1, 2. (a) Otjikeṋa tji matji raisa kutja oove omuture wOuhona waMukuru? (b) Ongwaye Ovahongonone vaJehova povikando tjiva tjaave sokurwira ouyara wongamburiro yawo?

 OOVE omuture wOuhona wa Mukuru poo indee? Tji u ri Omuhongonone waJehova, okutja oove umwe wawo! Nu hapo otjiraisiro tjoye tjokutja oove omuture wOuhona waMukuru ootjiṋe? Kakauru kondjiukiro poo ozombapira zarwe zohoromende. Nungwari, otjiraisiro tji za komuano mbu u rikotamena ku Jehova Mukuru. Omerikotameneno wouatjiri ye kamburira mo ovingi kombanda yoviṋa mbi u kambura mo. Ye kamburira mo oviṋa mbi u tjita, tjimuna onḓuviro ndji u na yo komatwako wOuhona waMukuru. Omerikotameneno wetu ye ṱuna koviṋa avihe mehupo retu, tjimuna omuano mbu tu kurisa ovanatje vetu nomuano mbu tu toorera ko omikambo koviṋa tjiva mbi mavi tjama nouveruke wetu.

² Posi yokutja, kaaruhe ouye mu twa tura mbwi tji u yandja ondengero kousemba wetu otjovature vOuhona waMukuru poo ku imbi mbi undjirwa ku eṱe. Ozohoromende tjiva za kondja okutjaera omerikotameneno wetu poo nandarire okuyeyandeka oparukaze. Povikando tjiva ovakongorere vaKristus aave hepa okurwira ouyara wawo wokuṱakamisa omatwako wOmbara Messias. Ihi otjihimise kove po? Kako. Orondu ovakarere vaJehova motuveze twOmbeibela potuingi aave hepa okurwira ouyara wawo wokurikotamena ku Jehova.

3. Otjirwa tjiṋe otjiwaṋa tjaMukuru tji tja kara na tjo momayuva wOmbara Oserekaze Ester?

³ Okutara kotjihorera, momayuva wOmbara Oserekaze Ester, ovakarere vaMukuru aave sokukondja okuyama omiinyo vyawo. Omena ratjike? Omunane wokehi wena Haman wa raera Ombara yaPersia Ahasveros (wina ngwaa tjiukwa otja Kerkes) kutja Ovajuda avehe mba rimbara akuhe mouhona wayo ve zepewe mena rokutja owo ve ‘notuzo tu tu ha sanene na itwi twovandu avehe varwe.’ (Est. 3:8, 9, 13) Jehova wa imbirahi ovakarere ve poo indee? Kako, nungwari wa sera ondaya kozongondjero zaEster na Mordekai zokutjita omaningiriro kombara yaPersia kutja i yame ovakarere vaMukuru.—Est. 9:20-22.

4. Mekondwa ndi mari kongorere ko matu kahungira ohunga na iye?

⁴ Kundino oviṋa vi ri vi? Otja tji twa muna mekondwa nda zu ko, ovanane mouye povikando tjiva aave pirukire Ovahongonone vaJehova. Mekondwa ndi, matu katara komiano tjiva ozohoromende nḓo mu za kondjisa okutjaera omerikotameneno wetu. Matu yandja ombango tjinene koviṋa vitatu mbi: (1) ousemba wetu wokurira otjira tji tja zikama nokurikotamena momuano mbu matu  vanga, (2) ouyara wokutoorora omuano womapangero mbu ri mombwaneno nomirari vyOmbeibela, (3) nousemba wovanene okukurisa ovanatje vawo otja komirari vyaJehova. Morupa aruhe, matu kamuna omuano ovature ovaṱakame vOuhona waMukuru mbu honaparerwa i Messias mu va kondja okutjevera ousemba wawo otjovature nomuano ozongondjero zawo mu za serwa ondaya.

5. Okuyakurwa kotjiveta ku vatera vi Ovakriste vatjiri?

⁵ Nu hapo tu hepa ousemba okuza kozohoromende zovandu kutja tu yenene okurikotamena ku Jehova? Kako, posi yokutja okuyakurwa i ozohoromende ku tupa oupupu wokukara norupa momerikotameneno wetu. Okutara kotjihorera, ku tu vatera kutja tu yenene okuworonganena pamwe mOmatuwo wetu oveni wOmerikotameneno nOmatuwo wOmaworonganeno omanene, okupirinda nokuhitisa omambo wetu nga zikamena kOmbeibela mehi nokutja tu yenene okuzuvarisira ovandu ombuze ombwa noupaturuke, nokuhina ngu me tu tjaere. Momahi omengi, Ovahongonone vaJehova ve ritjangisa kotjiveta nu ve nouyara wokurikotamena ku Mukuru tjimuna ozongamburiro zarwe nḓa yakurwa kotjiveta. Nu hapo pa tjitwa tjike indu ozohoromende tjaaze ha vanga okutuyakura kotjiveta poo tji za kondjisa okutjaera oviungura vyetu?

6. Ovahongonone vaJehova moAustralia va munine ouzeu waye momautiro wozombura nḓa 1940?

⁶ OAustralia. Momautiro wozombura nḓa 1940, omukuramene po wokombanda wohoromende yaAustralia aa munu kutja ongamburiro yetu “i pirukira” ozongondjero zovita. Okuzambo oviungura vyetu vya tjaerwa. Ovahongonone kaave yenene okuworongana pamwe rukwao poo okuzuvarisa noupaturuke, oviungura poBetel vya yandisiwa nave yekwa Omatuwo wawo wOmerikotameneno. Nandarire kaave yandjerwa okukara nomambo nga zikamena kOmbeibela. Kombunda yokuungura oviungura mbi mongumumu oure wozombura zorive, Ovahongonone moAustralia korusenina va muna onguturiro komauzeu wawo. Tji ya ri 14 ku Ngarano 1943, Otjombanguriro tjaAustralia tjOkombanda tja yandjera Ovahongonone okuungura oviungura vyawo rukwao.

7, 8. Kahurura ohunga notjirwa ovakambure ovakwetu moRussia tji va kara na tjo tjokuvanga ouyara womerikotameneno oure wozombura ozengi.

⁷ ORussia. Oure wozombura ozengi oviungura vyOvahongonone vaJehova vya tjaererwe, nungwari korusenina mombura ndji 1991, vya yandjerwa rukwao. Omahi ngaaye wire kehi yoSoviet Union tji ya za nokuhaṋika, eṱe twa pewa ouyara wokotjiveta moRussia mombura ndji 1992. Posi yokutja, tjimanga ovapirure tjiva, tjinenenene ouṋepo wOzokereka zaRussia zoOrthodox aave tirisiwa i omuano mbwaatu kurire ko motjivaro. Pokati kombura ndji 1995 na 1998, ovapirukire va kuminina Ovahongonone vaJehova ohunga noviṋa 5 pekepeke. Nungwari otjikando atjihe, ohahende kaai munu otjiraisiro otjikahu tjokutja owo ve nondjo. Ovapirukire mbe rimanenene okuteya oviungura vyOvahongonone okuzambo va twara otjiposa kohoromende mombura ndji 1998. Ovahongonone pomautiro va toṋa, nungwari kombunda ovapirukire va nakaura ondyero ndja tjitwa nu Ovahongonone va pandjara momaningiriro wawo ngu va tjita mu Kambundu 2001. Otjiposa 2 tja uta mu Seninaṋi wombura ndjo, nu kwa kongorera ondyero yarwe mombura ndji 2004 ndja tjaera kutja Ovahongonone vaJehova moMoscow ave ha yakurwa kotjiveta nokutjaera oviungura vyawo.

 ⁸ Kwa kongorera ondatumisire onene. (Lesa 2 Timoteus 3:12.) Ovahongonone va tatumisiwa nokutonwa. Va yekwa omambo wawo, nu kaave yandjerwa okuyazema poo okutunga ozondjuwo zomerikotameneno. Ripura uriri kutja ovakambure ovakwetu va ṱuninwe vi i omapirukiro ngo! Ovahongonone va tjita omaningiriro kOtjombanguriro tjaEuropa tjOusemba wOvandu mombura ndji 2001, nu va yandja ondjivisiro yokomurungu kOtjombanguriro ho mombura ndji 2004. Mombura ndji 2010, Otjombanguriro tjaEuropa tjOusemba wOvandu tja tjita ondyero yatjo. Otjombanguriro tja muna kutja oviungura vyOvahongonone vaJehova vya tjaerwa mena rokutja ohoromende kaai vanga ozongamburiro. Otjombanguriro wina tja tya kutja kape nepu esemba rokukayendisa ondando yotjombanguriro tjokehi komurungu mena rokutja kapa ri oviraisiro vyokutja Ovahongonone vaJehova ve notjiṋa tji va zunḓa. Otjombanguriro komurungu tja muna kutja omatjaerero ngo ya ri kutja Ovahongonone vaJehova ve pandjare ousemba wawo wokotjiveta. Ondando yOtjombanguriro ya tjita kutja Ovahongonone vaJehova ve kare nousemba wokukara nongamburiro yawo oveni. Nandarire kutja otupa tjiva twohoromende yaRussia katu ṱakamisire ondyero yOtjombanguriro tjaEuropa tjOusemba wOvandu, ovakarere vaMukuru mehi ndo va yanḓiparisiwa i ondoṋeno ndji va muna.

9-11. Ovakarere vaJehova moGreece va kondjera vi ouyara wokurikotamenena pamwe nu kwa kongorera tjike?

⁹ OGreece. Mombura ndji 1983, Mbuti Titos Manoussakis wa yazema etuwo moHeraklion tjaCrete, kutja okambumba okaṱiṱi kOvahongonone vaJehova ke rikotamenene mo ku Jehova. (Hebr. 10:24, 25) Posi yokutja tjimanga, omuhonge wokereka yOrthodox wa kaunauna kohoromende kutja Ovahongonone vaJehova kave sokuungurisa etuwo ndo. Omena ratjike? Omena rokutja ongamburiro yOvahongonone ya haṋika ku indji oyOkereka yOrthodox! Ohoromende ya uta okutoorera ko omikambo kotjiṋa hi nave kuminine Ovahongonone kutja va teya oveta. Owo va pewa omberero nave tuwa mondeko oure womieze 2. Otjovature ovaṱakame vyOuhona waMukuru, Ovahongonone va muna ondyero yotjombanguriro ndjo otjomatombero wousemba wawo womerikotameneno, okutja owo va twara otjiposa tjawo kovyombanguriro vyehi ndo nu korusenina ave tji twara kOtjombanguriro tjaEuropa tjOusemba wOvandu.

¹⁰ Korusenina, mombura ndji 1996, Otjombanguriro tjaEuropa tjOusemba wOvandu tja tjita ondyero ndji hina ya undjirwa ko i ovapirukire vongamburiro youatjiri. Otjombanguriro tja raisa kutja “Ovahongonone vaJehova ‘ongamburiro ndji tjiukwa nawa’ otja koveta yehi raGreece” nokutja ondyero yotjombanguriro tjokehi ya “ṱuna kousemba wovandu wokukara nouyara womerikotameneno kourike wawo.” Otjombanguriro komurungu tja tja ohoromende yaGreece kai nousemba “wokutya kutja ozongamburiro zovandu poo omuano ongamburiro mu mai raisiwa omusemba poo indee.” Oviṋa Ovahongonone mbi va kumininwa vya isakewa nu ouyara wawo wokurikotamena au yakurwa rukwao!

¹¹ Ondoṋeno ndjo ya ṱuna ozongaro moGreece poo indee? Ouhumandu, kai tjitire nao. Mombura ndji 2012, otjiposa tji tja ri  tjimuna otjikwao hi tja zengururwa motjihuro tjaKassandreia, moGreece, kombunda yozombura ape 12 zokurwisa otjiposa ho. Motjiposa hi, omapirukiro omanene aaye zu komuhonge omunene wokereka yOrthodox. Otjombanguriro otjinene moGreece tja toorora omunda wovakarere vaMukuru. Ondyero ndji ya raisa oveta yaGreece ndji tja omundu auhe u nouyara wokukara nongamburiro ye omuini nu ai nakaura omakuminino nge kara po aruhe kutja ongamburiro yOvahongonone vaJehova kai tjiukwa. Otjombanguriro tja tja: “Omahongero ‘wOvahongonone vaJehova’ ye tjiukwa nawa, nu ihi matji raisa kutja indji ongamburiro ndji tjiukwa nawa.” Ouṋepo wombongo onḓiṱi moKassandreia u nondjoroka kutja nambano u yenena okukara nozombongarero zombongo mEtuwo rawo oveni rOmerikotameneno.

12, 13. Ovapirure moFrance va kondjisa vi ‘okurundurura ouhasemba u rire ousemba,’ nu kwa kongorera ko tjike?

¹² OFrance. Ovapirukire vovakarere vaMukuru va rora ‘okurundurura ouhasemba u rire ousemba.’ (Lesa Epsalme 94:20.) Okutara kotjihorera, mokati kozombura nḓa 1990, ovahonapare votjitjamurongo tjohoromende yaFrance va uta okutara omambo wongorongova yorupa ndwi Association Les Témoins de Jéhovah (ATJ), orwo ndwa ri orupa rwOvahongonone vaJehova ndu ungura noviṋa vyoveta moFrance. Oministera yotjimariva otjiungurisiwa ya hungira ouatjiri kutja omena ratjike tji mave tara komambo wongorongova yOvahongonone vaJehova, nai tja: “Omatarero nga mape ya aye tjiti kutja oviungura vyOvahongonone vi tjaerwe poo pe kare oviṋa mbi mavi raisa kutja va teya oveta . . . , mbi mape ya avi ngundiparisa oviungura vyOvahongonone vaJehova poo avi tjiti kutja ve ise okuungura oviungura vyawo momaturiro wetu.” Nandirire kutja ovahonapare votjitjamurongo kave munine otjipo momambo wOvahongonone, owo va tjita kutja Ovahongonone ve ute okusuta otjitjamurongo otjingi tjinene. Andakuzu va toṋa, otjiṋa hi atja tji tjita kutja ovakambure ovakwetu ave ha kara nomuano warwe pendje nokupata orutavi rwomberoo nokurandisa otuveze twawo twi kutja ve sute otjitjamurongo tjohoromende. Otjiṋa hi tja ri otjizeu, posi yokutja ovakarere vaMukuru kavena pu va yumba ohama. Ovahongonone va rwisa otjiṋa hi nouvanḓe nu korusenina va hinda otjiposa tjawo hi kOtjombanguriro tjaEuropa tjOusemba wOvandu mombura ndji 2005.

¹³ Otjombanguriro tja tjita ondyero yatjo tji ya ri 30 ku Ngarano 2011. Otjo tja raisa kutja ouyara wokukara nongamburiro yoye omuini u sokutjita kutja ohoromende ai ha hiti moviṋa vyongamburiro okutara kutja oviṋa mbi ve kambura mo ovisemba poo omuano ongamburiro ndjo mu i raisiwa omusemba, pendje na indu tje ri otjiposa otjikendise. Otjombanguriro komurungu tja tja: “Omasutiro wotjitjamurongo . . . ya tjita kutja Ovahongonone vaJehova ve pandjere oviungurisiwa vyawo ovisemba, nu kombunda aye tjiti kutja ovandu ave he rikotamene momiano mu mave sokutjita nao.” Otjombanguriro atjihe tja toorora omunda wOvahongonone vaJehova! Ovakarere vaMukuru va yoroka tjinene indu ohoromende yaFrance tji ya kotora ovimariva vyawo mbyaave sutu otjotjitjamurongo ku novihohe nu otja komarakiza wOtjombanguriro ave isako otjisuta tji va twire korutavi rwomberoo.

14. Mo yenene vi okukara norupa mokurwira ouyara womerikotameneno?

 ¹⁴ Otja ovakarere vaMukuru varukuru ooEster na Mordekai, ovakarere vaMukuru ndino wina ve rwira ousemba wawo wokurikotamena ku Jehova momuano Eye ma rakiza. (Ester 4:13-16) Ove mo yenene okukara norupa motjiṋa hi? Ii, mo yenene. Mo yenene okukumbira ovakambure ovakweṋu mbe muna ouzeu mena rouhasemba wovanauvara. Ozongumbiro otja inḓo mape ya aze vatere ovakambure ovakwetu mbe ri kehi youzeu nondatumisire. (Lesa Jakobus 5:16.) Jehova u toorera ko omikambo kozongumbiro nḓo poo indee? Ondoṋeno ndji twa kara na yo movyombanguriro i raisa kutja u tjita nao!—Hebr. 13:18, 19.

15. Omapu yeṋe ovakarere vaMukuru ngu ve yandja ko ombango ohunga nomaungurisiro wombinḓu?

¹⁵ Otja tji twa muna mEkondwa 11, ovature vOuhona va pewa omarakiza omakahu kutja ve nakaure omaungurisiro omavi wombinḓu nge ungurisiwa tjinene ndino. (Gen. 9:5, 6; Lev. 17:11; Lesa Oviungura 15:28, 29.) Nandarire kutja katu yakura omapakerero wombinḓu, eṱe tu vanga omapangero omasembasemba ku eṱe oveni na imba mbu twa suvera, pendje na indu omapangero ngo tji maye vetasana oviuru nomatwako waMukuru. Ovyombanguriro vyokombanda vyomahi omengi vya muna kutja ovandu ve nousemba wokuritoororera oveni kutja omapangero yeṋe ngu mave vanga otja omeritjiviro wawo womomutima nongamburiro yawo pu mai ve yandjere. Nungwari momahi omengi, ovakarere vaMukuru va muna omauzeu omengi ohunga notjiṋa hi. Ngatu tare ku tjiva wawo.

16, 17. Omukazendu omukambure umwe moJapan wa muna omapangero waye nge mu urumisa tjinene nu ozongumbiro ze za zuvirwa momuano uṋe?

¹⁶ OJapan. Misae Takeda, omukazendu wozombura 63 moJapan, aa hepa okutaurwa. Mena rokutja eye omuture omuṱakame wOuhona waMukuru, eye wa raera onganga ye oukahu kutja aa vanga okupangwa nokuhina omaungurisiro wombinḓu. Posi yokutja, omieze omingi kombunda yanao, eye wa uruma tjinene indu tja zuva kutja wa pakerwa ombinḓu indu tja taurwa. Mena rokutja aa munu kutja wa zunḓwa nokutja wa tjitwa ovineya, Sisi Takeda wa tjita otjiposa kotjombanguriro ohunga nozonganga nonasareta ndjo mu Ngarano 1993. Omukazendu womutima omuwa ngwi nu weraka etarazu wa ri nongamburiro ndji ha teratera. Eye wa yandja omahongononeno komurungu wotjombanguriro tji tja ri atje ura ovandu nu wa kurama poruveze pu pe pangurirwa ovandu oure wokombanda yoiri nandarire kutja wa ri a ngundipara. Omueze umwe komurungu wonḓiro ye, eye wa ya kotjombanguriro rukwao otjikando otjisenina. Hapo ouvanḓe nongamburiro ye mavi tu tjatere poo indee? Sisi Takeda wa tja eye we riyarikaṋa ku Jehova kutja me mu sere ondaya motjirwa tje ho. Eye wa ri nongamburiro kutja ozongumbiro ze maze zuvirwa. Nu hapo za zuvirwa poo indee?

¹⁷ Ozombura 3 kombunda yonḓiro yaSisi Takeda, Otjomburiro tjaJapan tjOkombanda tja toorora omunda we, na tji tja ya ri ouposyo okupakerwa ombinḓu ngunda e hi nokuvanga. Ondyero ndja tjitwa tji ya ri 29 ku Tengarindi 2000, ya raisa kutja mozongaro otja inḓo “omundu auhe u nousemba wokutoorora omuini” mbi ma zeri nu omukambo auhe mbwa toora “u sokupewa ondengero.” Okuhepa konḓero yaSisi Takeda yokurwira ouyara we  wokuritoororera omuini omapangero ngu maye hitasana nomeritjiviro we womomutima nge hongorerwa i Ombeibela, orondu nai Ovahongonone moJapan ve muna omapangero nokuhina okutira kutja mape ya ave pakerwa ombinḓu kotjomasa.

18-20. (a) Otjombanguriro tji tji yakura omaningira moArgentina tja raisa vi kutja omundu auhe u nousemba wokupanḓa okuyakura omapakerero wombinḓu nge tjivisiwa okupitira mombapira yomapangero? (b) Ohunga nomaungurisiro omavi wombinḓu, matu yenene vi okuraisa kutja tu riwisa kehi youvara waKristus?

¹⁸ OArgentina. Ovature vOuhona mba vere ngandu tji ve ri mongaro yokuhina okuyenena okurihungirira po oveni, mave sokurirongerisa vi komapangero? Matu yenene okukara nombapira yokotjiveta ndji mai tu hungirire po, tjimuna Pablo Albarracini tja tjita. Mu Kambundu 2012, eye wa hara okuyekwa oviṋa vye kotjomasa nu a yahwa povikando ovingi. Eye wa twarewa konamiti e ri mepoṱu nu kaa yenene okukahurura ongurameno ye ohunga nomapakerero wombinḓu. Posi yokutja eye wa ri nombapira yomapangero ndja twa ko omunwe kembo ozombura zokombanda ya 4 komurungu wanao. Nandarire kutja eye wa ri mongaro ongendise, nu ozonganga tjiva aaze munu kutja ma hepa okupakerwa ombinḓu kutja ma hupe, ozonganga za raisa ondengero kozonḓero ze. Posi yokutja ihe yaPablo ngu ha ri Omuhongonone waJehova wa kapaha ombapira kotjombanguriro yokurundurura ozonḓero zomuatje we.

¹⁹ Ohahende ndjaai kuramene po omukazendu waPablo ya tjita omaningiriro kotjombanguriro tjimanga. Moure wozoiri ozonḓiṱi uriri, otjombanguriro tji tji yakura omaningira tja nakaura ondyero yotjombanguriro tjokehi na tji raisa kutja onḓero yomuvere, tjimuna tji ya raisiwa mombapira yomapangero, i sokupewa ondengero. Ihe yaPablo wa tjita omaningiriro kOtjombanguriro tjaArgentina tjOkombanda. Posi yokutja, Otjombanguriro tjOkombanda katji na pu tja muna “epu rokutja [ombapira yaPablo yomapangero ndji mai raisa onḓero ye yokuhina okuvanga okupakerwa ombinḓu] ya tjangwa nokuhina ounongo, poo ousemba wokutjita nao.” Otjombanguriro tja tja: “Omundu auhe omunene ma yenene okuyandja omirari ohunga nouveruke we omuini nu ma yenene okuyakura poo okunakaura omiano tjiva vyomapangero . . . Ozombapira zokotjiveta nḓa ze sokuyakurwa i ozonganga.”

²⁰ Mbuti Albarracini wa veruka. Eye nomukazendu we ve nondangi kutja eye wa tjanga ombapira yomapangero ndji. Mokutoora omukambo omuṱiṱi mbo posi yokutja mbu ri omunanḓengu, eye wa raisa kutja u riwisa kehi youhonapare waKristus okupitira mOuhona waMukuru. Ove neṱunḓu roye mwa toora omikambo otjingevyo poo indee?

21-24. (a) Peya vi Otjombanguriro tjaKanada tjOkombanda tji toore ondyero ohimise ohunga novanatje vokehi yozombura nomaungurisiro wombinḓu? (b) Otjiposa hi matji yenene vi okutunduuza omitanda vyOvahongonone vaJehova?

²¹ OKanada. Potuingi, ovyombanguriro vi yandjera kutja ovanene ve tye kutja omuano uṋe womapangero mbu ri omusembasemba kovanatje vawo. Povikando tjiva, ovyombanguriro nandarire vya tya kutja omuatje u sokupewa ondengero ndje mu pwire indu tji ma sokutoorora omiano vyomapangero mbi ri omisemba ku ye. April Cadoreth wa ri mongaro otjingeyo. Indu tja ri nozombura 14, April wa paterwa monasareta, orondu aa ziza ombinḓu tjinene okuza moukoto. Omieze omiṱiṱi komurungu wanao, eye wa tjanga okakarata nga Advance Medical Directive ku ke nomirari vyokutja ka sokupakerwa ombinḓu nandarire kutja tjiri u ri mongaro ongendise. Onganga ndjaai mu panga kai yandjere ombakatwi konḓero yaApril ndji, nai tjiti omaningiriro kotjombanguriro kutja April ma pakerwe  ombinḓu. Indu omaningiriro wonganga tji ya yakurwa, April wa pakerwa ombinḓu kotjomasa. April kombunda wa tja, ondjito ndjo ya sana norutjero.

²² April novanene ve va paha ombatero yotjombanguriro. Kombunda yozombura 2, otjiposa tjawo otji tja zuvakwa i Otjombanguriro tjaKanada tjOkombanda. Nandarire kutja April wa pandjara otjiposa tje kotjiveta, Otjombanguriro tje mu suta natji toorora omunda we novanatje avehe mbu mave vanga okuritoororera oveni kutja omiano viṋe vyomapangero mbi mave vanga. Otjombanguriro tja tja: “Ohunga nomapangero, ovanatje mbe ri kehi yozombura 16 ve sokupewa ouyara wokutoorora omuano womapangero mbu mave munu kutja omusemba, nu ondando omuatje ndja tjiti ondji mai raisa kutja omuatje we kura pu pe ṱa pi.”

²³ Otjiposa hi otjinanḓengu mena rokutja Otjombanguriro tjOkombanda tja tara kousemba wovanatje avehe mbe ri kehi yozombura posi yokutja mbe kura mourizemburuka. Komurungu wondyero ndji, otjombanguriro atjihe moKanada aatji yenene okutya kutja omapangero yeṋe omuatje wokehi yozombura 16 ngu ma sokupewa ndovazu otjo matji munu kutja omapangero ngo ya pwire omuatje. Posi yokutja, kombunda yondyero ndji, otjombanguriro  katja ri nousemba wokutyera po kutja omapangero yeṋe omuatje wokehi yozombura 16 ngu ma sokupewa nokuhina okumupa oruveze rwokuriraisa kutja u nozondunge nḓa yenene okutoora ondando ye omuini poo indee.

²⁴ Okurwisa otjiposa hi oure wozombura 3 ku nouwa mbu kwa eta poo indee? Otja ku April, “Ii, kwa eta ouwa!” April nai omukandjira omukarerere nu u nouveruke ouwa, nu eye wa tja: “Okutjiwa kutja mba ri nokarupa okaṱiṱi mokuhivirika ena raMukuru nokuraisa kutja Satan omunavizeze, tjiri ku ndji pa enyando.” Otjihorera tjaApril matji raisa kutja ovanatje mave yenene okupanḓera pongamburiro yawo nouvanḓe nokuraisa oveni kutja owo wina ovature vOuhona waMukuru.—Mat. 21:16.

25, 26. Ongaro iṋe ndji kara po povikando tjiva indu ovanene tji va teya orukupo?

²⁵ Jehova wa yandja omerizirira wokukurisa ovanatje otja komirari vye kovanene vawo. (Deut. 6:6-8; Ef. 6:4) Ihi otjiungura otjizeu, posi yokutja mape ya atji ririre ko otjizeu indu ovanene tji va teya orukupo. Ovanene ve kara noumune mbwa panguka ohunga nokutja ovanatje ve sokukurisiwa vi. Okutara kotjihorera, omunene umwe tje ri Omuhongonone waJehova, mape ya a kara noumune wokutja omuatje u sokukurisirwa momirari vyaJehova ngunda omunene ngu he ri Omuhongonone e hi noumune otjingewo. Otjiperi kutja omunene ingwi ngu ri Omuhongonone ma sokumuna kutja oupanga worukupo ombwa teka, nungwari kawombwi owomuatje ku nomunene we.

²⁶ Omunene ngu he ri Omuhongonone waJehova mape ya a ningire otjombanguriro kutja eye arire ngwa pewa ousemba wokuṱiza omuatje poo ovanatje nu momuano mbwo ma yenene okutjiwa kutja ovikeṋa omuatje mbi ma hongwa. Ovandu tjiva ve muna kutja okukurisiwa otjOmuhongonone waJehova otjiṋa otjivi. Owo mape ya ave pirukire epu rokutja ovanatje kave nokukara nomikandi vyongwatero poo omikandi vyarwe vyomayuva womasuviro, nu moruveze rwouvere omuatje ke nokupakerwa ombinḓu ndji mai yenene “okuyama omuinyo” we. Otjiṋa otjiwa otjohi tjokutja, moruveze rwokutara kutja omunene uṋe ngu nongamburiro osemba, ovyombanguriro ovingi vi tara kokutja ovikeṋa mbi ri ovisemba komuatje. Ngatu tare kovihorera tjiva.

27, 28. Otjombanguriro tjaOhio tjOkombanda tja toorera ko omikambo viṋe komakumininino wokutja okukurisiwa i Ovahongonone vaJehova otjiṋa otjivi komuatje?

²⁷ Omahi Omakutasane waAmerika. Mombura ndji 1992, Otjombanguriro tjOkombanda tjaOhio tja tara kotjiposa tjomurumendu ngu ha ri Omuhongonone waJehova ngwa tja, okukurisa omuatje we omuzandu otjOmuhongonone waJehova ma rire otjiṋa otjivi. Otjombanguriro tjokehi tja itavera kotjiṋa hi natji yandja ousemba wokukurisa omuatje ku ihe. Ina, wena Jennifer Pater, wa perwe ousemba wokukaryangera omuatje we posi yokutja wa raerwa kutja ka “sokuhonga omuatje ohunga nongamburiro yOvahongonone vaJehova momuano ngamwa auhe.” Ondyero yotjombanguriro tjokehi ndji aai hee kutja Sisi Pater kaa sokuhungira ku nomuatje we wena Bobby ohunga nOmbeibela poo omirari vyayo ohunga nongaro yomeritjindiro! Ripura uriri kutja otjiṋa hi tje mu ṱuna vi. Jennifer wa hihamwa omutima tjinene posi yokutja eye wa tja we rihonga okukara nomuretima nokuundja kutja Jehova ma toore omikambo.  Eye wa tja u zemburuka kutja, “Jehova aruhe ee mu vatere.” Ohahende ye norupa ndu u ungura noviṋa vyoveta pObetel va tjita omaningiriro kOtjombanguriro tjaOhio tjOkombanda.

²⁸ Otjombanguriro tja nakaura ondyero yotjombanguriro tjokehi na tji raisa kutja “ovanene ve nousemba wokuhonga ovanatje vawo, nu okutjita nao maku kamburire mo okuhonga ovanatje vawo ohunga nomirari nongamburiro yawo.” Otjombanguriro tja raisa kutja ndovazu kape notjiraisiro otjikahu kutja omahongero wOvahongonone vaJehova mape ya aye hihamisa omuatje momuano kaaṋi, okutja otjombanguriro katji nousemba wokutjaera omunene okukurisa omuatje we mena rongamburiro ye. Otjombanguriro katjina pu tja muna otjiraisiro tjokutja omahongero wOvahongonone vaJehova mape ya aye ṱunu kouveruke womuatje momuano omuvi.

29-31. Ongwaye omukazendu omukambure moDenmark tja pandjara ousemba wokukurisa omuatje we omukazona, nu Otjombanguriro tjaDenmark tjOkombanda tja tjita ondyero iṋe ohunga notjiṋa hi?

²⁹ ODenmark. Anita Hansen wa ri mongaro otjingeyo ndjo indu omurumendu ngu va haṋika tja tjita omaningiriro kotjombanguriro kutja ma pewe ousemba wokukurisa okanatje kawo kozombura 7 kena Amanda. Nandarire kutja otjombanguriro tjorukondwa tja yandja ousemba wokukurisa omuatje ku Sisi Hansen mombura ndji 2000, ihe yaAmanda wa tjita omaningiriro kotjombanguriro tjokombanda tji tja nakaura ondyero yotjombanguriro tjorukondwa na tji yandja ousemba wokukurisa omuatje ku ihe. Otjombanguriro tjokombanda aatji munu kutja mena rokutja ovanene va ri noumune mbwa panguka ohunga nehupo mena rozongamburiro zawo nḓa haṋika, okutja ihe ongu ma yenene okuzengurura  ouzeu mbwo nawa. Kunao, Sisi Hansen wa pandjara ousemba wokukurisa Amanda mena rokutja wa ri Omuhongonone waJehova!

³⁰ Moruveze oruzeu ndwi, Sisi Hansen povikando tjiva wa kurungisirwe tjinene ngandu tjaa ha tjiwa kutja nga kumbire tjike. Eye wa tja: “Posi yokutja, omambo nge ri mOvaroma 8:26 no 27 ye ndji yanḓiparisa tjinene. Ami ee munu kutja Jehova aruhe aa zuu kutja me vanga okutja vi. Eye aruhe ee ndji tarere nu ee ndji vatere.”—Lesa Epsalme 32:8; Jesaja 41:10.

³¹ Sisi Hansen wa tjita omaningiriro kOtjombanguriro tjaDenmark tjOkombanda. Mondyero yatjo, Otjombanguriro tja tja: “Ousemba wokutja omuatje u sokukurisiwa i uṋe, mau yandjwa indu tji pa kara otjiraisiro otjikahu kutja ovikeṋa mbi ri ovisemba komuatje.” Otjombanguriro komurungu tja tja: Ondyero yokutja omuatje u sokukurisiwa i uṋe i sokuzikamena kokutja omomuano uṋe omunene auhe me zengurura oviposa, nungwari katji sokuzikamena “komahongero nongurameno” yOvahongonone vaJehova. Sisi Hansen wa ri nondjoroka tjinene indu Otjombanguriro tji tja muna kutja eye omunene omusemba na tji mu pe ousemba wokukurisa Amanda rukwao.

32. Otjombanguriro tjaEuropa tjOusemba wOvandu tja tjevera vi ovanene vOvahongonone vaJehova kondoorora?

³² Omahi pekepeke moEuropa. Povikando tjiva, oviposa ohunga nokutja ngu ma sokupewa ousemba wokukurisa ovanatje vya twarewa kovyombanguriro vyokombandambanda momahi tjiva. Otjombanguriro tjaEuropa tjOusemba wOvandu wina tja tara koviposa mbi. Moviposa 2, Otjombanguriro tjaEuropa tjOusemba wOvandu tja raisa kutja ovyombanguriro vyokehi na imbi ovyomahi pekepeke vya tjinda Ovahongonone vaJehova na imba mbe he ri Ovahongonone vaJehova nondoorora mena rongamburiro yawo. Otjombanguriro tja raisa kutja okutjita nao okuraisa ombangu nu tja tya kutja “okutoora omukambo otja imbwo mena rongamburiro ndja panguka uriri katjiṋa otjiyakurwa.” Omukazendu omukwate umwe ngwa ri Omuhongonone waJehova wa vaterwa i ondyero yOtjombanguriro tjaEuropa tjOusemba wOvandu, nu mokuraisa ondangi ye eye wa tja: “Okukumininwa kutja mbi hihamisa ovanatje vandje otjiṋa otjihihamise tjinene, ngunda otjiṋa tjee kondjo okutjita atja ri okuvepa imbi mbyee nangarasi ombi ri ovisembasemba ku wo mokuvekurisa otjOvakriste.”

33. Ovanene vOvahongonone vaJehova mave yenene vi okuṱakamisa omurari mbu ri metjangwa rOvafilipi 4:5?

³³ Otjiperi kutja, ovanene mbe ri Ovahongonone nu mbe muna ouzeu koveta mena rokuvanga okukurisa ovanatje vawo otja komirari vyOmbeibela, ve kondja okuraisa ombepo ombwa. (Lesa Ovafilipi 4:5.) Otja tji ve kara nondangi kutja ve nousemba wokukurisira ovanatje vawo momirari vyaMukuru, owo wina ve muna kutja omunene ngu he ri Omuhongonone ma sokukara norupa mokukurisa omuatje, ndovazu ma vanga nao. Ovanene mbe ri Ovahongonone vaJehova ve vara omerizirira wawo wokukurisa omuatje otjotjiṋa otjinanḓengu pu pe ṱeki pi?

34. Ovanene mbe ri Ovakriste ndino mave yenene vi okurihongera kotjihorera tjOvajuda vomayuva waNehemia?

³⁴ Otjihorera tjoviṋa mbya tjitwa momayuva waNehemia, matji tu hongo ovingi. Ovajuda va ungura oukukutu okuṱuna nokutungurura omakuma waJerusalem. Owo aave tjiwa kutja tji va tjiti nao maye ve yama nokutjevera omaṱunḓu wawo koviwaṋa ovinavita na wo mbi ri ongondoroka na wo. Kunao Nehemia we ve raera kutja,  “Rwireye ovakweṋu novanatje novakazendu veṋu, nozonganda zeṋu.” (Neh. 4:14) Otjirwa ho tja ri otjinanḓengu tjinene kOvajuda mbwo. Kundino wina, ovanene mbe ri Ovahongonone vaJehova ve tjita ozongondjero zokukurisira ovanatje vawo mondjira youatjiri. Owo ve tjiwa kutja ovanatje vawo ve rihonga oviṋa ovivi kovakwao koskole na momaturiro wawo. Ozongaro ozombi otja inḓo wina ze yenena okuṱuna kovanatje okupitira motivii, moradio, mozongoramambo na momambo warwe. Vanene, amu zembi kutja otjiṋa otjinanḓengu tjinene okurwira ovanatje veṋu kutja ve yenene okukara noruveze oruwa rwondjeverero mu mave yenene okukurisa oupanga wawo kuna Jehova.

35, 36. Ouwa waye mbwe ya kOvahongonone vaJehova mena rokutja twa rwira ousemba wetu wokotjiveta, nu ove we rimanene okutjita tjike?

³⁵ Jehova tjiri wa sera ondaya kozongondjero zovakarere ve ndino kutja ve rwire ousemba wawo womerikotameneno. Mozongondjero zokurwira ousemba wawo, ovakarere vaMukuru potuingi va yenena okuyandja omahongononeno motjombanguriro na kovandu momaturiro wawo. (Rom. 1:8) Otjiṋa tjarwe otjiwa tji tja za mondoṋeno yawo onene ndji va muna, otjohi tjokutja owo va vatera ovandu ovengi mbe he ri Ovahongonone kutja wina ve ungurise ousemba wawo otjovature. Nungwari otjovakarere vaMukuru, katu vanga okurundurura oveta yehi nu katu vanga okurisora oveni. Nu kombanda yaavihe, Ovahongonone vaJehova va karwira ousemba wawo movyombanguriro mozongondjero zokuvanga okuzikamisa nokukayendisa omerikotameneno omakohoke komurungu.—Lesa Ovafilipi 1:7.

³⁶ Matu zeri kutja mamu rihongere ovingi kongamburiro ya imba mba rwira ouyara wokurikotamena ku Jehova! Eṱe wina ngatu rire ovaṱakame, nu tu kare nongamburiro kutja Jehova me tu vatere momerikotameneno wetu ku ye nu ma kayenda komurungu okutuyanḓiparisa kutja tu tjite ombango ye.—Jes. 54:17.