1, 2. a) Bõe la d get n bãng ned sẽn be Wẽnnaam Rĩungã poorẽ? b) Bõe yĩng tɩ mi n yaa tɩlae t’a Zeova Kaset rãmbã kẽng bʋʋdo?

YÃMB bee Wẽnnaam Rĩungã poorẽ bɩ? Y sã n yaa a Zeova Kaset soaba, dẽnd y bee a Rĩungã poorẽ. La bõe n wilgd rẽ? Pa neng sebr bɩ goosneem sebr a to ye. Yaa y sẽn tũud Wẽnnaam to-to wã n wilgd rẽ. Tũudum hakɩkã pa be ne y sẽn tẽed bũmb ninsã bal ye. Bee ne yãmb tʋʋm-tʋmdɩ wã me, rat n yeel tɩ y sẽn sakd Wẽnnaam Rĩungã noyã to-to wã. Tõnd ned kam fãa miime t’a segd n modg n tũu Wẽnnaam noyã a sẽn maandã fãa pʋgẽ, baa a zakã rãmb yell gesg wɛɛngẽ, la baa tɩbsgã wɛɛngẽ.

² D sẽn paam n yaa Wẽnnaam Rĩungã poorẽ dãmbã yaa zu-zẽkre, la dũniyã nebã yẽ toog mi n kae ne rẽ, pa rẽ bɩ yaa tõnd sẽn tũud Wẽnnaam noyã n pa noom-ba. Goosneema sãnda makame n na n gɩdg tõnd tʋʋm kẽere, bɩ n tolg n menes d tũudmã zãnga. Tẽns kẽer pʋgẽ, pa yɩ nana ne Kiristã poorẽ dãmb tɩ b paam sor bʋ-kaoodbã taoor n tũ Rĩungã noyã wa b sẽn datã ye. La linga tõnd bɩ? Ayo. Biiblã kibay wʋsg wilgdame tɩ pa yɩ nana ne a Zeova pĩnd nin-buiidã me ye.

3. Rĩm-poak a Ɛstɛɛr wakatẽ wã, yɩɩ tɩlae meng tɩ Wẽnnaam nin-buiidã maan bõe?

³ Rĩm-poak a Ɛstɛɛr wakatẽ wã, pa yɩ nana ne Wẽnnaam nin-buiidã tɩ b tõog n põsg b yõyã meng ye. Bõe yĩnga? Pɛrs rĩm a Asuerus ra kɩtame t’a Haman sẽn da yaa nin-wẽngã lebg a nanambsã fãa taoor soaba. A yeela rĩmã tɩ b tog n kʋʋ zʋɩf rãmbã fãa sẽn be soolmã pʋgẽ wã, bala b ‘tõodã yaa toor ne buudã fãa rẽndã.’ (Ɛst. 3:8, 9, 13) La a Zeova basame n pa sõng a nin-buiidã bɩ? Ayo. A Ɛstɛɛr ne a Mardose sẽn tall raood n tɩ gom ne Pɛrs rĩmã sẽn na yɩl t’a kogl zʋɩf rãmbã, a Zeova ninga bark tɩ yãk nenga.—Ɛst. 9:20-22.

4. Bõe yell la d na n gom sag-kãngã pʋgẽ?

⁴ La rũndã-rũndã yẽ? Wa d sẽn yã sak 14 pʋgẽ wã, nanambs kẽer namsa a Zeova Kaset rãmbã. Sag-kãngã pʋgẽ, d na n goma goosneema sãnda sẽn maan to-to n na n gɩdg tõnd tɩ d ra tũ Wẽnnaam wa d sẽn datã ye. D gom bũmb a tãab yelle. 1) Tõnd sẽn tar sor n na n lugl siglg la d tũ Wẽnnaam wa d sẽn datã. 2) D sẽn tar sor n na n yãk tɩbsgo,  n pa kɩɩs Biiblã sẽn yetã. La 3) roagdbã sẽn tar sor n na n wub b kambã tɩ zems ne a Zeova noyã. D na n yãame tɩ wakat fãa, Mesi wã Rĩungã poorẽ dãmb maoo wʋsg n kell n wilg tɩ b bee Rĩungã poorẽ, la t’a Zeova ninga b modgrã barka.

5. D sã n paam sor bʋ-kaoodbã taoore, sõngdame tɩ d tõe n maan bõe?

⁵ Rẽ yĩnga yaa tɩlae tɩ d paam goosneemã sor n yaool n tũ a Zeova bɩ? Ayo. La d sã n paam sore, sõngdame tɩ d tõe n tigim taab d toorẽ Rĩung rot la tigis-kãsems rotẽ, tɩ d tõe n yiis d sɛbã la d tool-b zĩis a taaba, la d tõe n moon koɛɛgã me tɩ gɩdgr kaẽ ye. Tẽns wʋsg pʋgẽ, b kõo a Zeova Kaset rãmbã sebr sẽn wilgd tɩ b yaa tũudum wa tũudum a taabã, tɩ rẽ kɩt tɩ b tar sor n tʋmd b tʋʋmã. La goosneema sã n pa sak n kõ-do, d maanda wãna?

6. Yʋʋmd 1940 loogr poore, yel-bʋg n nams a Zeova Kaset rãmbã sẽn be Ostrali wã?

⁶ Ostrali: Yʋʋmd 1940 loogr poore, Ostrali guvɛrneer zenerallã yeelame t’a Zeova Kaset rãmbã sẽn tẽed bũmb ninsã kɩtame tɩ nebã pa rat n kẽes b toog zabrã pʋgẽ ye. Rẽ kɩtame tɩ b gɩdg d tũudmã. B paga Betɛllã, n dees d Rĩung rotã, tɩ saam-biisã sã n na n tigim taab wall n moon koɛɛgã bɩ lebg soosgo. B yeelame meng tɩ b pa rat n yã ned t’a tar tõnd sɛbã ye. Maana yʋʋm tɩ Ostrali saam-biisã soosd n tʋmd b tʋʋmã. La yʋʋmd 1943 sigr kiuug rasem 14, tẽngã bʋ-kaoodb sull ning sẽn tar noor n yɩɩdã yiisa noor n yeel tɩ gɩdgrã saame.

7, 8. Wilg-y Risi saam-biisã sẽn mao to-to yʋʋm wʋsgo, sẽn na yɩl n paam sor n tũ b tũudmã.

⁷ Risi: Kominist rãmbã gɩdga a Zeova Kaset rãmbã tũudmã yʋʋm wʋsgo. La yʋʋmd 1991, b wa n baas n sak n kõ-b-la sore. Iniyõ Sovietikã naamã saab poore, yɩɩ yʋʋmd 1992 la Risi goosneemã sak n kõ-d sebr sẽn wilgd tɩ tõnd me yaa tũudum wa tũudum a taabã. Pa yã n kaoos la kɩɩsdb kẽere, sẽn yɩɩd fãa sẽn da yaa-b Egiliiz Ortodogsã poorẽ dãmbã sũy yik ne tõndo, d sõorã sẽn da fɩɩgd tao-tao wã yĩnga. Yʋʋmd 1995 n tãag 1998 wã, yɛl a nu la kɩɩsdbã tall n kẽng bʋ-kaoodbã taoore, n dõd a Zeova Kaset rãmbã tɩ b yaa bi-beese. Wakat fãa, porkirɛɛrã sã n vaees yellã, a pa yãt saam-biisã sẽn maan tɩ yaa wẽng ye. La kɩɩsdbã pa leb poorẽ ye. Yʋʋmd 1998 wã, b le kẽnga bʋ-kaoodbã taoor n tɩ rõd a Zeova Kaset rãmbã. Bʋ-kaoodbã kõo a Zeova Kaset rãmbã bʋʋm, tɩ kɩɩsdbã yeel tɩ b pa sake, n le tall yellã n kẽng bʋʋd yʋʋmd 2001 sig-noy kiuugã. So-kãngã b monga saam-biisã bʋʋm. Zĩ-likr kiuugã, b le sɩnga bʋʋdo, la yʋʋmd 2004 b yiisa noor n wilg tɩ b pa le mi a Zeova Kaset rãmbã siglgã sẽn be Mosku wã tiiri, la tɩ b gɩdga b tũudmã.

⁸ Namsgã maneg n yãngame. (Karm-y 2 Tɩmote 3:12.) Sɩd me, saam-biisã yãa namsg buud toor-toore. B reesa b tũudmã sɛbã. Saam-biisã ra pʋd n pa le tõe n me Rĩung  rot bɩ n luwaas roog n tigimd taab ye. Tags-y n ges-y yellã sẽn nams-b to-to! Yʋʋmd 2001 wã, saam-biisã taasa yellã Erop bʋ-kaoodb sull ning sẽn get ninsaalbã dʋrwa-rãmb yellã (CEDH), la b le taas-b kibay a taab yʋʋmd 2004. Yʋʋmd 2010, bʋ-kaoodb sul-kãng yãa vẽeneg tɩ yaa Risi tẽngã taoor dãmb sẽn pa nong a Zeova Kaset rãmbã yĩng bal la b sẽn gɩdg b tũudmã. B yiisa noor n yeel tɩ bʋʋm kae sẽn kɩt tɩ bãmb na n sak Risi bʋ-kaoodbã no-sɩɩrã, bala b pa yã bũmb sẽn wilgd t’a Zeova Kaset soab n maan wẽng ye. Bʋ-kaoodbã wa n wilgame meng tɩ tẽngã rãmb sẽn yiis noor n gɩdg a Zeova Kaset rãmbã tũudmã yaa b sẽn dat n maan-b pãng bala. B no-sɩɩrã wilga vẽeneg t’a Zeova Kaset rãmbã me tara sor n tũ b tũudmã. Risi tẽngã taoor dãmb kẽer pa sak n tũ bʋ-kaoodbã no-sɩɩrã tao-tao ye. Ne rẽ fãa, yellã sẽn baas to-to wã kenga Wẽnnaam nin-buiidã sẽn be be wã raoodo.

9-11. Gɛrs tẽngẽ wã, bõe la a Zeova nin-buiidã maan sẽn na yɩl n paam sor n tigimd taaba, la baasa wãna?

⁹ Gɛrs: Yʋʋmd 1983, saam-biig a Titos Manoussakis luwaasa roog Herakiliyõ tẽngã pʋgẽ, sẽn na yɩl tɩ saam-biisã a wãn tigimd taaba. (Heb. 10:24, 25) Pa yã n kaoos la Ortodogs rãmbã pɛrtr a ye tɩ yeel polɩɩs rãmbã tɩ saam-biisã sẽn tigimd roogã pʋgẽ n pʋʋsdẽ wã pa zems ye. Bõe yĩnga? Yaa a Zeova Kaset rãmbã sẽn tẽed bũmb ninsã sẽn yaa toor ne bãmbã yĩng bala. Polɩɩs rãmbã kẽngã bʋʋdo, n tɩ rõd a Titos Manoussakis ne saam-biis a tãab tɩ b kɩɩsa laloa wã. B kɩtame tɩ b yao, la b yeel tɩ b tog n kẽe bãens kiis a yiibu. A Zeova Kaset rãmbã sẽn yaa Wẽnnaam Rĩungã poorẽ dãmbã gesame tɩ yellã yaa kɛgre, tɩ b le tall n kẽng bʋʋdo. B wa n baas n taasa yellã Erop bʋ-kaoodb sull ning sẽn get ninsaalbã dʋrwa-rãmb yellã.

¹⁰ Yʋʋmd 1996, Erop bʋ-kaoodbã sull rɩka no-sɩɩr sẽn tolg n ling tũudum hakɩkã bɛɛbã. Bʋ-kaoodbã yãame t’a “Zeova Kaset rãmbã tũu Gɛrs tẽngã laloa sẽn wilg tũudum fãa sẽn tog n maan sẽn na yɩl tɩ b ges t’a yaa tũudum wa a taabã.” B yãame me tɩ tẽngã bʋ-kaoodbã sẽn dɩk no-sɩɩr ninsã gɩdga “saam-biisã tɩ b pa tõe n tũ b tũudmã wa b sẽn dat ye.” B paasame tɩ pa Gɛrs goosneemã n tog n “baood n na n ges tũudum sẽn tẽed bũmb ninsã, bɩ a sẽn maand to-to n wilgd a tẽebã sã n zemsame bɩ pa zems ye.” B sãama no-sɩɩr nins fãa Gɛrs bʋ-kaoodbã sẽn da rɩkã, la b wilg tɩ saam-biisã tara sor n tũ b tũudmã wa b sẽn date.

¹¹ B sẽn paam bʋʋmã kɩtame tɩ yellã sa Gɛrs tẽngã pʋgẽ bɩ? Ayo, pa sa ye. Yel-kãng buud n le yik Kasãnderya tẽngã pʋgẽ, hal t’a welgrã kaoos sẽn kolg yʋʋm 12. Yɩɩ yʋʋmd 2012 wã la b wa n tõog n welg-a. Yaa Ortodogs rãmbã evɛk a ye n wa ne yel-kãnga. Tẽngã taoor dãmb sull ning sẽn tar noor n yɩɩdã kaoo bʋʋdã n kõ Wẽnnaam nin-buiidã bʋʋm.  B no-sɩɩrã pʋgẽ, b wilgame tɩ Gɛrs kõstitisiõ wã kõta ned fãa sor t’a tũ a tũudum wa a sẽn date, la b yeel tɩ b sẽn bool a Zeova Kaset rãmbã bʋʋd naoor wʋsg yel-kãngã poorẽ wã pa segd ye. B paasa woto: “A Zeova Kaset rãmbã sẽn tẽed bũmb ninsã pa solg ye. Rẽ kɩtame tɩ yaa tũudum wa a taabã.” Kasãnderya tigingã neb sõor pa waoog ye. La b sũy yaa noog b sẽn paam masã n tõe n tigim taab b toorẽ Rĩung roogẽ wã.

12, 13. Fãrense, wãn to la bɛɛb mak n na n yiis “tõog sẽn yaa toog” n nams Wẽnnaam nin-buiidã? Baasa wãna?

¹² Fãrense: Wẽnnaam nin-buiidã bɛɛbã kẽer makame n na n yiis “tõog sẽn yaa toog” n paam n nams-ba. (Karm-y Yɩɩl Sõamyã 94:20.) Wala makre, yʋʋmd 1995 wã sẽnese, Fãrens tẽngã tʋʋmd noor ning sẽn get lampo rãmbã yellã yãka yam n na n vaees n ges Association Les Témoins de Jéhovah (ATJ) wã ligdã sẽn kẽed to-to. Yaa tõnd siglg ning b sẽn lugl Fãrensã yʋʋr la woto. Minisr ning sẽn geta goosneemã ligd yellã vẽneg n togsa lampo wã rãmb raabã. A yeelame: “Vaeesgã ra tõe n kɩtame tɩ b paam bũmb n tik rẽ n gɩdg association wã, wall n tall-a n kẽng bʋʋdo, . . .  tɩ rẽ sẽn da na n baas to-to wã tõe n koms association wã, bɩ n kɩt t’a tolg n pa le tʋm Fãrens tẽngã pʋgẽ.” Baa lampo wã rãmb sẽn pa yã bũmb sẽn yaa kɛgrã, b rogla association wã lampo sẽn tolg n loog nugu. Woto yaa sẽn da na n kɩt tɩ saam-biisã wa pa tar b sẽn tõe n maaneg sã n pa b pag Betɛllã, la b koos rotã n yao lampo wã. Pa yɩ nana, la Wẽnnaam nin-buiidã pa koms raood ye. Saam-biisã baoome n na n wilg tɩ b maan-b-la pãnga. Yʋʋmd 2005 wã, b wa n baas n talla yellã n taas Erop bʋ-kaoodbã sull ning sẽn get ninsaalbã dʋrwa-rãmb yellã.

¹³ Yɩɩ yʋʋmd 2011 sigr kiuugã rasem 30 wã daar la bʋ-kaoodbã kao bʋʋdã n sa. B yeelame tɩ sẽn mik tɩ ned fãa tara sor n tũ a tũudmã, Fãrens tẽngã taoor dãmb pa tar sor n na n fees tũudum neb sẽn tẽed bũmb ninsã bɩ b sẽn maand to-to n wilgd b tẽebã, sã n pa tũudmã neb maana bũmb sẽn loog nug ye. Bʋ-kaoodbã paasa woto: “Lampo wã b sẽn dogl-bã . . . ra na n kɩtame tɩ association wã pa le paamd bũmb nins fãa sẽn yaa tɩlae sẽn na yɩl n tʋm a tʋʋmã, tɩ rẽ kɩt tɩ b pa le tõe n sõng sẽn be-b Betɛllẽ wã ne tigimsã pʋsẽ wã tɩ b tũ tũudmã wa b sẽn datã ye.” Bʋ-kaoodbã naaga taab n dɩk no-sɩɩr sẽn kõt a Zeova Kaset rãmbã bʋʋm. B yeela Fãrens goosneemã t’a lebs saam-biisã ligd ning fãa a sẽn kɩt tɩ b yao wã n dogl yõodo, la a lebs teed nins a sẽn da reesã. Goosneemã sɩd wa n baas n tũu b sẽn yeelã, hal t’a Zeova nin-buiidã maan sũ-noogo.

14. Bõe la ned fãa tõe n maan n sõng saam-biis nins sẽn namsde, b sẽn pa tar sor n tũ b tũudmã yĩngã?

¹⁴ Wa sẽn yɩ to-to a Ɛstɛɛr ne a Mardose wakatẽ wã, rũndã-rũndã me, a Zeova nin-buiidã maooda b sẽn tõe fãa sẽn na yɩl n paam sor n tũ a Zeova wa a sẽn datã. (Ɛst. 4:13-16) La rẽ yĩnga, yãmb me tara y sẽn tõe n maan bɩ? N-ye. Y  tõe n pʋʋsd n kõta d saam-biisã, pagb la rap sẽn namsde, b tẽngã taoor dãmb sẽn maand-b pãng yĩnga. Tõe n sõng-b lame tɩ b tõog toogo. (Karm-y Zak 5:16.) A Zeova leokda pʋʋs-kãensã bɩ? D sẽn paam bʋʋm naoor wʋsgã yaa kaset t’a leokdame!—Heb. 13:18, 19.

15. Bõe la Wẽnnaam nin-buiidã mi zɩɩmã yell wɛɛngẽ?

¹⁵ Wa d sẽn yã sak 11 pʋgẽ wã, ne Biiblã maasem, Wẽnnaam nin-buiidã paama vẽenem zɩɩmã yell wɛɛngẽ, sẽn na yɩl n da tall zɩɩmã n maan bũmb sẽn pa zemse, wa neb wʋsg sẽn maand rũndã-rũndã wã. (Sɩng. 9:5, 6; Maan. 17:11; karm-y Tʋʋm 15:28, 29.) Yaa sɩd tɩ d pa sakd tɩ b ning-d zɩɩm ye. La tõnd mengã bɩ d zakã ned sã n pa keeme, d rata tɩbsg sẽn yaa sõma, sã n mik tɩ pa kɩɩsd Wẽnnaam noyã. Tẽns wʋsg pʋgẽ, bʋ-kaoodb sull ning sẽn tar noor n yɩɩdã sak n deegame tɩ ned fãa tara sor n sak bɩ n zãgs tɩbsg ninga, sũur-kaset yĩng bɩ a tũudum yĩnga. La tẽns kẽere, Wẽnnaam nin-buiidã namsa wʋsg yel-kãngã poorẽ. D gom makr a wãn yelle.

16, 17. Bõe la logtor maan Zapõ saam-bi-poak hal tɩ sãam a sũuri, la wãn to la a Zeova reeg a pʋʋsgã?

¹⁶ Zapõ: Saam-bi-poak a Misae Takeda sẽn da tar yʋʋm 63 ra tog n maana wopeere. A sẽn teend Wẽnnaam Rĩungã yĩnga, a reng n togsa logtorã vẽeneg t’a pa rat tɩ b ning-a zɩɩm ye. La kiis a wãn poore, a wa n bãngame tɩ logtorã baas n ning-a-la zɩɩm. A sũurã sãama zãnga. A yamẽ wã, ra yaa wa b sẽn belg-a la b maan-a pãnga. A talla yellã n kẽng bʋʋd yʋʋmd 1993 sigr kiuugã. Baa pʋg-kãngã sẽn da yaa ned sẽn gomd ne bʋgsmã, a ra tara tẽeb sẽn tar pãnga. A talla raoodo, n gom bʋ-kaoodbã taoor sẽn yɩɩd lɛɛr a ye, baa ne a sẽn da pa keemã. A sẽn na n kẽng bʋ-kaoodbã taoor a yaoolem soabã, pa yɩɩg kiuug la a maan kaalem ye. A raoodã ne a tẽebã pa noom yãmb sɩda? Saam-bi-poak a Takeda yeelame tɩ wakat fãa a ra pʋʋsda a Zeova t’a sõng-a yellã pʋgẽ. A ra kɩsa sɩd t’a na n leoka a pʋʋsgã. A Zeova sɩd leokame bɩ?

¹⁷ Saam-bi-poak a Takeda kũumã yʋʋm a tãab poore, Zapõ bʋ-kaoodb sull ning sẽn tar noor n yɩɩdã rɩka no-sɩɩr sẽn wilgd t’a tara bʋʋm. B sak n deegame t’a sẽn zãgs tɩ b kõn ning-a zɩɩm tɩ b baas n ning-a wã pa segd ye. Yɩɩ yʋʋmd 2000 wao-fugdg kiuugã rasem 29 wã la b rɩk no-sɩɩrã, n yeel tɩ yell a woto pʋgẽ, “b segd n sak n tũu a soabã sẽn yãk yam ningã,” bala “ned fãa tara sor n yãk a yam.” Saam-bi-poak a Takeda sẽn kell n tall raood n wilg t’a tara sor n na n zãgs tɩbsg ning sũur-kaset yĩngã, kɩtame tɩ Zapõ saam-biisã pa le yɛɛsd logtor na n wa modg-b n ning-b zɩɩm ye.

18-20. a) Bõe la Arzãntin bʋ-kaoodb yeel tɩ wilgdẽ tɩ ned fãa tara sor n tõe n gʋls sebr sẽn wilgd a raab tɩbsgã wɛɛngẽ? b) Zɩɩmã yell wɛɛngẽ, bõe la d tõe n maan n wilg tɩ d bee Kirist naamã poorẽ?

¹⁸ Arzãntin: Bõe la sẽn be-b Rĩungã poorẽ wã tõe n deng n maane, tɩ baa b sã n wa pa tõe n gom bɩ logtoɛɛmbã bãng  tɩ b pa rat tɩ b ning-b zɩɩm? Sebr n be, d sẽn tõe n gʋls n tik d nug tɩ be ne-d wakat fãa, tɩ yell a woto pʋgẽ bɩ logtoɛɛmbã tõe n bãng tõnd sẽn date. Yɩɩ woto la saam-biig a Pablo Albarracini maan-yã. Yʋʋmd 2012 sig-noy kiuugã pʋgẽ, daar a ye la bi-bees tão-a ne bug-raoog naoor ka tɛka. B tall-a lame n kẽng logtor-yiri, la a sẽn da sobgã yĩnga, a ra pa tõe n togs t’a pa rat tɩ b ning-a zɩɩm ye. La a ra tara sebr a sẽn gʋls n tik a nugu, n wilg a raab tɩbsgã wɛɛngẽ. Sẽn yɩɩd yʋʋm a naas la sebrã ra be ne-a. A sãmpogrã ra yaa kɛgeng hal tɩ logtoɛɛmbã ra tagsdẽ tɩ yɩl t’a põse, yaa tɩlae tɩ b ning-a zɩɩm. La sebrã yĩnga, b fãa sakame n na n tũ a raabã. A ba wã sẽn pa a Zeova Kaset soabã tɩ yãa bʋ-kaoodbã, n paam sor tɩ b na n kɩɩs a biigã raab n ning-a zɩɩm.

¹⁹ Zĩig pʋgẽ, saam-biig a Pablo pagã togsa yẽ avoka wã t’a taas yellã bʋʋdo. Lɛɛr a wãn pʋgẽ bala, bʋ-kaoodbã wilgame tɩ pipi bʋ-kaoodbã sẽn kõ a ba wã sorã pa zemse, la b wilg tɩ bãadã raab sẽn be sebrã pʋgẽ wã la b segd n tũ. A Pablo ba wã le talla yellã n taas tẽngã bʋ-kaoodb sull ning sẽn tar noor n yɩɩdã. La bãmb sẽn ges sebrã a Pablo sẽn tik a nug n wilg t’a pa rat zɩɩmã, b yeelame tɩ b pa yã “bũmb sẽn kɩt tɩ b tõe n sãmb t’a pa reng n tags neer n yaool n gʋls sebrã, wall tɩ pa yẽ mengã raabo, bɩ tũu ne modgr ye.” Bʋ-kaoodb-kãens yeelame: “Biig sã n lebg kãsma, a tara sor n na n deng n yãk a sẽn dat tɩ b tɩbs-a to-to a sã n wa bẽedẽ. A leb n tõe n saka tɩbsg ninga, wall a zãgse . . . Logtorã tog n saka a raabã.”

²⁰ Saam-biig a Albarracini tara keelem masã. Yẽ ne a pagã sũy yaa noog a sẽn da gʋls sebr n wilg a raab tɩbsgã wɛɛngẽ wã. Baa ne sebrã gʋlsg sẽn wõnd yaa yel-bilã, a sẽn sak n maan dẽ wã wilgdame t’a bee Kirist naamã poorẽ. Rẽ yĩnga yãmb ne y zakã ned kam fãa maana wa saam-biig a Albarracini bɩ?

21-24. a) Sɩnga wãn tɩ Kanada bʋ-kaoodb wa rɩk no-sɩɩr sẽn kõt kambã sor tɩ b tõe n zãgs tɩ b kõn ning-b zɩɩm? b) Wãn to la a April kibarã tõe n keng kom-bõonegã sẽn tũud a Zeova wã raoodo?

²¹ Kanada: Naoor wʋsgo, bʋ-kaoodbã sakd n deegame tɩ roagdbã tara sor n na n yãk tɩbsg sẽn yaa sõma b kambã yĩnga. Wakat ning menga, b yetame tɩ b segd n basa kamb nins sẽn nan pa kãsembã tɩ b yãk b sẽn dat tɩbsgã wɛɛngẽ. Yɩɩ woto ne a April Cadoreth. A zɩɩmã da raagda a pʋgẽ wã tɩ b tall-a n kẽng logtor-yiri. Rẽ t’a tara yʋʋm 14. Kiis a wãn sẽn deng rẽ, a ra gʋlsa sebr sẽn wilgd t’a pa rat tɩ b ning-a zɩɩm, baa a sã n wa bẽed bã-kɛgenga. Logtorã maana a toog kae ne bũmb ning a April sẽn gʋls sebrã zug tɩ yaa vẽenegã, n kɩt tɩ bʋ-kaoodbã kõ-a sor t’a ning-a zɩɩm. B modg-a lame n ning-a zɩɩm. A April wa n yeelame tɩ b sẽn maanã yɩɩ wa b sẽn yõg-a.

²² A April ne a roagdbã talla yellã n kẽng bʋʋdo. Yʋʋm a yiib poore, yellã taa Kanada bʋ-kaoodb sull ning sẽn tar noor n yɩɩda. Baa ne bʋ-kaoodbã sẽn pa tolg n kõ a April bʋʋmã,  b kɩtame tɩ b lebs-a ligd ning fãa a sẽn kẽes bʋʋdã pʋgẽ wã, la b kõ yẽ ne kamb a taab sor tɩ b tõe n yãk tɩbsg b sẽn date. Bʋ-kaoodbã yeela woto: “Tɩbsgã wɛɛngẽ, kamb nins sẽn pa ta yʋʋm 16 sã n yãk bãmb sẽn date, b segd n basame tɩ b wilg tɩ bãmb meng n tags neer n yaool n na n yãk b raabo, la tɩ pa yãadr ye.”

²³ A April yellã sõnga wʋsgo, bala kɩtame tɩ bʋ-kaoodb sull ning sẽn tar noor n yɩɩdã wilg tɩ kõstitisiõ wã kõta biig sẽn nan pa kãsem me sor t’a yãk a yam. Sẽn deng yel-kãngã, kamb nins sẽn nan pa ta yʋʋm 16 tɩbsg wɛɛngẽ, bʋ-kaoodbã sã n da tagsdẽ tɩ logtoɛɛmbã sẽn yãk tɩbsg ningã sɩd yaa biigã neer yĩnga, b tara sor n na n yeel-b tɩ b maan bãmb sẽn yetã. La a April yellã poore, baa biig pa ta yʋʋm 16, bʋ-kaoodbã pa le tar sor n kɩɩs a yam-yãkrã ye. Yaa tɩlae tɩ b reng n bas tɩ biigã wilg a sã n tara yam sẽn sek a na yãk a meng raabo.

²⁴ Yel-kãngã welgrã sẽn kaoos yʋʋm a tãabã yɩɩ sẽk sãoong bɩ? A April meng yeelame tɩ pa sẽk sãoong ye.  Rũndã-rũndã, a tara laafɩ, n yaa wakat fãa so-pakda. Ad a sẽn yeele: “Baa m sẽn maanã sẽn pa tolg n yaa bõn-kãsengã, m sẽn mi tɩ sõngame t’a Zeova yʋʋrã paam waoogre, la wilg t’a Sʋɩtãan yaa ziri yagdã, m sũur nooma wʋsgo.” A April makrã wilgdame tɩ kom-bõonegã me tõe n talla raoodo, n wilg tɩ b sɩd yaa Wẽnnaam Rĩungã poorẽ dãmba.—Mat. 21:16.

25, 26. Kãadem kaoob poore, yel-bʋg n tõe n zĩndi?

²⁵ A Zeova yeelame t’a ratame tɩ roagdbã wub b kambã tɩ zems ne yẽ noyã. (Tõo. 6:6-8; Ef. 6:4) Tʋʋm-kãngã a sẽn bobl-bã pa nana, sẽn yɩɩd fãa, roagdbã sã n wa kao kãadmã. Kãadmã kaoob poore, roagd fãa sẽn dat n wub kambã to-to wã mi n yaa toore. Wala makre, roagd a ye sã n yaa a Zeova Kaset soaba, a na n tagsdame tɩ yaa tɩlae t’a wub biig fãa tɩ zems ne Biiblã sẽn yetã, t’a to wã sẽn pa a Zeova Kaset soabã tõe n pa sak rẽ ye. La roagd ning sẽn yaa a Zeova Kaset soabã pa segd n yĩm tɩ baa b pa le yaa pag ne a sɩda, bãmb b yiibã ket n yaa kãmbã roagdba.

²⁶ Roagd ning sẽn pa a Zeova Kaset soabã tõe n tɩ yãa bʋ-kaoodbã, n dat tɩ b kõ yẽ sor t’a wub kambã, sẽn na yɩl n paam n zãms-b yẽ tũudmã. Neb kẽer tagsdame t’a Zeova Kaset rãmbã wubrã weoogda kambã. B yetame tɩ kambã pa tõe n maan rogem daar tẽegr kibsa, fɛt baa a ye, la tɩ b sã n bẽedẽ me, roagdbã pa sakd tɩ b ning-b zɩɩm n “fãag b yõyã” ye. Zu-noogo, bʋ-kaoodb wʋsg pa get roagdã tũudum sã n weoogda kambã bɩ pa weoogd-b ye. Sẽn pak-b n yɩɩd yaa kambã neere. D na n goma makr a wãn yelle.

27, 28. Neb kẽer yetame t’a Zeova Kaset rãmbã wubrã weoogda kambã. Bõe la Ohio bʋ-kaoodb sull ning sẽn tar noor n yɩɩdã yeel rẽ wɛɛngẽ?

²⁷ Etazĩni: Yʋʋmd 1992, yell a woto buud la b tall n kẽng Ohio tẽngã bʋ-kaoodb sull ning sẽn tar noor n yɩɩdã taoore. Yaa rao sẽn pa a Zeova Kaset soab n da tɩ yã bʋ-kaoodba, n yeel-b t’a pʋg-kʋdrã sẽn yaa a Zeova Kaset soabã sã n na n wub b bi-riblã, na n namsa biigã. B saka raoã sẽn yeelã, n wilg tɩ biigã na n zĩnda ne yẽ. B yeelame tɩ biigã tõe n tɩ gesa a ma wã, la t’a ma wã pa tog n “zãms-a bɩ n togs-a a Zeova Kaset rãmbã sẽn tẽed bũmb ninsã baa bilf ye.” B noorã ra yaa toaag wʋsgo. Yaa wa b sẽn yeel bal t’a Jennifer Pater sẽn yaa biigã ma wã pa tar sor n gomd Biiblã yelle, bɩ noy nins sẽn be Biiblã pʋgẽ wã yell ne a biigã ye. Tags-y n ges-y a sũurã sẽn sãam to-to! La a yeelame tɩ yellã pʋgẽ, a bãngame t’a segd n maaga a menga, la a gũ t’a Zeova welg yellã. A wa n yeela woto: “Wakat fãa, a Zeova ra bee ne maam.” A Zeova Kaset rãmbã siglgã sull ning sẽn get bʋ-kaoorã yɛlã sõnga pagã avoka t’a na n taas yellã Ohio bʋ-kaoodb sull ning sẽn tar noor n yɩɩdã, tɩ b welg-a.

 ²⁸ Bʋ-kaoodb sul-kãng pa sak no-sɩɩr ning pipi rãmbã sẽn dɩkã ye. B yeela woto: “Roagd fãa tara sor n na n wub a biiga. Dẽnd a tara sor n na n wilg-a sẽn segd la sẽn pa segde, la a zãms-a a tũudmã.” B paasame tɩ sã n pa bʋ-kaoodbã tara kaset sẽn wilgd t’a Zeova Kaset rãmbã sẽn zãmsd b kambã bũmb ninsã tõe n kɩtame tɩ biigã wa pa tar yĩns keelem wall a yamã pa ta, b pa tar sor n na n yeel tɩ biig kõn zĩnd ne a roagda, a tũudum yĩng ye. Bʋ-kaoodb sul-kãng pa yã bũmb sẽn wilgd t’a Zeova Kaset rãmbã sẽn tẽed bũmb ninsã tõe n kɩtame tɩ biigã wa pa tar yĩns keelem wall a yamã ka ta ye.

29-31. Danemarke, bõe yĩng tɩ b zãgs tɩ saam-bi-poak kõn deeg a bi-pugl n zã, la no-sɩɩr bʋg la bʋ-kaoodb sull ning sẽn tar noor n yɩɩdã rɩk-yã?

²⁹ Danemark: Yell a woto buud n paam a Anita Hansen. A sɩd-kʋdrã tɩ yãa bʋ-kaoodba, n dat tɩ b kõ-a sor t’a reeg b bi-pugl a Amanda sẽn tar yʋʋm a yopoe wã. Bʋ-kaoodb a taab n yaool n da zoe n kao bʋʋdã yʋʋmd 2000 wã, n yeel t’a Amanda na n zĩnda ne a ma. Ne rẽ fãa la a sɩd-kʋdrã sẽn tall yellã n kẽng bʋ-kaoodb sull sẽn tar noor n yɩɩd taoorã. Bãmb zãgsa pipi bʋ-kaoodbã sẽn yeelã, n kõ-a sor t’a reeg biigã. B yeelame tɩ sẽn mik tɩ yaa tũudmã n kɩt tɩ roagdbã pa zemsd taab biigã wubr wɛɛngẽ wã, yaa ba wã n tõe n welg yel-kãng tɩ zemse. Dẽnd yaa saam-bi-poak a Hansen sẽn yaa a Zeova Kaset soabã yĩng bal la b sẽn zãgs tɩ biigã kõn zĩnd ne-a wã.

 ³⁰ Yellã sasa, pa yɩ nana ye. Saam-bi-poak a Hansen sũurã ra mi n sãamdame, hal t’a pa mi a sẽn na n yeel bũmb ning a pʋʋsg pʋgẽ ye. Ad a sẽn yeele: “Rom dãmb 8:26 ne 27 goamã kenga m raood sõma. M da neeme t’a Zeova mii m sẽn dat n kos-a bũmb ningã. A ra geta maam la a be ne-m wakat fãa.”—Karm-y Yɩɩl Sõamyã 32:8; Ezai 41:10.

³¹ Saam-bi-poak a Hansen taasa yellã Danemark bʋ-kaoodb sull ning sẽn tar noor n tɩ yɩɩdã. Bãmb no-sɩɩrã pʋgẽ, b yeela woto: “Yel-kãngã buud pʋgẽ, b tog n bao n bãnga biigã sẽn na n kẽng a soab nengẽ tɩ naf-a n yɩɩda.” B paasame tɩ pa a Zeova Kaset rãmbã sẽn “tẽed bũmb ninsã bɩ b sẽn yetã” la b tog n tik n bãng biigã sẽn na n zĩnd ne a soabã ye. B tog n bao n bãnga roagd fãa manesem sẽn yaa to-to mo-yõsr sasa, n tik rẽ n yãke. Bʋ-kaoodbã sak n deegame tɩ pagã sã n deeg a Amanda, rẽ n na n yɩ sõma n yɩɩda. Saam-bi-poak a Hansen sũur yɩɩ noog wʋsgo!

32. Bõe yĩng tɩ d tõe n yeel tɩ Erop bʋ-kaoodb sull ning sẽn get ninsaalbã dʋrwa-rãmb yellã sõngame tɩ b pa paam n maan roagdb sẽn yaa a Zeova Kaset rãmb zãmbo?

³² Erop tẽns toɛy-toɛy pʋsẽ: Wakat ninga, yaa bʋ-kaoodb sul toɛy-toɛyã no-sɩɩrã n kɩɩsd taab biigã sẽn na n zĩnd a soab nengẽ wã zugu, hal tɩ wa ta Erop bʋ-kaoodb sull ning sẽn get ninsaalbã dʋrwa-rãmb yellã. Naoor a yiibu, sul-kãngã yãame tɩ tũudmã yĩnga, tẽnsã bʋ-kaoodb sulã sẽn tall manesem ning ne roagd ning sẽn yaa a Zeova Kaset soabã yaa toor ne roagd a to wã. B yeelame tɩ rẽ yaa zãmbo, n wilg tɩ bʋ-kaoodb “sã n ges tũudmã sẽn pa a ye wã, n tik rẽ bal n welg yelle, pa zems ye.” Erop bʋ-kaoodb sul-kãngã no-sɩɩrã nafa pag a ye sẽn yaa a Zeova Kaset soaba, hal t’a sũur yɩ noogo. A yeelame: “B sẽn da yeel tɩ mam weoogda m kambã sɩd ra namsd-m-la wʋsgo. Mam sẽn yaool n da maandã fãa yaa sẽn na yɩl tɩ b paam m sẽn tagsd tɩ tara yõod n yɩɩdã, wubr sẽn na n sõng-b tɩ b wa lebg kiris-neba.”

33. Bõe la roagdb sẽn yaa a Zeova Kaset rãmb tõe n maane, tɩ wilg tɩ b tũuda Filip rãmb 4:5 sẽn yetã?

³³ Roagdb nins sẽn yaa a Zeova Kaset rãmba, n be yel-kãngã pʋgẽ wã modgdame n na n wilg tɩ b yaa wʋmdba, n maand sũ-mare. (Karm-y Filip rãmb 4:5.) B sã n paam tɩ b kõ-b sor tɩ b na n wub b kambã Wẽnnaam noyã pʋgẽ, noom-b lame, la b pa yĩmd me tɩ roagd ning sẽn pa a Zeova Kaset soabã sã n data, yẽ me tara sor n na n kẽes a toog kambã wubr pʋgẽ ye. Roagd sẽn yaa a Zeova Kaset soab pa maand laas-laas kambã wubr pʋgẽ ye. Bõe yĩng tɩ d yet woto?

34. Wãn to la a Nehemi wakatẽ zʋɩf rãmbã kibarã tõe n naf roagdbã?

³⁴ D gom bũmb sẽn zĩnd a Nehemi wakatẽ wã yelle. Zʋɩf rãmbã ra tʋmda wʋsg sẽn na yɩl n lebs n me Zerizalɛm lalsã la b maneg-ba. B ra miime tɩ rẽ na n kogla bãmb ne b zagsã rãmba, tɩ bɛɛbã sẽn da gũbg-bã ra paam-b ye. Sɩd me, a Nehemi yeel-b lame tɩ b yik n ‘zab n fãag b saam-biisã ne b kambã la b pagbã ne b tẽngã.’ (Neh. 4:8) Zʋɩf rãmbã ra neeme tɩ yaa tɩlae tɩ b maan b sẽn tõe fãa zabrã pʋgẽ. Woto  me, roagdb nins sẽn yaa a Zeova Kaset rãmbã maanda b sẽn tõe fãa, sẽn na yɩl n wub b kambã tɩ b kẽn sɩdã sor zugu. B miime tɩ wakat fãa, lekollẽ wã la sakã pʋgẽ, kambã yãta yɛl buud toor-toor sẽn tõe n kʋɩɩb-ba. Ne tele wã, ẽntɛrnetã la bũmb a taab maasem, yel-kãens meng tõe n bʋʋga kambã zakẽ wã. Roagdba, bɩ y ra yĩm tɩ yaa tɩlae tɩ y maan y sẽn tõe fãa y kom-dibli wã ne y kom-pugli wã yĩnga, sẽn na yɩl tɩ zakã pʋgẽ bɩ b paam bũmb ning fãa sẽn na n sõng-b tɩ b tẽebã tall pãnga.

35, 36. A Zeova Kaset rãmbã sẽn modg sẽn na yɩl n paam sor n tũud a Zeova tɩ gɩdgr kaẽ wã, wãn to la rẽ naf-ba? Bõe la d ned kam fãa yãk yam n na n maane?

³⁵ A Zeova siglgã sɩd modgda sẽn na yɩl tɩ zĩig fãa bɩ d paam sor n tũud a Zeova. Sãmbs kae t’a ningda d modgrã barka. Wẽnnaam nin-buiidã sẽn maood woto wã kɩtame tɩ b mi n paam segb n kõ kasetã bʋ-kaoodb la neb kʋʋng taoore. (Rom 1:8) Sẽn paase, b sẽn paam bʋʋm naoor wʋsgã sõnga neb ka tɛk sẽn pa a Zeova Kaset rãmb tɩ b paam sor n maand bũmb kẽere. La d sẽn yaa Wẽnnaam nin-buiidã, d pa baood n na n toeem tẽnsã laloa rãmba, d leb n pa neb sẽn baood n na n wilg tɩ tõnd la nin-tɩrs ye. Sẽn yɩɩd fãa, yaa sẽn na yɩl n paam sor n lugl tũudum hakɩkã, la d sõng t’a paam pãngã yĩng la d sẽn tall yɛl n kẽng bʋ-kaoodbã taoorã.—Karm-y Filip rãmb 1:7.

³⁶ D yãame tɩ neb n mao b pãng fãa sẽn na yɩl tɩ d paam sor n tũud a Zeova tɩ gɩdgr kaẽ ye. Yaa mak-sõng sẽn wilgd tɩ b talla tẽebo. Bɩ d mogd n dɩk yam b kibayã pʋgẽ, n da tags tɩ pa tar yõod ne-d ye! D ket n tũud a Zeova, n kɩs sɩd t’a na n teela d tʋʋmdã, la a kõ-d pãng tɩ d tõog n maan a raabã.—Ezai 54:17.