1, 2. a) 1895 watapi, ¿imatan cambiarqanku Qhawaq revistapi? b) ¿Imatan wakin iñiqmasinchiskuna nirqanku chay cambiasqankumanta?

 QHAWAQ revistaq tapanqa 1895 watapin enero killapi cambiarqan, chay tapanpin rikukurqan lamar-qochata hatun wayra aytiykachashasqanta, wichay ladopitaq huk hatun foco k’anchashasqanta. Chay revistaq tapanta qhawaspan John Bohnet iñiqmasinchisqa anchata admirakurqan. Chay revistapin “Mosoq p’achayku” nisqa willakuy karqan, chaypin chay revistaq tapanta mosoq p’achawan tupanachirqanku.

² Bohnet iñiqmasiqa anchatan admirakurqan chayta rikuspa, hinan huk cartata Russell iñiqmasinchisman apachirqan, nirqanmi: “Revistapi lloqsimuq TORREQA k’achay-k’achaymi sayashan, ancha munaymi rikukun”, nispa. John Brown iñiqmasipas nirqanmi: “Revistaq tapanpi rikukuq torreqa allin takyasqan kashan, lamar-qochaña hatun wayraña chayman chayashan chaypas sayashallanmi”, nispa. Chay watapin iñiqmasinchiskuna rikurqanku revistaq tapanta ñawpaq kutita cambiasqankuta, ichaqa qhepamanpas cambiashallarqankun. Kaq watallapitaqmi noviembre killapi hukmanta cambiarqanku, chaypipas hukmantan rikukurqan lamar-qochata hatun wayra aytiykachasqanta.

3, 4. a) 1895 watapi, ¿ima problema kasqanmantan Qhawaq revista rimarqan? b) ¿Ima cambiotan ruwananku karqan?

³ 1895 watapi 15 noviembre killamanta Qhawaq revistapin Diospa llaqtanpi huk problema kasqanmanta willakurqan. Imaynan lamar-qochaqa mana thakchu hatun wayra aytiykachaqtin, chay hinatan Biblia Estudiaqkunapas mana thakpichu kawsasharqanku wakin problemakuna kasqanrayku. Iñiqmasikunan sapa kutilla churanakusharqanku pichus iñiq t’aqapi umalli kananmanta. ¿Iman necesitakurqan chaykuna mana kananpaq? Chayta yachachinanpaqmi chay revistaqa Diospa llaqtanta huk barcowan tupanachirqan. Chay qhepamantaq willarqan Diospa llaqtanpi umalliqkuna chay problemakunapaq  iñiqmasikunata mana preparasqankuta. ¿Imatan ruwananku karqan?

⁴ Chay revistan rimallarqantaq barcopi umalliqmanta, chay runaqa qhawarinmi barconpi kashanchus salvavida nisqakuna icha manachus chayta, barcopi riq runakunapas preparasqachus kashanku hatun wayrapaq icha manachus chaytapas. Chay hinallataqmi Diospa llaqtanpi umalliqkunapas qhawarinanku karqan iñiq t’aqakuna preparasqachus kashanku problemakunapaq icha manachus chayta. Chaypaqmi huk hatun cambiota ruwananku karqan. Chay revistan willarqan “sapanka compañiapi [otaq iñiq t’aqapi] umallikunata akllananku kasqanta, paykunan iñiqmasikunata qhawarinanku karqan” (Hech. 20:28).

5. a) ¿Imaraykun iñiq t’aqakunapi umallikunata akllasqanku allin karqan? b) ¿Ima tapuykunatan kutichisun?

⁵ Chay tiempopi umallikunata akllasqankun iñiq t’aqakunata yanaparqan problemakunaña kaqtinpas allin takyasqa kanankupaq. Chaymantapas iñiqmasikunatan yanaparqan Primera Guerra Mundial kasqan tiempopi allinlla kanankupaq. Qhepa watakunapi huk cambiokuna kasqanpas iñiqmasikunatan yanaparqan Jehová Diosta allinta servinankupaq. ¿Ima profecian chhayna cambiokuna kananta willarqanña? ¿Ima cambiokuna ruwakusqantan rikurqanki? ¿Imaynatan chay cambiokuna yanaparqasunki?

6, 7. a) ¿Ima ninanmi Isaías 60:17 textoq nisqan? b) ‘Umalliqkunamanta’ ‘ruwanakunata qoqkunamanta’ rimaspa, ¿imatan Jehová Dios rikuchisharqan?

⁶ Isqon capitulopi yachasqanchis hina, profeta Isaiasmi willarqan Jehová Dios llaqtanta askhayachinan kasqanta (Is. 60:22). Ichaqa Jehová Diosqa prometellarqantaqmi kaytapas: “Bronceq rantintan qorita apamusqayki, fierroq rantintan qolqeta apamusqayki, kurkuq rantintan bronceta apamusqayki, rumiq rantintataqmi fierrota apamusqayki. Ñoqan thak-kayta qosqayki umalliqniykikunawan, chanin-kaytataq ruwanakunata qoqniykikunawan”, nispa (Is. 60:17, NM). ¿Ima ninantaq chay nisqanri? ¿Allinninchispaqchu chay profecía?

⁷ Chay profeciaqa willarqanmi bronceq rantinpi qori kananta. Ichaqa bronceq rantinpi qorita churakusqanqa manan bronce mana allin kasqanraykuchu, aswanpas qori broncemanta aswan allin kasqanraykun. Kaqllatataqmi ruwakun chay textopi huk materialkunawanpas. Chay rikch’anachiywanmi Jehová Dios rikuchirqan pisi-pisimanta llaqtan aswan allin kananta. Ichaqa, ¿imakunapi allinyananmantan chay profecía rimashan? ‘Umalliqkunamanta’ ‘ruwanakunata qoqkunamanta’ ima rimaspaqa, Jehová Diosmi rikuchisharqan llaqtan aswan allin cuidasqa  kananta, payta servinankupaq aswan allin preparasqa kanankutapas.

8. a) ¿Pin Diospa llaqtanta aswan allinman tukuchin? b) ¿Imakunapin yanapawanchis cambiokuna ruwakusqan? (Qhawallaytaq “ Huch’uyyaykukuspa pantasqanta reqsikurqan” nisqa recuadrota.)

⁸ ¿Pin Diospa llaqtanta yanapashan aswan allin kananpaq? Kikin Jehová Diosmi, paymi kaykunata nirqan: “Qorita apamusqayki”, “qolqeta apamusqayki”, “Ñoqan thak-kayta qosqayki”, nispa. Chaypin sut’ita rikunchis iñiq t’aqakunaqa manan runakunaq yanapayninwanchu allinyan, aswanpas Jehová Diospa yanapayninwanmi. Jesús rey churasqa kasqanmantapachan, Jehová Diosqa churinta utilizashan llaqtanta yanapananpaq. ¿Imakunapin chay cambiokuna yanapawanchis? Chay textoq nisqan hina, chay cambiokunaqa ruwakun ‘thak-kaypi’ ‘chanin-kaypi’ kawsananchispaqmi. Sichus Diosta kasukusun cambiokunatapas ruwasun chayqa, iñiqmasinchiskunawanmi thakpi kawsasun, chaymantapas chaninpi kawsayta munasqanchismi kallpachawasun ‘thak-kayta qoq Diosta’ servinanchispaq (Filip. 4:9).

9. ¿Iman iñiq t’aqakunata yanapan imatapas ordenpi ruwanankupaq huk-nisqalla kawsanankupaqpas, imaraykun yanapan?

⁹ Apóstol Pablon kayta nirqan Jehová Diosmanta: “Diosqa manan ch’aqwa hatarichiq [otaq ch’arwita ruwaq] Dioschu, aswanpas thak kawsay qoq Diosmi”, nispa (1 Cor. 14:33). Pabloqa ch’arwi kaqtaqa manan imapas ordenpi  kaqwanchu tupanachirqan, aswanpas thak-kaywanmi tupanachirqan. ¿Imarayku? Chayta entiendenanchispaq kaywan rikch’anachisun: Soldadokunaqa ordenpi purispan maqanakuq rinku, ichaqa ordenpiña purinku chaypas paykunaqa ch’aqwatan hatarichinku manan thak-kaytachu. Chayraykun cristianokunaqa kayta yuyarinanchis: Sichus imapas mana thak-kaytachu apamunqa chayqa, ordenpiña chayta ruwakun chaypas mana allinpin tukunqa. Ichaqa Diospa qosqan thak-kayqa yanapawanchismi imatapas ordenpi ruwasqanchis allinlla kashananpaq. Chayraykun ancha kusisqa kashanchis “thak-kayta qoq Dios” pusawasqanchismanta aswan allin kanapaq yanapawasqanchismantapas (Rom. 15:33). Diospa qosqan thak-kayqa pachantinpi iñiq t’aqakunatan yanapan ordenpi imatapas ruwanankupaq huk-nisqalla kawsanankupaqpas, chaykunamantaqa anchatan Jehová Diosta agradecekunchis (Sal. 29:11).

10. a) ¿Ima cambiokunan karqan Diospa llaqtanpi ñawpaq watakunapi? (Qhaway “ ¿Imaynapin umallikunaq llank’ayninku allinyarqan?” nisqa recuadrota) b) ¿Ima tapuykunatan kutichisun?

¹⁰ “ ¿Imaynapin umallikunaq llank’ayninku allinyarqan?” nisqa recuadropin tarinki Diospa llaqtan ñawpaq watakunapi wakin cambiokuna ruwasqanta, chaykunaqa allinninchispaqmi karqan. Ichaqa Jehová Diosqa churin  Jesusta utilizaspan kay tiempopipas cambiokunata ruwarqan, “bronceq” rantinpin “qorita” churarqan. ¿Imaynatan chayta ruwarqan? ¿Imaynatan umallikunaq llank’ayninkupi cambio ruwakusqan pachantinpi iñiq t’aqakunata yanaparqan thakpi huk-nisqalla kawsanankupaq? ¿Imaynatan qanta yanapashasunki ‘thak-kayta qoq Diosta’ servinaykipaq?

11. a) ¿Imatan iñiqmasinchiskuna entienderqanku Bibliata estudiasqankupi? b) ¿Imata ruwanankupaqmi umalliq t’aqamanta iñiqmasinchiskuna decidisqa kasharqanku?

¹¹ 1964 watamanta 1971 watakaman, wakin iñiqmasinchiskuna Bibliapi estudiarqanku Jesuspa tiemponpi iñiq t’aqakuna imayna kasqanmanta, chaytaqa ruwarqanku umalliq t’aqaq yanapayninwanmi. a Chaypin kayta entienderqanku: Iñiq t’aqamantaqa manan huk umalliqllachu encargasqa kanan, aswanpas huk t’aqa umalliqkunan (leey Filipenses 1:1; 1 Timoteo 4:14). Umalliq t’aqamanta iñiqmasinchiskunan repararqanku cambiokunata ruwanankupaq rey Jesucristo paykunata yanapashasqanta, chaymi decidisqa kasharqanku Jesuswan pusachikunankupaq. Hinan umallikunaq llank’aynin imayna kasqanta usqhaylla cambiarqanku, chhaynapi Bibliaq nisqanman hina kananpaq. ¿Ima cambiokunan karqan 1970 watakunapi?

12. a) ¿Ima cambiotan ruwarqanku umalliq t’aqapi? b) ¿Imaynatan kay tiempopi umalliq t’aqa llank’ayninta aparishan? (Qhaway “ Umalliq t’aqa Diospa llaqtanta qhawarin” nisqa recuadrota.)

¹² Ñawpaq kaq cambiotaqa kikin umalliq t’aqapin ruwarqanku. Chay tiempopiqa qanchis akllasqa iñiqmasinchiskunan umalliq t’aqapi karqanku, paykunan encargakullarqankutaq Watch Tower Bible and Tract Society of Pennsylvania nisqa corporacionmantapas. Ichaqa 1971 watapin huk cambiota ruwarqanku, umalliq t’aqapiqa 11  iñiqmasinchiskunan kapurqanku, manañataqmi encargakurqankuñachu chay corporacionmantapas. Umalliq t’aqapi kaqkunamantaqa manan pipas aswan allin qhawarisqaqa kaqchu, hinaspapas sapa watanmi paykuna ukhumanta hukta churaqku presidente kananpaq.

13. a) 1932 watamanta 1972 watakama, ¿imaynatan iñiq t’aqakunapi umalliqkuna llank’aqku? b) ¿Imatan umalliq t’aqa ruwarqan 1972 watapi?

¹³ Chay qhepamanmi llapa iñiq t’aqakunapi huk cambiota ruwarqanku. ¿Ima cambiotan ruwarqanku? 1932 watamanta 1972 watakaman, iñiq t’aqakunapiqa huk umallilla lliwmanta encargakurqan. 1936 watakaman chay iñiqmasita nikurqan “predicacionta qhawariq” nispa. Chaymantapas iskay kutitawanraqmi sutinta cambiarqanku, qhepamantaq nirqanku “iñiq t’aqata qhawariq” nispa. Chay iñiqmasiqa tukuy sonqowanmi iñiqmasinkunata yanapaq espiritualpi allin kanankupaq. Chaywanpas chay iñiqmasiqa payllan imatapas decidiq, manan tapuqchu huk umallikunata. Ichaqa 1972 watapin umalliq t’aqa huk cambiota ruwarqan. ¿Iman chay cambio karqan?

14. a) 1972 watapi 1 octubre killamantapacha, ¿imaynatan iñiq t’aqakunapi umalliqkuna llank’ayta qallarirqanku? b) ¿Imaynatan umallikunaq llank’ayninpi yanapaq umalli Filipenses 2:3 textoq nisqanta kasukun?

¹⁴ Chay watakamaqa huk umallillan iñiq t’aqamanta encargakurqan, chay qhepamanmi ichaqa huk umallikunatapas akllakunan karqan, paykunataqa Bibliaq nisqanman hina akllakunan karqan. Chay umallikunataq huk hinalla llapanku iñiq t’aqamanta encargakunanku karqan. Chaytaqa 1972 watapi 1 octubre killamantapachan ruwayta qallarirqanku. Kay tiempopiqa kanmi iñiq t’aqakunapi umallikunaq llank’ayninpi yanapaq umalli, payqa huk umallikunamantaqa ‘aswan huch’uypaqmi’ qhawarikun (Luc. 9:48). Pachantinpi iñiqmasinchiskunaqa ancha kusisqan kashanku chhayna huch’uyyaykukuq umallikunawan (Filip. 2:3).

15. a) ¿Imaraykun umallikuna yanapanakuspa llank’asqanku ancha allin? b) ¿Iman reparachiwanchis Jesús tiemponpipuni imatapas ruwasqanta?

 ¹⁵ Umallikunaqa yanapanakuspan iñiq t’aqata qhawarinku, chay ruwasqankuqa allinmi. ¿Imarayku? Yachasun kinsamanta. Ñawpaq kaq: Ancha importante ruwanakunataña wakin umallikuna ruwanku chaypas, yanapanakuspa llank’asqankun llapankuta reparachin iñiq t’aqapi Jesús uma kasqanta (Efes. 5:23). Iskay kaq: Proverbios 11:14 texton nin: “Askhaq yuyaychayninwanmi [...] suyuqa allinta sayan”, nispa. Iñiqmasikuna iñiyninkupi allin kanankupaqmi umallikunaqa allinta imatapas decidinanku, chaypaqmi llapallanku huñukunku hinaspa sapankaq rimasqanta uyarinku, chayta ruwasqankun yanapan Bibliaq nisqanman hina decidinankupaq (Prov. 27:17). Jehová Diosqa allinpaqmi qhawarin chay decidisqankuta, chaymi ima ruwasqankupas allinpi tukun. Kinsa kaq: Diospa llaqtanpiqa askha umallikunatan necesitakun iñiq t’aqakunata qhawarinankupaq iñiqmasikunatapas cuidanankupaq, chaymi iñiqmasinchiskuna umalli kaspanku chay ruwaykunapi yanapakushanku (Is. 60:3-5). 1971 watapiqa pachantinpin 27.000 más iñiq t’aqakuna karqan, 2013 watapitaq 113.000 más iñiq t’aqakunaña karqan, chayqa ancha admirakunapaqmi. Chaypin sut’ita reparanchis rey Jesucristo tiemponpipuni iñiq t’aqakunapi umallikunata churasqanta (Miq. 5:5).

16. a) ¿Imatan umallikuna ruwananku iñiq t’aqapi? b) ¿Imaynatan Biblia Estudiaqkuna qhawarirqanku “ovejaykunata michipuway” nispa Jesuspa nisqanta?

¹⁶ Biblia Estudiaqkunaq tiemponpiraqmi umallikunaqa allinta yacharqanku iñiqmasinkuta Diosta servishanallankupaq yanapananku kasqanta (leey Gálatas 6:10). 1908 watapin Qhawaq revista “ovejaykunata michipuway” nispa Jesuspa nisqanmanta rimarqan (Juan 21:15-17). Chaypin umallikunata kayta nirqan: “Jesusqa ovejankunata qhawarinaykichispaqmi churarqasunkichis, chay ruwaytaqa ancha importantepaqmi qhawarinaykichis, chaymantapas ancha allinpaqmi qhawarinaykichis Jesuspa qatikuqninkunata mikhuchiyta cuidayta ima”, nispa. 1925 watapin Qhawaq revista hukmanta umallikunata yuyarichirqan iñiqmasikunata cuidananku kasqanta, nirqanmi: “Llapa iñiqmasikunaq dueñonqa Diosmi, [...] paymi umallikunamanta cuentata mañanqa”, nispa.

17. ¿Imaynatan Diospa llaqtan umallikunata prepararqan iñiqmasikunata aswan allinta cuidanankupaq?

¹⁷ Diospa llaqtanqa umallikunatan yanaparqan aswan allinta iñiqmasikunata cuidanankupaq, imaynan “fierroq” rantinpi “qolqeta” churakun hinata. ¿Imaynatan chayta ruwarqan? Umallikunata allinta preparaspan. 1959 watapin qallarirqan nombrasqa qharikunapaq escuela. Chaypin umallikuna yacharqanku sapanka iñiqmasita  imayna cuidananku kasqanta. Chaymantapas umallikunatan kallpacharqanku “huk horariota ruwakuspa iñiqmasikunata watukamunankupaq”. Hinaspapas yachachirqankun iñiqmasikunata imaynata kallpachanankupaq. 1966 watapin nombrasqa qharikunapaq escuelapi rimarqanku iñiqmasikunata watukamuy ancha importante kasqanta. ¿Imamantan chaypi astawan yachachirqanku? Kaymantan yachachirqanku: Umallikunaqa “Diospa ovejankunatan munakuywan cuidananku, ichaqa familiankutapas predicaciontapas mana saqespa”. Kay watakunapin umallikunapaq escuelakuna astawan aparikurqan. ¿Yanaparqanchu chay escuelakuna umallikunata? Arí, yanaparqanmi. Kunanqa askha umallikunan allin preparasqa kashanku iñiq t’aqankupi allinta servinankupaq.

18. a) ¿Imata ruwanankupaqmi umallikuna akllasqa kanku? b) ¿Imaraykun Jehová Diospas Jesuspas umallikunata anchata munakunku?

¹⁸ Jehová Diosmi Jesusta utilizarqan umallikunata akllananpaq. ¿Imata ruwanankupaqmi umallikuna akllasqa kanku? Diospa ovejankunata kay sasa tiempokunapi allinta cuidanankupaqmi (Efes. 4:11, 12; 2 Tim. 3:1). Jehová Diospas Jesuspas anchatan munakunku allinta llank’aq umallikunata, ¿imarayku? Bibliaq kay nisqanta kasukusqankurayku, ninmi: “Qankunaman hap’ichisqa kashaq Diospa ovejankunata allintapuni michiychis, [...] ama kamachisqa hinachu, aswanpas sumaq munakuywan, [...] paykunapaq yachaqakunankupaq hina kaychis”, nispa (1 Ped. 5:2, 3). ¿Imakunapin umallikuna hukkunaq yachaqakunankupaq hina kanku? ¿Imaynatan yanapakunku iñiqmasinchiskuna thakpi kusisqa kawsanankupaq? Yachasun iskay ruwasqankumanta.

19. ¿Imaynan sientekunchis umallikunawan predicaspa?

¹⁹ Ñawpaq kaq: Umallikunaqa iñiqmasikunawan kuskan predicanku. Lucasmi kayta nirqan Jesusmanta: “Jesusqa purirqan llapa llaqtakunata huch’uy llaqtakunatawan, [...] allin willakuykunata willaspa, paywantaq chunka iskayniyoq yachachisqankunapas rirqanku”, nispa (Luc. 8:1). Jesusqa apostolninkunawan kuskan predicarqan, chay hinatan kay tiempopi umallikunapas iñiqmasikunawan kuska predicanku. Paykunaqa reparankun chayta ruwaqtinku iñiqmasikuna thak sientekusqankuta. ¿Imaynatan iñiqmasinchiskuna umallikunata qhawarinku? Jeannine iñiqmasiqa yaqa 90 watanpin kashan, paymi nin: “Huk umalliwan predicaspayqa paywanmi rimani, hinaspapas aswan allintan payta reqsini”, nispa. Steven iñiqmasinchisqa 30 más watayoqmi kashan, paypas nillantaqmi: “Huk umalliwan predicaspayqa reparanin yanapawayta  munasqanta. Kusisqan sientekuni yanapayninta chaskikuspa”, nispa.

20, 21. a) ¿Imata ruwaspan umallikuna rikuchinku rikch’anachiypi oveja michiq hina kasqankuta? b) ¿Imaraykun huk iñiqmasinchis iñiq t’aqaman kutimpurqan? (Qhawallaytaq “ Sapa semana watukamunku” nisqa recuadrota.)

²⁰ Iskay kaq: Diospa llaqtanmi umallikunata preparan iñiq t’aqaman manaña hampuq iñiqmasikunata yanapanankupaq (Heb. 12:12). ¿Imaraykun umallikuna iñiyninkupi pisipaqkunata yanapananku? ¿Imaynatan chayta ruwananku? Chayta yachananchispaq qhawarisun Jesuspa huk rikch’anachiy rimasqanmanta (leey Lucas 15:4-7). Jesusmi rimarqan huk chinkasqa ovejamanta, chay oveja chinkaqtinmi michiqqa chayllapas ovejan kanman hinaraq maskhayta qallarin. ¿Imata ruwaspan umallikuna rikuchinku chay michiq hina kasqankuta? Michiqqa ancha valorniyoqpaqmi chinkasqa ovejanta qhawarin, chay hinatan umallikunapas ancha valorniyoqpaq qhawarinku iñiq t’aqaman manaña hampuq iñiqmasikunata. Paykunaqa manan saqepunkuchu iñiyninkupi pisipaqkunata, aswanpas yanapaytan munanku. Imaynan michiq runa ‘chinkaq ovejata maskhaq rin tarinankama’, chay hinatan umallikunapas kallpachakunku pisipaqkunata yanapanankupaq.

²¹ ¿Imatan michiq runa ruwan chinkasqa ovejanta tarispa? Rikch’anachiypi nisqan hina, payqa ‘rikranpi q’epiykukuspan’ ovejankunaq kasqanman apan. Chay hinatan umallikunapas iñiyninkupi pisipaqkunataqa sumaq sonqowan rimapayanku, chhayna rimasqankun paykunata kallpachan iñiq t’aqaman kutimpunankupaq. África ladomanta Victor iñiqmasinchismi chhaynapi tarikurqan, payqa manañan huñunakuyman ripurqanchu, paymi nin: “Pusaq watan huñunakuykunaman mana rirqanichu, ichaqa chay tiempopin umallikunaqa yanapawashallarqanku”, nispa. ¿Iman payta astawan yanaparqan iñiq t’aqaman kutimpunanpaq? Paymi nin: “Huk p’unchaymi huk umalli watukamuwarqan, payqa Juanmi karqan. Paymi qhawachiwarqan precursorkunapaq escuelaman risqayku fotokunata. Chay fotokunan yuyarichiwarqan Jehová Diosta servispa ancha kusisqa kasqayta”, nispa. Chay qhepallamanmi Victor iñiqmasinchisqa iñiq t’aqaman kutimpurqan, hukmantataq precursor kashan. Munakuq umallikunaqa anchatan yanapawanchis kusisqa kananchispaq (2 Cor. 1:24). b

22. ¿Imaynatan thak-kaypas chanin-kaypas iñiq t’aqakunata yanapan huk-nisqalla kawsanankupaq? (Qhawallaytaq “ Anchatan admirakurqayku” nisqa recuadrota.)

²² Ñawpaq parrafokunapi yachasqanchis hina, Jehová Diosmi willarqan serviqninkuna thak-kaypi chanin-kaypi kawsanankuta (Is. 60:17). ¿Imaynatan thak-kaypas  chanin-kaypas iñiq t’aqakunata yanapan huk-nisqalla kawsanankupaq? Rimasun chanin-kaymanta. Biblian nin: “Diosninchis Señor Diosqa ch’ullallan”, nispa (Deut. 6:4). Ima nacionmantaña iñiqmasinchiskuna kanku chaypas, Diospa kamachikuyninkunaqa kaqllan llapa iñiq t’aqakunapaq. Allin kaqmanta mana allin kaqmanta Diospa kamachikuyninkunaqa ch’ullallan, chaykunataq llapa iñiq t’aqakunapaq (1 Cor. 14:33). Chayrayku sichus iñiq t’aqakuna Diospa kamachisqanman hina imatapas ruwanqaku chayqa huk-nisqallan kawsanqaku. Kunanqa rimasun thak-kaymanta. Reyninchis Jesucristoqa munanmi iñiq t’aqapi thak kawsay kananta, ichaqa munallantaqmi ‘thak-kaypi kawsanapaq’ kallpachakunanchista (Mat. 5:9). Chayraykun ñoqanchisqa ‘hukkunaq thak-kaypi kawsanankupaq’ kallpachakunchis, problemakuna kaqtinpas mana piqpa tanqasqallanmi allichanchis (Rom. 14:19). Chayta ruwaspan yanapakullanchistaq iñiqmasikuna thakpi huk nisqalla kawsanankupaq (Is. 60:18).

23. ¿Imamantan Diosta serviqkuna kusisqa kashanchis?

²³ 1895 watapin noviembre killapi Qhawaq revista willarqan iñiq t’aqakunapi umallikunata akllakunan kasqanta. Hinaspapas Diospa llaqtanpi umalliqkunan Jehová Diospa yanapayninta mañakurqanku, ¿imapaq? Umallikunata akllakusqanwan “iñiqmasikuna huk-nisqalla kawsanankupaq”. Watakunaq pasasqanman hinan Jehová Dios Jesusta utilizarqan umallikunaq llank’ayninpi cambiokunata ruwananpaq, chay cambiokunan yanapawarqanchis Diosta huk-nisqalla servinanchispaq (Sal. 99:4). Chayraykun pachantinpi Jehová Diosta serviqkuna kusisqa kashanchis ‘huk yuyaynillayoq’ ‘kaq sonqollayoq’ kasqanchismanta, “huk-nisqalla” ‘thak-kayta qoq Diosta’ servisqanchismantapas (2 Cor. 12:18; leey Sofonías 3:9).