1, 2. Anto so pananguman ed Zion’s Watch Tower ya Enero 1895, tan antoy reaksion na agagi?

MALIKELIKET si John A. Bohnet, sakey a maseseg ya Estudyante na Biblia, sanen naawat toy Zion’s Watch Tower ya Enero 1895. Balo tan balibali apis na magasin​—walay litrato na lighthouse diad gilig na dayat. Anggano agaylay kasil na dagem tan daluyon, masmasnag so sinag na liwawa to ed ambilbilunget ya kaliberliber. Say anunsio ed magasin nipaakar ed balon apis et atemaan na “Say Balon Kawes Tayo.”

² Lapud mandinayew si Brother Bohnet, insulat tod si Brother Russell: “Makapalikliket ya nanengneng so balibalin TOWER.” Oniay insulat na sakey nin matoor ya Estudyante na Biblia a si John H. Brown: “Makaalay atension so tore. Mabisbiskeg so pundasyon to anggano ombabasig iray angkakabaleg a daluyon tan makmaksil a bagyo.” Say balon apis so sankaunaan ya pananguman ed saman a taon​—balet aliwan saman so sampot. Kasabi Nobyembre, wala lamet so baleg a pananguman. Makapainteres ta nipaakar lamet itan ed madaluyon a dayat.

3, 4. Anton problema so impaimano na Nobyembre 15, 1895 ya Watch Tower, tan anton importantin pananguman so inyanunsio?

³ Diad andukey ya artikulon im-publish ed Nobyembre 15, 1895 ya Watch Tower, impaamta so sakey a problema: Saray singa maksil a daluyon a problema et dederalen day kareenan na asosasyon odino organisasyon na Saray Estudyante na Biblia. Lanang ya pandedebatian na agagi no siopay nepeg ya magmaliw a lider na kongregasyon. Pian natulongan iran nipetek itan ya panlalaslasan, inkompara na artikulo so organisasyon ed sakey a barko. Insan to diretsaan ya inamin ya saramay mangidadaulo et agda niparaan so organisasyon ed saray mabagyon situasyon. Antoy kaukolan ya gawaen?

⁴ Impaimano na artikulo a kaukolan ya seguroen na responsablin kapitan a wala ray life guard ya akabantay tan akaparaan ya crew no walay onsabin bagyo. Mipadpara, kaukolan ya seguroen na saray mangidadaulo ed organisasyon ya akaparaan so amin ya kongregasyon ed saray singa bagyon problema. Pian nagawaan da itan, inyanunsio na artikulo so importantin  pananguman. Angiter itan na instruksion ya kaukolan dan gawaen a tampol: “Diad kada company, manpili na saray elder” ya “mangasikaso ed pulok.”​—Gawa 20:28.

5. (a) Akin a say unaan ya uksoyan nipaakar ed saray elder et nipanpanaon ya inyaligwas? (b) Anto ran tepet so pantongtongan tayo?

⁵ Satan ya unaan ya uksoyan nipaakar ed saray elder et nipanpanaon parad kiletneg na malet ya kongregasyon. Atulongan iray agagi ya manpatuloy anggaman mabagyo so situasyon lapud Sankamundoan a Guerra I. Diad saray sinmublay a taon, wala ray kaaruman a panamaaligwas ed organisasyon ya tinmulong ed totoo na Dios pian mas akaparaan iran manlingkor ed si Jehova. Anton propesiya ed Biblia so angipasakbay ed sayan inyaligwas? Anto ran pananguman ed organisasyon so naimatonan mo? Panon kan agunggonaan?

6, 7. (a) Antoy labay ya ibaga na Isaias 60:17? (b) Antoy ipapaimano na salitan “manangimaton” tan “manangiganggan”?

⁶ Singa naaralan tayo ed Kapitulo 9, impasakbay nen Isaias ya parakelen nen Jehova so totoo to. (Isa. 60:22) Balet, insipan nen Jehova ya aliwan satan labat so gawaen to. Diad satan lanlamang a propesiya, inkuan to: “Mangiyakar ak na balitok imbes a gansa, tan mangiyakar ak na pilak imbes a balatyang, gansa imbes a kiew, tan balatyang imbes a bato; tan turoen ko so kareenan bilang manangimaton mo tan say inkatunong bilang manangiganggan mo.” (Isa. 60:17, NW) Antoy labay ya ibaga na satan a propesiya? Panon ya onaplika itan ed panaon tayo?

⁷ Impropesiya nen Isaias ya say sakey a bengatla et nasalatan na sananey. Imanoen ya say insalat et duma ed samay sinalatan. Maabig la balet sinalatan na mas maabig. Say pangisalat na balitok ed gansa et sakey ya iyaaligwas, ontan met ed arum nin materiales ya abitla. Kanian diad sayan ilustrasyon, impasakbay nen Jehova ya kalkalnan onaligwas so totoo to. Anton iyaaligwas so tutukoyen na propesiya? Nen binitla toy “manangimaton” tan “manangiganggan,” impaimano nen Jehova so kalkalnan iyaligwas ed pangasikaso tan pangorganisad totoo to.

8. (a) Diad propesiya nen Isaias, siopay mamapaaligwas ed organisasyon? (b) Panon tayon minabang ed saray iyaaligwas? (Nengnengen met so kahon ya “ Mapaabeba Ton Inawat so Panangipetek.”)

⁸ Siopa so mamapaaligwas ed organisasyon? Inkuan nen Jehova: “Mangiyakar ak na balitok, . . . mangiyakar ak na pilak, . . . tan turoen ko so kareenan.” On, inmaligwas so inkaorganisa na kongregasyon aliwan diad sagpot na too, noagta diad tulong nen Jehova a mismo. Tan manlapu la nen nitronon Ari si Jesus, pinaaligwas nen Jehova so organisasyon panamegley na Anak to. Panon tayon minanabang ed sarayan pananguman? Imbaga met na teksto a sarayan iyaaligwas et manresultad “kareenan” tan “inkatunong.” No awaten tayoy panangigiya na Dios tan manguman tayo, niwalay kareenan ed sikatayo tan pakiwasen itayo na panangarod inkatunong  ya manlingkor ed si Jehova, say “Dios na kareenan” unong ed si apostol Pablo.​—Fil. 4:9.

9. Antoy pundasyon na uksoy tan pankakasakey ed kongregasyon, tan akin?

⁹ Onia ni imbaga nen apostol Pablo nipaakar ed si Jehova: “Say Dios et sakey a Dios na kareenan, aliwan gulo.” (1 Cor. 14:33) Imanoen ya say inusar nen Pablo ya kabaliktaran na gulo et kareenan, aliwan uksoy. Akin? Lapud say inkauksoy et aliwan naynay ya manreresultad kareenan. Singa bilang, nayarin mauk-uksoy ya manmartsa so sakey a grupo na sundalo, balet say mauk-uksoy ya iyaabante da et manresultad guerra, aliwan kareenan. Kanian bilang Kristiano, maabig no tandaan tayo iya: Antokaman ya uksoyan ya anggapoy kareenan et nabuyak. Balet say kareenan ya manlalapud Dios et mangiiter na uksoy ya agmangangga. Kanian, misalsalamat tayo ta say organisasyon tayo et igigiya tan pipinoen na “Dios a mangiiter na deen”! (Roma 15:33) Say kareenan ya manlalapud Dios so sengegan na uksoy tan pankakasakey na saray kongregasyon tayo ed interon mundo.​—Sal. 29:11.

10. (a) Anto ray inaligwasan na organisasyon tayo nensaman? (Nengnengen so kahon ya “ No Panon ya Inmaligwas so Paraan na Panangasikaso.”) (b) Anto ran tepet so pantongtongan tayo natan?

¹⁰ Diad kahon ya “ No Panon ya Inmaligwas so Paraan na Panangasikaso,” nanengneng tayo ray pigaran makagunggona tan organisadon pananguman nensaman diad organisasyon tayo. Balet anto ran mas balon pananguman so ginawa nen Jehova panamegley na Ari tayo? Antoy nitulong na saraman a pananguman ed inyaligwas na kareenan tan pankakasakey na saray kongregasyon ed interon mundo? Panon kan natutulongan na saratan diad panlilingkor mod “Dios na kareenan”?

11. (a) Antoy mas atalosan diad impanaral ed Kasulatan? (b) Antoy determinadon gawaen na saray agagi na mananguley ya ulop?

¹¹ Manlapu la nen 1964 anggad 1971, indaulo na mananguley ya ulop so malaknab ya proyekto na panagaral na Biblia. Nilikud nid dakel a tema, inaral da no panon ya naorganisa so Kristianon kongregasyon nen inmunan siglo. * Naaralan dan say mangaasikaso ed saray kongregasyon nen inmunan siglo et sakey ya ulop na saray elder imbes a sakey ya elder odino manangasikaso. (Basaen so Filipos 1:1; 1 Timoteo 4:14.) Nen mas atalosan da itan, amoria na mananguley ya ulop ya sikaray igigiya na Ari dan si Jesus diad pamapaaligwas ed inkaorganisa na totoo na Dios​—tan saray agagi na mananguley ya ulop et determinadon ontulok ed instruksion na Ari. Tampol iran nanggawa na pananguman pian natumbok day ibabaga na Kasulatan nipaakar ed panuro na saray elder. Anto ray pigaran pananguman nen gapo na 1970’s?

12. (a) Antoy ginawan pananguman parad mananguley ya ulop? (b) Deskribien no panon ya inorganisa so Mananguley ya Ulop natan. (Nengnengen so kahon ya “ No Panon ya Aasikasoen na Mananguley ya Ulop so Kimkimey Parad Panarian.”)

¹² Say unonan pananguman et nipaakar ed mananguley ya ulop. Antis na saman, pitora labat ya alanaan a brother so membro na board of directors na Watch Tower Bible and Tract Society of Pennsylvania. Balet nen 1971, nagmaliw ya 11 so  datin 7 membro na mananguley ya ulop tan alinewan so pidumaan dad board of directors. Agda ipapasen ya walay atagey ed sikara tan tinaon iran mansusublayan bilang chairman diad alphabetical order na ngaran da.

13. (a) Anton uksoyan so tinumbok ed loob na 40 taon? (b) Antoy ginawa na Mananguley ya Ulop nen 1972?

¹³ Say sinmublay ya pananguman et nipaakar ed kada kongregasyon. Anto itan? Manlapud 1932 anggad 1972, say manunan mangaasikaso ed kongregasyon et sakey a brother. Anggad 1936, say tawag ed sikato et service director. Ag-abayag, satan a tawag et sinalatan na company servant, insan congregation servant, tan manangasikaso na kongregasyon. Maseseg ton aasikasoey espiritualidad na pulok. Sikato so mabetbet ya mandedesisyon parad kongregasyon tan agto kokonsultaen so arum ya lingkor ed kongregasyon. Balet nen 1972, nanggawa so Mananguley ya Ulop na baleg a pananguman. Anto itan?

14. (a) Anton balon uksoyan so ginmapo nen Oktubre 1, 1972? (b) Panon ya iyaaplika na coordinator na ulop na mamatatken so simbawad Filipos 2:3?

¹⁴ Imbes ya sakey labat a brother so manlingkor bilang manangasikaso ed kada kongregasyon, saray arum a brother ya kualipikado based Kasulatan et nayari met lan turoen ya elder diad teokratikon paraan. Sikara so manugyop ed ulop na mamatatken ya mangasikaso ed kongregasyon. Satan ya balon uksoyan parad saray elder et ginmapo nen Oktubre 1, 1972.  Natan, ag-ipapasen na coordinator na ulop na mamatatken ya sikatoy mas atagey nen say arum, noagta “mapaabeba.” (Luc. 9:48) Talagan bendisyon iray mapaabeban brother ed sankamundoan ya impanaagi!​—Fil. 2:3.

15. (a) Anto ray gunggona na uksoyan ed kongregasyon nipaakar ed ulop na mamatatken? (b) Antoy paneknek ya marundunong so Ari tayo?

¹⁵ Say uksoyan parad pantutulongan na saray elder ed saray responsabilidad ed kongregasyon et paneknek na inyaligwas. Imanoey taloran gunggona: Unona, natutulongan so amin ya elder​—anggan panon kabaleg so responsabilidad dad kongregasyon​—pian lanang dan nonoten a si Jesus so Ulo na kongregasyon. (Efe. 5:23) Komadua, base ed Uliran, “sikaray ontalona no dakel so mananimbawa.” (Uli. 11:14, NW) Lapud pantotongtongan na saray elder iray isyu nipaakar ed espiritualidad na kongregasyon tan dedengelen day suhestion na balang sakey, natutulongan iran makapanggaway desisyon ya base ed saray prinsipyo na Biblia. (Uli. 27:17) Bebendisyonan nen Jehova iray ontan a desisyon, tan maabig so resulta. Komatlo, lapud mas dakel so kualipikadon manlingkor ya elder, tuloytuloy ya nitatarya na organisasyon so ombabaleg a pankaukolan na saray kongregasyon parad saray manangasikaso tan managpastol. (Isa. 60:3-5) Isipen pa​—say bilang na kongregasyon ed interon mundo ya 27,000 nen 1971 et nagmaliw  a masulok ya 113,000 nen 2013! Malinew sirin ya lapud karunongan na Ari tayo, nitatarya iray kakkaukolan a managpastol na papatumbok to diad dugan panaon.​—Miq. 5:5.

16. (a) Antoy responsabilidad na saray elder? (b) Antoy pakatalos na Saray Estudyante na Biblia ed bilin nen Jesus ya ‘pastolan iray karnero’?

¹⁶ Nen panaon ni na Saray Estudyante na Biblia, atalosan la na saray elder ya responsabilidad dan tulongan iray kapananisiaan da ya manmatoor ed Dios. (Basaen so Galacia 6:10.) Nen 1908, impaliwawa na sakey ya artikulo na Watch Tower so bilin nen Jesus: “Pastolan mo iray angkekelag a karnerok.” (Juan 21:15-17) Oniay imbaga na artikulo ed saray elder: “Importantin maong ya ipapuso tayo so kimey ya inter na Katawan nipaakar ed pulok, ipasen tayon baleg a pribilehyo so pamakan tan pangasikaso ed saray papatumbok na Katawan.” Nen 1925, indanet lamet na The Watch Tower so kaimportantian na pampastol tan oniay panonot tod saray elder: “Say simbaan na Dios et kayarian to, . . . tan usisaen toy amin ya inikdan toy pribilehyon manlingkor ed saray agagi da.”

17. Panon ya tinulongan iray manangasikaso pian magmaliw iran epektibon pastol?

¹⁷ Panon ya tinulongan na organisasyon nen Jehova iray elder ya napaaligwas so dunong dad panagpastol? Panamegley na panangipasal. Nen 1959, inggapo so Kingdom Ministry School parad saray manangasikaso. Kinonsidera ed sakey a sesyon na klase so teman “Pangipanengneng na Personal ya Atension.” Pinaseseg iray responsablin brother ya “manggawa na eskedyul na pambisitad saray publisher diad abung da.” Impresenta ed sesyon iray nanduruman paraan pian magmaliw ya makapabiskeg so ibisita na saray pastol. Nen 1966, inggapo so in-update ya Kingdom Ministry School. Kaibad satan so teman “Kaimportantian na Panagpastol a Kimey.” Antoy  manunan gagala na satan a sesyon? Saray mangidadaulo et “nepeg a mibiang ed maaron pangasikasod pulok na Dios, balet ta agda nepeg a paulyan so sarilin pamilya tan ministeryo da.” Diad agano ni ran taon, mas dakel ya eskuelaan parad saray elder so niletneg. Antoy resulta na tuloytuloy ya panangipasal na organisasyon nen Jehova? Natan et nilibo lay kualipikadon brother ya manlilingkor bilang espiritual a pastol ed saray kongregasyon.

18. (a) Anton baleg a responsabilidad so inmatalek ed saray elder? (b) Akin ya pinabpabli nen Jehova tan Jesus iray makukulin elder?

¹⁸ Saray elder ed kongregasyon et tinuro nen Jehova panamegley na Ari, si Jesus, pian gawaey baleg ya responsabilidad. Anto itan? Pangidaulod karnero na Dios diad sankairapan a panaon ed history na too. (Efe. 4:11, 12; 2 Tim. 3:1) Pinabpabli nen Jehova tan Jesus iray makukulin elder lapud uunoren day Makasulatan a bilin: “Pastolan yo so pulok na Dios a walad panangasikaso yo . . . mabulbulos . . . , akaparaan . . , magmaliw kayon ehemplo ed pulok.” (1 Ped. 5:2, 3) Pantongtongan tayoy duaran paraan no akin ya ehemplo iray Kristianon pastol ed pulok, tan say baleg a nitutulong dad kareenan tan liket na kongregasyon.

19. Antoy nibaga tayod saray elder ya mangiibad sikatayo diad ministeryo?

¹⁹ Unona, mikikimey iray elder ed saray membro na kongregasyon. Oniay insulat nen Lucas nipaakar ed si Jesus: “Sikatoy linma ed saray syudad tan ed saray baryo, ya impupulong tan inyaabawag to so maong a balita na panarian na Dios. Tan kaiba to so labindua.” (Luc. 8:1) Singa si Jesus ya kaiba ton nampulong iray apostol to, iibaan met na saray napanuliranan ya elder natan iray kapananisiaan da diad  panagpulong a kimey. Amta ran baleg so nitulong na satan ed pankakasakey na kongregasyon. Antoy liknaan na saray membro na kongregasyon ed ontan iran elder? Oniay inkuan nen Jeannine, sister ya ngalngali 90 años la: “No kaibak so sakey ya elder ed ministeryo, pankanawnawak so mitongtong ed sikato tan mas nakabat ko.” Oniay imbaga nen Steven, brother ya manga 35 to: “No kaibak ya manpupulong so sakey ya elder, antak ya labay to ak a tulongan. Aapresyaen ko itan ya tulong.”

20, 21. Panon ya naalig na saray elder so pastol ed parabolo nen Jesus? Mangiter na alimbawa. (Nengnengen met so kahon ya “ Mabunga ya Sinimban Ibibisita.”)

²⁰ Komadua, impasal na organisasyon nen Jehova iray elder ya ontulong ed saramay agla mililimog ed kongregasyon. (Heb. 12:12) Akin et kaukolan ya tulongan na saray elder iray maletey ed espiritual, tan panon dan gawaen itan? Naamtaan tayoy ebat ed samay parabolo nen Jesus nipaakar ed sakey a pastol tan abalang a karnero. (Basaen so Lucas 15:4-7.) Nen naimano na pastol ya walay sakey a karneron nababalang, maseet ton inanap ya singa aman labat so karnero to. Panon ya aaligen na saray elder natan so ehemplo na saman a pastol? No panon ya samay abalang a karnero et pinabpabli na pastol, saramay agla mililimog ed totoo na Dios et siansia nin pinabpabli na saray elder. Agda ipapasen ya panagdarak na panaon so pananap ed saray maletey ed espiritual. Niarum ni, no panon a samay pastol et desididon “anapen imay abalang anggad naromog to,” saray elder et gagawaen day anggaay nayarian dan anapen tan tulongan iray maletey.

²¹ Antoy ginawa na samay pastol ed parabolo sanen nalmo to may abalang a karnero? Inalsa to tan ‘inyan tod saray takeb to,’ insan to impawil ed pulok. Mipadpara, say maaron panamaseseg na elder so posiblin mamabiskeg ed sakey ya maletey ed espiritual tan ontulong ed sikaton ompawil ed kongregasyon. Atan so agawa ed si Victor, brother a taga Africa ya tinmundan milimog ed kongregasyon. Inkuan to: “Diad waloy taon ya inaktibo ak, nansagpot iray elder ya tulongan ak.” Antoy amakiwas ed sikato? Imbaga to: “Aminsan, binisita ak nen John, elder ya akaibak ed Pioneer Service School, tan impanengneng to ray litrato mi ed saman a klase. Kanian anonotan ko iramay balibalin eksperiensyak tan nailiw koy liket na panaglingkor ed si Jehova.” Kayari na imbisita nen John, pinmawil ed kongregasyon si Victor. Natan et payunir lamet. On, baleg so nitutulong na saray elder pian manliket tayo.​—2 Cor. 1:24. *

22. Panon ya napapaelet na inkatunong tan kareenan so pankakasakey na Kristianon kongregasyon? (Nengnengen met so kahon ya “ Mandinayew Kami.”)

²² Singa nipaimano la, impasakbay nen Jehova ya lalon onlaknab so inkatunong tan kareenan na totoo na Dios. (Isa.  60:17) Sarayan kualidad so mamapaelet ed pankakasakey na kongregasyon. Panon? No nipaakar ed inkatunong, say “Dios tayo sikato so sakey a Jehova.” (Deu. 6:4) Saray matunong ya estandarte to et agmanduruma ed saray kongregasyon diad nanduruman bansa. Saksakey so estandarte to ed duga tan aliwa, tan parepareho ed “amin a kongregasyon na saray masanto.” (1 Cor. 14:33) Kanian, onaligwas labat so sakey a kongregasyon no iyaaplika na satan iray estandarte na Dios. No nipaakar ed kareenan, aglabat labay na Ari ya panliketan tayoy kareenan ed kongregasyon noagta magmaliw itayo met ya “managpareen.” (Mat. 5:9, ftn) Kanian “tumboken tayo sirin iray bengatlan mamapawala na kareenan.” Sikatayo lay unonan onkiwas pian resolbien iray agpantatalosan a nayarin onlesa. (Roma 14:19) Diad ontan, mitutulongan tayo pian niwalay kareenan tan pankakasakey ed kongregasyon.​—Isa. 60:18.

23. Antoy panliliketan tayo natan bilang lingkor nen Jehova?

²³ Nen Nobyembre 1895, sanen inyanunsio na Watch Tower so unonan uksoyan parad saray elder, imbalikas met na saray responsablin brother so impapuson pilalek da. Impikasi da a sayan balon uksoyan na organisasyon et ontulong ed totoo na Dios a “tampol ya onkiwas parad pankakasakey na pananisia.” No pawilen tayoy apalabas iran dekada, misalsalamat tayo ta lalon inmelet so pankakasakey tayod panagdayew. Resulta itan na kalkalnan panagpino ed panangasikaso ya ginawa nen Jehova panamegley na Ari tayo. (Sal. 99:4) Kanian diad panaon tayo, malikeliket iray totoo nen Jehova ed interon mundo legan iran manbibilay a “saksakey so gagala,” ontutumbok ed “parehon bakat,” tan saniiban ‘manlilingkor’ ed “Dios na kareenan.”​—2 Cor. 12:18; basaen so Sofonias 3:9.