1, 2. (a) Gini gopai nayugo na ni nga mo nga vuru ga Mbori Kindo? (b) Tipagine du si aida aDezire Yekova sovura aso tini ti kura aregbo tipa ka gbia ranirii nga ga irisombori?

YA MO vuru ga Mbori Kindo nga mo? Wangia mo Dezire Yekova, mo nga vuru ga Mbori Kindo! Ginihe nayugoho nga mo nga vuru ga Mbori Kindo? Pasipoti ngaha te, watadu gu kura awaraga nga ga agbia ngbii a te. Kuba gure, gu gopai nayugoho nga, gu gene mo airiso Yekova Mbori ngbaha. Ndikidi irisombori adigongo kina kuti ida gupai mo naidi kutini te. Si nakoda gupai mo amangaha, gbiati giasangba agu andiko nga ga ga Mbori Kindo. Tipa rani dunduko, gaani irisombori nabipa agu apai dũ ani amangaha rogo raka yo, kodihe na wai ani asonosa awirani gbiati wai ani angerafuo agu akpakarapai nga ga akaza.

² Ono tie, gu zegino ani araka rogoho re si airisango padu ani ni avuru ga Mbori Kindo watadu agu arugute nga gaha te. Gu kura azogarago ima asada ka rũ andiko furani tipa gaani irisombori watadu ka nyasariipa ha. Ti gu kura aregbo, ga Kristo azogo nasovura aso tipa ka raka ringbisihe na agu andiko du tipa ga Masiya Kindo. Ya mo iˈiriwopai du? Oó. Gu ga Yekova aboro du payo Baibiri yo, i anaasovura aso dedede tipa ka gbia ranirii ka iriso Yekova.

3. Gini vura ga Mbori aboro agbiatiyo na ni ti rago Nakindo Esetere?

³ Ni kpiapai, ti regbo Nakindo Esetere, ga Mbori aboro asovura aso tipa ka bata. Tipagine? Gu gbegberẽ Bazogo nangia Amana afu berãpai fu Bakindo aParaso nangia Asuerose nga i imi agu aYudo dũ naaraka rogo gako kindo bambiko gayo ‘arugute kia ti ga kura aboro dunduko.’ (Est. 3:​8, 9, 13) Ya mo Yekova ambu gako amoyambu? Wagusa te, ko afu maku kurii gu ome Esetere na Morudekai amangihe ka zungodi bakindo aParaso ko banda ga Mbori aboro.​—⁠Est. 9:​20-​22.

4. Gini apai ani ka sakapai tipaha rogo gi kapita re?

⁴ Na ginipai du tipa gi gaani regbo re? A wa ani abihe rogo gu kapita ye mbata fu gere, ti kura aregbo, abazogo aima sogote aDezire Yekova. Rogo gi kapita re, ani nika sakapai tipa gu bete agene agu azogarago re aˈasadi ka ká na ani ngbaha ti gaani irisombori. Ani nika gbeberã rani kuti apai biata nga: (1) gu rengo du ani na ni tipa kadu nga riigbu sa na ka irisombori wa gu ani aidaha, (2) gu ranirii du ani na ni ka sia ngbatunga gu husa kaza ani aidaha ringbisihe kuti gu bangua arengo nga ga  Baibiri, na (3) gu rengo nga ga avunguagude tipa ka sonosa awiriyo ringbisihe kuti ga Yekova arugute. Rogo agi abangiriaba re ni basasa, ani nika bi wai ruru avuru ga Masiya Kindo nasota nyanyaki tipa ka banda padu yo ni avuru ga Mbori Kindo na wai Mbori nafu maku kurii gayo ome.

5. Gini undo ndikidi aKristano agbiaha ho agbia ngbii aidaha ni fuyo i mangi gayo irisombori?

⁵ Ya mo si naida abazogo idihe aida furani mbata ani ki niru ka iriso Yekova? Oó, ono ho abazogo asigira gaani pambori ni, si nasaha taata tipa ani irisimbori, ni kpiapai, ka ye sa gaani adunguratise Bambu Kindo yo gbiati Kikindigi Adunguratise, ka ye na gu gaani awaraga du mburuhe rii Baibiri, na kini tungusipai fu gaani amurakporo zanga boro fudi rani. Rogo dungu aringara, gu pambori nga ga aDezire Yekova ni sigirasigiraha kuti andiko na i nagbia kina gu bangisa ranirii nga ga irisombori du gu kura apambori na ni. Ono ginipai ninaamanga ho abazogo aká ni ka sigira gaani pambori ringbisihe kuti andiko watadu ka rũ agu andiko naká na ani ti gaani ranirii?

6. Gini kpakarapai aDezire Yekova agbiatiyo na ni Australia yo rogo 1940?

⁶ Australia. Rogo agu agarã naatona ti 1940, gu bakere gavana (gouverneur) nangia ga Australia ko aya gaani pambori “angbanga te” si na ka na aboro ti sovura. I arugusi gaani sunge. Gene aadunga be aDezire Yekova tipa i nimangi gayo adunguratise watadu ka tungusapai gbaiga te, i akisi Betere, na ki zi aBambu Kindo. Agbia-ngbii aaidanga ka bi gaani awaraga be boro te. Fuo manga ani sunge ni gbuko tipa dungu agarã, agu aDezire Yekova du Australia yo agbia ranirii niyangaraha. Rogo Banzinga 14, 1943, gu Bakere Bambu Ngbanga nga ga Australia azakigene furani.

7, 8. Oni sakingo pai tipa wai awirinarani nasovura tipa gu ranirii nga ga irisombori Russia yo tipa dungu agarã.

⁷ Russia. Gu zogarago nangia ga Komunisti arugusi gaani sunge tipa gbanga regbo na niyangaraha, i asigiraha rogo 1991. Fuo i gbandaka agu aringara nangia ga Soviet Union (Union soviétique), abazogo asigira gaani pambori Russia yo rogo 1992. Ono tie, fuo regbo ngbutuko, gu kura asogorani gbe gu Kanisa Nga ga Orotodoksi du Russia yo, rago aangbanga tiyo na gaani sonakumbatayo te. Asogorani akiti ngbarani bara bisue ti mburu kuraha tona rogo 1995 kuti 1998. Ti aregbo dunduko, gu bainiparugute naazaka angbanga aabingo gbegberẽpai tirani te. Ome avurarani abatanga te, rogo 1998, i azaki ngbanga berewe kuti rani. ADezire Yekova aima du na diabese ti tonatonaha, ono avurarani angia kango koyo du agbiangbanga ni, na rogo Merekoko 2001, ngbanga ati na aDezire Yekova. I ape gu ngbanga re berewe rogo Tanvuo rogo gu garã re, na i ki sari he rogo 2004 ka zio gaani basunge du rogo gu bagbata nga Moscow na ki rugusi gaani sunge tungusapai.

 ⁸ Rungosiro atona ka manga ni bakerehe. (Oni gedi 2 Timoteo 3:​12.) I atona ka fuda aDezire Yekova na kini rungosiyo. I azi gaani awaraga pambori; ka i aidanga ha furani ani dua ba irisombori watadu ka tumo tipaha ya. Oni berẽnga pa wai awirinarani adu ho i agbiatiyo ni na gi kpakaraapai re! ADezire Yekova angia kango koyo du gu Bakere Bambu Ngbanga ni Nga ga Putu Du Tipa Agu Arengo Nga ga Aboro rogo 2001, na rogo 2004, i andu na gu kuraapai berewe ku ngbanga yo. Rogo 2010, gu Bambu Ngbanga Nga ga Putu re adiberã. Agbiangbanga abihe gbaiga nga agu abazogo nga ga Russia yo arugusi ga aDezire Yekova sunge mbiko i aaidanga na yo te na agbiangbanga ki ya i aidanga na gu diaberã nangia ga gu tooni bambu ngbanga re te, mbiko i abingo gu kerepai aDezire Yekova namangihe te. Agbiangbanga aya ndu pa rugusa ga aDezire Yekova sunge adu tipa ka dia gu ranirii kusayo du yo na ni. Agbiangbanga akaraga gu ranirii nga ga aDezire Yekova tipa irisombori. Wa vura duhe nga badungu agu abazogo nga ga Russia yo aaidanga kuti gu diaberã re te, gu ga Mbori aboro du rogo gu ringara re aima gbia bakere ngarasaro be agu adiabese re.

9-11. Wai du ga Mbori aboro asota tipa gu ranirii nga ga irisombori ringara aGiriki yo, na sangbanaha angia gine?

⁹ Ringara aGiriki. Rogo 1983, Wiriba Titos Manoussakis atumo bambu rogo gu bagbata nga Heraklion, rogo gu kisanga nga Crete, tipa awirina nimangi gayo adunguratise rogoho. (Eb. 10:​24, 25) Ngbutuko, gu bavugahe nga ga Orotodoksi ko akitingbanga ko fu agbia ngbii nga, aDezire Yekova nairisombori dimoyo. Tipagine? Mbiko gupai gbua nga agu aida nga ga aDezire Yekova andunga sa na gu Kanisa nga ga Orotodoksi te! Agbia-ngbii azaki ngbanga kuti Titos Manoussakis na gu kura awirina biata nga i kuondiko. I azi yo na ki saringbanga yo na adiwi ue ku bambukiso yo. Wa i angia ruru avuru ga Mbori Kindo, i abihe nga gu diaberã nga ga agbia-ngbii re na ká na gayo rengo nga ga irisombori, sidu, i andu ku ngbanga yo na ni yangaraha si ki da rogo gu Bakere Bambu Ngbanga Nga ga Putu.

¹⁰ Ni yangaraha, rogo 1996, gu Bakere Bambu Ngbanga Nga ga Putu re afu kina zee fu avura ndikidi airisimbori. Agbiangbanga abihe nga “aDezire Yekova nga gu pambori ‘aboro naima inopai tipaha’ ringbisihe kuti gu ndiko nga ga ringara aGiriki,” na gu diaberã nangia ga tooni bambu ngbanga “aima fuda gu ga aDezire Yekova ranirii nga ga irisombori.” Agbiangbanga aya gu zogarago nga ga ringara aGiriki na rengo behe tipa ka “diaberã singia agu aida nga ga apambori watadu gu gene si ayugoho ngbaha ni wenehe watadu si ni wenehe te.” I asaringbanga fu aDezire Yekova, na ki karaga gayo ranirii nga ga irisombori kubaha!

¹¹ Ya mo gu diabese re anyasiriipa agu akpakarapai naadu ringara aGiriki yo? Wagusa te. Rogo 2012, i asari gu kura ngbanga berewe rogo gu gbata nga Kassandreia, ringara aGiriki yo,  gu ngbanga re adi agarã wa 12. Bara gere, gu Bisopu nga ga Orotodoksi ko naye na gi sogote re. Gu bakere rondo nabipa angbanga ringara aGiriki yo (Council of State), asari gu ngbanga re fu ga Mbori aboro. Gayo diaberã adu riipa agu andiko nga ga ringara aGiriki nafu gu ranirii nga ga irisombori fu aboro na i ape gupai nga kungbopai du nga aDezire Yekova nga gu pambori aboro ainongo pai tipaha ya. Agbiangbanga aya: “Gu yugopai nga ga ‘aDezire Yekova’ ni igiigihe te, i nga gu pambori aboro naima inopai tipaha.” Gu tooni dungurati naadu Kassandreia yo adu na ngbarago nga i rengbe arengba ka manga gayo adunguratise awere rogo gayo Bambu Kindo.

12, 13. Wai du asogorani aasadi ka ye na “kpakarapai kuti rani nga ga ndiko” France yo na sangbanaha angia gine?

¹² France. Gu kura asogo ga Mbori aboro “nasanga irairapai” tipa ka zio ga Mbori aboro rogo andiko yo. (Oni gedi Atambuahe 94:20.) Ni kpiapai, bebere gu garã nangia 1990, agu aboro nangerakurii marã ngbeti France yo atona ka wisigo gu marã nga ga gu gaani be-basunge du yo nga Association Les Témoins de Jéhovah (ATJ), si nga gu rimo agbia-ngbii naini aDezire Yekova ti ni France yo. Bangerekurii gu basunge re ayugu ndu gupai i aawisigoho ti ni nga: “Wisigoho rengbe ka sa agbia ngbii i kisi be-basunge watadu ka ndu na agu aboro nangerakuriihe ku ngbanga yo . . . , na gure rengbe ka gbarasapa gaha sunge watadu ka rugusaha ti mangasunge rogo gaani dagbarago.” Wa i avuranga bi irairapai nibipa marã ya, agu abangerekurii marã ngbeti re atona ka dia marã ngbeti be gaani be-basunge ni bakerehe. Ka i adu na diabese na gipai re, gupai ka awirina arengbe ka mangaha sa angia ka kiso be-sunge watadu ka baga agu abambu du yo tipa ka tumo gu bakere marã ngbeti re na ni. Riko iˈiriwopai du naadu, ono ga Mbori aboro aonganga aonga te. Awirina ayugu gayo gberãrago tipa gupai re, na rogo 2005, i andu ku rogo Bakere Bambu Ngbanga Nga ga Putu.

¹³ Agbiangbanga asari gu ngbanga re rogo Banzinga 30, 2011. I aya si naida gu ranirii nga ga apambori ká na agbia ngbii ti rimiso tiyo tipa ka ino agu aida nga ga pambori singia si ruaru watadu si arunga te, i rengbe ka mangaha sa kina gu ka si du nga gu pambori re namanga gbegberẽpai. Kurigure, agbiangbanga aya: “I amoi gu marã ngbeti re . . . tipa ka nyasariipa gu marã nga ga be-basunge, na ka saha ka si mangingo sunge wenengai na gu ranirii nga ga irisombori wa gu si aidaha ya.” Agbiangbanga naabayo dũ asaringbanga fu aDezire Yekova! Awirina France yo adu na ngbarago nga, gu zogarago nga ga France akaraga gu marã naabaha si adihe ni marã-ngbeti na ki moi gu kuraha kuriihe ringbisihe kuti gupai agbiangbanga apehe, na i aasananga be-basunge tipa marã-ngbeti berewe te.

14. Wai du rengbe mo ka fubee sa gu vura du tipa gu ranirii nga ga irisombori?

¹⁴ A wa si adu tipa Esetere na Morudekai, ga Yekova aboro areme nasovura tipa ranirii ka iriso Yekova ngba gu gene ko azinahe  tipaha. (Est. 4:​13-​16) Ya mo oni rengbe ka fu bee sa ni? Ii. Oni rengbe ka kpara tipa agu awirinaroni narungo awere be gu iraira sarangbanga nga ga agbia-ngbii. Ngbatunga agu akparakpee re rengbe ka undo agu awirinarani du rogo fudifudiapai gbiati arungosiro. (Oni gedi Yakoba 5:​16.) Ya mo Yekova namangapai kuti ngbatunga agu akparakpee re? Gaani adiabese nga ga angbanga nayugo ho nga ko namangaha amangaha!​​—⁠Eb. 13:​18, 19.

15. Gini arengo ga Mbori aboro amangapai kutini nibipa mangasunge na kure?

¹⁵ A wa ani abihe rogo Kapita 11, avuru ga Mbori Kindo aima gbia agu arugute du tipa zanga mangasunge na kure, na fu kure kutii kpotoseyo ima kpatafurã areme. (Bam. P. 9:​5, 6; Pa Mot. 17:11; oni gedi Amokedi 15:​28, 29.) Wa vura duhe nga ani adianga kure kutii kpotorani yo te, ani naida na gu wene gene husa ngba kisusi tipa rani gbiati gaani aboro ka si du nga gu gene husa kaza re atagbaganga tihe na ga Mbori andiko te. Dungu abambu ngbanga nga ga dungu aringara ima ida kuti gupai nga boro na boro du na rengo beni tipa ka sia gu gene husa kaza ni aidaha watadu ka ká gu sangbakpotoniyo asogaha. Ono tie, rogo gu kura aringara, ga Mbori aboro aima gbiatiyo na kere kpakarapai tipa gipai re. Ani wisigingo bete akpiapai.

16, 17. Gini gene husa kaza wirinarani sa agbiaha Japan yo nga gu nairiwo tiri, na wai du Mbori akaragapai kuti gari kparakpee?

¹⁶ Japan. Misae Takeda, nga gu diakumba garãri adu nga 63, aaida i gba ri. Wa ri angia ruru vuru ga Mbori Kindo, ri apehe gbaiga fu gari munganga nga ri aidanga ka dia kure kutii kpotoriyo te. Ono tie, fuo bete adiwi kusa, kina ngbari nazere ka gia gupai nga i aima fu kure kutii kpotoriyo. Rago agbere tiri ri ki zaki ngbanga rogo Banzinga 1993 kuti amunganga na kuti gu bambungua i agba ri rogoho. Gi wirinarani nangia bayee boro na ni boro umbasitise re aima du na nyanyaki idapase. Ri amangi nyanyaki dezirepai ku bangiri agbiangbanga dũ, na ki ru kuari ngbanga yo tipa saa sa ri ki vura kaa igirã vurũ. Ri andu berewe ku ngbanga yo ni yangaraha diwi ki mangi sa ri ki kpi. Ya mo rago angbanga tirani ka bi gari idapase na wingbaduse te? Wirinarani Takeda aya ri anaazungadi Yekova dedede tipa ko undo ri ri so gu vura re. Ri adu na kido nga Mbori nika karagapai akaraga kuti gari kpee. Si amangi wo?

¹⁷ Agarã biata fuo kpi ri, gu Bakere Bambu Ngbanga nga ga Japan asaringbanga furi ki ya si aarunga i fu kure kutii kpotoriyo te mbiko ri aima sogaha. Gu ngbanga i asarihe rogo Wegebe 29, 2000 aya, “gu rengo du tipa diaberã” rogo ngbatunga apai wa gure “si naida i irisihe nga ga boro diaberã du.” Mbiko gu ome ri amangihe ka sovura tipa gari ranirii nga ga sia gu ngbatunga gene husa kaza du na ngbanya kuti gu sangbakpotoriyo  Baibiri arabaha, aDezire Yekova areme Japan yo rengbe ka husa gayo akaza zanga i fu kure kutii kpotoyo yo ngbaome.

18-20. (a) Wai du bambu ngbanga sa Argentina yo aidipa ga boro rengo tipa ka ká mangasunge na kure tipa ka husa kaza? (b) Nibipa mangasunge na kure, wai du rengbe ani ka yugo gaani ra nigose fu ga Kristo pagbia?

¹⁸ Argentina. Wai du rengbe avuru ga Mbori Kindo ka mbakadatiyo ka si du nga si nika ida i mangi diaberã ti gu regbo kaza na kiisi ngbayo? Si naida ani di gu karte rengbe ka fura kubara rani wa gu si adu tipa Pablo Albarracini. Rogo Merekoko 2012, ko ati ku be abatuka na i ki nofo ko na bundu. I adika ko ku bambungua yo zanga ko inihe, na ka gene aadunga beko ka ya ko aidanga ka dia kure kutii kpotoko yo ya te. Ono tie, gu karte nazahe ti fu kure kutii kpoto boro yo adu kina beko (No Blood/Pas de Sang) nga gu ko aima hiisoho agarã biama kusayo. Wa vura duhe nga gako raka adu ngbapai na amunganga ki bihe nga si naida i fu kure afu kutii kpotokoyo tipa ka batasa ungako, i aima diaberã tipa ka irisa gako siapai. Ono tie, Ba Pablo naangianga Dezire Yekova ya andu ku ngbangayo tipa i idihe fuko i fu kure kutii kpoto wiriko yo.

¹⁹ Gu bainiparugute naafura kuba dia Pablo angia kango koyo du kura agbiangbanga ni. Vuru saa sa gbua, agu agbiangbanga re asaringbanga nga gu diaberã nga ga tooni bambu ngbanga re arunga te, na ki ya si naida i irisi gu diaberã nga ga borokaza, a wa duhe rogo gu karte re. Ba Pablo angia kango koyo du gu Bakere Bambu Ngbanga ni nga ga Argentina. Ono tie, Bakere Bambu Ngbanga aabingo “ndupai ka tikö kuti gupai nga [ga Pablo karte ko ahiisi he nayugo gako bipai nga ko aidanga ka dia kure te] mbiko ko ahiisi he na rugatinapai gbiati gu ranirii du ko na ni.” Agbiangbanga aya: “Boro na boro du na rengo beni tipa ka pepai mbu regbo kindi koyo tipa gupai ni aida i mangi kpotoni na ni, na ni ima rengba ka ida na gu kura gene husa kaza watadu ka kaha . . . Si naida gu munganga nangerafuo ni irisi gu gani diaberã re.”

²⁰ Wiriba Albarracini aima hu wenengai. Ko na diako na ngbarago tipa wai ko ahiisi gi karte re mbata fu regbo. Pa manga ko gu taata diandue du na nyanyakipaha re ayugupa gako ranigose fu ga Kristo zogarago vurube ga Mbori Kindo. Ya mo mo na gamo aborokporo ima mangapai wa gure?

21-24. (a) Wai du gu Bakere Bambu Ngbanga nga ga Kanada amangi nyanyakipa diaberã nibipa fu kure kutii kpoto rukutu agude yo? (b) Wai du rengbe gipai re ka ngarasa gu ga Yekova amoyambu nga paranga aboro?

²¹ Kanada. Dedede, abambu ngbanga ima inoho nga avunguagude na rengo beyo tipa ka sia gu gene husa kaza ngba tipa awiriyo. Ti kura aregbo, agbiangbanga aima idaha nga aboro irisi gu diaberã nga ga sosono gude nibipa sia gu gene husa kaza u aidaha. Gere nga gupai namangi tipa April Cadoreth. Ho garãri adu ni nga 14, i adika ri ku bambungua yo mbiko kure aaga ku vuriyo. Bete adiwi kusayo, ri ahiisi gu karte nazahe ti fu kure kutii kpoto boro yo nga ri aidanga i fu kure kutii kpotori yo te ka si vura du vurũ nga raka ri ngbapai. Gu munganga naangerafuo ri abasa gu gari diaberã re na ki ndu ku ngbanga yo agbiangbanga  idihe fuko ko fu kure kutii kpotori yo. I afu kure kutii kpotori yo ngbanga ome. Kusa, ri aringbisipa fu kure kutii kpotoriyo kuti kodaba nari ngbaome.

²² April na avunguri andu ku ngbanga yo tipa ruru sarangbanga. Fuo garã ue, i andu na gu ngbanga re ku rogo gu Bakere Bambu Ngbanga nga ga Kanada. Agbiangbanga akaraga gu marã dũ ri azaki ngbanga na ni wa si avura du nga anga gure nga gupai ri aidaha te na i ki saringbanga furi gbiati gu kura agude nga aguyo naida na gu rengo nga ga diaberã tipa gu gene husa kaza i aidaha. Bambu ngbanga aya: “Nibipa husa kaza, si naida i mbu gu paranga agude du garãyo 16 na kusende i mangi gayo diaberã nitiyo nibipa gu gene husa kaza i aidaha tipa ka yugo na ni nga i na ranirii beyo na i ima nyaka.”

²³ Gi sarangbanga re adu na nyanyakipa ha mbiko Bakere Bambu Ngbanga afura tipa gu ranirii andiko nafuhe fu sosono agude. Mbata fu i sari gu ngbanga re, gu bambu ngbanga nga ga Kanada adu na pagbia behe ka idapa husa kaza fu gu gude du garã ru kusende ti 16 ka si bihe nga si ni wenehe tipa gu gude  re. Ono fuo gi sarangbanga re, bambu ngbanga ho rengbe ka diaberã tipa husa kaza fu gu paranga boro du garãni kusende ti 16 zanga mbugene funi ni mangi gani diaberã tipa ka yugo na ni nga ni ima ngarã tipa ka manga diaberã ni tini te.

²⁴ Ya mo gu vura i asoho tipa agarã biata re adu na diabese? April akaragapai nga “Ii!” Ri awere nga nazakigene na kpotori ni wenehe, ri aya: “Pa ino mi gupai nga mi aima fubee sa taasarimo Yekova na ka yugo na ni nga Satana nga iraziree nafu ngbarago afu fere.” Ga ri pangbanga nayugo gupai nga paranga aboro ima rengba ka mangapai na wingbaduse ka yugo na ni nga i nga ndikidi avuru ga Mbori Kindo.​​—⁠Mt. 21:⁠16.

25, 26. Gini kpakarapai ni naakura ti gu kura aregbo ho du mbutise ni?

²⁵ Yekova fu gu tindiro fu avunguagude nga i sonosi agude ringbisihe kuti gako arugute. (Pa Rug. 6:​6-8; Ef. 6:⁠4) Taata sunge ngaha te, ono si nakpakara berewe gbe ho mbutise amanga ni. Avunguagude rengbe kadu na abipai ni bakiakia tipa ka sonosa yo. Ni kpiapai, gu vungugude nga Dezire Yekova rengbe ka bihe nga si naida ni sonosi gude kuti ga Yekova arugute, guni angianga Dezire Yekova ya arengbanga ka idaha te. Rengo ngaha nga, si naida gu vungugude nga Dezire Yekova inihe nga ka mbutise vura gbarasapa ramukporo, pai ho nagbarasa gu pagume du dagba gude na avunguru te.

²⁶ Gu vunguagude angianga Dezire Yekova ya rengbe ka ndu ku ngbanga yo i idihe funi tipa agude sungu na ni wa ka ni yugu gani pambori fuyo. Aguyo nape gupai nga gbegberẽpai du nga ka sonosa gude ni Dezire Yekova. I rengbe ka ya si nika ká na iriso uru batika, aˈuru ongoda, na ka si du nga tunguotunguopai mangi nga gu naida i “batasi ungayo,” i nika ká na yo ti dia kure kutii kpotoyo yo. Wenepai nga, dungu agbiangbanga nangera tipa gupai du ni wenehe tipa gude kuba gupai gbua nga ka sarangbanga singia gu pambori nga ga avungugude ni gbegberẽhe tipa ru. Ani bingo bete akpiapai.

27, 28. Wai du gu Bakere Bambu Ngbanga nga ga Ohio asaringbanga tipa gupai nga sonosa gude ni Dezire Yekova angbanga te?

²⁷ Amerika. Rogo 1992, gu Bakere Bambu Ngbanga nga ga Ohio afura tipa gu ngbanga gu bagude naangianga Dezire Yekova ya akusihe nga gbegberẽpai du nga ka sonosa wiriko nga kumbagude ni Dezire Yekova. Umba bambu ngbanga aidi ka fu gude fu bako. Agbiangbanga aidihe fu nako nga Jennifer Pater nga ri niye aye kaa biko, ono i aza ri nga ka ri “yugungo pai fuko tipa agu aida nga ga aDezire Yekova kandara tooni ya.” Gi sarangbanga re aayugo gupai nga si aidanga ri fura na wiiri nga Bobby tipa Baibiri watadu agu arugute nga ga Baibiri du tipa ruru mangaapai te! Ya mo oni rengbe ka berãpa gu gberãrago ri adu na ni? Rago aima gberã tiri ni kerehe, ono ri aya ri awiriki  kadu na zerangbaduse na ka pido Yekova tipa ko mangipai. Ri aya, “Yekova aambunga re te.” Riigbu aundo gari bainiparugute ko du nga kango koyo du gu Bakere Bambu Ngbanga ni nga ga Ohio.

²⁸ Gu bambu ngbanga re aaidanga kuti gu sarangbanga nangia ga tooni bambu ngbanga te, na si aya, “avunguagude na rengo beyo ka yugopai fu awiriyo, kodihe na agu arugute du tipa ruru mangapai gbiati pambori.” Bambu ngbanga aya, ka pai adu nga ho nayugoho nga ga aDezire Yekova pambori nika manga fu gude gbegberẽ ti kpoto ru na berã ru yo ya, rengo ho be agbiangbanga ka ká na gude be avunguru mbiko gupai gbua nga ga pambori te. Agbiangbanga aabingo gu gopai naayugo na ni nga agu aida nga ga aDezire Yekova rengbe arengba ka gbarasa berã gude watadu kpoto ru te.

29-31. Tipagine i aka na wirinarani ti ni ti ngerafuo wiiri Denmark yo, na gini diaberã gu Bakere Bambu Ngbanga nga ga Denmark amangihe tipaha?

²⁹ Denmark. Anita Hansen agbia tiri na kina gu bangisapai re ho kuru kumbari andu ni ku ngbanga yo tipa i idihe fuko tooni wiriyo nangia Amanda garãri adu nga saba sungu fuoko. Wa vura duhe nga gu bambu ngbanga nga ga gu dagbarago re aidihe nga gude sungu fuori rogo 2000, ba Amanda angia kango koyo du bakere bambu ngbanga ni, na si asaringbanga na ki fu gude fuko. Bakere bambu ngbanga ape gupai nga wa duhe nga avungugude na abipai ni bakiakia nibipa gayo aida nga ga  pambori, bagude du rengbe ka ruga gupai re. Nibasa fuo gipai re, Wirinarani nga Anita azanga ngerafuo gude mbiko wa ri angia Dezire Yekova!

³⁰ Vuru gi kpakarapai re naabaha, ri aima du ni fudifudi ri ni kerehe ka ri ainongo gupai ka ri arengbe ka kpara fu Mbori tipaha ya. Ri aya: “Ono agu afugo du rogo ARomo 8:​26 na 27 naafu wasa fere. Mi anaabihe dedede nga Yekova ima ino gupai mi aida ka pehe. Bangiriko adu tire dedede na ko aambunga re te.”​​—⁠Oni gedi Atambuahe 32:8; Yesaya 41:⁠10.

³¹ Wirinarani angia kango koyo du gu Bakere Bambu Ngbanga ni nga ga Denmark. Agbiangbanga asaringbanga nga: “Gupai nabipa ngerafuo gude, si naida i diberã tipaha nibipa gupai du ni wenehe tipa gude.” Kurigure, agbiangbanga ape kurapai nga, pa ngerafuo gude nabipa wai avungugude ni basasa amangapai kuti akpakarapai, angianga riipa “gu yugopai watadu padu” ni Dezire Yekova ya. Wirinarani adu na bakere ngbarago mbiko bambu ngbanga abihe nga ri ima rẽ ka ngerafuo Amanda.

32. Wai du gu Bambu Ngbanga Nga ga Putu nabanda gu rengo nga ga agu avunguagude nga aDezire Yekova?

³² Dungu aringara Putu yo. Rogo gu kura aba, agu akpakarapai nabipa ngerafuo agude adigongo kina rogo rukutu abambu ngbanga sa te. Gu Bambu Ngbanga Nga ga Putu ima fura tipa angbanga wa gure a. Nibipa angbanga ue, gu Bambu ngbanga re aya gu bapengbanga nga ga ringara asaringbanga fu agu avunguagude nga aDezire Yekova gbiati aguyo angianga aDezire Yekova ya gbua riimburu gayo apambori. Bambu ngbanga aya gure nga berã gbegberẽpai kuti boro, na ki ya gu sarangbanga “du mburuhe rii gu kparakparapai du tipa apambori si arunga te.” Nagude sa ni Dezire Yekova nagbia undo ti gu sarangbanga nangia ga gu Bambu Ngbanga re apepa gari ngbarago nga: “Si ima gberã wai nga i kitingbanga re nga mi namanga gbegberẽ fu awire, baraho mi asada ni ka sonosa yo ni aKristano.”

33. Wai du rengbe agu avunguagude nga aDezire Yekova ka mangapai kuti gu rugute du rogo AFiripoio 4:⁠5?

³³ Rengo du nga, agu avunguagude nga aDezire Yekova nandu ku ngbanga yo tipa kadu na rengo beyo ka rimiso agu arugute nga ga Baibiri ku ngbadu awiriyo yo, i namanga ome amanga ka du na ruru bipai. (Oni gedi AFiripoio 4:⁠5.) Kina wai rago angba tiyo tipa kadu na rengo ka raba awiriyo ngba ga Mbori agene, i ima inoho nga gu vungugude angianga Dezire Yekova ya, ni rengbe arengba ka ngerafuo gude a ka ni idihe. Wai du si aida gu vungugude nga Dezire Yekova bi gu sunge nga ga raba gude?

34. Wai du rengbe agu avunguagude nga aKristano areme ka gbia undo ti gu kpiapai naadu tipa aYudo ti rago Nemaya?

³⁴ Ani rengbe ka wirikapai ti gupai namangi ti rago Nemaya. AYudo amangi ome ni bakerehe tipa ka mbakada ngapa Yerusarema na ka duaha berewe. I aima inoho nga mangaha wo nika banda yo be gu rikaaboro naadu patiyo nga avurayo. Mbiko gupai re, Nemaya azungodi yo nga: “[Oni] so vura tipa awirinaroni, na awironi nga akumba, na agu awironi nga ade, na  adiaroni, na gaoni akporo.” (Nem. 4:​14) Tipa agu aYudo re, gu vura re aima du na nyanyakipaha. Wakina gure areme, agu avunguagude nga aDezire Yekova namanga ome nyanyaki ka sonosa awiriyo rogo rengo yo. I ima inoho nga awiriyo nagbiatiyo na gbegberẽ akpiapai sukuru yo gbiati gayo dagbarago. Ngbatunga gu mangaapai re ima rengba ka rimo ku kporo vurube agu aũngbarago i abihe. Avunguagude, ka bangironi gonga ya nga si ni nyanyakipa pai oni sovura ka sa awironi i sono ngba gu gene nika undo yo i zugo rogo toro yo.

35, 36. Gini undo aDezire Yekova nagbiaha ti sovura tipa ka gbia gu ranirii nga ga irisombori, na gamo diaberã nga gine?

³⁵ Yekova ima fu maku kurii gu ome gako riigbu namangihe tipa ka sovura ka gbia ranirii nga ga irisombori zanga kpakarapai. Pa ndu ga Mbori aboro ku ngbangayo, aima sayo i mangi nyanyaki dezirepai ngbangayo na fu badungu kura aboro. (Rom. 1:⁠8) Gu kura wenepai berewe nga, gayo adiabese ima fu ranirii zavura fu agu aboro angianga aDezire Yekova ya. Ono tie, anga ani naida ka aria apai rogo zegino te; ani aˈasadanga ka rugapai ku bara rani yo a te. Kurigure, ndu gupai aDezire Yekova andu ti ni ku ngbangayo nga ka manga ome tipa ka sigira gayo ndikidi irisombori si nindu kumbatayo.​​—⁠Oni gedi AFiripoio 1:⁠7.

³⁶ Ani dunga adu na tambuahe ti aregbo dũ tipa agu apai nga ga idapase rengbe ani ka wirikaha ti agu awirinarani naasovura tipa ani gbia ranirii ka iriso Yekova! Ani nyenga anye niruru rani a, kidu na kido nga Yekova nika songoda gaani sunge na ko nika fu gu ome furani ani aidaha tipa kaa manga gupai ko akpinyemuhe.​​—⁠Yes. 54:⁠17.