第13章
王國傳道員提出訴訟
1,2．（甲）為咗阻止傳道工作，宗教領袖採取乜嘢行動？（乙）使徒有乜嘢反應呢？（丙）點解使徒唔服從禁令？
公元33年五旬節過後冇幾耐，撒但睇到當時耶路撒冷嘅基督徒會衆只係成立咗幾個星期，就趁機展開攻勢。撒但想趁會衆仲未强大起嚟，就將佢徹底毁滅。撒但操縱事態，好快就利用宗教領袖禁止基督徒傳講王國信息嘅工作。即使係噉，使徒仲係勇敢無懼繼續傳道，結果好多人都成為“主嘅信徒”。（使徒行傳4:18,33；5:14）
使徒歡歡喜喜，“因為有榮幸配得為主嘅名受辱”
2 反對者好嬲，又發動攻擊，今次將所有使徒韞晒起嚟。但係，耶和華嘅天使喺夜晚打開監門，帶佢哋出去。天一光，使徒又喺外面傳道嘞！結果，使徒再次俾人拉咗，帶到去有權勢嘅人嗰度。呢啲人指控使徒違反禁令向人傳道。使徒勇敢同佢哋講：“我哋必須接受上帝嘅統治，服從上帝而唔係服從人。”嗰啲有權勢嘅人就好火滾，“想殺死啲使徒”。喺呢個緊要關頭，深受敬重嘅律法導師迦瑪列就話：“你哋一定要諗清楚點樣處置呢啲人。……唔好理呢啲人，由得佢哋算喇。”出乎意料嘅係，呢啲權貴竟然聽迦瑪列嘅話，放啲使徒走。忠心嘅使徒點樣做呢？佢哋勇敢無懼，“持續不懈噉教導人，宣揚基督嘅好消息，傳耶穌就係基督。”（使徒行傳5:17-21,27-42；箴言21:1,30）
3,4．（甲）撒但一向用乜嘢方法攻擊上帝嘅子民？（乙）呢一章同下面兩章會討論啲乜嘢？
3 公元33年發生嘅呢件事，係基督徒會衆第一次因為受到有權勢嘅人反對而被告上法庭，但唔係最後一次。（使徒行傳4:5-8；16:20；17:6,7）今日，撒但繼續興風作浪，利用反對正確宗教嘅人，挑動政府禁止我哋嘅傳道工作。反對者以各種罪名指控我哋，例如誣告我哋係擾亂社會秩序嘅滋事分子，係煽動人反政府嘅叛亂分子，仲話我哋係從事非法販賣活動嘅商販。我哋嘅弟兄為咗要駁倒敵人嘅指控，曾經喺適當嘅時候向法庭提出訴訟。結果點樣呢？法庭喺幾十年前作出嘅裁決對你有乜嘢影響呢？等我哋嚟討論一啲案件，睇吓呢啲訴訟點樣有助於“為好消息辯護，通過法律途徑確立好消息嘅工作”。（腓立比書 1:7）
4 呢一章主要講我哋點樣維護傳道嘅自由。下面兩章會回顧一啲訴訟案件，睇吓我哋點樣努力堅守唔屬於世界嘅立場，同埋按照王國嘅標準生活。
滋事分子？抑或係堅決擁護上帝王國嘅人？
5．（甲）上世紀30年代後期，點解王國宣揚者被捕？（乙）嗰啲帶頭嘅弟兄打算採取乜嘢行動？
5 上世紀30年代後期，美國各個地方政府都强迫耶和華見證人申請傳道許可證。我哋嘅弟兄冇噉樣做，因為佢哋知道政府有權吊銷呢啲許可證，而傳講王國好消息係嚟自耶穌嘅吩咐，政府冇權阻止。（馬可福音13:10）結果，幾百個王國宣揚者被捕。喺組織裏面帶頭嘅弟兄打算向法庭提出訴訟，等人睇出政府限制耶和華見證人嘅宗教自由係非法嘅。喺1938年發生嘅一件事引起咗一場訴訟，裁決影響深遠。當時發生乜嘢事呢？
6,7．坎特韋爾弟兄一家人有乜嘢遭遇？
6 1938年4月26日星期二嘅早上，60歲嘅紐頓·坎特韋爾同太太愛斯特，仲有佢哋嘅仔亨利、羅素同埋傑西，去康涅狄格州（康州）紐黑文市傳道。佢哋五個都係特别先驅。出發之前，佢哋已經有心理準備，當日未必返到嚟。點解呢？因為佢哋俾人拉過幾次，呢次可能都會。就算係噉，佢哋向人傳講王國信息嘅熱心一啲都冇減少。佢哋開住兩部車到咗紐黑文市。紐頓開住部車，部車放咗啲聖經書刊同手提式留聲機。22歲嘅亨利開住部播音車。果然不出佢哋所料，唔够幾個鐘，佢哋就俾警察截停咗。
7 第一個俾人拉嘅係18歲嘅羅素，跟住係紐頓同埋愛斯特。16歲嘅傑西離遠睇住爸爸媽媽同埋哥哥俾警察拉咗。由於亨利當時喺市内嘅另一個地方傳道，而家淨翻傑西一個人。佢攞住部留聲機，繼續傳道。有兩個天主教徒聽傑西播放盧述福弟兄題名為“仇敵”嘅演講。不過，佢哋越聽就越火滾，要打傑西。傑西好冷靜噉行開，之後冇幾耐有個警察截住佢，結果傑西都俾人韞咗起嚟。警察冇控告愛斯特，只係控告紐頓同佢兩個仔，不過，當日佢哋都獲准保釋。
8．點解法院判傑西有罪，話佢係滋事分子？
8 幾個月之後，即係1938年嘅9月，紐頓同家人喺紐黑文市出庭。紐頓、羅素同埋傑西被判無牌募捐。佢哋上訴到康州最高法院，但係傑西仲係被判擾亂治安罪，話佢係滋事分子，點解呢？因為嗰兩個天主教徒出庭作證，指控傑西播嘅演講錄音侮辱佢哋嘅宗教信仰，激嬲咗佢哋。為咗推翻呢個裁決，負責嘅弟兄上訴到美國最高法院。
9,10．（甲）美國最高法院對坎特韋爾弟兄一家人作出乜嘢裁決？（乙）今日我哋點樣從呢個裁決得益？
9 法院喺1940年3月29日開庭審理呢單案。首席大法官查爾斯·休斯同另外八位陪審官聽咗耶和華見證人代表律師海登·科温頓弟兄嘅陳述。 a康州政府嘅代表律師提出反駁，極力證明耶和華見證人係滋事分子。一位法官問佢：“喺耶穌嘅日子，啲人係咪唔鍾意聽耶穌傳講嘅信息呀？”政府嘅代表律師回答話：“係啊，如果我冇記錯嘅話，聖經仲話耶穌因為傳道有咩下場添。”呢句話講得真係好有意思！佢無意中將耶和華見證人同耶穌連繫埋一齊，又將政府同以往定耶穌有罪嘅人相提並論。1940年5月20日，最高法院一致裁定耶和華見證人勝訴。
海登·科温頓（前排中間）、格倫·豪（左）同其他人勝訴之後離開法庭
10 法院嘅呢項裁決意義重大，點解呢？因為裁決擴大咗人民享有嘅宗教自由，可以有權自由噉從事宗教活動，而聯邦政府、州政府同市政府都唔可以再用法律去限制呢種自由。法庭仲判傑西嘅行為“冇對公衆治安構成威脅”。所以，裁決清楚表明，耶和華見證人絶對唔係擾亂社會秩序嘅滋事分子。打贏呢場官司對耶和華嘅子民嚟講影響真係好深遠！我哋從中得到乜嘢益處呢？一位做律師嘅見證人話：“今日，我哋可以自由噉從事宗教活動，唔使擔心受到唔公平嘅限制。由於有呢個權利，耶和華見證人先至可以喺所住嘅地區向人傳講帶嚟希望嘅信息。”
叛亂分子？抑或係真理嘅宣揚者？
《魁北克仇恨上帝、基督同自由，是全加拿大的恥辱》
11．（甲）加拿大嘅弟兄發起一場乜嘢運動？（乙）點解佢哋噉做？
11 上世紀40年代，加拿大嘅耶和華見證人遭受激烈嘅反對。為咗俾大家知道政府侵犯咗耶和華見證人嘅崇拜自由，加拿大嘅弟兄喺1946年發起一場為期16日嘅運動，分發《魁北克仇恨上帝、基督同自由，是全加拿大的恥辱》呢份傳單。呢份四頁嘅傳單詳細披露我哋嘅弟兄喺魁北克省受到嘅惡劣對待，包括宗教領袖煽動嘅騷亂，警察嘅野蠻行為同暴民嘅襲擊。傳單指出：“耶和華見證人不斷俾人非法拘捕。”傳單仲指出：“喺蒙特利爾，控告耶和華見證人嘅案件大約有800宗。”
12．（甲）反對者對分發傳單運動有乜嘢反應？（乙）當局用乜嘢罪名指控我哋嘅弟兄姊妹？（另見腳注）
12 魁北克省總理杜普萊西斯同羅馬天主教樞機主教維爾納夫聯手反擊，向耶和華見證人宣戰，聲明“絶對唔會手下留情”。之後，控告耶和華見證人嘅案件好快就由800宗增加到1600宗。一個先驅姊妹話：“警察拉咗我哋好多次，多到數都數唔晒。”耶和華見證人喺分發傳單嗰時被捕，罪名係利用刊物煽動人反對政府。 b
13．（甲）邊個最先被控煽動叛亂罪？（乙）法院作出乜嘢裁決？
13 1947年，艾每·鮑徹弟兄同佢兩個女，18歲嘅吉塞勒同11歲嘅露西爾，係最先俾人以煽動叛亂罪告上法庭嘅人。佢哋喺魁北克市南部山區自己嘅農田附近分發《魁北克仇恨》傳單。真係好難想像鮑徹弟兄係滋事分子，佢性格温和又謙卑，一向安守本分，喺自己嘅農田做嘢，間唔中會坐馬車去鎮嗰度。雖然係噉，佢哋一家人受到虐待，就好似傳單所講嘅一樣。審理案件嘅法官好憎耶和華見證人，就算證據表明鮑徹弟兄同家人係無辜嘅，佢都係當睇唔到。法官接納控方嘅指控，認為傳單挑起敵對情緒，於是判鮑徹弟兄一家人罪名成立。法官噉做就等於話：講出真相係一種罪！鮑徹弟兄同吉塞勒被判煽動人反對政府罪，甚至年紀細細嘅露西爾亦都坐咗兩日監。後來弟兄向加拿大最高法院上訴，法院受理咗。
14．魁北克省嘅弟兄姊妹持續受到迫害，佢哋點樣做？
14 即使魁北克省嘅弟兄姊妹持續受到猛烈嘅攻擊，佢哋仍然勇敢無懼傳講王國嘅信息，而且仲好有成效。1946年嘅分發傳單運動之後嘅四年期間，魁北克省嘅耶和華見證人由300人增加到1000人！ c
15,16．（甲）加拿大最高法院對鮑徹弟兄一案作出乜嘢裁決？（乙）呢場勝訴對弟兄姊妹同埋其他人有乜嘢影響？
15 1950年6月，加拿大最高法院嘅9位法官都出席咗艾每·鮑徹弟兄一案嘅聽證會。6個月之後，即係1950年12月18日，法院裁定我哋勝訴。點解呢？耶和華見證人嘅代表律師格倫·豪弟兄解釋，法院同意我哋提出嘅理據，就係“煽動叛亂”一定要涉及到慫恿其他人使用暴力或者反叛政府。但係傳單嘅内容“根本冇呢類煽動性嘅成分，所以只係言論自由嘅表現，係合法嘅”。豪弟兄仲話：“我親眼睇到耶和華點樣促成呢場勝利。” d
16 呢項裁決其實係上帝王國嘅一場輝煌勝利。當時，仲有122宗案件等緊審理，都係指控魁北克省嘅耶和華見證人煽動反對政府嘅，但係最高法院嘅裁決成為先例，將呢啲指控全部推翻。根據呢項裁決，加拿大同其他英聯邦國家嘅公民有自由向政府表達任何意見。魁北克省嘅政教勢力聯手發動攻擊，試圖限制耶和華見證人嘅宗教自由，最終係失敗嘅！ e
非法商販？抑或係上帝王國嘅熱心傳道員？
17．有啲政府試圖用乜嘢手段限制我哋嘅傳道工作？
17 早期嘅基督徒冇“販賣上帝嘅話語”，今日耶和華嘅僕人亦都唔會噉樣做。（請讀哥林多後書2:17）但係，有啲政府想通過商業法嚟限制我哋嘅傳道活動。法庭曾經審理過一啲案件，判決表明究竟耶和華見證人係推銷商品，抑或係推廣真理。請睇吓其中兩單案件。
18,19．丹麥政府點樣試圖限制傳道工作？
18 丹麥 1932年10月1日，一條禁止無牌售賣印刷品嘅法令開始實施。弟兄冇申請任何許可證。第二日，五個傳道員喺首都哥本哈根以西30公里以外嘅羅斯基勒鎮，做咗一日傳道之後，其中一個傳道員奧古斯特·萊曼唔見咗。原來佢俾警察拉咗，話佢無牌售賣商品。
19 1932年12月19日，奧古斯特·萊曼出庭。佢承認自己上門推廣聖經書刊，但係否認售賣商品。法庭接受佢嘅解釋，指出：“被告有經濟能力。佢冇從呢項活動取得任何經濟利益，亦冇噉嘅打算，反而要承受經濟損失。”法庭支持耶和華見證人，裁定奧古斯特嘅活動“唔屬於商業活動”。反對上帝子民嘅人係都唔肯罷休，誓要喺全國壓制我哋嘅傳道工作。（詩篇94:20）檢察官一直上訴到最高法院。我哋嘅弟兄點樣做呢？
20．（甲）丹麥最高法院作出乜嘢裁決？（乙）弟兄姊妹有乜嘢反應？
20 最高法院開庭之前嘅嗰個星期，丹麥全國嘅耶和華見證人都增加咗傳道活動。1933年10月3日星期二，最高法院作出裁決，維持原判，裁定奧古斯特冇違反法律。呢個意味住，耶和華見證人可以繼續自由傳道。弟兄姊妹非常感激耶和華幫佢哋打贏呢場官司，所以更加努力傳講好消息。由嗰陣時開始，丹麥嘅弟兄姊妹一直享有傳道嘅自由，再冇受到政府干擾。
上世紀30年代喺丹麥勇敢嘅耶和華見證人
21,22．美國最高法院就默多克弟兄嘅案件作出乜嘢裁決？
21 美國 1940年2月25日星期日，一位先驅羅伯特·默多克同另外七個耶和華見證人，喺賓夕法尼亞州匹兹堡附近嘅珍妮特市傳道嘅時候被捕。由於佢哋冇申請推廣書刊嘅許可證，所以被判有罪。弟兄向美國最高法院上訴，法院受理咗。
22 1943年5月3日，最高法院裁定耶和華見證人勝訴。法院反對當局要求人申請許可證嘅規定，因為呢個規定等於話，人“要俾錢先至可以享有聯邦憲法賦予嘅權利”。最高法院認為，珍妮特市呢條法令“限制咗出版自由同宗教自由”，所以裁定法令無效。法官威廉·道格拉斯代表大多數法官發言，指出耶和華見證人嘅活動“唔單止係傳道，亦都唔單止係分發宗教刊物，而係兩者嘅結合”。呢位法官仲話：“呢種宗教活動，同嗰啲去教堂做禮拜，同埋喺講壇上講道嘅活動，同樣值得尊重”。
23．1943年喺法律上取得嘅勝利，點解對我哋咁重要？
23 呢項裁決係上帝嘅子民取得嘅一次重大勝利，證明我哋真正嘅身份係基督徒傳道員，而唔係商販。喺1943年歷史性嘅呢一日，耶和華見證人喺最高法院嘅13件案件中就有12場勝訴，包括默多克案。之後，反對者一再試圖阻止我哋喺公衆場所同逐家逐户傳講王國嘅信息，呢啲案例有力噉維護我哋嘅權利。
“我哋必須接受上帝嘅統治，服從上帝而唔係服從人”
24．如果政府禁止傳道工作，我哋會點樣做？
24 如果政府保障我哋喺法律上嘅權利，令我哋可以自由噉傳講王國嘅信息，我哋當然會好感激。就算政府禁止傳道工作，我哋都唔會停落嚟，而係會調整一下，用任何可行嘅方法繼續傳道。正如使徒話：“我哋必須接受上帝嘅統治，服從上帝而唔係服從人。”（使徒行傳5:29；馬太福音28:19,20）同時，我哋亦都會向法院上訴，希望政府撤銷禁令。請睇吓兩個例子。
25,26．（甲）尼加拉瓜最高法院受理咗一單同耶和華見證人有關嘅案件，請講吓事情嘅來龍去脈。（乙）結果點樣？
25 尼加拉瓜 1952年11月19日，擔任分部僕人嘅特派傳道員多諾萬·明斯特曼，俾人傳召到位於首都馬那瓜嘅移民局，同局長阿諾爾多·加西亞見面。移民局局長對多諾萬講，尼加拉瓜嘅所有耶和華見證人都“唔可以再傳教同宣傳宗教活動”。多諾萬問佢點解，佢話耶和華見證人冇向政府申請傳道許可證，仲有人指控佢哋係共産主義者。噉係邊個指控耶和華見證人呢？就係羅馬天主教嘅教士。
尼加拉瓜嘅弟兄姊妹，當時傳道工作俾政府禁止
26 多諾萬即刻請求宗教部門同總統安納斯塔西奧·索摩查·加西亞撤銷禁令，不過完全冇用。所以，啲弟兄作出調整，暫時關閉王國聚會所，以小組嘅形式聚會，停止做街頭見證，但係佢哋仍然繼續向人傳講王國嘅信息。同時，佢哋向尼加拉瓜最高法院申訴，請求法院判禁令無效。報紙廣泛報道政府實施嘅禁令同埋耶和華見證人提出申訴嘅新聞。最高法院受理咗呢單案。結果點呢？1953年6月19日，最高法院嘅法官一致裁定耶和華見證人勝訴。法院認為，禁令侵犯咗憲法賦予嘅言論自由、良心自由同信仰自由。法院亦都要求尼加拉瓜政府恢復翻對待耶和華見證人原來嘅方式。
27．（甲）點解尼加拉瓜人對法院嘅裁決非常驚訝？（乙）弟兄點睇呢場勝利呢？
27 法院判耶和華見證人勝訴，令好多尼加拉瓜人非常驚訝。喺呢件案件之前，法院會避免同教士發生衝突，因為教士嘅勢力實在太大。另外，政府官員有權有勢，法院判案嗰時，好少會違背官員嘅意願。我哋嘅弟兄深信，可以取得勝利，全靠天上嘅君王保護佢哋，同埋因為佢哋冇停止過傳道。（使徒行傳1:8）
28,29．上世紀80年代中期，扎伊爾嘅耶和華見證人面對乜嘢轉變？
28 扎伊爾 上世紀80年代中期，扎伊爾（而家叫做剛果民主共和國）大約有3萬5000個耶和華見證人。當時，由於王國工作不斷擴展，分部為咗應付需求，正喺度加建新設施。1985年12月，首都金沙薩舉行咗一個國際大會，有3萬2000個代表從世界各地嚟到，坐滿晒成個會場。點都估唔到，一場轉變好快就會發生喺耶和華嘅僕人身上嘞。究竟係乜嘢事呢？
29 馬塞爾·菲圖弟兄嚟自加拿大魁北克省，曾經喺杜普萊西斯政權下受過迫害。後來，佢被派到扎伊爾做特派傳道員。佢講翻當時嘅情況，話：“1986年3月12日，負責嘅弟兄收到一封信，信上聲明扎伊爾嘅耶和華見證人係非法團體。”禁令由總統蒙博托簽發。
30．（甲）分部委員會要作出乜嘢重要決定？（乙）佢哋決定點樣做？
30 第二日，國家電台宣布：“我哋以後喺扎伊爾唔會再聽到耶和華見證人呢個名嘞。”迫害浪潮隨即湧嚟。王國聚會所俾人破壞，而弟兄姊妹就俾人搶劫、拘捕、監禁、拷打，連耶和華見證人啲細路都要坐監。1988年10月12日，政府充公咗組織嘅財物，民兵團霸佔咗分部嘅物業。負責嘅弟兄向總統蒙博托申訴，不過得唔到回應。呢個時候，分部委員會要作出一個重要嘅決定：“我哋應該向最高法院上訴，定係再等吓先呢？”當時擔任分部委員會協調人嘅特派傳道員蒂莫西·霍姆斯回憶話：“我哋向耶和華尋求智慧同指引。”分部委員會向上帝禱告同埋仔細衡量利弊之後，認為仲未係時候採取法律行動。佢哋集中精力照顧弟兄姊妹，同埋諗吓有啲乜嘢方法，可以使傳道工作繼續落去。
“訴訟期間，我哋親眼睇到耶和華點樣扭轉事態”
31,32．（甲）扎伊爾最高法院作出乜嘢意想唔到嘅裁決？（乙）呢個裁決對我哋嘅弟兄有乜嘢影響？
31 過咗幾年之後，耶和華見證人面對嘅壓力少咗好多，社會亦都越來越重視人權。分部委員會認為，係時候向扎伊爾最高法院上訴嘞。諗唔到法院肯受理。喺1993年1月8日，總統下達禁令將近7年之後，法院裁定政府對耶和華見證人採取嘅行動係唔合法嘅，禁令無效。試諗吓，啲法官竟然冒生命危險，將國家總統嘅決定推翻！霍姆斯弟兄話：“訴訟期間，我哋親眼睇到耶和華點樣扭轉事態。”（但以理書2:21）呢場勝利强化咗弟兄姊妹嘅信心。佢哋睇出君王耶穌一直指引佢嘅子民，喺適當嘅時候採取適當嘅行動。
剛果民主共和國嘅耶和華見證人可以自由噉崇拜耶和華，非常開心
32 禁令廢除之後，分部辦事處獲得批准，可以俾特派傳道員入境，亦可以興建新嘅分部設施，同埋將聖經書刊運入嚟。 f世界各地事奉上帝嘅人都好開心，因為睇出耶和華喺屬靈方面的確保護緊佢嘅子民。（以賽亞書52:10）
“有耶和華幫助我”
33．我哋可以從呢一章提到嘅訴訟睇出乜嘢？
33 我哋可以從以上訴訟睇出，耶穌確實兑現咗承諾，佢講過：“我一定賜口才同智慧俾你哋，使所有反對你哋嘅人加埋一齊都擋唔住，駁唔倒。”（請讀路加福音21:12-15）事實表明，耶和華有時會通過好似迦瑪列噉樣嘅人嚟保護佢嘅現代子民，有時會推動一啲勇敢嘅法官同律師維護公義。耶和華的確令敵人嘅武器失去作用。（請讀以賽亞書54:17）任何反對都阻止唔到上帝要成就嘅事。
34．我哋喺法律上取得嘅勝利點解咁值得留意？呢啲勝訴證明咗乜嘢？（另見附欄“ 喺高等法院取得嘅重大勝利促進傳講王國嘅工作”）
34 點解話我哋嘅連場勝訴係咁特别嘅呢？試諗吓，耶和華見證人唔係啲有權有勢嘅人，佢哋唔參與政治選舉，唔支持政治運動，亦都唔會同政治人物搞關係。而且，喺高等法院出庭嘅耶和華見證人當中，喺好多人眼中佢哋係啲“冇學問嘅普通人”。（使徒行傳4:13）從人嘅角度嚟睇，法院同勢力强大嘅宗教以及政治領袖作對，判我哋勝訴，一啲好處都冇。但係，法院偏偏一次又一次噉企喺我哋呢邊。我哋贏咗咁多場勝利，證明我哋係“蒙上帝鑑察，靠住基督”得勝嘅。（哥林多後書2:17）我哋同使徒保羅深有同感，可以勇氣十足噉講：“有耶和華幫助我，我唔會驚。”（希伯來書13:6）
a 坎特韋爾訴康州案，係海登·科温頓弟兄喺美國最高法院為見證人打嘅43場官司中嘅第一場。海登弟兄喺1978年去世。佢嘅太太多蘿茜姊妹喺2015年去世，享年92歲，一生忠心事奉上帝。
b 呢項指控係根據1606年頒布嘅一條法令。基於呢條法令，陪審團只要認為被告講嘅話挑起敵對情緒，就算佢講嘅係真相，亦都可以判佢有罪。
c 1950年，魁北克有164個全時傳道員，包括63個基列學校畢業生。呢啲畢業生雖然知道喺魁北克服務會面對猛烈嘅反對，仲係甘願接受委派。
d 格倫·豪弟兄係個勇敢嘅律師。從1943年到2003年，佢好有技巧噉幫加拿大同其他國家嘅耶和華見證人打過幾百場官司。
e 關於呢件案，詳見《警醒！》2000年4月22日刊18-24頁《勝敗不在乎你們，乃在乎上帝》。
f 民兵團將分部物業裏面嘅嘢攞走晒。後來，新嘅分部起喺另一個地方。
