1, 2. Wanem change nao kamap lo Zion’s Watch Tower lo January 1895, and hao nao tingting blo olketa brata abaotem?

 TAEM John Bohnet wanfala faithful Bible Student kasem copy blo Zion’s Watch Tower blo January 1895, hem hapi tumas lo samting wea hem lukim. Magasin hia garem niu kava wea garem piksa blo wanfala laethaos wea laet blo hem shaen go lo skae wea dark and sea wea raf tumas. Wanfala page lo datfala magasin wea garem title “Our New Dress” hem storyim niu kava hia.

² From Brata Bohnet laekem niu kava blo magasin hia, hem raetem wanfala leta go lo Brata Russell. Hem sei: “Mi hapi tumas for lukim Watchtower magasin hia luk naes tumas.” Nara faithful Bible Student wea nem blo hem John Brown raet olsem abaotem kava hia: “Hem pullim interest blo man. Nomata big wind and olketa wave gohed for bangam, laethaos hia standap strong bikos hem garem strong faondeson.” Lo datfala year, diswan nao firstfala change wea olketa brata lukim, bat staka change moa kam bihaen. Lo November olketa kasem nara big change moa. Interesting samting, hem olsem sea wea raf tumas.

3, 4. Wanem problem nao Watch Tower blo November 15, 1895 storyim, and wanem change wea kamap nao Watch Tower storyim?

³ Lo wanfala article wea olketa pablisim lo Watch Tower blo November 15, 1895, hem storyim wanfala problem wea kamap insaed organization. Disfala problem hem olsem wave wea big tumas wea spoelem wan mind wea organization garem. Olketa brata argue evritaem abaotem hu lo olketa nao shud leader insaed kongregeson. For helpem olketa brata hia stretem tingting blo olketa for no garem wei for winim narawan, datfala article comparem organization olsem wanfala ship. And hem talem stret hao olketa wea lead, olketa fail for redyim organization wea olsem ship for feisim olketa problem wea olsem raf sea. Wanem nao olketa mas duim?

⁴ Datfala article sei tu gudfala kapten mek sure olketa samting for sevem laef hem stap lo ship, and olketa crew redi for taem blo nogud weather. Lo sem wei, olketa wea lead insaed organization need for mek sure evriwan lo kongregeson redi for deal witim olketa problem wea olsem wave. For duim datwan, article talem wanfala change bae kamap wea bae affectim evriwan. Datfala article sei, start lo datfala taem “lo evri kongregeson, olketa bae chusim olketa elder,” for “lukaftarem olketa sheepsheep.”—Acts 20:28.

5. (a) Why nao arrangement for garem olketa elder hem kam lo barava taem? (b) Olketa wanem kwestin nao bae iumi storyim?

 ⁵ Datfala arrangement for garem olketa elder hem kam lo barava taem, bikos hem mekem kongregeson waka followim gudfala plan. Hem helpem olketa brata for savve hao for deal witim olketa problem wea kamap lo World War I wea olsem olketa bigfala wave. Lo olketa year bihaen, organization mekem samfala change moa wea helpem pipol blo God for kamap fit for worshipim Jehovah. Wanem profesi lo Bible nao storyim change hia? Olketa wanem change wea happen lo organization nao iu lukim? Wanem gud samting nao iu kasem from olketa change hia?

6, 7. (a) Isaiah 60:17 hem minim wanem? (b) Taem verse storyim “olketa overseer” and “olketa man for givim waka,” hem showimaot wanem?

⁶ Olsem iumi storyim lo Chapter 9, Isaiah hem sei, Jehovah bae blessim pipol blo hem and olketa bae kamap staka. (Isa. 60:22, NW) Bat Jehovah promis for duim samfala samting moa. Lo datfala sem profesi, hem sei: “Mi bae tekem kam gold for changem copper, and mi bae tekem kam silver for changem iron, and changem timba witim copper, and olketa ston witim iron; and mi bae appointim peace olsem olketa overseer bilong iufala and raeteous fasin olsem olketa man for givim waka for iufala.” (Isa. 60:17, NW) Wanem nao datfala profesi minim? And hao nao diswan fitim iumi distaem?

⁷ Profesi blo Isaiah sei samting wea olketa iusim firstaem bae olketa changem and iusim nara samting. Diswan no minim olketa bae changem nogud samting, for kamap gud samting, bat hem minim for changem gud samting, for kamap samting wea barava gud. For changem copper witim gold hem gudfala change, and hem semsem witim olketa nara samting wea hem storyim. So lo disfala tokpiksa, Jehovah showim wanem pipol blo hem duim bae isisi kamap gud. Lo disfala profesi, olketa wanem change nao bae kamap gud moa? Taem verse sei “olketa overseer” and “olketa man for givim waka,” Jehovah showimaot pipol blo hem bae isisi kamap gud moa lo hao olketa organize and hu nao bae lukaftarem olketa.

8. (a) Hu nao mekem olketa change wea profesi blo Isaiah storyim? (b) Wanem gud samting nao iumi kasem from olketa change hia? (Lukim tu box “ Hem Hambol for Acceptim Kaonsel.”)

⁸ Hu nao mekem olketa change hia? Jehovah sei: “Mi bae tekem kam gold, . . . Mi bae tekem kam silver, . . . and Mi bae appointim peace.” Tru nao, olketa change wea organization mekem lo kongregeson, Jehovah seleva nao mekem kamap, no olketa man. And start taem Jesus kamap King kam kasem distaem, Jehovah iusim Son blo hem for mekem olketa change hia. Wanem gud samting nao iumi kasem from olketa change hia? Datfala sem verse sei olketa change hia bae mekem “peace” and “raeteous fasin” kamap. Taem iumi willing for acceptim direction wea kam from God and mekem olketa change, iumi bae garem peace midolwan iumi. And taem iumi lovem  raeteous fasin, datwan bae muvim iumi for worshipim Jehovah, wea aposol Paul sei hem “God wea givim peace.”—Phil. 4:9.

9. Wanem nao faondeson blo wei for organize and wan mind insaed kongregeson, and why nao olsem?

⁹ Paul raet olsem tu abaotem Jehovah: “God hem no laekem evri samting for olobaot, bat hem laekem peace.” (1 Cor. 14:33) Paul no comparem wei for no laekem evri samting for olobaot, witim wei wea evri samting stret, bat hem comparem witim peace. Why nao olsem? Tingim diswan, wei wea evri samting stret staka taem no savve mekem peace kamap. Olsem example, wanfala grup blo olketa soldia savve march stret followim laen, bat wei wea olketa duim datwan, mekem war nao kamap and no peace. So iumi olketa Christian mas tingim diswan, for evri samting hem organize and gohed gud, firstaem iumi mas garem peace. Peace wea God givim nomoa savve mekem evri samting gohed gud for longfala taem. Dastawe, iumi barava hapi bikos “God wea givim peace” leadim and mekem organization blo iumi for kamap klin. (Rome 15:33) Peace wea God givim hem faondeson blo wei for organize and wan mind wea iumi enjoyim insaed evri kongregeson raonem world wea iumi barava tinghae lo hem.—Sams 29:11.

10. (a) Olketa wanem change nao kamap lo organization lo olketa year wea go pas? (Lukim box “ Hao Olketa Chusim Olketa Elder Kamap Gud.”) (b) Olketa wanem kwestin nao bae iumi storyim distaem?

¹⁰ Datfala box “ Hao Olketa Chusim Olketa Elder Kamap Gud” storyim olketa gud samting wea kamap and olketa change wea isisi kamap insaed organization lo olketa year wea go pas. Bat olketa wanem change from ‘copper for gold’ nao Jehovah iusim King blo iumi for duim no longtaem go nomoa? Hao nao olketa change hia strongim peace and wan mind insaed olketa kongregeson evriwea lo world? Hao nao olketa change hia helpem iu for worshipim “God wea givim peace”?

11. (a) Taem olketa brata duim deep study lo Bible, wanem nao olketa luksavve olketa need for changem? (b) Olketa brata lo governing body disaed for duim wanem?

¹¹ Start lo 1964 go kasem 1971, governing body leadim samfala brata for duim deep study lo Bible abaotem staka subject, and wanfala nao hem abaotem hao kongregeson lo first century hem waka. a Taem olketa duim datfala study, olketa luksavve lo first century, body of elder nao lukaftarem kongregeson and no wanfala elder nomoa. (Readim Philippi 1:1; 1 Timothy 4:14.) Taem olketa minim gud datwan, governing body luksavve King Jesus nao leadim olketa for mekem olketa change hia lo organization, so olketa disaed for followim direction wea King givim. So stretawe olketa mekem samfala change lo organization abaotem hao olketa appointim olketa elder followim wanem olketa first century Christian duim. Wanem nao samfala change wea olketa mekem lo olketa year blo 1970?

12. (a) Wanem change nao kamap lo governing body? (b) Storyim hao Governing Body organize distaem. (Lukim box “ Hao Governing Body Lukaftarem Kingdom Waka.”)

¹² Firstfala change hem for governing body. Kam kasem datfala taem, sevenfala anointed brata nao olketa insaed board of director blo Watch Tower Bible and Tract Society of  Pennsylvania. Bat lo 1971, governing body garem 11-fala member nao, and start lo datfala taem, olketa no insaed lo datfala board of director. Olketa no tingim olketa seleva olsem olketa hae winim narawan, and evri year olketa chusim brata for chairman followim alphabet.

13. (a) Wanem arrangement nao kongregeson followim for 40 year? (b) Governing Body duim wanem lo 1972?

¹³ Nara change wea kamap hem lo kongregeson. Lo wanem wei? Start lo 1932 go kasem 1972, wanfala brata nomoa savve lukaftarem kongregeson. Kam kasem 1936, brata hia olketa kolem hem lo service director. Bihaen, olketa kolem hem lo company servant, then olketa kolem hem lo kongregeson servant, and gogo, olketa kolem hem lo kongregeson elder. Olketa brata hia wea olketa appointim lukaftarem gud spiritual saed blo olketa sheepsheep. Staka taem elder hia wea lukaftarem kongregeson nomoa savve mekem olketa disison for kongregeson and hem no askem tingting blo olketa nara brata wea waka lo kongregeson. Bat lo year 1972, Governing Body mekem wanfala important change. Wanem nao datfala change?

14. (a) Wanem niu arrangement nao kamap lo October 1, 1972? (b) Hao nao coordinator blo body of elder followim kaonsel lo Philippi 2:3?

¹⁴ Winim wei for wanfala brata nomoa hem elder insaed kongregeson, olketa nara brata wea kasem olketa mark lo Bible tu savve kasem appointment for kamap elder. Olketa brata hia, kamap body of elder wea waka tugeta for lukaftarem kongregeson.  Datfala niu arrangement for olketa elder hem start lo October 1, 1972. Distaem, coordinator blo body of elder no tingse hem winim olketa nara elder, bat hem mas “hambol.” (Luke 9:48) Olketa brata hia wea hambol kamap blessing for pipol blo God evriwea lo world!—Phil. 2:3.

15. (a) Olketa wanem gud samting nao olketa kongregeson kasem from arrangement for kongregeson garem body of elder? (b) Wanem nao King blo iumi duim wea showimaot hem wise?

¹⁵ Arrangement for body of elder sharem responsibility hem mekem waka blo olketa insaed kongregeson hem kamap gud. Tingim thrifala gud samting wea kamaot from diswan: Firstfala samting wea barava important, disfala arrangement helpem olketa elder for luksavve nomata responsibility blo olketa insaed kongregeson hem big, olketa evritaem tingim Jesus nao Hed blo kongregeson. (Eph. 5:23) Mek-tu samting, olsem Provebs 11:14 talem: “Herem plande advaes, bae stanap strong.” Taem olketa elder story tugeta abaotem samting wea affectim spiritual saed blo kongregeson and herem tingting blo olketa narawan, olketa savve mekem olketa disison wea followim olketa Bible principle. (Provebs 27:17) Jehovah blessim olketa disison olsem, and gudfala samting kamaot from diswan. Mek-thri samting, taem iumi garem staka brata wea fit kamap olketa elder, organization savve iusim olketa for lukaftarem olketa niu kongregeson and duim shepherding waka insaed kongregeson.  (Aesaea 60:3-5) Tingim diswan, lo 1971, namba blo olketa kongregeson raonem world hem 27,000, bat lo 2013, namba hia go ap kasem winim 113,000! Tru tumas, King blo iumi wea wise hem markem lo barava taem olketa shepherd for lukaftarem olketa follower blo hem.—Mic. 5:5, NW.

16. (a) Olketa elder garem wanem responsibility? (b) Hao nao Olketa Bible Student ting lo wanem Jesus talem for ‘lukaftarem olketa sheepsheep’?

¹⁶ Taem Olketa Bible Student just start, olketa elder savve finis responsibility blo olketa hem for helpem olketa brata and sista for gohed faithful lo God. (Readim Galatia 6:10.) Lo 1908, wanfala article lo Watch Tower storyim toktok blo Jesus wea sei: “Lukaftarem olketa smol sheepsheep bilong mi.” (John 21:15-17) Article hia talem olketa elder: “Waka wea Masta givim lo iumi for lukaftarem olketa sheepsheep hem mas barava important lo iumi. And iumi mas tinghae lo disfala privilege for givim spiritual kaikai and lukaftarem olketa follower blo Lord.” Lo 1925, The Watch Tower storyim moa why nao waka blo olketa elder hem important. Hem sei: “Church (kongregeson) hem blo God, . . . and hem bae askem ansa from evriwan wea garem privilege for hao olketa lukaftarem olketa member blo olketa.”

17. Wanem nao helpem olketa elder for kamap olketa gudfala shepherd?

¹⁷ Wanem nao organization blo Jehovah duim for helpem olketa elder for kamap gud lo hao for duim shepherding olsem ‘silver wea changem iron’? Organization provaedem training. Lo 1959, firstfala Kingdom Ministry Skul for olketa elder hem kamap. Wanfala tok wea kamap lo class hem storyim disfala subject “Interest lo Evriwan.” Olketa brata hia kasem encouragement for “wakem wanfala schedule for visitim olketa pablisa lo haos blo olketa.” Lo class, olketa storyim olketa difren wei wea olketa elder savve duim olketa visit wea savve encouragem  and strongim olketa pablisa. Lo 1966, Kingdom Ministry Skul kamap moa. Olketa storyim subject hia “Shepherding Waka Hem Important.” Wanem nao main point blo tok hia? Olketa wea lead “shud lukaftarem olketa sheepsheep blo God, bat olketa mas no forgetim famili blo olketa and for duim ministry.” Lo olketa year wea go pas, staka skul kamap for olketa elder. Wanem gud samting nao kamaot from training wea organization blo Jehovah gohed for provaedem? Distaem, Christian kongregeson garem staka thousand brata wea fit for kamap olketa shepherd.

18. (a) Wanem bigfala waka nao Jesus givim lo olketa elder? (b) Why nao Jehovah and Jesus lovem tumas olketa elder wea waka hard?

¹⁸ Jehovah iusim King blo iumi Jesus for mekem disfala arrangement for olketa Christian elder for duim wanfala bigfala waka. Wanem nao datfala waka? Hem for leadim olketa sheepsheep blo God lo olketa hard taem hia wea winim enitaem lo history. (Eph. 4:11, 12; 2 Tim. 3:1) Jehovah and Jesus barava lovem olketa elder hia wea waka hard bikos olketa obeyim wanem Bible talem: “Lukaftarem olketa sheepsheep bilong God wea hem nao markem iufala for lukaftarem . . . willing . . . , laek for helpem narawan. . . . Mas showimaot gudfala example for olketa sheepsheep.” (1 Pet. 5:2, 3) Bae iumi storyim tufala lo staka difren wei wea olketa Christian shepherd showimaot example for olketa sheepsheep and diswan help for mekem kongregeson hapi and garem peace.

19. Hao nao iumi ting lo olketa elder wea waka tugeta witim iumi lo ministry?

¹⁹ First samting olketa duim hem for waka witim olketa lo kongregeson. Luke sei olsem abaotem Jesus: “Hem go long evri taon and vilij for preachim gud nius abaotem Kingdom bilong  God. Twelvfala aposol tu go witim hem.” (Luke 8:1) Olsem Jesus wea preach witim olketa aposol blo hem, olketa elder distaem tu waka witim olketa brata and sista lo preaching waka. Olketa luksavve taem olketa duim olsem, olketa help for mekem kongregeson stap gud and waka tugeta. Hao nao olketa lo kongregeson ting lo olketa elder hia? Jeannine, wanfala sista wea klosap 90 years old sei: “Taem mi waka witim wanfala elder lo preaching mi garem chance for story witim hem and for savve gud lo hem.” Steven, wanfala brata wea winim 30 years old sei: “Taem wanfala elder waka witim mi lo preaching, mi savve hem laek for helpem. Mi hapi tumas for kasem help olsem.”

20, 21. Hao nao olketa elder savve followim example blo shepherd lo tokpiksa blo Jesus? Storyim example. (Lukim tu box “ Gud Samting From Olketa Visit Evri Week.”)

²⁰ Mek-tu samting, organization blo Jehovah trainim olketa elder for helpem olketa wea stop for associate witim kongregeson. (Heb. 12:12) Why nao olketa elder mas helpem olketa olsem, and wanem nao olketa elder savve duim for helpem olketa? Tokpiksa blo Jesus abaotem shepherd and wanfala sheepsheep wea lus ansarem disfala kwestin. (Readim Luke 15:4-7.) Lo tokpiksa hia, taem shepherd luksavve wanfala sheepsheep hem lus, hem go lukaotem olsem hem nomoa only sheepsheep wea hem garem. Wanem nao olketa elder distaem lanem from example blo datfala shepherd? Lo sem wei wea datfala shepherd tingim tumas sheepsheep wea lus, olketa elder tu tingim tumas olketa wea lusim kongregeson. Taem olketa elder lukaotem and helpem olketa hia, olketa shud no tingim olketa weistim taem. And tu, olsem shepherd wea “lukaotem datwan wea lus” go kasem taem hem faendem, olketa elder savve duim samting for faendem and helpem olketa wea wik.

²¹ Lo datfala tokpiksa, wanem nao shepherd duim taem hem faendem sheepsheep hia? Hem isisi liftimap and “karem long shoulder bilong hem,” and tekem go bak lo olketa nara sheepsheep. Lo sem wei, kaenfala toktok wea elder talem for samwan wea wikdaon savve strongim and helpem hem for kam bak lo kongregeson. Diswan nao samting wea happen lo Victor, wanfala brata lo Africa wea stop for associate witim kongregeson. Hem sei: “Insaed eitfala year wea mi inactive, olketa elder gohed helpem mi.” Wanem nao helpem hem for kam bak? Hem sei: “Wanfala day, John wanfala elder wea mitufala skul tugeta lo Pioneer Service Skul, hem markem taem for visitim mi and showim samfala piksa wea hem tekem taem mifala skul. Diswan mekem mi tingim bak staka naes samting wea mifala duim tugeta, diswan mekem mi laek kasem bak hapi wea mi kasem taem mi worshipim Jehovah.” No longtaem bihaen visit blo John, Victor kam bak lo kongregeson. And distaem, hem pioneer moa. Tru nao, iumi hapi tumas lo olketa Christian elder wea lukaftarem iumi.—2 Cor. 1:24. b

22. Hao nao raeteous fasin and peace strongim wan mind wea Christian kongregeson garem? (Lukim tu box “ Mitufala Sapraes Tumas.”)

²² Olsem iumi storyim finis, Jehovah talem raeteous fasin and peace midolwan pipol blo hem bae kamap big. (Isa. 60:17, NW) Tufala samting hia strongim wan mind wea olketa kongregeson garem. Lo olketa wanem wei? Saed lo raeteous fasin, “Wanfala Jehovah nomoa hem stap.” (Deut. 6:4, NW) Olketa raeteous standard blo hem semsem for evri kongregeson nomata olketa stap lo olketa difren kantri. Jehovah garem wanfala standard nomoa lo wanem hem stret and no stret, and hem semsem for “evri kongregeson bilong olketa holy wan.” (1 Cor. 14:33) Dastawe, kongregeson savve grow sapos olketa followim olketa standard blo God. For garem peace, King no laekem iumi for enjoyim peace nomoa, bat for iumi ‘no raoa and stap gud witim narawan’ lo kongregeson. (Matt. 5:9) So iumi “traem best for stap gud witim nara pipol.” Taem problem kamap midolwan iumi, iumi nao first wan for duim samting for stretem. (Rome 14:19) Taem iumi duim olsem, iumi help for mekem kongregeson blo iumi garem peace and wan mind.—Aesaea 60:18.

23. Wanem nao iumi olketa servant blo Jehovah enjoyim distaem?

²³ Taem Watch Tower blo November 1895 storyim arrangement for garem olketa elder, olketa brata wea lead tu showimaot olketa laekem datfala arrangement. Wanem nao olketa duim? Olketa laekem tumas and prea for disfala niu arrangement bae helpem pipol blo God for garem wan mind. Taem iumi ting bak lo olketa year wea go pas, iumi hapi for lukim olketa change wea isisi kamap lo waka blo olketa wea lead wea Jehovah iusim King blo iumi for duim, wea strongim wan mind wea iumi garem lo worship blo iumi. (Sams 99:4) From datwan, evri pipol blo Jehovah raonem world distaem olketa “wan mind long tingting” and lo ‘wanem olketa duim,’ and olketa “waka tugeta for worshipim” datfala “God wea givim peace.”—2 Cor. 12:18; readim Zephaniah 3:9, NW.