1. Ginipai Yezekere abihe nga gu naba kina iriworago tirani?

GINIPAI rengbe ka manga ka si du nga pai mangi ro wa gu namangi gu nebi nangia Yezekere 25 kama agarã kusayo? Mo berẽnga kurii gipai re: Mo ye mbembedi na gu babakere yekaru nakikä akikä. Bakere maraika gu du yo tipa ka yugo wai du apai foro! Mo biti agu atanga saba nandu sa ngbadimo sa dagba gu kikindigi angbadimo ndugu du biata. Kina iriworago zi ro wa da mo ti agu angbadimo re. Bagizo adangbaha nambeda kina kuti ametere 30. Ti agu angbadimoho re, mo bi ababandarago ho biata. Agu adangba ha du pa ngbadimoho na bawene kpia sikisa ti ni.—Yeze. 40:1-4, 10, 14, 16, 22; 41:20.

2. (a) Ginipai gu yuguyugupai nga ga yekaru arukubaha? (Oni bi rukutu kekeapai a.) (b) Ginipai rengbe ani ka wirikaha ti apapara angbadimo yekaru?

² Gere nga gu yuguyugupai narukuba gu yekaru nga ga toro. Yezekere asakipai tipaha futufutu, na kapita 40 kuti 48 hi kina be gu pangbanga du tipa gu yuguyugupai re. Gi yekaru re narukuba gu ga Yekova mbakadapai du tipa ziazia irisombori. Apaparaha ni basasa na rogoyo ti ni tipa gaani irisombori rogo gi yangara areme re. * Agu angbadimo du ni gbangagbanga ha narukuba gine? Si natingida rani nga agu aboro narimo gu ga Yekova mbakadapai du tipa ziazia irisombori, i du wa ka i raki ringbisihe na gu gako arugute du tipa iriiri mangaapai na du na paha kuari gbe. Zavura akpia kpe sikisa narukuba kina gu bangisapai re, mbiko i namangasunge na sikisa ti kura aregbo rogo Baibiri yo ka yugopa guhe du ni ruruhe. (Tam. 92:12) Na ginipai du tipa ababandarago? Si tie ziazia nga, agu aboro aidanga ka mangapai kuti agu arugute re ya i ambunga yo i rimi gu bawene gigiri irisombori nafu unga re te.—Yeze. 44:9.

3. Tipagine si aaida i ni kpuruwa apefuo Kristo akpuruwa ti ni kindi?

³ Wai du ga Yezekere yuguyugupai nadigisi tihe? A wa ani abihe rogo Kapita 2 nga ga gi buku re, Yekova amangisunge na Kristo tipa ka kpuruwa gako aboro ngba kparakpara gene naatona ti 1914 kuti tonatona 1919. Ya mo gu kpuruwa he re adigi kina ti gu regbo re? Wagusa te! Vuru gu kama garã susi kusayo, Kristo aima digo ni songodi ga Yekova ziazia arugute du tipa mangaapai. Si du si aida ti ni i ni kpuruwa apefuoko akpuruwa ti aregbo dunduko. Tipagine? Mbiko Kristo aima digo ni dungura  apefuoko rogo gi gbegberẽ zegino re na Satana ambunga asada ka gbeyo ku rogo wasiwasi mangaapai te. (Oni gedi 2 Petero 2:20-22.) Ani wisigingo abangiriaba biata nga gu i nakpuruwa ndikidi aKristano rogoho. Bambataha nga, gu kpuruwa he du tipa mangaapai, uehe nga, gu nyanyaki mbakadapai du tipa sa dungurati ni gigirihe, na ni yangaraha, gu mbakadapai nga ga aborokporo.

4, 5. Gini birĩ Satana adigi nimangisunge na ni na wai du ko na diabese rogoho?

⁴ Ga Yekova aboro ti aregbo dũ nidu na nyemu gu mangaapai du ni ruruhe. Sidu, i aima dia agu arugute kugume du tipa gipai re bakuru yo. Ani makianga bete akpiapai.

⁵ Wasiwasi kodaba. Yekova amangi kodaba si du ni gigirihe na ni wenehe dagba arogotise. Satana na ngbarago tipa ka gbarasa gu wene gamahe re ni aria ko ho si da ni bibiriko ho na ko namangasunge na ni tipa ka asada ga Yekova aboro wa ka i gberẽ bangiri Mbori. Satana amangisunge na gu birĩ re ti regbo Birama si ki ye na gbegberẽ sangbaha, na ko aima digo nimangisunge na ni nyanyaki rogo gi yangara arame re.—Geda 25:1-3, 9; Yugo. 2:14.

6. Gini zungahe i akusihe rogo Ngbaõbambu Sinziri, wai du i amangisunge na ni, na tipagine i ambu mangasunge ti ni na ni? (Oni bi rukutu kekeapai a.)

⁶ Tipa ka sovura kuti gu ga Satana ome re, gu Ngbaõbambu Sinziri nangia ga Banzinga 15, 1908, adu na gu zungahe rogoho naaya: “Mi nikaa mangapai ti aregbo dunduko na rogo aba dunduko ni iriirihe na agu aboro angianga gimi badiarogatise ya, rogo agu aba du ni okõokõho na rogo agu aba du aboro rogoho.” * Wa vura duhe nga anga andiko nangia gi zungahe re te, dungu aboro adihe kugume na ki fuku arimo yo tipa i nikusihe rogo Ngbaõbambu Sinziri. Bete agarã kusa, wa gi zungahe re avura kaa undo dungu aboro ti gu regbo re, si ada wakina sino mangaapai nga ga pambori gbua; sidu, i ki mbuhe. Ono tie, i aasongoda gu nyanyakipa arugute dedede nga ga mangapai naadu rogoho.

7. Rogo 1935, Ngbaõbambu Sinziri afura tipa ginipai, na gini rugute si anyakasipaha?

⁷ Ga Satana azubohe aakio kina kumbatayo. Rogo Marungu 1, 1935, Ngbaõbambu Sinziri afura gbaiga tipa ka rugusa gupai naadu dagba ga Mbori aboro. Gu kura aboro aaberãha nga ka i atungusapai, ndupai ho i kakuti gu ga Yekova arugute du tipa iriiri mangaapai rogo gayo raka yo te. Ngbaõbambu Sinziri afura kpadio nga: “Si naida boro na boro tingidihe nga, anga mangasunge dezirepai nga gu yangarapai si aidaha te. ADezire Yekova narukuba Yekova, na gayo sunge du ngaha nga ka rukuba ko na gako kindo ngba wene gene.” Gu kekeapai re afu rugute gbaiga tipa rogatise na wai si aida kodaba du, rogo gi gene re kini undo ga Mbori aboro i “né pa bari” watadu meteka.—1 Kor. 6:18.

8. Tipagine Ngbaõbambu Sinziri nafura ti ni bara dunguhe tipa ndikidi rogo gu pa-Giriki du tipa meteka?

⁸ Rogo agu agarã susi, Ngbaõbambu Sinziri ima sakapai ni bawene he tipa gu pa-Giriki du rogo Ziazia Kekeapai tipa meteka nga—por·neiˈa. Anga rogoyo nabi kina pa kodaba sa te. Kuba  gure, por·neiˈa nakoda wasiwasi mangaapai ngba arikoho dunduko gbiati gu gbegberẽ mangaapai nga ga sunge banambara. Rogo gi gene re, apefuo Kristo ni bandabanda yo ti gu gbegberẽ sangbanapai nga ga kodaba nagbia dungu aboro areme rogo gi zegino re.—Oni gedi AEfeso 4:17-19.

9, 10. (a) Gini iriiri mangapai Ngbaõbambu Sinziri afura tipaha rogo 1935? (b) Ga Ziazia Kekeapai bipai nga gine tipa mbirabuda?

⁹ Kpibuda. Gu Ngbaõbambu Sinziri nangia ga Marungu 1, 1935, afura tipa gu kura iriiri mangaapai nga: “Ani bihe nga kura aboro kinaho nandu ka tungusapai na kini mangi gu kura asunge rogo dungurati baraho i naima kpibuda ni. Gini ngbatunga mbirabuda Ziazia Kekeapai naidi paha? Ya mo si rengbe kadu ni wenehe nga boro mbiribuda ki dati gu bangiriba nga si gbarasipa gani sunge rogo ga Gbia riigbu?”

¹⁰ Karagapai kuti gipai re asakipai tipa gu ruru bipai du tipa mbirabuda rogo Fugo Mbori yo. Baibiri azangahe ti mbirabuda rengbearengba te, ono si ima soga kpibuda. (Tam. 104:14, 15; 1 Kor. 6:9, 10) Nibipa mbirabuda kini mangi ga Mbori sunge, i aima tingida ga Mbori amoyambu bakuru kusayo tipa gupai namangi agu awiri Arona Mbori aimi yo tipa fu kungba we rii ga Mbori bamotumo. Ngbutuko fuo gupai re, gu pangbanga re nayugo gupai si awira wa si nasayo i mangi gu gbegberẽpai re, mbiko Mbori aima rũ ndiko fu aboromotumo nga ka i mbiringa buda ho i amanga ziazia asunge ni ya. (Pa Mot. 10:1, 2, 8-11) Ka apefuo Kristo mangipai kuti agi arugute re areme, i na du na rubangirise nga i aidanga ka kpibuda ho i amanga ga Mbori sunge ni te.

11. Tipagine duhe ti ni ni pa maku fu ga Mbori aboro ka gbia bakere giarogopaiyo nibipa mbirabuda?

¹¹ Rogo agu agarã susi re, apefuo Kristo ima gbia dungu giarogopaiyo nibipa kakaka mbirabuda, nga gu nakoda mbiraha zanga ongada, gbiati gbegberẽ ziotise kutini. Mbiko gu riahe nga ga toro naye ti regboho, si ima undo dungu aboro i ini wai ka mangasunge na ni ngba wene gene na kini banda gayo raka. I ima undo dungu aguyo i ki mbu mbirabuda. Si aidanga boro mbu kpibuda si di gani kikii, gani aborokporo, na kurigure, gu momu nga ga manga agu asunge nabipa gu gani irisombori ni amangaha fu Yekova te.

12. Gini bipai ga Kristo amoyambu adu na ni tipa vugundö zavura mbata fu yangara arame tona?

¹² Vugundö. Apefuo Kristo atona za aboro ti vugundö mbata fu yangara arame tona. Dungu agarã kusayo, sosono wirinarani nga, Charles Capen, atingidipa gu bambata regbo ko agbia Charles Taze Russell bara ti digido 19 kama agarã. Capen adu ti gu regbo re na agarã 13, na unvurako gbiati atameko ue adu rii gu tanga nangia ga gu Betere i anaayambaha nga Bible House naadu Allegheny, Pennsylvania yo. Ho Russell aasusa ni, ko asanayo nga: “Agude oni navugundö avu? Mi gi fuõ he wa ngime gundö.” I ape rengo fuko nga i avungo gundö te. Nirengo, i aima rugatiyo na pa gu bipai ko adu na ni tipa gundö. Rogo gu Ngbaõbambu Sinziri nangia ga Buza 1, 1895, Wiriba Russell afura  riipa 2 AKorindo 7:1 nga: “Mi arengbanga ka bi wai rengbehe ka fu taarimo fu Mbori te, watadu ka undo ko a te ka si du nga Kristano navugundö. . . . Ani arengbanga ka berãha nga gaani Gbia rengbe ka sungo na ani kini gifuõ ngime gundö watadu ka rimiso guhe ku ngbako yo du ni bibiriko ho te.”

13. Gini arugute nga ga iriiri mangapai naaye rogo 1973?

¹³ Rogo 1935, Ngbaõbambu Sinziri ayambu gundö nga “bibiriko rende” na ki pe gupai nga gu boro sia ka rihe watadu ka vu he, ni arengbanga kadu ni gu borokporo nga ga Betere watadu kadu ni gu boro narukuba ga Mbori riigbu ni bazakigene watadu babi adungurati te. Rogo 1973 bakere kpuruwahe rogo mangaapai yo aye berewe. Gu Ngbaõbambu Sinziri nangia ga Banzinga 1 asakipai nga Dezire Yekova ho rengbe kadu ni wene kpiapai rogo dungurati baraho ni amanga agu apai ni naye na kpio, na birikosi boro, na gu mangaapai angbanga ya te. Si adu nga agu aboro aidanga ka mbu vugundö ya i kusiyo kusayo rogo dungurati. * Kristo aima manga gu kura diandue tipa ka kpuruwa apefuoko.

14. Ga Mbori arugute nga gine tipa kure, na wai fu kure kutii kpotose yo aye ka maapai?

¹⁴ Mangasunge na kure. Ti rago Noa, Mbori aya gbegberẽpai du nga ka ri kure. Ko anyakasihe berewe rogo agu aNdiko ko afuhe fu aYisaraere, na ki fu kina gu rugute re a fu gu dungurati nangia ga aKristano nga “i ne . . . kure.” (Amo. 15:20, 29; Bam. P. 9:4; Pa Mot. 7:26) Si airiwongo te nga, Satana ima bi gu kura gene ti gi gaani regbo re ko asa aboro ngbaha i nibasa gi rugute Mbori afuhe re. Amunganga atona ka wisigopai tipa kure rogo 19 kama agarã, ono fuo i ini gupai nga kure na arikoho ni bakiakia, gu mangapai re akpatafurã. Rogo 1937, i atona ka dungura kure kini bandaha rogo baigo kure, na Ue Vura Nga ga Zegino naasa gupai nga fu kure kutii kpotose yo moipai. Fuoho aturongo te, fu kure kutii kpotose yo ki moipai rogo zegino dunduko.

15, 16. (a) Gini diaberã aDezire Yekova amangihe nibipa fu kure kutii kpotose yo? (b) Gini undo apefuo Kristo nagbiaha nibipa dia kure kutii kpotose yo na agu agene ahusa kaza adunga na kure ya, na sangbaha nga gine?

¹⁵ Ti tonatona 1944, Ngbaõbambu Sinziri ape gupai nga dia kure kutii kpotose yo nga gu kura gene ka ri kure. Rogo gu garã nangbefuo ho, i anyakasi gu bipai nga ga Ziazia Kekeapai na ki fura tipaha berewe wenengai. Rogo 1951, tangaratangara asanahe akuru na akaragapai tipa ka undo ga Mbori aboro i ini wai ka fura fu amunganga. Rogo zegino dunduko, ruru apefuo Yesu naru nyanyaki, gbe ho aboro asawia yo ni, asoga yo ni, na kini rungosi yo ni. Ono Kristo aandu kumbatayo kindi kaa undo gako riigbu si nifu gu undo gako aboro aidaha. I amangi dungu wetekapai na ki kusi aburosua gbiati gu kekeapai naafura tipa gupai re gbaiga.

¹⁶ Rogo 1979, abaakumba atona ndu kaa bi amunganga kaa fura nayo tipa gu gaani bipai du mburuhe rii Ziazia Kekeapai nibipa kure na gu kura agene husa kaza rengbe yo ka mangaha kuba dia kure. Rogo 1980, abaakumba rogo agbata 39 Amerika yo agbia rabahe tipa gi sunge re. Kusa, Riigbu Bipasunge aidipa kusa gu basunge nga gu Rondo Du Tipa Sakapai na Amunganga  rogo zegino dunduko. Ya mo gu basunge re adunga na diabese vuru agu agarã susi re? Areme, badungu amunganga nagia tiyo agia na agu aDezire Yekova nawoka na kini irisi gu gaani siapai nga ga mangasunge na gu kura gene husa kaza kuba dia kure. Dungu abambungua kinaho nahusa kaza zanga fu kure, na aguyo nabihe nga si nga gu wene gene husa kaza ngba kisusi. Anga kina ngbarani nazera ka bi wai Yesu nabanda apefuoko be gu ome Satana amangaha tipa ka birikosi yo te?—Oni gedi AEfeso 5:25-27.

17. Wai du rengbe ani ka yugoho nga ani nabi gu gene Kristo akpuruwa apefuoko ngbaha na nyanyakipaha?

¹⁷ Si naida ani sana tirani nga, ‘Ya mo ani nabi gu gene Kristo adigi ni kpuruwa apefuoko ngbaha, na ka raba yo tipa i bi ga Yekova arugute du tipa iriiri mangapai na nyanyakipaha?’ Kangia wo duhe, ani moi gupai ku berãrani yo nga Satana naida ka nyaga rani kusayo ti Yekova na Yesu nisako rani ani bi ga Mbori arugute na paha kusende. Tipa ka sovura kuti gupai re, ga Yekova riigbu nafu zahe furani dedede na kini tingidi rani na pa gu wasiwasi mangaapai nga ga gi zegino re. Ani du na rubangirise na kini degeturani sa ngbatunga wene arugute wa gure.—Snz. 19:20.

18. Nibipa agu aboro nazinga kuti ga Yekova arugute rogo wia yo, ga Yezekere yuguyugupai natingida rani na ginipai?

¹⁸ Uepai nga, i kpuruwa rani rogo gu mangaapai nakoda gu mbakadapai du tipa ka banda dungurati gigiri. Si nafu kina gberãrago nga, anga agu aboro dunduko di ga Yekova arugute kugume ki kpara gayo raka fuko nakakuti gu gayo siapai re te. Aguyo naˈaria berãyo na ki samungu kuti agu arugute re. Ginipai si aida i mangi yo na ni? Ani ima rengba ka gbia pai sa rogo gu ga Yezekere yuguyugupai nga ga gu yekaru nga ga toro ani asakipai tipaha ti tonatona gi kapita re. Oni tingidipa gu gbangagbanga angbadimo re. Rogo agu angbadimo re ni basasa, ababandarago adu ho. Wa gopai ayugoho, agu ababanda yekaru re adu tipa agu aboro ‘nazanga yera kpotoyo’ yo ka i rimingo ya. (Yeze. 44:9) Gere natingida rani na gupai nga ziazia irisombori nga gu momu i nafuhe fu kina agu aboro naida ka raka ringbisihe na ga Yekova iriiri arugute nga ga mangapai. Wakina gure a, gu momu nga ga kodatise na akuarani aKristano rogo irisombori areme anga si fu aboro dunduko te.

19, 20. (a) Wai du Kristo aundo apefuoko yeeye i ini wai rengbe yo ka mangapai ka si du nga boro mangi kere ingapai? (b) Gini nduapai duho biata tipa kusa gu boro asanga berãni ya rogo rengo?

¹⁹ Rogo 1892, Ngbaõbambu Sinziri aya “gaani sunge du ngaha nga ka kusa (wangia ani aKristano) agu aboro kusayo rogo dungurati ayugongo ho rogo gayo afugo na mangaapai nga Kristo afu motumo tipa aboro dunduko ya.” (Oni gedi 2 Yoane 10.) Rogo 1904, buku sa (The New Creation) ape gupai nga agu aboro nye kuti manga gbegberẽ apai, i ima rengba ka rungburasi agu awirina du rogo dungurati. Ti agu aregbo re, dungurati naabaha naana wisigo gu “ngbanga nga ga kanisa” tipa ka bihe singia boro ima manga kere ingapai. Ono tie, gipai re anaamanganga dedede te. Rogo 1944, Ngbaõbambu Sinziri ape gupai nga kina abaakumba si aida i nisari ngbatunga agu angbanga re. Rogo 1952 gu mbakadapai du mburuhe rii Ziazia Kekeapai tipa sarangbanga akuru rogo Ngbaõbambu Sinziri, na ki yugu gu memepai i akusa gu boro ti ni kusayo asanga berã ya nga ka mbu dungurati ni gigirihe.

²⁰ Rogo agu agarã nangbefuo gure, Kristo aundo apefuoko na ki kpuruwa yo i ini wai ka mangapai ka si du nga boro mangi kere ingapai. Areme agu abaakumba nga aKristano nagbia wene rabahe tipa ka wirika wai ka sarangbanga wa Yekova niruru he na rogo nunga yo. Areme, nduapai ho biata si aida i kusi gu boro ti ni kusayo asanga berãni ya rogo dungurati: (1) ka dia gbarasarimo kusayo ti rimo Yekova, (2) ka banda dungurati ti surungba kere ingapai, na (3) ka undo gu boro mangi ingapai ni saberã ni ka si rẽ.

21. Rogo gini gene gu mbakadapai nga ga kusa boro rogo rengo yo naye na maku fu ga Mbori aboro?

²¹ Ya mo mo nabi wai gu mbakadapai nga ga kusa boro rogo dungurati kusayo naundo apefuo Kristo areme? Ti rago aYisaraere, amangi gbegberẽ apai anaagbarasa kura aboro agbarasa, ti gu kura aregbo i aninge kisusi agu aboro nakpinyemu Yekova  nga aguyo naida ka manga rurupai. Rogo gi gene re, aYisaraere anaaye na gbarasarimo kuti rimo Yekova na ka ko aidanga na yo ya. (Yere. 7:23-28) Ono areme, Yekova namangasunge na gu badona akumba na adee naima nyaka rogo toro yo. Bambiko wa duhe nga i nakusa agu amangi gbegberẽ apai kusayo asanga berãyo ya, sidu, si ambunga gene fu Satana ko mangisunge na yo wa bundu tipa ka gbarasa dungurati na ki gbarasipa duhe ni gigirihe te. Kuba gure, si nasa gupai nga ka i moinga pai ni bakerehe rii dungurati ya. Ni du ani ni badona, Yekova nakido rani nga ko ima ida na ani. Oni tingidi gupai nga, Yekova nakidohe nga: “Gu ũvura i ka mbakada ha kuti ro si adía nga be ro wa sa te.” (Yes. 54:17) Ya mo ani nasongoda abaakumba niruru rani, nga agu aboro du na bakere tindiro nga ga sapangbanga beyo?

22, 23. Tipagine du ani ti ni na tambuahe fu agu awirinarani nga aKristano naadu rogo 20 kama agarã, ono gini gopai duho nayugo na ni nga si aaida i du na ruru bipai nibipa aborokporo?

²² Gu biata gene apefuo Kristo nagbia undo ngbaha nga wai ko akpuruwa yo ti aregbo dunduko nibipa rogatise na gu raka nga ga aborokporo. Ya mo i kpuruwa gaani bipai tipa rogatise vuru agu agarã susi re? Ii. Ni kpiapai, ho ani agedapa gu ga Mbori amoyambu ni naadu ti tonatona 20 kama agarã, kina ngbarani nazera ka bi gu sino naadu tiyo nga ga mbupa gu kura gayo apai. Ani na ngbarago ka bi wai i aperesipa ga Mbori sunge rogo gayo raka yo kisusi apai dunduko. Ono tie, ti kina gu bangisa regbo re, ani nabihe abi a nga si aaidanga i roi kina kubani sa te. Rogo gini gene?

²³ Dungu awirina aaidanga ka mangasunge tungusapai watadu sunge babi adungurati nga gu naandu nayo tuturũ ti kpuyo tipa dungu adiwi te. Ti kura aregbo, i anaaka aka na aboro ti manga rogotise, ono Ziazia Kekeapai apenga ha wo te, na i anaafuranga gbe tipa gupai rengbe aKristano ka mangaha tipa ka nyakasa gayo ramukporo te. Ya mo kina gu bangisapai re namanga areme dagba apefuo Kristo? Wagusa te!

24. Wai du Kristo aundo gako ruru aboro i du na ruru bipai tipa rogatise na aborokporo?

²⁴ Areme, si aidanga boro mangi agu asunge nga ga siokrasia ki mbu berãpa gani aborokporo te. (Oni gedi 1 Timoteo 5:8.) Kurigure, Kristo ima manga ome tipa ruru apefuoko auru kpotosende nigbia gu undo akatanga ya tipa agu arugute nga ga Ziazia Kekeapai nabipa rogatise gbiati gu raka nga ga aborokporo. (Ef. 3:14, 15) Rogo 1978, buku akuru nga Making Your Family Life Happy. Agarã 18 kusa, gu kura buku akuru nga The Secret of Family Happiness. Kurigure, Ngbaõbambu Sinziri ima du na dungu kekeapai rogoho i nambakadihe tipa si undo arogotise i mangipai kuti agu arugute nga ga Baibiri rogo gayo ramukporo yo.

25-27. Wai du i nagbeberãse ni bakerehe gbe kuti ngbatunga agude ni bakiakia vuru agu agarã yo susi?

²⁵ Na ginipai du tipa paranga aboro? Vuru agu agarã susi, i ima gbeberãse kuti gayo nyemuapai ni bakerehe. Ga Yekova riigbu aima digo nikusi ahe ni bakiakia tipa agude ringbisihe kuti  agarãyo, ono areme, awaraga ima da kpaima tipa yo. Ni kpiapai, naatona rogo 1919 kuti 1921, gu magazini nangia The Golden Age anaakusa kekeapai riihe angia “Wisigo Baibiri Nga ga Paranga Aboro.” Fuo gure, burosua akuru nangia The Golden Age ABC rogo 1920 gbiati gu buku nangia Children rogo 1941. Rogo 1970, i akusi agu abuku nga Listening to the Great Teacher, Your Youth—Getting the Best out of It, na Gimi Kitabu Apangbanga Nga ga Ziazia Kekeapai. Rogo 1982, kekeapai atona kaa kura rogo Awake! nga “Agu Asanahe Paranga Aboro Naasanaha,” na kusa, gu buku nga Questions Young People Ask—Answers That Work, ki kuru rogo 1989.

²⁶ Areme, vovo abuku ue berani nga Young People Ask, na kekeapai tipa paranga aboro nakura dedede rogo gaani bangiriba nga jw.org. Ani a na gu buku berani nga Learn From the Great Teacher. Gaani bangiriba nga ga Internet na apai rogoho kpaima tipa paranga aboro, kodihe na rukutu akarte tipa agu aboro du payo rogo Baibiri yo, agu apai naundo agude i wisigi Baibiri, avidio, agu asura du tipa agu apangbanga nga ga Baibiri na agu apai  rengbe ka undo agu agude du garãyo biata watadu kusende tini tipa i wiriki Ziazia Kekeapai. Nirengo, ga Kristo bipai tipa rukutu agude aˈarianga tihe te naatona kinaho ko adungura agude ni kubeko rogo bambata sa kama agarã. (Mk. 10:13-16) Ko naida agude ri riahe wenengai rogo toro yo na i bihe nga i nakpinyemuyo akpi.

²⁷ Yesu naida i banda agude abanda a be gbegberẽ apai. Wa gi zegino re naima hi be gbegberẽ mangaapai, manga fu agude gbegberẽ nakio kina kumbatayo. Sidu, i ima kusa gu wene arugapai rengbe ka undo avunguagude i banda awiriyo be gi gbegberẽ mangapai re. *

28. (a) Ginipai si aida ani mangihe ka si du nga ani naida ka rimo gigiri irisombori, a wa duhe ni yuguyuguhe rogo ga Yezekere kpiapai yo? (b) Ginipai di ani berã tipa ka mangaha?

²⁸ Ya mo rago angbanga tirani ka berãkurii wai Kristo andu kumbatayo kindi kaa kpuruwa apefuoko, kaa rabayo tipa i du na irisa, i niraki ringbisihe kuti ga Yekova arugute na kini gbia undo ti ni te? Oni berẽnga berewe kuriipa gu yekaru Yezekere abihe rogo yuguyugupai. Oni tingidipa agu angbadimoho nadu ni gbangaha gbe. Nirengo, anga ndikidi yekaru ngaha te, ono si narukuba gupai nga ga toro. Wa vura duhe wo, ya mo ani nabihe ni ndikidipai? Anga ani narimo ku rogoho yo kinaho ani andu ni ku Bambu Kindo yo watadu ho ani azara Ziazia Kekeapai ni watadu ho ani atungusapai ni te. Gere nga agu amangaapai ani abihe abi. Irabiriki ima rengba ka manga agu apai re zanga ni rimi ku rogo ga Yekova yekaru. Ono tie, ka ani amanga agu apai re na kini raki ringbisihe kuti ga Yekova arugute du tipa iriiri mangaapai na kini songodi ndikidi irisombori na wene kpotoraniyo, gure nga ani ima rimo ku rogoho na ani namangasunge fu Mbori rogo ziazia ba nga gu mbakadapai du tipa iriso Yekova Mbori! Ani bingo gu momu re abi ti aregbo dunduko na nyanyakipaha. Ani mangingo ome amanga a tipa ka yugopa du Yekova ni ziazia ko ni ka ani kuti gako ruru arugute!