1, 2. Mu Rozonḓu 1895, ovikeṋa mbya rundururwa kokambo nga o-Zion’s Watch Tower nu ovakambure ovakwetu va raisa ongaro iṋe?

 INDU Omuhongwa umwe wOmbeibela epatje wena John A. Bohnet tja muna okambo ke nga Zion’s Watch Tower kaRozonḓu 1895, eye wa yoroka tjinene. Okambo nga kari notjipapeko tjarwe otjipe, ku kwa perenderwe oruhungu orure ndwa tungwa popezu nokuvare poo pokakoverwa nu ku ku nerambe ndi tanauka meyuru ngunda akwa zorere. Omatjivisiro ohunga nombuniko ombe yokambo ngo ya ri nepu ndi, “Omuzaro wetu omupe.”

² Otjiṋa hi tja ṱuna ku Mbuti Bohnet tjinene nga tja hinda orutuu ku Mbuti Russell. Eye wa tja: “Mba tjaterwa tjinene okumuna ombuniko ombwa yokambo nga o-Watchtower. Make munika nawa.” Omuhongwa warwe wOmbeibela omuṱakame wena John H. Brown wa tjanga ohunga notjipapeko tjokambo nga na tja: “Tjiri matji nana ombango tjinene. Oruhungu ndwi ru nomazikameno omakukutu, nandarire kutja ozongazona novivepo mavi rivete mu ro, orwo rwa zikama.” Omarundurukiro wotjipapeko tjokambo ngo, onga ri omarundurukiro omatenga ovakambure ovakwetu ngu va muna mombura ndjo, posi yokutja kanga ri omasenina. Mu Tjikukutu ve rihonga ohunga nomarundurukiro warwe omanene. Omarundurukiro nga aaye tjama nomauzeu warwe omanene.

3, 4. Ouzeu waye mbwa hungirirwa mokambo nga o-Watch Tower komayuva 15 ku Tjikukutu 1895, nu omarundurukiro yeṋe omanene nga tjivisiwa?

³ Orupa rwarwe ndwa pitisiwa mokambo nga o-Watch Tower 15 ku Tjikukutu 1895 rwa tjivisa ouzeu mbwa ri po nu aru tja: Pa sekama ouzeu mbwa eta ohaṋi motjira tjOvakonḓonone vOmbeibela. Pa ri nozombata pokati kovakambure ovakwetu kutja owaṋi ngu ma sokuhongorera ombongo. Okuvatera ovakambure ovakwetu mba okumuna kutja otjikeṋa tjaatji heperwa po okuṱuna ombepo yombatasaneno ndjo, orupa ndwo rwa sasaneka otjira tjaJehova ku noskepi. Okuzambo orwo rwa itavera kutja imba mbe hongorera kavena pu va rongerisa otjira tjaJehova tji tji ri tjimuna oskepi, okurwisa ozongaro ozombi. Aape hepa okutjitwa tjike?

⁴ Orupa ndwi rwa raisa kutja omuhinge omusemba woskepi u kondja okuyama omiinyo vya avehe mbe ri moskepi nokutjita kutja ovaungure avehe va puna ye ve rirongerere okuyama omiinyo vyovandu tji kwe ya oumba. Momuano otjingewo, imba mbe  hongorera otjira tjaJehova aave sokukondja kutja ozombongo azehe ze rongerisiwe okutjinda ngamwa ozongaro ozombi. Kutja ve yenenise otjiṋa hi, orupa ndwi rwa tjivisa omarundurukiro warwe omanene. Orwo rwa yandja omurari kutja moruveze rwatjimanga, “mombongo aihe mamu sokutoororwa ovanene vombongo” kutja ve ‘rise orupanda.’—Oviung. 20:28.

5. (a) Ongwaye ondyero ondenga yovanene vombongo tji ya ri otjiraisiro tjomarundurukiro omasemba moruveze ndu ri ro? (b) Matu kahungurira komapuriro yeṋe?

⁵ Ondyero ondenga yovanene vombongo ndjo, ya ri otjiraisiro tjomarundurukiro omasemba moruveze ndu ri ro orondu ya vatera okuzikamisa ozombongo ozonamasa. Oyo ya vatera ovakambure ovakwetu okutuurunga oviṋa ovivi mbya etwa i Ovita vyOuye Ovitenga. Mozombura nḓa kongorera ko, pa tjitwa omarundurukiro warwe motjira tjaJehova nga vatera ovakarere Ve kutja ve yenene okumukarera momuano omusemba. Omakwizikiro yeṋe wOmbeibela nga kwizika omekuriro nga? Omarundurukiro yeṋe motjira tjaJehova ove ngu wa muna? Owo ye ku vatera vi?

6, 7. (a) Etjangwa raJesaja 60:17, ri nomaheero watjike? (b) Embo ndi “ovahonapare” nda ungurisiwa metjangwa ndo mari raisa tjike?

⁶ Otja tji twa muna mEkondwa 9, Jesaja wa kwizika kutja Jehova ma sere ovakarere ve ondaya kutja ve rire ovengi motjivaro. (Jes. 60:22) Posi yokutja, Jehova wa kwizika kutja ma tjiti ovingi kombanda yanao. Momakwizikiro otjingewo, eye wa tja: “Ami me ku etere ongoldo moruveze rwongoporo, nosilveri nongoporo moruveze rwovitenda nomiti, novitenda moruveze rwomawe. Ovahonapare voye kave tji nokukuṋiṋikiza; Ami me ve pe omasorero okuhonapara nousemba nohange.” (Jes. 60:17) Omakwizikiro ngo maye hee tjike? Nu maye ṱunu vi ku eṱe ndino?

⁷ Omakwizikiro waJesaja maye raisa kutja otjiṋa tjimwe matji pingenisiwa notjikwao. Nungwari tjiwa kutja omapingenisiro nga maye hee okurundurura otjiṋa otjiwa okuririsa otjisemba nu kaku rundurura otjiṋa otjivi okuririsa otjiwa. Tji mo pingenisa ongoporo ku nongoldo, okutja mo eta omarundurukiro omasemba nu wina peri nao ohunga noviṋa vyarwe mbya tamunwa metjangwa ndi. Kunao, Jehova wa ungurisa otjisasanekero hi okukwizika kutja ongaro yovakarere ve mai runduruka kouṱiṱiṱiṱi. Omakwizikiro nga maye hungire ohunga nomarundurukiro waye? Mokutamuna “ovahonapare,” Jehova wa raisa kutja mape tjitwa omarundurukiro komuano ovakarere ve mu ve ṱakamisiwa nomuano mu ve hongorerwa.

8. (a) Omekuriro nga tamunwa momakwizikiro waJesaja ya etwa i uṋe? (b) Omarundurukiro nga ye tu vatera vi? (Wina tara kokaongo nga “ Eye wa yakura omavyuriro nomerisusuparisiro.”)

⁸ Ouṋe ngu eta omekuriro nga motjira tjaJehova? Jehova ma tja: ‘Ami me ku etere ongoldo nosilveri,’ ‘Ami me ve pe omasorero okuhonapara nohange.’ Okutja tjiri omarundurukiro mondyero yombongo kaya etwa i ozongondjero zovandu, nungwari ya etwa i Jehova omuini. Nu okuza koruveze Jesus tja zikwa otjOmbara, Jehova wa eta omarundurukiro nga okupitira mOmuna we. Omarundurukiro nga ye tu vatera vi? Etjangwa otjingero mari raisa kutja omarundurukiro nga maye eta ‘ohange nousemba.’ Otja tji matu yakura omirari vyaMukuru nokutjita omarundurukiro, tu kara nohange, tu suvera ousemba nu ihi tji tu hinga okukarera Jehova. Paulus wa tja Eye ‘oNdjambi ngu yandja ohange.’—Fil. 4:9.

9. Otjikeṋa tji tji eta ouhirona nombwaneno yatjiri mombongo nu omena ratjike?

 ⁹ Paulus wa tjanga nai ohunga na Jehova: “Orondu Ndjambi tje he ri Ndjambi wouhazendu, nungwari Eye tje ri Ndjambi wouhirona nowohange.” (1 Kor. 14:33) Paulus wina wa sasaneka ouhazendu ku nohange. Omena ratjike? Ripurira ku imbi: Ouhirona ouni uriri kau eta ozongaro zohange. Okutara kotjihorera, otjimbumba tjovarwe mape ya atji munika ouhirona tji matji nḓerere, posi yokutja omanḓererero watjo nga, ye kaeta ovita nungwari kahange. Okutja otjOvakriste matu sokuyandja ombango kouatjiri mbwi: Otjira ngamwa atjihe tji tji ha zikamisiwa mohange, kombunda matji kawa. Posi yokutja ohange ndji za ku Mukuru i tunduuza ombwaneno ongarerere. Kunao, tu nondangi tjinene kutja otjira tjetu tji hongorerwa nokuṱunwa i “Ndjambi ngu yandja ohange”! (Rom. 15:33) Ohange ndji za ku Mukuru i tunduuza ouhirona nombwaneno yatjiri ndji tu tjatera tjinene mozombongo zetu mouye auhe.—Eps. 29:11.

10. (a) Omarundurukiro yeṋe nga tjitwa motjira tjaJehova ozombura ozonguru? (Tara kokaongo nga “ Omuano wokuhongorera ombongo wa runduruka vi?”) (b) Omapuriro yeṋe ngu maku ka hungirirwa nai?

¹⁰ Okaongo nga “ Omuano wokuhongorera ombongo wa runduruka vi?” make tu raisire omarundurukiro omanahepero nu wouhirona nga tjitwa motjira tjaJehova mozombura ozonguru. Nu hapo omarundurukiro waye ‘okuza kongoporo okurira ongoldo’ Jehova nga tjita mozombura nḓa kapita okupitira mOmbara yetu? Omarundurukiro momahongorero ngo ya eta vi ohange nombwaneno mozombongo mouye auhe? Oyo ye ku vatera vi okukarera “Ndjambi ngu yandja ohange”?

11. (a) Omakonḓononeno wOmatjangwa ya eta omarundurukiro yeṋe momazuviro wovakarere vaJehova? (b) Ovakambure ovakwetu vorutu orunane ve rimanenene okutjita tjike?

¹¹ Okuza mombura ndji 1964 nga 1971, orutu orunane aaru hongorere omahongero wOmbeibela ngaaye konḓonona omapu tjimuna ohunga nokutja ombongo yOvakriste veserewondo etenga aai kayendisiwa vi. a Ohunga nomazikameno wotjira tjaJehova, omakonḓononeno yemwe ya raisa kutja omahongorero wombongo meserewondo etenga aaye tjitwa i orutu rwovanene vombongo moruveze rwokuhongorerwa i omunene umwe wombongo poo omutarere. (Lesa Ovafilipi 1:1; 1 Timoteus 4:14.) Epu ndi tji ra zuvakwa nawa, orutu orunane rwa muna kutja Ombara yawo, Jesus aai ve hongorere mokutjita omarundurukiro motjira tjovakarere vaMukuru nu owo ve rimanenene okuriwisa kehi yomahongorero wOmbara. Owo va hakahana okutjita omarundurukiro kutja ve ute okukongorera omirari mbi ri mOmbeibela ohunga nomazikiro wovanene vombongo. Omarundurukiro yeṋe nga tjitwa momautiro wozombura nḓa 1970?

12. (a) Omarundurukiro waye nga tjitwa korutu orunane? (b) Kahurura kutja Orutu Orunane nai ru kayendisiwa vi. (Tara kokaongo nga “ Omuano Orutu Orunane mu ru ṱakamisa ovihepwa vyOuhona,” omukuma 130.)

¹² Omarundurukiro omatenga aaye tjama norutu orunane oruini. Oruveze ndwo ovarumendu ovatwirisiwa mbo aave zikama movandu 7 uriri mbaave tjiukwa otjorupa oruhongore rwo-Watch Tower Bible and Tract Society of Pennsylvania. Nungwari mombura ndji 1971, orutu orunane rwa neneparisiwa okuza  kovandu 7 nga 11 nu kaave tjiukwa rukwao otjorupa ndu hongorera. Ouṋepo wawo aau rivara otjovandu mbe ri pondondo imwe nu auhe wawo aa pewa oruveze rwokurira omuhaamise otja kongongorasaneno yomana wawo.

13. (a) Ondyero iṋe ndja zikamisiwa oure wozombura 40? (b) Orutu Orunane rwa tjita tjike mombura ndji 1972?

¹³ Omarundurukiro oyetjakwao ya ṱuna kombongo aihe. Omomuano uṋe? Okuza kombura ndji 1932 nga 1972, omurumendu omukambure umwe uriri ongwaa hongorere ombongo. Okuza koruveze ndwo nga kombura ndji 1936, omurumendu ngwa zikwa ngwi aa isanewa omuhongore woviungura vyokuzuvarisa. Okuzambo ena ndo ra rundururwa okurira omuvatere wombongo nu korusenina aa isanewa omutarere wombongo. Ovarumendu ovakambure mbo aave ṱakamisa ozonḓu zaJehova kutja ze kare noupanga ouwa kuna Ye. Omutarere wombongo potuingi aa tjiti ozondando nḓu maze tjama nombongo nu aa zuvasana novavatere varwe mombongo. Nungwari mombura ndji 1972, Orutu Orunane rwa tjita omarundurukiro warwe omanene. Omarundurukiro ngo aaye tjama na tjike?

14. (a) Ondyero iṋe ombe ndja zikamisiwa 1 raSeninaṋi 1972? (b) Omuworonganise worutu rwovanene vombongo u ṱakamisa vi eronga ndi ri mOvafilipi 2:3?

¹⁴ Moruveze rwokutoorora omurumendu umwe uriri okurira omutarere mombongo aihe, nai ovarumendu varwe ovakambure mba pwa okuzikwa otjovanene vombongo otja komirari mbi ri mOmatjangwa, va uta okukarera otjovanene vombongo. Owo avehe pamwe aave yenene okurira orutu rwovanene vombongo ndu maru hongorere ombongo. Ondyero ombe yovanene vombongo  ndji, ya uta 1 raSeninaṋi 1972. Kundino omuworonganise worutu rwovanene vombongo ke rivara omuini otjomundu omunanḓengu tjinene povanene vombongo ovakwao, nungwari u rivara otja ‘ngu ri okaṱiṱi pu wo.’ (Luk. 9:48) Okukara novarumendu overisusuparise mba, tjiri ondaya onene keṱunḓu retu rovakambure mouye auhe!—Fil. 2:3.

15. (a) Ondyero yozombongo ohunga nokukara norutu rwovanene vombongo ya eta ombatero yatjike? (b) Otjikeṋa tji tji raisa kutja Ombara yetu ya raisa ounongo?

¹⁵ Ondyero yorutu rwovanene vombongo yokuhaṋasana omerizirira mombongo ya eta omarundurukiro omanene. Tara komiano vitatu omarundurukiro nga mu ya eta ombatero: Omutenga, ondyero ndji i vatera ovanene avehe vombongo okutjiwa kutja Jesus ongu ri Otjiuru tjombongo, kaina tja kutja ve nomerizirira omanene mombongo poo indee. (Ef. 5:23) Omuano outjavari, etjangwa rOmiano 11:14 mari tja: “Ovayandjandunge ovengi owo ondjamo.” Otja ovanene vombongo tji mave zuvasana ohunga noviṋa mbi mavi ṱunu koupanga wovandu mombongo kuna Jehova nokuyandja ombango kondunge ndji mave pasana, ku ve vatera okuya kepu rimwe nda zikamena komirari vyOmbeibela. (Omiano 27:17) Jehova u sera ozondando otja inḓo ondaya nu ihi tji eta ondoṋeno. Omuano outjatatu, okukara novarumendu ovakambure ovengi mba pwa okurira ovanene vombongo, kwa vatera otjira tjaJehova okuyenenisa ouhepe wovatarere novarise okuṱakamisa ozombongo. (Jes. 60:3-5) Ripurira uriri komuano otjivaro tjozombongo mouye auhe mu tja  yeruruka okuza 27 000 mombura ndji 1971 nga kozombongo zokombanda 113 000 mombura ndji 2013! Oukahu kutja, nounongo Ombara yetu ya yandja ovarise moruveze ndu ri ro kovakongorere vayo.—Mika 5:5.

16. (a) Ovanene vombongo ve nomerizirira waye? (b) Ovakonḓonone vOmbeibela aave vara vi erakiza raJesus nda tja, “risa ozonḓu zandje”?

¹⁶ Rukuru indu Ovakonḓonone vOmbeibela tji va uta, ovanene vombongo aave tjiwa kutja va ri nomerizirira wokuvatera ovakambure ovakwao okuṱakama otjovakarere vaMukuru. (Lesa Ovagalate 6:10.) Mombura ndji 1908, orupa rumwe ndwa pita mokambo nga o-Watch Tower rwa hungirira kerakiza raJesus nda tja: “Risa ozonḓu zandje.” (Joh. 21:15-17) Orupa ndwo rwa tja nai kovanene vombongo: “Erakiza raMuhona wetu ohunga nozonḓu matu sokurivara otjotjiṋa otjinanḓengu tjinene nu mari sokutuhinga okuvara otjiungura tjokurisa nokuṱakamisa ovakongorere vaMuhona otjondjingonekero onene.” Mombura ndji 1925, okambo nga The Watch Tower ka ṋunisa rukwao ounanḓengu wokukarera otjovanene vombongo nake tja: “Okereka yaMukuru oye omuini, . . . nu ma vara avehe otja mbe nomerizirira nondjingonekero yokukarera ovakambure ovakwao.”

17. Ovatarere vombongo va vaterwa vi okurira ovarise ovasemba?

¹⁷ Otjira tjaJehova tja vatera vi ovanene vombongo okurundurura ondjiviro yawo otjovarise okuza ‘kovitenda okurira osilveri’? Otjo tje ve pa omahongero. Mombura ndji 1959, Oskole yOviungura vyOuhona ondenga kovatarere otji ya utwa. Orupa rumwe romahongero rwa ṱuna kepu ndi, “Okuyandja ombango yapeke kozonḓu.” Ovarumendu ovakambure mba ri nomerizirira motjiungura tjaJehova va tunduuzwa “okuriṱunina ongongorasaneno yokukavarura ovazuvarise mozoyawo.” Omahongero ngu va muna ya hungirira komiano pekepeke ovarise mu mave yenene okutjita kutja omavaruriro wawo ngo ye rire omatunge. Mombura ndji 1966, pa utwa Oskole yOviungura vyOuhona ombe.  Oyo ya hungirira kepu ndi, “Ounanḓengu woviungura vyokurisa ozonḓu.” Epu riṋe nda ri ehongonekwa momahongero ngo? Imba mbe hongorera ombongo “ve sokukara norupa mokuyandja ombango kozonḓu zaMukuru nungwari wina mave sokuyandja ombango yapeke koveṱunḓu rawo na kotjiungura tjokuzuvarisa.” Mozombura nḓa kapita, mwa utwa ozoskole ozengi zokurongerisa ovanene vombongo. Omahongero otjira tjaJehova ngu tja yandja nga, ya eta ovikongorere ko viṋe? Nai, ombongo yOvakriste i novarumendu ovengi mbe nondjiviro ombwa yokurira ovarise vozonḓu zaJehova.

18. (a) Ovanene vombongo va pewa oviungura viṋe ovinene? (b) Ongwaye Jehova na Jesus tji va suvera ovanene vombongo mbe ungura oukukutu?

¹⁸ Ondyero yovanene vombongo yOvakriste ya zikamisiwa i Jehova okupitira mOmbara yetu Jesus kutja ve yenenise oviungura ovinene mbi va pewa. Oviungura viṋe mbyo? Oviungura vyokuhongorera ozonḓu zaMukuru moruveze oruzeu tjinene momakuruhungi aehe wovandu. (Ef. 4:11, 12; 2 Tim. 3:1) Jehova na Jesus va suvera ovanene vombongo mbe ungura noupandi, orondu owo ve ṱakamisa eronga rOmbeibela ndi mari tja: ‘Rireye ovarise ovasemba vorupanda Ndjambi ndwa yandja ku eṋe . . . nu mu ru ṱakamise nombango yeṋu oveni . . . , rireye otjihorera korupanda.’ (1 Petr. 5:2, 3) Ngatu tare komiano vivari ovarise vombongo mu mave yenene okurira otjihorera kozonḓu nokutunduuza ohange nenyando mombongo.

19. Tu vara vi ovanene vombongo mbe ungura puna eṱe motjiungura tjokuzuvarisa?

¹⁹ Omuano omutenga, ovanene vombongo ve ungura ku nouṋepo mombongo. Omutjange wEvangeli wena Lukas wa tja nai ohunga na Jesus: “Jesus wa ryangere movihuro na movirongo ama zuvarisa Ombuze Ombwa youhona waNdjambi. Ovahongewa mba omurongo na vevari va ya puna Ye.” (Luk. 8:1) Tjimuna Jesus tjaa zuvarisa pu novaapostele ve, ovanene vombongo  votjihorera otjiwa ndino wina ve ungura pu novakambure ovakwao motjiungura tjokuzuvarisa. Owo ve tjiwa kutja tji va tjiti nao, mave tunduuza ombwaneno mombongo. Ovandu mombongo ve tara vi kovanene vombongo mbe nombepo ndjo? Omukazendu omukambure wena Jeannine wotjiwondo tjozombura 80 notjihupe wa tja: “Okuungura pu nomunene wombongo motjiungura tjokuzuvarisa ku ndji pa oruveze oruwa okuhungira kuna ye nokumutjiwa nawa.” Omurumendu omukambure wena Steven wotjiwondo tjozombura 30 notjihupe wa tja: “Indu omunene wombongo tji ma ungura puna ami motjiungura tjokuzuvarisa, mbi muna kutja eye ma vanga okundjivatera. Okuyakura ombatero ndjo ku ndji pa enyando.”

20, 21. Ovanene vombongo mave yenene vi okuhorera komurise mehungi raJesus? Yandja otjihorera. (Wina tara kokaongo nga “ Omavaruriro wotjivike atjihe nga eta ovihape oviwa.”)

²⁰ Omuano outjavari, otjira tjaJehova tja honga ovanene vombongo okuraisa onḓero mu imba mba poka kombongo. (Hebr. 12:12) Ongwaye ovanene vombongo tji mave sokuvatera imba mba ngundipara mongamburiro nu mave sokuuta vi okuvevatera? Ehungi raJesus ohunga nomurise nonḓu ndja pandjarere mari tupe omaziriro kepuriro ndo. (Lesa Lukas 15:4-7.) Indu omurise mehungi ndo tja muna kutja onḓu imwe ya pandjara, eye wa paha onḓu ndjo aayo oyo aiyerike ndje na yo. Ovanene vombongo ndino ve horera vi kotjihorera omurise ngwi tja raisa? Otja onḓu ndja pandjara tji i ri otjiṋa otjihuze komurise, imba mba poka kovakambure ovakwao wina ovahuze kovanene vombongo. Owo ve vara omundu ngwa ngundipara mongamburiro otjonḓu ndja pandjara, nungwari kave mu vara otjomundu ngu morosa oruveze rwawo. Nu wina otja omurise tje tya kutja ma ‘kateza onḓu ndja pandjara, nga tje i munu,’ ovanene vombongo wina ve tjita ozongondjero zokupaha nokuvatera imba mba ngundipara.

²¹ Omurise mehungi wa tjita vi tja muna onḓu ndja pandjarere? Eye we i toora nongengezero, “e i twa koviṱuve vye,” nu e i yarura konganda. Momuano otjingewo, omunene wombongo tja raisa onḓero okuza komutima we tjiri, mape ya a yanḓiparisa omundu ngwa ngundipara mongamburiro tjinene nu e mu vatere okuyaruka kombongo. Ihi itjimwe tjoviṋa mbya vatera Victor, omurumendu omukambure moAfrika ngwa isa okuyenda kozombongarero zombongo. Eye wa tja: “Mozombura 8 nḓu mba pokere kouatjiri, ovanene vombongo va kara pokukondja okundjivatera.” Hapo otjikeṋa tji tje mu ṱuna tjinene? Eye wa tja: “Eyuva rimwe, omunene wombongo wena John ngu twa ri pamwe kOskole yOviungura vyOvakandjira, we yekundjivarura ne ndji raisire oviperendero tjiva mbi twa perendwa pamwe tji twa ri koskole ndji. Ovyo vye ndji zemburukisa ohunga noviṋa oviwa nga tji mba uta okuzera okukara nondjoroka ndji mba ri na yo indu tjee karere Jehova.” Tjimanga kombunda yanao Victor wa uta okuyenda kozombongarero zombongo. Kundino eye wa uta okukarera otjomukandjira rukwao. Tjiri, ovanene vombongo mbe nonḓero mu eṱe ve tupa enyando.—2 Kor. 1:24. b

22. Ousemba nohange wa eta vi ombwaneno mombongo yOvakriste? (Wina tara kokaongo nga “ Eṱe twa ri nondjoroka ohimise.”)

²² Otja tji twa munu rukuru, Jehova wa kwizika kutja ousemba nohange mavi kurire ko mokati kovakarere Ve. (Jes. 60:17) Ovikaṋena aviyevari mbi vi eta ombwaneno mozombongo. Omomiano viṋe? Ohunga nousemba, “Muhona Eye erike Ndjambi wetu.” (Deut. 6:4) Eye ka yandja omirari vyorive kombongo imwe na yandja vyarwe kombongo yarwe. Nungwari omirari vye ohunga nouwa nouvi ivimwe “mozombongo azehe zovakriste.” (1 Kor. 14:33) Kunao, ombongo mai yenene okukura porwayo indu omirari vyaMukuru tji vya ṱakamisiwa. Ohunga nohange, Ombara yetu kai vanga kutja tu kare nohange mombongo uriri, nungwari wina i vanga kutja tu rire ovandu mbe “hangana.” (Mat. 5:9) Okutja, matu “sokupyukira oviṋa, mbi eta ohange.” Matu sokutjita ozongondjero zokuṱuna ozondjakaha nḓu mape ya aze kara pokati ketu novakambure ovakwetu. (Rom. 14:19) Momuano mbwo, otji matu eta ohange nombwaneno mombongo yetu.—Jes. 60:18.

23. Ovikeṋa mbi tu yorokera ndino otjovakarere vaJehova?

²³ Mu Tjikukutu wombura ndji 1895, indu okambo nga o-Watch Tower tji ka tjivisa ohunga nondyero ondenga yovanene vombongo, ovarumendu mbe nomerizirira mombongo wina va raisa onḓero yawo. Onḓero yawo ya ri oyokutjita tjike? Owo va ri nonḓero kutja ondyero ombe ndji i vatere ovakarere vaMukuru kutja “ve hakahane okuwana mongamburiro,” nu va kumbira otjiṋa hi. Tji twa tara kozombura nḓa kapita, tu nonyuṋe okumuna kutja omarundurukiro nga tjitwa momahongorero wovakarere vaMukuru nga etwa i Jehova okupitira mOmbara yetu, tjiri ya eta oruwano momerikotameneno wetu. (Eps. 99:4) Kunao, ovakarere vaJehova mouye auhe ve nondjoroka kutja ve kayenda “mombepo tjingeyo,” ve twara “ondjira tjingeyo,” nu “owo avehe” ve karera “Ndjambi Eye ngu yandja ohange.”—2 Kor. 12:18; lesa Sefanja 3:9.