1, 2. O le ā le suiga na faia i le Watch Tower o Ianuari i le 1895, ma o le ā le auala na tali atu ai uso i lenā suiga?

 SA MATUĀ fiafia le uso o John A. Bohnet i le taimi na ia vaai ai i le Watch Tower, o Ianuari i le 1895. Ua sui foliga o le faavaa o le mekasini. Ua iai le ata o se ʻolo maualuga o loo iai i luga molī o le ava, ma o loo susulu atu lona malamalama agaʻi i le pogisa. Ae i lalo ifo o le ʻolo, o loo iai le ata o se sami sousou. I totonu o le mekasini, sa iai se faasilasilaga e faatatau i lenei suiga fou sa faaulutalaina “O se Faavaa Fou.’’

² Sa tusi atu le uso o Bohnet i le uso o Russell: ʻUa matuā matagofie lava le mekasini.’ Na tusi mai foʻi se isi uso e igoa iā John H. Brown: ʻMaʻeu le matagofie o le faavaa, faapea le malosi o le faavae o le ʻolo, a o taia pea e peau o le sami sousou.’ O lenei faavaa fou o le mekasini, o le suiga muamua lenā sa faia i lenā tausaga, peitaʻi, e leʻi gata ai i inā. Iā Novema i le tausaga lava lenā, sa vaaia ai se isi suiga tele lea na tai pei o se sami sousou.

3, 4. O le ā le faafitauli na taʻua i le Watch Tower o Novema 15, 1895, ma o le ā le suiga mataʻina na faasilasila mai ai?

³ Sa taʻua i se mataupu i le Watch Tower o Novema 15, 1895, le faafitauli sa tupu. Sa saveʻu e faafitauli e pei o se sami sousou, le filemu i le faalapotopotoga o Tagata Aʻoga o le Tusi Paia. Sa fefinauaʻi uso po o ai e taʻimua i faapotopotoga. O lea, ina ia fesoasoani i uso e aveesea le agaga fevaevaeaʻi ua amata ona aliaʻe mai, na faatusa ai e lenei mataupu le faalapotopotoga i se vaa. Sa taʻua manino ai le lē taulau o i latou sa taʻimua e sauniunia le faalapotopotoga mo taimi faigatā. Sa faapefea ona foʻia le faafitauli?

⁴ Sa taʻua i le mataupu, e sauniunia e se kapeteni lelei lana ʻauvaa pe a fesagaʻia taimi faigatā. I se tulaga talitutusa, e faamautinoa e i latou o loo taʻimua i le faalapotopotoga,  ua sauniunia lelei faapotopotoga mo taimi faigatā. O lea, na taʻua ai i lenei mataupu se suiga mataʻina. Na taʻua ai, ʻe tatau ona filifilia ni toeaina mai i faapotopotoga taʻitasi e leoleoina le lafu mamoe.’—Galu. 20:28.

5. (a) Aiseā na talafeagai lelei ai le taimi na faia ai le uluaʻi faatulagaga mo toeaina? (e) O ā fesili o le a tatou iloiloina?

⁵ Sa tāua tele lenā uluaʻi faatulagaga mo le filifilia o toeaina, i le faavaeina lelei o faatulagaga i le faapotopotoga. E lē gata i lea, sa fesoasoani foʻi i le ʻauuso e fesagaʻia ai faigatā na faapogaia e le Taua Muamua a le Lalolagi. Peitaʻi, na iai lava nisi suiga i le faalapotopotoga na fesoasoani i tagata o le Atua e faaleleia ai pea la latou auaunaga. O le ā le valoaga a le Tusi Paia na valoia mai ai na suiga? O ā ni suiga i le faalapotopotoga na e mātauina, ma o ā ni aogā ua e maua mai ai?

6, 7. (a) O le ā le uiga o le Isaia 60:17? (e) O le ā e faailoa mai iā i tatou i le taʻua o “ovasia” ma “lē e tofia atu galuega” i le valoaga?

⁶ E pei ona taʻua i le Mataupu e 9, na valoia mai e Isaia o le a faatoʻateleina e Ieova ona tagata. (Isa. 60:22) Peitaʻi na fetalai Ieova lava ia i lenā valoaga: “Ou te aumaia le auro e sui aʻi le ʻapamemea, ou te aumaia foʻi le siliva e sui aʻi le uʻamea, o le ʻapamemea e sui aʻi le laupapa, o le uʻamea e sui aʻi maa; ou te tofia le filemu e fai ma ou ovasia ma le amiotonu e fai ma lē e tofia atu galuega.” (Isa. 60:17) O le ā le uiga o lenā valoaga, ma e faapefea ona faatatau mai i aso nei?

⁷ Na valoia e Isaia, o nei suiga e lē o le suia mai i le leaga i le lelei, peitaʻi o le suia mai i se tulaga lelei i se tulaga e sili ona lelei. O le a suia mai i le ʻapamemea i le auro, ma e faapena foʻi isi meafaitino uma. O lea, na valoia mai ai e Ieova o le a faasolosolo ona agaʻigaʻi i luma ona tagata. O le ā e aofia ai i le agaʻigaʻi i luma lea na taʻua i le valoaga? Na taʻua i le valoaga “ovasia” ma “lē e tofia atu galuega.” O lea, na faailoa mai ai e Ieova o lenei agaʻigaʻi i luma, e fesootaʻi atu i le auala o le a tausia ma faamaopoopo ai ona tagata.

8. (a) O ai na faapogaia suiga e pei ona taʻua i le valoaga a Isaia? (e) E faapefea ona aogā iā i tatou na suiga? (Tagaʻi foʻi i le pusa “ Na Ia Talia ma le Lotomaulalo Faasaʻoga.”)

⁸ O ai e faapogaia nei suiga i le faalapotopotoga? Na fetalai Ieova: “Ou te aumaia le auro,” “ou te aumaia foʻi le siliva,” ma “ou te tofia le filemu.” O lea, e lē o ni taumafaiga a tagata ua māfua ai suiga i le auala e faamaopoopo ai faapotopotoga. Peitaʻi, o Ieova lava ia na faapogaia. Talu mai le taimi na avea ai Iesu ma Tupu, ua faaaogā e Ieova lona Alo e faagaoioia nei suiga. O ā ni aogā ua tatou maua mai ai? Na taʻua i le mau, o le a tatou maua le “filemu” ma le “amiotonu.” O le taliaina o taʻiala mai le  Atua ma faia suiga manaʻomia, o le a tatou maua ai le filemu, ma o le naunau i le amiotonu, o le a uunaʻia ai i tatou e auauna i le “Atua o le filemu.”—Fili. 4:9.

9. O le ā le faavae moni o le maopoopo ma le autasi, ma aiseā?

⁹ Na faapea mai Paulo i le 1 Korinito 14:33, o Ieova “o le Atua o le filemu ma e fai mea maopoopo.” Mātau, e leʻi taʻua e Paulo le maopoopo ma le lē maopoopo, peitaʻi na ia taʻua faatasi le maopoopo ma le filemu. Aiseā? Talu ai e lē faapea a maopoopo se mea, ona otometi ai lea ona maua le filemu. O se faaaʻoaʻoga, e mafai ona savavali fitafita i se auala maopoopo. Peitaʻi, o lo latou sini o le auai i se taua, ma e lē maua ai se filemu. O le tulaga foʻi lenā i le avea ai o i tatou ma Kerisiano. Ia manatua, e lē taulau se faalapotopotoga pe a lē faavaeina i le filemu. O le filemu mai le Atua e maua ai le maopoopo moni. O lea, e tatou te lotofaafetai ai ona o loo faamamā ma taʻitaʻia la tatou faalapotopotoga, e le “Atua o lē e foaʻiina mai le filemu.” (Roma 15:33) O le filemu mai le Atua ua maua ai le maopoopo ma le autasi, lea e tatou te olioli ai i totonu o faapotopotoga i le lalolagi aoao.—Sala. 29:11.

10. (a) O ā suiga sa faia i la tatou faalapotopotoga? (Tagaʻi i le pusa “ Suiga i le Auala e Vaavaaia ai Faapotopotoga.”) (e) O ā fesili o le a tatou iloiloina?

¹⁰ Ua faailoa mai i le pusa “ Suiga i le Auala e Vaavaaia ai Faapotopotoga,” aogā o suiga sa faia i le faalapotopotoga a o faagasolo tausaga. O ā suiga e pei o le suia o le ʻapamemea i le auro’ na faia e Ieova e ala mai iā Iesu? Na faapefea i suiga i le auala e vaavaaia ai faapotopotoga, ona faamalosia ai le filemu ma le autasi i faapotopotoga i le lalolagi aoao? Ua faapefea foʻi i na suiga ona fesoasoani iā i tatou e auauna ai i le “Atua o le filemu”?

11. (a) O le ā le suiga sa faia ona o suʻesuʻega sa faia? (e) O le ā na maumauaʻi le vaega pule e fai?

¹¹ Talu mai le 1964-1971, na faia ai e le vaega pule ni suʻesuʻega i le tele o mataupu faale-Tusi Paia, lea e aofia ai le auala na faagaoioi ai le faapotopotoga Kerisiano i le uluaʻi senituri. a O le iʻuga, sa latou iloa ai na vaavaaia faapotopotoga i le uluaʻi senituri e se ʻautoeaina, ae lē o se toeaina se toʻatasi. (Faitau le Filipi 1:1; 1 Timoteo 4:14.) I le taimi na latou malamalama lelei ai i lea vala, na iloa ai e le vaega pule o loo taʻitaʻia e Iesu i latou e faia suiga i le auala e faamaopoopo ai tagata o le Atua. Na latou faia suiga ina ia ōgatusa ma faatulagaga o loo taʻua i le Tusi Paia. O ā nisi o suiga na faia i le amataga o vaitausaga o le 1970?

12. (a) O le ā le suiga sa faia i le vaega pule? (e) Faamatala le auala ua faagaoioi ai le Vaega Pule i aso nei. (Tagaʻi i le pusa “ O Auala ua Tausia ai e le Vaega Pule Manaʻoga o le Malo.”)

¹² O le suiga muamua sa faia, o le suiga lea i le vaega pule. O lenā vaega sa faia aʻe i sui faauuina e toʻafitu o le  komiti faatonu, o le Watch Tower Bible and Tract Society of Pennsylvania. Peitaʻi i le 1971, na siitia ai le fuainumera o sui o le vaega pule mai i le toʻafitu i le toʻasefulu tasi, ma e leʻi toe avea i latou ma sui o le komiti faatonu. Sa tutusa i latou uma ma na feauauaʻi ona avea i latou ma taʻitaʻifono i tausaga taʻitasi, e faasolo i o latou igoa.

13. (a) O le ā le faatulagaga sa iai mai le 1932-1972? (e) O le ā na faia e le Vaega Pule i le 1972?

¹³ Na sosoo ai ma le faia o suiga i faapotopotoga taʻitasi. E mai le 1932-1972, e toʻatasi le uso e vaavaaia le faapotopotoga atoa. O le 1936 na taʻua ai lenā uso tofia o le faatonu o le auaunaga. Peitaʻi, na taʻua mulimuli ane o le auauna o le faapotopotoga, ona sosoo ai lea ma le ovasia o le faapotopotoga. O lenei uso tofia sa maelega e vaavaaia le itu faaleagaga o le lafu mamoe. E masani ona faia e le ovasia o le faapotopotoga faaiʻuga mo le faapotopotoga, e aunoa ma le soālaupule ma isi auauna i le faapotopotoga. Peitaʻi, na faia e le vaega pule se suiga i le 1972. O le ā na aofia ai i lenā suiga?

14. (a) O le ā le faatulagaga na amata ona faia iā Oketopa 1, i le 1972? (e) E faapefea ona faatatauina e le sooupu o le ʻautoeaina le fautuaga i le Filipi 2:3?

¹⁴ Nai lo o le toʻatasi o le uso e avea ma ovasia i faapotopotoga taʻitasi, ae ua mafai nei ona tofia i le auala faale-Atua nisi o tane agavaa e auauna o ni toeaina. E faia  aʻe iā i latou le ʻautoeaina lea e vaavaaia le faapotopotoga. Na amata ona faia lenā suiga iā Oketopa 1, i le 1972. I aso nei, e lē manatu le sooupu o le ʻautoeaina e sili aʻe o ia nai lo o isi toeaina. Peitaʻi, e manatu iā te ia o se “tagata faatauvaa.” (Luka 9:48) Ua avea nei uso lotomaulalo ma faamanuiaga i le ʻauuso i le lalolagi aoao.—Fili. 2:3.

15. (a) O ā aogā o le faatulagaga o le tofia o le tino o le ʻautoeaina? (e) Aiseā e tatou te iloa ai o loo gaoioi ma le atamai lo tatou Tupu?

¹⁵ Ua faamaonia le aogā o le fefaasoaaʻi o tiute tauave o le ʻautoeaina i le faapotopotoga. O nisi nei o aogā: Muamua, e tusa po o le ā le tele o tiute tauave a toeaina, ae o lenei faatulagaga ua faamanatu atu ai iā i latou o Iesu le Ulu o le faapotopotoga. (Efe. 5:23) Lona lua, e pei ona taʻua i le Faataoto 11:14, “e iai le faaolataga i le toʻatele o faufautua.” E soālaupule faatasi e toeaina mataupu e aafia ai le itu faaleagaga o le faapotopotoga. E fefaaaliaʻi o latou manatu, ma taumafai e fai faaiʻuga e ōgatusa ma taʻiala a le Tusi Paia. (Faata. 27:17) E faamanuia e Ieova na faaiʻuga, ma taulau manuia ai. Lona tolu, o le toʻatele o uso ua agavaa e auauna o ni toeaina, ua talafeagai lea ma le manaʻoga tele mo ni leoleo mamoe, ona o le faatuputupulaʻia o le faalapotopotoga. (Isa. 60:3-5) O se faataʻitaʻiga,  e 27,000 faapotopotoga sa iai i le 1971, ae e oo ane i le 2013 ua silia i le 113,000 faapotopotoga. E tatou te mautinoa ai, ua saunia e Keriso leoleo mamoe mo ona soo i le taimi talafeagai.—Mika 5:5.

16. (a) O le ā le tiute tauave o toeaina? (e) O le ā le vaaiga a Tagata Aʻoga o le Tusi Paia i le fautuaga a Iesu ina ia ʻleoleo i mamoe’?

¹⁶ Ua leva ona iloa e toeaina o lo latou tiute tauave le fesoasoani i uso e tumau ona avea ma auauna a Ieova, i tuā i le vaitaimi o Tagata Aʻoga o le Tusi Paia. (Faitau le Kalatia 6:10.) I le 1908, na talanoaina ai i se mataupu i le Watch Tower le fautuaga a Iesu: “Ia e leoleo i aʻu tamaʻi mamoe.” (Ioa. 21:15-17) Na taʻua i le mataupu le fautuaga lenei i toeaina: ʻE tatau ona tāua i o tatou loto le galuega ua tuuina mai e Iesu. O lea, o se faaeaga iā i tatou le tausia ma le fafagaina o soo o le Alii.’ Ae i le 1925, na toe faamamafa mai ai i le Watch Tower le tāua o le galuega a toeaina o ni leoleo mamoe: ʻO Ieova e ana le faapotopotoga, ma e tali atu iā te Ia i latou o loo iai le faaeaga o le auauna atu i o latou uso.’

17. O le ā le auala ua fesoasoani i toeaina e avea ai ma leoleo mamoe lelei?

¹⁷ Ua saunia e le faalapotopotoga a Ieova toleniga e fesoasoani i toeaina e faaleleia ai o latou tomai o ni leoleo mamoe, e pei ona suia o le ʻuʻamea i le siliva.’ Na faia le uluaʻi Aʻoga o le Faiva o le Malo i le 1959. O se tasi o vasega na talanoaina ai le mataupu, “Ia Uaʻi Atu i Tagata Taʻitoʻatasi.” Na faalaeiauina ai uso “e fai se faasologa e asia ai tagata talaʻi i o latou aiga.” Na faailoa mai i lenā aʻoga auala eseese e faia ai nei asiasiga i se auala e atiaʻe ai. I le 1966, na amata ai ona toe faia nisi suiga i lenei aʻoga.  Na talanoaina ai le mataupu “Le Tāua o le Galuega Faaleoleo Mamoe.” O le ā le manatu autū na talanoaina i lenā vasega? E tatau i ē taʻimua ona “faia so latou sao i le tausiga lelei o le lafu mamoe a le Atua. Peitaʻi, e tatau foʻi ona latou uaʻi atu i o latou lava aiga, ma ia faia so latou sao i le faiva.” I tausaga talu ai nei, e tele aʻoga ua faia mo toeaina. O ā iʻuga ua maua mai ai? I aso nei, e faitau afe uso agavaa ua auauna o ni leoleo mamoe faaleagaga.

18. (a) O le ā le tiute tauave tāua ua tuuina atu i toeaina? (e) Aiseā e tāua ai toeaina iā Ieova ma Iesu?

¹⁸ Na faavae e Ieova le faatulagaga mo toeaina e ala mai iā Iesu, ina ia faia se tiute tauave tāua, o le taʻitaʻia lea o mamoe a le Atua i lenei taimi e sili ona faigatā. (Efe. 4:11, 12; 2 Timo. 3:1) E tāua iā Ieova ma Iesu galuega mamafa a toeaina, auā o loo latou usitaʻia le fautuaga a le Tusi Paia: ʻIa leoleo i le lafu mamoe a le Atua ma le lotomalie, ma le lotonaunau, ma ia avea ma faaaʻoaʻoga lelei i le lafu mamoe.’ (1 Pete. 5:2, 3) Seʻi o tatou iloiloina nisi o auala se lua ua avea ai leoleo mamoe ma faaaʻoaʻoga lelei i le lafu mamoe, ma saosaolaumea ai i le fiafia ma le filemu o le faapotopotoga.

19. O ā o tatou faalogona pe a galulue faatasi ma toeaina i le talaʻiga?

¹⁹ Muamua, e galulue faatasi toeaina ma sui o le faapotopotoga. Na faapea mai Luka e faatatau iā Iesu: ʻNa malaga atu o ia mai i lea aai i lea aai, ma mai i lea nuu i lea nuu, ua talaʻi ma folafola atu le tala lelei o le malo o le Atua. Ua faatasi ma ia le toʻasefulu lua.’ (Luka 8:1) Sa talaʻi faatasi Iesu ma ona soo. Ua faapena foʻi ona galulue  faatasi toeaina ma uso talitonu i le galuega talaʻi. O le faia faapea, ua latou saosaolaumea ai e atiaʻe se agaga lelei i le faapotopotoga. O ā ni aafiaga o lea mea i le faapotopotoga? Na faapea mai Jeannine, o se tuafafine ua lata i le 90 tausaga: “O le galulue faatasi ma se toeaina i le talaʻiga, ou te maua ai le avanoa e malamalama lelei ai iā te ia.” Ae na faapea mai Steven, o se uso ua silia i le 30 tausaga: “O le galulue ma se toeaina i le talaʻiga, ou te mafaufau ai o loo ia naunau e fesoasoani mai iā te aʻu. O le mauaina o lenā fesoasoani ou te maua ai le olioli.”

20, 21. E faapefea ona faataʻitaʻi toeaina i le leoleo mamoe na taʻua i le talafaatusa a Iesu? Aumai se faaaʻoaʻoga. (Tagaʻi foʻi i le pusa “ Aogā o Asiasiga i Vaiaso Taʻitasi.”)

²⁰ Lona lua, ua toleniina e le faalapotopotoga a Ieova toeaina e fesoasoani iā i latou ua lē toe faifaimea faatasi ma le faapotopotoga. (Epe. 12:12) Aiseā e tatau ai i toeaina ona fesoasoani i ē ua vaivai faaleagaga, ma e faapefea ona latou faia lea vala? O le a taliina na fesili i le talafaatusa a Iesu e faatatau i le leoleo mamoe ma le mamoe na leiloa. (Faitau le Luka 15:4-7.) E tusa ai ma le talafaatusa, ina ua leiloa le mamoe e tasi, sa matuā saʻilia o ia e le leoleo mamoe, e pei e na o le pau lea o lana mamoe. Ua faapefea ona mulimuli toeaina i lenā faaaʻoaʻoga? E tāua i le leoleo mamoe le mamoe ua leiloa, e faapena foʻi ona tāua i toeaina i latou ua lē toe faatasitasi ma tagata o Ieova. E lē manatu toeaina o se avega mamafa le saʻilia ma le fesoasoani iā i latou. Ae e pei ona ʻalu atu le leoleo mamoe e saʻili mai le mamoe ua sē seʻia maua o ia,’ e faapena foʻi ona tausolomua toeaina e fesoasoani i ē ua vaivai faaleagaga.

²¹ O le ā le gaoioiga na fai e le leoleo mamoe i le talafaatusa ina ua toe maua le mamoe? E na te siiina i luga le mamoe, “ona ia faafuata lea i ona tauau” ma toe faafoʻi i le lafu. I se tulaga talitutusa, o le manatu mamafa o toeaina, e mafai ona fesoasoani ai i se tagata ua vaivai faaleagaga, ma toe foʻi ai i le faapotopotoga. O le mea lenā sa tupu iā Victor, o se uso i Aferika na lē toe faifaimea faatasi ma le faapotopotoga. Na ia faapea mai: “Sa taumafai toeaina e fesoasoani mai pea iā te aʻu i le valu tausaga na ou lē toe talaʻi ai.” Ae o le ā se vala na sili ona pāʻia ai lona loto? Na ia faapea mai: “I se tasi aso, na asiasi mai ai John, o se toeaina na ma auai faatasi i le Aʻoga mo le Auaunaga Paeonia, ma faaali mai iā te aʻu nisi o ata sa puʻeina i le aʻoga. Na mafai ona toe faamanatu mai ai taimi fiafia na ou olioli ai i le auaunaga iā Ieova.” E leʻi umi ae toe foʻi Victor i le faapotopotoga, ma ua toe avea nei o ia o se  paeonia. O le tausiga alofa a toeaina ua tatou maua ai le fiafia.—2 Kori. 1:24. b

22. E faapefea i le amiotonu ma le filemu ona faamalosia ai le autasi i le faapotopotoga? (Tagaʻi foʻi i le pusa “ Na Ma Maofa.”)

²² E pei ona taʻua i le amataga, na valoia mai e Ieova o le a faasolosolo ona faateleina le amiotonu ma le filemu o ona tagata. (Isa. 60:17) O nei uiga ua faamalosia ai le autasi o le faapotopotoga. E faapefea i le amiotonu ona faataunuuina lea vala? ʻO lo tatou Atua o Ieova, e toʻatasi lava ia.’ (Teu. 6:4) E tutusa ana tapulaa mo le mea saʻo ma le mea sesē, lea o loo tausia e “faapotopotoga uma o le ʻaupaia.” (1 Kori. 14:33) O lea, e faatoʻā taulau manuia se faapotopotoga pe a latou tausia tapulaa a Ieova. Ae faapefea le filemu? E finagalo lo tatou Tupu e tatou te maua le filemu i le faapotopotoga, ma ia avea foʻi i tatou o ni “ē e faatupuina le filemu.” (Mata. 5:9) O lea, e tatau ona tatou “tausisi i mea e faatupu ai le filemu.” Ia tatou tausolomua e foʻia ni feeseeseaʻiga e tulaʻi mai. (Roma 14:19) O le faia faapea, e tatou te saosaolaumea ai i le filemu ma le autasi o le faapotopotoga.—Isa. 60:18.

23. O le ā ua tatou olioli ai i aso nei?

²³ I le Watch Tower o Novema i le 1895, na uluaʻi faasilasila ai le faatulagaga mo toeaina. Na faailoa mai ai e uso na taʻimua lo latou faanaunauga. Na latou tatalo ma faamoemoe o le a fesoasoani lenei faatulagaga i tagata o Ieova, e ʻautasi ai i le faatuatua.’ A o faagasolo tausaga, e tatou te lotofaafetai ona o le auala ua aumaia ai e Ieova suiga e ala mai i lona Alo, e faamalosia ai le autasi i le tapuaʻiga. (Sala. 99:4) O le iʻuga, ua olioli tagata o Ieova i le lalolagi aoao a o latou savavali “i le loto e tasi,” mulimuli i le “ala e tasi,” ma “auauna soosootauʻau” i le “Atua o le filemu.”—2 Kori. 12:18; faitau le Sefanaia 3:9.