1, 2. ¿Baʼax kʼeexil yanchaj tiʼ le revista Watch Tower tiʼ enero tiʼ 1895, yéetel bix tu yuʼubiluba le sukuʼunoʼob tu yoʼolal leloʼ?

 JUNTÚUL j-Xoknáal tiʼ le Bibliaoʼ ku kʼaabaʼtik John A. Bohnet, letiʼeʼ jach kiʼimakchaj u yóol ka tsʼaʼabtiʼ junpʼéel revista Watch Tower tiʼ enero tiʼ 1895. Le baʼax yaan tu táan yéetel tu paach le revistaoʼ túumben: u dibujoil junpʼéel faro waʼakúuntaʼan ichil junpʼéel kʼáaʼnáab ku woʼoltikuba, táan u juul u sáasil ichil le éeʼjochʼeʼeniloʼ. Le anuncio tu taasaj le revista utiaʼal u tsoʼolol le túumben bix beetaʼaniloʼ tu kʼaabaʼtaj «K-túumben nookʼ».

² Jach kiʼimakchaj u yóol le sukuʼun Bohnetoʼ, le oʼolal tu túuxtaj junpʼéel carta tiʼ sukuʼun Russell, tuʼux tu yaʼalaj: «Jach jatsʼuts u yilaʼal le PʼÍICH TULUM ku chíikpajal teʼ revistaoʼ». John Brown, uláakʼ juntúul j-Xoknáal tiʼ le Bibliaoʼ tu tsʼíibtaj xan yoʼolal le revistaoʼ: «Jach maʼalob u yilaʼal. Chíikaʼan maʼalob u chuunpakʼil yéetel maʼ tu péeksaʼal tumen u olasil le jaʼ ku jatsʼkuba tiʼoʼ». Le bix beetaʼabik le revistaaʼ letiʼe yáax kʼeex tu yilaj le sukuʼunoʼob teʼ kʼiinoʼoboʼ, baʼaleʼ lelaʼ chéen u káajbal. Tu mesil noviembreeʼ tu yiloʼob junpʼéel kʼeex maas nojoch. Lelaʼ láayliʼ yaan yil yéetel junpʼéel kʼáaʼnáab ku woʼoltikubaeʼ.

3, 4. ¿Baʼax tu yaʼalaj le revista Watch Tower 15 tiʼ noviembre tiʼ 1895, yéetel baʼax kʼeexil aʼalaʼab kun beetbil?

³ Junpʼéel xook chan chowak tu taasaj le revista Watch Tower 15 tiʼ noviembre tiʼ 1895, tʼaanaj tiʼ junpʼéel baʼax ku yúuchul: U kaajal Dios wa le j-Xoknáaloʼob tiʼ le Bibliaoʼ táan u woʼoltaʼaloʼob tumen yaʼabkach talamil yéetel táan u luʼsaʼal le jeetsʼelil yaantiʼoboʼ. Le sukuʼunoʼoboʼ jach chʼiikil u yiloʼob máax ichiloʼob unaj u nuʼuktik le múuchʼuliloʼ. Utiaʼal u yáantaʼaloʼob u yiloʼob maʼ maʼalob le tuukul yaantiʼoboʼ, le xookoʼ tu ketaj u kaajal Dios yéetel junpʼéel barco. Tsʼoʼoleʼ tu yaʼaleʼ le máaxoʼob nuʼuktikoʼ maʼ maʼalob baʼax tu beetoʼobiʼ, tumen maʼ u kaʼansoʼob u kaajal Dios ku keʼetel yéetel junpʼéel barco utiaʼal u aktáantik le talam kʼiinoʼoboʼ. ¿Baʼax túun unaj u beetaʼal?

⁴ Le xookoʼ tu yaʼaleʼ juntúul capitán jach yaan u naʼateʼ ku yilik ka yanak salvavidaʼob utiaʼal le máaxoʼob yanoʼob teʼ barcooʼ. Tsʼoʼoleʼ le máaxoʼob ku binoʼoboʼ unaj u kaʼansaʼaloʼob u kʼaloʼob u ventanailoʼob le barco ken káajak junpʼéel kʼaʼamkach jaʼoʼ. Bey túun xanoʼ le máaxoʼob nuʼuktik u kaajal Jéeobaoʼ unaj u kaʼanskoʼob le múuchʼuliloʼob u aktáantoʼob le talam kʼiinoʼoboʼ. Utiaʼal  u béeytal lelaʼ, le revistaoʼ tu yaʼalaj yaan u beetaʼal junpʼéel nojoch kʼeex. Tu yaʼaleʼ tu séebaʼanil «unaj u yéeyaʼal ancianoʼob utiaʼal u kanáantoʼob le tamanoʼob yaan teʼ múuchʼuliloʼoboʼ» (Bax. 20:28).

5. 1) ¿Baʼaxten jach maʼalob úuchik u yéeyaʼal le ancianoʼob teʼ kʼiinoʼob jeʼeloʼ? 2) ¿Baʼax kʼáatchiʼiloʼob ken k-xakʼalte?

⁵ Le úuchik u tsʼaʼabal le ancianoʼoboʼ tu beetaj u muʼukʼaʼantal le múuchʼuliloʼoboʼ. Tu yáantaj le sukuʼunoʼob u aktáantoʼob baʼaloʼob talamtak beyoʼob u nukuch olasil jaʼ taasaʼab tumen le Yáax Nojoch Baʼateltáambaloʼ. Ka máan kʼiineʼ beetaʼab uláakʼ kʼeexoʼob jach tu yáantaj xan le sukuʼunoʼob u meyajtoʼob Jéeoba jeʼex unajoʼ. ¿Máakalmáak le profecía aʼalmil le kʼeexoʼob kun ilbil ichil u kaajal Diosoʼ? ¿Máakalmáak le kʼeexoʼob tsʼoʼok a wilik techoʼ? ¿Baʼax utsiloʼob tsʼoʼok u taasiktech?

6, 7. 1) ¿Baʼax u kʼáat u yaʼalal Isaías 60:17? 2) ¿Baʼax u kʼáat u yaʼal le tʼaanoʼob «a méekʼtantaʼal» yéetel «u nuʼuktik a beel»?

⁶ Jeʼex t-ilaj teʼ 9 xookiloʼ profeta Isaíaseʼ tu yaʼaleʼ Jéeobaeʼ yaan u beetik u maas nojochtal u kaajal (Isa. 60:22). Baʼaleʼ Jéeobaeʼ tu yaʼalaj xan uláakʼ baʼax ken u beete: «Tu jeel bronceeʼ bíin in tsʼáatech oro, tu jeel fierroeʼ bíin in tsʼáatech plata, tu jeel cheʼeʼ bíin in tsʼáatech bronce, tu jeel tuunichoʼobeʼ bíin in tsʼáatech fierro. Bíin in beet a méekʼtantaʼal [wa a nuʼuktaʼal] tumen jeetsʼel, le tojiloʼ ku [bin] u nuʼuktik a beel» (Isa. 60:17). ¿Baʼax u kʼáat u yaʼal le profecíaaʼ? ¿Baʼax utsil ku taasiktoʼon?

⁷ Le profecíaoʼ ku yaʼalikeʼ yaan baʼaxoʼob kun kʼexbil. Baʼaleʼ maʼatech u yaʼalik wa yaan u kʼeʼexel junpʼéel baʼax maʼ patal yéetel junpʼéel baʼax maʼalobiʼ, baʼaxeʼ ku yaʼalikeʼ yaan u kʼeʼexel junpʼéel baʼal maʼalob yéetel junpʼéel baʼax maas maʼalob. Jeʼex le bronceoʼ aʼalaʼab yaan u kʼeʼexel yéetel oro, junpʼéel baʼax maas maʼalob, lelaʼ bey xan aʼalaʼab kun úuchul yéetel le uláakʼ baʼaloʼoboʼ. Yéetel le kettʼaanaʼ Jéeobaeʼ tu yaʼalaj yaan u bin u maas maʼalobkíintik u kaajal. ¿Bix kun úuchul le baʼax tu yaʼalaj le profecíaoʼ? Le ka tu yaʼalaj Jéeoba: «a méekʼtantaʼal» yéetel «u nuʼuktik a beel», táan u yaʼalikeʼ yaan u maas maʼalobkíintik bix u meyaj u kaajal utiaʼal u kanáantik yéetel u nuʼuktik tubeel le máaxoʼob yanoʼob ichiloʼ.

8. 1) ¿Máax beetik u yantal le kʼeexoʼob ku yaʼalaʼal tu profecíail Isaíasoʼ? 2) ¿Baʼax utsiloʼob ku taasiktoʼon? (Ilawil xan le cuadro « Tu yeʼesaj kabal óolal ka tsolnuʼuktaʼabi».)

⁸ ¿Máax beetik u yúuchul le kʼeexoʼobaʼ? Jéeobaeʼ tu yaʼalaj: «Bíin in tsʼáatech oro», «bíin in tsʼáatech plata» yéetel «bíin in beet a méekʼtantaʼal tumen jeetsʼel». Jeʼex k-ilkoʼ le kʼeexoʼob ku yantal teʼ múuchʼuliloʼoboʼ Jéeoba beetik u yúuchul, maʼ chéen máakoʼobiʼ. Desde ka tu tsʼáaj Jesús u beet u Reyileʼ, Jéeobaeʼ tsʼoʼok u nuʼuktik u Hijo utiaʼal ka u beet le kʼeexoʼobaʼ. ¿Baʼax utsiloʼob ku taasiktoʼon? Le profecíaoʼ ku yaʼalikeʼ le kʼeexoʼoboʼ yaan u taasik jeetsʼelil yéetel justicia. Le ken k-kʼam u nuʼuktaj Dios yéetel ken k-beet le kʼeexoʼobaʼ ku yantal jeetsʼelil ichiloʼon yéetel k-yaabilaj tiʼ baʼax tojeʼ ku péeksikoʼon k-meyajt Jéeoba, le «u Diosil [...] jeetsʼelil» tu yaʼalaj apóstol Pablooʼ (Fili. 4:9).

9. ¿Baʼax kʼaʼabéet utiaʼal ka múul meyajnak tuláakal tubeel teʼ múuchʼulil yéetel ka beetaʼak tuláakal baʼal tu tsoololoʼ, yéetel baʼaxten?

 ⁹ Apóstol Pabloeʼ tu yaʼaleʼ Jéeobaeʼ u «Diosil jeetsʼel maʼ u Jajal Diosil xa’ak’a’an tuukuliʼ» (1 Cor. 14:33, Le Tumben Nuptʼan, [Versión Popular]). Jeʼex k-ilkoʼ Pabloeʼ maʼ tʼaanaj tiʼ baʼaloʼob xaʼakʼaʼan yanil yéetel tiʼ baʼaloʼob tu tsoolol yaniliʼ, baʼaxeʼ tʼaanaj tiʼ baʼaloʼob xaʼakʼaʼan yanil yéetel tiʼ jeetsʼelil. ¿Baʼaxten? Tumen le baʼaloʼob tu tsoolol yaniloʼ maʼ mantatsʼ ku taasik jeetsʼeliliʼ. Jeʼex junjaats soldadoʼob ku binoʼob tiʼ junpʼéel baʼateleʼ, kex tu tsoolol u binoʼobeʼ, maʼ jeetsʼelil ku kaxtikoʼobiʼ, baʼaxeʼ baʼateʼel. Le oʼolal unaj k-jach kʼaʼajsik lelaʼ: wa junpʼéel baʼal maʼ tu meyaj utiaʼal u kaxtaʼal jeetsʼelil kex tu tsoolol yanileʼ, maʼ kun pʼáatal waʼatal utiaʼal mantatsʼ. Baʼaleʼ tuláakal baʼal tu tsoolol yanil ku taal tiʼ u Diosil le jeetsʼeliloʼ ku pʼáatal utiaʼal mantatsʼ. Le oʼolal jach kiʼimak k-óol ikil u nuʼuktaʼal yéetel u limpiokíintaʼal k-múuchʼulil tumen «u Diosil [...] le jeetsʼeliloʼ» (Rom. 15:33). Le jeetsʼelil ku tsʼáaik Diosoʼ ku beetik u múul meyaj le máaxoʼob yanoʼob tiʼ tuláakal le múuchʼuliloʼoboʼ bey xan u beetaʼal tuláakal baʼal tu tsoololiʼ (Sal. 29:11).

10. 1) ¿Baʼax kʼeexiloʼob yanchaj ichil u kaajal Dios úuchjeakil? (Ilawil le cuadro « Kʼeʼex bix u yéeyaʼal le máaxoʼob ku nuʼuktajoʼoboʼ».) 2) ¿Baʼax kʼáatchiʼiloʼob ken k-xakʼalt beoraaʼ?

¹⁰ Le cuadro « Kʼeʼex bix u yéeyaʼal le máaxoʼob ku nuʼuktajoʼoboʼ» ku yeʼesiktoʼon bix le kʼeexoʼob yanchaj ichil u kaajal Dios úuchjeakiloʼ yéetel ku yeʼesik le utsiloʼob tu taasoʼ. Baʼaleʼ teʼ kʼiinoʼobaʼ, ¿bix tsʼoʼok u tsʼaʼabal ‹oro tu jeel bronce› tumen le Rey tsʼaʼan tumen Jéeobaoʼ? ¿Bix tsʼoʼok u beetik u yantal jeetsʼelil yéetel u múuchʼ meyaj le sukuʼunoʼob teʼ múuchʼuliloʼ? ¿Bix u yáantkech le kʼeexoʼob a maas meyajt «u Diosil [...] le jeetsʼeliloʼ»?

11. 1) ¿Baʼax kʼuch naʼatbil ka tsʼoʼok u xakʼalxoktaʼal le Bibliaoʼ? 2) ¿Baʼax tu chʼaʼtuklaj u beetik le sukuʼunoʼob yanoʼob ichil le cuerpo gobernanteoʼ?

¹¹ Tu jaʼabil 1964 tak 1971, le cuerpo gobernanteoʼ tu yilaj ka beetaʼak junpʼéel xakʼalxook tiʼ le Bibliaoʼ. Ichil le baʼaxoʼob xakʼaltaʼaboʼ tiaʼan le bix u meyaj kaʼach le múuchʼulil teʼ yáax siglooʼ. a Teʼ xakʼalxookaʼ kʼuch u naʼatoʼobeʼ le múuchʼuliloʼoboʼ maʼ chéen juntúul anciano wa superintendente nuʼuktikoʼobiʼ, baʼaxeʼ ku nuʼuktaʼaloʼob tumen junmúuchʼ ancianoʼob (xok Filiposiloʼob 1:1; 1 Timoteo 4:14). Le ka naʼataʼab tubeel leloʼ, le cuerpo gobernanteoʼ tu tsʼáaj cuenta tu jaajil táan u nuʼuktaʼal tumen Rey Jesucristo utiaʼal u maas maʼalobkíintik bix u meyaj u kaajal Diosoʼ, le oʼolal tu chʼaʼtukloʼob u seguer u chaʼik u nuʼuktaʼaloʼob tumen le Reyoʼ. Tu séebaʼanil tu beetoʼob le kʼeexoʼob kʼaʼabéet utiaʼal ka yéeyaʼak le ancianoʼob jeʼex u yaʼalik le Biblia unaj u beetaʼaloʼ. ¿Máakalmáak le kʼeexoʼob beetaʼab desde tu jaʼabil 1970?

12. 1) ¿Baʼax kʼeexiloʼob beetaʼab ichil le cuerpo gobernanteoʼ? 2) Tsol baʼax meyajil ku beetik le Cuerpo Gobernanteoʼ (ilawil le cuadro « Le Cuerpo Gobernanteoʼ ku kanáantik le baʼaxoʼob yaan tiʼ le Reinooʼ»).

¹² Le yáax kʼeex yanchajoʼ yaan yil yéetel le cuerpo gobernanteoʼ. Teʼ kʼiinoʼob jeʼeloʼ siete tiʼ le sukuʼunoʼob yéeyaʼanoʼob utiaʼal u binoʼob kaʼanoʼ ku meyajoʼob kaʼach bey directoriloʼob tiʼ le Watch Tower Bible and Tract Society of Pennsylvaniaoʼ. Baʼaleʼ tu jaʼabil 1971, le siete sukuʼunoʼob ku meyajoʼob bey cuerpo  gobernanteoʼ tu chukaj 11 u túulaloʼob yéetel xuʼul u yaʼalaʼal directoril tiʼob. Minaʼan máax u maas nojchil ichiloʼob, láaj igualoʼob yéetel cada jaʼabeʼ yaanal sukuʼun ku meyaj kaʼach bey u presidenteileʼ.

13. 1) ¿Bix nuʼuktaʼabik le múuchʼuliloʼob tu yáamil 40 jaʼaboʼoboʼ? 2) ¿Baʼax tu beetaj le Cuerpo Gobernante tu jaʼabil 1972?

¹³ Le uláakʼ kʼeex beetaʼaboʼ yaan yil yéetel le múuchʼuliloʼoboʼ. ¿Máakalmáak le kʼeexoʼob yanchajoʼ? Tu jaʼabil 1932 tak 1972, chéen juntúul sukuʼun ku nuʼuktaj kaʼach teʼ múuchʼuliloʼ. Tak tu jaʼabil 1936, tiʼ le sukuʼunaʼ ku yaʼalaʼal kaʼach u directoril servicio. Ka máan kʼiineʼ káaj u yaʼalaʼaltiʼ siervo de companía, ka tsʼoʼokeʼ siervo de congregación yéetel tu tsʼookeʼ superintendente tiʼ le múuchʼuliloʼ. Le sukuʼunoʼob ku meyajoʼob beyaʼ jach tu tsʼáaj u yóoloʼob u kanáantoʼob le múuchʼuliloʼoboʼ. Baʼaleʼ maases tu juunaloʼob kaʼach ku chʼaʼtuklikoʼob baʼaloʼob yaan yil yéetel le múuchʼuliloʼ, maʼatech u tsikbaltikoʼob yéetel u maasil sukuʼunoʼoboʼ. Baʼaleʼ tu jaʼabil 1972, le Cuerpo Gobernanteoʼ tu beetaj junpʼéel kʼeex jach nojoch. ¿Tiʼ baʼax kʼeexil táan k-tʼaan?

14. 1) ¿Baʼax kʼeexil yanchaj 1 tiʼ octubre tiʼ 1972 teʼ múuchʼuliloʼoboʼ? 2) ¿Bix u beetik cada juntúul tiʼ u coordinadoril le ancianoʼob le baʼax ku yaʼalik Filiposiloʼob 2:3?

¹⁴ Kaʼacheʼ chéen juntúul sukuʼun ku meyaj bey superintendente tiʼ cada múuchʼulileʼ, baʼaleʼ bejlaʼeʼ, jeʼex u yaʼalik le Bibliaoʼ, ku yéeyaʼal le sukuʼunoʼob jeʼel u páajtal u beetik u ancianoiloʼoboʼ. Letiʼobeʼ ku múuchʼ meyajoʼob utiaʼal u kanáantkoʼob le múuchʼuliloʼ. Lelaʼ káaj 1 tiʼ octubre tiʼ 1972. Bejlaʼeʼ le sukuʼun  ku meyaj bey coordinadoril tiʼ le ancianoʼoboʼ maʼatech u yilik wa maas nojoch tiʼ u maasil ancianoʼoboʼ, baʼaxeʼ bey «juntúul tiʼ le mejentakoʼob[oʼ]» (Luc. 9:48). Le sukuʼunoʼob beyaʼ jach nojoch áantaj ku tsʼáaikoʼob ichil u kaajal Dios (Fili. 2:3).

15. 1) ¿Baʼax utsiloʼob tsʼoʼok u taasik le bix u múuchʼ meyaj le ancianoʼoboʼ? 2) ¿Baʼax eʼesik jach maʼalob le baʼax tu beetaj le Reyoʼ?

¹⁵ U tʼoʼoxol le meyaj ichil le ancianoʼob teʼ múuchʼuliloʼ tsʼoʼok u taasik yaʼab utsil. Koʼox tʼaan tiʼ óoxpʼéeliʼ: Yáaxeʼ kex nojoch meyaj tsʼaʼan u beet juntúul ancianoeʼ, ku yilik de ke «Cristo u poolil le múuchʼuliloʼ» (Efe. 5:23). U kaʼapʼéel jeʼex u yaʼalik Proverbios 11:14: «U bin utsil tiʼ le kaajoʼ tiʼ u taal tiʼ yaʼab tsol xiknoʼobeʼ». Le ancianoʼoboʼ ku chʼaʼtuklikoʼob baʼaloʼob yaan yil yéetel u yutsil le sukuʼunoʼoboʼ. Le ken u muchʼubaʼob u chʼaʼtukloʼobeʼ ku kʼáatkoʼob baʼax ku tuklik cada juntúul anciano yéetel ku chʼaʼikoʼob en cuentail. Wa ku nuʼuktikubaʼob yéetel baʼax ku yaʼalik le Bibliaoʼ maas maʼatech u talamtal u chʼaʼtuklikoʼob baʼax ken u beetoʼob (Pro. 27:17). Jéeobaeʼ ku bendecirtik yéetel ku beetik u bin utsil tiʼ le baʼax ku chʼaʼtuklikoʼoboʼ. U yóoxpʼéeleʼ tumen yaʼab ancianoʼob yaneʼ u kaajal Dioseʼ ku páajtal u maas áantik yéetel u kanáantik le múuchʼuliloʼoboʼ (Isa. 60:3-5). Chéen tukult lelaʼ: tu jaʼabil 1971, tiʼ tuláakal yóokʼol kaabeʼ yaan kaʼach maas tiʼ 27 mil múuchʼuliloʼob, baʼaleʼ tu jaʼabil 2013, tu chukaj 113 mil u pʼéelal. Jeʼex k-ilkoʼ le Reyoʼ jach táaj yaan u naʼat úuchik u  tsʼáaik sukuʼunoʼob jach tu kʼiinil utiaʼal u meyajoʼob bey j-kanan tamanoʼobeʼ (Miq. 5:5, TNM).

16. 1) ¿Baʼax meyajil tsʼaʼan u beet le ancianoʼoboʼ? 2) ¿Bix áantaʼabik le j-Xoknáaloʼob tiʼ le Biblia u beetoʼob le baʼax tu yaʼalaj Jesusaʼ: «Kanáant in mejen alakʼ tamanoʼob»?

¹⁶ Desde táant u káajal u yantal le j-Xoknáaloʼob tiʼ le Bibliaoʼ, le ancianoʼoboʼ u naʼatmoʼob letiʼob unaj u yáantkoʼob le sukuʼunoʼob utiaʼal ka seguernak u meyajtikoʼob Diosoʼ (xok Galaciailoʼob 6:10). Tu jaʼabil 1908, tiʼ junpʼéel xook tu taasaj le revista Watch Toweroʼ maas tsoʼol le baʼax tu yaʼalaj Jesusaʼ: «Kanáant in mejen alakʼ tamanoʼob» (Juan 21:15-17). Le xookoʼ tu yaʼalaj tiʼ le ancianoʼoboʼ: «Jach unaj k-beetik le meyaj tu tsʼáajtoʼon le Tsʼuuloʼ, unaj k-ilik bey junpʼéel jatsʼuts meyaj k-tséentik yéetel k-kanáantik le máaxoʼob tsaypachtik Yuumtsiloʼ». Tu jaʼabil 1925, le revista Watch Toweroʼ tu kaʼa aʼalaj tiʼ le ancianoʼob u kʼaʼanaʼanil u meyajoʼob bey j-kanan tamanoʼobeʼ: «Dioseʼ u yuumil u iglesia [...], letiʼeʼ yaan u kʼáatik cuenta tiʼ tuláakal le máaxoʼob u tsʼaamaj u kanáantoʼob le sukuʼunoʼoboʼ».

17. ¿Baʼax áantajil tsʼoʼok u tsʼaʼabal tiʼ le ancianoʼob utiaʼal u kanáantkoʼob maʼalob le múuchʼuliloʼ?

¹⁷ ¿Bix tsʼoʼok u yáantaʼal le ancianoʼob tumen u kaajal Jéeoba utiaʼal ka u beetoʼob maas maʼalob le meyaj tsʼaʼantiʼob jeʼex u kʼeʼexel le «fierro» yéetel le ‹plataoʼ›? Ku kaʼanskoʼob tubeel. Tu jaʼabil 1959, beetaʼab le yáax Escuela tiʼ Ministerio tiʼ le Reino utiaʼal le superintendenteʼoboʼ. Junpʼéel tiʼ le xook xakʼaltaʼaboʼ tu kʼaabaʼtaj «Bix jeʼel u yáantaʼal cada juntúul sukuʼuneʼ». Teʼ xookoʼ aʼalaʼab xan tiʼ le ancianoʼob «ka u beetoʼob junpʼéel programa utiaʼal u bin u xíimbaltoʼob le sukuʼunoʼob tu yotochoʼoboʼ». Teʼeloʼ tsolaʼab jejeláas bix jeʼel u páajtal u beetaʼal maas maʼalobeʼ. Tu jaʼabil 1966, túumbenkuntaʼab le kaʼansaj ku beetaʼal teʼ Escuela tiʼ Ministerio tiʼ le Reinooʼ, teʼelaʼ tsʼaʼab junpʼéel xook ku kʼaabaʼtik «U kʼaʼabéetil u bin xíimbaltbil le sukuʼunoʼoboʼ».  ¿Baʼax maas tsoʼoliʼ? Aʼalaʼabeʼ le máaxoʼob nuʼuktik le múuchʼuliloʼ «unaj u kanáantkoʼob u tamanoʼob Dios yéetel yaabilaj, baʼaleʼ maʼ unaj u tsʼáaikoʼob juntséelil u familiaʼobiʼ yéetel unaj u jóokʼloʼob kʼaʼaytaj». Teʼ tu tsʼook jaʼaboʼobaʼ tsʼoʼok u yantal uláakʼ xookoʼob utiaʼal u maas kaʼansaʼal le ancianoʼoboʼ. ¿Baʼax utsiloʼob tsʼoʼok u taasik le kaʼansaj ku tsʼáaik u kaajal Jéeobaoʼ? Bejlaʼeʼ teʼ múuchʼuliloʼoboʼ táan u meyaj u milesil sukuʼunoʼob kaʼansaʼanoʼob tubeel u beetoʼob le meyaj kʼubéentaʼantiʼoboʼ.

18. 1) ¿Baʼax meyajil tsʼaʼan u beet le ancianoʼoboʼ? 2) ¿Baʼaxten jach yaabiltaʼan le ancianoʼob tumen Jéeoba yéetel Jesusoʼ?

¹⁸ Yéetel u yáantaj Jéeobaeʼ, Rey Jesucristoeʼ tsʼoʼok u yéeyik ancianoʼob utiaʼal ka u beetoʼob junpʼéel nojoch meyaj. ¿Baʼax meyajil? U nuʼuktikoʼob le máaxoʼob meyajtik Dios teʼ kʼiinoʼob maas talamtakaʼ (Efe. 4:11, 12; 2 Tim. 3:1). Jéeoba yéetel Jesuseʼ jach u yaabiltmoʼob le ancianoʼob u tsʼaamaj u yóol u beetoʼob le baʼax ku yaʼalik le Bibliaaʼ: «Kanáanteʼex le u tamanoʼob Dios u kʼubéentmajteʼex [...] yéetel kiʼimak óolal; [...] tsʼáa a wóoleʼex meyaj; [...] eʼeseʼex maʼalob bej tiʼ le tamanoʼoboʼ» (1 Ped. 5:2, 3). Koʼox ilik kaʼapʼéel bix u yeʼesaʼal maʼalob bej tiʼ le tamanoʼoboʼ yéetel bix u taasik jeetsʼelil yéetel kiʼimak óolal tiʼ le múuchʼuliloʼ.

19. ¿Bix unaj k-ilik le ancianoʼob ku múul jóokʼloʼob kʼaʼaytaj t-éeteloʼ?

¹⁹ Yáaxeʼ le ancianoʼoboʼ ku kʼaʼaytajoʼob yéetel tuláakal le sukuʼunoʼob teʼ múuchʼuliloʼ. Lucaseʼ tu yaʼaleʼ Jesuseʼ «bin kajalkaaj yéetel tiʼ mejen kajtaliloʼob táan u kʼaʼaytik u maʼalob péektsilil u Reino Dios. Le doce apostoloʼob xanoʼ táan kaʼach u binoʼob tu yéetel» (Luc. 8:1). Jeʼex Jesús ku kʼaʼaytaj kaʼach yéetel u apostoloʼobeʼ, le ancianoʼob xanoʼ ku yilik u jóokʼloʼob kʼaʼaytaj yéetel le sukuʼunoʼob teʼ múuchʼuliloʼ. Tsʼoʼok u yilkoʼobeʼ ken u beetoʼob beyaʼ ku yáantaj utiaʼal u maas kʼaj óoltkubaʼob yéetel u biskubaʼob. ¿Bix u yilik le sukuʼunoʼob le baʼax ku beetik le  ancianoʼobaʼ? Jeannine, juntúul kiik óoliʼ 90 jaʼaboʼob yaantiʼeʼ, tu yaʼalaj: «In jóokʼol kʼaʼaytaj yéetel juntúul ancianoeʼ ku tsʼáaikten u páajtalil in tsikbal tu yéetel bey xan in kʼaj óoltik tubeel». Steven, juntúul sukuʼun yaan maas tiʼ 30 jaʼaboʼob tiʼeʼ, tu yaʼalaj: «Le ken jóokʼok juntúul anciano kʼaʼaytaj tin wéeteleʼ kin tsʼáaik cuenta u kʼáat u yáanten. Jach uts tin tʼaan u yáantken».

20, 21. ¿Bix jeʼel u páajtal u beetik le ancianoʼob jeʼex le j-kanan taman tu yaʼalaj Jesús teʼ kettʼaanoʼ? Aʼal junpʼéel bixi (ilawil xan le cuadro « Ku taasik utsil u xíimbaltaʼaloʼob cada semana»).

²⁰ U kaʼapʼéeleʼ u kaajal Jéeobaeʼ ku kaʼansik le ancianoʼob utiaʼal ka u yáantoʼob le máaxoʼob tsʼoʼok u náachkuntkubaʼob tiʼ le múuchʼuliloʼ (Heb. 12:12). ¿Baʼaxten le ancianoʼoboʼ unaj u yáantkoʼob le sukuʼunoʼob maʼ muʼukʼaʼan u fejoʼobaʼ? ¿Bix unaj u beetkoʼob? Teʼ tu kettʼaanil le taman saatloʼ Jesuseʼ tu yeʼesaj baʼax unaj u beetik le j-kanan tamanoʼoboʼ (xok Lucas 15:4-7). Le ka tu tsʼáaj cuenta yaan juntúul u yaalakʼ saatloʼ tu yilaj u kaxtik, jeʼex u beetik juntúul máak chéen juntúul taman yaantiʼeʼ. ¿Bix u beetik le ancianoʼob jeʼex tu beetil le j-kanan tamanoʼ? Letiʼobeʼ láayliʼ jach kʼaʼanaʼan u yilkoʼob le máaxoʼob tsʼoʼok u náachkuntkubaʼoboʼ, ku yilkoʼob jeʼex u yilaʼal le taman saatal tumen le j-kanan tamanoʼ. Baʼaleʼ mix juntéen ku tuklikoʼob wa junpuliʼ maʼ kun suutoʼob teʼ múuchʼuliloʼ. Jeʼex u beetik le j-kanan tamanoʼ ku binoʼob «u kaxt le saatloʼ» tak ken kʼuchukoʼob tu yiknal. Jeʼex k-ilkoʼ le ancianoʼoboʼ ku tsʼáaik u yóoloʼob u kaxtoʼob yéetel u yáantoʼob le sukuʼunoʼob beyaʼ.

²¹ ¿Baʼax tu beetaj le j-kanan taman ku yaʼalaʼal teʼ kettʼaan le ka tu kaxtaj le chan tamanoʼ? Kananbail úuchik u chʼúuyik utiaʼal «u naʼaksik tu keléembal» ka tu bisaj ichil u maasil tamanoʼoboʼ. Juntúul anciano xaneʼ le ken u tʼan yéetel yaabilaj le máax náachchajaʼanoʼ, jeʼel u beetik u líikʼil u yóol utiaʼal ka suunak teʼ múuchʼuliloʼ. Bey úuchik tiʼ Victor, juntúul sukuʼun tiʼ u luʼumil África, xuʼul u bin muchʼtáambal. Letiʼeʼ tu yaʼalaj: «Tu yáamil le ocho jaʼaboʼob maʼ tin bin muchʼtáambaloʼ, le ancianoʼoboʼ maʼ tu pʼatenoʼobiʼ». ¿Baʼax áant utiaʼal ka suunak? Letiʼeʼ ku yaʼalik: «Junpʼéel kʼiineʼ, John, juntúul anciano in wéet binak tu xookil le precursoroʼoboʼ, tu xíimbalten yéetel tu yeʼesajten jujunpʼéel fotoʼob chʼaʼabtoʼon ka binoʼon teʼ xookoʼ. Leloʼobaʼ tu beetaj u kʼaʼajalten le jatsʼuts súutukiloʼob in máansmaj ichil u kaajal Jéeobaoʼ, leloʼ tu beetaj u kaʼa taaktal in meyajtik». Le maʼ sen úuch xíimbaltaʼak tumen Johnoʼ, Victoreʼ suunaj teʼ múuchʼuliloʼ, bejlaʼeʼ táan u kaʼa meyaj bey precursoreʼ. U jaajileʼ le ancianoʼob ku kanáantkoʼob tubeel le sukuʼunoʼoboʼ jach ku yáantajoʼob utiaʼal ka yanak kiʼimak óolal tiʼob (2 Cor. 1:24). b

22. ¿Bix u yáantaj le justicia yéetel le jeetsʼelil utiaʼal u múuchʼ meyaj le sukuʼunoʼob teʼ múuchʼuliloʼ? (Ilawil le cuadro « Jach jatsʼuts úuchik k-ilik».)

²² Jeʼex t-aʼalaj tu káajbal le xookaʼ, Jéeobaeʼ u yaʼalmeʼ le justicia yéetel le jeetsʼeliloʼ yaan u maas ilaʼal ichil u kaajal (Isa.  60:17). Le kaʼapʼéel baʼaloʼobaʼ ku yáantaj utiaʼal u múul meyaj le sukuʼunoʼob teʼ múuchʼuliloʼoboʼ. ¿Bix u yúuchul? Tumen le justiciaoʼ junpʼéeliliʼ, jeʼex «k-Dioseʼ juntúuliliʼ Jéeoba» (Mar. 12:29). U leyoʼobeʼ ku meyaj tiʼ tuláakal le múuchʼuliloʼob jeʼel baʼaxak luʼumil yanoʼobeʼ. Letiʼeʼ junpʼéeliliʼ bix u yaʼalik baʼax uts yéetel baʼax kʼaas. Le baʼax ku yaʼalikoʼ utiaʼal «tuláakal u múuchʼulil le máaxoʼob kiliʼichoʼoboʼ» (1 Cor. 14:33). Le oʼolal junpʼéel múuchʼulileʼ chéen ku bin utsil tiʼ ken u beet baʼax ku yaʼalik Dios. ¿Kux túun utiaʼal ka yanak jeetsʼelil? Le Reyoʼ maʼ chéen u kʼáat ka yanak jeetsʼelil teʼ múuchʼuliloʼ, baʼaxeʼ u kʼáat ka ‹meyajnakoʼon utiaʼal ka yanak› jeetsʼelil (Mat. 5:9). Le oʼolal mantatsʼ k-ilik k-beetik «le baʼaxoʼob ku yáantajoʼob utiaʼal ka yanak jeetsʼeliloʼ». Ken kʼuuxilnak wa máax t-éeteleʼ, unaj k-bin tu séebaʼanil tʼaan tu yéetel (Rom. 14:19). Bey túunoʼ k-áantaj utiaʼal ka múul meyajnak le múuchʼuliloʼ yéetel ka yanak jeetsʼelil ichil (Isa. 60:18).

23. ¿Baʼax beetik u kiʼimaktal k-óol teʼ kʼiinoʼobaʼ?

²³ Tu mesil noviembre tiʼ 1895, le ka yáax jóoʼsaʼab teʼ revista Watch Tower bix kun meyaj le ancianoʼoboʼ, le sukuʼunoʼob nuʼuktik le meyajoʼ tu kʼáat óoltoʼob tiʼ Jéeoba ka u beet u bin utsil tiʼ le túumben bix kun meyaj le ancianoʼob utiaʼal ka séeb «junpʼéeliliʼchajak k-fe». Jach ku taasiktoʼon kiʼimak óolal k-kʼaʼajsik bix úuchik u bin u beetaʼal le kʼeexoʼob tumen Jéeoba yéetel u Hijooʼ. Leloʼobaʼ jach tsʼoʼok u yáantkoʼon utiaʼal k-múul meyajtik Jéeoba (Sal. 99:4). Tsʼoʼok xan u yáantkoʼon xíimbal «yéetel junpʼéeliliʼ tuukul», ka k-bis «junpʼéeliliʼ bej» yéetel ka k-meyajt «u Diosil [...] le jeetsʼelil» yéetel «junpʼéeliliʼ keléembal» junmúuchʼ yéetel tuláakal le máaxoʼob meyajtik tiʼ tuláakal yóokʼol kaaboʼ (2 Cor. 12:18; xok Sofonías 3:9).