1, 2. (a) Vyuma muka vize vyamisolola hatoma nge mwapwa muvatu vayula kuWangana waKalunga? (b) Mwomwo ika Vinjiho jaYehova shimbu jimwe vanafwilanga kuvetavisa valemesa Yehova?

UNO mwapwa muvatu vayula kuWangana waKalunga tahi? Hakupwa muVinjiho jaYehova, chikupu vene mwapwa muvatu vayula kuWangana. Chuma muka chamilingisa mufwelele ngwenu mwapwa muvatu vayula kuWangana? Chuma kana kachapwa chitupa chakuya nacho kumafuchi eka chipwe mapapilo eka afulumendeko. Oloze chuma chamisolola hatoma shina jila mweji kulemeselangamo Yehova Kalunga. Kulemesa chamuchano chapwa kufwelela Kalunga, nakwononoka jishimbi jaWangana wenyi. Kulemesa chetu Kalunga chakwata nahakuyoya chetu, nahajila tweji kulelelangamo vana vetu, nomu tweji kusakwilangamo jila yakutukilamo.

² Oloze vatu mukaye kavavumbika vyuma twafwelelako. Jifulumende jimwe jinasakenga kutuhonesa kulemesa Kalunga. Chipwe ngocho vaka-kukavangiza Kulishitu vanafwilanga vavetavise kukavangiza jishimbi jaMwangana Meshiya. Kutala chakutamo kulinga ngocho tahi? Eyo. Mwomwo navatu jaYehova kunyima vanafwilanga vavetavise kulemesa Kalunga.

3. Vatu jaKalunga vafwililile kulinga ika mumakumbi aLisano Eseta?

³ Chakutalilaho, mumakumbi aLisano Eseta, vatu jaKalunga vafwililile kulwila myono yavo. Mujila muka? Hamane uze apwile chilolo wamupi waMwangana Ahaswelu waPeleja alwezele ou mwangana ngwenyi, vaYuleya vosena vatela kuvajiha mwomwo “jishimbi javo jalihandununa najeji javatu veka naveka vosena.” (Ese. 3:8, 9, 13) Uno Yehova echelelele vangamba jenyi vavajihe tahi? Nduma, akafwile Eseta naMolotekai vahanjike kuli mwangana waPeleja akinge vatu jaKalunga.—Ese. 9:20-22.

4. Vyuma muka natushimutwila mukapetulu uno?

⁴ Nyi ngachilihi mumakumbi ano? Nganomu twashimutwilanga mukapetulu nafumuho, shimbu jimwe jifulumende jinafumbukilanga Vinjiho jaYehova. Mukapetulu uno natushimutwila omu jifulumende jinasakenga kutuhonesa kulemesa Kalunga. Tushimutwilenu havyuma vitatu: (1) lisesa lyakwitavisa liuka lyetu nakutwitavisa tulemese Kalunga mujila tunasake, (2) lisesa lyakusakula jila yakutukilamo kweseka  najishimbi jamuMbimbiliya, (3) lisesa lyavisemi lyakulela vana vavo kweseka najindongi jaYehova. Muvyuma vyosenevi vitatu, natumona omu vatu vayula kuWangana waMeshiya vanakilikitanga nangolo mangana valame kulonga chavo nomu vanavakisula.

5. Kutambula lisesa kufulumende chinakafwe ngachilihi vaka-Kulishitu vamuchano?

⁵ Uno fulumende yatela kutuhana lisesa numba tulemese Yehova tahi? Nduma, oloze kutambula lisesa kufulumende cheji kutukafwa tulemese Kalunga mukusuuluka. Chakutalilaho, twapwa vakukasunuka kulemesela Kalunga mujiZuvo jaWangana namujiZuvo jaKukunguluka Chachinene, nakusoneka nakutuma mikanda yahanjika haMbimbiliya, nakwambulula hatoma mujimbu wamwaza kuvatu chakuzeneka wakututangula. Mumafuchi amavulu Vinjiho jaYehova vavetavisa kulemesa Kalunga hatoma ngana muze vetavisa mauka akwitava eka. Jino vyuma muka vinasolokanga omu jifulumende jinakanenga kutwitavisa kulemesa Kalunga?

6. Ukalu muka vamwene Vinjiho jaYehova muAustralia muji 1940?

⁶ Australia. Muji 1940, nguvulu waAustralia ambile ngwenyi vyuma twafwelela vyapwa “vyavipi” mwomwo katwakundwiza jijitako. Ngocho vakanyishile mulimo wetu. Vinjiho kavahashile kukunguluka chipwe kwambulula hatomako, kaha nawa Mbetele vayisokele, nakutambula jiZuvo jaWangana josena. Mikanda yetu yahanjika haMbimbiliya vayikanyishile. Hanyima yakulemesa Kalunga mukuswama hamyaka yayivulu, vandumbwetu muAustralia vasokokele. HaJune 14, 1943, zango yayinene yaAustralia yasambishile Vinjiho.

7, 8. Lumbununenu omu vandumbwetu muRussia vanasoponga vihande hamyaka yayivulu hakufwila kupwa nalisesa lyakulemesa Kalunga.

⁷ Russia. Vinjiho jaYehova vavakanyishile kulemesa Kalunga hamyaka yayivulu, oloze liuka lyavo valisonekesele jino kufulumende mu 1991. Kaha mu 1992 omu chiyulo chaSoviet Union chakumine, vatwitavishile jino tulemesenga Kalunga hatoma mufulumende yaRussian Federation. Nakushimbula chiku vaka-kole, chikumanyi vaka-Chachi yaOrthodox vevwile chikela mwomwo vatu jaKalunga vapwile nakuvulilako chikuma. Ava vaka-kole vasonekele mijimbu yamakuli hali Vinjiho jaYehova nakuyitwala kuzango yakusopela, kufuma mu 1995 nakuheta mu 1998. Oloze vaka-kusopesa kavatuwanyine namulongako. Kaha mumwaka vene uze wa 1998, ava vaka-kole vatwalile echi chihande kuzango yeka. Hakavanga Vinjiho vasambile, oloze vaka-kole vakanyine, kaha muMay 2001 vachambamilonga vahanyine mulonga Vinjiho. Echi chihande vachisopele cheka kuputuka muOctober mumwaka vene uze, kaha kuheta mu 2004 liuka lyaVinjiho jaYehova mumbaka yaMoscow valijimine nakukanyisa jino mulimo wavo.

⁸ Shikaho Vinjiho vaputukile kuvayanjisa chikuma. (Tangenu WaChimoteu 2, 3:12.) Vavayanjishilenga nakuvaveta.  Mikanda yetu vayikanyishile, kavatwitavishile tutunge chipwe kufwetela zuvo yakulemesela Kalungako. Achishinganyekenu omu vevwilenga vandumbwetu haukalu kanou. Mu 2001 Vinjiho vatwalile chihande chavo kuZango Yayinene yamuEurope Yize Yatala haLisesa Vatwama Nalyo Vatu, kaha mu 2004 vatwalile mijimbu yikwavo yakukundwiza chihande kana. Mu 2010, eyi zango yavatwile chihande ngwavo chapwile chakuhenga vaka-Russia kukanyisa Vinjiho, mwomwo kakwapwile unjiho wakusolola nge Vinjiho vavulumwine mulongako. Zango yahanjikile cheka ngwayo kukanyisa mulimo waVinjiho chapwile kuvatambula lisesa vatwama nalyo kweseka najishimbi. Ngachize eyi zango yayinene yetavishile jino Vinjiho valemesenga Kalunga kavo. Numba tuhu jizango jamuRussia kajakavangijile vyuma vasopele kuzango yayinene yamuEurope, oloze vatu jaKalunga mulifuchi kana vanazame mulufwelelo mwomwo yakuvasambisa.

9-11. Vatu jaYehova muGreece valipikile ngachilihi najifulumende hakusaka kupwa nalisesa lyakulemesa Kalunga, kaha vyuma muka vyafuminemo?

⁹ Greece. Mu 1983, Titos Manoussakis afwetelelenga kazuvo muHeraklion, Crete, mangana vandumbwetu valikungulwilengamo hakulemesa Kalunga. (Hepe. 10:24, 25) Nakushimbula chiku kapilishitu wamuchachi yaOrthodox alwezele fulumende vavakanyise kuzachisa zuvo kana. Mwomwo ika? Mwomwo kwitava chaVinjiho chalihandununa nachize chavaka-Orthodox. Vatwamina valifuchi vavangijikilile ndumbwetu Titos Manoussakis naVinjiho veka vatatu ngwavo vanavulumuna mulonga waunene. Kaha vavakashile mukamenga hatukweji vavali. Hakupwa vatu vayula kuWangana waKalunga, Vinjiho vamwene ngwavo zango kayasopele kanawako, ngocho vatwalile chihande chavo kujizango jeka jajindende, kutwala muze vachitwalile nakuzango yayinene yamuEurope.

¹⁰ Kaha mu 1996, eyi zango yatalile hachihande kana nakuhakwila Vinjiho. Zango yahanjikile ngwayo “Vinjiho jaYehova ‘hiliuka lize vatachikiza kuvatu’ kweseka najishimbi jalifuchi lyaGreece,” kaha vyuma vayulile kujizango jajindende “jakwachile halisesa vatwama nalyo vatu hakulemesa Kalunga.” Eyi zango nawa yambile ngwayo, fulumende yaGreece kayapwile “nalisesa lyakulweza vatu ngwavo vyuma vafwelela vyamuchano nyi vyamakuli, chipwe kuvalweza jila yakulemeselamo Kalungako.” Ngachize Vinjiho vasambile hachihande kana, kaha vavetavishile jino kulemesa Kalunga.

¹¹ Uno kuvatula chihande mujila kaneyi chakumishile ukalu muGreece tahi? Nduma. Mu 2012, vavatwile chihande chize vanasoponga hamyaka 12 mumbaka yaKassandreia muGreece. Chihande kana vachisangumwine kuli mbishopu wachachi yaOrthodox. Zango yayinene yamuGreece yavatwile chihande kana nakuhakwila vatu jaKalunga. Yambile ngwayo,  jishimbi jafulumende yaGreece jahana vatu lisesa lyakulemesa Kalunga, kaha vakanyine mazu vahanjikile vatu ngwavo liuka lyaVinjiho jaYehova kavalitachikizako. Ngocho zango yambile ngwayo: “Vyuma vanangula Vinjiho jaYehova kavyapwa vyakuswekako, shikaho liuka lyavo valitachikiza chikuma.” Vandumbwetu muchikungulwilo chaKassandreia vawahililile chikuma hakukungulukila jino muZuvo yavo yaWangana.

12, 13. Uno fulumende yaFrance ‘yinayanjisanga ngachilihi vatu jaYehova hakulyongela mujishimbi,’ oloze vyuma muka vinasoloka?

¹² France. Vaka-kole javatu jaKalunga “vanajinyi kuyanjisa vatu hakulyongela mujishimbi.” (Tangenu Samu 94:20.) Chakutalilaho, muji 1990 vaka-kutelesa mitelo muFrance vahitulukile mujimbongo jaliuka lyaVinjiho jaYehova muFrance. Chilolo atala vyajimbongo jafulumende ahanjikile ovyo vasakile kuhituluka mujimbongo jaliuka lyetu. Ambile ngwenyi: “Vyuma natuwana omu natuhituluka vinahase kulingisa liuka valijime chipwe kulisopesa . . . , kahechi nachilingisa vahone kuzata kanawa chipwe vene kusoka mulimo wavo wosena.” Numba tuhu kavavawanyine namulongako, oloze vaka-kutelesa mitelo valwezele Vinjiho vafwete jimbongo jajivulu chikuma. Kachi nge vatwalileho kufweta jimbongo kana, kachi vasokele ofesi yamutango nakuyilanjisa numba vahase kufweta jimbongo kana. Vinjiho vapwile muukalu wakulinga nahameso wi, chipwe ngocho kavaholele kahako, oloze mu 2005 vatwilile chihande kana kuzango yayinene yamuEurope.

¹³ Eyi zango yavatwile chihande kana haJune 30, 2011. Yahanjikile ngwayo fulumende kayatela kukekesa vyuma vafwelela vatu chipwe jila veji kulemesalangamoko, mwomwo vatu kana vavahana lyehi lisesa lyakulemesa Kalunga. Zango yatwalileho ngwayo: “Kutambula mitelo kana . . . nachikumisa jimbongo josena jaliuka, nakulingisa jino vahone kuzata kanawa mulimo wavo wakulemesa Kalunga.” Zango yavatwile chihande nakuhakwila Vinjiho jaYehova. Vatu jaYehova vawahililile chikuma omu vavahakwililile ngwavo fulumende yaFrance yatela kukindulwisa jimbongo jize vahanyinenga Vinjiho jaYehova nakuvahakilaho kalyapoko, nakufumisako mutelo uze vatelelelenga ofesi yamutango.

14. Vyuma muka munahase kulinga mangana mukafwe vandumbwetu vavetavise kulemesa Yehova?

¹⁴ Ngana mwaEseta naMolotekai, vatu jaYehova makumbi ano veji kuyanga kujizango mangana vavetavise kulemesa Yehova mujila yize azanga. (Ese. 4:13-16) Vyuma muka munahase kulinga nayenu? Munahase kulombelangako vandumbwenu vaze vali nakuyanjisa mumafuchi muze vakanyisa mulimo wetu. Kulomba chenu chinahase kujikijisa ava vandumbwetu vali nakuhita muvihuli. (Tangenu WaYakova 5:16.) Uno Yehova eji kukumbululanga kulomba kana tahi? Hakuwana nge jizango jinatuhakwilanga mapapa kakavulu, echi chinakusolola nge Yehova eji kukumbululanga kulomba kana.—Hepe. 13:18, 19.

15. Vatu jaKalunga vamona ngachilihi chihande chamanyinga?

¹⁵ Nganomu twashimutwilanga muKapetulu 11, vatu vayula kuWangana waKalunga vavalweza muVisoneka valihendenga kumanyinga numba tuhu vatu vavavulu makumbi ano kaveshi nakulinga ngochoko. (Kupu. 9:5, 6; Levi 17:11; tangenu Vilinga 15:28, 29.) Numba tuhu katwetavila kutuhaka manyingako, oloze twasaka kutuka mujila yize kayalimbalaka najishimbi jaKalungako. Jizango jakusopela mumafuchi amavulu jinetavila ngwavo vatu vakwechi lisesa lyakusakula jila yakuvokilamo, kaha vanahase kukana nge kuka kana chinalimbalaka nachivezu chavo chipwe navyuma vafwelela. Oloze mumafuchi amwe vatu jaKalunga vanamononga ukalu. Tutalenu vyakutalilaho vimwe.

16, 17. Ndumbwetu umwe wamuJapan vamulingile ngachilihi omu apwile nakuviza, kaha kulomba chenyi vachikumbulwile ngachilihi?

¹⁶ Japan. Ndumbwetu wapwevo Misae Takeda wamyaka 63 vasakile kumupula mwomwo yamusongo avijile. Ou ndumbwetu wakushishika alumbunwinyine vandotolo ngwenyi vatela kumuka chakuzeneka manyinga. Chaluvinda omu mwahichile tukweji vamulwezele ngwavo vamuhakile manyinga omu vapwile nakumupula. Ou ndumbwetu apihililile chikuma kaha atwalile vandotolo navaka-chipatela kuzango muJune 1993. Ou ndumbwetu apwile nalufwelelo lyakukola chikuma. Ahanjikile nakumika vyuma afwelela muzango yakusopela kafwe ola yamuundu numba tuhu apwile muveji. Ou ndumbwetu afwile omu mwahichile kakweji umwe kufuma haze ahanjikile chihande chenyi muzango. Chikupu vene lufwelelo nakumika chenyi vinatujikijisa. Ndumbwetu Takeda ahanjikilenga ngwenyi alombelenga Yehova mapapa kakavulu mangana amukafwe hachihande kanechi. Afwelelele ngwenyi Yehova mwakumbulula kulomba chenyi. Uno Yehova achikumbulwile nyi?

¹⁷ Omu mwahichile myaka yitatu kufuma haze afwile ndumbwetu Takeda, zango yayinene yamuJapan yahakwilile ou ndumbwetu ngwayo chapwile chakuhenga kumuhaka manyinga mwomwo yivene akanyine. HaFebruary 29, 2000 eyi zango yayulile ngwayo “mutu himutu akwechi lisesa lyakusakula jila yakumukilamo.” Tweji kusakwililanga ndumbwetu Takeda hakumika chenyi nakufwila kusakula jila yakumukilamo yize yalitombola nachivezu chenyi vanangula naMbimbiliya, mwomwo oholyapwa Vinjiho muJapan vali nakuvoka chakuzeneka kuvashinyinyika kuvahaka manyinga.

18-20. (a) Uno zango yakusopela muArgentina yayulilile ngachilihi ndumbwetu uze asonekele lipapilo lyakukana kumuhaka manyinga? (b) Tunahase kusolola ngachilihi ngwetu twaliluula kuchiyulo chaKulishitu hachihande chakuhaka manyinga?

¹⁸ Argentina. Vatu vayula kuWangana vanahase kulizanga ngachilihi vyakuvoka shimbu kanda vavize misongo yayinene? Twatela kumbatanga lipapilo lize nalituhanjikilako nganomu alingile ndumbwetu Pablo Albarracini. MuMay 2012 ou ndumbwetu vamulukukile kuvihwanga kaha vamulozele  vilyanga vyavivulu. Vamumbachile chizekazeka nakumutwala kuchipatela ngocho kahashile kulumbununa vyuma afwelela hamanyingako. Oloze kutokwa apwile nalipapilo lyakusoneka kanawa jila yakumukilamo lize asonekele kafwe myaka yiwana kunyima. Numba tuhu misongo yatohwele kaha nawa vandotolo vamwe vashinganyekele kumuhaka manyinga, oloze vaka-chipatela vasakile kukavangiza vyuma asonekele haze halipapilo. Chaluvinda ise yandumbwetu Pablo uze kapwile Chinjiho chaYehovako ayile kuzango yakusopela mangana vetavise vaka-chipatela vamuhake manyinga.

¹⁹ Lihako emanyinyineko pwevo lyandumbwetu Pablo alingile apilu. Hahaze vene vaka-zango vayulile ngwavo jila vavatwililemo chihande kuzango yayindende yapwile yakuhenga, oloze vaka-chipatela vatela kukavangiza vyuma nahanjika muveji. Ise yaPablo alingile apilu kuzango yayinene yamuArgentina. Oloze eyi zango yawanyine nge Pablo asonekele eli lipapilo lyakukana kumuhaka manyinga mwomwo yalisesa atwama nalyo navyuma ashinganyeka ngwenyi vyakwoloka. Ngocho eyi zango yayulile ngwayo: “Mutu himutu wakukola akwechi lisesa lyakulisakwila chimweza jila yakumukilamo, kaha nahase kwitavila chipwe kukana jijila jimwe jakumukilamo . . . Vandotolo vatela kukavangiza vyuma mwasakula muveji.”

²⁰ Oholyapwa ndumbwetu Albarracini alikangula kumujimba. Ikiye napuwenyi vawahilila hakuwana nge asonekele chimweza lipapilo lyakusakula jila yakumukilamo. Hakusoneka eli lipapilo asolwele nge aliluula kuli Kulishitu uze apwa Mwangana waWangana waKalunga. Kutala enu navaka-tanga yenu mwasoneka lyehi eli lipapilo tahi?

21-24. (a) Zango yayinene yamuCanada yakashile lushimbi muka hali vanyike nahamanyinga? (b) Echi chihande nachikolezeza ngachilihi vangamba jaYehova vavanyike?

²¹ Canada. Jizango jakusopela jetavisa visemi kusakwila vana vavo vavandende jijila jakuvokilamo. Lwola lumwe nawa jizango jinahakulanga ngwajo, vanyike vakukola vanahase kulisakwila vavene jila yakuvokilamo. Tutalenu vyuma vyasolokele kuli ndumbwetu April Cadoreth. Omu apwile namyaka 14, apwile muchipatela mwomwo manyinga achimbililile mujimo. Ou ndumbwetu asonekele chimweza Kati yaKulumbununa vyaManyinga yize asolwele nge nakane kumuhaka manyinga numba misongo yitohwa ngachilihi. Ndotolo apwile nakumuka asakile kuleununa vyuma asakwile ou ndumbwetu, ngocho ayile kuzango yakusopela mangana yimwitavise kumuhaka manyinga. Kahou ndumbwetu vamushinjilile nakumuhaka manyinga. Ndumbwetu April amwene ngwenyi chuma kana chapwile kwijiva nge vanamupiki.

²² April navisemi jenyi vayile kuzango yakusopela. Omu mwahichile myaka yivali echi chihande chahetele kuzango yayinene yamuCanada. Kweseka najishimbi, ndumbwetu April atelele kufwa namulonga, oloze zango yamuhakwililile nakuvuluka  ngwayo vanyike vaze vanakolo vakwechi lisesa lyakulisakwila vavene jila yakuvokilamo kuhambakana kuvashinjila. Zango jino yakukulwile ngwayo: “Vanyike vamyaka 16 nakuneha mwishi vatela kuvetavisa valisakwilenga vavene jila yakuvokilamo kweseka nalisesa vatwama nalyo.”

²³ Echi chihande chapwile chachilemu, mwomwo zango yayinene yahanyine vanyike vakukola lisesa lyakulisakwila vavene jila yakuvokilamo. Shimbu kanda echi chihande, zango yamuCanada yetavishile vandotolo kuhana vanyike vamyaka 16 nakuneha mwishi vitumbo vize vanamono ngwavo navivakafwa. Oloze kufuma vene haze vasopele chihande chauze ndumbwetu, zango kayapwile jino nangolo jakwitavisa vandotolo vahane vanyike vitumbo kachi nge vavene vanahase kulumbununa ovyo vanakanyinako.

²⁴ Uno chapwile chakutamo kusopa chihande kana tahi? Ndumbwetu April etavilile ngwenyi, “Eyo.” Oholyapwa jino ou ndumbwetu apwa payiniya washimbu yosena kaha nawa wakulikangula kumujimba. Ambile ngwenyi: “Ngwawahilila  chikuma hakutachikiza ngwami ngwalingile chuma chize chazezwile lijina lyaKalunga nakusolola Satana kupwa muka-kwonga.” Chakutalilaho chaApril chinatukafwe nge navanyike vanahase kumika nakusolola hatoma ngwavo vavayula kuWangana waKalunga.—Mateu 21:16.

25, 26. Vyuma muka vyeji kusolokanga nge valunga napwevo vanalilukulula?

²⁵ Yehova ahana visemi mulimo wakulela vana nakuvanangula jishimbi jenyi. (Lushi. 6:6-8; Efwe. 6:4) Mulimo kana wapwa waukalu chikumanyi nge visemi vanalilukulula. Nge visemi vanalilukulula, jila navasaka kulelelamo vana yinahase kulihandununa. Chakutalilaho, chisemi uze apwa Chinjiho mwasaka kulela vana kweseka najishimbi jamuMbimbiliya, oloze chisemi uze kapwa Chinjihoko keshi kwitavilako. Chisemi uze apwa Chinjiho atela kutachikiza ngwenyi nge vanalilukulula namuka-mahyenyi kaha usoko wavo unakumu, olozenyi mulimo wakulela vana kawakumineko.

²⁶ Chisemi uze kapwa Chinjihoko nahase kuya kuzango vamwitavise kulela vana mangana avanangule mwaya jindongi jamukwitava chenyi. Vatu vamwe vashinganyeka ngwavo vana veji kulyenyekanga nge navavalela mwaya jindongi jaVinjiho jaYehova. Vashinganyeka ngwavo vanyike kaveshi kulivwisa kuwaha viwanyino vyakwanuka makumbi akusemuka, namakumbi akunoka, kaha nawa kaveshi ‘kulwila myono yavo’ mwomwo veji kukananga kuvahaka manyingako. Chipwe ngocho jizango jajivulu jeji kutalanga havyuma vize navinganyalisa mwana keshi hakwitava chavisemiko. Tutalenu havyakutalilaho vimwe.

27, 28. Zango yayinene yaOhio yayulile ngachilihi chihande chakwamba ngwavo mwana mwalyenyeka kachi nge navamulela mwaya jishimbi jaVinjiho jaYehova?

²⁷ United States. Mu 1992, zango yayinene yamuOhio yasopele chihande chalunga umwe uze kapwile Chinjihoko. Ambile ngwenyi mwanenyi mwalyenyeka kachi nge navamulela mwaya jishimbi jaVinjiho jaYehova. Zango yayindende yetavilile vyuma ahanjikile ou chisemi, kaha ambachile uze mwana akamulele ikiye. Jennifer Pater naye yauze mwana vamwitavishile kaha kuyanga nakumenekela mwanenyi, oloze vamukanyishile “kumunangula chipwe kumulweza kala vyuma vafwelela Vinjiho jaYehova.” Vyuma yahanjikile eyi zango vyasolwele nge ndumbwetu Pater katelele kuhanjika namwanenyi Bobby havyuma yahanjika Mbimbiliya chipwe jishimbi jatwamamoko. Ou ndumbwetu evwile ngachilihi? Evwile kupihya chikuma, oloze ambile ngwenyi alinangwile kupwa namuchima wakutalilila chikoki nakuvandamina Yehova amukafwe. Ambile ngwenyi, “Yehova angukafwilenga.” Lihako vazachishilenga kuliuka lyaVinjiho jaYehova atwalile chihande kana kuzango yayinene yamuOhio.

 ²⁸ Eyi zango kayetavilile vyuma yayulile zango yayindendeko, yambile ngwayo “visemi vakwechi lisesa lyakunangula vana vavo kuhakilako vene nakuvangula jishimbi jamukwitava.” Vachambamilonga vakukulwile ngwavo zango kayeshi nalisesa lyakukanyisa chisemi kulela vana venyi nakuvanangula jishimbi jamukwitava chenyiko, kuvanga kaha nge kuli unjiho wakusolola nge vyuma vafwelela Vinjiho jaYehova vinahase kwenyeka vana. Shikaho vawanyine ngwavo kakweshi unjiho wakusolola nge vyuma vafwelela Vinjiho jaYehova vinahase kwenyeka vanako.

29-31. Mwomwo ika ndumbwetu umwe muDenmark vamukanyishile kulela mwanenyi, kaha zango yayinene yamuDenmark yayulile ngachilihi?

²⁹ Denmark. Ndumbwetu Anita Hansen apwile naukalu woumwe omu lunga lyenyi alwezele zango yimwitavise atambule mwanenyi Amanda wamyaka 7 nakumulela yivene. Numba tuhu mu 2000 zango yetavishile ndumbwetu Hansen alele mwanenyi, oloze lunga lyenyi atwalile chihande kana kuzango yeka. Kaha zango kana yetavishile uze lunga atambule mwana. Eyi zango yakukulwile ngwayo hakuwana nge ava visemi valimbalakile kweseka navyuma vafwelela ngocho chisemi walunga ikiye atelemo kulela kanawa mwana mujila yamwaza. Shikaho ndumbwetu Hansen vamutambwile mwanenyi Amanda mwomwo yakupwa Chinjiho jaYehova.

³⁰ Mulwola kanelu lwaukalu ou ndumbwetu alizakaminyine chikuma, kaha lwola lumwe katachikijile navyuma  vyakulomba Kalungako. Ambile ngwenyi, “Mazu atwama hali Wavaka-Loma 8:26, 27 angukolezezele chikuma. Ngwatachikijile ngwami Yehova ejivilenga vyuma ngwasakilenga kuhanjika. Yehova angumwenenga, kaha apwilenga nayami lwola lwosena.”—Tangenu Samu 32:8; Isaya 41:10.

³¹ Ndumbwetu Hansen atwalile chihande kana kuzango yayinene yamuDenmark. Zango yahanjikile ngwayo: “Mutu uze natwitavisa kumbata mwana nakukamulela shina uze natuwana ngwetu mwakamuzakama kanawa.” Zango nawa yalumbunwine ngwayo, mutu uze mwambata mwana nakukamulela shina uze eji kukumisanga vikokojola mujila yamwaza. Keshi kutala havyuma vafwelela Vinjiho jaYehovako. Ndumbwetu Hansen evwile kuwaha omu zango yawanyine nge ikiye atelemo kupwa chisemi wamwenemwene wakulela mwanavo Amanda.

32. Zango yayinene yamuEurope yinahakwilanga ngachilihi visemi vaze vapwa Vinjiho?

³² Mafuchi eka amuEurope. Vihande vimwe vyavanyike vize vanasoponga vinahetenga nakujizango jajinene jakumafuchi eka. Zango Yayinene yamuEurope Yize Yatala haLisesa Vatwama Nalyo Vatu yinasoponga vihande kanevi. Muvihande vivali yasopele, yahanjikile ngwayo jizango jajindende jahanyinenga mulonga visemi vaze vapwa Vinjiho jaYehova nakuhakwila vaze kavapwa Vinjihoko mwomwo yavyuma vafwelela. Shikaho yakukulwile ngwayo, “chapwa chakuhenga zango kusopesa mutu nakumuhana mulonga mwomwo yakwitava chenyi.” Chinjiho umwe wapwevo wachisemi uze vahakwilile kuzango kana ambile ngwenyi, “Ngwevwile kupihya chikuma hakunguhana mulonga ngwavo ngunakwenyeka vana vami, okunyi ngwapwile nakuvanangula vyuma vyamwaza vyakushipilitu mangana vakapwe vatu vamwenemwene.”

33. Visemi vaze vapwa Vinjiho vanahase kuzachisa ngachilihi mazu ahali Wavaka-Fwilipi 4:5?

³³ Numba tuhu Vinjiho vaze vapwa visemi vanavatwalenga kujizango jakusopela mwomwo yakunangula vana vavo jindongi jamuMbimbiliya, oloze vanashiwisanga michima yavo. (Tangenu Wavaka-Fwilipi 4:5.) Vanahanjikanga ngwavo, vakwechi lisesa lyakunangula vana vavo jindongi jamuMbimbiliya ngana muze visemi vaze kavapwa Vinjiho vanahase kunangula vana vavo kala vyuma vyamwaza vanasake mangana vakapwe vatu vamwenemwene kulutwe. Visemi vaze vapwa Vinjiho vatela kumona ngachilihi mulimo waulemu wakunangula vana vavo?

34. Vyuma muka navalinangula visemi vaka-Kulishitu kuchakutalilaho chavaYuleya vamumakumbi aNehemiya?

³⁴ Tutalenu chakutalilaho chasolokele mumakumbi aNehemiya. VaYuleya vazachile nangolo hakutunga nakutungulula kembwe yaYelusalema. Vatachikijile ngwavo kuzata mulimo kana nachivakinga hamwe najitanga javo kuli vaka-kole javo vaze vavajingilikile. Shikaho, Nehemiya avalwezele ngwenyi: “Lwilenu vandumbwenu, navana venu vamalunga, navava vamapwevo, namembo enu.” (Nehe. 4:14) Echi chavalingishile  vazate nangolo. Namakumbi ano, visemi vaze vapwa Vinjiho jaYehova veji kuzatanga nangolo hakulela vana vavo mumuchano. Vatachikiza ngwavo vana vavo veji kuhita muvyeseko vyavivulu kushikola namundandanda vatwama. Vyuma kanevi vyakuvahungumwisa vinakupwanga jino nahavisaji najishinga. Visemi vatachikiza kanawa ukalu kanou, ngocho vatela kufwila kukafwa vana vavo mangana vafukile kushipilitu.

35, 36. Vyuma muka vananganyala Vinjiho jaYehova hakutwala vihande kujizango jakusopela, kaha munakufwila kulinga ika?

³⁵ Yehova nakafwe vangamba jenyi makumbi ano kuhichila muliuka lyenyi mangana vavetavise kufulumende valemese Kalunga. Hakusopa vihande kana, vatu jaKalunga vanahanenga unjiho kujizango nakuvatu vaze vanevwililanga kuvihande kana. (Loma 1:8) Chuma cheka chamwaza chinafumumo shina navatu vaze kavapwa Vinjihoko vali jino nalisesa lyakusakula vyuma vanasake. Chipwe ngocho hakupwa tuvatu jaKalunga, katweshi kusopa vihande kana mangana twalumuneko vyuma vimwe mufulumende, chipwe tulinehele ulemuko. Oloze Vinjiho jaYehova veji kutwalanga vihande kana kujizango mangana vavahane lisesa lyakutandakanyisa kulemesa chamuchano.—Tangenu Wavaka-Fwilipi 1:7.

³⁶ Chikupu vene twatela kusakwilila vandumbwetu vaze vanatwalenga vihande kujizango jakusopela mangana tupwenga nalisesa lyakulemesa Yehova. Shikaho nayetu tutwalenuho kupwa vakushishika, nakufwelela ngwetu Yehova mwatukafwa tuzate kanawa mulimo wetu, nakutwalaho kulinga mwaya muchima wenyi.—Isa. 54:17.