1, 2. (a) Kico ta proba cu bo ta un ciudadano di e Reino di Dios? (b) Dicon tabatin biaha cu testigonan di Jehova mester a lucha pa libertad di religion?

 BO TA un ciudadano di e Reino di Dios? Si bo ta un testigo di Jehova, claro cu si. Kico ta e prueba di bo ciudadania? Esey no ta un paspoort ni un otro documento oficial. Mas bien, e prueba di bo ciudadania ta e manera cu bo ta adora Jehova Dios. Adoracion berdadero no ta encera solamente loke bo ta kere, sino tambe loke bo ta haci: obedece e leynan di e Reino di Dios. Nos adoracion tin di haber cu tur aspecto di nos bida, incluso e manera cu nos ta cria nos famia y hasta kico nos ta haci ora nos ta confronta cierto problema di salud.

² Pero no ta semper e mundo aki ta respeta nos precioso ciudadania y su rekisitonan. Tin gobierno a purba di restringi nos adoracion of hasta prohibie. Tabatin biaha cu ciudadanonan di Cristo mester a lucha pa e derecho di biba segun e leynan di e Rey Mesianico. Pero esaki mester straña nos? No. Den tempo biblico tambe e pueblo di Jehova hopi biaha mester a lucha pa e derecho cu nan tin di adora Jehova.

3. Pakico e pueblo di Dios mester a lucha den tempo di Reina Ester?

³ Por ehempel, den tempo di Reina Ester, e pueblo di Dios mester a lucha hasta pa nan keda na bida. Dicon? Pasobra e Prome Minister malbado, Haman, a conseha Rey Asuero di Persia pa laga mata tur Hudiu cu tabata biba den teritorio di su reino. Dicon? Pasobra “nan leynan [tabata] diferente for di esnan di tur otro pueblo.” (Est. 3:8, 9, 13) Acaso Jehova a laga su sirbidornan na caya? No. El a bendiciona e esfuerso cu Ester y Mardokeo a haci ora cu nan a apela na e Rey di Persia pa proteha e pueblo di Dios.—Est. 9:20-22.

4. Kico nos lo trata den e capitulo aki?

⁴ Kico di nos tempo? Manera nos a mira den e capitulo anterior, tabatin biaha cu autoridadnan gubernamental a opone testigonan di Jehova. Den e capitulo aki, nos lo trata algun manera cu e gobiernonan ey a purba di restringi e manera cu nos ta rindi adoracion na Dios. Nos lo concentra riba tres aspecto general: (1) nos derecho di existi como un organisacion y di adora Dios manera nos ta desea, (2) e libertad di scoge tratamento medico cu ta na harmonia cu principio biblico y (3) e derecho di mayornan  di cria nan yiunan di acuerdo cu e normanan di Jehova. Den cada un di e aspectonan aki, nos lo mira con ciudadanonan leal di e Reino Mesianico a lucha cu curashi pa proteha nan ciudadania precioso y con Jehova a bendiciona nan esfuerso.

5. Kico ta e beneficionan cu reconocemento legal ta duna cristiannan berdadero?

⁵ Acaso nos tin mester di reconocemento legal di gobiernonan humano pa nos adora Jehova? No, pero cu reconocemento legal ta bira mas facil pa nos por reuni libremente den nos mes Salonnan di Reino y Salonnan di Asamblea, pa nos por imprimi y importa literatura biblico y pa nos por comparti e bon noticia abiertamente cu nos prohimo sin niun problema. Den hopi pais, testigonan di Jehova ta legalmente registra y ta disfruta di e mesun libertad pa adora Dios cu miembronan di otro religionnan legalmente reconoci. Pero kico a sosode ora cu gobiernonan a nenga di duna nos reconocemento legal of a purba di restringi nos derechonan fundamental?

6. Ki reto testigonan di Jehova na Australia a confronta na cuminsamento di decada di 1940?

⁶ Australia. Na cuminsamento di decada di 1940, e gobernador general di Australia a haya cu nos creencianan a bay contra e interesnan di nan pais den tempo di guera. Esey a hiba na un prohibicion di nos actividadnan. Testigonan di Jehova no por a reuni ni predica abiertamente, y autoridadnan a cera Betel y confisca Salonnan di Reino. Tabata hasta prohibi pa hende tin nos literatura biblico. E rumannan na Australia a sigui traha den secreto pa varios aña, y porfin dia 14 di juni 1943 Corte Supremo di Australia a revoca e prohibicion.

7, 8. Conta un tiki tocante con e rumannan na Rusia a lucha pa adora Jehova libremente a traves di añanan.

⁷ Rusia. Testigonan di Jehova mester a biba pa hopi decada bou di prohibicion di e regimen comunista, pero finalmente na 1991 nan a ser registra oficialmente. Despues cu Union Sovietico a separa for di otro, e Federacion di Rusia a duna nos reconocemento legal na 1992. Pero algun opositor—principalmente esnan liga cu Iglesia Ortodox Ruso—no a keda contento ora nan a mira con rapido e cantidad di testigo di Jehova tabata crece. Cinco biaha opositornan a entrega keho contra testigonan di Jehova entre 1995 y 1998. Cada biaha cu nan a haci esey, fiscal no a haya niun evidencia di actonan criminal. E opositornan a sigui persisti y a cuminsa cu un caso civil na 1998. Na prome instante, e Testigonan a gana e caso, pero e opositornan no tabata di acuerdo cu e veredicto y a apela e caso. E Testigonan a perde e caso ey na mei 2001. Na october 2001 nan a bolbe habri e caso, y na 2004 esey a hiba na e veredicto pa disolve e entidad legalmente registra cu testigonan di Jehova ta uza na Moscu y prohibi su actividadnan.

⁸ Esey a hiba na un ola di persecucion. (Lesa 2 Timoteo 3:12.) Nan a intimida y ataca testigonan di Jehova, confisca nan literatura  religioso y a bira hopi dificil pa e rumannan huur of construi luganan di adoracion. Imagina bo con nos rumannan lo a sinti nan ora nan tabata confronta e dificultadnan ey. Na 2001, e rumannan a apela na Corte Europeo di Derechonan Humano, y na 2004 nan a entrega informacion adicional na e corte ey. Na 2010, Corte Europeo di Derechonan Humano a yega na su decision. Segun e corte ey, tabata bisto cu Rusia a prohibi e actividad di testigonan di Jehova pa motibo di intolerancia religioso. Pues segun e veredicto, nan no por a bay di acuerdo cu e decisionnan di e cortenan mas abou, ya cu e Testigonan no a haci nada malo. Ademas, Corte a menciona cu meta di e prohibicion tabata pa kita tur derecho legal for di e Testigonan. Pero e decision di Corte a sostene nan derecho di libertad di religion. Aunke te ainda varios autoridad Ruso no a cumpli cu e veredicto di Corte Europeo di Derechonan Humano, e victorianan ey ta anima e pueblo di Dios masha hopi mes.

9-11. Na Grecia, con e pueblo di Jehova a lucha pa nan derecho di por reuni pa adora Dios, y kico tabata e resultado?

⁹ Grecia. Na 1983, Titos Manoussakis a huur un camber na Heraklion, Creta, pa asina un grupo chikito di testigo di Jehova por a reuni eynan pa adora Dios. (Heb. 10:24, 25) Pero poco despues, un pastoor ortodox a entrega un keho na polis; e tabata contra e echo cu e Testigonan tabata uza e camber pa practica nan religion. Dicon el a haci esey? Djis pasobra e creencianan di testigonan di Jehova ta diferente for di esnan di Iglesia Ortodox. Ministerio Publico a cuminsa un caso penal contra Titos Manoussakis y tres otro Testigo local. Nan a haya un boet y a ser sentencia na dos luna di prizon. Como ciudadano leal di e Reino di Dios, e Testigonan a considera e decision di corte un violacion di nan libertad di religion. Pues, nan a sigui bringa nan caso den e cortenan di e pais y cu tempo a apela na Corte Europeo di Derechonan Humano.

¹⁰ Finalmente, na 1996, Corte Europeo di Derechonan Humano a tuma un decision cu a resulta di ta un golpi duro pa opositornan di adoracion puro. E Corte ey a declara “cu pa definicion di ley di Grecia testigonan di Jehova ta cay den e categoria di ‘religion conoci’” y cu e decisionnan di e cortenan mas abou “a afecta e libertad di religion di e demandantenan directamente.” Ademas, Corte a haya cu no ta keda na gobierno di Grecia pa “determina si e creencianan religioso of e maneranan cu e creencianan ey ta ser expresa ta corecto of no.” Corte a anula e sentencianan contra di e Testigonan y a sostene nan libertad di religion.

¹¹ Acaso e victoria ey a resolve e situacion na Grecia? Lamentablemente cu no. Na 2012, un caso similar na e stad Casandrea a termina finalmente despues di un bataya legal di casi 12 aña. Den e caso ey, un obispo ortodox tabata esun tras di e asunto. E Conseho di Estado, cu ta e corte administrativo di mas halto  na Grecia, a dicta fayo na fabor di e pueblo di Dios. Den e decision cu corte a tuma nan a referi na e constitucion di Grecia cu ta garantisa libertad di religion y a refuta e acusacion cu bes tras bes hende sa haci, esta, cu testigonan di Jehova no ta un religion conoci. Corte a declara: “E doctrinanan di ‘testigonan di Jehova’ no ta scondi y, consecuentemente, nan religion ta un religion conoci.” Miembronan di e congregacion chikito na Casandrea ta contento cu awor nan por reuni pa adora Dios den nan propio Salon di Reino.

12, 13. Na Francia, con opositornan a purba di uza e tactica di “hasi inhustisia legal”, y cu ki resultado?

¹² Francia. Algun opositor di e pueblo di Dios a uza e tactica di “hasi inhustisia legal.” (Lesa Salmo 94:20.) a Por ehempel, meymey di decada di 1990, servicio di impuesto na Francia a cuminsa cu un audit, of control di finanza, di e Association Les Témoins de Jéhovah, un di e entidadnan legal cu testigonan di Jehova ta uza na Francia. E Minister di Presupuesto a revela e berdadero meta di e control: “E audit lo por hiba na likidacion of un caso penal ..., loke probablemente lo destabilisa e funcionamento di e asociacion of oblig’e di stop cu su actividadnan den nos teritorio.” Aunke nan no a topa cu nada straño durante e audit ey, autoridadnan a cobra e asociacion di testigonan di Jehova un suma di belasting exorbitante. Esey tabata un golpi duro. Si e tactica aki a funciona, e rumannan lo no por a haci nada otro cu cera sucursal y bende e edificionan pa nan por a paga e belasting sumamente halto aki. Pero e pueblo di Dios no a entrega. Testigonan di Jehova no a acepta e trato inhusto aki y a cuminsa un caso, y na 2005, finalmente a hiba e caso Corte Europeo di Derechonan Humano.

¹³ Corte a duna su veredicto dia 30 di juni 2011. Segun Corte, libertad di religion no ta duna Estado derecho di evalua si creencianan religioso of e manera cu nan ta ser expresa ta corecto of no, excepto den casonan extremo. Ademas, Corte a declara: “E belasting cu nan a cobra ... tabatin como consecuencia cu nan a blokia e recursonan importante di e asociacion, y esey a pone cu e asociacion ya no ta den un posicion pa percura pa su miembronan practica nan creencianan na un manera liber.” Corte a dicidi unanimamente na fabor di testigonan di Jehova. Esta contento e pueblo di Jehova na Francia tabata ora cu porfin gobierno Frances a debolbe e belasting cu nan a cobra e asociacion di testigonan di Jehova! Di acuerdo cu e ordo di Corte, nan a debolbe e belasting cu interes y a kita e beslag cu nan a pone riba propiedad di sucursal.

14. Kico abo por haci pa yuda den e lucha pa libertad di religion?

¹⁴ Mescos cu Ester y Mardokeo di pasado, awe e pueblo di Jehova ta lucha pa e libertad di adora Jehova na e manera cu el a manda nan. (Est. 4:13-16) Kico abo por haci pa yuda den e lucha ey? Bo por haci oracion regularmente pa bo rumannan den fe cu ta sufriendo  di “inhustisia legal.” E oracionnan ey por ta un gran yudansa pa nos rumannan cu ta confronta dificultad y persecucion. (Lesa Santiago 5:16.) Pero Jehova ta contesta e oracionnan ey? Claro cu si! Nos victorianan den corte ta prueba di esey.—Heb. 13:18, 19.

15. Kico e pueblo di Dios ta tene cuenta cu ne en conexion cu uzo di sanger?

¹⁵ Manera nos a menciona den Capitulo 11, ciudadanonan di e Reino di Dios a haya instruccion biblico cla y raspa cu nan mester evita mal uzo di sanger, algo cu a bira asina comun awe. (Gen. 9:5, 6; Lev. 17:11; lesa Echonan 15:28, 29.) Aunke nos no ta acepta transfusion di sanger, nos kier e mihor cuido medico posibel pa nos mes y pa nos sernan keri, pero e tratamento ey mester ta na harmonia cu e leynan di Dios. E cortenan di mas halto di hopi pais a reconoce cu hende tin derecho di scoge of nenga tratamento medico a base di nan consenshi y creencia religioso. Pero den algun pais e pueblo di Dios a confronta retonan grandi relaciona cu esaki. Laga nos wak algun ehempel.

16, 17. Kico un ruman muher na Japon a experencia, y con Jehova a contesta su oracionnan?

¹⁶ Japon. Misae Takeda, un ama di cas di 63 aña, mester a haci un operacion grandi. Como un ciudadano leal di e Reino di Dios, el a splica su dokter bon cla cu e kier haci e operacion sin sanger. Pero algun luna despues, el a keda den shock ora el a haya sa cu toch nan a dun’e transfusion di sanger durante su operacion. Ruman Takeda a sinti su mes viola y engaña. Pues, na juni 1993 el a entama un caso contra e dokternan y e hospital. E ruman humilde y di caracter suave aki tabatin un fe firme. Cu curashi, el a duna testimonio den un sala di corte gepak cu hende pa mas cu un ora largo, a pesar cu su salud tabata hopi delicado. El a presenta den corte pa ultimo biaha apenas un luna prome cu el a muri. Sin duda, nos ta admira Ruman Takeda su fe y curashi. El a bisa cu constantemente e tabata pidi Jehova bendiciona su esfuerso. E tabata sigur cu Jehova lo contesta su oracionnan. Esey a sosode?

¹⁷ Tres aña despues cu Ruman Takeda a muri, Corte Supremo di Japon a dicta fayo na su fabor. Corte a bay di acuerdo cu ne cu dokternan no mester a dun’e un transfusion di sanger contra su boluntad. E veredicto di 29 di februari 2000 a declara cu den casonan asina mester respeta e derecho cu un hende tin di dicidi pa su mes kico e kier, ya cu esaki ta cay bou di derechonan personal. Ruman Takeda tabata determina pa lucha pa su libertad di scoge tratamento medico cu ta na harmonia cu su consenshi entrena pa Bijbel. Danki na esey, testigonan di Jehova na Japon awor por haya tratamento medico sin miedo cu dokternan lo duna nan un transfusion di sanger contra nan boluntad.

18-20. (a) Con Corte Supremo di Argentina a reconoce e derecho cu un persona tin di nenga transfusion di sanger via di un carchi di instruccion medico? (b) Relaciona cu mal uzo di sanger, con nos por demostra cu nos ta sumiso na Cristo?

 ¹⁸ Argentina. Por sosode cu un persona ta inconsciente y tin cu tuma un decision medico. Con nos como ciudadanonan di Reino por prepara nos mes pa un situacion asina? Nos ta cana semper cu un documento legal cu ta expresa nos deseonan, manera Pablo Albarracini a haci. Na mei 2012, el a haya varios herida di bala durante un intento di atraco. E tabata inconsciente ora el a yega hospital, y pesey e no por a splica su posicion encuanto transfusion di sanger. Pero e tabatin hunto cu ne un carchi di instruccion medico valido cu el a yena mas cu cuater aña prome. Pablo su condicion tabata serio, y algun dokter tabata di opinion cu pa scapa su bida mester a dun’e transfusion di sanger. Pero e personal medico tabata dispuesto pa respeta su deseo. Pero e tata di Pablo, cu no tabata testigo di Jehova, a logra haya un ordo hudicial pa anula e deseonan di su yiu.

¹⁹ Di biaha e abogado cu a representa e esposa di Pablo a apela e decision. Den un par di ora so, Corte di Apelacion a anula e ordo di Corte di Prome Instancia y a dicta cu dokternan mester respeta e deseonan cu e pashent a expresa den e carchi di instruccion medico. E tata di Pablo a apela e ora ey na Corte Supremo di Argentina. Pero, Corte Supremo no tabatin niun duda cu Pablo a yena su carchi di instruccion medico, cu a expresa su deseo pa no tuma transfusion di sanger, cu e debido comprondemento, discernimento y libertad. Corte a declara: “Tur persona adulto y cu sano huicio tin e capacidad pa duna instruccion di antemano encuanto [su] salud y por acepta of rechasa cierto tratamento medico ... E dokter encarga mester acepta e instruccionnan aki.”

²⁰ Mientrastanto, Ruman Albarracini a recupera completamente. E cu su esposa ta contento cu el a yena su carchi di instruccion medico. Tumando e paso ey cu ta simpel, pero importante, el a demostra su sumision na Cristo, e Rey di e Reino di Dios. Abo cu bo famia tambe a tuma e medida ey caba?

21-24. (a) Dicon Corte Supremo di Canada a tuma un decision grandi relaciona cu menornan di edad y uzo di sanger? (b) Con e caso aki lo por anima sirbidornan hoben di Jehova?

²¹ Canada. Por lo general, cortenan ta reconoce e derecho cu mayornan tin pa determina kico ta e mihor cuido medico pa nan yiunan. Pero tabatin biaha cu cortenan hasta a yega di dicta cu mester respeta un menor maduro ora ta trata di tumamento di decisionnan medico. Esey tabata e caso di un mucha muher cu yama April Cadoreth. Tempo April tabatin 14 aña, el a bay hospital cu sangramento interno pisa. Un par di luna prome, el a yena un carchi di Instruccion Medico Delanta cu a bisa specificamente pa no dun’e sanger ni den caso di emergencia. E dokter cu a trata April a dicidi di no haci caso di e deseonan cu el a expresa bon cla y a busca un ordo di corte pa dun’e sanger. Nan a dun’e un transfusion di tres saco di sanger contra su boluntad. Mas despues, April a conta cu el a sinti comosifuera nan a viol’e.

 ²² April cu su mayornan a bay corte. Despues di dos aña, nan a hiba e caso dilanti di Corte Supremo di Canada. Aunke tecnicamente April a perde e caso cu el a entama relaciona cu violacion di su derechonan constitucional, Corte a ordena e contrapartida pa paga e gastonan di e caso y a duna un veredicto cu a beneficia April y otro menornan maduro cu kier eherce nan derecho di dicidi pa nan mes ki tratamento medico nan lo kier haya. Corte a declara: “Den e contexto di tratamento medico, mester duna hobennan bou di 16 aña [na Canada, un menor ta un persona bou di 16 aña] e oportunidad di demostra mediante e decision cu nan a tuma encuanto un cierto tratamento medico cu nan ta suficiente madura y cu ta trata di nan propio pensamento.”

²³ E caso aki ta importante den e sentido cu Corte Supremo a trata e derecho constitucional di menornan maduro. Prome cu e veredicto aki, un corte na Canada por a duna autorisacion pa un mucha bou di 16 aña haya tratamento medico si e corte a haya cu e tratamento tabata na bienestar di e mucha. Pero despues di  e veredicto aki, un corte no por autorisa niun tratamento contra di e boluntad di hobennan bou di 16 aña sin ofrece nan prome e oportunidad di demostra cu nan ta suficiente madura pa tuma nan propio decisionnan.

²⁴ E bataya ey di tres aña largo tabata bale la pena? Segun April: “Si!” Awor e ta pionero regular y bon di salud, y el a bisa: “Mi ta masha feliz mes cu mi por a hunga un papel chikito den purba di glorifica e nomber di Dios y duna prueba cu Satanas ta un mentiroso.” E experencia di April ta mustra cu nos hobennan por tin e curashi pa tuma un posicion firme y asina proba cu nan ta berdadero ciudadano di e Reino di Dios.—Mat. 21:16.

25, 26. Ki situacion por surgi despues di divorcio?

²⁵ Jehova a confia mayornan cu e responsabilidad di cria nan yiunan segun Su normanan. (Deu. 6:6-8; Efe. 6:4) E tarea ey no ta facil, pero e por bira mas dificil ainda den caso di divorcio. E mayornan su punto di bista tocante e manera cu mester cria nan yiunan por ta completamente diferente for di otro. Por ehempel, un mayor testigo di Jehova kisas ta convenci cu mester lanta un mucha segun normanan cristian, mientras cu e mayor cu no ta Testigo kisas no ta di acuerdo cu esey. Claro cu un mayor Testigo mester reconoce cu maske divorcio a kibra e relacion matrimonial, e relacion di mayor si ta keda intacto.

²⁶ Kisas e mayor cu no ta Testigo ta pidi corte dun’e custodia di e yiu of yiunan pa asina e por dicidi den ki religion e ta lanta su yiu. Tin di nan ta insinua cu un mucha ta ser perhudica si lant’e como testigo di Jehova. Kisas nan ta argumenta cu e muchanan lo ser priva di hacimento di aña, di dianan di fiesta y di un transfusion di sanger cu lo por “salba nan” den caso di un emergencia medico. Nos ta contento cu mayoria di corte ta wak loke ta na bienestar di e mucha, en bes di djis husga si nan ta haya cu e religion di un mayor ta perhudicial of no. Laga nos wak algun ehempel.

27, 28. Con Corte Supremo di Ohio a reacciona riba e acusacion cu un mucha ta ser perhudica si su mayor lant’e como un testigo di Jehova?

²⁷ Merca. Na 1992, Corte Supremo di Ohio a trata un caso den cua e tata cu no ta Testigo a bin dilanti cu e acusacion cu su yiu homber chikito lo a ser perhudica si e mama a lant’e como un testigo di Jehova. Corte di Prome Instancia a bay di acuerdo cu e tata y a dun’e custodia di e yiu. E mama, Jennifer Pater, a haya derecho di bishita e yiu, pero corte a orden’e pa no “siña ni expone e mucha den ningun manera na e creencianan di testigonan di Jehova.” E ordo aki di e corte mas abou tabata asina amplio cu bo por a interpreta cu e ordo di corte no a permiti Ruman Pater ni sikiera papia cu su yiu homber, Bobby, tocante Bijbel ni tocante e normanan moral di Bijbel. Bo por imagina bo con Jennifer a sintie? El a sintie hopi malo, pero el a bisa cu el a  siña tene pasenshi y warda pa Jehova interveni. El a bisa: “Jehova semper tabata hunto cu mi.” Su abogado, cu yudansa di e organisacion di Jehova, a apela na Corte Supremo di Ohio.

²⁸ Corte Supremo no tabata di acuerdo cu e corte mas abou y a declara cu “mayornan tin un derecho fundamental di educa nan yiunan, esey ta inclui siña nan norma- y balornan moral y religioso.” Corte a declara cu a menos cu por a proba cu e norma- y balornan cu testigonan di Jehova ta promove lo a perhudica e bienestar fisico y mental di e mucha, e corte mas abou no tabatin derecho di pone restriccion riba e derechonan di custodia di un mayor a base di su religion. Corte no a haya niun prueba cu e creencianan religioso di e Testigonan lo a perhudica e bienestar mental of fisico di e mucha.

29-31. Dicon un ruman muher na Dinamarca a perde custodia di su yiu muher, y kico Corte Supremo di Dinamarca a dicidi tocante e asunto?

²⁹ Dinamarca. Anita Hansen a confronta un situacion similar ora cu su ex-casa a pidi corte p’e haya custodia di nan yiu muher Amanda di shete aña. Aunke corte di districto a duna Ruman Hansen custodia na aña 2000, e tata di Amanda a apela na un otro corte cu a anula e veredicto di corte di districto y duna e tata custodia. Segun rasonamento di e corte ey, ya cu e mayornan su punto di bista di bida tabata na conflicto cu otro pa motibo di nan creencianan religioso, e tata lo tabata den mihor posicion pa trata cu e conflictonan ey. Basicamente, anto,  Ruman Hansen a perde custodia di Amanda pasobra e ta testigo di Jehova.

³⁰ Durante e experencia dificil aki, Ruman Hansen tin biaha tabata asina angustia cu e no tabata sa kico pa pidi den oracion. El a conta: “Pero e palabranan di Romanonan 8:26 y 27 tabata un gran consuelo pa mi. Semper mi a sinti cu Jehova tabata compronde kico mi kiermen. Semper e tabata pendiente di mi y semper e tabata sostene mi.”—Lesa Salmo 32:8; Isaias 41:10.

³¹ Ruman Hansen a apela na Corte Supremo di Dinamarca. Corte a declara den su veredicto: “Lo dicidi e cuestion di custodia a base di un evaluacion concreto di loke ta na mihor interes di e mucha.” Ademas, Corte a declara cu un decision tocante custodia mester ta basa riba e manera cu cada mayor ta maneha conflicto, no riba e “doctrinanan y puntonan di bista” di testigonan di Jehova. Esta un alivio Ruman Hansen a sinti ora cu Corte a reconoce cu e ta apto como mayor y a bolbe dun’e custodia di Amanda!

32. Con Corte Europeo di Derechonan Humano a proteha mayornan cu ta testigo di Jehova contra discriminacion?

³² Varios pais na Europa. Tin biaha, ni sikiera e cortenan di mas halto den un pais ta logra resolve algun caso dificil relaciona cu custodia di yiu. Den casonan asina, Corte Europeo di Derechonan Humano ta trata e asunto ey. Den dos caso, Corte Europeo di Derechonan Humano a reconoce cu e cortenan nacional mas abou a trata mayornan testigo di Jehova y esnan cu no ta Testigo diferente for di otro, simplemente a base di nan religion. Corte Europeo di Derechonan Humano a yama e tipo di trato ey discriminatorio y a dicta cu “no ta aceptabel pa haci un distincion basa principalmente riba diferencia di religion so.” Un mama testigo di Jehova cu a beneficia di un decision asina di Corte Europeo di Derechonan Humano a expresa e alivio cu el a sinti, bisando: “A duel mi masha hopi mes ora nan a acusa mi di ta perhudica mi yiunan, mientras cu e unico cos cu mi tabata purba di haci ta duna nan loke mi a pensa tabata lo mihor pa nan: un educacion cristian.”

33. Con mayornan cu ta testigo di Jehova ta aplica e principio di Filipensenan 4:5?

³³ Claro cu mayornan cristian ta haci esfuerso pa ta rasonabel ora cu nan ta purba di kita nan derecho di inculca normanan di Bijbel den curason di nan yiunan. (Lesa Filipensenan 4:5.) Mescos cu nan ta aprecia e derecho cu nan tin di educa nan yiunan den e caminda di Dios, asina tambe nan ta reconoce cu e mayor cu no ta Testigo, si e ta desea, tambe tin derecho di cumpli cu su responsabilidad como mayor. Con serio un mayor cu ta Testigo ta tuma su responsabilidad di educa su yiu?

34. Con mayornan cristian awe ta beneficia di e ehempel di e Hudiunan den tempo di Nehemias?

³⁴ Nos por siña hopi for di un ehempel den tempo di Nehemias. E Hudiunan a traha duro pa drecha y reconstrui e murayanan di Jerusalem. Nan tabata sa cu esaki lo a proteha nan y nan famia contra e nacionnan enemigo cu tabata biba rond di nan.  Pa e motibo ey, Nehemias a urgi nan: “Bringa pa boso ruman hombernan, boso yiu hombernan, boso yiu muhernan, boso esposanan y boso casnan.” (Neh. 4:14) Pa e Hudiunan ey, e lucha tabata bale la pena. Awendia ta mescos, mayornan cu ta testigo di Jehova ta traha duro pa cria nan yiunan den e caminda di e berdad. Nan sa cu nan yiunan ta ser bombardia cu mal influencia na scol y den bario. E mal influencia ey por drenta e ambiente di bo cas sin cu bo sa via medionan di comunicacion. Mayornan, no lubida nunca cu ta bale la pena pa bringa pa boso yiu hombernan y yiu muhernan pa asina boso por percura un ambiente sigur den cua nan lo bay bon spiritualmente.

35, 36. Ki beneficio nos a ricibi door di lucha pa nos derechonan legal, y kico ta bo determinacion?

³⁵ Un cos ta sigur, Jehova a bendiciona e esfuerso di su organisacion di tempo moderno den nan lucha pa e derecho di adora Dios libremente. Como resultado, e pueblo di Dios hopi biaha a haya oportunidad di duna un bon testimonio den corte y na e publico en general. (Rom. 1:8) Un otro beneficio di e tantisimo victorianan legal ey ta cu nan a reforsa e derechonan civil di hopi hende cu no ta Testigo. Pero, como e pueblo di Dios, nos no ta boga pa reformanan social ni nos no ta haci tur e esfuersonan aki djis pa proba cu nos tin rason. Principalmente, testigonan di Jehova ta bay corte pa defende y promove adoracion puro.—Lesa Filipensenan 1:7.

³⁶ Laga nos nunca lubida e lesnan cu nos por siña for di e ehempel di nos rumannan, kende a demostra fe den nan lucha pa e libertad di por adora Jehova. Laga nos tambe keda fiel, y mustra cu nos tin confianza cu Jehova ta sostene nos trabou y ta sigui duna nos e fortaleza pa haci su boluntad.—Isa. 54:17.