1, 2. Ki sanzman i ti annan dan Zion’s Watch Tower an Zanvye 1895 e ki mannyer bann frer ti reakte?

 LETAN ki John Bohnet, en Etidyan Labib devoue ti ganny son kopi Zion’s Watch Tower Zanvye 1895, i ti kontan sa ki i ti vwar. Sa magazin ti annan en nouvo lapo byen atiran avek desen en gran far lo en lanmer azite e lalimyer sa far ti pe klere dan fernwanr. Dan sa magazin, i ti annan en lanons avek tit “Our New Dress” (Nou nouvo lenz) konsernan sa nouvo kouvertir.

² Byen enpresyonnen par sa, Frer Bohnet ti anvoy Frer Russell en let. I ti ekri: “Mon kontan pour vwar LATOUR dan son Zoli Lenz. I vreman zoli.” John Brown, en lot Etidyan Labib fidel ti ekri sa konsernan sa kouvertir: “I vreman atiran. Menm si laroul ek tanpet pe bat avek li, sa latour i lo en fondasyon solid.” Sa nouvo kouvertir ti premye sanzman ki nou bann frer ti vwar sa lannen, me i pa ti sel sanzman. An Novanm, zot ti aprann ki i ti annan en lot sanzman enportan. I ti en sanzman ki ti en pe parey en lanmer azite.

3, 4. Ki problenm ki ti ganny adrese dan Watch Tower le 15 Novanm 1895 e ki sanzman ki ti ganny anonse?

³ En gran lartik ki ti ganny pibliye dan Watch Tower le 15 Novanm 1895 ti ekspoz en problenm: Bann gro problenm ki ti parey bann gro laroul ti pe menas lape dan lasosyasyon ouswa lorganizasyon bann Etidyan Labib. Bann frer ti touzour pe argimante konsernan lekel ki devret responsab dan kongregasyon. Pour ed bann frer vwar sa ki ti neseser pour rezourd sa problenm ki ti pe diviz kongregasyon, sa lartik ti konpar lorganizasyon avek en bato. Apre sa, i ti montre klerman ki sa bann ki responsab dan kongregasyon pa ti pe reisi prepar lorganizasyon pour en tanpet. Kwa ki ti merit ganny fer?

⁴ Sa lartik ti montre ki en kaptenn eksperyanse i fer sir ki tou manm lekipaz abor i ganny sove e ki bann maren i pare pour ferm tou bann louvertir ler tanpet i vini. Pareyman, sa bann ki responsab dan kongregasyon ti bezwen fer  sir ki tou manm kongregasyon ti pare pour fer fas avek bann kondisyon ki parey en tanpet. Pour arive fer sa, sa lartik ti anons en gran sanzman. I ti endike ki toudswit, ‘dan sak kongregasyon, bann ansyen i merit ganny swazir’ pour “sirvey troupo.”​—Akt 20:28.

5. (a) Akoz sa laranzman konsernan bann ansyen ti zis dan sa bon moman? (b) Ki kestyon nou pou egzaminen?

⁵ Sa premye laranzman pour etablir bann ansyen ti en pa enportan pour etablir en striktir ki stab dan kongregasyon. I ti ed nou bann frer pour navige pandan sa bann letan tanpet diran Premye Lager Mondyal. Dan bann deseni ki ti swiv, plis sanzman ankor dan lorganizasyon ti ed pep Bondye pour pli byen ekipe pour servi Zeova. Ki profesi Labib ki ti predir sa devlopman? Ki sanzman dan nou lorganizasyon ki ou’n vwar? Ki mannyer ou’n benefisye avek sa bann sanzman?

6, 7. (a) Ki Izai 60:17 i vedir? (b) Ki sa lekspresyon “sirveyan” ek “bann ki donn ou latas” i vedir?

⁶ Parey nou ti vwar dan Sapit 9, Izai ti predir ki Zeova ti pou beni son pep pour fer zot vin en kantite. (Iza. 60:22) Par kont, Zeova ti promet pour fer plis ki sa. Dan sanmenm sa profesi, i ti dir: “Olye kwiv mon pou anmenn lor, olye feray mon pou anmenn larzan, olye dibwa, kwiv, e olye bann ros, feray, mon pou apwent lape konman ou bann sirveyan e ladrwatir konman bann ki donn ou latas.” (Iza. 60:17) Ki sa profesi i vedir? Ki mannyer i aplik avek nou ozordi?

⁷ Profesi Izai i montre ki en eleman ti pou ganny ranplase par en lot. Me, remarke ki sa bann ranplasman se bann sanzman, i pa pe sorti le pir pour vin le meyer, me sorti le meyer pour vin pli meyer ankor. Ranplas kwiv avek lor i en amelyorasyon e sanmenm ki arive avek lezot eleman ki’n ganny mansyonnen. Alor, atraver sa legzanp, Zeova ti pe predir ki kondisyon son pep ti pou amelyore ptitapti. Ki kalite amelyorasyon sa profesi ti pe refer avek? Par mansyonn “sirveyan” ek “bann ki donn ou latas,” Zeova ti pe endike ki i ti pou annan bann amelyorasyon gradyel dan lafason ki son pep ti pou ganny pran swen avek e organize.

8. (a) Lekel ki responsab pour sa amelyorasyon ki ganny mansyonnen dan profesi Izai? (b) Ki mannyer nou benefisye avek sa bann amelyorasyon? (Vwar osi bwat “ I ti aksepte koreksyon avek limilite.”)

⁸ Lekel ki fer sa bann sanzman dan lorganizasyon? Zeova ti dir: “Mon pou anmenn lor, . . . mon pou anmenn larzan, . . . e mon pou apwent lape.” Sirman, se Zeova li menm ki’n fer bann sanzman dan laranzman kongregasyon, pa bann imen. Depi ki Zezi ti ganny etablir Lerwa, Zeova in fer bokou sanzman atraver son Garson. Ki byenfe nou gannyen avek sa bann sanzman? Sa menm verse i dir ki sa bann sanzman pou anmenn “lape” ek “ladrwatir.” Anmezir nou  aksepte gidans Bondye e fer bann azisteman, nou annan plis lape antre nou e lanmour pour ladrwatir i motiv nou pour servi Zeova, sa Bondye ki zapot Pol ti dekrir konman en Bondye lape.​—Fili. 4:9.

9. Ki pli bon fondasyon lape ek linite dan kongregasyon e akoz?

⁹ Konsernan Zeova, Pol ti ekri: “Annefe, Bondye pa en Bondye dezord, me en Bondye lape.” (1 Kor. 14:33, nou ki’n met an italik.) Remarke ki Pol pa ti pe fer en konparezon ant dezord ek annord, me i ti konpar li avek lape. Akoz? Egzamin sa: Lord pa neseserman anmenn lape. Par egzanp, en group solda i kapab mars annord ziska fron batay, me zot lamars se pour al lager, pa pour al fer lape. Alor, konman Kretyen, nou anvi gard sa pwen esansyel antet: Nenport striktir ki son fondasyon pa baze lo lape pou tonbe to ou tar. De lot kote, lape Bondye i promot sa kalite lord ki dire. Alor, eski pa nou rekonesan ki nou lorganizasyon i ganny gide e rafinen par sa Bondye lape! (Rom. 15:33) Lape ki Bondye i donnen i fondasyon sa lord ek linite ki nou apresye en kantite dan tou kongregasyon dan lemonn.​—Ps. 29:11.

10. (a) Ki sanzman i ti annan dan nou lorganizasyon o konmansman? (Vwar bwat “ Ki mannyer sirveyans bann kongregasyon in amelyore.”) (b) Ki kestyon nou pou egzaminen?

¹⁰ Sa bwat “ Ki mannyer sirveyans bann kongregasyon in amelyore” i donn nou en apersi lo bann sanzman efikas e annord ki ti arive dan nou lorganizasyon o konmansman. Me ki sanzman, ki parey kwiv ki ganny ranplase avek lor, ki Zeova in anmennen resaman atraver nou Lerwa Zezi? Ki mannyer sa bann azisteman konsernan bann ansyen pe fortifye lape ek linite dan bann kongregasyon dan lemonn? Ki mannyer zot ed ou personnelman pour servi sa Bondye lape?

11. (a) Apre en letid lo Lekritir, ki sanzman dan nou konprenezon i ti annan? (b) Ki bann frer lo konsey direkter ti determinen pour fer?

¹¹ Depi 1964 ziska 1971, konsey direkter ti siperviz en gran proze pour etidye Labib o profon e egzamin serten size, enn parmi ti o size lafason ki kongregasyon Kretyen ti fonksyonnen dan premye syek. a Konsernan striktir kongregasyon, zot ti dekouver ki bann kongregasyon dan letan lontan ti annan en konsey ansyen ki ti responsab plito ki zis en ansyen tousel. (Lir Filipyen 1:1; 1 Timote 4:14.) Letan ki zot ti konpran byen sa pwen, konsey direkter ti realize ki zot Lerwa Zezi ti pe gid zot pour fer bann azisteman dan lafason ki pep Bondye ti organize e bann frer lo konsey direkter ti determinen pour soumet anba direksyon zot Lerwa. Deswit zot ti fer bann azisteman pour ki bann ansyen i ganny etablir dan kongregasyon parey Labib i dir. Ki serten azisteman ki ti ganny fer boner dan bann lannen 1970?

12. (a) Ki azisteman ki ti ganny fer lo konsey direkter? (b) Dekrir lafason ki Konsey Direkter i ganny organize konmela. (Vwar bwat “ Lafason ki Konsey Direkter i pran swen avek lentere Rwayonm.”)

 ¹² Premye azisteman ti aplik avek konsey direkter li menm. Ziska sa letan, konsey direkter ti sa set frer swazir ki ti direkter Watch Tower Bible and Tract Society of Pennsylvania. Par kont, an 1971, konsey direkter ti sorti 7 frer pour vin 11 frer e bann frer lo konsey direkter ti nepli neseserman bann direkter sa lasosyasyon. Bann manm konsey direkter ti vwar zot tou egal e tyermenn ti sanze tou le-z-an dapre lord alfabet zot non.

13. (a) Ki laranzman in annan depi 40 an? (b) Ki Konsey Direkter ti fer an 1972?

¹³ Sa lot azisteman ti afekte kongregasyon antye. Dan ki fason? Depi 1932 ziska 1972, se zis en frer ki ti okip kongregasyon antye. Ziska 1936, sa frer ti ganny apele direkter servis. Pli tar, sa non ti ganny sanze pour vin company servant, epi serviter kongregasyon e finalman sirveyan kongregasyon. Sa bann frer ki ti ganny apwente dan kongregasyon ti devoue e zot ti pran swen avek spirityalite troupo. Sirveyan kongregasyon ti souvan fer desizyon pour kongregasyon, san vwar avek lezot serviter dan kongregasyon. Me, diran lannen 1972, Konsey Direkter ti prepare pour en sanzman istorik. Ki sa ti enplike?

14. (a) Ki nouvo laranzman i ti annan apartir le 1 Oktob 1972? (b) Ki mannyer kordinater konsey ansyen i aplik sa konsey dan Filipyen 2:3?

¹⁴ Olye zis en frer ki ti sirveyan kongregasyon dan sak kongregasyon, lezot frer ki ti kalifye dapre Labib ti osi  kapab ganny apwente konman ansyen. Ansanm zot ti pou form en konsey ansyen ki ti pou pran swen avek kongregasyon. Sa nouvo laranzman an rapor avek bann ansyen ti konmanse le 1 Oktob 1972. Ozordi, kordinater konsey ansyen pa mazinen ki li i pli enportan ki lezot ansyen. Plito, i konsider son lekor konman sa enn “ki pli pti.” (Lik 9:48) Eski pa sa bann frer i bann bon legzanp limilite pour nou tou?​—Fili. 2:3.

15. (a) Ki byenfe sa laranzman pour bann kongregasyon annan en konsey ansyen in anmennen? (b) Kwa ki montre ki nou Lerwa i konn sa ki pase?

¹⁵ Sa laranzman pour partaz responsabilite ant bann diferan ansyen dan konsey ansyen in vreman en gran amelyorasyon. Get sa bann byenfe ki i anmennen: Premyerman e pli enportan, sa laranzman i ed tou bann ansyen pour konsyan ki Kris i Sef kongregasyon, malgre zot menm zot annan bann gro responsabilite. (Efe. 5:23) Dezyenmman, parey Proverb 11:14 i dir: “I annan sikse kan i annan plizyer konseye.” Anmezir bann ansyen i diskit ansanm bann problenm ki afekte byennet spirityel kongregasyon, zot egzamin pwennvi kanmarad e dan sa fason zot ganny led pour fer en desizyon ki an armoni avek bann prensip Labib. (Prov. 27:17) Zeova i beni sa bann desizyon e sa bann desizyon i anmenn bon rezilta. Trwazyenmman, lefet ki i  annan bokou plis frer ki kalifye pour vin ansyen, lorganizasyon in kapab annan ase frer pour pran swen avek bann kongregasyon ki kontinyelman ogmante. (Iza. 60:3-5) Zis mazin sa, lakantite kongregasyon in ogmante dan lemonn antye sorti 27,000 an 1971 pour vin apepre 113,000 an 2013! I kler ki avek lasazes, nou Lerwa in donn son bann disip bann berze neseser dan sa bon moman.​—Mik. 5:5.

16. (a) Ki responsabilite bann ansyen i annan? (b) Ki mannyer bann Etidyan Labib ti konsider konsey Zezi pour pran swen avek son bann mouton?

¹⁶ Depi dan lepok bann premye Etidyan Labib, bann ansyen ti deza konpran ki zot ti annan sa responsabilite pour ed bann frer ek ser reste en serviter Bondye. (Lir Galat 6:10.) An 1908, en lartik dan Watch Tower ti konsider sa parol Zezi: “Pran swen avek mon bann mouton.” (Zan 21:15-17) Sa lartik ti dir bann ansyen: “I enportan ki lord nou Met an rapor avek son troupo i annan en plas enportan dan nou leker, nou devret konsider li en privilez pour nouri e pran swen avek bann disip Kris.” An 1925, ankor enn fwa, The Watch Tower ti met lanfaz lo lenportans pour servi konman berze par rapel bann ansyen: “Legliz Bondye i pour li . . . e tou bann ki pe servi zot frer pou bezwen rann kont avek li.”

17. Ki mannyer bann ansyen in ganny led pour vin bann bon berze?

¹⁷ Ki mannyer lorganizasyon Zeova in ed bann ansyen pour amelyor zot abilite konman ansyen, dan en sans pour fer feray vin larzan? I ti donn zot formasyon. An 1959, premye Lekol Minister Rwayonm pour bann ansyen ti ganny fer. En sesyon dan laklas ti egzamin sa size “Donn latansyon personnel.” Bann frer responsab ti ganny ankouraze pour “fer en progranm pour vizit bann proklanmater kot  zot.” Sa sesyon ti montre plizyer fason ki bann berze ti kapab fer sa bann vizit ankourazan. An 1966, Lekol Minister Rwayonm avek en nouvo progranm ti konmanse. I ti egzamin sa size “Lenportans pour vizit bann frer ek ser.” Ki ti pwen prensipal sa sesyon? Bann ansyen i devret “pran swen avek troupo Bondye e an menm tan zot devret pran swen avek zot lakour ek predikasyon.” Pli resaman, plis lekol ankor pour form bann ansyen in ganny fer. Ki’n arive gras a sa formasyon ki lorganizasyon Zeova in donnen? Konmela, dan bann kongregasyon i annan plizyer ansyen kalifye ki pe servi konman bann berze spirityel.

18. (a) Ki gro responsabilite bann ansyen i annan? (b) Akoz Zeova ek Zezi i annan lafeksyon pour bann ansyen ki travay dir?

¹⁸ Bann ansyen in ganny met an plas par Zeova atraver nou Lerwa Zezi Kri pour desarz en gro responsabilite. Ki sa responsabilite? Pour ed pep Bondye fer fas avek sa letan pli kritik dan listwar imen. (Efe. 4:11, 12; 2 Tim. 3:1) Zeova ek Zezi i annan en gran lanmour pour bann ansyen ki travay dir akoz sa bann frer i obei konsey Labib: “Pran byen swen troupo Bondye ki’n ganny konfye avek zot konman berze; pa fer li kontre-ker me avek bonn volonte, . . . zot devre vin en model pour troupo.” (1 Pyer 5:2, 3) Annou egzamin de parmi plizyer fason ki bann berze Kretyen i en legzanp pour troupo e fason ki zot kontribye anver lape ek lazwa dan kongregasyon.

19. Ki mannyer nou santi anver bann ansyen ki akonpanny nou dan predikasyon?

¹⁹ Premyerman, bann ansyen i travay avek manm kongregasyon. Lik, en ekriven Levanzil ti dir: “Zezi ti vwayaz dan plizyer lavil ek vilaz pour pres Bonn Nouvel Rwayonm  Bondye. Son douz disip ti avek li.” (Lik 8:1, nou ki’n met an italik.) Zis parey Zezi ti pres kot a kot avek son bann disip, bann ansyen egzanpler ozordi i travay kot a kot avek zot bann frer ek ser Kretyen dan predikasyon. Zot realize ki kan zot fer sa, zot kontribye anver en bon leta lespri dan kongregasyon. Ki mannyer bann manm kongregasyon i santi anver bann ansyen? Jeannine, en ser dan son bann 80 an i dir: “Pres avek en ansyen dan predikasyon i donn mwan loportinite pour koz avek li e konn li pli byen.” Steven, en frer apepre 35 an i dir, “Kan en ansyen i pres avek mwan kaz an kaz, mon santi ki i anvi ed mwan. Bann led parey i donn mwan en kantite lazwa.”

20, 21. Ki mannyer bann ansyen i kapab imit sa berze dan parabol Zezi? Donn en legzanp. (Vwar osi bwat “ Bann vizit fortifyan tou le semenn.”)

²⁰ Dezyenmman, lorganizasyon Zeova in form bann ansyen pour demontre lentere dan sa bann ki’n elwannyen avek kongregasyon. (Ebr. 12:12) Akoz bann ansyen i bezwen ed sa bann ki feb spirityelman e ki mannyer zot devret fer li? Parabol Zezi lo en berze ek en mouton perdi i donn larepons. (Lir Lik 15:4-7.) Ler sa berze dan sa parabol i remarke ki enn son mouton i manke, i rod li konmsi i sa sel keksoz ki i annan. Ki mannyer bann ansyen dan nou letan i imit legzanp sa berze? Zis parey sa mouton perdi ti presye pour sa berze, sa bann ki’n elwannyen avek pep Bondye i ankor presye dan lizye bann ansyen. Zot konsider sa frer oubyen ser ki feb spirityelman konman en mouton perdi, pa konman enn ki enposib ede. Deplis, zis parey sa berze ti deside pour “al rod sa enn ki’n perdi ziska, ki i retrouv li,” bann ansyen i pran linisyativ pour rod e ed sa bann ki feb.

²¹ Ki sa berze dan sa parabol i fer kan i trouv sa mouton? I zantiman pran li dan son lebra, “met sa mouton lo son zepol” e anmenn li kot leres troupo. Pareyman, lentere senser en ansyen i kapab fer sa dimoun ki feb spirityelman santi konmsi i’n ganny pran dan lebra e sa i kapab ed li retourn dan kongregasyon. Sanmenm ki ti arive avek Victor, en frer Lafrik ki ti aret asosye avek kongregasyon. I rakonte: “Pandan sa wit an ki mon ti’n inaktif, bann ansyen ti kontinyen fer zefor pour rod mwan.” Kwa ki ti tous li? I eksplike: “En zour, John, en ansyen ki mon ti fer Lekol Pionye avek ti pran letan pour vizit mwan e montre mwan serten portre ki nou ti’n tire nou de pandan sa lekol. Sa bann portre ti telman fer mwan mazin en kantite souvenir ki mon ti konmans anvi reganny sa lazwa ki mon ti annan kan mon ti pe servi Zeova.” Pa tro bokou letan apre vizit John, Victor ti retourn dan kongregasyon. Ozordi, Victor in revin en pionye. Sirman, bann ansyen i kontribye en kantite anver nou lazwa.​—2 Kor. 1:24. b

22. Ki mannyer ladrwatir ek lape i promot linite dan kongregasyon? (Vwar osi bwat “ Nou ti emerveye.”)

²² Parey nou’n mansyonnen pli boner, Zeova ti predir ki ladrwatir ek lape ti pou ogmante parmi son pep. (Iza. 60:17) Tou le de kalite i promot linite dan kongregasyon. Dan ki fason? Konsernan ladrwatir, “Bondye, i en sel Zeova.” (Det. 6:4) Son bann standar drwat dan sak kongregasyon dan en pei i parey ki dan en lot pei. Son bann standar lo sa ki byen ek mal i enn sel, e zot parey ‘dan tou bann kongregasyon bann sen.’ (1 Kor. 14:33) Alor, en kongregasyon pou prospere zis ler bann standar Bondye i ganny aplike. An rapor avek lape, nou Lerwa i oule ki nou pa zis anpe, i osi oule ki nou menm nou kontan “fer lape.” (Mat. 5:9) Alor, sanmenm nou “rod sa bann keksoz ki prodwi lape.” Nou pran linisyativ pour rezourd bann problenm ki par ler i leve antre nou. (Rom. 14:19) Dan sa fason, nou kontribye anver lape ek linite dan nou kongregasyon.​—Iza. 60:18.

23. Konman serviter Zeova ozordi, ki benediksyon nou annan?

²³ An Novanm 1895, ler Watch Tower ti fer lanons konsernan laranzman bann ansyen, bann frer responsab osi ti eksprim zot dezir senser. Ki ti zot dezir? Zot ti oule e priye ki sa nouvo laranzman dan kongregasyon i ed pep Bondye pour “vin vitman ver linite nou lafwa.” Ler nou mazin sa plizyer dizenn lannen pase, nou rekonesan ki sa bann sanzman gradyel konsernan laranzman bann ansyen ki Zeova in met an plas atraver nou Lerwa in vreman fortifye nou linite dan ladorasyon. (Ps. 99:4) An rezilta sa, ozordi, pep Zeova dan lemonn antye i dan en gran lazwa anmezir nou mars “avek en menm lespri,” nou swiv menm lepa e servi sa Bondye lape “zepol kont zepol.”​—2 Kor. 12:18; lir Tsefanya 3:9.