1, 2. Idi Enero 1895, ania ti nabaliwan iti Zion’s Watch Tower, ket ania ti reaksion dagiti kakabsat?

 NAAYATAN ni John A. Bohnet, a naregta nga Estudiante ti Biblia, idi naawatna ti Enero 1895 a ruar ti Zion’s Watch Tower. Napintas ti baro nga akkub ti magasin​—maysa dayta a ladawan ti parola nga adda iti nadawel a baybay ken agranraniag iti nasipnget a tangatang. Ti pakaammo maipapan iti baro a disenio ti akkub ti magasin ket napauluan iti “Our New Dress” (Ti Baro a Kawestayo).

² Gapu iti ragsakna, nagsurat ni Kabsat Bohnet ken ni Kabsat Russell. Imbagana a maayatan iti napintas nga itsura ti Watchtower. Kastoy ti insurat ti sabali pay a matalek nga Estudiante ti Biblia a ni John H. Brown maipapan iti akkub: “Naidumduma dayta. Ipakitana a nagtibker ti pundasion ti torre uray no duparen ti dalluyon ken bagyo.” Ti baro nga akkub ti umuna kadagiti panagbalbaliw a nakita dagiti kakabsat iti dayta a tawen​—ngem saan a dayta ti maudi. Iti Nobiembre, adda manen ti dakkel a panagbalbaliw. Makapainteres ta mainaig met laeng iti nadawel a baybay.

3, 4. Ania a problema ti nailawlawag iti Nobiembre 15, 1895 a ruar ti Watch Tower? Ania a dakkel a panagbalbaliw ti naipakaammo?

³ Adda detalyado nga artikulo a naipablaak iti Nobiembre 15, 1895 a ruar ti Watch Tower maipapan iti maysa a problema: Madaddadael ti talna iti asosasion, wenno organisasion, dagiti Estudiante ti Biblia gapu kadagiti arig dalluyon a riribuk. Kumarkaro ti riri dagiti kakabsat maipapan iti no siasino ti mangidaulo iti lokal a kongregasion. Tapno matulongan dagiti kakabsat a mangrisut iti panagsisinnalisal nga agresulta iti panagsisina, ti artikulo inyarigna ti organisasion iti maysa a barko. Kalpasanna, sipaprangka nga imbaga ti artikulo a dagiti mangidadaulo saanda a naisagana ti arig barko nga organisasion iti narungsot a bagyo. Ania ti masapul a maaramid?

⁴ Kuna ti artikulo a ti nalaing a kapitan ti barko siguraduenna nga adda umdas nga alikamen a pangsalbar iti biag ken ammo dagiti marinero ti ar-aramidenda no adda bagyo. Umasping iti dayta, masapul a siguraduen dagiti mangidadaulo iti organisasion a nakasagana ti amin a kongregasion no dumteng dagiti arig bagyo a kasasaad. Tapno maaramid dayta, naipakaammo iti artikulo  ti dakkel a panagbalbaliw. Kunana nga iti “tunggal company [wenno, kongregasion], adda dagiti mapili a panglakayen” a “‘mangidaulo’ iti arban” ket dagus a maipatungpal dayta.​—Ara. 20:28.

5. (a) Apay a naintiempuan ti damo nga urnos maipapan kadagiti panglakayen para iti panagrang-ay? (b) Ania dagiti saludsod nga usigentayo?

⁵ Ti damo nga urnos maipapan kadagiti panglakayen ket naintiempuan tapno mapatibker ti kongregasion. Daytoy ti nakatulong kadagiti kakabsat tapno malasatanda dagiti arig dalluyon a kasasaad gapu iti Sangalubongan a Gubat I. Kadagiti simmaganad a dekada, adda manen dagiti panagrang-ay iti organisasion a nakatulong iti ili ti Dios nga ad-adda a nakasagana nga agserbi ken ni Jehova. Ania a padto iti Biblia ti nangipakpakauna iti daytoy a panagrang-ay? Ania dagiti nakitam a panagbalbaliw iti organisasion? Kasanoka a nagunggonaan kadagita?

6, 7. (a) Ania ti kaipapanan ti Isaias 60:17? (b) Apay a nausar ti sasao a ‘manangaywan’ ken ‘manangituding iti akem’?

⁶ Kas naammuantayo iti Kapitulo 9, impadto ni Isaias nga umadu ti bilang ti ili ni Jehova. (Isa. 60:22) Ngem saan la a dayta ti inkari ni Jehova nga aramidenna. Iti dayta met laeng a padto, kinunana: “Imbes a ti gambang mangyegakto iti balitok, ket imbes a ti landok mangyegakto iti pirak, ket imbes a ti kayo, gambang, ket imbes a ti batbato, landok; ket dutokakto ti talna kas dagiti manangaywanmo ken ti kinalinteg kas dagiti manangitudingmo iti akem.” (Isa. 60:17) Ania ti kaipapanan daytoy a padto? Kasano nga agaplikar daytoy kadatayo ita?

⁷ Iti padto ni Isaias, ti maysa a material ket mabaliwan iti sabali. Ngem paliiwenyo ta ti panagbalbaliw ket saan a manipud iti dakes nga agbalin a nasayaat, no di ket manipud iti nasayaat nga agbalin a nasaysayaat pay. Ti gambang agbalin a balitok, ket kasta met laeng ti mapasamak kadagiti dadduma pay a material a nadakamat. Gapuna, maysa daytoy a panangiladawan no ania dagiti addang nga aramiden ni Jehova tapno sumayaat ti kasasaad ti ilina. Ania a panagrang-ay ti tuktukoyen ti padto? Babaen ti panangdakamatna iti sasao a ‘manangaywan’ ken ‘manangituding iti akem,’ ipaspasimudaag ni Jehova nga in-inut a sumayaat ti wagas a pannakaaywan ken pannakaorganisar ti ilina.

8. (a) Siasino ti makinggapuanan iti panagrang-ay a nadakamat iti padto ni Isaias? (b) Kasanotayo a magunggonaan kadagita a panagrang-ay? (Kitaenyo met ti kahon a “ Sipapakumbaba a Nagpailinteg.”)

⁸ Siasino ti makinggapuanan iti panagrang-ay ti organisasion? Kinuna ni Jehova: “Mangyegakto iti balitok,” “mangyegakto iti pirak,” ken “dutokakto ti talna.” Wen, dagiti panagrang-ay iti pannakaorganisar ti kongregasion ket saan a gapu iti panangikagumaan ti tao, no di ket gapu ken Jehova a mismo. Ken manipud idi naisaad ni Jesus kas Ari, inyeg ni Jehova dagitoy a panagrang-ay babaen ti Anakna. Kasanotayo a magunggonaan kadagitoy a panagbalbaliw? Kuna ti isu met laeng a teksto a dagitoy a panagrang-ay ket agresulta iti “talna” ken “kinalinteg.” No agpaiwanwantayo iti Dios ken awatentayo dagitoy a panagbalbaliw, adda talna iti nagbabaetantayo ket ti ayattayo iti kinalinteg ti mangtignay kadatayo nga agserbi ken ni Jehova, a dineskribir ni apostol Pablo kas “Dios ti talna.”​—Fil. 4:9.

9. Ania ti umiso a pundasion ti urnos ken panagkaykaysa ti kongregasion, ken apay?

 ⁹ Kastoy met ti insurat ni Pablo maipapan ken ni Jehova: “Ti Dios ket Dios, saan a ti riribuk, no di ket ti talna.” (1 Cor. 14:33) Paliiwenyo ta saan nga inggidiat ni Pablo ti riribuk iti urnos, no di ket iti talna. Apay? Panunotenyo daytoy: Ti urnos ket saan a kanayon a mangyeg iti talna. Kas pagarigan, mabalin a naurnos ti panagmartsa ti grupo dagiti soldado, ngem ti naurnos a panagmartsada ket agturong iti gubat, saan a talna. Kas Kristiano, laglagipentayo ngarud daytoy a napateg a kinapudno: Aniaman nga urnos nga awanan iti talna kas pundasionna ket marba iti di agbayag. Maisupadi iti dayta, ti nadiosan a talna itandudona ti kita ti urnos nga awan patinggana. Gapuna, anian a yamantayo ta ti organisasiontayo ket iwanwanwan ken guggugoran “ti Dios a mangipaay iti talna”! (Roma 15:33) Ti talna manipud iti Dios ti pundasion ti makagunggona nga urnos ken ti naimpusuan a panagkaykaysa a tagtagiragsaken ken ap-apresiarentayo unay kadagiti kongregasiontayo iti intero a lubong.​—Sal. 29:11.

10. (a) Kadagiti nagkauna a tawen, ania dagiti panagrang-ay a napasamak iti organisasiontayo? (Kitaenyo ti kahon a “ No Kasano a Simmayaat ti Wagas ti Panangaywan.”) (b) Ania dagiti saludsod nga usigentayo ita?

¹⁰ Ti kahon a “ No Kasano a Simmayaat ti Wagas ti Panangaywan” ket maipapan iti makagunggona ken naurnos a panagbalbaliw iti organisasiontayo kadagiti nagkauna a tawtawen. Ngem ania dagiti panagbalbaliw manipud ‘gambang nga agbalin a balitok’ ti nabiit pay nga inyeg ni Jehova babaen ti Aritayo? Kasano a dagidiay a panagbalbaliw iti panangaywan pinarayrayna ti talna ken panagkaykaysa dagiti kongregasion iti intero a lubong? Kasano a nakatulong dagita kenka nga agserbi iti “Dios ti talna”?

11. (a) Ti panangadal iti Kasuratan ket nangyeg iti ania a panagbalbaliw iti pannakatarustayo? (b) Ania ti determinado nga aramiden dagiti miembro ti bagi a manarawidwid?

¹¹ Manipud idi 1964 agingga idi 1971, indauluan ti bagi a manarawidwid ti nasaknap a proyekto a panangadal iti Biblia, nga inusigda ti adu a topiko a pakairamanan ti panagandar ti kongregasion Kristiano idi umuna a siglo. a No maipapan iti organisasion, naammuanda a ti mangidadaulo kadagiti kongregasion idi umuna a siglo ket bagi dagiti panglakayen, saan a maymaysa laeng a panglakayen, wenno manangaywan. (Basaen ti Filipos 1:1; 1 Timoteo 4:14.) Idi limmawag ti pannakatarusda iti dayta, naamiris ti bagi a manarawidwid a ti Arida a ni Jesus ti mangiwanwanwan kadakuada a mangaramid kadagiti panagbalbaliw iti wagas a pannakaorganisar ti ili ti Dios ket determinado dagiti miembro ti bagi a manarawidwid nga agpasakup iti bilin ti Ari. Dagus a nangaramidda kadagiti panagbalbaliw tapno masurotda ti kuna ti Biblia maipapan iti urnos a panangdutok kadagiti panglakayen. Ania ti sumagmamano a panagbalbaliw a napasamak iti umuna a paset ti 1970’s?

12. (a) Ania ti naaramid a panagbalbaliw iti bagi a manarawidwid? (b) Iladawanyo ti pannakaorganisar ita ti Bagi a Manarawidwid. (Kitaenyo ti kahon a “ No Kasano nga As-asikasuen ti Bagi a Manarawidwid Dagiti Interes ti Pagarian.”)

¹² Ti umuna a panagbalbaliw ket agaplikar a mismo iti bagi a manarawidwid. Idi, dayta a grupo ti napulotan a kakabsat ket buklen ti pito a miembro ti board of directors ti Watch Tower Bible and Tract Society of Pennsylvania. Ngem idi 1971, saan laengen a 7 ti mangbukel iti bagi a manarawidwid no di ket 11 ken  naiduman iti board of directors. Saan nga ibilang dagiti miembro a natantan-okda ngem kadagiti dadduma ken tinawen nga agsukat ti tserman sigun iti panagsasaganad ti apeliedoda iti alpabeto.

13. (a) Ania nga urnos ti naipatungpal iti 40 a tawen? (b) Ania ti inaramid ti Bagi a Manarawidwid idi 1972?

¹³ Ti sumaruno a panagbalbaliw inapektaranna ti tunggal kongregasion. Kasano? Manipud idi 1932 agingga idi 1972, kaaduanna a maysa laeng a kabsat a lalaki ti mangidadaulo iti kongregasion. Service director ti awag iti dayta a nadutokan a kabsat agingga idi 1936. Kalpasanna, nasuktan dayta nga awag iti company servant, sa congregation servant, ken manangaywan ti kongregasion idi agangay. Sireregta nga inasikaso dagiti nadutokan a kakabsat a lallaki ti naespirituan a pagsayaatan ti arban. Gagangay a ti manangaywan ti kongregasion ti mangaramid kadagiti desision para iti kongregasion uray no saan nga agkonsulta kadagiti dadduma a servant. Ngem idi 1972, adda inaramid ti Bagi a Manarawidwid a nangyeg iti panagbalbaliw iti historia. Ania ti ramanen dayta a panagbalbaliw?

14. (a) Ania a baro nga urnos ti naipatungpal idi Oktubre 1, 1972? (b) Kasano nga iyap-aplikar dagiti koordineytor ti bagi dagiti panglakayen ti balakad iti Filipos 2:3?

¹⁴ Imbes a maysa laeng a kabsat a lalaki ti agserbi kas manangaywan ti kongregasion iti tunggal kongregasion, mabalinen ti mangdutok kadagiti dadduma a kakabsat nga agserbi kas Kristiano a panglakayen no la ket ta maragpatda dagiti Nainkasuratan a kualipikasion. Dagitoy ti mangbukel iti bagi dagiti panglakayen a mangaywan iti lokal a kongregasion. Naipatungpal ti baro nga  urnos maipapan kadagiti panglakayen idi Oktubre 1, 1972. Ita, dagiti koordineytor ti bagi dagiti panglakayen saanda nga ibilang ti bagida a nangatngato ngem kadagiti dadduma no di ket “kas maysa a nanumnumo.” (Luc. 9:48) Talaga a bendision dagita a napakumbaba a kakabsat iti sangalubongan a panagkakabsat!​—Fil. 2:3.

15. (a) Ania dagiti pagsayaatan ti urnos a dagiti kongregasion ket maaddaan iti bagi dagiti panglakayen? (b) Ania ti mangipakita a nagtignay a nainsiriban ti Aritayo?

¹⁵ Maibilang a dakkel a panagrang-ay ti urnos maipapan iti panagtitinnulong ti miembro dagiti bagi dagiti panglakayen a mangibaklay kadagiti responsabilidad iti kongregasion. Panunotenyo dagitoy a tallo a pagsayaatanna: Kangrunaan iti amin, ti urnos tulonganna ti amin a panglakayen​—kasanoman ti kadagsen ti responsabilidadda iti kongregasion​—nga agbalin a sipapanunot a ni Jesus ti Ulo ti kongregasion. (Efe. 5:23) Maikadua, kuna ti Proverbio 11:14: “Adda pannakaisalakan iti kinaadu dagiti manangbalakad.” No pagsasaritaan dagiti panglakayen dagiti banag a mangapektar iti pagsayaatan ti kongregasion iti naespirituan ken tingitingenda ti singasing ti tunggal maysa, makaaramidda kadagiti desision a maitunos kadagiti prinsipio iti Biblia. (Prov. 27:17) Bendisionan ken pagballigien ni Jehova dagiti kasta a desision. Maikatlo, no ad-adu a kualipikado a kakabsat ti agserbi kas panglakayen, ad-adda a maasikaso ti organisasion ti dumakdakkel a panagkasapulan para kadagiti manangaywan ken mangipastor  kadagiti kongregasion. (Isa. 60:3-5) Panunotenyo daytoy​—ti nasurok a 27,000 a bilang dagiti kongregasion iti intero a lubong idi 1971 ket nagbalinen a nasurok a 113,000 idi 2013! Nalawag a nagtignay a nainsiriban ti Aritayo iti panangipaayna kadagiti pasurotna kadagiti kasapulan a pastor iti umiso a tiempo.​—Mik. 5:5.

16. (a) Ania ti responsabilidad dagiti panglakayen? (b) Ania ti panangmatmat dagiti Estudiante ti Biblia iti balakad ni Jesus nga ‘ipastoranyo ti arban’?

¹⁶ No subliantayo dagiti Estudiante ti Biblia idi un-unana, natarusan idin dagiti panglakayen nga addaanda iti responsabilidad a mangtulong kadagiti kapammatianda nga agtultuloy nga agserbi iti Dios. (Basaen ti Galacia 6:10.) Idi 1908, adda maysa nga artikulo iti Watch Tower a nangilawlawag iti daytoy a balakad ni Jesus: “Ipastoram dagiti babassit a karnerok.” (Juan 21:15-17) Kuna ti artikulo kadagiti panglakayen: “Nakapatpateg nga ipapusotayo ti responsabilidad nga inted ti Apo maipapan iti panangaywan iti arban, nga ibilangtayo a naindaklan a pribilehio ti mangpakan ken mangtaripato kadagiti pasurot ti Apo.” Idi 1925, impaganetget manen ti The Watch Tower ti kinapateg ti panagserbi kas pastor babaen ti panangipalagipna kadagiti panglakayen: “Ti iglesia ti Dios ket kukuana, . . . ken manungsungbat kenkuana ti amin nga inikkanna iti pribilehio nga agserbi kadagiti kakabsatda.”

17. Kasano a natulongan dagiti manangaywan nga agbalin a kualipikado a pastor?

¹⁷ Kasano a tinulongan ti organisasion ni Jehova dagiti panglakayen a mamagbalin iti abilidadda a mangipastor kas ‘landok nga agbalin a pirak’? Babaen ti panangsanay. Idi 1959, naangay ti damo a Kingdom Ministry School para kadagiti manangaywan. Iti maysa a leksion, naadal ti topiko a “Panangipaay iti Personal nga Atension.” Naiparegta kadagidiay a responsable a kakabsat a “mangaramidda iti eskediul a mangsarungkar kadagiti agibumbunannag iti pagtaenganda.” Naisuro iti klase ti nagduduma a pamay-an tapno makaparegta ti panangipastor dagiti panglakayen.  Idi 1966, nairugi ti napabaro a Kingdom Ministry School. Dita a nausig ti topiko a “Ti Kinapateg ti Trabaho a Panangipastor.” Ania ti kangrunaan a tema dayta a klase? Dagidiay mangidadaulo “masapul a makiramanda a mangipaay iti naayat a panangasikaso iti arban ti Dios, ngem saanda a baybay-an ti pamiliada ken ti panagserbida iti tay-ak.” Kadagiti kallabes a tawen, ad-adu pay nga eskuelaan ti naangay para kadagiti panglakayen. Ania ti resulta ti agtultuloy a panangsanay nga ipapaay ti organisasion ni Jehova? Ti kongregasion Kristiano ket addaan itan iti rinibu a kualipikado a kakabsat nga agserserbi kas naespirituan a pastor.

18. (a) Ania a nadagsen a responsabilidad ti naitalek kadagiti panglakayen? (b) Apay nga ipatpateg ni Jehova ken ni Jesus dagiti nagaget a panglakayen?

¹⁸ Dagiti Kristiano a panglakayen ket dinutokan ni Jehova babaen ti Aritayo a ni Jesus, a mangitungpal iti nadagsen a responsabilidad. Ania dayta? Idauluanda ti arban ti Dios iti daytoy karirigatan a tiempo iti pakasaritaan ti tao. (Efe. 4:11, 12; 2 Tim. 3:1) Ipatpateg unay ni Jehova ken ni Jesus dagiti nagaget a panglakayen gapu ta tungtungpalen dagitoy a kakabsat daytoy a Nainkasuratan a balakad: “Ipastoranyo ti arban ti Dios nga adda iti aywanyo, . . . situtulok . . . sigagagar . . . [ken] agbalinkayo a pagulidanan ti arban.” (1 Ped. 5:2, 3) Usigentayo ti dua kadagiti adu a pamay-an a dagiti Kristiano a pastor ket pagulidanan ti arban ken dakkel ti maitulongna iti talna ken rag-o iti kongregasion.

19. Ania ti makunatayo iti panangkadua kadatayo dagiti panglakayen iti ministerio?

¹⁹ Umuna, makipagtrabtrabaho dagiti panglakayen kadagiti miembro ti kongregasion. Kuna ti mannurat iti Ebanghelio a ni Lucas maipapan ken Jesus: “Napan nagbambaniaga iti siniudansiudad ken iti pinuronpurok, nga ikaskasabana ken idekdeklarana ti naimbag a damag ti pagarian ti Dios. Ket naikuyog kenkuana ti sangapulo ket dua.” (Luc. 8:1) No kasano a nangasaba ni  Jesus a kadua dagiti apostolna, dagiti mapagulidanan a panglakayen kadkaduaenda met ita dagiti kapammatianda a mapan mangasaba. Ammoda a dakkel ti maitulongna iti nasayaat nga espiritu ti kongregasion no aramidenda dayta. Ania ti makuna dagiti miembro ti kongregasion kadagiti kasta a panglakayen? Kuna ni Jeannine, nga agtawen iti agarup 90: “No makikaduaak iti panglakayen a mapan mangasaba, maaddaanak iti gundaway a makisarita ken mangam-ammo a naimbag kenkuana.” Kuna ni Steven nga agtawen iti agarup 35: “Para kaniak, no kaduaennak ti maysa a panglakayen a mangasaba, kayatnak a tulongan. Pagragsakak unay dayta a tulong.”

20, 21. Kasano a matulad dagiti panglakayen ti pastor iti ilustrasion ni Jesus? Mangtedkayo iti pagarigan. (Kitaenyo met ti kahon a “ Nabunga a Linawas nga Ibibisita.”)

²⁰ Maikadua, sansanayen ti organisasion ni Jehova dagiti panglakayen a mangipakita iti pannakaseknan kadagiti saanen a makitimtimpuyog iti kongregasion. (Heb. 12:12) Apay a rumbeng a tulongan dagiti panglakayen dagiti nakapuy ti espiritualidadna, ken kasano ti panangaramidda iti dayta? Maammuantayo ti sungbat iti ilustrasion ni Jesus maipapan iti pastor ken ti napukaw a karnero. (Basaen ti Lucas 15:4-7.) Idi nadlaw ti pastor nga adda mapukpukaw a karnero, binirokna dayta a kas man la dayta laeng ti karnerona. Kasano a matulad dagiti panglakayen ita ti ulidan dayta a pastor? No kasano a ti mapukpukaw a karnero ket napateg latta iti pastor, dagiti saanen a makitimtimpuyog iti ili ti Dios ket napateg latta kadagiti panglakayen. Saanda nga ibilang a panangsayang iti tiempo ti panangtulong kadagiti nakapuy ti espiritualidadna. Maysa pay, no kasano nga inkeddeng ti pastor ti “mapan a maipaay iti napukaw agingga a masarakanna,” ikagumaan met dagiti panglakayen a biroken ken tulongan dagiti nakapuy.

²¹ Iti ilustrasion, ania ti inaramid ti pastor idi nasarakanna ti karnero? Siaannad nga ‘imparabawna kadagiti abagana’ ken insublina iti arban. Umasping iti dayta, ti naimpusuan a pannakaseknan dagiti panglakayen mabalin a mapabilegna manen dagiti nakapuy iti naespirituan ken makatulong kadakuada nga agsubli iti kongregasion. Kasta ti napasamak ken ni Victor, maysa a kabsat a taga-Africa a nagsardeng a makitimpuyog iti kongregasion. Kinunana: “Bayat ti walo a tawen a saanak nga aktibo, saan a nagsardeng dagiti panglakayen a nangtultulong kaniak.” Ania ti nangnangruna a nakatignay iti pusona? Kinunana: “Maysa nga aldaw, sinarungkarannak ni John, maysa a panglakayen a kaklasek iti Pioneer Service School, ket impakitana ti sumagmamano kadagiti retratomi bayat ti panageskuelami. Dayta ti nangipalagip kaniak kadagiti nagsayaat a kapadasan isu a nariing ti iliwko iti naragsak a panagserbik ken ni Jehova.” Di nagbayag kalpasan ti ibibisita ni John, nagsubli ni Victor iti kongregasion. Ita, isu ket maysa manen a payunir. Wen, dakkel ti maaramidan dagiti naayat a Kristiano a panglakayen tapno maaddaantayo iti rag-o.​—2 Cor. 1:24. b

22. Kasano a ti kinalinteg ken talna pabilgenna ti panagkaykaysa ti kongregasion Kristiano? (Kitaenyo met ti kahon a “ Nasdaawkami.”)

²² Kas naammuantayo kadagiti immuna a parapo, impakpakauna ni Jehova a ti kinalinteg ken talna ket agtultuloy a rumang-ay iti ilina. (Isa. 60:17) Dagitoy a kualidad agpadpada a pabilgenna ti panagkaykaysa dagiti kongregasion. Kadagiti ania a pamay-an? No maipapan iti kinalinteg, ti “Diostayo ket maymaysa a Jehova.” (Deut. 6:4) Saan nga agduduma dagiti nalinteg a pagalagadanna a sursuroten dagiti amin a kongregasion iti aniaman a pagilian. Agpapada dagiti pagalagadanna maipapan iti umiso ken di umiso para “kadagiti amin a kongregasion dagiti sasanto.” (1 Cor. 14:33) Gapuna, rumang-ay laeng ti kongregasion no mayaplikar dagiti pagalagadan ti Dios. No maipapan iti talna, kayat ti Aritayo a tagiragsakentayo saan laeng a ti talna iti kongregasion no di ket agbalintayo met a “mannakikappia.” (Mat. 5:9) Gapuna, “surotentayo koma ti bambanag a mamataud iti talna.” No adda tumaud a di pagkikinnaawatan, datayo koma ti umuna a makikappia. (Roma 14:19) Iti kasta, makatulongtayo tapno agtalinaed ti talna ken panagkaykaysa iti kongregasiontayo.​—Isa. 60:18.

23. Kas ili ni Jehova, ania ti tagtagiragsakentayo ita?

²³ Idi Nobiembre 1895, idi impakaammo ti Watch Tower ti damo nga urnos maipapan iti panglakayen, inyebkas met dagiti responsable a kakabsat ti naimpusuan a tarigagayda. Ania dayta? Tartarigagayan ken ikarkararagda a daytoy a baro nga urnos ket makatulong iti ili ti Dios a “dagus nga agkaykaysa iti pammati.” No subliantayo dagiti napalabas a dekada, anian a yamantayo ta in-inut a ginugoran ni Jehova ti wagas a pannakaaywantayo babaen ti Aritayo a talaga a nangpabileg iti panagkaykaysatayo nga agdaydayaw. (Sal. 99:4) Kas resultana, ti ili ni Jehova iti intero a lubong ita ket siraragsak a magmagna “iti isu met laeng nga espiritu,” mangsursurot ti “isu met laeng nga addang,” ken agserserbi iti “abagan-abaga” iti “Dios ti talna.”​—2 Cor. 12:18; basaen ti Sofonias 3:9.