1, 2. Se a te ‵fuliga ne fai i te Zion’s Watch Tower i a Ianuali 1895, kae ne ‵saga atu pefea a taina ki ei?

I TE taimi ne maua ei ne se Tino Akoga i te Tusi Tapu loto finafinau, ko John A. Bohnet, tena ‵kopi o te Zion’s Watch Tower i a Ianuali 1895, ne fiafia malosi tou tagata ki ana mea ne matea. E fou tena ‵kava kae ‵kala uli malosi​—mo te ata o se fale maluga mo se molī i ei i luga i te tai sou i se afā, kae maina atu tena mainaga ki te lagi pouli. Ko te faka‵pulaga i te mekesini e uiga ki te fakatokaga fou ne fakaulutala penei “‵Tou Gatu Fou.”

² Ona ko tena fiafia, ne lafo atu ei ne te Taina ko Bohnet se tusi ki te Taina ko Russell. Ne tusi mai a ia: “Ko oko eiloa i toku fiafia ke kilo atu ki te gali o te FALE MALUGA. Ko se faka‵tau eiloa i te gali.” Ne tusi atu a te suā Tino Akoga i te Tusi Tapu fakamaoni, ko John H. Brown, e uiga ki te ‵kava: “Ko oko eiloa i te matagali. Ko oko eiloa i te malosi o te fakavae o te fale maluga i te taimi e ‵fati atu a peau kae agi malosi atu foki te matagi ki ei.” A te ‵kava fou tenā ko te ‵fuliga muamua ne lavea atu ne taina i te tausaga tenā​—kae e se tenā te ‵toe ‵fuliga. I a Novema, ne iloa atu foki ne latou a te suā ‵fuliga lasi. Se mea fakaofoofogia me ne aofia foki i ei a te tai sou.

3, 4. Se a te fakalavelave ne fakasino atu ki ei te Watch Tower i a Novema 15, 1895, kae se a te ‵fuliga tāua telā ne faka‵pula atu?

³ Ne fakaasi faka‵sau mai i se mataupu telā ne ‵lomi aka i te Watch Tower i a Novema 15, 1895: A fakalavelave kolā e fai pelā mo te tai sou ne fakamasei atu ki te filemu o te kautaina, io me ko te fakapotopotoga o Tino A‵koga i te Tusi Tapu. Ne momea aka faeloa o kinau a taina me ko oi te tino e ‵tau o fai mo fai te takitaki i olotou fakapotopotoga. Ke fesoasoani atu ki taina ke lavea ne latou a mea e manakogina ke faka‵tonu aka ei te uiga fia fakamavae‵vae tenā, ne fakatusa ne te mataupu a te fakapotopotoga ki se vaka. Kae ne taku atu ei mo te fakaeteete me i a latou kolā ne fai ne latou te takitakiga ne fakata‵mala ke fakatoka a te fakapotopotoga e pelā me se vaka mō tau-o-aso ma‵sei. Ne a mea ne ‵tau o fai?

⁴ Ne taku mai i te mataupu me e fakamautinoa aka ne se kapeni atamai ke faka‵sao a tino i luga i te vaka kae e toka a kauvaka o faka‵mau a mataloa mo nisi mea māfai ko pili o oko atu te matagi malosi. E penā foki loa, a latou kolā e fai ne latou te takitakiga i te fakapotopotoga e ‵tau o fakamautinoa aka ne latou me  e toka a fakapotopotoga katoa o fakafesagai atu ki tulaga faiga‵ta e pelā me se afā. Ke fakataunu te mea tenā, ne faka‵pula atu ei ne te mataupu se ‵fuliga lasi ‵ki. Ne fakatonu atu i ei me e ‵tau o fakagalue fakavave aka, me “i so se kamupane, ko oti ne filifili aka a toeaina” ke fai mo “tausi mamoe o te fakapotopotoga.”​—Galue. 20:28.

5. (a) Kaia ne fai ei a te fakatokaga muamua o toeaina mo fai se faifaiga ‵lei i te taimi tonu? (e) Ne a fesili ka mafau‵fau ki ei?

⁵ Ne fakaasi mai i te fakatokaga muamua tenā o toeaina se faifaiga ‵lei i te taimi tonu ke ati aka ei se fakapotopotoga malosi ‵ki. Ne fesoasoani atu ki ‵tou taina ke fakateletele atu faka‵lei i loto i galu ma‵luga kolā ne pogai mai i te Taua Muamua a te Lalolagi. I te fia o sefulu tausaga mai tua ifo, ne fesoasoani atu a nisi fakatokaga tai ‵lei atu ki tino o te Atua ke toka ‵lei o tavini atu ki a Ieova. Se a te valoaga i te Tusi Tapu ne ‵valo mai i ei te fakatokaga tenei? Ne a ‵fuliga i fakatokaga ne iloa ne koe? Ne maua pefea ne koe a mea aoga mai i ei?

6, 7. (a) Se a te uiga o te Isaia 60:17? (e) Se a te mea e fakaasi mai i pati “tino pule,” io me ko ovasia mo te “pule” atu?

⁶ E pelā mo te mea ne mafau‵fau tatou ki ei i te Mataupu e 9, ne ‵valo mai a Isaia me ka fakamanuia ne Ieova ana tino e auala i te faiga ke gasolo latou o tokouke atu. (Isa. 60:22) Kae ne tauto mai a Ieova me ka uke atu ana mea e fai. I te valoaga foki eiloa tenā, ne fai mai a ia: “Ka aumai ne au ki a koe a te aulo kae se ko te palasi, te siliva mo te palasi [kopa] kae se ko te fiti mo te lakau, te fiti kae se ko te fatu. A ou tino pule [ovasia] ka se toe pule fakasaua ki a koe; ka fai ne au latou ke pule mo te fai mea tonu mo te filemu.” (Isa. 60:17) Se a te mea e fakauiga ki ei te valoaga tenā? E fakauiga pefea ki a tatou i aso nei?

⁷ Ne fai mai te valoaga a Isaia me ka sui a nisi mea. Kae onoono aka me i te suiga o mea konei, e se mai te masei ki te ‵lei, kae mai te ‵lei ki te ‵lei atu. A te suiga o te kopa ki te aulo se mea e tai ‵lei atu, kae e penā foki loa a nisi mea kolā ne taku mai i konei. Tela la, mai i pati fakauiga konei, ne ‵valo mai ne Ieova te tulaga o ana tino ka gasolosolo malielie aka eiloa o ‵lei. Ne a vaegā faka‵leiga kolā ne fakasino atu ki ei te valoaga? I te takumaiga o “tino pule,” io me ko ovasia mo te “pule” atu, ne fakaasi mai ne Ieova a faka‵leiga malielie o auala ne tausi kae fakatoka faka‵lei ei ana tino.

8. (a) A faka‵leiga kolā ne taku mai i te valoaga a Isaia ne māfua mai i a ai? (e) Ne a mea aoga ne maua ne tatou mai i faka‵leiga konei? (Ke onoono foki ki te pokisi “ Ne Talia Eiloa ne Ia mo te Loto Maulalo a Fakatonutonuga.”)

⁸ Ko oi ka fai ne ia te faka‵leiga tenei i fakatokaga? E fai mai a Ieova: “Ka aumai ne Au ki a koe te aulo,” mo te “ka fai ne Au latou ke pule . . . mo te filemu.” A te ‵tonuga loa, a te momea aka o te ‵lei i fakatokaga i te fakapotopotoga ko oti eiloa ne fai, e se auala i taumafaiga a tino, kae e auala eiloa i a Ieova. Kae talu mai te taimi ne fai ei a Iesu mo fai te Tupu, ne fai eiloa ne Ieova a faka‵leiga konei e auala i tena Tama. E maua pefea ne tatou a mea aoga mai i ‵fuliga konei? E fai mai foki a te tusi siki tenei me ka iku atu a faka‵leiga konei ki “te filemu” mo te “fai mea tonu.” I te taimi e talia ei ne tatou a te takitakiga a te Atua kae fai a ‵fuliga, e tumau eiloa te filemu i va o tatou kae fakamalosi aka tatou ne  te alofa ki te fai mea tonu ke tavini atu ki a Ieova, telā ne fakamatala mai ne te apositolo ko Paulo me ko “te Atua o te filemu.”​—Fili. 4:9.

9. Se a te fakavae ‵lei ke maua ei te tokagamalie mo te fealofani i te fakapotopotoga, kae kaia?

⁹ Ne tusi mai a Paulo e uiga ki a Ieova: “Me i te Atua e se ko te Atua o te fai valevale, kae ko te Atua o te filemu.” (1 Koli. 14:33) Mafaufau la me e seki faka‵kese ne Paulo a te fai valevale mo te fai faka‵lei, kae ne faka‵kese ne ia ki te filemu. Kaia? Mafaufau ki te mea tenei: A te fai faka‵lei e se mafai o iku atu i a ia eiloa ki tulaga filemu. E pelā mo se potukau o sotia e mafai o māti atu i se auala tokagamalie ki laina mai mua, kae ko te lotou fakatoka faka‵lei e mafai o iku atu ki se taua, kae e se ko te filemu. Tela la, e pelā me ne Kelisiano, e ma‵nako tatou ke masaua a te manatu tāua tenei: So se fakatokaga ‵lei telā e se fakavae ki te filemu ka malepe vave io me i se taimi fakamuli. E ‵kese mai i ei, e fakamalosi aka ne te filemu o te Atua a te fakatokaga ‵lei telā e tumau. Tela la, ko oko eiloa i te ‵tou fia‵fia me e takitaki kae faka‵ma eiloa ‵tou fakapotopotoga ne “te Atua o te filemu”! (Loma 15:33) A te filemu mai Atua e ati aka ei te fakavae mō se fakatokaga aoga mo te fealofani tonu, telā e maua kae fakatāua malosi ne tatou i ‵tou fakapotopotoga i te lalolagi kātoa.​—Sala. 29:11.

10. (a) Ne a faka‵leiga ne fai i te ‵tou fakapotopotoga i ana tausaga kamata? (Ke onoono ki te pokisi “ Te Auala ne Momea Aka ei te ‵Lei o te Tausiga o Fakapotopotoga.”) (e) Ne a fesili ka mafau‵fau nei ki ei?

¹⁰ A te pokisi ko “ Te Auala ne Momea Aka ei te ‵Lei o te Tausiga o Fakapotopotoga” e tuku mai i ei se ata kātoa o ‵fuliga aoga kae ‵lei kolā ne fai i te ‵tou fakapotopotoga i ana tausaga kamata. Kae ne a ‵fuliga ‘mai te kopa ki te aulo’ ne fai ne Ieova i aso fakamuli nei e auala i te ‵tou Tupu? Ne fakamalosi aka pefea ne fakama‵fuliga konā i fakatokaga a te filemu mo te fealofani o fakapotopotoga i te lalolagi kātoa? E fesoasoani atu pefea ki a koe ke tavini faka‵lei atu ki “te Atua o te filemu”?

11. (a) Se a te fakamafuliga ne fai ki te malamalama ona ko sukesukega ki te Tusi Tapu? (e) Ne a mea ne fakaiku aka ne taina i te potukau pule ke fai?

¹¹ Mai te 1964 ki te 1971, ne fai ne te potukau pule se sukesukega ‵loto ki te Tusi Tapu e uiga ki mataupu e uke, telā e aofia i ei a te auala ne fakateletele aka ei te fakapotopotoga Kelisiano i te senitenali muamua. * E pelā mo te fakatokaga o te fakapotopotoga, ne iloa aka me ne tausi eiloa a te fakapotopotoga i te senitenali muamua ne te kau toeaina i lō se toeaina, io me se ovasia fua e tokotasi. (Faitau te Filipi 1:1; 1 Timoteo 4:14.) I te taimi ne malamalama faka‵lei ei i te manatu tenā, ne iloa aka ei ne te potukau pule me i te lotou Tupu, ko Iesu, e takitaki ne ia latou i te faiga o faka‵leiga i te fakatokaga o tino o te Atua​—kae ne fakaiku aka ne taina i te potukau pule ke talia te takitakiga a te Tupu. Ne fai fakavave ei ne latou a fakama‵fuliga ke fakafetaui aka a fakatokaga ki mea kolā e fakaasi mai i te Tusi Tapu mō toeaina. Ne a nisi fakama‵fuliga ne fai i tausaga kamata talu mai te 1970?

12. (a) Se a te fakamafuliga ne fai ki te potukau pule? (e) Fakamatala mai te auala e fakatoka ei a te Potukau Pule i aso nei. (Ke onoono ki te pokisi ko te “ Te Auala e Tausi Atu ei te Potukau Pule ki Manakoga o te Malo,” te itulau e 130.)

¹² Ne fai eiloa te fakamafuliga muamua ki te potukau pule. Ke oko ki te taimi tenā, ne aofia eiloa a sui e tokofitu i te potukau tenā o taina fakaekegina i matagaluega kese‵kese o te Watch Tower Bible and Tract Society of Pennsylvania. Kae i te 1971, ne fanaka te  aofaki o sui o te potukau pule mai te 7 ki te 11 kae ne seki toe aofia latou i matagaluega kese‵kese. Ne ‵kilo ifo a sui ki a latou e pelā me e ‵pau katoa kae ne kamata o fakasolosolo latou i te tulaga o te takitakifono telā e fakasolosolo ei latou e ‵tusa mo olotou igoa i te fakasologa o mataimanu.

13. (a) Se a te fakatokaga ne fakagalue aka i tausaga e 40? (e) Se a te mea ne fai ne te Potukau Pule i te 1972?

¹³ A te suā fakamafuliga ne pokotia i ei a fakapotopotoga takitasi. E pefea la? Mai te 1932 ki te 1972, ne tausi tokotasi sāle ne se taina a te fakapotopotoga. Ke oko atu ki te 1936, ne taku a te taina tenā ki te pule o te taviniga. Mai tua ifo i ei, ne ‵fuli a te igoa ki te tavini o te kamupane, oti ki te tavini a te fakapotopotoga, kae fakamuli loa ki te ovasia o te fakapotopotoga. Ne tausi eiloa mo te loto finafinau ne taina konā a te lafu i te feitu faka-te-agaga. Ne fai sāle ne te ovasia o te fakapotopotoga a fakaikuga mō te fakapotopotoga e aunoa mo te fakailoa atu ki nisi tavini i te fakapotopotoga. Kae i te tausaga ko te 1972, ne fakatoka ei a te Potukau Pule mō te suā ‵fuliga lasi i tala fakasolopito. Ne a mea ne aofia i te ‵fuliga tenā?

14. (a) Se a te fakatokaga fou ne fakagalue aka i a Oketopa 1, 1972? (e) E fakagalue aka pefea ne te kouotineita o te kau toeaina a pati fakatonutonu i te Filipi 2:3?

¹⁴ I lō te faiga ke tavini atu se taina e tokotasi e pelā me se ovasia o te fakapotopotoga i fakapotopotoga takitasi, ko ‵tofi aka nei a nisi taina kolā e fetaui ‵lei mo tulaga faka-te-Tusi Tapu ke tavini atu e pelā me ne toeaina Kelisiano. E aofia latou i te kau toeaina kolā e tausi atu ki se fakapotopotoga. A te fakatokaga fou tenā o  toeaina ne kamata i a Oketopa 1, 1972. I aso nei, a te kouotineita o te kau toeaina e se kilo atu ki a ia e pelā me e maluga atu i nisi toeaina, kae se tino “e se taulia.” (Luka 9:48) Ko oko eiloa i te manuia o te kautaina i te lalolagi kātoa ona ko taina loto maulalo penā!​—Fili. 2:3.

15. (a) Ne a mea aoga ne maua mai i te fakatokaga o fakapotopotoga e uiga ki te kau toeaina? (e) Se a te mea e fakaasi mai me ne gasuesue eiloa te ‵tou Tupu mo te poto?

¹⁵ A te fakatokaga ke fakatau fesoasoani i tiute o te kau toeaina se fakamaoniga o te ‵toe faka‵leiga sili. Mafaufau ki mea aoga e tolu konei: A te mea muamua kae ko te ‵toe mea tāua foki, e fesoasoani atu a te fakatokaga ki toeaina katoa​—faitalia me e pefea te ‵mafa o olotou tiute i te fakapotopotoga​—ke masaua ne latou me i a Iesu ko te Ulu o te fakapotopotoga. (Efe. 5:23) A te lua, e pelā mo pati i te Faataoto 11:14: “A te tokouke o tino fai manatu fakatonutonu ko te ‵lei tenā o te malo.” Kafai e fai‵pati fakatasi a toeaina ki mea kolā e pokotia ei te fakapotopotoga i te feitu faka-te-agaga kae mafaufau ki manatu fesoasoani o te suā tino, e fesoasoani atu ei ke fai ne latou se fakaikuga telā e fetaui mo akoakoga fakavae i te Tusi Tapu. (Faata. 27:17) E fakamanuia ne Ieova a vaegā fakaikuga penā kae e iku atu eiloa ki te manuia. A te tolu, a te uke o taina e fetaui ‵lei ke tavini atu e pelā me ne toeaina, ne mafai ei ne te fakapotopotoga o tausi atu ki manakoga kolā e olo aka faeloa ki luga i te tausiga mo te atafai atu ki tino i fakapotopotoga. (Isa. 60:3-5) Mafaufau aka la ki ei​—a te aofaki o  fakapotopotoga i te lalolagi kātoa e fanaka mai te 27,000 tupu i te 1971 ki te 113,000 tupu i te 2013! E manino ‵lei, me ona ko te kilo ‵mao, ne tuku mai eiloa ne te ‵tou Tupu a tausi mamoe e manakogina mō ana soko i te taimi tonu.​—Mika 5:5.

16. (a) Se a te tiute ne maua ne toeaina? (e) Se a te kilokiloga ne maua ne Tino A‵koga i te Tusi Tapu ki te fakamalosiga a Iesu ke ‘tausi a mamoe’?

¹⁶ I aso kamata o Tino A‵koga i te Tusi Tapu, ne malamalama a toeaina me e isi se lotou tiute ke fesoasoani atu latou ki taina tali‵tonu ke tumau e pelā me ne tavini a te Atua. (Faitau te Kalatia 6:10.) I te 1908, ne fakamatala mai i se mataupu i te Watch Tower a te fakamalosiga a Iesu: “Tausi aku mamoe.” (Ioa. 21:15-17) Ne fai atu te mataupu ki toeaina: “Se mea tāua ke fakamuamua ne tatou i ‵tou loto a te fakatonuga a te Matai e uiga ki te lafu, ke fakatāua malosi ne tatou a te tauliaga sili ke fagai kae tausi atu ki soko o te Aliki.” I te 1925, ne toe faka‵mafa mai ne The Watch Tower a te tāua o te tavini atu e pelā me ne tausi mamoe mai i te toe fakamasaua atu ki toeaina: “E a te Atua eiloa tena lotu, . . . kae ka fakamasino aka ne ia a latou kolā e maua te tiute mō te tauliaga ke tavini atu ki olotou taina.”

17. Ne fesoasoani atu pefea ki ovasia ke momea aka te lotou ata‵mai e pelā me ne tausi mamoe?

¹⁷ Ne fesoasoani atu pefea a te fakapotopotoga a Ieova ki toeaina ke ‵fuli olotou atamai e pelā me ne tausi mamoe mai ‘te fiti ki te siliva’? Mai i te tukuatuga o akoakoga. I te 1959, ne fai ei i te taimi muamua a te Akoga mō Toeaina mo Tavini Fesoasoani mō ovasia. Ne mafau‵fau a te vasega i te taimi e tasi ki te mataupu ko te “Ke ‵Saga Tonu Atu ki ei.” Ne fakamalosi atu ki taina i tōfiga konā ke “fakatoka se fakasologa o tino talai ke āsi atu ki a latou i olotou fale.” Ne fakamatala mai i te mataupu tenā a auala kese‵kese e mafai ei ne tausi mamoe o fai a vaegā āsiga fakamalosi loto penā. I te 1966, ne kamata aka foki se Akoga mō Toeaina mo Tavini Fesoasoani Fou. E mafau‵fau i ei ki te mataupu “Te Tāua o te Galuega a Tausi Mamoe.” Se a te manatu tāua i te mataupu  mō te vasega tenā? A latou kolā e fai ne latou te takitakiga “e ‵tau o aofia i te fakaasiatuga o te alofa atafai ki te lafu a te Atua, e aunoa mo te fakaseaoga ne latou olotou kāiga mo te galuega talai.” I tausaga fakamuli nei, ne fai eiloa a akoga mō toeaina e uke atu. Ne a mea ne iku mai i akoakoga tumau kolā ne fakatoka ne te fakapotopotoga a Ieova? I aso nei, e lau eiloa i afe o taina i fakapotopotoga Kelisiano kolā e fetaui ‵lei ke tavini atu e pelā me ne tausi mamoe faka-te-agaga.

18. (a) Se a te tiute ‵mafa ‵ki ne tuku atu ki te kau toeaina? (e) Kaia e a‵lofa malosi ei a Ieova mo Iesu ki toeaina ga‵lue malosi?

¹⁸ Ne ‵tofi aka eiloa ne Ieova, e auala i te ‵tou Tupu, ko Iesu, a toeaina Kelisiano ke fai ne latou se galuega ‵mafa ‵ki. Se a la te galuega tenā? Ke takitaki atu a mamoe a te Atua i toe taimi faiga‵ta i tala fakasolopito o tino. (Efe. 4:11, 12; 2 Timo. 3:1) E alofa malosi a Ieova mo Iesu ki toeaina ga‵lue malosi ona ko te mea e faka‵logo a taina konei ki te fakamalosiga i te Tusi Tapu: “Tausi faka‵lei te lafu mamoe a te Atua tenā e tausi ne koutou . . . i te loto fiafia . . . , i te fiafia tonu. . . . , ke fai koutou mo fakaakoakoga ‵lei ki te lafu mamoe.” (1 Pe. 5:2, 3) Ke na mafau‵fau nei tatou ki auala e lua, mai te fia o auala, e fai ei a tausi mamoe Kelisiano mo fai ne fakaakoakoga ki te lafu, kae fesoasoani malosi atu ki te tausiga o te filemu mo te fiafia i te fakapotopotoga.

19. E pefea ‵tou lagonaga māfai e ga‵lue fakatasi tatou mo toeaina i te galuega talai?

¹⁹ Muamua la, e ga‵lue fakatasi a toeaina mo tino o te fakapotopotoga. Ne fai mai te tino tusitala Evagelia ko Luka e uiga ki a Iesu: “Ne faimalaga atu a Iesu mai fa‵kai ‵lasi ki nisi fa‵kai ‵lasi, e pelā foki mo fa‵kai fo‵liki ki nisi fa‵kai fo‵liki, o talai kae folafola atu te tala ‵lei e uiga ki te Malo o te Atua. Kae ne fakatasi atu foki te toko sefululua ki a ia.” (Luka 8:1) E pelā eiloa mo te talai fakatasi atu o Iesu mo ana apositolo, e penā foki te ga‵lue fakatasi o toeaina kolā e fai mo fakaakoakoga ‵lei mo olotou taina tali‵tonu i te galuega talai. E iloa ne latou me mai te faiga penā,  e fesoasoani malosi atu eiloa latou ki te ‵lei o te fakapotopotoga. E pefea a lagonaga o tino o te fakapotopotoga e uiga ki vaegā toeaina penā? A Jeannine, se tuagane telā ko 80 tupu ana tausaga, ne fai mai: “A te ga‵lue fakatasi mo se toeaina i te galuega talai e tuku mai i ei se avanoaga gali ke sau‵tala māua kae ke iloa ‵lei ne au a ia.” A Steven, se taina ko 30 tupu ana tausaga, ne fai mai: “Kafai e ga‵lue fakatasi māua mo se toeaina i te galuega talai mai fale ki fale, e mafaufau au me e fia fesoasoani mai a ia ki a au. A te mauaga o se vaegā fesoasoani penā e maua ei ne au a te fiafia lasi.”

20, 21. E mafai pefea o fakaakoako atu a toeaina ki te tausi mamoe i te tala fakatusa a Iesu? Tuku mai se fakaakoakoga. (Ke onoono foki ki te pokisi “ Āsiga Aoga i Vaiaso Katoa.”)

²⁰ A te lua o mea, ko oti eiloa ne fakamasani ne Ieova a toeaina ke fakaasi atu te lotou manava‵se ki tino kolā ko se ‵kau atu ki te fakapotopotoga. (Epe. 12:12) Kaia e ‵tau ei mo toeaina o fesoasoani atu ki tino kolā e vāi‵vai i te feitu faka-te-agaga, kae ne a mea e ‵tau o fai ne latou? E tuku mai eiloa a te tali i te tala fakatusa a Iesu e uiga ki te tausi mamoe mo se mamoe ne galo. (Faitau te Luka 15:4-7.) Kafai ko iloa ne te tino tausi mamoe i te tala fakatusa me e isi se mamoe e galo, e ‵sala atu a ia ki te mamoe ne galo e pelā eiloa me e tasi fua tena mamoe. E tau‵tali atu pefea a toeaina Kelisiano i aso nei ki te fakaakoakoga a te tausi mamoe tenā? E pelā eiloa mo te tāua o te mamoe ne galo i te kilokiloga a te tausi mamoe, e penā foki a latou kolā ko ‵galo atu mai i tino o te Atua, e tumau eiloa te lotou tāua i te kilokiloga a toeaina. E ‵kilo atu latou ki se tino vāivāi i te feitu faka-te-agaga e pelā me ko te mamoe ne galo​—kae e se pelā me ne tino fakamāumāu taimi. E sili atu i ei, e pelā eiloa mo te fakaiku aka ne te tausi mamoe ke “fano o ‵sala te mamoe telā ko galo ke oko ki te taimi e maua ei ne ia,” e penā foki te gasue‵sue muamua o toeaina ke ‵sala kae fesoasoani atu ki a latou kolā ko vāi‵vai.

²¹ Ne a mea e fai ne te tausi mamoe i te tala fakatusa i te taimi ne maua ei ne ia te mamoe? E amo aka ne ia mo te atafai “ki tena tuauma,” kae toe fakafoki atu ki te lafu. E penā foki loa, a te manavase tonu o se toeaina e mafai o sau aka ne ia mo te atafai se tino vāivāi i te feitu faka-te-agaga kae fesoasoani atu ke toe foki mai ki te fakapotopotoga. Tenā eiloa te mea ne tupu ki a Victor, se taina i Afelika telā ne fakagata aka tena kau atu ki te fakapotopotoga. Ne fai mai tou tagata: “I te valu tausaga ne vāivāi ei au i te feitu faka-te-agaga, ne tumau eiloa a toeaina i te fesoasoani mai ki a au.” Se a te mea ne otia malosi ei a ia? Ne fakamatala mai a ia: “I te aso e tasi, a John, se toeaina telā ne ‵kau fakatasi atu māua ki te Akoga mō Paenia, ne fakaavanoa faeloa ne ia a taimi ke āsi mai ki a au kae fakaasi mai ne ia a nisi ata ne puke ne ia i te taimi o te akoga. Ne toe masaua ei ne au a mea ‵gali e uke telā ne kamata o manako malosi au ki te fiafia telā ne maua ne au i te taimi ne tavini atu ei au ki a Ieova.” E se leva mai tua o āsiga a John, ne toe foki atu a Victor ki te fakapotopotoga. I aso nei, ko toe tavini atu a ia e pelā me se paenia. A te ‵tonuga loa, e fesoasoani malosi mai a toeaina Kelisiano atafai ki te ‵tou fia‵fia.​—2 Koli. 1:24. *

22. E fakamalosi aka pefea ne te fai mea tonu mo te filemu a te fealofani o te fakapotopotoga Kelisiano? (Ke onoono foki ki te pokisi ko te “ Ne Ōfo Māua.”)

²² E pelā mo mea ne lavea atu muamua, ne ‵valo mai ne Ieova me ka momea aka faeloa ki luga a te fai mea tonu mo te filemu i tino o te Atua. (Isa. 60:17) E fai ne te avā uiga konei ke momea aka te fealofani o fakapotopotoga. I auala fea? E pelā mo te fai mea tonu, a Ieova “ko te Atua e tokotasi.” (Teu. 6:4) E se faka‵kese ne ia ana tulaga amio‵tonu i fakapotopotoga i se fenua e tasi mai i fakapotopotoga i te suā fenua. E tonu, e tasi eiloa tena tulaga e uiga ki te mea ‵lei mo te mea ‵se, kae e ‵pau eiloa “mo fakapotopotoga katoa o tino tapu.” (1 Koli. 14:33) Tela la, ka gasolo aka eiloa o ola ‵lei te fakapotopotoga māfai e fakagalue aka a tulaga o te Atua. Kae e pelā mo te filemu, e manako te ‵tou Tupu ke se maua fua te filemu i te fakapotopotoga kae ke “uiga filemu” foki. (Mata. 5:9) Tela la, e “kausaki atu tatou ki mea kolā e maua ei a te filemu.” E gasue‵sue muamua tatou o faka‵lei aka a mea kolā e ‵kese ei tatou kae e mafai o ‵sae aka i nisi taimi. (Loma 14:19) I te auala tenā, e mafai o fesoasoani atu tatou ki te fakamalosiakaga o te filemu mo te fealofani i te ‵tou fakapotopotoga.​—Isa. 60:18.

23. E pelā me ne tavini a Ieova, ne a mea e maua ne tatou i aso nei?

²³ I a Novema 1895, i te taimi ne faka‵pula atu ei ne te Watch Tower a te fakatokaga muamua e uiga ki toeaina, ne fakaasi atu ne taina tōfia olotou lagonaga ‵tonu. Ne a la? Ne mafau‵fau kae ‵talo latou ke fesoasoani atu te fakatokaga fou tenei ki tino o te Atua ke “maua fakavave ne latou te tasi i te fakatuanaki.” I te kilo atu ki te fia sefulu tausaga ko ‵teka, e fia‵fia eiloa tatou ke iloa atu, me i te faka‵maga malielie i te tausiga o te fakapotopotoga telā ne fai ne Ieova, e auala i te ‵tou Tupu ne fakamalosi aka ei te tasi o tatou i te tapuakiga. (Sala. 99:4) A te ikuga, ko fia‵fia eiloa a tino katoa o Ieova i te lalolagi i aso nei i te taimi e sa‵sale atu tatou “i te agaga e tasi,” tau‵tali atu i “te auala e tasi,” kae tavini atu fakatasi ki “te Atua o te filemu.”​—2 Koli. 12:18; faitau te Sefanaia 3:9.