1, 2. a) Ntshijadiki kayi tshidi tshileja ne: udi muena dia Bukalenge bua Nzambi? b) Bua tshinyi Bantemu ba Yehowa bavua imue misangu baluangane bua budikadidi bua ntendelelu?

 UDIKU muena dia Bukalenge bua Nzambi anyi? Bidi nanku, bualu udi Ntemu wa Yehowa. Ntshinyi tshidi tshijadika bualu ebu? Ki mmukanda wa njila peshi mikanda mikuabu ya kudi mbulamatadi to. Kadi, tshijadiki tshidi tshimuenekela mu mushindu uudi utendelela Yehowa Nzambi. Ntendelelu mulelela kena anu wimanyina pa malu audi witabuja to. Udi kabidi utangila malu audi wenza, mmumue ne: ditumikila diebe dia mikenji ya Bukalenge bua Nzambi. Bua yonso wa kutudi, ntendelelu wetu udi utangila nsombelu wetu mujima kusangisha ne mushindu utudi tukolesha bana betu, ne kabidi tshitudi tuenza patudi kumpala kua mishindu kampanda ya luondapu.

² Kadi, bulongolodi butudi kabutu misangu yonso buangata ne mushinga buena muabu buetu butudi banange bikole ne malu adibu butulomba to. Imue mbulamatadi mmitete bua kuelela ntendelelu wetu mikenji peshi mene bua kumushipa bua kashidi. Imue misangu, bayidi ba Kristo badi ne bua kuluangana bua kupeta budikadidi buabu bua kutumikila mikenji ya Mukalenge Masiya. Bualu ebu budiku bukemesha anyi? Tòo. Batendeledi ba Yehowa ba mu bikondo bia kale bavua misangu ya bungi baluangana bua kupeta budikadidi buabu bua kutendelela Yehowa.

3. Mmvita kayi ivua bantu ba Nzambi baluangane mu matuku a mukalenge mukaji Esetê?

³ Tshilejilu, mu matuku a mukalenge mukaji Esetê, bantu ba Nzambi bavua ne bua kuluangana bua kushalabu ne muoyo. Bua tshinyi? Hamana, uvua kavula-mbedi wa muoyo mubi wakambila Ahashawelosha, mukalenge wa bena Pelasa bua bashipe bena Yuda bonso bavua mu bukalenge buende bualu ‘mikenji yabu ivua mitapuluke ku ya bantu bonso.’ (Ese. 3:8, 9, 13) Yehowa uvuaku mulekele batendeledi bende anyi? Tòo, wakabenesha bionso bivua Esetê ne Môdekai benze pavuabu balombe mukalenge wa bena Pelasa bua kukuba bantu ba Nzambi.—Ese. 9:20-22.

4. Ntshinyi tshituamona mu nshapita eu?

⁴ Netuambe tshinyi bua matuku etu aa? Anu mutuvua bamone mu nshapita mushale, mbulamatadi ya bukole ivua miluishe Bantemu ba Yehowa misangu kampanda. Mu nshapita eu, netumone imue mishindu idi mbulamatadi eyi mitete kupangisha mushindu wetu wa kutendelela. Netuimanyine pa malu manene asatu aa: 1) Bukenji buetu bua kuikala bulongolodi kampanda  ne kutendelela mu mushindu utudi basungule, 2) budikadidi bua kusungula ngondapilu udi umvuangana ne mêyi manene a mu Bible, ne 3) bukenji budi nabu baledi bua kukolesha bana bilondeshile mikenji ya Yehowa. Mu bualu buonso, netumone mudi bena dia Bukalenge bua Mukalenge Masiya ba lulamatu badienzeje ne dikima bua kulama buena muabu buabu bua mushinga ne mushindu udibu babeneshe madikolela abu.

5. Kupeta dianyisha dia kudi mbulamatadi nkuambuluishe bena Kristo balelela ku tshinyi?

⁵ Tudiku dijinga ne dianyisha dia kudi mbulamatadi ya bantu bua kutendelela Yehowa anyi? Tòo, kadi dianyisha dia kudi mbulamatadi didi dituambuluisha bua kutendelela bipepele; tshilejilu, bua kudisangisha mu Nzubu yetu ya Bukalenge ne ya mpuilu badilekelele, bua kupatula mikanda idi yumvuija Bible ne kuyituma miaba mikuabu ne bua kuyisha bantu netu lumu luimpe patoke kakuyi tshipumbishi. Mu matunga a bungi, Bantemu ba Yehowa mbamanyike ku mikanda ya mbulamatadi ne badi ne budikadidi bua kutendelela anu mudi bitendelelu bikuabu bidi pabi ne dianyisha edi bienza. Kadi, ntshinyi tshivua tshienzeke pavua mbulamatadi mivile dianyisha edi peshi mikebe bua kukepesha budikadidi buetu bua nshindamenu?

6. Bantemu ba Yehowa ba mu Autralie bavua bapete lutatu kayi ku ntuadijilu kua bidimu bia 1940?

⁶ Australie. Ku ntuadijilu kua bidimu bia 1940, nguvene munene wa mu Australie wakamba mudi mitabuja etu apangisha malu avuabu balongolole bua mvita. Bakakandika midimu yetu. Bantemu kabavua mua kudisangisha peshi kuyisha patoke to, bakakanga nzubu ya Betele, ne kunyenga Nzubu ya bukalenge. Kukandikabu nansha dikuata patupu ku bianza mikanda yetu idi yumvuija Bible. Panyima pa dienza mudimu mu musokoko munkatshi mua ndambu wa bidimu, ndekelu wa bionso Bantemu ba mu Australie bakapeta disulakana. Mu dia 14 ngondo 6 wa 1943, Kabadi kakulu ka mu Australie kakashipa mukenji wa dikandika.

7, 8. Leja muvua bana betu ba mu Russie baluangane munkatshi mua bidimu bivule bua kupeta budikadidi bua ntendelelu.

⁷ Russie. Bavua bakandike midimu ya Bantemu ba Yehowa munkatshi mua bidimu makumi a bungi mu bukokeshi bua ba-koministe, kadi ndekelu wa bionso mu 1991, bakabafunda ku mikanda. Mu 1992, panyima pa difua dia Union soviétique, tuakapeta dianyisha dia kudi mbulamatadi wa mu Russie. Kadi matuku makese pashishe, tshisumbu kampanda tshia baluishi bavua badisangisha ne tshitendelelu tshia Ortodokse tshia mu Russie bakatumvuila mukawu bua mutuvua tuvulangana. Baluishi abu bakabanda Bantemu ba Yehowa ne malu misangu itanu kumbukila mu 1995 too ne mu 1998. Musangu wonso, mulumbuluishi kavua upeta bualu kampanda bubi to. Mu 1998, baluishi bavua badisuike aba bakasaka bantu bua kutufunda. Bantemu bakanji kutshimuna, kadi baluishi bakabenga dipangadika dia kabadi ne Bantemu bakapangila mu ngondo 5 wa 2001. Bakatuadija kulumbuluisha kabidi tshilumbu etshi mu ngondo wa 10 wa tshidimu atshi, kufikabu ku diangata dipangadika mu 2004 dia kumbusha Bantemu ku mikanda ya mbulamatadi wa mu Moscou ne kubakanga midimu yabu.

 ⁸ Buluishi bukole buakatuadija. (Bala 2 Timote 3:12.) Bakatatshisha Bantemu bikole ne kubakengesha. Bavua babanyenga mikanda yabu ya malu a ntendelelu; bavua bababengela ne muoyo mujima bua kufutshilabu nzubu bua kutendelelamu peshi kuyibaka. Ela meji muvua bana betu bumvue pavuabu mu ntatu eyi. Mu 2001, Bantemu bakaya ne tshilumbu ku Kabadi kanene ka manême a bantu ka ku mputu, kukumbajabu malu makuabu ku Kabadi mu 2004. Mu 2010, Kabadi kanene kakangata diaku dipangadika. Kabadi aku kakamona patoke ne: bavua bakandike Bantemu anu bualu kabavua basue ntendelelu wabu mu Russie to, ne kakaleja ne: kakuvua bualu buvua mua kusaka Kabadi kanene bua kuitaba mapangadika a tubadi tushadile to, bualu kakuvua tshijadiki tshivua tshileja muvua Bantemu benze bualu kampanda bubi nansha. Kabadi kakaleja kabidi ne: bavua bakandike Bantemu anu bua kubanyangila manême abu avua mbulamatadi mubapeshe. Dipangadika dia Kabadi diakapingajila Bantemu bunême buabu bua kutendelela badikadile. Nansha muvua mbulamatadi mishilashilangana ya mu Russie mipangile bua kubenga dipangadika dia Kabadi kanene, mishindu ya ditshimuna eyi yakakankamija bantu ba Nzambi.

9-11. Mmunyi muvua bantu ba Yehowa baluangane mu Grèce bua kupeta budikadidi bua kutendelela pamue? Mbipeta kayi biakapatuka?

⁹ Grèce. Mu 1983, Titos Manoussakis wakafutshila nzubu mu Heraklion mu Crète bua kasumbu kakese ka Bantemu ba Yehowa kadisangishilamu bua kutendelela. (Eb. 10:24, 25) Kadi pashishe, nsaserdose wa bena Ortodokse wakafundila bamfumu ba mbulamatadi, ubenga bua Bantemu kabangatshi nzubu au bua kutendelelamu to. Bua tshinyi? Anu bualu mitabuja a Bantemu avua mashilangane ne a mu ntendelelu wa bena Ortodokse. Bamfumu ba mbulamatadi bakatuadija kulondakaja muanetu Titos Manoussakis ne Bantemu bakuabu basatu ba muaba au, bababanda muvuabu benze bualu bubi. Bakabakosela tshibawu tshia buloko bua ngondo ibidi. Bu muvua Bantemu bikale bena dia Bukalenge ba lulamatu, bakamona dipangadika dia kabadi bu dishipa dia bukenji buabu bua budikadidi bua ntendelelu, nunku bakaya ne tshilumbu tshiabu ku tubadi tua mu ditunga, ne ndekelu wa bionso kuyabu ku Kabadi kanene ka manême a bantu ka ku Mputu.

¹⁰ Ndekelu wa bionso mu 1996, Kabadi kanene kakenza baluishi ba ntendelelu mukezuke tshia musangu umue. Kabadi kakaleja ne: “Bantemu ba Yehowa mbakumbane bua kuikala ‘tshitendelelu tshianyishibue’ anu muvuabi bileja mu mikenji ya mu Grèce,” ne kulejaku kabidi ne: mapangadika a tubadi tushadile “avua anyanga budikadidi buabu bua ntendelelu.” Kabadi kakamona kabidi ne: mbulamatadi wa mu Grèce kavua ne bukenji bua “kujadika bikala mitabuja a tshitendelelu peshi malu adibu benza bua kuleja mitabuja aa apetangana ne mikenji peshi kaayi apetangana nayi.” Bakumbusha bibawu bivuabu bafundile Bantemu ne kubapingajilabu budikadidi buabu bua ntendelelu.

¹¹ Ditshimuna edi divuaku dijikije bilumbu bia mu Grèce anyi? Diakabi, kabivua bijike to. Mu 2012, bakakosa tshilumbu tshia muomumue mu Kassandreia, mu Grèce panyima pa bidimu bitue ku 12 bia diluangana ku kabadi. Mu tshilumbu etshi,  buluishi buvua bukebesha kudi muepiskopo wa bena Ortodokse. Tshipangu tshia mbulamatadi tshivua tshikale kabadi kakulu ka malu a mbulamatadi ka mu Grèce tshiakakosa tshilumbu, tshibingisha bantu ba Nzambi. Dipangadika diakatela mêyi makulu a ditunga dia Grèce avua apesha bantu budikadidi bua ntendelelu ne diakabenga dibanda divuabu babanda nadi Bantemu ba Yehowa misangu yonso bamba mudibu kabayi tshitendelelu tshianyishibue. Kabadi kakamba ne: “Malongesha a ‘Bantemu ba Yehowa’ ki mmasokome to, bua bualu ebu mbakumbane kuikala tshitendelelu tshianyishibue.” Bena mu kasumbu kakese ka mu Kassandreia bakasanka bualu bavua mpindieu mua kudisangisha bua kutendelela mu wabu Nzubu wa Bukalenge.

12, 13. Mmunyi muvua baluishi batete mua kupangadija ‘malu mabi adi alonda mikenji yabu’ mu France? Ntshipeta kayi tshiakapatuka?

¹² France. Bamue baluishi ba bantu ba Nzambi mbenze mudimu ne buteyi bua ‘kupangadija malu mabi adi alonda mikenji yabu.’ (Bala Musambu wa 94:20.) Tshilejilu, mu bidimu bia pankatshi pa 1990, bamfumu ba mbulamatadi ba mu France bakatuadija kulondolola bitadi bua Association Les Témoins de Jéhovah (ATJ), bumue bua ku malongolodi a Bantemu ba Yehowa mamanyike kua mbulamatadi bua mu France. Ministre wa malu a mpetu wakaleja tshipatshila tshilelela tshia bualu ebu wamba ne: “Dilondolola edi divua mua kufikisha ku dikanga midimu peshi difila dinyoka . . . , bualu buvua pamuapa mua kutekesha ngenzelu wa mudimu wa bulongolodi ebu peshi kubuenzeja bua kuimanyikabu midimu yabu mu teritware wetu.” Nansha muvuabu kabayi bapete tshilema pavuabu benze dilondolola edi, bamfumu ba malu a bitadi bakatuila bulongolodi bua ATJ tshitadi tshitambe bunene. Bu bualu ebu bukumbane, mayele aa avua mua kufikisha bana betu ku dimanyika midimu ku filiale ne ku dipana mpangu bua kufuta tshitadi tshinene etshi. Tshivua bualu bunene, kadi bantu ba Nzambi kabakatshioka to. Bantemu bakabenga ne dikima dionso mushindu uvuabu babenzela malu ne kansungasunga au, ne ndekelu wa bionso mu 2005, bakaya ne tshilumbu ku Kabadi kanene ka manême a bantu ka mu Mputu.

¹³ Kabadi kakangata dipangadika diaku mu dia 30 ngondo 6 wa 2011. Kakaleja ne: pa kumbusha bilumbu bikuabu bia pa buabi, bukenji bua budikadidi bua ntendelelu ki mbuanyishile mbulamatadi bua kuamba bikala mitabuja a tshitendelelu peshi malu adibu benza bua kuleja mitabuja aa apetangana ne mikenji peshi kaayi apetangana nayi to. Kabadi kakaleja kabidi ne: “Ditua tshitadi . . . divua mua kufikisha bulongolodi ku dipangila makuta ne bintu bivua bibuambuluisha bua kuenza mudimu, ne pashishe bupangila bua kuambuluisha bantu badi babulamate bua kuenzabu ntendelelu wabu mudibi bikengela.” Bena ku Kabadi bonso bakangata dipangadika divua dibingisha Bantemu ba Yehowa. Bualu buvua busankishe bantu ba Yehowa buvua bua ne: mbulamatadi wa mu France wakapingajila bulongolodi bua ATJ makuta a tshitadi avuabu babafutshishe, ne makuabu a pa mutu, ne bilondeshile dîyi dituma kudi Kabadi, bakabapingajila bintu bia Betele bivuabu banyenge.

14. Mmunyi muudi pebe mua kuambuluisha mu diluangana bua kupeta budikadidi bua ntendelelu?

¹⁴ Anu bu Esetê ne Môdekai, bantu ba Yehowa lelu badi baluangana bua kupeta budikadidi bua kutendelela Yehowa mu  mushindu udiye mubalombe. (Ese. 4:13-16) Udiku pebe mua kuluangana mvita eyi anyi? Eyowa. Ikala usambila pa tshibidilu bua bena Kristo nebe badi mpindieu bakengeshibua bua mikenji miela ne kansungasunga. Masambila a nunku adi mua kuikala diambuluisha dinene kudi bana betu badi mu nsombelu mikole peshi badibu bakengesha. (Bala Yakobo 5:16.) Yehowa utuku uteleja masambila a nunku anyi? Mishindu itudi batshimune ku tubadi idi ileja ne: udi uateleja.—Eb. 13:18, 19.

15. Mmalu kayi adi bantu ba Nzambi bimanyina mu tshilumbu tshidi tshitangila dienza mudimu ne mashi?

¹⁵ Anu mutuvua bamone mu Nshapita wa 11, bena dia Bukalenge bua Nzambi mbapete bulombodi butoke bua mu Mifundu bua kuepuka dienza mudimu bibi ne mashi didi ditangalake pa buloba lelu. (Gen. 9:5, 6; Lew. 17:11; bala Bienzedi 15:28, 29.) Nansha mutudi katuyi tuitaba diedibua mashi, tudi basue ngondapilu mutambe buimpe udiku, buetu tuetu ne bua bantu batudi banange bikalayi kayi ubengangana ne mikenji ya Nzambi. Tubadi tukulu tua mu matunga a bungi ntuitabe ne: bantu badi ne bukenji bua kuitaba ngondapilu kampanda peshi kumubenga bilondeshile tshidi kondo kabu ka muoyo ne mitabuja abu bilomba. Kadi mu amue matunga, bantu ba Nzambi mbapete buluishi bukole mu tshilumbu etshi. Tumonayi bimue bilejilu.

16, 17. Nngondapilu wa mushindu kayi uvua muanetu wa bakaji wa mu Japon mupete uvua mumutonde? Mmunyi muvua Nzambi muandamune masambila ende?

¹⁶ Japon. Misae Takeda, mamu wa bidimu 63 wa mu Japon, uvua ne disama dinene divua dikengela bua bamupande. Bu muvuaye muena dia Bukalenge wa lulamatu, wakamanyisha doktere wende patoke ne: uvua musue bamupande kabayi bamuela mashi. Kadi panyima pa ndambu wa ngondo, biakamutonda pakamanyaye ne: bavua bamuele mashi pavuabu bamupanda. Bu muvua muanetu Takeda udiumvua muenzeja malu ku bukole ne bamushime, wakafunda badoktere ne lupitadi ku kabadi mu ngondo 6 wa 1993. Mamu wa lutulu ne budipuekeshi eu uvua ne ditabuja dikole. Wakafila ne dikima bumanyishi kumpala kua bantu ba bungi bavua ku kabadi, muimanyine ku tshilumbuluidi ntanta mupite pa dîba dijima nansha muvuaye kayi ne bukole bua mubidi. Wakalumbulula ku kabadi bua musangu wa ndekelu ngondo umue kumpala kua kufuaye. Katuenaku mua kuanyisha dikima ne ditabuja bivuaye nabi anyi? Muanetu Takeda wakamba ne: uvua ulomba Yehowa misangu yonso bua amuambuluishe mu mvita ivuaye uluangana. Uvua mutuishibue ne: Yehowa uvua ne bua kuandamuna masambila ende. Uvuaku muandamune anyi?

¹⁷ Bidimu bisatu panyima pa lufu lua muanetu Takeda, Kabadi kanene ka mu Japon kakangata dipangadika kamubingisha, ne kuitabaku ne: bivua bibi bua kumuela mashi bu muvuaye mubenge patoke. Mu dia 29 ngondo 2 wa 2000, dipangadika diakamba ne: “bukenji bua kuangata dipangadika” mu bilumbu bia nunku “badi ne bua kubunemeka bu manême adi nawu muntu.” Ku diambuluisha dia dipangadika divua muanetu Takeda muangate bua kusungula ngondapilu bilondeshile kondo kende ka muoyo kalongesha kudi Bible, Bantemu ba mu Japon badi  mpindieu mua kuondapibua kabayi batshina diedibua mashi ku bukole.

18-20. a) Mmunyi muvua kabadi ka mu Argentine kitaba bukenji budi nabu muntu bua kubenga diedibua mashi ku diambuluisha dia karte ka Instructions médicales ? b) Mu tshilumbu tshia dienza mudimu bibi ne mashi, mmunyi mutudi tuleja ne: tudi tukokela bulombodi bua Kristo?

¹⁸ Argentine. Bidi mua kuenzeka ne: bikengela kuangata dipangadika mu tshilumbu tshia luondapu padi muntu kayi ne mushindu wa kuakula. Mmunyi mudi bena dia Bukalenge badilongolole mu tshilumbu etshi? Tudi ne bua kuikala ne karte ketu kikala mua kuakula pa muaba wetu anu muvua Pablo Albarracini muenze. Mu ngondo 5 wa 2012, bu muvuaye muaba kampanda uvua bivi bakeba kuiba, masashi akamukuata. Bakaya nende ku lupitadi mujimija lungenyi ne kavua mua kuleja dipangadika diende mu tshilumbu tshia kuedibua mashi to. Kadi, uvua ne karte ka Instructions médicales kavuaye muwuje kukavua bidimu bipite pa binayi. Nansha muvuaye mu nsombelu mukole ne bamue badoktere bamona ne: bua kupandaye bivua bikengela kumuela mashi, kasumbu ka baminganga kavua kadiakaje bua kunemeka dipangadika diende. Kadi tatuende wa Pablo, uvua kayi Ntemu wa Yehowa wakapeta dianyisha ku kabadi bua kubenga kunemeka disua dia muanende.

¹⁹ Mulumbuluidi wa mukaji wa Pablo wakaya diakamue ku kabadi. Panyima pa mêba, kabadi kabandile kakashipa dipangadika dia kabadi kashadile ne kulejaku ne: bavua ne bua kunemeka dijinga dia mubedi anu muvuabi bileja mu karte kende ka Instructions médicales. Tatuende wa Pablo wakaya ku Kabadi kakulu ka mu Argentine. Kadi, Kabadi kakulu “kakavua kapete bualu buvua buleja ne: [karte ka Pablo kavua kaleja muvuaye mubenge diedibua mashi] kakavua kuwuja ku budisuile, busunguluji ne budikadidi to.” Kabadi aka kakamba ne: “Muntu yonso mukulumpe udi mukumbane bua kuangata dipangadika udi ne mushindu wa kudianjila kuleja malu adiye musue bua bidi bitangila makanda [ende] a mubidi, ne udi mua kuitaba peshi kubenga ngondapilu kampanda . . . Munganga udi ne bua kumuondapa udi ne bua kulonda malu au.”

²⁰ Muanetu Albarracini ukadi mumane kupetulula makanda ende onso a mubidi. Yeye ne mukajende badi ne disanka bua muvuaye mudianjile kuwuja karte ka Instructions médicales. Pavuaye muenze bualu bupepele kadi buvua ne mushinga ebu, uvua muleje mudiye ukokela Kristo, Mfumu wa Bukalenge bua Nzambi. Wewe ne bena mu dîku diebe, nudiku benze penu nunku anyi?

21-24. a) Mmunyi muvua Kabadi kakulu ka mu Canada kafike ku diangata dipangadika dia mushinga bua bidi bitangila bana bakadi batantamane ne bua dienza mudimu ne mashi? b) Mmunyi mudi tshilejilu etshi mua kuambuluisha bansonga badi benzela Yehowa mudimu?

²¹ Canada. Pa tshibidilu, tubadi tutu tuitaba bukenji budi nabu baledi bua kusunguila bana babu ngondapilu muimpe. Imue misangu, tubadi tuvua kabidi tuleja ne: badi ne bua kunemeka dipangadika didi muana ukadi mubandile wangata mu tshilumbu tshia ngondapilu. Bualu ebu ke buvua bufikile April Cadoreth. Pavuaye ne bidimu 14, wakabuela mu lupitadi bua disama dikole dia mashi mabuwila mu mubidi. Ngondo mikese kumpala, uvua muwuje karte ka Instructions médicales anticipées kavua kaleja ne: kabavua ne bua kumuela mashi to, nansha biobi bikole. Munganga uvua umuondapa wakajinga bua kubenga kulonda dijinga dia April divua dileja patoke, ne wakalomba dianyisha kudi kabadi bua kumuela mashi. Bakamuela bipompa bisatu bia mashi ku bukole. April wakalua kufuanyikija tshienzedi etshi ne dilala nende ku bukole.

 ²² April ne baledi bende bakaya ne tshilumbu etshi ku tubadi. Panyima pa bidimu bibidi, tshilumbu tshiakafika ku Kabadi kakulu ka mu Canada. Nansha muvua April mupangile bua muvuabu bakudimune mêyi makulu a ditunga bibi, Kabadi kakamufuta makuta bilondeshile mikenji ne kuangataku dipangadika divua dimubingisha yeye ne bana bakuabu bakavua babandile bavua bajinga kuenza mudimu ne bukenji buabu bua kudiangatshila mapangadika mu tshilumbu tshia ngondapilu. Kabadi kakamba ne: “Mu tshilumbu tshidi tshitangila luondapu, bana ba bidimu muinshi mua 16 badi ne bukenji bua kuteta kuleja ne: mmuenenu wabu mu dipangadika didi ditangila luondapu kampanda, udi uleja mudibu badikadile bua kuleja lungenyi ludibu nalu ne dikola diabu.”

²³ Bualu bua mushinga buvua mu tshilumbu etshi buvua ne: Kabadi kakulu kakaleja manême avua mikenji mipeshe bana bakavua batantamane. Kumpala kua kuangata dipangadika edi, kabadi ka mu Canada kavua mua kuanyishila muana wa bidimu muinshi mua 16 ngondapilu kampanda pavuaku kamona ne: ngondapilu au uvua muimpe bua muana. Kadi panyima pa diangata dipangadika edi, kabadi kakavua mua kuanyishila muana wa bidimu muinshi mua 16 ngondapilu kampanda uvua  ubengangana ne disua diende kumpala kua kumupeshabu mpunga wa kuleja ne: ukadi mukumbane bua kudiangatshila dipangadika to.

²⁴ Diluangana divua dienzeke mu bule bua bidimu bisatu edi divuaku ne mushinga anyi? Divua nawu bilondeshile April. Lelu April udi mpanda-njila wa pa tshibidilu ne udi ne makanda mimpe a mubidi. Udi wamba ne: “Kumanya ne: mvua ne mushindu mukese wa kuteta bua kutumbisha dîna dia Nzambi ne kuleja mudi Satana muena dishima, nkumpeteshe disanka bushuwa.” Tshivua tshifikila April tshidi tshileja ne: bansonga betu badi mua kuangata dipangadika ne dikima, baleja mudibu bena dia Bukalenge bua Nzambi balelela.—Mat. 21:16.

25, 26. Ntshilumbu kayi tshitu imue misangu tshijuka patu dibaka difua?

²⁵ Yehowa mmupeshe baledi bujitu bua kukolesha bana babu bilondeshile mikenji yende. (Dut. 6:6-8; Ef. 6:4) Mudimu eu udi ne ntatu, kadi idi mua kuvula padi dibaka difua. Panyima pa difua dia dibaka, baledi badi mua kuikala ne mmuenenu mushilangane bikole bua bidi bitangila mushindu wa kukolesha bana. Tshilejilu, muledi udi Ntemu udi mua kumona ne muoyo mujima ne: muana udi ne bua kukola bilondeshile mikenji ya buena Kristo, kadi muledi udi kayi Ntemu udi mua kubenga bualu ebu. Bushuwa, muledi udi Ntemu udi ne bua kuitaba ne budipuekeshi ne: nansha mudi difua dia dibaka mua kunyanga malanda a mulume ne mukaji, malanda a baledi ne bana adi wowu ashala.

²⁶ Muledi udi kayi Ntemu udi mua kulomba kabadi bukenji bua kulama bana bua amone mua kulondolola dikola diabu mu malu a ntendelelu. Bamue badi baleja ne: kukolesha muana bua kuluaye Ntemu wa Yehowa nkumuenzela bibi. Badi mua kuleja ne: kuenza nunku nekupangishe bana bua kusekelelabu mufikilu wa diledibua diabu, kuenza mafesto a mifikilu ya matuku, ne padiku disama dia tshimpitshimpi, kudi kubapangisha bua kubela mashi adibu bamba mudiwu asungila muoyo. Bia diakalenga, tubadi tua bungi tutu tutangila tshidi mua kupetesha muana diakalenga pamutu pa kuamba mudi tshitendelelu tshia umue wa ku baledi tshikale ne njiwu. Tumonayi bimue bilejilu.

27, 28. Mmunyi muvua Kabadi kakulu ka mu Ohio kakose tshilumbu tshia ne: kukolesha muana bua kuluaye Ntemu wa Yehowa kudi njiwu kudiye?

²⁷ États-Unis. Mu 1992, Kabadi kakulu ka mu Ohio kakakosa tshilumbu tshia tatu kampanda uvua kayi Ntemu uvua uleja ne: bivua mua kuikala bibi bua kukolesha muanende wa balume bua kuluaye Ntemu Yehowa. Kabadi kashadile kavua kitabe bualu ebu, kumupeshaku bukenji bua kukolesha muana. Bavua bapeshe Jennifer Pater uvua mamuende wa muana bukenji bua kulua kutangila muana, kadi bavua bamuelele mukenji bua “kubenga kulongesha muana mitabuja a Bantemu ba Yehowa peshi kumuambilawu mu mushindu kayi wonso.” Mukenji wa ku kabadi kashadile eu uvua umvuika ne: muanetu Pater kavua nansha mua kuakula ne muanende Bobby malu a mu Bible peshi bua mikenji ya bikadilu bimpe idimu to. Uvuaku mua kufuanyikija muvua muanetu eu mudiumvue anyi? Jennifer uvua mupangile tshia kuenza, kadi udi wamba ne: uvua mulonge bua kuikala ne lutulu ne kuindila bua Yehowa adiangatshile malu  mu bianza. Udi uvuluka wamba ne: “Yehowa uvua pabuipi nanyi misangu yonso.” Mumulumbuluidi uvuabu bambuluishe kudi bulongolodi bua Yehowa wakaya ne tshilumbu ku Kabadi kakulu ka mu Ohio.

²⁸ Kabadi kakulu kakabenga dipangadika dia kabadi kashadile, kaleja ne: “baledi badi ne bukenji bua nshindamenu bua kulongesha bana babu, kusangisha ne bukenji bua kubambila malu adi atangila bikadilu bilenga ne malongesha a ntendelelu wabu.” Kabadi kakulu kakamba ne: bu muvua kabadi kashadile kakayi kaleje mudi malongesha a Bantemu ba Yehowa mua kunyanga muana ku mubidi ne mu lungenyi, kakavua mua kupangisha muledi bukenji bua kulama muana anu bua ntendelelu wende to. Kabadi kakavua kapete tshijadiki tshivua tshileja muvua mitabuja a ntendelelu wa Bantemu mua kunyanga lungenyi lua muana peshi makanda ende a mubidi to.

29-31. Bua tshinyi muanetu wa bakaji wa mu Danemark wakajimija bukenji buende bua kulama muanende? Kabadi kakulu ka mu Danemark kakangata dipangadika kayi mu tshilumbu etshi?

²⁹ Danemark. Anita hansen uvua mupete lutatu lua muomumue pavua mulume uvuaye nende kumpala mulombe kabadi bukenji bua kukolesha Amanda, muanende wa bidimu 7. Nansha muvua kabadi ka mu tshimenga kapeshe muanetu Hansen bukenji bua kukolesha muana mu 2000, tatuende wa Amanda wakaya ne tshilumbu ku kabadi kanene, kavua kalue kushipa dipangadika dia kabadi ka mu tshimenga ne kamupeshe bukenji bua kulama muana. Kabadi kanene kakaleja ne: bu mudi baledi ne mmuenenu mishilangane pa bidi bitangila muoyo mimanyine pa mitabuja a ntendelelu yabu, tatu uvua mukumbane bua kupita ne dishilangana edi. Pashishe, muanetu Hansen  wakajimija bukenji buende bua kulama Amanda bualu uvua Ntemu wa Yehowa.

³⁰ Mu tshikondo tshikole etshi, muanetu Hansen uvua imue misangu upanga tshia kuenza ne bimufikisha ku dipanga tshia kuamba mu disambila. Udi wamba ne: “Kadi mêyi adi mu Lomo 8:26 ne 27 avua mankoleshe bikole. Mvua misangu yonso ngumvua ne: Yehowa uvua umvua dijinga dianyi. Dîsu diende divua kundi ne uvua nanyi misangu yonso.”—Bala Musambu wa 32:8; Yeshaya 41:10.

³¹ Muanetu wa bakaji Hansen wakaya ne tshilumbu ku Kabadi kakulu ka mu Danemark. Kabadi aka kakakosa tshilumbu kamba ne: “Badi ne bua kukosa tshilumbu tshia bukenji bua kulama muana bilondeshile dikonkonona dijalame dienza bua kumanya tshidi tshimpe bua muana.” Kabadi kakaleja kabidi ne: dipangadika dia bukenji bua kulama muana didi ne bua kuimanyina pa mushindu udi yonso wa ku baledi ujikija bilumbu, kadi kadiena ne bua kuimanyina pa “malongesha ne mmuenenu” wa Bantemu ba Yehowa to. Muanetu Hansen wakapeta disulakana dinene, Kabadi kakaleja muvuaye mukumbane bu muledi ne kumupingajilabu bukenji bua kulama Amanda.

32. Mmunyi mudi Kabadi kanene ka manême a bantu ka ku Mputu kakube baledi Bantemu ku kansungasunga?

³² Matunga mashilashilangane a ku Mputu. Mu bilumbu bidi bitangila bukenji bua dilama bana, kabatu bimanyina anu ku tubadi tua mu ditunga to. Kabadi kanene ka manême a bantu ka ku Mputu katu paku kakose tshilumbu etshi. Mu bilumbu bibidi, Kabadi kanene ka manême a bantu nkamone ne: tubadi tushadile, ne tubadi tua mu ditunga ntuenzele baledi badi Bantemu ne badi kabayi Bantemu malu mu mushindu mushilangane bimanyine pa ntendelelu wabu. Bu muvua Kabadi kanene kamone ne: tshivua kansungasunga, kakangata dipangadika dia ne: “ditapulula dia malu dimanyine nangananga pa dishilangana dia ntendelelu nkayadi ki ndianyishibue to.” Mamu kampanda uvua Ntemu uvua dipangadika dia Kabadi kanene diambuluishe udi uleja mudiye mupete disulakana wamba ne: “Bidi binnyingalaja bikole padibu bambanda bamba mundi nnyanga bana banyi, pabi mvua ndienzeja ne muanyi muonso bua kubapesha tshimvua ngela meji ne: ke tshivua tshimpe buabu, mmumue ne: kubakolesha mu buena Kristo.”

33. Mmunyi mudi baledi badi Bantemu batumikila dîyi dinene didi mu Filipoyi 4:5?

³³ Bushuwa, baledi Bantemu badibu babengele ku tubadi bua kupeta bukenji buabu bua kubueja mikenji ya mu Bible mu mioyo ya bana babu batu badienzeja bua kubenga kuikala ne malu makole. (Bala Filipoyi 4:5.) Nansha bobu bapete bukenji bua kulongesha bana babu mu njila wa Nzambi, badi bitaba ne: muledi udi kayi Ntemu udi pende ne bujitu bua kukolesha bana yeye musungule bua kuenza nunku. Biobi nanku, muledi udi Ntemu wa Yehowa udi wangata dilongesha bana bende ne mushinga kayi?

34. Tshilejilu tshia bena Yuda ba mu matuku a Nehemiya tshidi tshiambuluisha baledi bena Kristo lelu mushindu kayi?

³⁴ Tshilejilu tshia mu matuku a Nehemiya tshidi tshituambuluisha. Bena Yuda bavua benza mudimu mukole bua kuakaja bimanu bia Yelushalema ne kubibakulula. Bavua bamanye ne: kuenza nunku kuvua mua kubakuba bobu ne mêku abu kudi bisamba bivua babanyunguluke bivua bibaluisha. Bua bualu  ebu, Nehemiya wakabakankamija ne: ‘Nuluangane bikole bualu bua bana benu, ne bana benu ba balume ne bana benu ba bakaji baledibue ne bua bakaji benu ne nzubu yenu.’ (Neh. 4:14) Bua bena Yuda abu, diluangana divua ne mushinga wa bungi. Bia muomumue lelu, baledi badi Bantemu ba Yehowa badi badienzeja bikole bua kukolesha bana babu mu njila wa bulelela. Mbamanye ne: bana babu mbanyunguluka kudi buenzeji bubi bua mu tulasa ne bua bantu badi babanyunguluke. Buenzeji ebu budi mua kubuela mu nzubu ku diambuluisha dia bikandakanda ne bisanji. Baledi wetu, kanupu muoyo ne: bidi ne mushinga wa bungi bua kuluangana bikole bua bana benu ba balume ne ba bakaji bua kubapetesha nsombelu muimpe wabambuluisha bua kukola bimpe mu nyuma.

35, 36. Mmasanka kayi adi Bantemu ba Yehowa bapete bua diluangana dietu bua kupeta bukenji buetu? Udi mudisuike bua kuenza tshinyi?

³⁵ Yehowa udi bushuwa mubeneshe mushindu udi bulongolodi buende bua lelu budienzeje bua kupeta bukenji bua kutendelela badikadile. Diluangana edi ditu ditupetesha mushindu wa kufila bumanyishi bukole ku tubadi ne kudi bantu ba bungi. (Lomo 1:8) Bualu bukuabu buimpe budi mu mishindu ya bungi ya ditshimuna budi ne: mmikoleshe bukenji bua bantu bakuabu ba bungi badi kabayi Bantemu. Kadi bu mutudi bantu ba Nzambi, katuena bantu badi bakaja malu a mu nsombelu wa bantu to, ne katuena tuenza malu anu bua diakalenga dietu nkayetu to. Kupita bionso, Bantemu ba Yehowa mbalondakaje bukenji buabu ku tubadi bua kumona mua kujadika ntendelelu mukezuke ne kuenza bua aye kumpala.—Bala Filipoyi 1:7.

³⁶ Katupepeji malongesha a ditabuja atudi bapetele kudi aba bavua baluangane bua budikadidi bua ntendelelu wa Yehowa nansha kakese. Tushale petu ne lulamatu, batuishibue ne: Yehowa udi ukuatshisha mudimu wetu ne udi utungunuka ne kutupesha bukole bua kuenza disua diende.—Yesh. 54:17.