1, 2. a) Mun lo b’a yira ko i ye Ala ka Masaya marakɔnɔmɔgɔ dɔ ye? b) Tuma dɔw la, mun na Jehova Seerew ka ɲi ka bondori kɛ walisa ka se k’u ka batolikow kɛ ɲɛsuma na?

 I YE Ala ka Masaya marakɔnɔmɔgɔ dɔ ye wa? N’i ye Jehova Seere ye, siga t’a la, o kɔrɔ ko i ye Ala ka Masaya marakɔnɔmɔgɔ dɔ ye! Nka mun lo b’o yira? Karadante wala wolosɛbɛ lo t’o yira. An be Jehova Ala bato cogo min na, o lo b’a yira n’an y’a ka Masaya marakɔnɔmɔgɔ dɔ ye. Tiɲɛn batoli tɛ dan an ka lannakow dɔrɔn ma. Nka o ɲɛsinna an ka kɛwalew fana ma. O kɔrɔ, an be Ala ka Masaya ka sariyaw labato cogo min na. An ka batoli ɲɛsinna an ka ɲɛnamaya faan bɛɛ lo ma, i n’a fɔ an deenw lamɔcogo ani an be furakɛcogo minw sugandi.

² Nɛɛmaba lo an fɛ ka kɛ Ala ka Masaya marakɔnɔmɔgɔw ye. Nka duniɲamɔgɔw t’o jati ani a man di u ye k’a ye ko an be Ala ka sariyaw labatora. Gofɛrɛnɛman dɔw y’a ɲini ka bali sigi an ka batolikow kan wala ka daan sigi u la pewu yɛrɛ. O kama tuma dɔw la, an ka ɲi ka jijaliba lo kɛ ka se ka joo sɔrɔ ka an ka Masa Krista ka sariyaw labato a ɲɛɛ ma. O ka ɲi ka bari an na wa? Ayi, sabu fɔlɔfɔlɔ la fana, Jehova sagokɛlaw y’o ɲɔgɔn lo kɛ siɲɛ caaman.

3. Ala sagokɛlaw ye bondori juman lo kɛ masamuso Ɛsitɛri ka wagati la?

³ Misali la, masamuso Ɛsitɛri ka wagati la, Ala sagokɛlaw ye bondori lo kɛ walisa k’u niin kisi. Mun na do? Sabu Aman tun y’a fɔ Pɛrɛsi masacɛ Asuerus ye ko Yahutu minw bɛɛ b’a ka mara la, a k’a to u k’u bɛɛ faga sabu “u ka landa ni tɔw ta te kelen ye.” (Ɛsitɛri 3:8, 9, 13). Yala Jehova bɔra a sagokɛlaw kɔ wa? Ayi! Ɛsitɛri ni Maridose ye jijali minw kɛ ka taga kuma Pɛrɛsi masacɛ fɛ walisa a ka Ala ka jama latanga, Jehova y’a kɛ o ɲɛna u bolo.—Ɛsitɛri 9:20-22.

4. An bena mun lo ye sapitiri nin na?

⁴ Bi bi nin na do? I ko an y’a ye cogo min na sapitiri tɛmɛnin na, gofɛrɛnɛmanw ye Jehova Seerew kɛlɛ siɲɛ caaman na. Sapitiri nin na, an ben’a ye o gofɛrɛnɛmanw tɛmɛna fɛɛrɛ minw fɛ walisa k’a ɲini ka bali sigi an ka batolikow kan. An bena kuma koo jɔnjɔn saba koo la: 1) Joo min b’an fɛ sariya sira fɛ k’an ka tɔɔn sigi sen kan ani k’an ka diinankow kɛ a ɲɛɛ ma, 2) joo min b’an fɛ k’an ka  furakɛcogow sugandi ka kɛɲɛ ni Bibulu ka sariyakolow ye, ani 3) joo min be bangebagaw fɛ k’u deenw lamɔ ka kɛɲɛ ni Jehova ka sariyakolow ye. O koo kelen kelen bɛɛ la, an ben’a ye cogo min na Masiya ka Masaya marakɔnɔmɔgɔw y’u jija k’a yira k’u be Ala ka Masaya lo kɔ. An ben’a ye fana cogo min na Jehova y’u duga o kosɔn.

5. Ka joo sɔrɔ sariya sira fɛ k’an ka batolikow kɛ, nafa juman lo b’o la?

⁵ Yala an mako b’a la gofɛrɛnɛmanw ka sira di an ma an be sɔrɔ ka Jehova bato wa? Abada! Nka, n’an ye sira sɔrɔ, o be koow nɔgɔya an ma. Misali la, o b’a to an be se ka ɲɔgɔn lajɛn ɲɛsuma na Masaya Boonw ni lajɛnba boonw na. O b’a to fana an be se k’an ka sɛbɛw dilan wala k’u ta jamana wɛrɛw la ka na n’u ye, ani ka kibaro diiman fɔ an mɔgɔɲɔgɔnw ye hali mɔgɔ t’an bali. Jamana caaman na, a yirala faamanw ka sɛbɛw kɔnɔ ko Jehova Seerew ye diinan ye ani sira dira u ma u k’u ka diinankow kɛ i ko diinan tɔɔw. Nka, mun lo kɛra tuma min na gofɛrɛnɛman dɔw ma sɔn o la wala u y’a ɲini ka bali sigi an ka batoliko jɔnjɔnw kan?

6. Saan 1940 fan fɛ, Jehova Seerew ye gwɛlɛya jumanw lo sɔrɔ Ɔsitarali jamana na?

⁶ Ɔsitarali. Saan 1940 fan fɛ, Ɔsitarali jamana ka gofɛrɛnɛrɛ y’a fɔ ko Jehova Seerew ka lannakow b’a kɛ mɔgɔw tɛ dɛmɛ don kɛlɛkow la. O kama, a ye bali sigi an ka batolikow kan. U ye Betɛli datugu, k’an ka Masaya Boonw bɔsi an na ani k’a fɔ k’u t’a fɛ ka mɔgɔ si ye n’an ka sɛbɛw ye. Saan caaman kɔnɔ, balimaw tun be dogo le ka lajɛnw kɛ ani ka waajuli kɛ. Nka saan 1943 zuwɛnkalo tile 14, Ɔsitarali ka kititigɛsoba y’o bali wuli. O ye balimaw lafiya yɛrɛ le!

7, 8. Irisi balimaw ye bondori juman lo kɛ saan caaman kɔnɔ walisa ka se k’u ka batolikow kɛ ɲɛsuma na?

⁷ Irisi. Saan caaman kɔnɔ, kominisiw ye Jehova Seerew bali u k’u ka diinankow kɛ. Nka saan 1991, u labanna ka sira di an ma. Saan 1992, Soviyetikiw ka kuntigiya bannin kɔ, Irisi gofɛrɛnɛman ye Jehova Seerew ka diinan tɔgɔ sɛbɛ diinan jɛnkuluw cɛma. Nka komi an kɛlɛbaga dɔw, sanko ɔritodɔksi diinan kuntigiw y’a ye ko mɔgɔ caaman be kɛra Jehova Seerew ye, u dimina kosɔbɛ. O kama, saan 1995 ni 1998 cɛ, u tagara an jalaki faamanw fɛ siɲɛ duuru bɛɛ. Nka o bɛɛ la, prokirɛr ko ale ma foyi ye min b’a yira ko an ye koo jugu kɛ. O bɛɛ n’a ta, an kɛlɛbagaw m’u fari faga. Saan 1998, u segira ka taga an jalaki faamanw fɛ. Kititigɛlaw ye joo di an ma, nka an kɛlɛbagaw ko olu ma sɔn. O kama, u y’a ɲini kititigɛlaw fɛ u k’o koo lajɛ tugun, ani saan 2001 mɛkalo la, kititigɛlaw ye joo di u ma. O saan nin ka ɔkutɔburukalo la, kititigɛlaw ye kiti tigɛ tugun o koo kan. Nka saan 2004 la le u ye desizɔn ta k’a fɔ k’u ye Jehova Seerew ka diinan tɔgɔ bɔ diinan jɛnkuluw cɛma Mɔsuku ani u ye bali sigi an ka baaraw kan.

 ⁸ U y’a daminɛ ka tɔɔrɔ sugu bɛɛ la Jehova Seerew kan (2 Timote 3:12 kalan). U y’an ka sɛbɛw bɔsi an na ani k’a fɔ ko an man kan ka batolibonw lɔ wala ka yɔrɔw luwe an ka batolikow kama. A’ ye miiri k’a filɛ o gwɛlɛyara an balimaw ma cogo min na! Saan 2001, balimaw tagara n’o koo ye Erɔpu ka kititigɛsoba la min be adamadenya joo lafasa. Saan 2004, balimaw segira ka taga o kititigɛsoba la ni kunnafoni wɛrɛw ye. Saan 2010, kititigɛsoba ye kiti tigɛ o koo kan. U y’a faamu ko Irisi gofɛrɛnɛman ye bali sigi Jehova Seerew ka baara kan sabu u koo man di u ye. O la, u y’a fɔ ko kititigɛso tɔɔw ye desizɔn min ta, k’olu ma sɔn o la sabu foyi t’a yira ko Jehova Seerew ye kojugukɛlaw ye. Sariya sira fɛ, joo be Jehova Seerew fɛ k’u ka batolikow kɛ. Kititigɛsoba y’a faamu ko Irisi gofɛrɛnɛman ye min bɛɛ kɛ, o kuun tun ye k’an bali k’an ka batolikow kɛ. O kama, u y’a fɔ ko sariya sira fɛ, joo be Jehova Seerew fɛ k’u ka diinankow kɛ ɲɛsuma na. Hali ni Irisi faaman caaman ma sɔn ka Erɔpu ka kititigɛsoba ka desizɔn labato, o sesɔrɔli ye an balimaw jija kosɔbɛ Irisi jamana na.

9-11. Gɛrɛsi jamana na, Jehova Seerew ye bondori jumanw lo kɛ walisa ka se k’u ka batolikow kɛ ɲɔgɔn fɛ ɲɛsuma na, ani mun lo sɔrɔla o la?

⁹ Gɛrɛsi. Saan 1983, Titos Manoussakis tun ye boon ta luwanse la Erakiliyɔn dugu la, Krɛti mara la walisa balimaw jɛnkulu dennin dɔ ka se ka lajɛnw kɛ yen (Eburuw 10:24, 25). Nka, a ma mɛɛn ɔritodɔksi diinan kuntigi dɔ tagar’a fɔ polisiso la ko a daganin tɛ Jehova Seerew k’u ka batolikow kɛ o boon kɔnɔ. Mun na a y’o kɛ? Sabu Jehova Seerew ka lannakow ni ɔritodɔksi diinan ta tɛ kelen ye. O koo labanna ka se kititigɛso la. Kititigɛlaw ye jalaki ben balimacɛ Titos ni balima saba wɛrɛw kan k’u ye kojugukɛlaw ye. U ko o balimaw bena alimandi sara ani ka kalo fila kɛ kaso kɔnɔ. Ala ka Masaya marakɔnɔmɔgɔw y’a ye ko kititigɛlaw ka desizɔn bɛnnin tɛ ani k’u b’a fɛ le k’an bali k’an ka batolikow kɛ ɲɛsuma na. O kama, u m’u fari faga. U y’u kaan bɔ jamana ka kititigɛso wɛrɛw ma. A laban, u tagara n’o koo ye Erɔpu ka kititigɛsoba la min be adamadenya joo lafasa.

¹⁰ Saan 1996, o kititigɛsoba ye desizɔn dɔ ta min digira an kɛlɛbagaw la kosɔbɛ. U ko: “Ka kɛɲɛ ni Gɛrɛsi jamana ka sariya ye, Jehova Seerew ka diinan be saratiw dafa walisa o ka jati diinan jɛnkulu dɔ ye.” U y’a fɔ fana ko Gɛrɛsi jamana ka kititigɛsow ye desizɔn min ta, k’o bɛnnin tɛ sabu, u be Jehova Seerew “balila le u k’u ka batolikow kɛ ɲɛsuma na.” U y’a fara a kan ko joo tɛ gofɛrɛnɛman fɛ “k’a fɔ ni diinan dɔ ka lannakow bɛnnin lo wala k’a latigɛ u ka ɲi k’u ka lannakow kofɔ tɔɔw ye cogo min na.” Kititigɛso denninw tun ye jalaki minw ben balimaw kan, kititigɛsoba y’u lasa. U y’a fɔ ka gwɛ ko joo be Jehova Seerew fɛ k’u ka batolikow kɛ ɲɛsuma na.

 ¹¹ O sesɔrɔli y’a to koow nɔgɔyara Jehova Seerew ma Gɛrɛsi jamana na wa? Ayi dɛ! Saan 2012, o koo ɲɔgɔn kɛra Kasandriya dugu la ani o ye saan 12 lo ta ka sɔrɔ ka ɲɛnabɔ. Ɔritodɔksi diinan kuntigi dɔ lo y’o koo fana lawuli. Gɛrɛsi jamana ka kititigɛsoba ye kiti tigɛ ani ka joo di Jehova seerew ma. U y’a yira ko ka kɛɲɛ ni sariya ye, joo be bɛɛ fɛ k’a ka diinankow kɛ ɲɛsuma na ani ko mɔgɔ si tɛ se k’a fɔ ko Jehova Seerew tɛ diinan ye. U ko: “Jehova Seerew ka lannakow dogonin tɛ mɔgɔ si la. O kama, u ka diinan lɔnnin lo.” Kasandriya kafo mɔgɔw ninsɔn ka di sabu u be se k’u ka lajɛnw kɛ sisan Masaya Boon na.

12, 13. Faransi jamana na, cogo juman na an kɛlɛbagaw y’a ɲini ka “tilenbaliya koow kɛ [an na] sariya tɔgɔ la,” ani mun lo sɔrɔla o la?

¹² Faransi. Ala sagokɛlaw kɛlɛbaga dɔw tɛmɛna nanbarakow fɛ walisa ka “tilenbaliya koow kɛ [u la] sariya tɔgɔ la.” (Zaburuw 94:20, Bible senuma) (o vɛrise kalan). Misali la, an ka tɔɔn min be Faransi n’o be weele ko Association Les Témoins de Jéhovah (ATJ), saan 1995 fan fɛ, faamanw y’a daminɛ k’o tɔɔn ka wariko sɛgɛsɛgɛ. Mun na do? Sabu u tun b’a fɛ k’a lɔn u b’u ka wari sɔrɔ cogo min na. Minisiriso min be jamana ka wariko kun na, ale y’a yira o sɛgɛsɛgɛri kuun ye min ye tigitigi. A ko: “O sɛgɛsɛgɛri be se ka kɛ sababu ye an be fiɲɛ dɔ sɔrɔ an be se ka basigi min kan k’o tɔɔn ka baaraw bali wala k’u jalaki kititigɛso la . . . N’a sɔrɔ o bena kɛ sababu ye k’o tɔɔn ka baaraw nagasi wala k’o lasa yɛrɛ Faransi jamana na.” Hali k’a sɔrɔ u ma fiɲɛ foyi ye an ka wariko la, u y’an waajibiya ka lanpoba dɔ sara. N’u ka nanbarako tun ɲɛna u bolo, waajibi tun lo an b’an ka tɔnbolo datugu ani k’a boonw feere walisa ka se k’o lanpo sara. O tun ye wagati gwɛlɛ yɛrɛ lo ye an fɛ, nka an m’an fari faga hali dɔɔni. Balimaw ma sɔn o tilenbaliyako la. O kama saan 2005, u tagara n’o koo ye Erɔpu ka kititigɛsoba la min be adamadenya joo lafasa.

¹³ O kititigɛsoba ye desizɔn dɔ ta saan 2011, zuwɛnkalo tile 30. Kititigɛlaw ye gofɛrɛnɛman hakili jigi ko ka kɛɲɛ ni sariya ye, a daganin tɛ gofɛrɛnɛman ka dɔ fɔ diinanw ka lannakow la, wala u fɔcogo koo la, fɔɔ ni koo gwɛlɛn dɔ lo. Kititigɛsoba y’a fɔ fana ko: “O Association mako tun be fɛɛn minw bɛɛ la walisa k’u ka baara kɛ, u y’u bɛɛ don lanpo sara la . . . O cogo la, gofɛrɛnɛman ye o Association mɔgɔw bali u k’u ka batolikow kɛ a ɲɛɛ ma.” Kititigɛlaw bɛɛ lajɛnnin ye joo di Jehova Seerew ma! Gofɛrɛnɛman tun y’an ka Association waajibiya ka lanpo wari min sara, Jehova sagokɛlaw ninsɔndiyara k’a ye k’u y’o segi, ani ka dɔ fara a kan yɛrɛ! Kititigɛlaw tun y’a fɔ fana ko gofɛrɛnɛman y’an ka Association ka boon minw bɔsi, u k’o segi. Gofɛrɛnɛman y’o lo kɛ.

14. An balima minw be bondori kɛra walisa ka se k’u ka batolikow kɛ ɲɛsuma na, an be se k’u dɛmɛ cogo di?

¹⁴ I ko Ɛsitɛri ni Maridose ka wagati la, bi bi nin na fana  Jehova sagokɛlaw be jijaliba lo kɛ walisa ka sira sɔrɔ ka Jehova bato a ɲɛɛ ma (Ɛsitɛri 4:13-16). I be se k’u dɛmɛ wa? Ɔnhɔn. Balima minw tɔɔrɔnin lo faamanw ka tilenbaliyakow kosɔn, i be se ka delili kɛ u ye. I ka delili be se k’u dɛmɛ k’o tɔɔrɔw muɲu (Zaki 5:16 kalan). Jehova b’o deliliw ɲɔgɔn lamɛn wa? An ye see sɔrɔ kitiko minw na, u b’a yira ko a b’o deliliw lamɛn, siga t’o la!—Eburuw 13:18, 19.

15. Ala sagokɛlaw ye cikan gwɛnin juman lo sɔrɔ joli koo la?

¹⁵ Bi bi nin na, mɔgɔw tɛ baara kɛ ni joli ye cogo bɛnnin na. I ko an y’a ye cogo min na sapitiri 11nan na, Ala ka Masaya marakɔnɔmɔgɔw ye cikan gwɛnin sɔrɔ o koo la (Zɛnɛzi 9:5, 6; Lev. 17:11; Kɛwaliw 15:28, 29 kalan). Tiɲɛn lo ko an tɛ sɔn u ka joli don an fari la. Nka an b’a fɛ u ka an n’an ka mɔgɔ kanulenw furakɛ cogo fisaman na. A daan ye o furakɛcogo ka bɛn ni Ala ka sariyaw ye. Jamana caaman na, kititigɛsobabaw sɔnna a ma ko joo be bɛɛ fɛ k’a ka furakɛcogo sugandi. A be se ka ban furakɛcogo dɔ la n’o b’a dusukun kɛlɛ wala n’o bɛnnin tɛ n’a ka lannakow ye. Nka jamana dɔw la, Ala sagokɛlaw ye gwɛlɛyabaw sɔrɔ o koo la. An ka misali damanin lajɛ o koo la.

16, 17. Zapɔn jamana na, dɔgɔtɔrɔw ye balimamuso dɔ furakɛ cogo juman na min digira a la kosɔbɛ? Jehova y’a ka deliliw jaabi cogo di?

¹⁶ Zapɔn. Balimamuso Misae Takeda tun be ni saan 63 ye tuma min na a tun ka ɲi ka operasɔn gwɛlɛn dɔ kɛ. O balimamuso kantigi y’a ɲɛfɔ ka gwɛ a ka dɔgɔtɔrɔ ye ko ale t’a fɛ u ka joli don a fari la. Nka kalo damanin o kɔ, a y’a mɛn ko dɔgɔtɔrɔw ye joli don a la operasɔn tuma na. O digira a la fɔɔ a y’a fɔ ko dɔgɔtɔrɔw ye fanga lo kɛ a la ani k’a lafili. O kama saan 1993 zuwɛnkalo la, a ye kɔnwokasɔn tigɛ ka tag’a di dɔgɔtɔrɔw ni dɔgɔtɔrɔso ɲɛmɔgɔ ma. Balimamuso tun ye mɔgɔ majiginin ye, a tun be kuma ni dususuman ye ani a tun be ni limaniya barikaman ye. Hali k’a sɔrɔ fanga bɛrɛ tun t’a la, a lɔra a seen kan lɛri kelen ni kɔ kɔnɔ ka seereya kɛ kititigɛlaw ni jamaba ɲɛfɛ. Kalo kelen dɔrɔn ka kɔn a saya ɲɛ, a tun be kititigɛso la. A ka jagwɛlɛya n’a ka limaniya t’i kabakoya wa? Balimamuso Takeda tun be Jehova deli tuma bɛɛ a k’ale dɛmɛ ka see sɔrɔ o kitiko la. A tun lanin b’a la ko Jehova bena a ka deliliw jaabi. Jehova y’a ka deliliw jaabi wa?

¹⁷ Saan saba balimamuso Takeda sanin kɔ, Zapɔn ka kititigɛsoba ye joo di a ma. U ko dɔgɔtɔrɔw tun man kan ka joli don a fari la k’a sɔrɔ a tun t’o fɛ. Saan 2000, feburukalo tile 29, kititigɛso y’a fɔ ko “joo be bɛɛ fɛ k’a yɛrɛla desizɔn ta” o koo ɲɔgɔn na ani k’o “desizɔn ka ɲi ka labato.” Balimamuso Takeda tun jijanin lo ka bondori kɛ walisa ka joo sɔrɔ k’a ka furakɛcogo sugandi ka kɛɲɛ n’a dusukun ye o min kolola Bibulu fɛ. O y’a to bi bi nin na, Zapɔn balimaw  be se k’u ka furakɛcogo sugandi hali u tɛ siran ko dɔgɔtɔrɔw bena u waajibiya ka joli don u la.

18-20. a) Arzantini ka kititigɛso wɛrɛ y’a yira cogo di ko joo be bɛɛ fɛ ka ban u ka joli don a fari la? b) An be se k’a yira cogo di ko an kolonin lo Krista ka kuntigiya ye joli koo la?

¹⁸ Arzantini. N’an lanin lo dɔgɔtɔrɔso ani an ka ɲi ka desizɔn ta furakɛcogo dɔ koo la k’a sɔrɔ an t’an yɛrɛ kala ma do? An be se ka kɔn k’an yɛrɛ labɛn cogo di o koo ɲɔgɔn kama? An ka ɲi ka kɛ ni sɛbɛ dɔ ye an bolo kɔrɔ tuma bɛɛ, min b’a yira an ye desizɔn min ta furakɛcogo koo la. Pablo Albarracini y’o lo kɛ. Saan 2012 mɛkalo la, soonw y’a ci ni marifa ye siɲɛ caaman. Mɔgɔw y’a ɲun ka taga n’a ye dɔgɔtɔrɔso la. Komi balimacɛ Pablo tun t’a yɛrɛ kala ma, a tun tɛ se k’a ɲɛfɔ dɔgɔtɔrɔw ye ko ale t’a fɛ u ka joli don a fari la. Nka a ka jolisɛbɛ tun b’a kun. A tun y’o dafa ani k’a bolonɔ la a kan saan naani ni kɔ ka kɔn o koo ɲɛ. Komi a tun mandiminin lo kojugu, dɔgɔtɔrɔ dɔw y’a miiri ko waajibi lo u ka joli don a fari la walisa ka se k’a niin kisi. O bɛɛ n’a ta, u tun labɛnnin lo ka Pablo ka desizɔn labato joli koo la. Pablo facɛ tɛ Jehova Seere ye. Ale tagara sɛbɛ dɔ minɛ kititigɛso la min be sira di dɔgɔtɔrɔw ma u ka joli don a dencɛ fari la.

¹⁹ Pablo muso kaan bɔra u ka awoka ma ani ale y’a ɲini kititigɛlaw fɛ u ka o koo lajɛ tugun. Lɛri damanin dɔrɔn kɔnɔ, kititigɛlaw y’o sɛbɛ minɛ Pablo facɛ la ani u ko dɔgɔtɔrɔw ka ɲi ka banabagatɔ ka ŋaniya lo labato. O kama, Pablo facɛ tagara n’o koo ye Arzantini ka kititigɛsoba la. Olu ko Pablo ye min sɛbɛ a ka jolisɛbɛ kɔnɔ, “mɔgɔ man kan ka sigasiga o la sabu mɔgɔ m’a waajibiya, ale yɛrɛ lo y’o ŋanina ta.” Kititigɛsoba y’a fɔ fana ka gwɛ ko: “Mɔgɔ o mɔgɔ min ye baliku ye, a tigi be se ka kɔn ka cikan gwɛninw di [a ka] kɛnɛyako la, ani a be se ka sɔn wala ka ban furakɛcogo dɔw la . . . Dɔgɔtɔrɔ min b’a furakɛla, a ka kan k’o tigi ka cikanw labato.”

²⁰ Balimacɛ Pablo Albarracini kɛnɛyara pewu. Ale n’a muso ninsɔn ka di sabu a tun kɔnna k’a ka jolisɛbɛ dafa. Hali n’o ye koo dennin ye, o kɔrɔtanin lo kosɔbɛ sabu a y’a yira o cogo la ko a kolonin lo Ala ka Masaya Masacɛ Krista ye. Ele n’i ka denbayamɔgɔw y’aw ka jolisɛbɛ dafa wa?

21-24. a) Joliko ta fan fɛ, mun lo y’a to Kanada ka kititigɛsoba ye desizɔnba dɔ ta min ɲɛsinna denmisɛnw ma? b)Jehova sagokɛla minw ye denmisɛnw ye, o koo be se k’u jija cogo di?

²¹ Kanada. Tuma caaman na, kititigɛlaw be sɔn a ma ko joo be bangebagaw fɛ k’a latigɛ furakɛcogo min ka fisa u deenw ma. Tuma dɔw la, u yɛrɛ b’a fɔ ko ni denmisɛn dɔ ɲaa tigɛra ani a ye desizɔn dɔ ta a yɛrɛ furakɛcogo koo la, a ka desizɔn ka ɲi ka labato. O koo ɲɔgɔn lo ye April Cadoreth sɔrɔ. A saan 14nan na, u tagara n’a ye dɔgɔtɔrɔso sabu a joli tun be bɔnna a kɔnɔ. Kalo damanin ka kɔn o ɲɛ, a tun y’a ka jolisɛbɛ dafa k’a yira ko ale t’a fɛ u ka joli don a fari la hali ni gwɛrɛgwɛrɛko dɔ y’a sɔrɔ. April ye min fɔ ka gwɛ a ka  jolisɛbɛ kɔnɔ, a ka dɔgɔtɔrɔ banna ka tugu o kɔ. A tagara sɛbɛ dɔ ɲini kititigɛso la min be sira di a ma ka joli don April la. Dɔgɔtɔrɔw ye fanga kɛ April la, u ye joli pɔsi saba bɛɛ don a fari la. A ko o kɛra i n’a fɔ u y’ale waajibiya ka la n’a ye le.

²² April n’a bangebagaw tagara n’o koo ye kititigɛso la. Saan fila o kɔ, o koo sera Kanada ka kititigɛsoba la. April n’a bangebagaw y’a fɔ kititigɛlaw ye ko u ye sariya min boli April kan, k’o daganin tɛ. Kititigɛlaw ma sɔn o ma, u y’a fɔ k’o sariya daganin lo. Nka April ye wari min don o kitikow la, u y’o segi a ma ani k’a fɔ ko dɔgɔtɔrɔw ye min kɛ a la, k’o bɛnnin tɛ. U ye joo di April ma ani u ko sisan, denmisɛn minw ɲɛɛ tigɛninw, olu be se k’a latigɛ u yɛrɛ ma u be furakɛcogo min fɛ. Kititigɛlaw y’a fɔ ko: “Furakɛcogo koo la, denmisɛn minw sanda ma se 16 ma, sira ka ɲi ka di u ma u k’u ka desizɔn ɲɛfɔ walisa dɔgɔtɔrɔw k’a lɔn k’olu yɛrɛ lo y’o desizɔn ta ani k’u b’o faamu ka ɲɛ.”

²³ April ka koo ye mɔgɔ caaman nafa. O kɛra sababu ye kititigɛsoba ye desizɔn dɔ ta denmisɛn ɲɛnatigɛninw koo la  minw be se ka desizɔn ta u yɛrɛ ye. Ka kɔn o ɲɛ, ni deen dɔ sanda tun ma se 16 ma, kititigɛlaw tun be se ka sira di dɔgɔtɔrɔw ma u ka furakɛcogo dɔ kɛ a la, n’a sɔrɔla k’o furakɛcogo bena o deen nafa. Nka sisan, ni deen dɔ sanda ma se 16 ma, kititigɛlaw tɛ se tugun ka sira di dɔgɔtɔrɔw ma u k’a waajibiya ka furakɛcogo dɔ kɛ a la. Dɔgɔtɔrɔw ka ɲi k’o deen lamɛn fɔlɔ walisa k’a lɔn n’a b’a ka desizɔn faamu.

²⁴ O kitiko mɛɛnna saan saba. Nka u ka jijaliw kɛra fuu ye wa? April y’a fɔ ko “ayi!” Sisan April kɛnɛyara ani a ye kudayi piyɔniye ye. A y’a fɔ ko: “N’ sera ka min kɛ, hali n’o tɛ bɛrɛ ye, n’ ninsɔn ka di kosɔbɛ k’a lɔn ko o ye nɔɔrɔ la Jehova tɔgɔ kan ani k’a yira ko Sutana ye ngalontigɛla ye.” April ka koo b’a yira ko an deenw yɛrɛ be se k’u jaa gwɛlɛya ka lɔ kelen kan ani k’a yira k’u ye Ala ka Masaya marakɔnɔmɔgɔ sɔbɛw ye.—Mat. 21:16.

25, 26. Furusa be na ni gwɛlɛya juman lo ye tuma dɔw la?

²⁵ Jehova ye kunkanbaara dɔ kalifa bangebagaw ma. O ye k’u deenw kolo ka kɛɲɛ n’a ka sariyakolow ye (Deter. 6:6-8; Efɛz. 6:4). O man nɔgɔ yɛrɛ le sanko n’a sɔrɔla ko bangebagaw y’u ka furu sa. N’a sɔrɔ u tɛ ni miiriya kelen ye u deenw lamɔcogo koo la. Misali la, bangebaga min ye Jehova Seere ye, ale lanin b’a la ko deen ka ɲi ka lamɔ ka kɛɲɛ ni Jehova ka sariyakolow ye. Nka, n’a sɔrɔ tɔɔ kelen tɛna sɔn o ma. Bangebaga min ye Jehova Seere ye, ale ka ɲi ka sɔn a ma ko hali n’a ka furu sara, o tɛ daan sigi deen n’a bangebaga tɔɔ kelen ka jɛnɲɔgɔnya la.

²⁶ Bangebaga min tɛ Jehova Seere ye, n’a sɔrɔ a ben’a ɲini kititigɛlaw fɛ u k’a to ale be denmisɛnw mara walisa bangebaga tɔɔ kelen kana se k’u lamɔ ka kɛɲɛ ni Jehova Seerew ka lannakow ye. Dɔw b’a fɔ ko ka deen lamɔ ka kɛɲɛ ni Jehova Seerew ka lannakow ye, o be se ka bɔnɛ lase deen ma: a tɛna se k’a ka wololon sanyɛlɛma fɛti ni fɛti wɛrɛw kɛ, ani dɔgɔtɔrɔw tɛna se ka joli don a fari la walisa k’a “niin kisi” ni gwɛrɛgwɛrɛko dɔ y’a sɔrɔ. Koo ɲuman lo k’a lɔn ko ni kititigɛlaw b’u ka desizɔn tara, u tɛ diinan sira lo filɛ. Nka min ka fisa deen ma, u b’o lo filɛ. An ka misali dɔw lajɛ o koo la.

27, 28. Mɔgɔ dɔw b’a fɔ ko ka deen lamɔ Jehova Seerew ka diinan na, k’o man ɲi deen ma. Oyo mara ka kititigɛsoba ye mun lo fɔ o koo la?

²⁷ Etazini. Saan 1992, a ɲinina Oyo ka kititigɛsoba fɛ a ka kitiko dɔ lajɛ. Facɛman dɔ tagara kititigɛso dennin dɔ la k’a fɔ ko n’ale musokɔrɔ lo bena u dencɛ lamɔ Jehova Seerew ka diinan sira la, o tɛna ɲɛ deen ma. O kititigɛso dennin ye joo di a ma ani k’u dencɛ marako kalifa a ma. U ko deen bamuso Jennifer Pater be se ka taga bɔ a dencɛ ye, nka a man kan k’a “kalan Jehova Seerew ka lannakow la cogo si la.” O  kɔrɔ ko bamusoman yɛrɛ tun tɛ se ka Bibulu wala Bibulu ka sariyakolow kofɔ a dencɛ ye. A’ ye miiri k’a filɛ o koo y’a dusu kasi cogo min na! O bɛɛ n’a ta, a y’a fɔ ko ale bena muɲu ka Jehova makɔnɔ a k’o koo ɲɛnabɔ. A ko: “Jehova tun be ni n’ ye tuma bɛɛ.” Jehova ka ɔriganisasiyɔn ka dɛmɛ barika la, Jennifer ka awoka y’a ɲini Oyo mara ka kititigɛsoba fɛ u ka segi k’o koo lajɛ.

²⁸ O kititigɛsoba ma sɔn kititigɛso dennin ka desizɔn ma. U ko “joo be bangebaga bɛɛ fɛ k’a deen lamɔ, k’a yira a la min ka ɲi ani min man ɲi ani k’a kalan a ka lannakow la.” U ko komi foyi tɛ yen min b’a yira ko Jehova Seerew ka lannakow be se ka kɛ farati ye deen ka kɛnɛyako ma, k’o kititigɛso dennin tun man kan ka basigi bamusoman ka diinankow kan k’a deen bɔsi a la. Kititigɛsoba k’olu ma foyi sɔrɔ Jehova Seerew ka lannakow la min be se ka deen hakili ɲagami wala k’a ka kɛnɛyako bila farati la.

29-31. Danemarki jamana na, mun na kititigɛso dɔ banna ka balimamuso dɔ denmuso marako kalifa a ma? Kititigɛsoba y’o koo ɲɛnabɔ cogo di?

²⁹ Danemarki. O koo ɲɔgɔn lo tun ye balimamuso Anita Hansen sɔrɔ. Saan 2000, kititigɛso dɔ tun ye a denmuso Amanda marako kalifa a ma. Nka, tuma min na deen ye saan 7 sɔrɔ, Anita cɛkɔrɔ ma sɔn, a tagar’a n’o koo ye kititigɛsoba la. Olu ye kititigɛso fɔlɔ ka desizɔn sɔsɔ ani ka Amanda marako kalifa a facɛ ma. Kititigɛlaw ko komi bangebagaw tɛ  ni miiriya kelen ye ɲɛnamaya koo la u ka diinankow kosɔn, facɛman lo ka ɲi k’o bɛnbaliyako ɲɛnabɔ. K’a fɔ k’a surunya, u ma sɔn ka Amanda marako kalifa a bamuso ma sabu a ye Jehova Seere ye!

³⁰ O wagati gwɛlɛn na, balimamuso Hansen jigi tun tigɛra fɔɔ a yɛrɛ tun m’a lɔn a be min fɔ Jehova ye a ka deliliw la. A y’a fɔ ko: “Ɔrɔmukaw 8:26, 27 ka kumaw ye n’ dusu saalo kosɔbɛ. N’ tun lanin b’a la ko Jehova be n’ kɔnɔko lɔn. A ɲɛɛ tun be n’ kan, ani a tun be ni n’ ye tuma bɛɛ.”—Zaburuw 32:8 ani Ezayi 41:10 kalan.

³¹ Balimamuso Hansen y’a ɲini Danemarki ka kititigɛsoba fɛ u ka segi k’o koo lajɛ. Olu ye desizɔn ta k’a fɔ ko: “Yɔrɔ min bena fisaya deen ma, kititigɛlaw ka ɲi ka basigi o lo kan ka sɔrɔ k’a latigɛ bangebaga min bena o deen tɔgɔla mara.” U y’a fɔ fana ko bangebaga kelen kelen bɛɛ be bɛnbaliyakow ɲɛnabɔ cogo min na, kititigɛlaw ka ɲi ka basigi o le kan sanni ka basigi “Jehova Seerew ka lannakow kan.” Kititigɛlaw sɔnna a ma ko balimamuso Hansen be se k’a denmuso lamɔ ka ɲɛ ani u ye Amanda segi a ma. O ye balimamuso dusu saalo yɛrɛ le!

32. Bangebaga minw ye Jehova Seerew ye, cogo juman na Erɔpu mara ka kititigɛsoba y’u tanga wolomani ma?

³² Erɔpu jamana caaman na. Kiti min be tigɛ denmisɛnw marako la, tuma dɔw la o kitiko tɛ dan jamanaw ka kititigɛsobaw la. O yɛrɛ be se ka taga Erɔpu ka kititigɛsoba la min be adamadenya joo lafasa. Misali la, kitiko fila dɔw la, Erɔpu ka kititigɛsoba ko jamana ka kititigɛsow ye wolomani lo kɛ. U ko bangebaga min ye Jehova Seere ye ani min tɛ Jehova Seere ye, kititigɛlaw m’u fila minɛ cogo kelen na. O wolomani kosɔn, Erɔpu ka kititigɛsoba y’a fɔ ko “ka basigi diinankow dɔrɔn kan walisa ka desizɔn ta kitiko la, o daganin tɛ fewu.” Balimamuso dɔ lafiyara tuma min na Erɔpu ka kititigɛsoba ye joo di a ma kitiko dɔ la. A y’a fɔ ko: “Tuma min na u bagara n’ ma ko n’ be koo jugu kɛra n’ deenw na, o digira n’ na kosɔbɛ. K’a sɔrɔ ne fɛ, k’u lamɔ kerecɛnya sira kan, o lo ka fisa u ma.”

33. Sariyakolo min be sɔrɔ Filipikaw 4:5 la, bangebagaw be se k’o sira tagama cogo di?

³³ Tuma dɔw la kititigɛlaw b’a fɔ ko joo tɛ an Jehova Seerew fɛ k’an deenw lamɔ ka kɛɲɛ ni Bibulu ka sariyakolow ye. O bɛɛ n’a ta, an be koow kɛ k’a dama kɛɲɛ (Filipikaw 4:5 kalan). A ka di an ye kosɔbɛ k’an deenw lamɔ Ala sira la. Ani fana, an sɔnnin b’a ma ko bangebaga min tɛ Jehova Seere ye, joo b’ale fana fɛ k’a niin don a deenw lamɔko la. Kunkanbaara min kalifara bangebagaw ma u k’u deenw lamɔ, Jehova Seerew b’o koo ta cogo di?

34. Yahutu minw tun be Neemi ka wagati la, u ka koo be se ka kerecɛn bangebagaw nafa cogo di?

³⁴ An ka kuma koo dɔ la min kɛra Neemi ka wagati la. Yahutuw tun ye baaraba lo kɛ ka se ka Zeruzalɛmu kogow lalaga ani k’u lɔ kokura. U tun b’a lɔn k’o tun bena olu n’u ka denbaya latanga u juguw ma. O lo kama Neemi y’u jija  ko: “Aw ka kɛlɛ kɛ aw badenw n’aw dencɛw n’aw denmusow, n’aw ka musow n’aw ka somɔgɔ tɔw kosɔn.” (Neemi 4:8). Yahutuw fɛ, kuun tun b’a la u k’u jija kosɔbɛ o kɛlɛ la. O cogo kelen na, bi bi nin na Jehova Seerew b’u jija yɛrɛ le ka se k’u deenw lamɔ tiɲɛn sira kan. Bangebagaw b’a lɔn ko u deenw ka lakɔli filankuru ani kiinmɔgɔw be se ka nɔɔ jugu to u kan. U b’a lɔn fana ko hali k’u deenw to soo, u be min filɛ telewisɔn na wala ɛntɛrɛnɛti kan, o be se ka nɔɔ jugu to u kan. Bangebagaw, aw kana ɲinɛ abada ko kuun b’a la aw k’aw jija kosɔbɛ k’aw dencɛw n’aw denmusow dɛmɛ u ka kɛ yɔrɔ latanganin na. O lo bena u dɛmɛ ka yiriwa Alako ta fan fɛ.

35, 36. Jehova Seerew ye bondori minw kɛ walisa ka joo sɔrɔ sariya sira fɛ, nafa juman lo sɔrɔla o la? Ele jijanin lo ka mun lo kɛ?

³⁵ An be bondori min kɛra ka se ka Jehova bato ɲɛsuma na, siga t’a la, a b’an dugara o kosɔn. O be sababu di an ma ka seereya barikaman kɛ kititigɛlaw ni mɔgɔw caaman ɲɛɛ kɔrɔ (Ɔrɔm. 1:8). An ye joo sɔrɔ kitiko minw na, o ye mɔgɔ caaman nafa, hali minw yɛrɛ tɛ Jehova Seerew ye. Nka, Ala sagokɛlaw ka laɲinita tɛ ka gofɛrɛnɛman ka sariyaw yɛlɛma. U t’a ɲinina fana ka joo sɔrɔ u yɛrɛ dɔrɔn nafa kosɔn. Nka an be bondori minw bɛɛ kɛra kititigɛsow la, u kuun ye ka joo sɔrɔ sariya sira fɛ ka batoli senuman sigi sen kan ani k’a yiriwa.—Filipikaw 1:7 kalan.

³⁶ Minw ye bondori kɛ walisa ka se ka Jehova bato ɲɛsuma na, an be kalan minw sɔrɔ u ka koo la, an k’o jati fɛɛn nafamanba ye! An k’an jija k’u ka limaniya ladegi an kɛtɔ ka la a la ko Jehova bena an dɛmɛ k’a ka baara kɛ ani ko a bena to ka fanga d’an ma an k’a sago kɛ.—Ezayi 54:17.