KAPITE 13
Ko Te Kau Faifakamafola ʼo Te Puleʼaga ʼe Natou Tagi Ki Te ʼu Telepinale
1, 2. (1) Kotea ʼae neʼe lava fai e te kau takitaki lotu ʼo ʼuhiga mo te faifakamafola, pea neʼe fakalogo koa te kau apositolo? (2) He ko ʼe neʼe mole fakalogo te kau apositolo ki te tapuʼi ʼo tanatou faifakamafola?
NEʼE hoki ʼosi age pe ia te Penikosite ʼo te taʼu 33 H.T.S., pea neʼe kei foʼofoʼou foki mo te kokelekasio Fakakilisitiano ʼae ʼi Selusalemi. Neʼe manatu ai leva Satana ʼe ko te temi lelei ʼaia ke ina ʼohofi te kau Kilisitiano. Neʼe ina faigaʼi ke fakaʼauha ia te kokelekasio ʼi muʼa ʼo tana liliu ʼo malohi. Neʼe foimo fakaneke ai e Satana te kau takitaki lotu ke natou tapuʼi ia te fakamafola ʼo te Puleʼaga. Kaʼe ʼaki he lototoʼa, neʼe hoko atu pe e te kau apositolo tanatou faifakamafola, pea tokolahi te hahaʼi fafine mo tagata neʼe natou “tui . . . ki te Aliki.”—Gaue 4:18, 33; 5:14.
2 Neʼe ʼasili age ai te ita ʼa te kau takitaki lotu, ʼo natou ʼave ai te kau apositolo ʼo pilisoniʼi. Kaʼe ʼi te poʼuli, neʼe avahi e te ʼaselo ʼa Sehova te ʼu matapa ʼo te fale pilisoni, pea ʼi te kei hegihegi, neʼe toe liliu te kau apositolo ʼo faifakamafola. Neʼe toe puke natou mo ʼave ki te kau takitaki. Neʼe lau ai ko te kau apositolo neʼe mole natou fakaʼapaʼapa ki te tapuʼi age ʼae ke ʼaua naʼa natou faifakamafola. ʼAki he lototoʼa, neʼe tali fenei e te kau apositolo: “E tonu ke [matou] fakalogo age ki te Atua i te tagata.” ʼI te kovi ʼaupito ʼo te ita ʼa te kau takitaki, neʼe natou fia “tamatei” te kau apositolo. Kaʼe ʼi te lakaga ʼaia, neʼe palalau ia te tagata faiako iloa ʼo te Lao, ko Kamaliele. Neʼe ina fakatokaga fenei ki te kau takitaki: “Aua naa koutou tokaga ki te u tagata aeni, kae koutou tuku natou ke natou olo.” Meʼa fakapunamaʼuli he neʼe fakalogo te kau takitaki ki tana tokoni pea natou fakaʼateainaʼi te kau apositolo. Kotea ʼae neʼe fai e te kau apositolo? Neʼe natou haga fai “tanatou akonaki pea mo tanatou fakaha te logo lelei o Sesu-Kilisito.”—Gaue 5:17-21, 27-42; Taag. 21:1, 30.
3, 4. (1) Kotea te faʼahiga fai ʼae ʼe fakaʼaogaʼi e Satana talu mai fualoa moʼo ʼohofi te hahaʼi ʼa te ʼAtua? (2) Kotea ʼae ka tou vakaʼi anai ʼi te kapite ʼaeni pea mo te ʼu kapite ʼe lua ka hoa mai?
3 Ko te fakamau ʼaia neʼe hoko ʼi te taʼu 33 H.T.S., pea neʼe ko te ʼuluaki fakamatala ʼaia ʼo te fakafeagai ʼa te kau takitaki ki te kokelekasio Fakakilisitiano. Pea neʼe mole gata ai. (Gaue 4:5-8; 16:20; 17:6, 7) ʼI totatou temi, ʼe kei fakaneke pe e Satana te kau fakafeagai ʼo te tauhi moʼoni ke natou uga te kau takitaki fakatagata ke tapuʼi ia te faifakamafola. Neʼe lahi te ʼu tukugakovi neʼe lau e te kau fakafeagai ʼo ʼuhiga mo te hahaʼi ʼa te ʼAtua. Neʼe natou ui ʼe tou fakatupu tokakovi pea mo fakatutuʼu ki te puleʼaga. Pea neʼe natou lau ko tatou ko he hahaʼi fakatau koloa. ʼI tona temi totonu, neʼe tagi ʼotatou tehina ki te ʼu telepinale moʼo fakaha te hala ʼo te ʼu tukugakovi ʼaia. Neʼe kotea te ʼu tonu ʼae neʼe fai e te ʼu telepinale? ʼE malave feafeaʼi kia koe te ʼu tonu ʼaia neʼe fai kua hili ki ai ni lau ʼi taʼu? Tou vakaʼi he ʼu fakamau neʼe tokoni ai ki “te haofaki ʼo te logo lelei pea mo fakamoʼoni ki ai e te lao.”—Filp. 1:7, MN.
4 ʼE tou vakaʼi anai ʼi te kapite ʼaeni pe neʼe feafeaʼi tatatou tauʼi ke hoko atu tatatou faifakamafola faʼifaʼitaliha. ʼE tou vakaʼi anai ʼi te ʼu kapite ʼe lua ka hoa mai te ʼu fakamau neʼe hoko he neʼe mole tou fia kau ki te malamanei, kaʼe neʼe tou fia mulimuli ki te ʼu lekula ʼo te Puleʼaga ʼo te ʼAtua.
ʼE Natou Fakatupu Koa He ʼu Tokakovi Peʼe Natou Lagolago Ki Te Puleʼaga ʼo Te ʼAtua?
5. ʼI te fakaʼosi ʼo te ʼu taʼu 1930, he ko ʼe neʼe puke ia te kau faifakamafola ʼo te Puleʼaga, pea kotea ʼae neʼe fakakaukauʼi ke fai e te ʼu tehina takitaki?
5 ʼI te fakaʼosi ʼo te ʼu taʼu 1930, ko te ʼu kolo ʼi Amelika neʼe natou fakakinauʼi te kau Fakamoʼoni ʼa Sehova ke natou kole ki te puleʼaga ke fakagafua tanatou faifakamafola. Neʼe fakafisi ki ai ʼotatou tehina koteʼuhi neʼe feala ke molehi te fakagafua ʼaia. Pea tahi, neʼe natou tui ʼe mole feala ki he puleʼaga ke fakafeagai ki te fakatotonu ʼa Sesu ke fakamafola te logo ʼo te Puleʼaga. (Mko. 13:10) Neʼe puke ai te toko lau ʼi teau kau faifakamafola ʼo te Puleʼaga. Pea ko te ʼu tehina takitaki ʼo te kautahi neʼe natou fakakaukauʼi ke natou tagi ki te telepinale. Neʼe ko tanatou fakaʼamu ke fakaha neʼe mole fakaʼapaʼapa ia te puleʼaga ki te fakahoko faʼifaʼitaliha e te kau Fakamoʼoni tanatou tauhi. Pea ʼi te taʼu 1938, neʼe hoko ia te aluʼaga neʼe iku ki he faifakamau maʼuhiga. Kotea ʼae neʼe hoko?
6, 7. Kotea ʼae neʼe hoko ki te kiʼi famili Cantwell?
6 ʼI te Feliatolu uhu, ʼaho 26 ʼo Apelili 1938, neʼe teuteu te kiʼi famili Cantwell ke natou olo ʼo faifakamafola ʼi te kiʼi kolo ko New Haven, ʼi te kolo lahi ʼo Connecticut. Ko te tamai ko Newton ʼae neʼe taʼu 60, mo tona ʼohoana ko Esther pea mo ʼanā tama ko Henry, mo Russell, mo Jesse neʼe natou pionie makehe fuli. Neʼe natou iloʼi neʼe feala pe ke mole natou toe liliu ki tonatou ʼapi ʼi te ʼaho ʼaia. Kotea tona tupuʼaga? Neʼe kua tuʼa lahi tonatou puke e te kau polisi, koia neʼe mahino ai kia natou neʼe feala ke toe puke natou ʼi te ʼaho ʼaia. Kaʼe neʼe malohi pe te loto ʼa te kiʼi famili ʼaia ke natou fakamafola ia te logo ʼo te Puleʼaga ʼo te ʼAtua. Neʼe natou tau atu ki te kolo ko New Haven ʼi te ʼu motoka ʼe lua. Neʼe taki e Newton tanatou motoka ʼae neʼe fafaʼo ki ai te ʼu tohi Fakatohi-tapu pea mo te ʼu fakatagi feʼaveʼaki. Kaʼe neʼe taki e Henry, ʼae neʼe taʼu 22 ia te motoka faifakatagi. Pea hili pe ni hola ki ai, neʼe taʼofi leva tanatou gaue e te kau polisi.
7 Neʼe puke ia Russell, ʼae neʼe taʼu 18, ʼo feia mo Newton pea mo Esther. Pea neʼe sio ia Jesse ʼae neʼe taʼu 16, mai mamaʼo ki te ʼave e te kau polisi ʼana matuʼā pea mo tona taʼokete. Neʼe to tokotahi
leva ia Jesse he neʼe faifakamafola ia tona taʼokete ko Henry ʼi te tahi age faʼahi. Kaʼe neʼe ina toʼo tana fakatagi feʼaveʼaki pea mo hoko atu tana faifakamafola. Ko te ʼu tagata Katolika ʼe toko lua neʼe nā tali ke fakatagi e Jesse ia te akonaki ʼo te tehina ko Rutherford, neʼe ko tona kupu tafitō “Te ʼu Fili.” Kaʼe ʼi tanā fakalogo ʼae ki te akonaki, neʼe nā iita ai pea neʼe nā fia ta ia Jesse. Neʼe mavae ia Jesse mai ia naua, kaʼe neʼe puke leva ia e te tagata polisi. Pea neʼe toe pilisoniʼi mo Jesse. Neʼe mole maʼu e te kau polisi he hala ʼa te tuagaʼane, kaʼe neʼe natou tukugakoviʼi pea mo taʼofi ia te tehina mo ʼona foha. Kaʼe neʼe fakamavae natou ʼi te ʼaho pe ʼaia hili tanatou totogi te tuʼā.8. He ko ʼe neʼe tala e te telepinale ko Jesse Cantwell neʼe fakatupu tokakovi?
8 ʼI te mahina ʼo Sepetepeli 1938, neʼe fakamauʼi ai ia te famili Cantwell ʼi te telepinale ʼo New Haven. Neʼe tukugakoviʼi ia Newton, mo Russell pea mo Jesse, takua neʼe natou kole he ʼu meʼa ʼofa kaʼe neʼe mole fakagafua age. Logo la tanatou tagi ki te Telepinale Lahi ʼo Connecticut, kaʼe neʼe tala e te telepinale pe ʼaia ko Jesse neʼe ina fakatupu he ʼu tokakovi. Kotea tona tupuʼaga? Koteʼuhi ko te ʼu tagata Katolika ʼe toko lua ʼae neʼe nā fagono ki te akonaki, neʼe nā fakamatala ʼi te telepinale ko te akonaki ʼaia neʼe laukovi ki tanā lotu pea mo fakatupu ita kia naua. Neʼe tagi leva te ʼu tehina takitaki ʼo totatou kautahi ki te Telepinale Lahi ʼo Amelika, ke toe vakaʼi ia te tonu ʼaia neʼe fai.
9, 10. (1) Kotea te tonu neʼe fai e te Telepinale Lahi ʼo Amelika ʼi te fakamauʼi ʼo te kiʼi famili Cantwell? (2) ʼE fua lelei feafeaʼi kia tatou te tonu ʼaia neʼe fai?
* Pea neʼe faigaʼi leva e te avoka ʼo Connecticut ke ina fakaha ko te kau Fakamoʼoni ʼe natou fakatupu tokakovi. Kaʼe neʼe fehuʼi fenei age e te tuʼi fakamau: “ ʼE mole moʼoni koa la neʼe mole faʼa leleiʼia e te hahaʼi ia te logo ʼae neʼe tala e Kilisito Sesu?” Pea neʼe tali fenei e te avoka ʼo te kolo: “ ʼEi ʼe moʼoni, pea kapau ʼe au manatuʼi lelei te fakamatala ʼi te Tohi-Tapu, ʼe toe fakaha ai te meʼa ʼae neʼe hoko kia Sesu ʼuhi ko tana tala ia te logo ʼaia.” Neʼe mole pe la ina iloʼi ʼe ina haga ʼo fakatatau ia te kau Fakamoʼoni kia Sesu, kaʼe neʼe ina fakatatau te puleʼaga kia natou ʼae neʼe natou tukugakoviʼi ia ia. ʼI te ʼaho 20 ʼo Maio 1940, neʼe fai e te Telepinale Lahi te tonu neʼe lagolago ki te kau Fakamoʼoni.
9 ʼO kamata ʼi te ʼaho 29 ʼo Malesio 1940, ko te ʼu tuʼi fakamau ʼe toko valu pea mo Charles E. Hughes, te Pelesita ʼo Te Telepinale, neʼe natou fagono ki te ʼu fakamahino neʼe fai e te tehina ko Hayden Covington, te avoka ʼa te kau Fakamoʼoni ʼa Sehova.10 ʼAki te tonu ʼaia, neʼe ina puipui ai te lava maʼuliʼi faʼifaʼitaliha e he tahi tana lotu, pea ʼe mole feala ki te puleʼaga ʼo Amelika peʼe ko ʼona kolo ke ina tapuʼi ia te faʼahi ʼaia. Pea tahi, neʼe tala e te Telepinale Lahi ko te aga ʼa Jesse neʼe mole fakatupu tokakovi ia. Koia neʼe fakaha lelei ai ʼaki te tonu ʼaia neʼe fai, ko te kau Fakamoʼoni ʼa Sehova ʼe mole natou fakatupu tokakovi. ʼE ko he toe malo lahi ʼaia maʼa te ʼu kaugana ʼa te ʼAtua. ʼE fua lelei feafeaʼi kia tatou? ʼE ui fenei e te avoka ʼae ʼe ko he Fakamoʼoni ʼa Sehova: “Ko tatatou lava maʼuliʼi faʼifaʼitaliha tatatou lotu ʼo mole tou tuʼania naʼa tapuʼi, ʼe feala ai kia tatou kau Fakamoʼoni ia ʼaho nei ke tou tala te logo lelei ki te hahaʼi ʼo totatou kolo.”
ʼE Natou Fakatutuʼu Koa Ki Te Puleʼaga Peʼe Natou Tala Ia Te Moʼoni?
11. Kotea ʼae neʼe tufa e ʼotatou tehina ʼi Kanata, pea kotea tona tupuʼaga?
11 ʼI te ʼu taʼu 1940, neʼe fakatagaʼi kovi te kau Fakamoʼoni ʼa Sehova ʼi Kanata. Neʼe fia fakaha e ʼotatou tehina ʼe mole faka’apa’apa ia te puleʼaga ʼo Kanata ki te maʼuliʼi faʼifaʼitaliha e he tahi tana lotu. Koia ʼi te taʼu 1946, neʼe natou tufa lolotoga ʼaho ʼe 16 ia te pepa lotu ko tona kupu tafitō ʼE Fakaufiufi Ki Te Fenua Katoa ʼo Kanata Ia Te Fehiʼa ʼa Te Hahaʼi ʼo Québec Ki Te ʼAtua, Mo Kilisito Pea Mo Te ʼAteaina. Neʼe fakamatala ai te ʼu maveuveu neʼe fakatupu e te hahaʼi ʼae neʼe fakaneke e te kau takitaki lotu pea mo te agamalohi ʼa te kau polisi mo te hahaʼi ki ʼotatou tehina ʼi Québec. Neʼe ui fenei ʼi te pepa lotu: “ ʼE kei hoko atu pe te puke e te kau polisi ia te kau Fakamoʼoni ʼa Sehova kaʼe neʼe mole hona tupuʼaga. Pea ko tukugakovi ʼe 800 neʼe fai ki te kau Fakamoʼoni ʼa Sehova ʼi te kolo lahi ko Montréal.”
12. (1) Kotea te tali ʼa te kau fakafeagai ki te tufa ʼaia ʼo te pepa lotu? (2) Kotea te tukugakovi neʼe fai ki ʼotatou tehina? (Vakaʼi mo te nota.)
12 Moʼo tali ki te tufa ʼaia ʼo te pepa lotu, ko te ʼUluaki Minisi ʼo Québec ko Maurice Duplessis, ʼae neʼe fakatahi lelei mo te Kaletinale Katolika ko Villeneuve, neʼe ina tala ʼe ina tauʼi malohi anai te kau Fakamoʼoni ʼa Sehova. Pea neʼe fakalaka te ʼu tukugakovi mai te 800 ki te 1 600. Neʼe ui fenei e te tuagaʼane pionie: “Neʼe *
mole kei matou malauʼia te puke ʼo matou e te kau polisi.” Pea ko te kau Fakamoʼoni ʼae neʼe puke ʼi tanatou lolotoga tufa ia te pepa lotu, neʼe tukugakoviʼi natou ʼe natou tufa he pepa ʼe fakatutuʼu ki te puleʼaga.13. Ko te kiʼi famili fea ʼae neʼe ʼuluaki fakamauʼi takua ʼe natou fakatutuʼu ki te puleʼaga, pea neʼe kotea te tonu ʼa te telepinale?
13 ʼI te taʼu 1947, neʼe ʼuluaki fakamauʼi ia te tehina ko Aimé Boucher mo ʼona ʼofafine ko Gisèle, ʼae neʼe taʼu 18 pea mo Lucille, ʼae neʼe taʼu 11, takua neʼe natou fakatutuʼu ki te puleʼaga. Koteʼuhi neʼe natou tufa ʼo ovi ki tonatou ʼapi ʼi te kolo ko Québec ia te pepa lotu Te Fehiʼa ʼa Te Hahaʼi ʼo Québec. Kaʼe neʼe mole feala ia ke ui ʼe ko ni hahaʼi ʼe natou fakatupu tokakovi. Koteʼuhi ko te tehina ko Boucher neʼe ko he tagata gaue kele, mo agavaivai pea mo agamalu. Kaʼe neʼe fai ki tona kiʼi famili ia te ʼu agakovi ʼae neʼe fakamatala ʼi te pepa lotu. Ko te tuʼi fakamau ʼo te telepinale, ʼae neʼe fehiʼa ki te kau Fakamoʼoni, neʼe mole ina tali te fakaha ʼae neʼe mole he hala ʼa te kiʼi famili Boucher. Kaʼe neʼe lagolago ia ki te ui ʼae ko te pepa lotu ʼe fakatupu maveuveu pea koia la ʼae ʼe lakahala ai te kiʼi famili Boucher. ʼE ha mai ai, maʼa te tuʼi fakamau ʼaia, ʼe ko he toe hala mamafa te tala ʼo te moʼoni. Neʼe tala e te telepinale neʼe fakatutuʼu ia Aimé mo Gisèle ki te puleʼaga ʼo pilisoniʼi ai naua. Pea maʼia mo te kiʼi taʼahine ko Lucille neʼe pilisoniʼi ia ʼaho ʼe lua. Neʼe tagi leva te ʼu tehina ki te Telepinale Lahi ʼo Kanata pea neʼe tali.
14. Kotea ʼae neʼe fai e te ʼu tehina ʼi Québec lolotoga te ʼu taʼu ʼae neʼe fakatagaʼi ai natou?
14 Neʼe hoko atu pe ʼi Québec te fakamafola ʼo te logo ʼo te Puleʼaga e te ʼu tehina mo tuagaʼane lototoʼa logo la tonatou fakatagaʼi. Pea neʼe ʼi ai tona fua. ʼI te ʼu taʼu ʼe fa ʼae neʼe hoa mai ki te tufa ʼo te pepa lotu ʼi te taʼu 1946, neʼe tuputupu ai te kau Fakamoʼoni ʼi Québec, mai te toko 300 ki te toko 1 000. *
15, 16. (1) Kotea te tonu neʼe fai e te Telepinale Lahi ʼo Kanata ʼo ʼuhiga mo te kiʼi famili Boucher? (2) Neʼe kotea tona fua ki ʼotatou tehina pea mo ʼihi atu?
15 ʼI te mahina ʼo Sunio 1950, ko te Telepinale Lahi ʼo Kanata, ʼae neʼe faʼufaʼu e te ʼu tuʼi fakamau ʼe toko hiva, neʼe natou toe sivi te fakamau ʼo te tehina ko Aimé Boucher. Hili ki ai mahina ʼe ono, ʼi te ʼaho 18 ʼo Tesepeli 1950, neʼe toʼo e te Telepinale Lahi te tonu neʼe lagolago ki totatou faʼahi. Kotea tona tupuʼaga? Neʼe ui e te tehina ko Glen How, te avoka ʼa te kau Fakamoʼoni, ko te Telepinale Lahi neʼe ina tali te fakamahino ʼae ko he tahi ʼe fakatutuʼu ki te puleʼaga, ʼe ko he tahi ʼe ina uga te hahaʼi ki te agamalohi peʼe ke natou agatuʼu ki te puleʼaga. Kaʼe ʼo ʼuhiga mo te pepa lotu, “neʼe mole maʼu ai he ʼu faʼahi feia kaʼe neʼe ko he ʼu manatu neʼe fakagafua e te lao.” Neʼe toe ui fenei e te tehina ko How: “Neʼe au sio totonu ai ki te foaki mai e Sehova te malo.” *
16 Ko te tonu ʼaia neʼe fai e te Telepinale Lahi neʼe ko he toe malo lahi maʼa te Puleʼaga ʼo te ʼAtua. Neʼe molehi ai te ʼu tukugakovi ʼe 122 neʼe fai ki te kau Fakamoʼoni ʼi Québec, takua neʼe natou fakatutuʼu ki te puleʼaga. Tahi ʼae faʼahi, ko te tonu ʼae neʼe fai e te Telepinale Lahi neʼe ina foaki ai ki te hahaʼi ʼo Kanata ʼo toe feia mo te ʼu fenua fuli ʼae neʼe puleʼaga Pilitania ʼi te temi muʼa, te fealagia ʼae ke natou fai he tagi mo kapau ʼe mole natou leleiʼia te *
aga ʼo te puleʼaga. Pea ʼaki te tonu ʼaia, neʼe to noa ai te ʼu faiga ʼa te Lotu Katolika mo te Puleʼaga ʼo Québec ke natou taʼofi te ʼateaina ʼa te kau Fakamoʼoni ʼa Sehova.ʼE Natou Fakatau Koloa Koa Peʼe Natou Faʼafai ʼo Tala Te Puleʼaga ʼo Te ʼAtua?
17. Kotea ʼae neʼe faigaʼi e ʼihi puleʼaga moʼo taʼofi tatatou faifakamafola?
17 Ohage ko te kau ʼuluaki Kilisitiano, ko te ʼu kaugana ʼa Sehova ia ʼaho nei ʼe mole natou “[“fakatotogi,” MN] te folafola a te Atua.” (Lau ia 2 Kolinito 2:17.) Kaʼe ʼe kei faiga pe e ʼihi puleʼaga ke natou taʼofi tatatou gaue faifakamafola ʼaki tanatou fakatuʼu he ʼu lao ʼo ʼuhiga mo te fakatau koloa. Tou vakaʼi te ʼu fakamau ʼe lua neʼe fai e te telepinale ʼe feala ai ke iloʼi peʼe ko te kau Fakamoʼoni ʼa Sehova ʼe ko he hahaʼi fakatau koloa peʼe ko he kau faifakamafola.
18, 19. Neʼe faigaʼi feafeaʼi e te puleʼaga ʼo Danemark ke ina taʼofi te faifakamafola?
18 Danemark. ʼI te ʼaho 1 ʼo Oketopeli 1932, neʼe tapuʼi e te lao te fakatau e he tahi ni tohi kaʼe mole hana pepa fakagafua. Kaʼe neʼe mole kole e ʼotatou tehina te pepa ʼaia. ʼI te uhu ake, neʼe faifakamafola te toko nima ʼi te kolo ko Roskilde, ia kilometa ʼe 30 mai te kolo muʼa ko Copenhague. ʼI tanatou ʼosi faifakamafola, neʼe puli te tehina ko August Lehmann. Neʼe puke ia ia e te kau polisi takua neʼe fakatau koloa kaʼe mole hana pepa fakagafua.
19 ʼI te ʼaho 19 ʼo Tesepeli 1932, neʼe fakamauʼi te tehina ko August Lehmann. Neʼe ina fakamoʼoni neʼe ina tufa te ʼu tohi Fakatohi-tapu ki te hahaʼi, kaʼe neʼe mole ina fakatau. Neʼe tali e te telepinale tana fakamahino ʼaia. Pea neʼe ui e te tuʼi fakamau neʼe mole tau te tehina mo he fihifihia fakapaʼaga, pea ʼaki te gaue faifakamafola neʼe mole ina maʼu ai hana falā peʼe faiga ke ina maʼu hana falā. Kaʼe neʼe puli tana falā ʼi tana fai te gaue ʼaia. Neʼe lagolago te telepinale ki te kau Fakamoʼoni, ʼo natou fai ai te tonu ʼae ko te gaue ʼa Lehmann ʼe mole ko he fakatau koloa ia. Kaʼe neʼe fakatotonu e te ʼu fili ʼo te hahaʼi ʼa te ʼAtua ke natou taʼofi te faifakamafola ʼi te fenua. (Esa. 10:1) Ohage la, ko te avoka ʼae ʼe fakafeagai ki te kau Fakamoʼoni neʼe ina fai tana tagi ki te Telepinale Lahi ʼo Danemark. Kotea ʼae neʼe fai e ʼotatou tehina?
20. Kotea te tonu neʼe fai e te Telepinale Lahi, pea neʼe feafeaʼi ʼotatou tehina?
20 Lolotoga te vahaʼa ʼi muʼa ʼo te hoko ʼo te fakamau ʼi te Telepinale Lahi, ko te kau Fakamoʼoni ʼo Danemark neʼe natou fakalahi tanatou faifakamafola. ʼI te Feliatolu, ʼaho 3 ʼo Oketopeli 1933, neʼe tala e te Telepinale Lahi tana tonu. Neʼe lagolago ia ki te tonu ʼae neʼe fai e te ʼuluaki telepinale, ʼae ko August Lehmann neʼe mole ina maumauʼi te lao. Ko te tonu ʼaia neʼe ina fakagafua ai ki te kau Fakamoʼoni ke hoko atu faʼifaʼitaliha tanatou faifakamafola. Moʼo fakaha tanatou lotofakafetaʼi kia Sehova ʼi tana foaki ia te malo ʼaia, neʼe lahi age te faifakamafola ʼa te ʼu tehina mo tuagaʼane. Talu mai te tonu ʼaia neʼe fai, neʼe mole taʼofi e te puleʼaga ia te faifakamafola ʼo ʼotatou tehina ʼi Danemark.
21, 22. Kotea te tonu ʼae neʼe fai e te Telepinale Lahi ʼo ʼuhiga mo te tehina ko Murdock?
21 Amelika. ʼI te ʼAhotapu, ʼaho 25 ʼo Fepualio 1940, ko te tehina ko Robert Murdock pea mo te toko fitu kau Fakamoʼoni neʼe
puke natou ʼi tanatou lolotoga faifakamafola ʼi te kolo ko Jeannette, ʼi Pennsylvanie. Neʼe tukugakoviʼi natou he neʼe mole natou totogi te pepa ʼae ʼe ina fakagafua ke natou tufa ʼanatou tohi. Neʼe fai e te ʼu tehina te tagi ki te Telepinale Lahi ʼo Amelika, pea neʼe tali.22 ʼI te ʼaho 3 ʼo Maio 1943, neʼe fakaha e te Telepinale Lahi tana tonu, ʼae neʼe lagolago ki te kau Fakamoʼoni. Neʼe fakafisi te Telepinale Lahi ki te fakamaʼua ʼae ke totogi e he tahi ia he aluʼaga ʼe fakagafua e te Lao. Neʼe molehi e te Telepinale Lahi te fakatotonu ʼaia ʼo te kolo, he ʼe ina fakatuʼakoi te lava ta faʼifaʼitaliha e he tahi hana tohi, ʼo feia mo tana lava fakahoko faʼifaʼitaliha tana tauhi. ʼI tana fakaha ia te tonu ʼae neʼe fai e te kau tuʼi fakamau ʼo te Telepinale Lahi, neʼe ui e te Tuʼi Fakamau ko William O. Douglas ʼo ʼuhiga mo te gaue ʼa te kau Fakamoʼoni ʼa Sehova, “ ʼe mole natou faifakamafola pe, pea ʼe mole natou tufa pe he ʼu tohi.” Neʼe ina toe ui fenei: “Ko te faʼahiga gaue fakalotu ʼaia ʼe tatau mo te tauhi ʼae ʼe fai ʼi te ʼu ʼekelesia pea mo te faifakamafola mai te ʼu faiakonakiʼaga.”
23. He ko ʼe ʼe maʼuhiga kia tatou te ʼu malo ʼae neʼe hoko ʼi te telepinale ʼi te taʼu 1943?
23 Ko te tonu ʼaia neʼe fai e te Telepinale Lahi neʼe ko he toe malo lahi maʼa te hahaʼi ʼa te ʼAtua. Neʼe ina fakamoʼoni ai ko tatou ko he kau faifakamafola kaʼe mole ko ni hahaʼi faifakatau
koloa. ʼI te ʼaho maʼuhiga ʼaia ʼo te taʼu 1943, neʼe malo te ʼu Fakamoʼoni ʼa Sehova ia fakamau ʼe 12 ʼi te ʼu fakamau ʼe 13 neʼe ʼave ki te Telepinale Lahi. Pea neʼe kau ki ai te fakamau ʼo te tehina ko Murdock. ʼI te ʼu taʼu ʼae neʼe hoa mai ki ai, neʼe toe faigaʼi e te kau fakafeagai ke natou taʼofi tatatou tala ia te logo ʼo te Puleʼaga ʼi te ʼu ʼapi. Kaʼe neʼe toe malo ʼotatou tehina ʼi te ʼu telepinale ʼuhi ko te ʼu tonu ʼae neʼe fai ʼi te ʼu faifakamau ki muʼa atu.“E Tonu Ke [Tou] Fakalogo Age Ki Te Atua i Te Tagata”
24. Kotea ʼae ka tou fai moka tapuʼi e he puleʼaga tatatou faifakamafola?
24 ʼI totatou ʼuhiga kaugana ʼa Sehova, ʼe tou fiafia moka fakagafua e te ʼu puleʼaga ke tou fakamafola faʼifaʼitaliha te logo ʼo te Puleʼaga. Kaʼe ka tapuʼi e he puleʼaga tatatou faifakamafola, pea ʼe tou fetogi ai tatatou faʼahiga fai, ke feala hatatou hoko atu tatatou gaue. Ohage ko te kau apositolo, “e tonu ke [tou] fakalogo age ki te Atua i te tagata.” (Gaue 5:29; Mat. 28:19, 20) Pea ʼe tou toe tagi ki te ʼu telepinale, ke molehi te tapuʼi ʼo tatatou gaue. Tou vakaʼi he ʼu aluʼaga ʼe lua neʼe hoko.
25, 26. He ko ʼe neʼe olo te kau Fakamoʼoni ʼo Nicaragua ki te Telepinale Lahi, pea neʼe kotea tona ikuʼaga?
25 Nicaragua. ʼI te ʼaho 19 ʼo Novepeli 1952, ko te tehina misionea pea mo taupau ʼo te filiale ko Donovan Munsterman neʼe alu ki te Pilo ʼae ʼe tokaga ki te hahaʼi haʼu, ʼi te kolo muʼa ko Managua. Neʼe fakatotonu age ke alu ki te tagata pule ʼo te pilo, ia te Kapiteni ko Arnoldo García. Neʼe ui e te kapiteni kia Donovan, ko te kau Fakamoʼoni ʼa Sehova fuli ʼi Nicaragua kua “tapuʼi tanatou fakamafola ʼanatou akonaki pea mo tanatou fakahoko ʼanatou gaue fakalotu.” ʼI tana fakalavelave tona tupuʼaga, neʼe fakamahino age e te Kapiteni García neʼe mole fakagafua e te minisi ʼo te puleʼaga ki te kau Fakamoʼoni ke natou faifakamafola pea neʼe ui ko natou ko ni hahaʼi kominisi. Neʼe ko ai ʼae neʼe ina lau ia te faʼahi ʼaia? Neʼe ko te kau takitaki lotu Katolika.
26 Neʼe fai atu aipe e te tehina ko Munsterman he tagi ki te minisi ʼae ʼe tokaga ki te ʼu lotu, ʼo feia ki te Pelesita ko Anastasio Somoza García, kaʼe neʼe mole hona fua. Koia neʼe fetogi ai e te ʼu tehina ʼanatou faʼahiga fai. Neʼe natou pupunu te Fale Fono, kaʼe neʼe natou fakatahi fakakutuga. Neʼe natou fakagata tanatou faifakamafola ʼi te ʼu ala, kaʼe natou tala fakafufu ia te logo lelei. Pea neʼe natou fai tanatou tohi ki te Telepinale Lahi ʼo Nicaragua, ke natou molehi te tapuʼi ʼaia. Neʼe lahi tona ta ʼi te ʼu nusipepa ia te tapuʼi ʼaia pea mo te tohi ʼae neʼe fai. Neʼe tali e te Telepinale Lahi ke natou sivi te aluʼaga ʼo te kau Fakamoʼoni. Neʼe kotea tona ikuʼaga? ʼI te ʼaho 19 ʼo Sunio 1953, neʼe fakaha e te Telepinale Lahi tanatou lagolago fuli ki te kau Fakamoʼoni. Neʼe tala e te Telepinale Lahi ko te tapuʼi ʼaia neʼe mole fakaʼapaʼapa ia ki te lao ʼo ʼuhiga mo te lava fakaha faʼifaʼitaliha e he tahi tana manatu mo tana tui pea mo mulimuli ki tona leʼo ʼo loto. Pea neʼe toe fakatotonu ai ke toe hage ia te ʼu felogoʼi ʼo te puleʼaga ʼo Nicaragua mo te kau Fakamoʼoni ko te temi muʼa.
27. He ko ʼe neʼe punamaʼuli te hahaʼi ʼo Nicaragua ki te tonu ʼae neʼe fai e te Telepinale Lahi, pea neʼe kotea te manatu ʼo ʼotatou tehina ʼo ʼuhiga mo te malo ʼaia?
27 Neʼe punamaʼuli te hahaʼi ʼo Nicaragua ki te lagolago ʼa te Telepinale Lahi ki te kau Fakamoʼoni. Koteʼuhi ʼi muʼa atu, neʼe malohi te fakaneke ʼa te kau takitaki lotu, koia neʼe mole loto ai e te Telepinale Lahi ke tokakovi mo natou. Pea neʼe toe feia mo te kau takitaki ʼo te puleʼaga, koia ʼi te agamahani neʼe tali e te Telepinale Lahi ʼanatou tonu. Kaʼe neʼe tui papau ʼotatou tehina neʼe natou malo ʼuhi he neʼe puipui natou e tonatou Hau pea neʼe mole natou fakagata tanatou faifakamafola.—Gaue 1:8.
28, 29. ʼI te taʼu 1986, kotea te fetogi neʼe hoko ʼi Zaïre?
28 Zaïre. ʼI te taʼu 1985, neʼe ko Fakamoʼoni ʼe toko 35 000 ʼi Zaïre, ʼae ʼe higoa ʼi te temi nei ko te République démocratique ʼo Congo. Neʼe laga te Petele foʼou ʼuhi ko te tuputupu ʼo te ʼu gaue ʼo te Puleʼaga. ʼI te mahina ʼo Tesepeli 1985, neʼe fai ia te fakatahi fakamalamanei ʼi te kolo muʼa ko Kinshasa. Neʼe fonu te malaʼe faigaoʼi ʼo te kolo ʼuhi ko te toko 32 000 teleke ʼae neʼe ʼomai mai te ʼu fenua kehekehe. Kaʼe neʼe fetogi leva te aluʼaga ʼa te ʼu kaugana ʼa Sehova. Kotea ʼae neʼe hoko?
29 Ko te tehina ko Marcel Filteau neʼe haʼu mai Québec, ʼi Kanata, pea neʼe felaveʼi ia ia mo te ʼu fakataga ʼae neʼe fai e te ʼUluaki Minisi ko Duplessis ʼi Kanata. Pea neʼe misionea te tehina ʼi Zaïre. Neʼe ina fakamatala fenei te meʼa ʼae neʼe hoko: “ ʼI te ʼaho 12 ʼo Malesio 1986, neʼe foaki ki te ʼu tehina takitaki ia te pepa neʼe tohi ai kua tapuʼi ʼi Zaïre ia te kautahi ʼa te kau Fakamoʼoni ʼa Sehova.” Pea neʼe sinie te pepa ʼaia e te pelesita ʼo te fenua, ko Mobutu Sese Seko.
30. Kotea ʼae neʼe tonu ke fakakaukau ki ai te Filiale, pea kotea te tonu ʼae neʼe natou fai?
30 ʼI te uhu ake, neʼe tala fenei ʼi te latio: “ ʼE mole tou toe sisio anai ki he Fakamoʼoni ʼa Sehova ʼi Zaïre.” Neʼe fakatagaʼi atu aipe te kau Fakamoʼoni. Neʼe maumauʼi te ʼu Fale Fono, neʼe kaihaʼa te ʼu koloa ʼo te ʼu tehina, mo puke natou, mo pilisoniʼi pea mo ta natou. Maʼia mo te ʼu fanau ʼa te kau Fakamoʼoni neʼe pilisoniʼi. ʼI te ʼaho 12 ʼo Oketopeli 1988, neʼe toʼo e te puleʼaga te ʼu kele mo te ʼu fale ʼo totatou kautahi, pea neʼe nofoʼi e te kau solia ia te
Petele. Ko te ʼu tehina takitaki neʼe natou fai te tagi ki te Pelesita ko Mobutu, kaʼe neʼe mole hona fua. ʼI te lakaga ʼaia, neʼe tonu ke fakakaukauʼi e te Komite ʼo te Filiale peʼe natou tagi ki te Telepinale Lahi peʼe natou atalitali. ʼE manatuʼi fenei e Timothy Holmes, ʼae neʼe misionea pea neʼe ko te kootinatea ʼo te Filiale ʼi te temi ʼaia: “Neʼe matou kole kia Sehova tona poto pea mo tana takitaki.” Hili tanatou faikole pea mo talaga ki ai, neʼe manatu ai te komite ʼe heʼeki hoko te temi ʼae ke natou tagi ki te telepinale. Pea neʼe natou tokakaga tafitō leva ki ʼonatou tehina mo tuagaʼane pea mo kumi ni puleʼaki moʼo hoko atu te faifakamafola.“Lolotoga te temi ʼae neʼe vakaʼi ai e te Telepinale te faʼahi ʼaia, neʼe matou sio ai ki te lava fetogi e Sehova te ʼu meʼa ʼae ʼe hoko”
31, 32. Kotea te tonu maʼuhiga neʼe fai e te Telepinale Lahi ʼo Zaïre, pea kotea ʼae neʼe logoʼi e ʼotatou tehina?
31 Hili ni taʼu, neʼe kua siʼisiʼi te fakatagaʼi ʼo te kau Fakamoʼoni, pea neʼe liliu ʼo maʼuhiga ʼi te fenua ia te fakaʼapaʼapa ki te loto faʼitaliha ʼo te hahaʼi. Neʼe manatu ai te Komite ʼo te Filiale ʼe kua hoko mai te temi ʼae ke natou tagi ai ki te Telepinale Lahi ʼo Zaïre, ke natou vakaʼi te tapuʼi ʼaia ʼo te kau Fakamoʼoni. Meʼa fakapunamaʼuli foki he neʼe tali e te Telepinale Lahi. Koia ʼi te ʼaho 8 ʼo Sanualio 1993, kua hili ki ai teitei taʼu ʼe fitu ki te fakatotonu ʼa te pelesita ke tapuʼi te kau Fakamoʼoni, neʼe tala e te Telepinale Lahi ko te fakatotonu ʼaia ʼa te puleʼaga ʼe fakafeagai ia ki te lao, pea neʼe gata ai te tapuʼi ʼo te kau Fakamoʼoni. Neʼe ko he tonu faigataʼa ʼaia neʼe fai e te kau tuʼi fakamau. Koteʼuhi neʼe feala ke matehi ai natou ʼi tanatou molehi ia te tonu ʼae neʼe fai e te pelesita ʼo te fenua. ʼE ui fenei e te tehina ko Holmes: “Lolotoga te temi ʼae neʼe vakaʼi ai e te Telepinale te faʼahi ʼaia, neʼe matou sio ai ki te lava fetogi e Sehova te ʼu meʼa ʼae ʼe hoko.” (Tan. 2:21) Neʼe malohi ai te tui ʼo ʼotatou tehina. Kia natou, neʼe takitaki e te Hau ko Sesu ia tana hahaʼi ke natou iloʼi te temi pea mo te meʼa ʼae ʼe tonu ke natou fai.
* Neʼe fiafia lahi te ʼu kaugana ʼa te ʼAtua ʼi te malamanei ʼi tanatou sisio ʼae ki te puipui e Sehova ia te aluʼaga fakalaumalie ʼo tana hahaʼi.—Esa. 52:10.
32 ʼI te mole kei tapuʼi ʼo te kau Fakamoʼoni, neʼe feala ai ke fekauʼi ni misionea ki Zaïre, mo laga ai he Petele foʼou, pea mo fakaui ke momoli age ni tohi Fakatohi-tapu.“Ko [Sehova] Ko Toku Tokoni”
33. Kotea te ako ʼe tou taʼofi mai tatatou vakaʼi te ʼu fakamau ʼaia?
33 Ko tatatou vakaʼi te ʼu fakamau ʼaia, ʼe fakamoʼoni ai neʼe fakahoko e Sesu tana fakapapau ʼaeni: “E au foaki atu anai kia koutou he gutu mo he poto ae e mole lavai anai e natou e fakafehagai kia koutou tona tatali mo tona taui.” (Lau ia Luka 21:12-15.) ʼI tona temi totonu, neʼe fakaʼaogaʼi e Sehova he ʼu “Kamaliele” moʼo puipui tana hahaʼi peʼe ina uga he kau tuʼi fakamau mo he kau avoka lototoʼa moʼo fakahoko te faitotonu. Neʼe fakato noa e Sehova te ʼu mahafu ʼo ʼotatou fili. (Lau ia Esaia 54:17.) Pea ʼe mole feala ke taʼofi e he tahi ia te gaue ʼa te ʼAtua.
34. He ko ʼe ʼe fakaofoofo ʼatatou malo ʼi te ʼu telepinale, pea kotea ʼae ʼe fakamoʼoni ai? (Vakaʼi mo te fakamatala ʼae ʼi te ʼa takai “ Ko ʼIhi Faifakamau Maʼuhiga Neʼe Lagolago Ki Te Gaue Faifakamafola.”)
34 Ko ʼatatou malo ʼi te ʼu telepinale ʼe fakaofoofo. Kotea tona tupuʼaga? Koteʼuhi ko te kau Fakamoʼoni ʼa Sehova ʼe mole natou maʼuhiga. ʼE mole tou vote, peʼe tou lagolago ki te ʼu faʼahi fakapolitike, peʼe tou fakaneke he kau faipolitike. Pea ko ʼotatou tehina ʼae neʼe olo ki te ʼu telepinale lalahi, ʼi te agamahani neʼe lau “ko he u tagata kaifenua . . . nee mole ako.” (Gaue 4:13) Koia ʼi te sio fakatagata, neʼe mole he tupuʼaga ke lagolago te ʼu telepinale ki totatou faʼahi pea mo natou fakafeagai ki ʼotatou fili fakalotu pea mo fakapolitike ʼae ʼe malolohi. Kaʼe neʼe ko te faʼahi ʼaia ʼae neʼe natou fai. Ko ʼatatou malo ʼi te ʼu telepinale ʼe fakamoʼoni ai ʼe tou haʼele “ia mua o te Atua, o hage ko ni tagata faifekau a Kilisito.” (2 Ko. 2:17) Koia, ʼe tou ui fenei anai ohage ko te apositolo ko Paulo: “Ko [Sehova] ko toku tokoni, e mole au mataku anai ki he mea.”—Hep. 13:6.
^ pal. 9 Ko te fakamau ʼaia neʼe fakafeagai ai te tehina ko Cantwell ki te kolo ko Connecticut. Neʼe ko te ʼuluaki fakamau ʼaia ʼae neʼe avoka ai te tehina ko Hayden Covington maʼa ʼotatou tehina. Pea neʼe toe avoka pe ʼi te ʼu fakamau ʼe 42 ʼi te Telepinale Lahi ʼo Amelika. Neʼe mate ʼi te taʼu 1978. Pea ko tona ʼohoana, ia Dorothy, ʼae kua taʼu 90, ʼe kei tauhi agatonu pe ʼi te selevisi pionie.
^ pal. 12 Neʼe fakatafito ia te tukugakovi ʼaia ki te lao ʼae neʼe fakatuʼu ʼi te taʼu 1606. Neʼe feala ai ke fakatuʼā he tahi mo kapau neʼe ina fai ni palalau ʼe fakatupu maveuveu, tatau aipe pe moʼoni ʼana palalau.
^ pal. 14 ʼI te taʼu 1950, ko te ʼu tehina mo tuagaʼane ʼe toko 164 neʼe natou faifakamafola temi katoa ʼi Québec, ʼo kau ai te toko 63 neʼe natou maʼu pepa ʼi te Ako ʼo Kileate pea neʼe natou lotolelei ke fekauʼi natou ki ai logo la te fakataga lahi ʼae neʼe hoko ai.
^ pal. 15 Ko te tehina ko Glen How, neʼe ko he avoka lototoʼa. Mai te taʼu 1943 ki te taʼu 2003, neʼe fetau te tehina ʼaia maʼa te kau Fakamoʼoni ʼa Sehova ʼi te ʼu lau ʼi teau fakamau ʼae neʼe hoko ʼi Kanata pea mo te tahi atu ʼu fenua.
^ pal. 16 Kapau ʼe ke fia maʼu he tahi ʼu manatu ʼo ʼuhiga mo te fakamau ʼaia, vakaʼi ia te alatike “La bataille n’est pas la vôtre, mais celle de Dieu” ʼi te Réveillez-vous ! ʼo te ʼaho 22 ʼo Apelili 2000, ʼi te ʼu pasina 18-24.
^ pal. 32 Ki muli age, neʼe mavae te kau solia ʼi te Petele; kaʼe neʼe laga leva ia te Petele foʼou ʼi te tahi age koga kele.