1. Xi visión risaca gucuaa Ezequiel.

BIXUIʼLÚ ñápaluʼ privilegiu ni gupa profeta Ezequiel raca biaʼ chupa mil gaayuʼ gayuaa iza. Ñeluʼ ra nuu ti yuʼduʼ roʼ ni nabé ruzaaniʼ. Ora nindaluʼ raqué, ñuuyaluʼ cabeza ti ángel lii. Dxiiñaʼ stiʼ ángel riʼ nga chiné lii para gunibiaʼluʼ yuʼduʼ que. Biuusitu la? gudxíʼbatu gadxe escalón para yendatu ra nuu chonna puertaʼ ngola —o entrada—, cada tobi de laacani nasoo 30 metru. Ra zidíʼditu que ruuyaluʼ nuu cámara (cuartuhuiiniʼ) guiropaʼ laadu ra nuu ti binni ni cayapa ne laaca rihuinni caadxi columna naroʼbaʼ casi yaga ziña (Ezeq. 40:1-4, 10, 14, 16, 22; 41:20).

2. 1) Xii nga templu espiritual (laaca zanda gúʼyaluʼ nota stini). 2) Xii nga zeeda gaca casi ca puertaʼ stiʼ yuʼduʼ, ne xi rusiidini laanu.

² Yuʼduʼ riʼ nga templu espiritual biʼyaʼ Ezequiel lu ti visión. Cumu guníʼ profeta riʼ guiráʼ ni biʼyaʼ la? nga runi, rugaanda relatu stibe dede capítulo 40 hasta capítulo 48 stiʼ libru de Ezequiel ni zeeda lu Biblia. Templu riʼ nga modo maʼ gudixhe Jiobá guni adorárcabe laa. Ne cada tobi de cani bíʼyabe ra templu riʼ laaca rihuinni cani lu adoración ni rudiʼnu Dios lu ca últimu dxi riʼ. * Ca puertaʼ soo stiʼ yuʼduʼ que nga ca norma ni maʼ gudixhe Dios chinanda binni. Xiñee nasoo cani yaʼ. Purtiʼ ca binni ni deruʼ cuzulú cayuni adorar Dios la? naquiiñeʼ gúnicaʼ stipa naroʼbaʼ para guibánicaʼ modo na cani. Laaca ngaca nga ni rusiidiʼ ca columna casi yaga ziña que laanu, purtiʼ stale biaje ruzeeteʼ Biblia ca yaga riʼ ora maʼ caníʼ de guendaruni jneza (Sal. 92:12). Ca cámara que nga adoración nayá ne sicarú ni rudiʼnu Dios. Nga runi, ca binni ni qué runi respetar ca norma stiʼ Dios, qué zanda diʼ chuʼcaʼ ndaaniʼ templu espiritual para guni adorarcaʼ (Ezeq. 44:9).

3. Xiñee naquiiñeʼ gaca purificar ca xpinni Cristu gatigá.

³ Ximodo cayaca cumplir visión stiʼ Ezequiel que yaʼ. Lu capítulo 2 stiʼ libru riʼ, bidúʼyanu xi biʼniʼ Jiobá: biquiiñebe Cristu para biʼniʼ purificarbe xquídxibe en sentidu espiritual dede 1914 hasta ra bizulú 1919. Peru, ñee raqué nga biluxe bisiá Dios laacabe la? Coʼ. Lu ti siglu ni maʼ gudiʼdiʼ hasta ca dxi stinu riʼ, cayacaneruʼ Cristu laanu guidúʼyanu pabiáʼ risaca chinándanu ca norma ni maʼ gudixhe Dios. Ne dede nagasi nga caquiiñeruʼ gaca purificar ca xpinni Cristu. Xiñee yaʼ. Purtiʼ lade binni ni nabiidiʼ en sentidu moral nga gulee Cristu laacabe ne purtiʼ nabé ruquiinde Binidxabaʼ laacabe para guibiguétacabe lu guidxilayú biidiʼ stiʼ (biindaʼ 2 Pedro 2:20-22). Guzéʼtenu chonna ejemplu ra rihuinni ximodo cayuni purificar Jesús ca xpinni  gatigá. Primeru zadúʼyanu ximodo naquiiñeʼ gaca conducta stinu, de racá maʼ zuzéʼtenu xi runi Cristu para cadi gaca biidiʼ xquidxi Dios, ne últimu zadúʼyanu ximodo huayacanebe ca familia.

4, 5. Xi trampa huaquiiñeʼ Binidxabaʼ maʼ raca stale iza, ne xi huabeendube.

⁴ Nabé huayuni xquidxi Jiobá stipa para gaca conducta moral stiʼ jneza ne nayá. Nga runi, cada biaje gusiene Jiobá laacabe caquiiñeʼ gaca conducta stícabe jma galán la? riuuláʼdxicabe ca conseju riʼ ne ruzuubacabe diidxaʼ. Guzéʼtenu caadxi ejemplu.

⁵ Inmoralidad sexual. Dxi bicheelaʼ Jiobá primé hombre ne primé gunaa la? gudixhe gaca relación sexual stiʼ guiráʼ guendaxheelaʼ nayá ne sicarú. Peru maʼ biʼniʼ biidiʼ Binidxabaʼ regalu riʼ ne riquiiñebe ni para gucaabe ca xpinni Jiobá guchee ti guixélecaʼ de Dios. Biquiiñeʼ Binidxabaʼ trampa riʼ para bicaa stale xpinni Dios guchee ca dxi stiʼ Balaam, peru lu ca últimu dxi riʼ nga jma caquiiñeʼ Binidxabaʼ trampa riʼ (Núm. 25:1-3, 9; Apoc. 2:14).

6. Xi voto biree lu revista Watch Tower, ximodo biquiiñeʼ ni, ne xiñee bisaana de iquiiñeʼ ni (laaca zanda gúʼyaluʼ nota).

⁶ Para cadi guiaba ca xpinni Dios lu trampa stiʼ Binidxabaʼ riʼ, biree ti voto para guiráʼ ca cristianu lu revista Watch Tower 15 stiʼ junio iza 1908, ti ndaa de laani na sicaríʼ: «Ladu tiica chaaʼ ne ra tiica chuaaʼ, zuneʼ respetar ti hombre o ti gunaa, zuneʼ ni zacá guiráʼ ora, cásica ora cayuuyaʼ binni naa ne ora guirutiʼ cayuuyaʼ naa». * Neca qué nucaa xquidxi Dios ca hermanu ninándacaʼ ni, stale tu biʼniʼ ni ne laaca guniʼcaʼ guicá lacaʼ lu revista para ganna binni maʼ cayúnicaʼ ni na voto que. Dxandíʼ gucané voto que stale binni, peru ra gudiʼdiʼ iza, biiyaʼ organización stiʼ Jiobá maʼ beeda gaca ni casi ti ritual si para xcaadxi, ngue runi bisaana de iquiiñecabe ni. Peru ca principiu moral risaca ni biquiiñeʼ para guca voto que dede yanna nuu cani.

7. Xi guendanagana bizeeteʼ revista La Torre del Vigía iza 1935, ne xi guniʼni naquiiñeʼ guni ca xpinni Cristu.

⁷ Peru qué nusaana de nuyubi Binidxabaʼ ximodo guniná ca xpinni Dios. Lu ti númeru stiʼ revista La Torre del Vigía ni biree beeu agosto iza 1935, beeda ti tema ni caníʼ de ti guendanagana napa ca xpinni Cristu, ne nayaguieʼ modo bisiene tema que cadi jneza ni cayuni caadxi de laacabe. Caadxi de laacabe riníʼ ique cadi caquiiñepeʼ chinándacaʼ ca norma moral stiʼ Jiobá ora maʼ nuucaʼ stúbicaʼ, purtiʼ si rucheechecaʼ stiidxaʼ Dios. Peru qué nutale revista que diidxaʼ ora guníʼ «caquiiñeruʼ gúnicabe xcaadxi cosa risaca, purtiʼ cadi guendarucheeche si diidxaʼ nga laani». Laaca guníʼ revista que sti cosa: cumu Testigu laanu ne rábinu binni Jiobá nga cuseendaʼ laanu la? «naquiiñeʼ guihuinni dxandíʼ nabáninu modo racalaʼdxiʼ Jiobá ne nuunu pur reinu stiʼ». De raqué la? nayaguieʼ modo bidii revista que caadxi conseju ni caníʼ de guendaxheelaʼ ne moralidad, zaqué nga gucanécabe xquidxi Dios guixeleʼ de inmoralidad sexual (1 Cor. 6:18).

8. Xiñee stale biaje maʼ bizeeteʼ revista Torre stiʼ ni rapa xi guiráʼ significadu napa diidxaʼ ni riquiiñeʼ para inmoralidad sexual lu Escrituras Griegas.

⁸ Lu ca últimu década ni maʼ gudiʼdiʼ hasta nagasi, nabé maʼ stale biaje bizeeteʼ revista Torre stiʼ ni rapa xi guiráʼ significadu napa diidxaʼ pornéia, ni riquiiñeʼ Escrituras Griegas ora maʼ caníʼ de inmoralidad sexual. Qué riníʼsini gapa tuuxa relación sexual né sti binni (coito), sínuque laaca nuu xcaadxi práctica inmoral luni, casi ca cosa yuudxuʼ raca ndaaniʼ ti burdel. Guiráʼ cani maʼ bisiene revista riʼ huayacaneni cani dxandíʼ xpinni Cristu para cadi gaca biidicaʼ casi nuu stale  binni ndaaniʼ Guidxilayú riʼ pur guiráʼ conducta sexual ni cadi jneza nápacaʼ (biindaʼ Efesios 4:17-19).

9, 10. 1) Xi conducta moral nabé risaca bizeeteʼ revista La Torre del Vigía iza 1935. 2) Ximodo gucané Biblia ca hermanu gácacaʼ equilibradu né nisadxuʼniʼ.

⁹ Nisadxuʼniʼ. Revista La Torre del Vigía stiʼ agosto iza 1935 bizeeteʼ de sti conducta moral nabé risaca: «Maʼ bihuinni nuu caadxi hermanu ni rucheeche diidxaʼ ne laaca rúnicaʼ xcaadxi dxiiñaʼ ndaaniʼ organización stiʼ Dios neca maʼ güeʼcaʼ [nisadxuʼniʼ]. Yanna, pora si nga na Stiidxaʼ Dios cadi cuchee binni pa gueʼ vinu yaʼ. Ñee jneza gusaana de guni adorar binni Dios ndaaniʼ organización stiʼ Señor pur gueeda gapa viciu de gueʼ vinu o nisadxuʼniʼ la?».

¹⁰ Biquiiñeʼ revista que conseju ni zeeda lu Stiidxaʼ Dios para gucané ca hermanu gácacaʼ equilibradu né nisadxuʼniʼ. Biblia na zanda gueʼ binni vinu o intiica clase nisadxuʼniʼ, peru guni ni sin tiidisú; ni riníʼ Biblia nga cadi jneza xhudxi binni (Sal. 104:14, 15; 1 Cor. 6:9, 10). Yanna, ñee jneza nga guni binni tobi de ca serviciu sagradu stiʼ pa maʼ güeʼ neca caadxi vinu o nisadxuʼniʼ la? Maʼ raca stale iza nga de rusietenaláʼdxicabe ca xpinni Dios relatu stiʼ ca xiiñiʼ Aarón, biiti Jiobá ca hombre que purtiʼ bizaaquiicaʼ guʼxhuʼ lu altar, neca nánnacaʼ cadi naquiiñeʼ gúnicaʼ ni. Lu xcaadxi versículo stiʼ relatu riʼ, ridúʼyanu gudixhe Dios ti ley: qué zanda diʼ guni ca sacerdote serviciu sagradu sticaʼ pa maʼ güeʼcaʼ vinu o nisadxuʼniʼ. Ni bizéʼtenu riʼ nga racané laanu gánnanu xi bicaa ca hombre que gúnicaʼ ti cosa malu (Lev. 10:1, 2, 8-11). Ndiʼ nga principiu ni rinanda ca xpinni Cristu, nga runi, qué lica reʼcaʼ vinu o nisadxuʼniʼ ora maʼ chigúnicaʼ serviciu sagradu sticaʼ.

11. Xiñee ti ndaayaʼ para xquidxi Dios ganda guiene chaahuiʼ xii nga alcoholismu.

¹¹ Lu ca últimu década ni maʼ gudiʼdiʼ hasta ca dxi stinu, cani dxandíʼ xpinni Cristu jma maʼ riene chaahuicaʼ xii nga alcoholismu, laani nga ti guendahuará ni rucaa ti binni guiníʼ ique maʼ qué zanda guibani pa qué gueʼ nisadxuʼniʼ. Guendaró espiritual ni ricaanu órapeʼ caquiiñenu riʼ, huayacaneni stale binni para gudxiilú guendahuará ca ne gusaana de gaca esclavu stini. Ne laaca huayacaneni stale binni para cadi lica gapa viciu riʼ. Cadi jneza diʼ nga gudii binni lugar gunitilú nisadxuʼniʼ laa, gunitiluni familia stiʼ, peru ndiʼ nga ni jma triste: gunitiluni privilegiu sicarú napa de guni adorar Jiobá.

12. Xii nga ni maca riene xquidxi Dios ante guzulú ca últimu dxi.

¹² Gueza. Maca dede ante guzulú ca últimu dxi riʼ nga biene xquidxi Dios cadi jneza cubaʼ binni gueza. Guidúʼyanu xi guníʼ Charles Capen, ti hermanu ni maʼ nagola, ora cuzeeteʼ xi bizaaca primé biaje guníʼnebe Charles Taze Russell, ra ziluxe siglu XIX. Guca ni dxi napa hermanu Capen 13 iza, ora zuhuaanebe chonna de ca bíʼchibe lu escalera stiʼ Casa Bíblica de Allegheny (Pensilvania, Estados Unidos). Ora gudiʼdiʼ hermanu Russell cuéʼcabe, gunabadiidxaʼ laacabe: «Báʼducaʼ, ñee cagúʼbatu gueza la? Candáʼ gueza raríʼ». Óraque gúdxicabe laabe cadi caguʼbadícabe gueza. Nagueendaca bidiicabe cuenta qué riuulaʼdxiʼ hermanu Russell cubaʼ binni gueza. Yanna guidúʼyanu ximodo bisiene hermanu Russell textu stiʼ 2 Corintios 7:1 lu revista Watch Tower 1 stiʼ agosto iza 1895: «Para naa la? qué zanda diʼ chuʼ ti cristianu ni guiníʼ ribeendú ni galán ora riguʼbaʼ intiica clase gueza, o guiníʼ zanda gusisaca Dios neca napa viciu riʼ. [...] Qué zanda guxuíʼlunu Señor candáʼ gueza ladi o caguu xiixa ni guni biidiʼ xcuerpu ndaaniʼ ruaa».

13. Xi purificación moral guca iza 1973.

 ¹³ Lu iza 1935, guníʼ revista La Torre del Vigía zeeda gaca gueza «ti guixi nabiidiʼ» ne laaca bisihuínnini ti cosa nabé risaca: tuuxa ni raʼsaʼ gueza o ni riguʼbaʼ ni, qué zanda diʼ guiaana lade familia Betel o gaca representante stiʼ organización stiʼ Dios casi precursor o ministru viajante. Peru, cadi raqué diʼ nga biluxe guca purificar xquidxi Dios, gúcaruʼ ni lu iza 1973. Revista La Atalaya 15 stiʼ octubre ni biree iza que bisiene ti cosa: viciu riʼ la? ruutini binni, runibiidini xcuerpu ne laaca rusihuínnini qué runi respetar binni stobi. Nga runi, tuuxa ni guiníʼ Testigu laa, peru qué naʼ gusaana viciu riʼ la? qué zuuyaʼ diʼ xquidxi Dios laa casi testigu stiʼ Jiobá. Laaca guʼtaʼ ti tiempu para cani napa viciu riʼ, ne pa qué gusaanacabe ni la? zaca expulsárcabe. * Racá ridúʼyanu biʼniʼ Cristu sti cosa nabé risaca para biʼniʼ refinar ca xpinni.

14. Xi mandatu gudixhe Dios, peru xiñee bizulú guníʼ ique binni zanda guicá rini.

¹⁴ Cadi jneza modo riquiiñeʼ binni rini. Maca dede ca dxi stiʼ Noé que nga guníʼ Dios cadi naquiiñeʼ gó binni rini. Gudiʼdiʼ si tiempu, guluu Dios mandatu riʼ lu Ley gucuaa guidxi Israel ne laaca bidiibe ni ca xpinni Cristu ora gúdxibe laacaʼ cadi «[gocaʼ] rini» (Hech. 15:20, 29; Gén. 9:4; Lev. 7:26). Nga runi, qué ridxagayaadinu xiñee ridxela Binidxabaʼ modo gucaa binni gucheené norma stiʼ Dios yanna. Maca dede lu siglu XIX que nga bizulú guníʼ stale doctor zianda ti binni huará jma nagueenda pa guicá rini, peru ora bíʼyacabe nuu stale tipu rini la? jmaruʼ si bizulú biquiiñecabe ni. Ngue runi, lu iza 1937 bizulú bitópacabe ne guluu chaahuicabe líquidu riʼ ndaaniʼ stale lugar ni rábicabe bancu ra nuu rini; peru, dxi guca Segunda Guerra Mundial que nga jma maʼ bicaacabe rini binni. Qué nindaa de ngue, maʼ bizulú bicaacabe rini binni ndaaniʼ stale guidxi roʼ.

15, 16. 1) Xii nga biene chaahuiʼ ca testigu stiʼ Jiobá. 2) Ximodo huayacané Cristu laanu para ganda gusiénenu ti doctor xiñee qué ricanu rini, ne xi huabeendunu.

¹⁵ Guidúʼyanu xii nga ni maca guníʼ revista The Watchtower ni biree iza 1944: ora guicá binni rini la? zeeda gaca ni casi ora ñobe ni (biree artículo riʼ diidxastiá lu revista La Atalaya 15 stiʼ abril iza 1945). Gudiʼdiʼ si chupa chonna beeu, biene chaahuiʼ guiráʼ hermanu xi guníʼ revista que. Lu iza 1951 biree ti lista ra zeeda ximodo cacabi xquidxi Dios stale guendarinadiidxaʼ ni zanda gacané ca hermanu gánnacaʼ ximodo guiníʼnecaʼ ca doctor ni guyúbicaʼ para gacané laacaʼ. Biene guiráʼ hermanu nuu lu guidubi Guidxilayú cadi naquiiñeʼ guicacaʼ rini, neca zaqué, stale biaje biʼniʼ burla binni laacabe, bininá laacabe ne nuu tiru dede guzanándacaʼ laacabe. Peru biquiiñeʼ Cristu organización stiʼ para gucané laacabe, ne guca ni ora biree stale tema ne folletu ra zeeda stale información ni zanda gacané laacabe gusiénecabe xi racaláʼdxicabe.

¹⁶ Lu iza 1979, bizulú guyé caadxi binnigola ndaaniʼ guiráʼ hospital para gacanecaʼ ca doctor runi dxiiñaʼ raqué guiene chaahuicaʼ xiñee qué ricá ca Testigu rini ne gunáʼ nga ca razón rudii Biblia para laani, ne laaca bisiénecabe ca doctor xi xcaadxi tratamientu zanda iquiiñecaʼ lugar de gucaacaʼ rini ca hermanu. Sti iza que biyúbicabe binnigola de 39 guidxi stiʼ Estados Unidos para guicaacaʼ ti cursu especial ni gacané laacaʼ gúnicaʼ dxiiñaʼ que jma jneza. Gudiʼdiʼ si tiempu, guníʼ Grupu ni Zaniruʼ gaca nombrar caadxi grupu ni láʼ Comité de Enlace con los Hospitales lu guidubi Guidxilayú. Lu ca iza  ni maʼ gudiʼdiʼ dede dxiqué hasta nagasi, jma maʼ galán modo cayaca dxiiñaʼ riʼ. Yanna riʼ maʼ nuu doctor, cirujanu ne anestesiólogo ni riuulaʼdxiʼ gacané ca Testigu ne runi respetarcaʼ laacabe ora guiníʼcabe guicaacabe ti tratamientu sin rini. Ne zidale hospital ni rudii tratamientu sin rini, ne nuu caadxi de laacani ruzeeteʼ jma nagueenda racanecaʼ ti binni huará zacá. Cadi dxandíʼ riéchenu stale ora riníʼ íquenu ximodo cayapa Jesús ca xpinni para cadi guni biidiʼ Binidxabaʼ laacaʼ en sentidu moral la? (Biindaʼ Efesios 5:25-27.)

17. Ximodo rusihuínninu risaca para laanu modo cayuni purificar Cristu ca xpinni.

¹⁷ Guiranu naquiiñeʼ guinabadiidxanu laca laanu: «Ñee rusisacaʼ modo cayuni purificar Cristu laanu, ora rusiidiʼ laanu guni respetarnu ca norma moral risaca stiʼ Dios la?». Pa zacá ni la? cadi naquiiñeʼ guiaandaʼ laanu ti cosa nabé risaca: nisi cuyubi Binidxabaʼ modo gucaa laanu gusaana de guni respetarnu ca norma stiʼ Dios, purtiʼ nánnabe zaxélenu de Jiobá ne de Jesús pa gúninu ni. Para cadi guiábanu lu ca trampa stiʼ Binidxabaʼ la? gatigá riguixhená organización stiʼ Jiobá laanu ne rusietenaláʼdxini laanu xi cadi naquiiñeʼ gúninu ti cadi guchéʼnenu ca norma stiʼ Dios, ne cadi guiaandaʼ laanu runi xquidxi Jiobá ni purtiʼ nadxii laanu. Nga runi, naquiiñeʼ gatananu, guicaanu guiráʼ conseju sicarú gudiicabe laanu ne guzúʼbanu diidxaʼ (Prov. 19:20).

18. Ximodo racané visión stiʼ Ezequiel laanu gánnanu xi raca né ca binni ni qué naʼ chinanda ca norma stiʼ Dios.

¹⁸ Guzéʼtenu sti ejemplu ra rihuinni xi raca ndaaniʼ xquidxi Dios para cadi gaca xiixa ni guni biidiʼ ca cristianu en sentidu moral. Triste guininu ni, peru stale de cani riníʼ zinanda ca norma stiʼ Jiobá ne maʼ bidiicaʼ xquendanabánicaʼ laabe, qué rúnicaʼ ni rudii stiidxacaʼ. Nuu de laacabe ruchaa modo riníʼ ique ne rusaana de chinanda ca norma stiʼ Dios. Xi raca né ca binni riʼ yaʼ. Para gánnanu ni la? guietenaláʼdxinu templu espiritual biʼyaʼ Ezequiel lu visión stiʼ, ni bizéʼtenu ra bizulú capítulo riʼ. Ñee redasilú lii ca puertaʼ ngola nuu raqué la? Ndaaniʼ cada tobi de ca cámara que nuu ti binni ni cayapa. Ca binni cayapa ra templu que la? qué rudiicaʼ lugar chuʼ binni ni «caʼruʼ gaca circuncidar ladxidóʼ» (Ezeq. 44:9). Ni bizéʼtenu riʼ rusietenalaʼdxiʼ laanu ti cosa: ca binni si ni guni stipa de guidubi ladxidóʼ para chinanda ca norma ni maʼ gudixhe Jiobá nga cani zanda guni adorar laabe modo racaláʼdxibe. Zacagá nga privilegiu nápanu ora runi adorarnu Jiobá né guiráʼ ca hermanu stinu: qué zanda diʼ guni guiráʼ binni ni.

19, 20. 1) Ximodo cayacané Cristu ca xpinni gánnacaʼ gunáʼ nga modo jma jneza guni juzgarcaʼ tuuxa ni biʼniʼ ti pecadu naroʼbaʼ. 2) Bizeeteʼ chonna razón para gaca expulsar tuuxa ni qué naʼ gaca arrepentir de ca pecadu stiʼ.

¹⁹ Lu iza 1892 guníʼ revista Watch Tower sicaríʼ: «Napa xidé guni expulsarnu ca cristianu ni gusihuinni, o cani gacalaʼdxiʼ gucaa stobi guiníʼ ique cadi dxandíʼ bidii Cristu xquendanabani [...] pur guiranu» (biindaʼ 2 Juan 10). Ne lu iza 1904 bisiene libru The New Creation (La nueva creación) ti cosa nabé risaca: binni ni qué naʼ gusaana de guni xiixa pecadu la? zuni biidiʼ xquidxi Dios en sentidu moral. Tiempu que guyuu chupa chonna «tribunal stiʼ yuʼduʼ» ne rié guiráʼ binni ridagulisaa nezalúcabe para guiníʼ xi gaca né tuuxa ni biʼniʼ ti pecadu naroʼbaʼ. Peru guidúʼyanu xi bisiene revista La Atalaya iza 1944: ca hermanu si ni maʼ guca nombrar para gapa ti neza binni ridagulisaa nga cani naquiiñeʼ guni tender ca guendanagana que. Ne lu iza 1952 nga guníʼ revista La Atalaya ximodo na Biblia naquiiñeʼ gaca juzgar tuuxa ni biʼniʼ ti pecadu naroʼbaʼ, ne bisihuínnini xiñee naquiiñeʼ gaca expulsar cani qué naʼ gaca arrepentir: raca ni para guiaana xquidxi Dios nayá.

²⁰ Lu xcaadxi década ni gudiʼdiʼ despué, gucaneruʼ Cristu ca xpinni para guiene chaahuicaʼ ximodo jma jneza guni juzgarcaʼ tuuxa ni biʼniʼ ti pecadu naroʼbaʼ. Ricaa ca binnigola stale capacitación para guni juzgarcaʼ cásica runi Jiobá, ti Dios ni riuulaʼdxiʼ gaca ni jneza, peru laaca rilaselaʼdxiʼ binni. Yanna riʼ jma maʼ riene chaahuinu nuu chonna razón para gaca expulsar ti binni ni qué naʼ gaca arrepentir de ca pecadu stiʼ: 1) Para cadi guiníʼ binni mal de lá Jiobá, 2) para cadi gaca biidiʼ ti neza binni ridagulisaa pur pecadu stiʼ tuuxa ni cuchee ne 3) para gacaneni binni ni bichee riʼ gaca arrepentir.

21. Xiñee ti ndaayaʼ para xquidxi Dios gaca expulsar ca binni ni qué naʼ gaca arrepentir.

²¹ Para ca cristianu nuu yanna riʼ, ti ndaayaʼ naroʼbaʼ nga gaca expulsar ca binni ni qué naʼ gaca arrepentir. Cadi dxandíʼ la? Ca binni ni guni xiixa pecadu naroʼbaʼ ndaaniʼ guidxi Israel dxiqué la? chaahuiʼ chaahuiʼ rucaacaʼ xcaadxi guni casi cayúnicaʼ, ne nuu tiru rácacabe jma stale que ca binni ni nadxii Jiobá ne cani racalaʼdxiʼ guni ni na  Dios. Pur guiráʼ ca cosa ni cadi jneza biʼniʼ guidxi que, guníʼ stale binni mal de lá Jiobá ne ra gudiʼdiʼ dxi bisaana Jiobá laacabe (Jer. 7:23-28). Peru xquidxi Dios nuu yanna riʼ, cadi ti guidxi diʼ casi guidxi Israel guyuu dxiqué ni, laani nga ti organización ra nuu hombre ne gunaa de stale guidxi ne maʼ gudixhe ique ca binni riʼ chinándacaʼ guiráʼ norma stiʼ Dios. Ora raca expulsar cani qué naʼ gaca arrepentir la? maʼ qué rudiicabe lugar iquiiñeʼ Binidxabaʼ laacaʼ casi ti guiibaʼ para guniná ca xpinni Dios ne guxheleʼ laacabe de Jiobá. Cumu qué ricaa ca binni qué iquiiñeʼ riʼ lugar para gucaacaʼ stobi guni casi cayúnicaʼ la? rapa xquidxi Dios ndaayaʼ stiʼ Jiobá. Cadi guiaandaʼ laanu promesa bidii Dios laanu: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ» (Is. 54:17). Ñee runi respetarnu ca binnigola ora guiniʼcaʼ xi naquiiñeʼ gaca né tuuxa ni biʼniʼ ti pecadu naroʼbaʼ la? Cadi guiaandaʼ laanu Jiobá nga bisaana laacabe para gápacabe laanu.

22, 23. Xiñee riuuláʼdxinu modo biʼniʼ ca hermanu xhiiñaʼ Dios ra bizulú siglu XX, peru xiñee rininu ñanda ñácacabe xcaadxi equilibradu né familia stícabe.

²² Yanna guzéʼtenu guionna ejemplu ra rihuinni ximodo ziyaca purificar cani dxandíʼ xpinni Cristu: guendaxheelaʼ ne familia. Guizáʼ ridxagayaanu ora ridúʼndanu ximodo biʼniʼ xquidxi Dios dxiiñaʼ ra bizulú siglu XX, purtiʼ ridúʼyanu pabiáʼ naroʼbaʼ ca sacrificiu bíʼnicabe. Nécapeʼ riéchenu stale ora ridúʼyanu modo bíʼnicabe dxiiñaʼ para gusihuínnicabe pabiáʼ risaca serviciu sagradu stícabe, rihuinni dxíchica ñanda ñácacabe xcaadxi equilibradu. Xiñee rininu zacá yaʼ.

²³ Nabé gucuaa ca hermanu que asignación para chigucheechecaʼ diidxaʼ o para gácacaʼ ministru viajante, peru stale biaje bicaani laacabe chúʼcabe zitu de ra lídxicabe chupa chonna beeu. Dede guyuu tu guníʼ jma jneza guni tuuxa pa qué guichaganáʼ, neca qué rusiidiʼ Biblia zaqué; peru huaxiéʼ si ruzeetecabe xi zanda guni ca cristianu ni maʼ bichaganáʼ para gaca xquendaxheelacaʼ jma naguidxi. Yanna ridúʼyanu maʼ qué rácani zacá.

24. Ximodo maʼ gucané Jesucristu ca xpinni para gácacaʼ equilibradu lu xquendaxheelacaʼ ne ora gudiicaʼ ni caquiiñeʼ familia sticaʼ.

²⁴ Yanna riʼ nabé rusietenaláʼdxicabe laanu cadi galán diʼ nga guicaanu stale asignación ndaaniʼ xquidxi Dios ne pur laacani guiaandaʼ laanu guni tendernu familia stinu (biindaʼ 1 Timoteo 5:8). Peru, cadi ngasi, laaca cayuni Jesucristu dxiiñaʼ para ganda guicaa ca xpinni stale conseju ni zeeda lu Biblia para gácacaʼ equilibradu lu xquendaxheelacaʼ ne ora gudiicaʼ ni caquiiñeʼ familia sticaʼ (Efes. 3:14, 15). Guzéʼtenu caadxi ejemplu. Lu iza 1978 biree libru Cómo lograr felicidad en su vida familiar. Gudiʼdiʼ si dieciocho iza biree libru El secreto de la felicidad familiar. Ne lu revista Torre stiʼ ni rapa maʼ huaree stale tema ra zeeda conseju ni zanda iquiiñeʼ cani maʼ bichaganáʼ para gánnacaʼ ximodo chinándacaʼ ca principiu stiʼ Biblia lu xquendaxheelacaʼ.

25-27. Xi huayuni xquidxi Dios maʼ raca stale iza para ganda guicaa ca xcuidi ne cani jma maʼ ziniisihuiiniʼ guiráʼ ni caquiiñecaʼ.

²⁵ Yanna, ximodo cayacané xquidxi Dios ca xcuidi ne ca xpinni Cristu ni maʼ ziniisihuiiniʼ yaʼ. Lu ca iza ni maʼ gudiʼdiʼ hasta ca dxi stinu, guizáʼ cadxela stale modo para guicaacabe ni caquiiñecabe. Maʼ raca stale iza nga de bizulú cudii organización stiʼ Jiobá ni caquiiñeʼ ca xcuidi ni napa gadxé gadxé iza. Dxiqué la? ruluíʼ gota nisa ni, peru  yanna riʼ maʼ beeda gácani casi ti guiiguʼ ni dxátipa. Guzéʼtenu caadxi ejemplu. Dede 1919 hasta 1921, biree ti sección lu revista The Golden Age (yanna runibiaʼnu ni casi ¡Despertad!) ni láʼ «Juvenile Bible Study» (Estudio bíblico para los jóvenes). Lu iza 1920 biree ti folletu napa stale dibuju ni láʼ The Golden Age ABC, ne lu iza 1942 biree ti libru ni láʼ Hijos. Lu década stiʼ 1970 biree libru Escuchando al Gran Maestro, Tu juventud... aprovechándola de la mejor manera ne Mi libro de historias bíblicas. Lu iza 1982 bizulú biree ti serie ni láʼ «Los jóvenes preguntan» lu revista ¡Despertad!, despué biquiiñeʼ stale de ca tema stini para guca libru Lo que los jóvenes preguntan. Respuestas prácticas, ni biree iza 1989.

²⁶ Yanna riʼ maʼ nápanu chupa volumen actualizadu stiʼ libru Los jóvenes preguntan, ne dede nagasi rireeruʼ jma tema de laani lu sitiu jw.org. Laaca maʼ gucuaanu libru Guizíʼdinu de Maestru Ni Jma Nanna Gusiidiʼ. Laaca nuu stale sección para ca xcuidi ne para cani maʼ ziniisihuiiniʼ lu sitiu nápanu lu Internet, lade cani zeeda tarjeta stiʼ ca binni ruzeeteʼ Biblia, laaca nuu caadxi cosa ni zanda iquiiñecabe para guni estudiárcabe Biblia, nuu videu ne historia ni napa dibuju, ne laaca nuu stale lección stiʼ Biblia para ca xcuidi ni napa chonna  iza o para cani caʼruʼ gusaa chonna iza. Racá rudiʼnu cuenta ruuyaruʼ Jesús ca baʼduhuiiniʼ cásica bíʼyabe laacaʼ dxi guluube caadxi xcuidi ndaaniʼ nabe dxi bicheechebe diidxaʼ lu Guidxilayú (Mar. 10:13-16). Laabe racaláʼdxibe guni sentir ca xcuidi ne cani jma maʼ ziniisihuiiniʼ nuu tu nadxii laacaʼ ne guizaa ni gocaʼ en sentidu espiritual.

²⁷ Laaca racalaʼdxiʼ Jesús gapa guiráʼ baʼduhuiiniʼ ti cadi chuʼ tu guniná laacaʼ. Yanna riʼ nabé nuu stale binni ni rilaxoo, o ni runi abusar de ca xcuidi, ne zeeda gaca ca binni qué iquiiñeʼ riʼ casi ti plaga ni nuu lu guidubi Guidxilayú. Nga runi, maʼ gulee xquidxi Jiobá stale información ni cusiene xipeʼ nga naquiiñeʼ guni cani napa xiiñiʼ ti ganda gápacaʼ laacabe de ca binni ni gacalaʼdxiʼ guni abusar de laacabe. *

28. 1) Casi bihuinni lu visión stiʼ Ezequiel, xi naquiiñeʼ gúninu para ganda chuʼnu ndaaniʼ templu espiritual stiʼ Jiobá. 2) Xi maʼ gudixhe íqueluʼ gúniluʼ.

²⁸ Yanna riʼ ridúʼyanu guiráʼ modo cayacané Cristu ca xpinni: cayuni purificarbe laacaʼ, cusiidibe laacaʼ guni respetarcaʼ guiráʼ ca norma moral stiʼ Jiobá ne guzuubacaʼ diidxaʼ, ne cayacanebe laacaʼ cueenducaʼ stale cosa sicarú. Cadi dxandíʼ riéchenu stale ora ridúʼyanu guiráʼ ni cayuni Jesús pur laanu la? Bixuiʼlú cayuuyuʼ templu biʼyaʼ Ezequiel lu visión que sti biaje ne cayuuyuʼ pabiáʼ naroʼbaʼ ca puertaʼ stini. Dxandíʼ qué rihuinni ni, purtiʼ ti templu espiritual ni. Peru, ñee rúninu stipa para guiníʼ íquenu zeeda gaca ni casi ti templu ni zanda guidúʼyanu la? Qué riúʼdinu ndaaniʼ templu riʼ purtiʼ si riuunu ra Yoo stiʼ Reinu, purtiʼ si ridúʼndanu Biblia o purtiʼ si ruxhidxinanu ra puertaʼ stiʼ ti yoo ora maʼ zigucheechenu diidxaʼ. Ca cosa riʼ la? randa ruuyaʼ binni cani. Dede ca binni ni ruluíʼ dxandíʼ nachaʼhuiʼ ñanda ñuni guiráʼ nga neca qué chuʼ dxi guiuucaʼ ndaaniʼ templu stiʼ Jiobá. Nga runi, para ganda chuʼnu ndaaniʼ templu sagradu riʼ —laani nga modo maʼ gudixhe Jiobá guni adorárcabe laa—, naquiiñeʼ gúninu guiráʼ ni maʼ bizéʼtenu ca, peru cadi ngasi, laaca napa xidé guibáninu modo na guiráʼ ca norma moral risaca stiʼ Jiobá ne guni adorarnu laabe de guidubi ladxidoʼno. Gusisácanu privilegiu naroʼbaʼ nápanu riʼ. Gúninu stipa biaʼ gándatiʼ para gusihuínninu santidad stiʼ Jiobá ne chinándanu guiráʼ norma sicarú stibe.