Capen a kuata 13 kanyamo wa kala la vamanjaye vatatu vosikata Yonjo Yembimbiliya ko Allegheny, volupale luo Pensilvânia. Eci manji Russell a pita ponele yavo, wa pula hati: “Ene amãla, vu kasi hẽ oku sipa? Ndi yevite elemba liakaya.” Ovo va tambulula vati, sio. Epulilo Manji Russell a linga kokuavo lia va vetiya oku limbuka ovisimĩlo viaye viatiamẽla koku sipa. Vutala Wondavululi 1 wosãi Yenyenye yunyamo wo 1895, Manji Russell wa tukula olondaka viukanda 2 Va Korindo 7:1 poku popia hati: “Si pondola oku limbuka ndomo oku sipa ku eca esivayo ku Suku, ale ci kuatisa Ukristão ndaño o ci linga volonjila via litepa. ... Ka tu pondolavo oku sokolola Ñala  yetu oku lẽha owisi wakaya, ale oku kapa vomela waye ocina cikuavo ca vĩha.”

13. Oku yelisiwa kupi kovituwa kua lingiwa kunyamo wo 1973?

¹³ Kunyamo wo 1935, Utala Wondavululi wa tukula akaya hati, “amẽla a vĩhisa” etimba kuenda wa lekisa okuti omunu wosi wa nõlapo oku takĩla akaya ale oku a sipa, ka pondola oku amamako oku kala ko Betele, oku kala onumiwa yocisoko ca Suku, oku linga ukundi wotembo yosi, ale ukuakunyula akongelo. Kunyamo wo 1973 kua eciwa olonumbi vikuavo viatiamẽla koku liyelisa. Utala Wondavululi 1 wosãi Yevambi okuti (kelimi Lioputu, 1 wosãi ya Cembanima) wa lombolola ndoco, la yimue Ombangi ya Yehova yi pondola oku amamako oku taviwa vekongelo nda ka yi yongola oku siapo ovituwa via vĩha vi lekisa ekambo liocisola, kuenda vi kapa kohele omuenyo. Vana ka va yongola oku liwekapo oku sipa, citava okuti va tundisiwa vekongelo. c Kristu wa kuama onjila yikuavo yi kuete esilivilo yoku yelisa olondonge viaye.

14. Cipi ocihandeleko ca Suku catiamẽla kosonde, kuenda ocituwa coku sakula losonde ca li sanduila ndati kolonepa viosi?

¹⁴ Oku sakuiwa losonde. Koloneke via Noha, Suku wa popele hati, ka ca sungulukile oku lia osonde. Eye wa pitulula ondaka yaco eci a eca Ocihandeleko ku va Isareli, kuenda wa ecavo onumbi yimuamue vekongelo Liakristão yokuti, “ka ci tava oku lia osonde.” (Ovil. 15:20, 29; Efet. 9:4; Ovis. 7:26) Koloneke vilo, Satana wa siata oku vetiya omanu valua oco ka va ka kapeko ocihandeleko ca Suku. Kocita 19, olondotolo via seteka oku sakula omanu losonde, pole eci via limbuka okuti osonde yomanu ya litepa, ocituwa caco coku sakula losonde ca livokiya. Kunyamo wo 1937, olondotolo via fetika oku upa osonde vetimba liomanu kuenda oku yi seleka vosipitali. Kuenje ocituwa caco ceya oku livokiya vokuenda Kuyaki Wavali wa pita Voluali luosi. Ka pa pitile otembo yalua, oku sakula losonde kua lisanduila kolonepa viosi violuali.

15, 16. (a) Onjila yipi Olombangi Via Yehova via nõlapo catiamẽla koku sakuiwa losonde? (b) Ekuatiso lipi lia siata oku eciwa kolondonge via Kristu catiamẽla koku sakuiwa losonde, kuenda onima yipi va siata oku kuata?

¹⁵ Kunyamo wo 1944, Utala Wondavululi (kelimi Lioputu wa sandekiwa kunyamo wo 1945,) wa lekisa okuti oku sakuiwa losonde ku sokisiwa loku yi lia. Vunyamo wa kuamamo, onumbi yaco Yembimbiliya ya pituluiwa kuenda ya lomboluiwa ciwa. Utala Wondavululi yunyamo wo 1951 (kelimi Lioputu wa sandekiwa kunyamo wo 1959,) wa sandeka ulala wapulilo latambululo oco u kuatise afendeli va Suku oku sapela lolondotolo. Voluali luosi, olondonge via Kristu vakuekolelo, via siata oku lekisa utõi eci vi popiwa lãvi, kuenda poku lambalaliwa. Pole, Kristu o kasi oku amamako oku songuila ocisoko ca Yehova loku eca ekuatiso li sukiliwa. Kuenje kua siata oku sandekiwa olombrochura kuenda ovipama vikuavo vi kuete olonumbi viatiamẽla kondaka yaco.

¹⁶ Kunyamo wo 1979, akulu vamue vekongelo va fetika oku nyula olosipitali oco va kuatise olondotolo oku kuata elomboloko lieci ka tu tavela oku sakuiwa losonde, loku lekisa uvangi Wembimbiliya watiamẽla kondaka yaco. Kuenje va lekisa kolondotolo olonjila vikuavo vi pondola oku kuamiwa poku sakula. Kunyamo wo 1980, akulu vekongelo va tunda kueci ci soka 39  kalupale kofeka yo Estados Unidos, va tambula epindiso oco va tẽlise ciwa upange waco. Vokuenda kuotembo, Osungu Yolombangi Via Yehova, ya sokiya Oseketa Yoku Tetulula Ovitangi Violombei voluali luosi. Anga hẽ elikolisilo liaco lia siata oku eca onima vokuenda kuanyamo? Koloneke vilo, omanu valua vakuoloño woku sakula oku kongelamo olondotolo via litepa kuenda vakuakutoma ocinjesãu osimbu omunu ka pelaliwile, va siata oku tava kovisimĩlo violombei okuti Olombangi Via Yehova. Kuenje, va lekisa esumbilo konjongole yetu yoku sakuiwa lonjila yimue okuti ka tu kapiwa osonde. Cilo, olosipitali vialua vikuãi olonjila vioku sakula okuti ka va kapi osonde kuenda valua va yi tenda okuti onjila yimue yavelapo yoku sakula. Ka tu sanjuka hẽ poku sokolola ndomo Yesu a siata oku teyuila olondonge viaye kalikolisilo a Satana oku vi yapuisa?​—Tanga Va Efeso 5:25-27.

17. Tu lekisa ndati okuti tua kapako onjila Kristu a siata oku kuama yoku yelisa olondonge viaye?

¹⁷ Tu sukila oku lipula ndoco: ‘Nda kapako hẽ onjila Kristu a siata oku kuama yoku yelisa olondonge viaye, poku vi pindisa oco vi kakatele kolonumbi via Yehova viatiamẽla koku lekisa ovituwa viwa?’ Omo liaco, tu sukila oku ivaluka okuti, Satana wa siata oku sanda epuluvi lioku tepa ukamba wetu la Yehova kumue la Yesu poku tu vetiya oco ka tu ka pokole kolonumbi via Suku. Oco ka tu ka yapuisiwe locituwa caco, ocisoko ca Yehova  ca siata oku tu ivaluisa loku tu ĩha alungulo oco tu yuvule ovituwa vĩvi via siata voluali lulo. Omo liaco, tu amamiko oku lavulula, kuenda oku pokola kalungulo aco!​—Olosap. 19:20.

18. Ocinjonde Esekiele a kuata ci tu ivaluisa nye catiamẽla komanu vana ka va pokola kovihandeleko via Suku?

¹⁸ Konepa yavali kua lingiwa apongoloko koku yelisiwa kovituwa, oco ekongelo lia amameko oku yela. Vamanji vamue ndaño va tava kolonumbi via Yehova viatiamẽla koku liyelisa kovituwa kuenda va litumbika kokuaye, pole ka vamamako oku kakatela konjila va nõla. Vamue va pongolola ovisimĩlo viavo, kuenje va nõlapo oku tomba olonumbi viaco. Nye omanu vaco va sesamẽla? Ocinjonde Esekiele a kuata catiamẽla konembele yespiritu tua konomuisa kefetikilo liocipama cilo, ci tu kuatisa oku sanga etambululo liepulilo eli. Ivaluka olombundi via lepa. Ivaluka hẽ olombundi vinene? Pombundi lombundi pa kala otulohondo tuolondavululi via enda oku teyuila onembele, oco ‘oviyamba viutima’ ka vi ka iñile. (Esek. 44:9) Ulandu owu u tu ivaluisa okuti, omanu vana va likolisilako oku pokola kolonumbi via lipua via Yehova viatiamẽla koku liyelisa kovituwa, ovo lika va kuete esumũlũho lioku panga onepa kefendelo lia lipua. Cimuamue haico ci kasi oku pita koloneke vilo okuti, havosiko va kuete esumũlũho lioku likongela Lakristão vocili kefendelo.

19, 20. (a) Kristu wa siata oku kuatisa ndati olondonge viaye oku li yelisa poku tetulula akandu anene? (b) Atosi api atatu a lekisa okuti vana ka va likekembela va sukila oku tundisiwa vekongelo?

¹⁹ Utala Wondavululi yunyamo wo 1892, wa lombolola okuti, “etu tu kuete ocikele coku tundisa vekongelo Akristão vana ka va tava okuti, Kristu wa lieca ndocisembi [ca fetiwa oco ci yovole] omanu vosi.” (Tanga 2 Yoano 10.) Kunyamo wo 1904, elivulu The New Creation (Oviluvo Viokaliye) lia lekisa okuti, vana va amamako oku linga ovina ka via sungulukile, va pondola oku honguisa ekolelo liomanu vakuavo vekongelo. Kotembo yaco, vamanji vosi vekongelo va enda oku panga onepa koku “tetulula akandu anene vonembele.” Pole, ka va endele oku ci linga olonjanja viosi. Kunyamo wo 1944, Utala Wondavululi (kelimi Lioputu wa sandekiwa kunyamo wo 1945,) wa lekisa okuti, vamanji va kuete ocikele coku songuila ekongelo, ovo lika va pondola oku tetulula ovitangi viaco. Kunyamo wo 1952, Vutala Wondavululi mua sandekiwa ocipama cimue ca lekisa ndomo ku lingiwa esombiso, kuenje ca lombolola okuti, vana ka va yongola oku likekembela va sukila oku tundisiwa vekongelo oco li yelisiwe.

²⁰ Tunde kotembo yaco, Kristu wa siata oku kuatisa olondonge viaye oku kuata elomboloko lia suapo liatiamẽla koku tetulula ovitangi viomanu va linga ekandu linene. Akulu vekongelo va siata oku pindisiwa oco va kũlĩhe ndomo va sombisa lonjila yi taviwa la Yehova kuenda ndomo va lekisa esunga kuenda ohenda. Koloneke vilo tu kuete elomboloko liatosi atatu a lekisa esunga lieci omunu wa lueya a sukilila oku tundisiwa vekongelo: (1) Oku teyuila onduko ya Suku oco ka yi ka vĩhisiwe. (2) Oku teyuila ekongelo koku vĩhisiwa lakandu anene. (3) Oku kuatisa omunu wa lueya oco a likekembele nda citava.

21. Eliangiliyo lioku tundisa vekongelo vana ka va likekembela lia linga ndati esumũlũho kafendeli va Suku?

 ²¹ O pondola hẽ oku limbuka ndomo eliangiliyo lioku tundisa vana ka va likekembela lia siata oku linga esumũlũho kolondonge via Kristu koloneke vilo? Ko Isareli yosimbu, omanu vana va enda oku linga ekandu olonjanja vialua ovituwa viavo via enda oku yapuisa omanu valua okuti, etendelo liaco lia pitahãla vana va sole Yehova haivo va yongola oku linga eci ca sunguluka. Omo liaco, va Isareli olonjanja vialua va enda oku vĩhisa onduko ya Yehova kuenda ka va taviwile vali laye. (Yer. 7:23-28) Pole, koloneke vilo Yehova wa siata oku talavaya lalume kuenda akãi va pama kespiritu. Omo okuti vana va lueya haivo ka va likekembela va siata oku tundisiwa vekongelo, cecelela okuti ka va kala vali ndovimalẽho via Satana oco va yapuise ekongelo loku li vĩhisa. Omo liaco, ka tu yapuisiwa lovituwa viavo, pole, tu amamako oku pamisa ukamba wetu la Yehova. Ivaluka ohuminyo ya Yehova wa popia hati: “Lacimue ocimãlẽho va ci telela oku yaka love ci ku linga cimue [cĩvi].” (Isa. 54:17) Tua siata hẽ oku kuatisa akulu vekongelo, va kuete ocikele coku sombisa?

22, 23. Momo lie tu sukilila oku eca olopandu ku va manji va kala kefetikilo liocita 20? Momo lie ca sukilile oku lekisa esunguluko catiamẽla kepata?

²² Catatu, olondonge via Kristu via siata oku kuatisiwa oku liyelisa kolohuela kuenda komuenyo wepata. Anga hẽ ovisimĩlo vietu viatiamẽla kepata via siata oku yelisiwa vokuenda kuanyamo? Via siata oku yelisiwa. Omo liaco, eci tu tanga ovolandu atiamẽla kafendeli va Suku va kala kefetikilo liocita 20, tu komõha calua omo liovituwa viwa va lekisa. Tu eca olopandu omo va pitisa kovaso upange u kola komuenyo wavo, kuenda tu limbuka okuti va sukilile oku lekisa esunguluko. Ndamupi?

²³ Tu komõha calua poku limbuka ndomo vamanji va enda oku tambula ovikele viupange woku kunda, ale vioku nyula akongelo ndaño va sukilile oku kala ocipãla lepata liavo vokuenda kuolosãi vialua. Olonjanja vimue ka va vetiyile oku kuata ovisimĩlo via sunguluka viatiamẽla kolohuela ndomo ci lekisiwa Vovisonehua, kuenda ka va endele oku sapela ovina vialua viatiamẽla koku kuata olohuela via pama. Ocitangi caco ci kasi hẽ oku amamako pokati kolondonge via Kristu toke koloneke vilo? Sio!

24. Kristu wa siata oku kuatisa ndati olondonge viaye vakuekolelo oco vi kuate ovisimĩlo via sunguluka viatiamẽla kolohuela kuenda komuenyo wepata?

²⁴ Koloneke vilo, ovikele vamanji va kuete vekongelo ka citava okuti vi va tateka oku kuatisa epata liavo. (Tanga 1 Timoteo 5:8.) Handi vali, Kristu wa siata oku eca kolondonge viaye vi kasi palo Posi alungulo a sangiwa Vembimbiliya atiamẽla kolohuela kuenda komuenyo wepata. (Va Efe. 3:14, 15) Kunyamo wo 1978, kua sandekiwa elivulu losapi hati: Torne Feliz Sua Vida Familiar. Eci pa pita ekũi lecelãla kanyamo, kua sandekiwa elivulu losapi hati: Uloño Wepata Liasanjuka. Handi vali, Utala Wondavululi wa siata oku sandeka ovipama vialua oco vi kuatise olohueli oku kapako olonumbi Viembimbiliya komuenyo wavo.

25-27. Ovina amalẽhe kumue lomãla va sukila, via siata hẽ oku kapiwako vokuenda kuanyamo?

²⁵ Nye ci popiwa catiamẽla kamalẽhe? Vokuenda kuanyamo va siatavo oku tambula olonumbi vialua viwa. Ocisoko ca Yehova ca siata oku sandeka alivulu oku kuatisa amalẽhe kuenda  omãla. Ndaño okuti kosimbu ka ca lelukile oku tambula alivulu alua oku kuatisa amalẽhe, pole, cilo kua siata oku sandekiwa alivulu alua. Tunde kunyamo wo 1919 toke kunyamo wo 1921, o revista The golden age (A Idade de Ouro) okuti cilo o Despertai!, mu sangiwa ocipama losapi hati: “Estudo Bíblico Juvenil” (Elilongiso Liembimbiliya Liamalẽhe). Noke kunyamo wo 1920 kua sandekiwa ombrochura The Golden Age ABC, (O ABC da idade de ouro), kuenda kunyamo wo 1941, (kelimi Lioputu wa sandekiwa kunyamo wo 1944,) kua sandekiwa elivulu Filhos (Omãla). Oku upisa kunyamo wo 1970 kua sandekiwa alivulu ndeci: Escute o Grande Instrutor; Sua Juventude—O Melhor Modo de Usufruí-la, kuenda Elivulu Liasapulo Embimbiliya. Kunyamo wo 1982 o Despertai! ya fetika oku sandeka ocipama losapi hati: “Os Jovens Perguntam” okuti noke kua pongiyiwa elivulu losapi hati: Os Jovens Perguntam—Respostas Práticas, lia sandekiwa kunyamo wo 1989.

²⁶ Koloneke vilo, tu kuete alivulu avali okaliye losapi hati, Os Jovens Perguntam, kuenda ovipama viaco vi kasi oku amamako oku sandekiwa vonumbi yetu yo Internet jw.org. Tu kuetevo elivulu losapi hati: Aprenda do Grande Instrutor. Vonumbi yetu yo Internet mu sangiwa ovipama vialua vi pondola oku kuatisa amalẽhe,  oku kongelamo otuikanda Tuembimbiliya, ovitalukilo vi nena esanju kuenda ovina vikuavo vi kuatisa omãla, olovideo, ovolandu Embimbiliya a kuete oviluvialuvia, kuenda ovipama Viembimbiliya vi kuatisa omãla va kuete anyamo atatu ale vana ka va tẽlisile anyamo atatu. Ocisimĩlo ca Kristu catiamẽla kamalẽhe ka ca pongolokele tunde eci eye a laleka omãla oco veye kokuaye kocita catete. (Mar. 10:13-16) Eye o yongola oco omãla kumue lamalẽhe va limbuke okuti, va soliwe kuenda va tekuiwa ciwa konepa yespiritu.

²⁷ Yesu o yongola okuti omãla va teyuiwa. Osimbu oluali lulo lu kasi oku amamako oku linga ovina ka via sungulukile, efengi lioku linga ukahonga lomãla li kasi oku livokiya calua. Omo liaco, kua siata oku sandekiwa ovipama vimue oco vi kuatise olonjali oku teyuila omãla vavo kovituwa viaco ka via sungulukile. d

28. (a) Ndomo ca lekisiwa vocinjonde conembele Esekiele a kuata, nye tu kisikiwa oku linga nda tu yongola oku kuama efendelo liocili? (b) Nye wa nõlapo oku linga?

²⁸ Ka tu sanjuka hẽ poku limbuka ndomo Kristu a kasi oku amamako oku yelisa olondonge viaye, loku vi longisa oco vi sumbile olonumbi via Yehova loku vi kapako oco vi va vetiye oku lekisa ovituwa viwa? Sokolola vali ocinjonde Esekiele a kuata catiamẽla konembele. Ove hẽ ivaluka olombundi vinene? Ocili okuti, onembele yaco ka yi lomboloka ocitumãlo cimue ci letiwe, pole onembele yespiritu. Tu tava hẽ okuti ocitumãlo caco cocili muẽle? Ka tu iñila lika vonembele yaco eci tu enda Vonjango Yusoma, poku yulula Embimbiliya, ale poku totola kapito kupange woku kunda. Momo vovina viaco mua kongela ovilinga vi letiwe. Omunu wosi ukuambambe o pondolavo oku linga ovina viaco ndaño okuti ka iñila vonembele ya Yehova. Pole, nda tu linga ovina viaco kuenda tua kapako olonumbi via Yehova vioku liyelisa, loku panga onepa kefendelo lia lipua lutima wetu wosi ceca uvangi wokuti, tua iñila vocitumãlo caco ci kola, loku linga upange watiamẽla kefendelo lia lipua lia Yehova Suku! Olonjanja viosi tu sanjukili ocikele cilikasi tu kuete! Omo liaco, tu amamiko oku linga ovina tu tẽla oco tu sokolole oku kola kua Yehova poku kakatela kolonumbi viaye viesunga!