1, 2. 1) ¿Imaynatá rikuchisunman Diospa Reinonpa kamachiyninpi llajtayoj jina kasqanchejta? 2) ¿Imaraykutaj Jehovaj testigosnin mayta kallpachakunanchej karqa religión jina kananchejta saqenawanchejpaj?

 ¿DIOSPA Reinonpa kamachiyninpi llajtayoj jinañachu kanchej? Jehovaj testigosnenqa ajina kasqanta nisunman. ¿Imaynatá chayta rikuchisunman? Mana uj documentonejtachu, manaqa imaynatachus Jehovata yupaychasqanchejnejta. Jehovata yupaychaytaj mana imapi creeyllachu, astawanqa Diospa Reinonpa leyesninta kasukunanchej tiyan. Arí, kausayninchejpi rikuchinanchej tiyan Jehovata yupaychasqanchejta: wawasninchejta uywasqanchejpi, imaswanchus jampichikuyta ajllasqanchejpipis.

² Kay pacha runastajrí, Diospa Reinonpi llajtayoj jina kasqanchejta, imastachus juntʼananchejtapis mana allinpajpunichu qhawanku. Wakin gobiernosqa Diosta yupaychayninchejta jarkʼayta munanku chayri chinkachiyta. Wakin kuteqa Reinoj kamachiyninpi kajkuna, mayta kallpachakunanchej karqa Reinoj kamachiykunasninman jina kausakojta saqenawanchejpaj. Chaytaj mana kay tiempollapichu. Jehovaj llajtanqa, ñaupa tiempomantapacha sapa kuti kallpachakunan karqa, Diosta yupaychayta atinanpaj.

3. ¿Imapajtaj reina Esterpa tiempopi Diospa llajtan kallpachakorqa?

³ Reina Esterpa tiempopeqa, Diospa llajtan mayta kallpachakorqa mana chinkachisqa kananpaj. Kuraj kamachi Amanqa, Persiamanta rey Asuerota nerqa judiosta chinkachinanta. Imaraykuchus judiospa “kamachiykunasninkoqa waj jinataj” karqa (Est. 3:8, 9, 13, Qheshwa Biblia). ¿Jehová kamachisninmanta qonqaporqachu? Mana. Astawanpis, Esterwan Mardoqueowan reymanta Diospa llajtanta jarkʼananta mañakojtinku yanaparqa (Est. 9:20-22).

4. ¿Imastá kay yachaqanapi yachakusun?

⁴ Kay tiempopipis kikillanpitaj rikukunchej. Kay libroj 14 yachaqananpi yachakorqanchej jina, wakin kuteqa gobiernos Jehovaj testigosninman churanakunku. Kay yachaqanapitaj yachakusun, Jehovata yupaychasqanchejta imaynasmantachus jarkʼayta munasqankuta. Kaykunamanta parlarisun: 1) Diospa llajtan uj organización jina kayta atisqanmanta, chantá imaynatachus Diosta yupaychayta ajllayta  atisqanmanta; 2) Bibliaj yuyaychaykunasninman jina jampichikuyta ajllayta atisqanmanta; 3) tatas Jehovaj kamachiykunasninman jina wawasninkuta uywayta atisqankumanta. Chantapis qhawarisun Diospa kamachisnin Reinoj kamachiyninpi llajtayoj jina kasqankuta valechinankupaj, imastachus mana manchachikuspa ruwasqankuta, imaynatatajchus Jehová kallpachakusqankupi yanapasqantapis.

5. ¿Imaynatá yanapawanchej gobiernos religión jina kananchejta saqewasqanchej?

⁵ Jehovata sirvinapaj, ¿necesitanchejchu gobiernos religión jina kanata saqenawanchejta? Mana. Chaywanpis saqewasqanchejrayku Tantakuna Wasispi, Jatun Tantakuna Wasispi ima tantakuyta atinchej, publicacionesninchejta imprimiyta, waj ladosmantaj apachiyta atinchej, sumaj willaykunatataj tukuyman willayta. Ashkha suyuspeqa, Jehovaj testigosnin leyesman jina autoridadespajpi qhelqasqa kashanku, waj religiones jinataj ruwanasninkuta juntʼayta atinku. Chaywanpis wakin kuteqa, autoridades religión jina kananchejta mana saqewanchejchu, nitaj cristiano jina ruwanasninchejta juntʼajtapis. ¿Imatá ruwanchej ajinapi rikukuspa?

6. ¿Imapitaj Australia suyumanta Jehovaj testigosnin 1940 wata chaynejpi rikukorqanku?

⁶ Australia. Kay 1940 watas qallariy chaynejpi, Australia suyumanta vicepresidente nerqa, Jehovaj testigosnin imaspichus creesqanku guerrapi atipanapaj mana yanapasqanta. Chayraykutaj niña saqerqachu religión jina kanankuta, tantakunankuta, nitaj Diosmanta willanankutapis. Chantapis Betelta wisqʼacherqanku, Tantakuna Wasistataj qhechorqanku. Publicacionesninchejqa ni pejpata kapunanchu karqa. Chayrayku Jehovaj testigosnenqa ashkha watasta pakayllamanta cristiano ruwanasninkuta juntʼarqanku. Kay 1943 watapi 14 junio killapi, Australia suyumanta Tribunal Superior nisqaqa, Jehovaj testigosninpa contranpi nikusqanta niña valecherqachu.

7, 8. ¿Ima demandaspitaj Rusiamanta hermanosninchej rikukorqanku?

⁷ Rusia. Comunistas nisqa kamachishajtinku Jehovaj testigosnintaqa ashkha watasta mana saqerqankuchu religión jina kanankuta. Kay 1991 watapiraj leyesman jina autoridadespajpi qhelqasqa karqanku. Unión Soviética nisqa chinkajtintaj, Rusia suyupi 1992 watapi religión jina rejsisqa kanankuta nikorqa. Chaywanpis pisi tiemponmanqa, Rusia suyupi Ortodoxa Iglesiamanta churanakojkuna, Diospa kamachisnin usqhayllata yapakushasqanrayku phiñakorqanku. Chayrayku 1995, 1998 wataspi, phishqa kutita Jehovaj testigosninta demandarqanku. Chaywanpis fiscalqa, mana ima juchatapis Jehovaj testigosninpi tarerqachu. Chay churanakojkunataj, 1998 watapi ujtawan demandarqanku. Qallariypeqa  Jehovaj testigosnin chay demandapi atiparqanku, churanakojkunataj atipaytapuni munaspa tukuy imata ruwarqanku. Kay 2001 watapitaj mayo killapi Jehovaj testigosninta atiparqanku. Chay watallapitaj octubre killapi, watejmanta chay demanda tribunalesman chayarqa. Kay 2004 watapitaj Moscú llajtapi nikorqa, Jehovaj testigosnin niña religión jina kanankuta, ruwanasninkutapis niña juntʼanankuta.

⁸ Chayrayku sinchʼi qhatiykachay qallarerqa (2 Timoteo 3:12 leey). Jehovaj testigosnintaqa mayta ñakʼaricherqanku, publicacionesta qhechorqanku, tantakuna wasista alquilakunankuta chayri ruwanankutapis ni saqellajchu kanku. Hermanosninchejqa chay jinapi rikukuspa may llakisqachá kasharqanku. Kay 2001 watapeqa Tribunal Europeo de Derechos Humanos nisqaman demandakorqanku, 2004 watapitaj chay demanda astawan sutʼinchakunanpaj waj imastawan rikucherqanku. Chantá 2010 watapi chay Tribunalpi nikorqa, Rusia suyupi religión kanankuta mana saqekusqanqa waj religionniyoj kajkunata chejnisqankuraykulla kasqanta. Mana ima juchatapis Jehovaj testigosninpi tarispataj, ñaupaj tribunalespi nikusqanta niña valecherqachu. Chantapis nillarqataj chay waj tribunalespi nikusqanqa, mana leyesman jinachu kasqanta. Chayrayku, Jehovaj testigosnin religión jina kayta atisqankuta nikorqa. Rusiamanta ashkha autoridades chayta niraj valechejtinkupis, Tribunal Europeo nisqapi nikusqanqa hermanosninchejta mayta kallpacharqa.

9-11. ¿Imatataj Greciapi Diospa llajtan ruwarqa religión jina kananpaj, chaytaj qhasichu karqa?

⁹ Grecia. Kay 1983 watapi Titos Manoussakis, uj cuartota alquilakorqa Iráklion llajtapi (Creta), chaypi Jehovaj testigosnin tantakunankupaj (Heb. 10:24, 25). Pisi tiemponman Ortodoxa Iglesiamanta sacerdote, paykunata denunciaykorqa. ¿Imaraykú? Jehovaj testigosnin imapichus creesqanku, iglesianpi creesqankuwan mana kikinchu kasqanrayku. Autoridadesqa Titos Manoussakis hermanota, kinsa hermanostawan demandarqanku, multarqanku, iskay killapajtaj wisqʼaykorqanku. Paykunaqa, Diospa Reinonpa kamachiyninpi llajtayojkuna jina kaspa, chay tribunalpi nikusqan mana leyesman jinachu kasqanta yacharqanku. Chayraykutaj chay suyumanta tribunalesman demandakorqanku. Chantá Tribunal Europeo de Derechos Humanos nisqakama chayarqanku.

¹⁰ Kay 1996 watapeqa Tribunal Europeo nisqa, cheqa yupaychayman churanakojkunaj contranpi sayaykorqa. Nerqataj: “Jehovaj testigosnenqa Greciamanta leyes nisqanman jina religión kayta atinku, chay waj tribunalestaj chay leyesta mana valechinkuchu”. Chantapis nillarqataj Grecia  gobiernoqa mana niyta atisqanta, “imaspichus runas creenankuta chayri imaynatachus chay creesqankuta rikuchinankuta”. Jehovaj testigosninpa contranpi nikusqantaqa niña valecherqachu, religión kayta atisqankutataj nerqa.

¹¹ Chaypi atipasqankurayku, ¿Greciapi hermanospa chʼampaykunasninku allinchakorqachu? Mana. Jinapis 2012 watapi Casandrea llajtapi (Grecia) uj demandapi atipallarqankutaj. Chay demandataqa, Ortodoxa Iglesiamanta obispo ruwarqa, 12 watasta jinataj mana allinchasqa karqa. Chaywanpis Greciamanta aswan jatun tribunal Consejo de Estado nisqa, Diospa llajtanta atipacherqa. Chaypajtaj Grecia suyoj leyesninmanta parlarqa, mayqenpichus tukuy runas religionniyoj kayta atisqankuta nin. Jehovaj testigosnin religión jina kayta atisqankutataj nerqa. Consejo de Estado nisqa kayta nerqa: “‘Jehovaj testigosnenqa’ imaspichus creesqankuta mana pakankuchu, chayrayku ley nisqanman jina uj religión kayta atinku”, nispa. Kay tiempopeqa Casandrea llajtapi qotuchakuymanta kajkuna may kusisqa kashanku, Tantakuna Wasinkupi tantakusqankumanta.

12, 13. ¿Imatataj Franciapi enemigosninchej ruwarqanku, imataj chayrayku karqa?

¹² Francia. Diospa llajtanta chinkachiyta munaspa, wakin enemigosqa “leypa contrampi sajrata ruwanku” (Salmo 94:20 leey). Sutʼincharinapaj, 1995 wata chaynejpi Franciamanta autoridades Jehovaj testigosnin (Association Les Témoins de Jéhovah) mashkha qolqeyojchus kasqankuta yachayta munaspa tantakorqanku. Qolqemanta cargoyoj ministro imapajchus chay tantakuyta ruwasqankumanta kayta nerqa: “Kay tantakuyta ruwakusqanrayku, [Jehovaj testigosninpa oficinasninku] wisqʼakunanta chayri leyman jina juchachasqa kanankuta nikunman [...]. Chayraykutaj kay suyupi ruwanasninkuta niña juntʼayta atinkumanchu chayri sayachipunkuman”. Autoridadesqa ni ima juchata tarispapis, Jehovaj testigosninmanta ashkha qolqeta orqhoyta munarqanku. Pagachinkumanpuni karqa chayqa, hermanosqa sucursalta wisqʼaspa venderparinkuman karqa chay chhika qolqeta paganankupaj. Chayqa may llakiy karqa, jinapis Diospa llajtanqa mana jinallachu qhepakorqa. Hermanosqa mana cheqantachu ruwakushasqanta nerqanku, 2005 watapitaj Tribunal Europeo de Derechos Humanos nisqakama chayarqanku.

¹³ Tribunalqa 2011 watapi 30 junio killapi, sutʼincharqa: tukuy runas religionniyoj kayta atisqankuta, gobiernotaj imaspichus runas creenankuta chayri imaynatachus chayta rikuchinankuta mana niyta atisqanta, imapis anchapuni kajtillan chaytaqa niyta atisqanta. Chantá kaytawan nerqa: “Chay chhika qolqeta mañasqankoqa, [...] mana ruwanasninkuta juntʼajta saqerqachu”, nispa. Tribunalpi kajkunaqa  Jehovaj testigosninta atipacherqanku. Franciamanta gobiernoqa, pagachisharqaña chay qolqeta kutichiporqa interesnintawan. Chaytaj may kusiy Diospa llajtanpaj karqa. Chantapis Tribunal kamachisqanman jina, sucursaltaqa niña qhechorqankuchu.

14. ¿Imaynamantataj noqanchejpis yanapakuyta atisunman?

¹⁴ Esterpa chantá Mardoqueoj tiemponkupi jinallataj, kay tiempopipis Jehovaj llajtanqa kamachisqanman jina Payta yupaychanankupaj ni ima jarkʼananta saqenkuchu (Est. 4:13-16). Noqanchejpis yanapakuyta atisunman, qhasimanta ñakʼarishanku chay hermanospaj Diosmanta mañapuspa. Chaytaj ñakʼarishajtinku, qhatiykachasqa kashajtinku ima mayta yanapanman (Santiago 5:16 leey). ¿Jehová uyarinchu chay mañakusqanchejta? Tribunalespi demandasta atipasqanchejqa uyarisqanta rikuchin (Heb. 13:18, 19).

15. ¿Imatá Reinoj kamachiyninpi llajtayoj jina kajkuna yuyanku yawarwan jampichikuymanta?

¹⁵ Kay libroj 11 yachaqananpi yachakorqanchej jina, Diospa Reinonpa kamachiyninpi llajtayoj jina kajkunaqa, mana yawarwan jampichikunamanta imatachus Biblia kamachisqanta sutʼita yachanku. Kay tiempopitajrí runasqa, chaywanpuni jampichikunku (Gén. 9:5, 6; Lev. 17:11; Hechos 15:28, 29 leey). Mana yawarta churachikuspapis, noqanchejqa familianchejpis allinta jampichikuyta munanchej, Diospa kamachiykunasninta mana pʼakispalla. Ashkha suyusmanta jatuchaj tribunalesqa reparanku, runa conciencianman jina chayri religionninman jina imaynatachus jampichikuyta ajllayta atisqanta. Jinapis wakin suyuspeqa, Jehovaj llajtan chʼampaykunapi rikukun. Wakinmanta parlarina.

16, 17. ¿Imatataj Japonmanta uj hermanata ruwarqanku? ¿Imaynataj kasharqa chayta yachaspa, Diosrí mañakusqanta uyarerqachu?

¹⁶ Japón. Japonmanta hermana Misae Takeda pichus 63 watayoj, operachikunan karqa. Payqa, Reinoj kamachiyninpi llajtayoj jina kasqanrayku, doctorninman sutʼita nerqa mana yawarllawan operanankuta. Chaywanpis killasninmanqa yacharqa, operashaspa yawarta churaykusqankuta, nitaj ni imanakuyta aterqachu. Hermanaqa chay jinata ruwasqankurayku, chʼaukiyasqankuraykutaj 1993 watapi junio killapi doctoresta, hospitalta ima demandarqa. Chay hermanaqa, mana parlaysapachu kaspapis, sinchʼi creeyniyoj karqa. Chantá onqosqa kaspapis tribunalpi tukuy runaspa ñaupaqenpi uj hora kurajta sutʼincharqa. Niraj wañupushaspataj, killa ñaupajta watejmanta tribunalman rerqa. Mana manchachikuspa chayta ruwasqanta sumajpaj qhawanchej, creeyniyoj kasqantapis. Hermana Misaeqa chayta ruwananpaj Jehovamanta mana saykʼuspa mañakusqanta nerqa. Yacharqataj Jehová uyarinantapuni. ¿Uyarerqatajchu?

 ¹⁷ Hermana wañupusqanmanta kinsa watasninman, Japón suyupi Tribunal Supremo nisqaqa, hermanaj demandanta atipacherqa. Mana munashajtin yawarta churasqankoqa, mana allinchu kasqanta nerqa. Kay 2000 watapi 29 febrero killapi imatachus nikusqanqa, sutʼita rikucherqa “sapa runa imatachus ajllayta atisqanta jatunpaj qhawana” kasqanta. Hermana Misaeqa, Bibliamanta yachakusqanrayku, mana jinallachu qhepakorqa, ajllasqanta jatunpaj qhawanankuta munarqa. Chayta ruwasqanrayku, Japonmanta Jehovaj testigosnenqa jampichikushajtinku, yachankuña doctores mana yawarta churaykunankuta.

18-20. 1) ¿Imatataj Argentinapi uj tribunal nerqa yawarta mana churachikunapaj documentoyoj kaymanta? 2) ¿Imaynatataj rikuchisunman Reinoj kamachiyninpi kasqanchejta?

¹⁸ Argentina. Wakin kuteqa, Diospa Reinonpi llajtayoj jina kajkuna, ima kajtinpis wañuy patapi rikukusunman. Ajinapi rikukuspaqa, jampichikunapaj wakichisqa kananchej tiyan. ¿Imaynamantá? Uj documentota apaspa, imaynatachus Pablo Albarracini ruwarqa ajinata. Paytaqa 2012 watapi mayo killapi suwayta munaspa, sinchʼita balearparqanku. Hospitalman apashajtinkoqa wañuy patapi kasharqa, nitaj sutʼinchayta aterqachu yawarta mana churachikuyta munasqanta. Chaywanpis tawa wata kurajtaña uj documentota firmasqata apaykachakojpuni. Mana wañupunanpaj wakin doctores yawarta churana kasqanta yuyajtinkupis, chay documentota valecherqanku. Chaywanpis Pabloj tatanqa mana Testigochu karqa, uj ordentataj orqhokorqa wawanpa nisqanta mana valechinanpaj.

¹⁹ Pabloj warminpa abogadontaj demandarqapacha. Horasninmantaj tribunalqa, chay ñaupaj tribunal ordenta qosqanta mana valecherqachu, Pabloj documentonpi nisqanta valechinankutataj nerqa. Pabloj tatanqa, chay suyumanta Corte Suprema nisqakama chayarqa. Chaywanpis chaypeqa nerqanku, “Pablo yawarta mana churachikunapaj [documentoyoj kasqanta] valechinankuta. Imajtinchus chaytaqa paypuni allin yuyaywan ajllarqa, nitaj pipis tanqarqachu”. Chantapis, Corte Suprema nisqa kaytawan nerqa: “[Ley nisqanman jinaqa] wiñay tukusqaña kajkuna, uj documentota ruwayta atinku imaynatachus jampichikunankumanta chayri ima jampistachus qhesachanankumanta [...]. Chay documentostataj doctoresqa valechinankupuni tiyan”, nispa.

²⁰ Hermano Pabloqa sanoyapunña. Paywan warminwantaj mayta kusikunku chay documento kapusqanmanta. Hermanoqa chay documentota juntʼachisqanrayku, Diospa Reinonpa kamachiyninpi kasqanta rikucherqa. ¿Qanpata, familiaykipatapis chay documento kanñachu?

21-24. 1) ¿Imaraykutaj Canadapi Tribunal Supremo nisqa niraj 16 watayoj kajkunaj ajllasqankuta valecherqa? 2) ¿Imaynatataj waj cristiano jovenestapis chay yanapan?

²¹ Canadá. Tribunalespeqa yachanku, tatas ajllayta atisqankuta imawanchus wawasninkuta jampichiyta. Wakin kutitaj tribunalespeqa ninku, uj wawa yuyayniyojña kajtin,  imaynachus jampisqa kayta ajllayta atisqanta, chaytataj valechikunanta. Ajina karqa 14 watayoj April Cadoreth sutiyoj sipasitawan. Paytaqa yawarnin cuerponpi suruykusqanrayku, usqhayllata hospitalman aparqanku. Aprilqa ñaupaj killaspi documentota juntʼachisqa ni imarayku yawarta churanankupaj. Operasharqa chay doctortaj mana chayta valecherqachu, ordenta orqhospataj yawarta churaykorqa. Aswan qhepaman April nerqa chay doctor yawarta churaykusqan, abusay jina kasqanta.

²² Aprilwan tatasninwanqa tribunalesman rerqanku justicia ruwakunanta munaspa. Demandankutaj iskay watanman, Canadá suyupi Tribunal Supremo nisqakama chayarqa. April leyman jina mana atipajtinpis, Tribunalqa gastasqanta kutichiporqa. Chantapis imawanchus jampichikuyta ajllasqanta valechikunanta nerqa, jinallataj mitanmanta kajkunaj ajllasqankutapis. Tribunalpeqa kayta nikorqa: “Niraj 16 watayoj kajkunaqa imawanchus jampichikunankuta ajllayta atinku. Sichus allin yuyaywan,  sapallankumantataj ajllanku chayqa, nisqankuta valechikunan tiyan”, nispa.

²³ Ajinata Tribunal Supremo nerqa, imajtinchus repararqa ley nisqanman jinaqa allin yuyayniyojña kaj wawaspis ajllayta atisqankuta. Chayta tribunal manaraj nishajtenqa, niraj 16 watayoj kajkunata imaynatachus jampinamanta, mayqen tribunalpis ordenta qoyta atillaj. Kunantaj niña chayta ruwayta atinkuchu. Ñaupajtaqa sumajtaraj qhawarinanku tiyan, manaraj 16 watayoj kajkuna allinta ajllayta atinankupaj jinachus manachus kasqankuta.

²⁴ Chay kinsa watasta demandapi purisqanku, ¿qhasipajchu karqa? April nerqa mana qhasichu kasqanta. Kunanqa precursora regular, sanitutaj kashan. Pay nin: “Diospa sutin jatunchasqa kananpaj kallpachakusqayrayku, Satanás llulla kasqanta rikuchisqayraykutaj may kusisqa kashani”, nispa. Aprilpa kausaynenqa, sutʼita rikuchin jovenespis sumaj sayasqa kayta atisqankuta. Ajinamanta, Diospa Reinonpa kamachiyninpi llajtayoj jina kasqankuta rikuchinkuman (Mat. 21:16).

25, 26. ¿Imataj kanman uj qhariwarmi divorciakojtinku?

²⁵ Jehovaqa, kamachiykunasninman jina tatas wawasninkuta uywanankuta kamachin (Deu. 6:6-8; Efe. 6:4). Chayta ruwaytaj mana atikullanchu, astawanraj divorciasqas kanku chayqa. Ichapis imaynatachus wawasninkuta uywanankumanta mana kikintachu yuyankuman. Jehovaj testigosnenqa wawasninkuta Diospa kamachiykunasninman jina uywayta munanku, mana Jehovaj testigosnin kajkunataj ichá mana chayta allinpajchu qhawankuman. Testigos kajkunaqa reparanku, divorciakuspa niña qhariwarmi jinachu kasqankuta, chaywanpis mama chayri tata kasqankoqa mana tukukunchu.

²⁶ Jinapis mana Testigo kaj mama chayri tata, wawanta qhechukapuyta munanman. Wakin runasqa ninku, Jehovaj testigon jina wawas uywasqa kanankoqa mana allinchu kasqanta. Yuyankutaj diachakusmanta, fiestasmanta, imanarpakojtinkutaj yawarta churachikunankumanta jarkʼananta, mayqenchus “wañuymanta salvananta” ninku. Chaywanpis casi tukuy tribunalesqa wawaj allinninta maskʼanku, nitaj tataspa religionninkuman jinachu juzganku. Wakinmanta parlarina.

27, 28. ¿Imatataj Ohio llajtapi Tribunal Supremo nerqa Jehovaj testigosninpa religionninman jina wawas uywasqa kanankumanta?

²⁷ Estados Unidos. Kay 1992 watapi Ohio llajtamanta Tribunal Supremo nisqa uj demandata qhawarerqa, mayqenpichus uj tata nisharqa Jehovaj testigon jina wawan uywasqa kananqa mana allinchu kasqanta. Waj tribunalpeqa ajinapuni  kasqanta yuyaspa, tatan uywananta nerqa. Jennifer Pater mamanqa yoqallitunta watukoj riyta aterqa, chaywanpis “ni imaynamanta Jehovaj testigosnin imaspichus creesqankumanta yachachiyta” aterqachu. Tribunalpa kamachisqanman jinaqa, ichapis hermanaqa mana Bibliamanta, nitaj yuyaychaykunasninmantapis yoqallitunman parlayta atinmanchu karqa. Ajinapi rikukuspataj may llakisqachá kasharqa. Jinapis pacienciayoj kayta, Jehovapitaj suyakuyta yachakorqa. Hermana nin: “Jehovaqa noqawanpuni kasharqa”, nispa. Abogadanqa Diospa llajtan yuyaychasqanman jina, Ohio llajtapi Tribunal Supremo nisqaman demandarqa.

²⁸ Tribunal Supremo nisqaqa, mana chay uj tribunal jinachu nerqa. Astawanqa nerqa: “Tatasqa wawasninkuta yachachiyta atinku imachus allin kasqanmanta, religionmantapis”. Chantapis nillarqataj Jehovaj testigosnin yachachisqanku, wawaj kausayninpaj, yuyayninpaj ima mana allinchu kajtenqa sutʼinchakunanraj kasqanta, uj tribunaltaj mana religionman jinallachu juzganan kasqanta. Tribunal Supremo nisqaqa, Jehovaj testigosninpa religionninku wawaj kausayninpaj, yuyayninpaj ima allillan kasqanta repararqa.

29-31. ¿Imaraykutaj Dinamarcamanta uj hermana wawanta qhechuchikorqa, chantá imatá nerqa Tribunal Supremo nisqa?

²⁹ Dinamarca. Hermana Anita Hansen ajina chʼampayllapitaj rikukorqa. Qosan karqa chay runaqa tribunalman quejakuspa nerqa, qanchis watayoj wawan Amanda paywan  qhepakunanta. Kay 2000 watapitaj tribunal nerqa hermana Anita wawanta uywananta. Chaywanpis, wawanpa tatanqa aswan jatun tribunalman demandarqa. Chaypitaj nikorqa Amandata tatan uywananta. Amandaj tatasnin mana kikin religionniyojchu kasqankurayku, mana kikintachu yuyarqanku. Chayrayku tribunalpeqa nikorqa, tatallan wawanta uywananta. Anitaqa Jehovaj testigon kasqanrayku wawanta qhechuchikorqa.

³⁰ Payqa chay jina llakiypi tarikuspa mana yacharqachu imatachus Diosmanta mañakunantapis. Anita nin: “Romanos 8:26, 27 versiculospi nisqan mayta sonqochawarqa. Imatachus niyta munasqayta Jehová entiendesqanta repararqani. Payqa mana saqerpawarqachu, yanapawarqapunitaj” (Salmo 32:8; Isaías 41:10 leey).

³¹ Hermana Anitaqa Dinamarcapi Tribunal Supremo nisqaman chayarqa. Chaypitaj tribunalpi kayta nikorqa: “Pichus wawata qhawanan kasqantaqa, imachus wawaj allinninpaj kasqanman jina nikonqa”, nispa. Chantapis nerqa tatachus chayri mamachus wawata qhawanantaqa, imaynatachus chʼampaykunata allinchasqankuman jina nikunanta. Nitaj Jehovaj testigosnin “imaspichus creesqankuman jinachu”. Tribunal Supremo nisqaqa repararqa Anita allin mama kasqanta, wawantataj kutichicherqa.

32. ¿Imaynatataj cristiano tatasta yanaparqa Tribunal Europeo de Derechos Humanos nisqa?

³² Europaj suyusnin. Wakin kuteqa uj suyumanta jatun tribunalespipis mana allinchayta aterqankuchu piwanchus wawa qhepakunanta. Chay jina chʼampay kajtintaj, Tribunal Europeo de Derechos Humanos nisqa allinchanan karqa. Chaypitaj iskay kutipi nikorqa, chay ñaupaj tribunales Jehovaj testigosninta religionninkuraykulla mana allintachu juzgasqankuta. Tribunal Europeo nisqaqa chay ruwasqanku mana allinchu kasqanta niytawan, kayta nerqa: “Religionninkuraykulla mana cheqanta juzgasqankoqa mana allinchu”, nispa. Uj hermana chaywan yanapachikusqanmanta kayta nerqa: “Mayta sonqoy nanawarqa wawasniyta mana allintachu uywashasqayta niwajtinku. Noqaqa allinnillankuta munarqani: cristiano jina kausakunankuta”, nispa.

33. ¿Imaynatá Testigo tatas Filipenses 4:5 nisqanman jina ruwankuman?

³³ Testigo tatasqa, wawasninkuman Bibliamanta yachachiyta atisqankumanta demandaspi tarikuspa, maychus kajllata yuyanku (Filipenses 4:5 leey). Chantapis Diosmanta wawasninkuman yachachinankuta saqejtinku mayta agradecekunku. Reparankutaj tata chayri mama mana Jehovaj testigonchu kajtin, wawasta uywaysiyta atisqankuta. ¿Imaraykutaj wawasninkuta sumajta uywayta munanku?

34. ¿Imatataj cristiano tatas ñaupa tiempo judiosmanta yachakunkuman?

³⁴ Nehemiaspa tiemponmanta mayta yachakusunman. Judiosqa kallpachakorqanku Jerusalenpa perqasninta allinchanankupaj, watejmantataj jatarichinankupaj. Paykunaqa  yacharqanku chayta ruwaspa, enemigosninkumanta jarkʼakunankuta jinallataj familiankutapis jarkʼanankuta. Chayrayku Nehemías paykunaman nerqa: “Maqanakuychej ari llajta masisniykichejrayku, churisniykichejrayku, ususisniykichejrayku, warmisniykichejrayku, wasisniykichejraykupis”, nispa (Neh. 4:14). Chay judíos ajinata maqanakusqankoqa, allinninkupaj karqa. Kunanpis Cristiano tatasqa, wawasninkuta cheqan ñanpi uywanankupaj mayta kallpachakunku. Paykunaqa yachanku escuelapi, tiyakunku chaypipis sajra ruwaykuna chaupipi rikukusqankuta, chaytaj wasipipis telenejta chayri waj imasnejta kallanmantaj. Tatas, amapuni qonqaychejchu wawasniykichejta allinta uywanapaj kallpachakusqaykichejqa, mana qhasichu kasqanta.

35, 36. ¿Ima bendicionestataj Jehovaj testigosnin japʼinchej tribunalespi leyesman jina ruwakunanta maskʼasqanchejrayku? ¿Imatataj ruwayta munanki?

³⁵ Jehovaqa kamachisninta mayta yanapashan, payta yupaychanankupaj kallpachakusqankupi. Chayraykutaj Diospa llajtanqa sutʼinchan tribunalespi, tukuy runas yachanankutataj (Rom. 1:8). Chantapis Diospa llajtan tribunalespi atipasqanrayku, mana Testigo runastapis leyes yanapallarqataj. Chaywanpis Diospa llajtan jinaqa, mana waj leyesta orqhoytachu maskʼanchej, nitaj tukuy may sumajpaj qhawanawanchejtachu. Manaqa tribunalespi cheqallanta ruwakunanta munanchej, Diosta yupaychajtataj saqenawanchejta (Filipenses 1:7 leey).

³⁶ Jehovata yupaychajta saqenankupaj hermanosninchej mayta kallpachakusqankumanta, yuyarikunapuni. Noqanchejpis cheqa sonqollapuni kana. Atienekunataj Jehová yanapanawanchejpi, munayninta juntʼanapajpis pay kallpachanawanchejpi (Isa. 54:17).