1. Ana cici cacikusatutendekasya lung’wanu ni yaŵayiweni Esekiele?

 ANA akapikene wuli yikaŵe kuti asimene ni cakutendekwa mpela ciŵasimene naco jwakulocesya Esekiele yaka 2,500 yipiteyo? Awanicisye kuti akwinjila m’nyumba jakulambilila jekulungwa soni jakusalala mnope, soni akusimana ni lilayika lyamacili lyalikusaka kwalosya wawojo malogo. Ni akukwela masitepe 7 kwawula mwinani kwakuwusimana umo mwa milango jitatu jekulungwa jajipali. Pakwinjila akutenda lung’wanu mnope ni ukawonece wa milangoji, ligongo jili jelewu mamita 30 kwawula mwinani. Pakwenda akuyiwona yipinda ya alonda. Yipilala yakwe ŵayipanganyisye mpela yitela ya mgwalangwa.—Esek. 40:1-4, 10, 14, 16, 22; 41:20.

2. (a) Ana mesomkulola ga nyumba jakulambililaga gakwimila cici? (Alolesoni maloŵe gamwiŵanda.) (b) Ana citulijiganye cici kutyocela ku yindu yayili pa mageti ga nyumba jakulambilila?

² Mesomkulolaga gakwimila nyumba jakulambilila jausimu. Esekiele ŵasasile ya mesomkulolaga pa Esekiele caputala 40 mpaka 48. Nyumbaji jikwimila dongosolo ja Yehofa pakulambila kweswela. Cakutendekwa cilicose cikwete ngopolelo jakwe pakalambile ketu masiku agano. a Ana milango jelewuji jikwimila cici? Milangoji jikusatukumbusya kuti jwalijose jwali mu likuga lya Yehofa akusosekwa kuya ndamo syapenani soni syagoloka sya Mlungu. Nambosoni yitusitusi yakusepa ya yitela ya mgwalangwa yikulosya ciwundo cakulandanaco. Ligongo citela ca mgwalangwa m’Baibulo, ndaŵi sine cikusajimila kugoloka. (Sal. 92:12) Nambi uli pakwamba ya yipinda ya alonda? Yipindayi yikulosya pelanguka kuti jwalijose jwakusalepela kuya ndamo sya Mlungu, nganaŵa akundidwe kwinjila mu nyumba jausimu. Nyumbaji jikwimila dongosolo jakalambile keswela kakakusapeleka umi.—Esek. 44:9.

3. Ana ligongo cici ŵakumkuya ŵa Klistu aŵele ali mkusosekwa kuswejesyedwape?

³ Ana mesomkulola ga Esekiele gakwanilicikwe camtuli? Mpela mwatwayiwonele mu mtwe 2 m’bukuji, Yehofa ŵamkamulicisye masengo Klistu pakwaswejesya ŵandu ŵakwe mu yakutendekwa yapajika kutyocela mu 1914 mpaka 1919. Ana kuswejesyaku kwamalile papopo? Iyayi, ligongo mkati mwa yaka 100 yayipiteyi, Klistu aŵele ali mkulolecesya kuti ndamo syeswela sya Yehofa ngasikusakasidwa. Ana ligongo cici ŵakumkuya ŵakwe ŵasosekwe kupitilisya kuswejesyedwa? Ligongo lyakuti Klistu aŵele mkwasonganganya ŵakumkuya ŵakwe kutyocela m’cilambo cakusakalaci, soni Satana akupitilisya kulingalinga kuti ŵandu ŵa Mlungu awujile ku ndamo syakusakala. (Aŵalanje 2 Petulo 2:20-22.) Kwende tulole mbali sitatu syele Aklistu ŵasyesyene aŵele mkuswejesyedwa. Candanda,  citulole mbali jakuswejesyedwa mu ndamo, kaneko citulole yayikusatendekwa kuti mpingo uŵe weswela, soni kaneko dongosolo ja liŵasa.

4, 5. Ana Satana aŵele ali mkukamulicisya masengo litala lyapi, soni paŵele yakuyicisya yamtuli?

⁴ Ŵandu ŵa Yehofa aŵele ŵakusacilila kukola ndamo syagoloka kapena kuti syambone. Mwamti aŵele ali mkukuya malamusi gakupikanika cenene pa nganiji. Kwende tulole yisyasyo yakuŵalanjikape.

⁵ Cikululu. Yehofa ŵapelece mtuka wakugonana kwa ŵandu ŵalombanepe kuŵa cindu ceswela soni cakusangalasya. Satana ajonasile mtuka wapenaniwu mwakwatendekasya ŵandu kuti agambeje kugonana mwacisawawa ni cakulinga cakwakopa ŵandu ŵa Yehofa kuti alece kumtumicila. Satana ŵakamulicisye masengo litalali mu ndaŵi ja Balamu, mwamti ŵandu ŵajinji ŵawile. Jwalakwe akukamulicisya mnope masengo litalali m’masiku getu gano kupundana ni kala kose.—Num. 25:1-3, 9; Ciw. 2:14.

6. Ana mu Sanja ja Mlonda, mwaliji mwana cilanga camtuli? (b) Ana cakamulaga masengo camtuli, soni ligongo cici calesile kukamula masengo? (Alolesoni maloŵe gamwiŵanda.)

⁶ Pakusaka kulimbana ni nganisyo sya Satanasi, Sanja ja Mlonda ja June 15, 1908, jasasile ya cilanga cicapwatice maloŵe gakuti, “Ndaŵi jilijose, cindendeje yindu mwakuŵajilwa ni ŵandu ŵanganaŵa acalume kapena acakongwe acimjangu pandili pa malo gangawonecela soni gakuwonecela.” b Atamose kuti cilangaci nganiciŵa lilamusi, nambope ŵandu ŵajinji ŵacikamulicisyaga masengo, mwamti ŵalembesye mena gawo soni ŵagawandisye mu magasini ja Zion’s Watch Tower. Atamose kuti cilangaci cakamucisyaga pandaŵijo, nambope kaneko ŵandu ŵakuyaga cilangaci mwamwambo. M’yoyo, ŵalesile kucikamulicisya masengo. Nambope ndamo syapenani syacasalaga cilangaci syajendelecelepe kukamula masengo.

7. Ana mu 1935, Sanja ja Mlonda jasasile yacakusawusya capi, soni jagombelecesye ciwundo capi?

⁷ Nambope Satana ŵajendelecele kamulicisya masengo cikululu mpela litala lyakwasokonacisya ŵandu ŵa Mlungu. Sanja ja Mlonda ja March 1, 1935, jasasile mwangapita mumbali ya cakusawusya cekulungwa pasikati pa ŵakutumicila ŵa Mlungu. Ŵandu ŵane ŵaganisyaga kuti naga akujigala mbali mu undumetume wa mumgunda nikuti mpaka atendeje ndamo syakusakala syakutindana ni yakusasaka Yehofa pali kwajika. Sanja ja Mlonda jeleji jasasile mwangasisa kuti, “Jwalijose akusosekwa kumbucila kuti kulalicilape nganikuŵa kwakwanila. Mboni sya Yehofa sikusamjimila Yehofa, soni sikwete udindo wakulosya cenene kuti sikusamjimila Jwalakwe ni Ucimwene wakwe.” Pakwakamucisya ŵandu ŵa Mlungu “kusitila ndamo sya cikululu,” nganiji japelece camuko cakupikanika cenene pakwamba ya ulombela soni kugonana.—1 Akoli. 6:18.

8. Ana ligongo cici Sanja ja Mlonda jagombelecesyaga mwakuwilisyawilisya ngopolelo ja liloŵe lya Cigiliki lyacikululu?

⁸ Mu yaka yapacangakaŵapa, Sanja ja Mlonda jiŵele mkusala mwakuwilisyawilisya kagopolele kakuŵajilwa ka liloŵe lya cikululu lyakusimanikwa m’Malemba ga Cigiliki, lyakuti por·neiʹa. Liloŵeli ngalikusagamba kugopolela ya kugonanape. Nambo likusapwatikapo yitendo yejinji yakusakala yakwaya cikululu, yayikusatendekwa m’nyumba sya mahule. M’yoyo, ŵakumkuya ŵa Klistu aŵele ali mkuŵambala yitendo yagonana mwakulemweceka, yayiwandile mnope pacilambopa masiku agano.—Aŵalanje Aefeso 4:17-19.

9, 10. (a) Ana Sanja ja Mlonda jasasile ya ndamo japi mu 1935? (b) Ana Baibulo jikusajiganya yamtuli pangani jakumwa ukana?

 ⁹ Kumwa mnope ukana. Sanja ja Mlonda ja March 1, 1935, jasasile kuti, “Yikuwoneka kuti ŵane akulalicilaga soni kutenda maundumetume gane ga m’likuga ali amwele ukana. Ana Baibulo jikusajiticisya kumwa ukana payakutendekwa yapi? Ana yili yakuŵajilwa kuti mundu amwe ukana mpaka kwika pakusokonasya undumetume wakwe mu likuga lya Mlungu?”

¹⁰ Maloŵe ga Mlungu gakusajanga yiwusyoyi mwakulosya kuti tukusosekwa kuwuwonaga ukana mwakuŵajilwa. Baibulo jangalekasya kumwa ukana mwakuŵajilwa, nambo jikusalekasya kukolelwa. (Sal. 104:14, 15; 1 Akoli. 6:9, 10) Pangani jakutenda undumetume ali amwele ukana, ŵakutumicila ŵa Mlungu aŵele ali mkwakumbusya ya ngani ja ŵanace ŵaŵili ŵa Aloni. Ŵanaceŵa ŵawulajidwe ni Mlungu ligongo lyakupeleka mbopesi pakukamulicisya masengo moto wangaŵajilwa. Panyuma pa yakutendekwayi, nganiji jalosisye yiyatendekasisye ŵanace ŵa Aloniŵa kuti atende yakulemwecekayi. Mlungu ŵapelece lilamusi lyakwalekasya ŵambopesi kumwa ukana pakutenda undumetume wawo. (Lef. 10:1, 2, 8-11) Pakujigalila ciwundoci, ŵakumkuya ŵa Klistu masiku agano akusaŵambala mnope kutenda undumetume ali amwele ukana.

11. Ana ligongo cici mpaka tuŵecete kuti ŵandu ŵa Mlungu apatile majali ligongo lyakumanyilila kogoya kwa kumwa mnope ukana?

¹¹ Mu yaka yapacangakaŵapa, ŵakumkuya ŵa Klistu amanyilile mnope yakogoya kwa kumwa mnope ukana, yayikupwatika kukolelwa, soni cisyoŵe cakusaka kutenda cilicose ali amwele ukana. Tukusayamicila cakulya causimu ca pandaŵi jakwe catukusapocela. Cakulyaci cakamucisye ŵajinji kumalana ni cisyoŵe cakumwa mnope ukana soni cakamucisye kukola mtima wakulilekasya. Cakulya causimuci cakamucisye ŵane kuti aŵambale yakusawusya yayikusayika ligongo lya kumwa ukana. Tukakunda kuti kumwa ukana mwakulemweceka kututyocesye ucimbicimbi wetu soni wa liŵasa lyetu, soni mnopemnope upile wetu wakumlambila Yehofa mwakuŵajilwa.

12. Ana ŵakutumicila ŵa Klistu ŵakuwonaga wuli kukamulicisya masengo sona mu yaka ya munyumamo masiku gambesi mkanigatande?

¹² Kukamulicisya masengo sona. Ŵakutumicila ŵa Klistu ŵakuweni kala kusosekwa kwa kuleka kukamulicisya masengo sona masiku gambesi mkanigatande. Yaka yejinji munyumamo, m’bale jwacikulile, Charles Capen, akukumbucila yayatendekwe ali asimene ni Charles Taze Russell pandaŵi jandanda cakumbesi kwa caka ca 1900. Pandaŵiji, Capen jwakwete yaka 13. Jwalakwe yalumo ni abale acimjakwe ŵatatu, ŵaliji m’masitepe mkati mwa nyumba jaŵajikolangaga kuti Nyumba ja Baibulo ku Allegheny, Pennsylvania. Russell paŵapitaga pamalopa, ŵawusisye kuti, “Ana jemanja anyamata mkwembileje eti? Ngupikana liwungo lya sona.” Anyamataŵa ŵamsimicisye kuti nganakwembaga. Mwangakayicila jemanjaji ŵasimanyi nganisyo sya M’baleju pangani ja sona. Mu Sanja ja Mlonda ja August 1, 1895, M’bale Russell, pakugombelecesya lilemba lya 2 Akolinto 7:1 jwatite, “Nguyiwona kuti kukwemba sona mwalitala lililyose nganikuŵa kucimbicisye Mlungu kapena kumkamucisya Mklistu. . . . Nganituŵa tuganisisye kuti Ambuje mpaka apikanice ni liwungo lya sona kapena kuŵika cindu cilicose cakonanga mkamwa mwawo.”

13. Ana mu 1973, ŵakutumicila ŵa Mlungu ŵapatile cikamucisyo camtuli pa ngani ja sona?

 ¹³ Mu 1935, Sanja ja Mlonda jakolasile sona kuŵa “cakumela cakusakala” soni jasasile kuti jwalijose jwasagwile kuti alye kapena kwemba sona nganaŵa ajendelecele kutama m’liŵasa lya Beteli kapena kutumicila mpela jwakwimila likuga lya Mlungu mu undumetume wa upayiniya kapena wakulolela mkuli. Mu 1973, ŵandu ŵapocelesoni cikamucisyo panganiji. M’cakaci, Sanja ja Mlonda ja June 1 jasasile kuti pangali Jwamboni jwampaka aŵe jwandamo jambone mu mpingo kwineku ali mkutenda ndamo jakonanga, jakuwulaga soni jangali cinonyeloji. Wosope ŵaŵakanile kuleka kukamulicisya masengo sona ŵasosekwagwa kutyosyedwa mumpingo. c Klistu ŵaswejesyesoni ŵandu m’litala line.

14. Ana Maloŵe ga Mlungu gakusati cici pangani ja miyasi, soni ana mteto wakumtaga mundu miyasi wawandile camtuli?

¹⁴ Kamulicisya masengo miyasi mwakulemweceka. Mundaŵi ja Nowa, Mlungu ŵasasile kuti kuli kulemwa kulya miyasi. Jwalakwe jwagombolecesye nganisyo syakwesi mu Cilamusi caŵapele Aisalaeli. Mlungu ŵasalilesoni ŵandu ŵaŵaliji mumpingo wa Ciklistu kuti ‘akalya. . . miyasi.’ (Mase. 15:20, 29; Gen. 9:4; Lef. 7:26) Ni ligongo lyakwe yili yangasimonjesya kuti Satana apatile litala lyakwatendekasya ŵandu kuti akapikanila lilamusi lya Mlunguli masiku agano. Mu yaka ya m’ma 1800, madokotala galinjilile kamulicisya masengo litala lyakumtaga mundu miyasi mpela mtela. Ndamo jakamulicisya masengo miyasi jawandile mnope madokotala gali gakopocele kuti pana mbali syakulekanganalekangana sya miyasi. Mu 1937, ŵandu ŵatandite kusonganganya miyasi nikujisungaga m’malo gakusunjila miyasi. Mwamti Ngondo Jaŵili ja Pacilambo Cosope jatendekasisye kuti kwataga miyasi ŵakulwala kujawule pasogolo. Mwangacelewa kwataga ŵakulwala miyasi kwawandile mnope pacilambo cosope.

15, 16. (a) Ana Ŵamboni sya Yehofa ŵakuwonaga wuli kutajidwa miyasi? (b) Ana ŵakumkuya wa Klistu ŵapatile cikamucisyo camtuli pangani ja kutajidwa miyasi soni cikamucisyo camtela cangakamulicisya masengo miyasi? (c) Soni yakuyicisya yakwe yiŵele yamtuli?

¹⁵ Kutandila m’caka ca 1944, Sanja ja Mlonda jasasile kuti kutajidwa miyasi lili litala linesoni lyakulila miyasiji. M’caka cakuyicisya, ciwundo ca m’Malembaci ŵacigombolecesye soni kucisala mwakupikanika cenene. Mu 1951, kupitila mu Sanja ja Mlonda, likuga lyakopwesye ndandanda ja yiwusyo ni kwanga kwakwe jakwakamucisya ŵandu ŵa Mlungu pa yampaka atende pasimene ni madokotala. Pacilambo cosope, ŵakumkuya ŵa Klistu ŵakulupicika ŵalimbaga mtima paŵanyosyaga atamose paŵalagasyaga kwene ligongo lyakana kutajidwa miyasi. Nambope Klistu ŵapitilisye kulilongolela likuga lyakwe kuti lipeleceje cikamucisyo cakusosecela panganiji. Mwamti pakopwece tumabuku soni ngani syakulondesya cenene ya nganiji.

¹⁶ M’caka ca 1979, acakulungwa ŵane ŵa mumpingo ŵatandite kwendela m’yipatala. Ŵatesile yeleyi pakusaka kugakamucisya madokotala kupikanicisya cenene nganisyo syetu. Nambosoni kugakamucisya madokotala kumanyilila magongo ga m’Malemba gatukusakanila miyasi. Ligongo line lyaliji kugakamucisya madokotala kumanyilila matala gane gampaka akamulicisye masengo m’malo mwa miyasi. Mu 1980, acakulungwa ŵa mumpingo ŵakutyocela m’misinda 39, m’cilambo ca United States, ŵapocele majiganyo gapajika pa masengoga. Kaneko, Likuga Lyakulongolela lyajiticisye yakutamilikasya  Makomiti Gakuŵecetana ni Ŵacipatala pacilambo cosope capasi. Masiku agano madokotala gamajinji gakusatenda yindu mwakamulana ni Mboni sya Yehofa pakucimbicisya yakusasagula pangani jakuŵambala miyasi. Yipatala yejinji yikusapeleka cikamucisyo cangakamulicisya masengo miyasi soni nicakusaciwona kuŵa capenani mnope. Kusala yisyene yili yakusangalasya kuganicisya ya matala gakamulicisye masengo Yesu pakwacenjela ŵakumkuya ŵakwe kuti Satana akasakasya.—Aŵalanje Aefeso 5:25-27.

17. Ana mpaka tulosye camtuli kuyamicila litala lyaŵele ali mkulikamulicisya masengo Klistu pakwaswejesya ŵakumkuya ŵakwe?

¹⁷ M’yoyo mpaka yiŵe cenene kuliwusya kuti, ‘Ana tukusayamicila litala lyaŵele ali mkulikamulicisya masengo Klistu pakwaswejesya ŵakumkuya ŵakwe, mwakutujiganya kuti tukuyeje yiwundo yandamo syapenani sya Yehofa?’ Naga tukusayamicila, kwende tukaliŵalila kuti Satana akulingalinga kuti atulekanganye ni Yehofa soni Yesu mwakututendekasya kuti tukacimbicisyaga yiwundo ya ndamo syambone ya Mlungu. Pakusaka kuti akatulekanganya, likuga lya Mlungu mwacinonyelo likupitilisya kutukalamusya soni kutukumbusya ya ndamo syakusakala syasili m’cilamboci. Kwende tuŵe mesope soni tukuyeje yindu yakusatusalilayi.—Mis. 19:20.

18. Ana mesomkulola ga Esekiele gakusatujiganya cici pa kwamba ya ŵandu ŵakusajimucila yiwundo ya Mlungu mwamele?

¹⁸ Mbali jaŵili jakusatenda Yehofa pakutuswejesya mundamo jikusapwatikaposoni yayikusatendekwa pakusaka kuti mpingo upitilisye kuŵa weswela. Nambo yakutesya canasa niyakuti, ŵandu mpaka ajiticisye yiwundo ya ndamo syambone sya Yehofa soni kulipeleka kwa jwalakwe nambo ngaŵa wosope ŵakusapitilisya kuya yiwundoyo. Ŵandu ŵane akusacenga soni akusakasaga mwamele yiwundoyi. Ana jemanjaji patesile yeleyi cikusatendekwa cici? Kwende tulole cindu cimpepe kutyocela m’mesomkulola ga Esekiele gatukambilene kundanda kwa mtwewu gagakulosya yampaka yatendecele jemanjaji. Akumbucile ya milango jelewu jila. Pa mlango uliwose pana yipinda ya alonda. Alondaŵa ŵateteyaga nyumba jakulambilila, soni kwalekasya kwinjila “ŵangawumbala mu mtima.” (Esek. 44:9) M’yoyo yili yakupikanika kuti kulambila kweswela uli upile kwa ŵandu ŵakulipeleka kuti atameje mwakuya yiwundo ya Yehofa yandamo syeswela. Yeleyi yikulosya kuti upile wakuŵa mu likuga lya Aklistu masiku agano, nganiwuŵa wa jwalijose.

19, 20. (a) Ana Klistu ŵakamucisye camtuli ŵakumkuya ŵakwe kupata litala lyakuŵajilwa lyakusamalila yakulemwa yekulungwakulungwa? (b) Ana ni magongo gatatu gapi gakumtendekasya mundu jwakutenda yakusakala jwangapitikuka mtima kutyosedwa mumpingo?

¹⁹ Mu 1892, Sanja ja Mlonda jasasile kuti uli “udindo wetu (mpela Aklistu) kwatyosya ŵakukana mwakuwonecela kapena mwangawonecela kuti Klistu ŵalipelece mpela ciwombolo [mtengo wakuŵajilwa] kwa wosope.” (Aŵalanje 2 Yohane 10.) Mu 1904, buku ja Cisungu (The New Creation) jasasile kuti ŵandu ŵakupitilisya kutenda ndamo jakusakala nikuti akuwutendekasya mpingo kuwujila panyuma. Pandaŵiji, mpingo wosope wajigalaga mbali pakusamalila ngani sya yakulemwa yekulungwakulungwa. Nambope dongosolo jeleji jatandite kunandipa. Mu 1944, Sanja ja Mlonda jasasile kuti abale ŵa maudindope ni ŵaŵasosekwaga kukamula masengoga. Mu 1952, Sanja ja Mlonda, jasasile litala lya m’Malemba lyakasamalile ka ngani syakwayana ni ulemwa. Jasasile magongo ga m’Malemba gakutendekasya kuti ŵangapitukuka mtima atyosyedweje mumpingo pakusaka kuti mpingo upitilisye kuŵa weswela.

²⁰ Kutyocela pandaŵiji, Klistu aŵele ali mkwakamucisya ŵakumkuya ŵakwe mwampaka asamalilile ngani sya yakulemwa yekulungwa. Acakulungwa ŵa mumpingo aŵele ali mkulijiganya mwakusamala mwampaka asamalilile mwacilungamo soni mwacanasa ngani syampaka sisace komiti jakwelusya mwakamulana ni nganisyo sya Yehofa. Masiku agano pana magongo gatatu gakumanyika cenene gagakusatendekasya kuti mundu jwatesile cakulemwa cekulungwa jwangapitikuka mtima atyosyedwe mumpingo. Magongoga gali, (1) kuti lina lya Yehofa lijendelecele kuŵa lyeswela. (2) kuwucenjela mpingo ku yakulemwa yekulungwakulungwa, (3) kumtendekasya jwakulemwa kuti apitikuce mtima naga yili yakomboleka.

21. Ana kwatyosya ŵandu ŵangapitikuka mtima mumpingo kuyikasisye camtuli majali kwa ŵandu ŵa Mlungu?

²¹ Kusala yisyene, dongosolo jakwatyosya ŵandu ŵakulemwa ŵangapitikuka mtima jakamucisye mnope ŵakumkuya ŵa Klistu masiku agano. Mundaŵi ja Aisalaeli, ŵandu ŵaŵatendaga yakusakala ŵawusokonasyaga mtunduwo. Camti m’yoyo, ciŵalanjilo ca ŵandu ŵaŵamnonyelega Yehofa soni ŵaŵasakaga kutenda yakuŵajilwa canandipaga.  Yakuyicisya yakwe mtunduwu wasakasyaga lina lya Yehofa mwamti wajasile upile wakuŵa paunasi ni Jwalakwe. (Yel. 7:23-28) Nambo masiku agano, Yehofa ali pasikati pa acalume ni acakongwe ŵakutyocela m’mitundu jakulekanganalekangana ŵasagwile kumtumicila soni kuya malamusi gakwe. Ligongo lyakuti ŵakutenda yakusakala ŵangapitikuka mtima akusatyosyedwa pasikati petu, jemanjaji ngakusakola mpata wakuwusokonasya soni kuwusakasya mpingo mpela yida ya Satana. M’yoyo, yitendo yawoyi ngayikusakola macili. Mpela likuga, kwende tupitilisye kutenda yakuti Yehofa atunonyeleje. Tukumbucileje yaŵatulagwisye Yehofa. Jwalakwe jwatite, “Nambo pangali cida cepanganyidwe ni m’magongo ticicimpweteka m’mwejo.” (Yes. 54:17) Ana tukusitwakamucisya mwakulupicika acakulungwa ŵa mumpingo ŵakusakamula masengo gekulungwa mnope gakusamalila ngani syakwelusya?

22, 23. Ana tukusosekwa kuyamicila yindu yapi yaŵatesile Aklistu ŵakundanda kwa m’ma 1900? (b) Nambope ana ŵasosekwaga kongolela mbali syapi pa ngani ja ulombela?

²² Mbali jatatu jijakamucisye ŵakumkuya ŵa Klistu jili kuswejesyedwa kwakutendekwe mu ulombela soni umi waliŵasa. Ana kapikane ketu pangani ja ulombela kacenjile? Elo kacenjile. Mwacisyasyo, patukusaŵalanga yakwamba ŵakutumicila ŵa Mlungu ŵakundanda kwa yaka ya m’ma 1900, tukusakola lung’wanu soni kusimonga ni msimu wawo wakulipeleka. Tukusayamicila mnope ni yaŵatite pakuŵika undumetume pamalo gandanda kupunda pa yine yosope pa umi wawo. Nambope mpaka tuyiwone mwangasawusya kuti jemanjaji ŵasosekwaga kutenda yindu mwacikatikati. Mwamtuli?

²³ Ndaŵi syejinji abale nganakanaga kupocela ma undumetume gampaka gatendekasye kutalikangana ni maŵasa gawo. Ŵakutumicila ŵa Mlungu ŵasalilidwaga mwamacili kuti ulombela nginiwuŵa wakusosekwa mnope soni ŵasalilaga yeleyi mwakulekangana ni yajikusasala Baibulo. Pandaŵijo ngani syakulimbikasya maŵasa nganisilembedwaga kaŵilikaŵili. Ana mwelemu ni muyiŵelele ni ŵakumkuya Klistu masiku agano? Iyayi.

24. Ana Klistu ŵakamucisye camtuli ŵandu ŵakwe ŵakulupicika kuti awuwoneje ulombela soni maŵasa mwakuŵajilwa?

²⁴ Masiku agano, undumetume ngawukusosekwa kusokonasya udindo wa muliŵasa. (Aŵalanje 1 Timoteo 5:8.) Nambosoni Klistu akulolecesya kuti ŵakumkuya ŵakwe ŵakulupicika akupocela cikamucisyo cakamulana ni Malemba cakwamba ulombela soni umi wa liŵasa. (Aef. 3:14, 15) Mu 1978, pakopwece buku ja mtwe wakuti Kupangitsa Moyo Wanu wa Banja Kukhala Wachimwemwe. Pali pamasile yaka 18, pakopwece buku ja mtwe wakuti Yakamucisya Liŵasa Kuŵa Lyakusangalala. Nambosoni, m’magasini ga Sanja ja Mlonda muŵele muli mkukopoka ngani syakwakamucisya ŵalombane kukamulicisya yiwundo ya m’Malemba mu ulombela wawo.

25-27. Ana likuga liŵele mkukoposya yindu yapi yambone kwa ŵanace ŵa yaka yakulekanganalekangana?

²⁵ Nambi uli pakwamba ya ŵacinyamata? Kwa yaka yejinji, ŵacinyamata aŵele ali mkupocela ngani syakwakamucisya paumi wawo. Likuga lya Yehofa liŵele mkukoposya yindu yambone yakwakamucisya ŵanace ŵayaka yakulekanganalekangana. Pandanda, yeleyi yaliji yamnono nambo sambano yipali yejinji. Mwacisyasyo, ngani jakuti  “Juvenile Bible Study” jijakopokaga mu Ajimuce! kutandila mu 1919 mpaka 1921. Mu 1920 pakopwece kabuku kamtwe wakuti The Golden Age ABC, soni mu 1941 mwakopwece buku jakuti Ŵanace. Mu yaka ya m’ma 1970, mwakopwece mabuku gakuti, Kumamumvetsera Mphunzitsi Wamkulu’yo, Your Youth—Getting the Best out of It, ni Buku Jangu ja Ngani sya m’Baibulo. Mu 1982, ngani sya mtwe wakuti “Zimene Achinyamata Amadzifunsa” syatandite kukopoka. Nganisi syatendekasisye kuti pakopoce buku ja mtwe wakuti Mafunso Achichepere Akufunsa—Mayankho Amene Amathandiza (jele masiku agano jikusamanyika kuti Mayankho a Zimene Achinyamata Amafunsa).

²⁶ Masiku agano tukwete mabuku gaŵili gelinganyesoni ga Zimene Achinyamata Amafunsa, soni ngani sya ŵacinyamatasi sikwendelecela kusimanikwa pa Webusayiti ja jw.org. Tukwetesoni buku ja mtwe wakuti Phunzirani kwa Mphunzitsi Waluso. Pa Webusayiti jetu pana yejinji ya ŵacinyamata. Yeleyi yikupwatikapo makadi gakulosya ŵandu ŵa m’Baibulo, yakutenda pakulijiganya Baibulo ya ŵanace ŵacinandipile ni ŵacikulile, maseŵela gakumtendekasya mwanace kuganisya, mafidiyo, yiwulili yakusala ngani sya m’Baibulo, soni Zimene Ndikuphunzira M’Baibulo syakwajiganya ŵanace ŵangapunda  yaka yitatu. Pelepa yili yakumanyika cenene kuti lung’wanu lwa Yesu lwakwanonyela ŵanace kutandila pandaŵi jaŵanyakwile ŵanace m’miyala mu yaka 100 yandanda nganilucenga. (Mak. 10:13-16) Akusaka kuti ŵanace ŵali pasikati petu alipikaneje kuti akunonyeledwa soni kusamalidwa cenene mwausimu.

²⁷ Yesu ali jwakusacililasoni kwacenjela ŵanace ku yindu yakogoya. M’cilamboci, ndamo sikupitilisya kusakala, nombesoni mlili wa ungapikanila wa ŵanace ukutupilatupilape. M’yoyo, ngani syakupikanika cenene soni syangapita mumbali siŵele sili mkukopoka kuti syakamucisyeje acinangolo kwateteya ŵanace ŵawo ku ndamo syakusakalasi. d

28. (a) Mwakamulana ni mesomkulola ga Esekiele ga nyumba jakulambilila, ana tukusosekwa kutenda cici kuti tupitilisye kuŵa m’nyumba jakulambilila ja Mlungu? (b) Ana wawojo ali ŵakusimicisya kutenda cici?

²⁸ Kusala yisyene yili yakulimbikasya kuyiwona yaŵele mkutenda Yesu pakwaswejesya ŵakumkuya ŵakwe, kwajiganya kuti acimbicisyeje, kukuya, soni kupindula kutyocela ku ndamo syapenani syambone sya Yehofa. Aganicisyesoni ya nyumba ja kulambilila ja m’mesomkulola ga Esekiele. Akumbucile ya milango jelewu. Yili yisyene kuti nyumba jeleji nganijiŵa malo gasyesyene, nambo malo gausimu. Nambope, ana tukugawona mesomkulolaga kuŵa gasyesyene? Tukwinjila m’nyumbaji ngaŵa mwakwamba kwawulape ku Nyumba ja Ucimwene, kuŵalanga Baibulo, kapenasoni gamba kwawula kukulalicila. Yeleyi yili yindu yakuwoneka ni meso yampaka tuyitende. Mundu jwakwamba kulilosya kuti ali jwakulupilila mpaka atendesoni yeleyi atamose kuti nganajinjileje m’nyumba jakulambilila Yehofa. Mpaka tutende yeleyi naga tukutama mwakamulana ni yiwundo ya ndamo sya Yehofa ni kulambilaga Mlungu ni mtima wambone. Patukutenda yeleyi tukusaŵa kuti tujinjile m’nyumba jakulambilila, soni tukusaŵa tuli mkutumicila m’malo geswela mnope gagakwimila yalinganyisye Yehofa Mlungu pakulambila kweswela. Kwendeje tulosyeje kuti tukusayamicila upile welewu. Konjecesya pelepa kwende tupitilisye kutenda yampaka tukombole pakulosya ndamo jeswela ja Yehofa mwakukuya ndamo syakwe syapenani.