1. Etthu xeeni aawenhe awe Ezekiyeli enniiriha okhala ootikinihiwa?

NKAHAYA muupuwele wira munoona itthu seiye profeta Ezekiyeli aawenhe awe iseekulu 25 sivinre. Muupuwele ela: Nyuwo munnaattamela etemplo emosa yuulupale, yowaarya ni yowaatta itthu. Nlaikha nimosa noowerya nihoorwa wira niwooniheryeni opuro ola wootikiniha! Nyuwo munniwela ixikatta 7 seiyo sinoopixani vari mikhora miraru. Mikhora iyo nto sinniwiirihani otikinihiwa. Orakama wa anamukattha aya onniphiya imeetru 30. Mpaani mwa empa eyo, muniwoona maguarda. Maripu aya ta miri suulupale sa kororo.​—Ezek. 40:1-4, 10, 14, 16, 22.

2. (a) Entaphulela exeeni etemplo yaawehihiwe Ezekiyeli? (Nwehe-tho enoota.) (b) Exeeni eniixutta ahu voohimya sa mukhora wa etemplo ele?

² Ela yaari yowoonihiwa ya etemplo ya omunepani. Ezekiyeli aahitthokiherya oratteene makhalelo a empa ele, aniphwanyaneya okhuma ekapitulu 40 mpakha 48 ya eliivuru awe. Etemplo ela enithoonyerya marehereryo a Yehova a okokhorela wekeekhai. Wa khula etthu ya empa ele, yookhalana yootaphulela ya okokhorela wahu mahiku ala ookiserya. * Nto sintaphulela exeeni mikhora iye suulupale? Iyo sinnuupuxerya wira ale anikela mmareheryoni a okokhorela wootteela wa Yehova, ahaana otthara malamulo a xariya a Muluku. Nnaamwi ixiri sa enupa ele seiyo saarina ilatarato sa miri sa korooro sitaphulelaka etthu emosaru, ikwaha sikina Biibiliya onnirumeela miri sa korooro ohimyaka exariya. (Esal. 92:13) Ankhi maguarda yaaweherya mpaani anitaphulelani? Moohaaniherya ale ahiniiwelela sooruma sa Muluku annikhoottiheriwa okela opuro ola wooreera, wa okokhorela wa ekeekhai.​—Ezek. 44:9.

3. Xeeni atthareli a Kristu anitthuneya aya olokiheriwa khuta okathi?

³ Moota xeeni eprofesia Ezekiyeli yaakhwanenle aya? Ntoko niwenhe ahu Muru 2 wa eliivuru ela, Yehova aahimuruma Yesu wira aareerihe atthu a Muluku okhuma mwaakha wa 1914 mpakha wanipacerya wa 1919. Niireke oreerihiwa nno waamalenle vaavale? Nnaari! Mwa eseekulu evinre, Kristu aahivikaniha waakiherya malamulo ootteela a Yehova a mweettelo. Tthiri atthareli awe, annivikaniha otthuneya oreerihiwa. Mwaha wa Xeeni? Mwaha woowi Kristu onnaathukumanya atthareli awe waakumihaka elapo ela yootakhala. Nave Satana khonihiya wiimananiha wawe waahapuxerya atthu mwa mweettelo woohiloka. (Mmusome 2 Pedru 2:20-22.) Nrowe niwehe inamuna tthaaru sa moota maKristau eekeekhai anivikaniha aya oreerihiwa. Wanipacerya, ninrowa othokorerya  voohimya sa olokiheriwa wa mweettelo, nuumala-vo, mareheryo anikhaliherya muloko okhala wooloka; ni wanikisa, nnooweha mareheryo a etthoko.

4, 5. Olavilavi xeeni Satana onirumeela awe wira aawoke atthu a Muluku?

⁴ Okhala wene atthu a Yehova, onnaasivela okhalana mweettelo wooloka. Tivonto vanitthara aya saana malakiheryo voohimya sa mwaha owo. Nrowe niwehe matakiheryo vakhaani.

⁵ Orupihana Woohiloka. Yehova ohaavaha apinaatamu enoka wira atthu athelanne erumeeleke oratteene ni wooreera. Satana vannimusivela ohonona yoovaha ela yooloka khiyawiiriha atthu orumeela mwa enamuna yoohiirya. Nave owo onnirumeela etthu ela wira oweehererye atthu a Yehova wira apakeke itthu sinimunanara Muluku. Satana aahirumeela enamuna eyo ni khikumiherya ehasara yuulupale mmahiku a Balaamu. Nave owo onnirumeela-tho enamuna eyo vanceene mahiku ala ookiserya.​—Moth. 25:1-3, 9; Wis. 2:14.

6. Moolumo xeeni a wiiwanana yaakumiheriwe ni erevista Watch Tower (Owehaweha), nto yaarumeeliwa sai, ni xeeni ahalaka ohiiwa orumeeliwa? (Nwehe-tho enoota.)

⁶ Erevista Watch Tower (Owehaweha) 15 ya Junyo, 1908, ephavelaka owanana miteko iyo sa Satana, yaahikumiherya moolumo a wiiwanana yaahimya so: “Khula okathi ni khula opuro, kinrowa ottharaka mweettelo wooloka voohimya sa orupihana alopwanaru wala athiyanaru hata kiryeene owaani mekhaka wala opuro mukina”. * Nnaamwi mwiiwanano ole waari moolumo paahi, anamunceene yaahilepa masina aya wira akumiheriwe murevistani Zion’s Watch Tower (Owehaweha) wira yanaakhulela mwiiwanano ole”. Iyaakha sinceene muhoolo mwaya, vaahooneya wira nnaamwi mwiiwanano ole, waakhalihenrye anamunceene a okathi ole, akina yoona okhala ntoko yoolema paahi; nto waahihiwa orumeeliwa. Masi, miruku sa mweettelo wooloka saarina aya saanivareliwa muteko khula okathi.

7. Eyaakha ya 1935, erevista The Watchtower (Owehaweha) yaahimmye muxankiho xeeni ni miruku xeeni yaalipihenrye aya?

⁷ Satana aanivikaniha waatuphela atthu a Muluku. Erevista The Watchtower (Owehaweha) 1 ya Março, 1935, yaahilavula moolipiherya muxankiho muulupale waarina aya atthu a Muluku. Atthu akina yuupuwela wira yaarowakaru muteko woolaleerya, khiyaatthuneya otthara malakiheryo a Yehova voohimya sa mweettelo wooloka yakhala owaani. Erevista ele moowiiwanyeya yaahihimya so: “Khula mutthu ohaana osuwela wira olaleerya khahiyo tenivekeliwa paahi. Anamoona a Yehova annikuxa nsina nawe, nto khula mutthu ohaana okhalana mweettelo wooloka ntoko mutthu a Yehova ni omwene awe”. Nuumala-vo, mwaha ole aahivaha miruku sooloka voohimya sa ekasamento ni wiisumaaliha; nto eyo yahaakhaliherya atthu a Muluku otthyawa “itthu s’ekhapa”.​—1 aKor. 6:18.

8. Xeeni erevista The Watchtower (Owehaweha) enimakela aya otthokiherya nuulumo na eGriki noowi orupihana woohiloka?

⁸ Mwa iyaakha sivinre niinano, erevista Owehaweha enimakela otthokiherya yootaphulela ya nuulumo na eGriki noowi orupihana woohiloka, eyo piiyo, por·neiʹa. Nuulumo nla khannitaphulela orupihana paahi. Masi, por·neiʹa onihela muhina itthu soovirikana sa mweettelo woohiloka, ntoko ole ohireere wuulaana inupa  sa anamararuwa. Atthareli a Yesu annaakiheriwa wira ehaaphwanye ehasara ya onamuttompe yeeyo yaapahunle atthu anceene mahiku ala.​—Mmusome aÉfeso 4:17-19.

9, 10. (a) Mwaha xeeni voohimya sa mweettelo wooloka waakumiheriwe ni erevista The Watchtower (Owehaweha) mwaakha wa 1935? (b) Moonelo xeeni Biibiliya orina awe voohimya sa owurya wookhalela?

⁹ Ohapaliwa. Erevista Owehaweha 1 ya Março 1935, yaahikumiherya mwaha mukina waalavula sa mweettelo vaavo yaalavula aya so: “Vanooneya wira aakhala atthu anrowa muteko woolaleerya hata ovara miteko sikina sa mmulokoni awunrye ene. Okathi xeeni Biibiliya oneemererya awe owuriwa eviinyu? Niireke vaamureerela owurya eviinyu mpakha ohonona muteko mutthu oninvarela awe Pwiya?”

¹⁰ Waakhuliwa waya waahooniherya moonelo wooloka wa Biibiliya voohimya sa soowurya soohapala. Biibiliya khonikhoottiha owurya eviinyu wala etthu ekina enihapala mooreerela, masi onnikhoottiha moomalela ohapaliwa. (Esal. 104:14, 15; 1 aKor. 6:9, 10) Voohimya sa ovara miteko sa Muluku ohapaliwe ene, arummwa a Muluku akhumme khalai wuupuxeriwa yowiiraneya ya anaawe Aroni, yaawo yaiviwe ni Muluku mwaha woorumeela mooro woohikhalela valtari a Muluku. Moohipisa, mwaha ole onnooniherya etthu yawirinhe alopwana ale opaka etthu yoohireerela, maana Muluku aahivaha nlamulo naakhoottiherya anamukuttho ovara miteko sa Muluku awunrye ene. (Onam. 10:1, 2, 8-11) Avarihelaka muteko malakiheryo awo, atthareli a Yesu olelo-va annisyaka ovara miteko sa Muluku awunrye ene.

11. Xeeni varyaaya mareeliho maalupale atthu a Muluku otthokiheriwa oratteene voohimya sa soowurya soohapala?

¹¹ Mwa iyaakha vakhaani sivinre, atthareli a Kristu annireelihiwa mwaha wa wiiwexexa waya saana mwaha wa ohapaliwa, mukhalelo wa omakelaka owurya ni orumeela mwa enamuna yoohiloka soowurya soohapala. Mwaha wa yoolya ya omunepani enivahiwa okathi wooreerela, anamunceene aahiya mweettelo owo woohiloka ni anneettiha ikumi saya mooreerela. Akina aakhaliheriwa osyaka mixankiho sotheene sinikumiheriwa ni ohapaliwa. Ohikhale mutthu oneemererya soowurya soohapala simpahulaka wala emusi awe, hata eparakha awe ya ovara miteko sa okokhorela wekeekhai wa Yehova.

12. Arumeyi a Kristu yoonela sai omulya soona khalai ahinatthi opacerya mahiku ookiserya?

¹² Omulya Soona. Arumeyi a Kristu, apacenrye khalai omuthanya soona hata mahiku ookiserya ahinatthi opacerya. Mwa iyaakha sinceene sivinre, munna mmosa oowunnuwela, Charles Capen, aahuupuwelela okathi aakumanne awe ni Charles Taze Russell eseekulu 19. Capen, yoowo aarina iyaakha 13 onvikana Charles, vamosa ni annawe araru, yaari ohoolo wa Empa ya Biibiliya wAllegheny, oPennsylvania. Okathi Russell aavira awe ohoolo waya, aahaakoha wira: “Nyuwosa munimpaha soona? Kinimoona wunkha”. Ale yaahaakhulasa wira nnaari. Eyo enooniherya wira ale yaanisuwela moonelo awe mmwaha ole. Erevista the Watch Tower (Owehaweha) 1 ya Agosto 1895, munna Russell aahitthokiherya masu ari va 2 aKorinto 7:1 ariki: “Miyo nkinoona wira mutthu onrowa onvuwiha Muluku, ophwanya mureerelo awe wala, mureerelo wa maKristau makina akhala wira onnimulya soona. . . . Hiyo  khannaamini wira Pwiyahu anwerya wunkha mwiixi wa soona wala ohela etthu ekina yoohiirya mwaano mwawe”.

13. Malakiheryo xeeni voohimya sa mweettelo wooloka yaakumiheriwe mwaakha wa 1973?

¹³ Mwaakha wa 1935, erevista The Watchtower (Owehaweha) yaahimuhimya soona okhala “makukhu oonanara”; nto yaanihimya wira khuuvo mutthu onithanla omukhuura wala ompaha soona, oneemereriwa orumeela oBetheli, wala ovara miteko sikina sa nikhuuru nootthokiheya na Yehova ntoko pioneero, wala mutokweene ooweetteetta. Mwaakha wa 1973, yaahiruuhiwa malakiheryo makina voohimya sa mweettelo. Erevista Owehaweha 1 ya Junyo yaahitthokiherya wira khuuvo Namoona aarowa wooniwa okhala mutthu ooloka mmulokoni, orina ene yoolema eyo yoowiiva, yoopahula, ni ehinooniherya niphento. Atthu yaale yaakhootta omuttharuwa omulya soona yaahaana okumihiwa mmulokoni. * Kristu aahivikaniha waareeriha atthareli awe mwa enamuna ekina.

14. Tuuvi okhanle moonelo wa Muluku voohimya sa ephome ni orumeeliwa ephome wira alooliwe aretta, nto wuulaanale moota xeeni?

¹⁴ Ovarihela muteko ephome moohiloka. Okhuma mahiku a Nowe, Muluku aahitikitherya nlamulo noowi olya ephome etthu yootakhala. Owo aahilipiherya moonelo owo mwa Nlamulo aavanhe awe nloko na Isarayeli; nave moolikanasa aahivaha malakiheryo muloko wa eKristau wira ‘ehilyiweké ephome’. (Mit. 15:20, 29; Maph.9:4; Onam. 7:26) Moohaaniherya, Satana oophwanya inamuna sa owiiriha atthu ohiiwelela nlamulo nla na Muluku. Mameediku apacenrye osoma inamuna sa moota wowaahelela ephome atthu eseekulu 19, masi nuumala osuwela enamuna eyo, mwiirelo owo ohuulaana. Mwaakha wa 1937, yaahipacerya osukiwa ni otthukumanyiwa ephome; nave Ekhotto ya Nenli ya Olumwenku Wotheene yaahitepiha wuulaaniha oheleliwa ephome atthu. Vano, oheleliwa ephome ohuulaana olumwenku wotheene.

15, 16. (a) Anamoona a Yehova anoonela sai mwaha wa oheleliwa ephome? (b) Mikhaliheryo xeeni avahiwe aya atthareli a Kristu voohimya sa ephome ni inamuna sa olooliwa sihinirumeela ephome, nto exeeni ekhumelenle?

¹⁵ Ohinatthi ophiya mwaakha wa1944, erevista The Watchtower (Owehaweha) yaahooniherya wira oheleliwa ephome waari enamuna ekina ya olya ephome. Mwaakha waattharelana, ekeekhai eyo ya mBiibiliyani yaahilipiheriwa ni wiiwanyeihiwa saana. Mwaakha wa 1951, yaahikumiheriwa elista ya makoho ni waakhuliwa waya wira yaakhaliherye atthu a Muluku ovaanela ni mameediku. Olumwenku wotheene, atthareli a Kristu, moolipa murima yaanittharihela malakiheryo awo, nnaamwi ikwaha sinceene yahaaxiwa, olupatthiwa hata onyokhiwa. Masi Kristu aahivikaniha okhaliherya nikhuuru nawe. Saahikumiheriwa ibroxura ni myaha soovirikana soolokiheriwa saana.

¹⁶ Mwaakha wa 1979, axitokweene akina yaahipacerya oxekurya ixipitaali wira yaakhaliherye mameediku wiiwexexa oratteene moonelo ahu, mathowa a Biibiliya anniiriha okhootta ephome, ni waaleela inamuna sikina sa olooliwa sihinihela muhina ephome. Mwaakha wa 1980, axitokweene a ipooma 39 sa wEstados Unidos yaahiixuttihiwa saana moota woovara muteko ola. Nikhuuru Noolamulela naaheemererya wira sipakiwe Igrupu sa Axitokweene Sinilavula  ni Ixipitaali olumwenku wotheene. Niireke wiimananiha iwo wookumiherya mireerelo? Olelo-va, atthu anceene anivara oxipitaali, waahela muhina mameediku, masirurgiau, anestesiologista, annaakhulela waaloola Anamoona attittimihaka yoothanla ahu ya oheemererya oheleliwa ephome. Khula nihiku sinimuncerereya ixipitaali sineemererya waaloola atthu ahirumeelaka ephome, ni sikina sinnihimya wira ohirumeela ephome tekhanle enamuna yoolokexa ya olooliwa ekhanle. Niireke khamunoona okhala vookuxa murima woona moota Yesu onaakhapelela awe atthareli awe wira ahipahuliwe ni Satana?​—Mmusome aÉfeso 5:25-27.

17. Ninrowa wooniherya sai wira ninnivaha efaita enamuna Kristu enaalokiherya awe atthareli awe?

¹⁷ Niikoheke so: ‘Kiireke kinnivaha efaita enamuna Kristu onaareeriha awe atthareli awe wira avarexexe malamulo a Yehova voohimya sa mweettelo?’ Vakhala wira ti siiso, nrowe nuupuweleke khula okathi wira Satana oniphavela onihapuxa wira nihiye omutthara Yehova ni Yesu vaavo owo onihonona awe ottittimiha wahu malamulo a Muluku a mweettelo wooloka. Nikhuuru nootthokiheya na Yehova nimmakela onivaha soowuupuxerya ni soolopola soophenta wira nisyakeke inamuna soohiloka sa olumwenku ola. Nto nivikanihe wiiwelela miruku iyo sookhaliherya.​—Mir. 19:20.

18. Voohimya sa atthu ale anilakelela ohiya weettela malamulo a Muluku, ennuupuxerya exeeni etemplo yoonihiwe Ezekiyeli?

¹⁸ Enamuna ya nenli ya oreerihiwa wa atthu a Muluku enihela muhina itthu sipakiwe wira muloko okhaleke ooloka. Mooriipiha murima, atthu akina khaneemererya malamulo a Yehova a mweettelo wala wiivahererya wa Muluku moororomeleya attharaka soothanla sawe. Akina muhoolo mwaya annirukunuxa murima aya nto moolakela khiyakhootta malamulo a Muluku. Nto aniirihiwa exeeni atthu siiso? Hiyo ninniphwanya waakhula waya mwa yowoonihiwa ya Ezekiyeli voohimya sa etemplo ya omunepani yeele eromoliwe wanipacerya wa muru ola. Nyuwo munnuupuwela mikhora saya. Wa khula mpantta waahuliwa mukhora yaahikhala maguarda. Maguarda ale yaanaakiherya etemplo, woonasa wene yaakhoottiheryaka okela mpaani mme atthu “òhìnnuwihiwa” vamurimani vaya. (Ezek. 44:9) Eyo enninuupuxerya wira okokhorela wa ekeekhai ti eparakha enivahiwa atthu aniimananiha wiiwelela malamulo ooloka a Yehova a mweettelo. Nave, eparakha ya okhala vamosa ni maKristau oororomeleya mookokhorelani khanivahiwa atthu otheene olelo-va.

19, 20. (a) Moota xeeni Kristu, vakhaani-vakhaani olokihenrye awe enamuna yaakhapeleliwa aya atthu yaapaka itampi mmulokoni? (b) Mathowa xeeni mararu ammwiiriha mutthu ohinttharuwa okumihiwa mmulokoni?

¹⁹ Mwaakha wa 1892, erevista Watch Tower (Owehaweha) yaahihimya wira “nookhalana muritti wa waakumiha (yaale aniihimya okhala maKristau) masi mooluluwanya hata moohiluluwanya anikhootta wira Yesu ohiivahererya wira onoopole otheene ahu”. (Mmusome 2 Yohani 10.) Mwaakha wa 1904, eliivuru The New Creation (Yoopattuxiwa Esya) yaahihimya wira atthu yaathipelela opaka itthu soohiloka toowoopiha okhala wira anoowerya opahula muloko. Okhuma okathi ole, muloko wotheene waarowa opakaka ele yaitthaniwa “otokosa wa mukerexa” wira ewehe itampi suulupale. Masi waanithowa okathi woopaka eyo. Mwaakha wa 1944, erevista The Watchtower (Owehaweha) yaahooniherya wira anna arina miritti mmulokoni, ti yaarowa otokosaka soottheka iyo suulupale. Eyaakha ya 1952, mwiirelo wa Biibiliya wa ophuka milattu, waahikumiheriwa murevistani Owehaweha ottittimiheryaka etthu yiiriha okumihiwaka atthu oohittharuwa, eyo piiyo, wiiriha muloko okhala wooloka.

²⁰ Mwa iyaakha soottharelana, Kristu ohaakhaliherya atthareli awe wiiwexexa ni olokiherya enamuna ya ophuka itampi suulupale. Axitokweene a eKristau, anniixuttihiwa moota woophuka myaha amutakihaka Yehova yoowo orina exariya ni othunku. Olelo-va ninnoona mathowa mararu, aniiriha okumihiwaka mmulokoni atthu ahinttharuwa: (1) wira nsina na Yehova nihiveehiweke, (2) waakiherya muloko wira ohipahuliwe ni itampi suulupale, ni (3) waakhaliherya ale atthenke ottharuwa itampi saya.

21. Mwa enamuna xeeni okumihiwa ale ahinittharuwa woonihenrye aya okhala mareeliho wa atthu a Muluku?

²¹ Niireke nyuwo munnoona marehereryo a waakumiha mmulokoni anamattheka okhala mareeliho wa atthareli a Kristu olelo-va? Wisarayeli wa khalai, atthu yaapaka itthu sootakhala yaaniwerya ohapuxa nloko notheene; ikwaha sikina atthu anceene yamphenta Yehova ni yaaphavela opaka itthu sooloka. Ti maana  aya, nloko nle naaniruwaniha nsina na Yehova; wanikisa nloko nle naahinyanyaliwa ni Muluku. (Yer. 7:23-28) Masi olelo, Yehova ori ni nloko na alopwana ni athiyana omunepani. Okhala wira atthu anipaka itthu sootakhala annoomoliwa mmulokoni, nto khaneemereriwa okhala ikaruma sa Satana, seiyo sinihonona muloko wooloka. Enamuna eyo khaniwerya ohonona itthu sinceene. Hiyo ninnilipiheriwa okhaliheriwa ni Yehova. Muupuwele yoolaiherya ela ya Yehova eni: “Iyuma sothene sipakeliwe wolupatthani khasinvara-tho muteko”. (Yes. 54:17) Niireke nyuwo munnaakhaliherya axitokweene, yaale arina muritti muulupale wa ophuka myaha mmulokoni?

22, 23. Xeeni vanaaxukhurela ahu maKristau makhwiihu yaale yaakhala wanipacerya wa eseekulu 20, masi, etthu xeeni enooniherya wira yaahaana okhala a miruku mmyaha sa emusi?

²² Enamuna ya neeraru yeeyo atthareli a Kristu aniphwanya aya mureerelo wa oreerihiwa ti ekasamento ni okumi wa vatthokoni. Niireke moonelo ahu voohimya sa okumi wa vatthokoni wooreerihiwa? Aayo. Mwa ntakiheryo, vaavo vanisoma ahu voohimya sa arumeyi a Muluku a wanipacerya wa eseekulu 20, hiyo ninnitikinihiwa mwaha wa munepa aya wowiivahererya. Ninnaaxukhurela vanceene mwaha wa opweha waya muteko wa Muluku ohoolo wa itthu sotheene mweekumini mwaya. Masi, okathi omosaru, ninnoona wira waanitthuneya okhalana moonelo wooloka. Moota xeeni?

²³ Okathi ole anna anceene yaale yaavara miteko sa orummwa wa Muluku, hata axitokweene oweetteetta yaanikhuma vatthokoni vaya khiyaviriha myeeri sinceene ahitthinke.[34] Ekasamento yaanikhoottihiwa mootepana ovikana ele Biibiliya onihimya awe, nave khisaavahiwa miruku sinceene saalipiha ikasamento sa maKristau.[35] Niireke makhalelo awo aakhala eriyari ya atthareli a Kristu olelo-va? Nnaari!

24. Moota xeeni Kristu waakhalihenrye awe atthu awe oororomeleya okhalana moonelo wooloka voohimya sa ekasamento ni emusi?

²⁴ Olelo-va okhalana miritti mmulokoni khoniranttela miteko sa etthoko awe. (Mmusome 1 Timotheyo 5:8.) Ohiya-vo, Kristu onnaakhaliherya atthareli awe oororomeleya wira yaakhele miruku sooloka sinikumihiwa mBiibiliyani voohimya sa ekumi ya vatthokoni. (aÉf. 3:14, 15) Mwaakha wa 1978, yaahikumiheriwa eliivuru eni Making Your Family Life Happy (Mwiirihe Okumi Anyu wa Vatthokoni Okhala Woohakalaliha). Nuuvira iyaakha 18, yaahikumiheriwa eliivuru eni: Esiiri ya Etthoko Yoohakalala. Nave, erevista Owehaweha ennikumiherya miru sinceene sipakeliwe waakhaliherya anamathelana ovarihela muteko miruku sa mBiibiliyani vatthokoni vaya.

25-27. Moota xeeni sootthuneya sa amiravo a munnuwelo woovirikana sinikhapeleliwa aya mookhalela okhuma khalai mpakha olelo-va?

²⁵ Ankhi amiravo? Mwa iyaakha sinceene, amiravo annakhela nikhaliheryo ninceene. Nikhuuru nootthokiheya na Yehova, okhuma khalai ninnikumiherya itthu sooloka sinaakhaliherya anamwane a munnuwelo woovirikana. Masi khula okathi sinnivirikana mixankiho sinaaphwanya amiravo. Mwa ntakiheryo, mpantta oni: “Estudo Bíblico Juvenil (Yoosoma ya Biibiliya ya Amiravo)”, yaanikumiheriwa ni erevista A Idade de Ouro okhuma 1919-1921.  Nuumala-vo, mwaakha wa 1920, yaahikumiheriwa ebroxura A Idade de Ouro ABC; mwaakha wa 1941 yaahikumiheriwa eliivuru yaitthaniwa Filhos. Okhuma eyaakha ya 1970 mpakha 1980, saahikumiheriwa iliivuru Escute o Grande Instrutor, Sua Juventude​—O Melhor Modo de Usufruí-la, ni Eliivuru Aka ya Miyaha Sa Biibiliya. Eyaakha ya 1982, erevista Despertai!, yaanikumiherya mpantta oni: “Os Jovens Perguntam” yeeyo muhoolo mwaya, yaakumiheriwe ntoko eliivuru eni Os Jovens Perguntam — Respostas Práticas, eyaakha ya 1989.

²⁶ Olelo-va, nookhalana iliivuru piili soolokiheriwa sa Jovens Perguntam. Nave myaha iye khalai saakumiheriwa ni Despertai! vano sinikumiheriwa musaite, jw.org. Hiyo-tho nookhalana eliivuru “Aprenda do Grande Instrutor”. Web saite ahu ookumiherya myaha sinceene sa amiravo ohela muhina Cartões Bíblicos, Actividades de Estudo, sa anamwane a munnuwelo woovirikana aJoogu, iviidiyu, Histórias Bíblicas Ilustradas, vamosa ni sowiixuttiha sa anamwane arina iyaakha 3 wala ahiniphiya-vo. Nto vannooneya wira moonelo wa Yesu khoturukeyale voohimya sa anamwane okhuma okathi  yoole aakunxe awe anamwane mmatatani mwawe eseekulu yoopacerya. (Mar. 10:13-16) Owo oniphavela wira amiravo eriyari ahu aphentiweke ni olyihiwa saana momunepani.

²⁷ Nave, Yesu oniphavela wira anamwane yaakiheriweke voohimya sa itthu sootakhala. Olumwenku ola onootepa otakhala voohimya sa mweettelo, nto ehasara ya orupihiwa anamwane enootepa. Ti maana aya, vakumiheriwe aya malakiheryo oowiiwanyeya wira anamuyari asuweleke waakhapelela anaaya wira ehaaphwanye ehasara eyo. *

28. (a) Moovarihana ni etemplo yoonihiwe Ezekiyeli exeeni enitthuneya wira nimukokhorele Yehova mwa enamuna yooweemerereya? (b) Nto mumphavela olakela opaka exeeni?

²⁸ Khivanoosivelani woona moota Kristu aareerihale awe atthareli awe, ni owiixuttiha wira attittimiheke, yeetteleke, ni attotteleke mureerelo malamulo a Yehova a mweettelo wooloka? Muupuwelele-tho etemplo yeele Ezekiyeli oonale awe. Nyuwo munnuupuwela mikhora saya. Ekeekhai wira etemplo ele, etthu ehinooneya maana ti etemplo ya omunepani. Masi niireke hiyo ninniwerya woona okhala etthu yekeekhai? Hiyo ninnikela mutemplo mmo ohiya paahi okathi yoole onrowa ahu Empa ya Omwene, vanimuhula ahu Biibiliya, wala ninvaha ahu ekhumaala itthoko sa atthu wira nilaleerye. Miteko iyo itthu sowooneya. Hata atthu oowiipaka anoowerya ovara miteko iyo, masi khaniwerya okela etemplo ya Yehova. Masi, akhala wira hiyo ninnivara miteko iyo, neettelaka malamulo a Yehova voohimya sa mweettelo wooloka, ni wiirela mpantta okokhorela wekeekhai ni murima ahu wotheene, nnoowerya okela mpaani mmo, ni orumeela nipuro nootepexa waarya, eyo piiyo, malokiheryo a okokhorela wekeekhai wa Yehova Muluku! Nrowe nivikanihe ovaha efaita eparakha eyo. Nto nivikanihe wiimananiha wooniherya otteela wa Yehova ni ovarexexa malamulo awe a exariya!