1. Jesusan arkirinakapajj tantachasipkäna ukhajja, ¿kunsa katoqapjjäna, ukat kunatsa uk munapjjäna?

 JESUSAJJ jiwatat jaktayatäkäna uka qhepatjja, arkirinakapajj maynit maynikam chʼamañchtʼasiñatakiw punku jistʼantat mä utan tantachtʼasipjjäna, enemigonakapar ajjsarasaw jupanakajj ukham lurapjjäna. Ukampis Jesusajj jupanak taypin uñstkäna ukat “qollan ajayu katoqapjjam” sasin siskäna ukhajja, janiw ajjsarjjapjjänti (Juan 20:19-22 liytʼañataki). Uka qhepatsti wasitatwa tantachasipjjäna, ukhaw Jehová Diosan qollan ajayup katoqapjjäna. Cheqas uka qollan ajayuw jupanakarojj yatiyir sarañatak chʼamachtʼäna (Hech. 2:1-7).

2. 1) ¿Kunjamsa Diosajj yanaptʼistu, ukat kunatsa uk muntanjja? 2) ¿Kunatsa familjama Diosar yupaychañajj wakisi? (Qhanañchäwipa ukat “ Diosar familjam yupaychaña” siski uka recuadro uñjjattʼäta.)

² Jichhürunakanjja, nayrïr patak maranakan jakapkäna uka jilat kullakanakjamaw jan walinakan uñjastanjja (1 Ped. 5:9). Awisajj jaqer ajjsarañaw utjaspa, ukatwa yatiyaskakiñatakejj Jehová Diosan yanaptʼap muntanjja (Efe. 6:10). ¿Kunjamatsa Diosajj yanaptʼistu? Semana tukuyar apaski uka tantachäwinak toqew Jupajj yanaptʼistu. Uka tantachäwinakajj akanakawa: Taqenitaki Arstʼäwi, Yatiyañataki sat revistat Yatjjatañataki. Ukat semanan apaski uka tantachäwi toqew Diosajj yanaptʼarakistu. a Ukatjja, aka pusi tantachäwinakaw maran apasiraki: kimsa uru jachʼa tantachäwi (asamblea regional), asamblea de circuito ukajj maran pay kutiw mä urukam apasi ukat Criston jiwäwip amtañatak tantachäwi. ¿Kunatsa taqe uka tantachäwinakar sarañasäspa? ¿Kunjamsa jichhürunakan utjki uka tantachäwinakajj apasiñ qalltäna? Ukat ¿kunsa ukar sarasajj uñachtʼaytan?

3, 4. ¿Kunsa Diosajj sapa maynit suyi? Uk mä uñachtʼäwimp qhanañchtʼam.

³ Servirinakapajj Jupar yupaychañatak tantachasipjjaspa ukwa Jehová Diosajj nayratpach munäna. Amuytʼañataki, 1513 nayra pacha maranwa Jehová Diosajj Israel markar Leyinakap churäna, ukarjamajja sapa sabadow israelit  familianakajj Diosar yupaychañataki ukat Leyinakapat yatjjatañatak tiempo apstʼasipjjañapäna (Deu. 5:12; 6:4-9). Kunapachatï ukarjam phoqapjjäna ukhajja, familianakajj wali chʼamañchtʼataw jikjjatasipjjäna, ukaw markpacharojj Jehová Diosamp sum apasipjjañapatak yanaptʼäna. Maysa toqetjja, kunapachatï israelitanakajj Diosan Leyinakap jan istʼapkäna ukat Diosar yupaychañatak jan tantachasipkäna ukhajja, janiw Jehová Diosamp askit uñjatäpkänti (Lev. 10:11; 26:31-35; 2 Cró. 36:20, 21).

⁴ Jichhajj Jesusat amuytʼarakiñäni, jupajj sapa sabadow sinagogar sarirïna (Luc. 4:16). Ukat arkirinakapan janis sábado uru imapjjañapajj wakisjjchïnjja, Jesusajj jiwatat jaktkäna uka qhepat tantachasisipkakïnwa (Hech. 1:6, 12-14; 2:1-4; Rom. 14:5; Col. 2:13, 14). Nayrïr patak maranakan jakapkäna uka cristianonakajja, uka tantachäwinakanwa Diosan arunakapat yateqapjjäna ukat chʼamañchtʼasipjjäna. Ukatjja, oracionan mayisisa, arstʼasa ukat qʼochusaw Jehová Diosar jachʼañchapjjarakïna (Col. 3:16; Heb. 13:15).

5. ¿Kunatsa tantachäwinakarusa ukat jachʼa tantachäwinakarus sartan? (“ Diosan markapar mayachtʼañatak jachʼa tantachäwinaka” siski uka recuadro uñjjattʼäta.)

⁵ Sapa semanajj apaski uka tantachäwinakaru ukat maran apaski uka jachʼa tantachäwinakar sartan ukhajja, Diosan Reinopar yanaptʼataswa uñachtʼaytanjja, Diosan qollan ajayupwa katoqtanjja ukat arstʼäwinakasampiw mayninakar chʼamañchtʼaraktanjja. Ukatjja, oracionan mayisisa, arstʼasa ukat qʼochusaw Jehová Diosar yupaychtanjja, ukaw jukʼamp askejja. Tantachäwinakasajj janis kunjamtï israelitanakasa nayrïr cristianonakas apapjjerïkäna ukhamäkchejja, yanaptʼaskakistuwa. Jichhürunakan utjki uka tantachäwinakajja, ¿kunjamsa apasiñ qalltpachäna?

6, 7. 1) ¿Kunanakatakis tantachäwinakajj yanaptʼistu? 2) ¿Kunjamsa tamanakajj tantachäwinak apapjjerïna?

⁶ Charles Taze Russell jilatajj Biblian cheqa yatichäwinakap yatjjatañ qalltkäna ukhajja, jupjam yatjjatañ munapkäna ukanakamp tantachasiñ wakisitapwa amuyäna. 1879 maranjja, akham sasaw Russell jilatajj qellqäna: “Qollan Qellqatanakat yatjjatañatakiw nayajj Pittsburgh markan jakasir jaqenakampejj sapa domingo urojj tantachasta” sasa. Ukat Yatiyañataki revista liytʼapkäna ukanakarojja, tamanak uttʼayapjjañapatakiw chʼamañchtʼasïna, 1881 maranjja sapa miércoles ukat domingo urunakaw Pittsburgh (Pensilvania, Estados Unidos) sat markan tantachasipjjäna. Ukatjja, 1895 maran noviembre phajjsin mistkäna uka Yatiyañataki revistajj akham sasaw qhanañchäna: “Maynit maynikam [chʼamañchtʼasiñataki] sum apasiñataki, munasiñataki ukat cristianjam mayachtʼat sarnaqañatakiw tantachäwinakajj yanaptʼistu” sasa (Hebreos 10:24, 25 liytʼañataki).

⁷ Nayrajja, sapa tamaw kunjamsa ukat kunürunakas tantachasipjjani uk amtapjjäna. Amuytʼañataki, Estados Unidos sat markankir mä tamajja, “semanan phesqa kutiw tantachasipjjta” sasaw mä cartan qhanañchapjjäna. Uka cartajj 1911 maranwa mä revistan apsusïna. ¿Kunürunakas tantachasipjjäna? Lunes, miércoles, viernes urunaka ukat domingo urojj pay kutiw tantachasipjjerïna. Ukat África markankir mä tamajja, “phajjsin pay kutiw tantachasipjjta, viernes urut qalltasa domingo urukama” sasaw mä cartan qhanañchapjjarakïna. Uka cartajj 1914 maranwa mä revistan apsusïna. Tiempompejja, kunjamtï jichhajj tantachasktan ukham tantachasiñatakiw amtasjjäna. Jichhajja, kunjamsa sapa tantachäwinak apañ qalltawaytan ukwa yatjjatañäni.

8. ¿Kuna toqenakatsa yaqhep arstʼäwinakajj parläna?

⁸ Taqenitaki Arstʼäwi. 1879 maran Yatiyañataki revista apsuñ qalltkäna uka qhepatwa Russell jilatajja, Jesusat yateqasisajj 1880 maran yaqha markanakar yatiyir saräna (Luc. 4:43). Uka markanakanwa jupajj kunjamsa Taqenitaki Arstʼäwi sat tantachäwejj apasiñapäna uk uñachtʼayäna. Kuna markanakarus sarañapäna uk yatiyasajja, Yatiyañataki revistajj akham sänwa: “‘Diosan Reinopat kunanak yatiñas wakisi’ sat pʼeqeñchäwini arstʼäwi [Russell jilatajj] arstʼañ muni” sasa. Ukat 1911 maran tamanakajj uttʼayaskäna uka qhepatjja, akham sasaw chʼamañchtʼasïna: ‘Kawkhantï tantachasipkta uka jakʼankir tamanakaruw suma wakichtʼata arstʼirinak khitapjjañama’ sasa. Jupanakajja,  jan wali jaqenakar tukjaskani uka uruta ukat kunjamsa Jesucristojj qhespiyistu uka toqenakatwa mayachtʼat sojjta arstʼäwinak arstʼapjjäna. Arstʼañ tukuyasajja, jutïr semanajj khitisa ukat kuna toqetsa arstʼaskani ukwa arstʼirinakajj yatiyapjjarakïna.

9. ¿Tiempompejj Taqenitaki Arstʼäwi sat tantachäwejj kunjamsa apasjjäna, ukat kunjamsa uka tantachäwir wali askit uñjatas uñachtʼaysna?

⁹ “Kuna jan waltʼäwinakas jichhürunakan utji” uka toqetwa taqe tamanakan arstʼasiskani sasaw Yatiyañataki revistajj 1945 maran yatiyäna, ukatakejj mayachtʼat kimsaqallq arstʼäwinakaw wakichtʼasïna. Arstʼir jilatanakajja, walja maranakaw jupanakan waktʼayat arstʼäwinaka ukat Amuyasiri Cheqapa Uywatajj apayankäna uka bosquejonakat arstʼapjjäna. Ukampis 1981 maranjja, akham sasaw yatiyasïna: ‘Tamanakar apayaski uka bosquejonakarjamaw arstʼir jilatanakajj arstʼapjjañapa’ sasa. b 1990 marakamajja, arstʼir jilatanakajj tantachasirinakaruw arstʼapjjañapatak jisktʼirïna ukat demostracionanakaw utjarakïna, ukampis uka marat aksarojja, ‘janiw ukanakajj utj-jjaniti’ sasaw arstʼirinakar yatiyasïna. Ukat enero, 2008 maratjja, ‘uka tantachäwejj janiw 45 minutonakan apasjjaniti, jan ukasti, 30 minutonakanwa apasjjani’ sasaw tamanakar yatiyasirakïna. Taqenitaki Arstʼäwi sat tantachäwejj janiw nayrjam apasjjeti, ukampis suma wakichtʼat arstʼäwinakajja, Diosan Arupar jukʼamp confiyasiñatakiw yanaptʼistu ukat Diosan Reinopatwa yaticharakistu (1 Tim. 4:13, 16). Bibliat apstʼat uka arstʼäwinak istʼir jutapjjañapatakejja, ¿Bibliat jukʼamp yatjjatañ munapki ukat Diosar jan uñtʼapki ukanakarojj jawstʼasktanti?

10-12. 1) ¿Yatiyañataki sat revistat Yatjjatañataki tantachäwejj kunjamsa nayrajj apasïna? 2) ¿Kunanak jisktʼasiñasas wakisispa?

¹⁰ Yatiyañataki sat revistat Yatjjatañataki. 1922 maranjja, peregrinos sasin uñtʼatäpkäna uka jilatanakaw tamanakan arstʼapjjañapataki ukat Diosan arunakap yatiyañan  pʼeqtʼapjjañapatak khitatäpjjäna. Uka jilatanakajj akham sasaw Diosan markap sarayapkäna uka jilatanakar sapjjäna: ‘Yatiyañataki sat revistat yatjjatañatakiw sapa semanajj mä tantachäwejj utjañapa’ sasa. Ukat jilat kullakanakajj ukarjamaw lurañ qalltapjjäna, semanan mä uru jan ukajj domingo urunakaw Yatiyañataki revistat yatjjatañatak tantachasipjjerïna.

¹¹ Uka tantachäwinakajj kunjamsa apasiñapäna ukwa Yatiyañataki junio 15, 1932 maran mistkäna uka revistajj jukʼamp qhanañchäna. Kunjamtï Betel utan yatjjataskäna ukhamarakiw jilat kullakanakajj uka revistat yatjjatapjjañapäna. Uka revistajj akham sänwa: ‘Mä jilataw uka tantachäw sarayañapa ukat kimsa jilatanakaw nayraqatan qontʼasisajj tʼaqanak mayat mayat liytʼapjjañapa’ sasa. Uka tiemponjja, tantachasirinakar jisktʼañatakejj janiw Yatiyañataki revistan jisktʼanakajj utjkänti. Ukhamajj uka tantachäwi sarayir jilataw kuntï revistajj parlkäna ukarjam jisktʼapjjañapatakejj tantachasirinakar mayïna ukat uka jisktʼanak qhanañchapjjañapatakiw mayninakar mayirakïna. Jukʼamp qhanañchtʼañatï wakischïna ukhajja, uka tantachäwi sarayir jilataw “mä qawqha arunakamp” qhanañchtʼäna.

¹² Qalltanjja, kawkïr revistatsa yatjjatañ munapjjäna uk sapa tamaw ajllisïna. Ukampis Yatiyañataki abril 15, 1933 maran mistkäna uka revistajja, akham sänwa: ‘Phajjsitak mistki uka revistatwa taqpach tamanakajj yatjjatapjjañapa’ sasa. Ukat 1937 maranjja, domingo urunakaw uka tantachäwejj apasiñapa sasaw qhanañchasirakïna. Yatiyañataki octubre 1, 1942 maran mistkäna uka revistaw kunjamsa uka tantachäwejj apasiñapäna uk akham sasin qhanañchäna: ‘Jichhat uksarojja, uka tantachäwejj mä horanak apasjjani. Ukat jumanakan arstʼapjjañamatakiw pachpa revistan jisktʼanakajj utjani, ukarjamaw arstʼapjjañama. Ukampis revistat liytʼañat sipansa, pachpa arunakamamp qhanañchtʼapjjasma ukhajj jukʼamp askïspawa’ sasa. Jichhürunakanjja, ukarjamaw uka tantachäwejj apasiskaki. Cheqansa, ‘Amuyasiri Cheqapa Uywatajj’ uka tantachäwi toqew Biblian cheqa yatichäwinakap horasapar churistu (Mat. 24:45, MT). Ukhamajj sapa mayniw akham jisktʼasiñasäspa: “¿Yatiyañataki sat revistat yatjjataskani ukatakejj sapa semanat wakichtʼastjja? ¿Arstʼañatak chʼamachastti?” sasa.

13, 14. Taman Bibliat Yatjjatañataki tantachäwejja, ¿kunjamsa apasiñ qalltäna, ukat kunatsa uka tantachäwir wal sarañ muntan?

¹³ Taman Bibliat Yatjjatañataki. 1890 maranakanjja, Baltimore (Maryland, Estados Unidos) markankir H. N. Rahn sat jilatajja, ‘tantachäwinakanwa Bibliat jukʼamp yatjjatsna’ sasaw säna, uka tantachäwinakajj Círculos de la  Aurora sasin uñtʼatänwa. Uka maratakejja, La Aurora del Milenio sat libronakajj waljaw utj-jjäna. Uka tantachäwi apañajj wakisispati janicha uk yatiñatakiw uka tantachäwejj jilat kullakanakan utanakapan apasiñ qalltäna. Ukampis 1895 maran septiembre phajjsitakejja, Círculos de la Aurora sat tantachäwejj Estados Unidos markan walja cheqanakanwa apasjjäna. Ukatwa septiembre phajjsin mistkäna uka Yatiyañataki revistajj akham säna: ‘Khitinakatï cheqa yatichäwinak yatiñ munapki ukanakaw uka tantachäwi apapjjañapa. Uka tantachäwi sarayirejja, suma liytʼirïñapawa. Mä qawqha arunak liytʼasajja, tantachasirinakan arstʼanipjjañapatakiw mayiñapa ukat mä tʼaqa phoqatpach liytʼasajja, ukan utjki uka qellqatanakwa Bibliat liytʼañapa. Ukat mä yatichäwi yatjjatañ tukuyasajja, sapa mayni jilat kullakanakaw kuna toqetsa uka yatichäwejj parli uk mä qawqha arunakamp qhanañchtʼapjjañapa’ sasa.

 ¹⁴ Uka tantachäwejj kunayman sutinakamp uñtʼatänwa. Sañäni, Círculos Bereanos para Estudios Bíblicos sasin uñtʼatänwa, ¿kunatsa? Berea markankir nayrïr cristianonakajj Qollan Qellqatanakatwa sum yatjjatapjjerïna (Hech. 17:11). Qhepatjja, Librot Yateqañataki Taman Tantachäwipa sat sutimpiw uñtʼasïna. Jichhajja, Taman Bibliat Yatjjatañataki sat sutimp uñtʼatäjjarakiwa ukat janiw jilat kullakanakan utanakapan apasjjeti, jan ukasti, Tantachasiñ Utanakanwa apasjje. Uka tantachäwinjja, libronakata, folletonakata ukat Yatiyañataki sat revistatwa yatjjatasiwayi. Ukat qalltatpachaw ukan arstʼapjjañapatakejj jilat kullakanakar chʼamañchtʼasïna. Cheqansa, nayratpachaw uka tantachäwejj Bibliat jukʼamp yatjjatañatakejj cristianonakar yanaptʼawayi. Ukhamasti, ¿uka tantachäwitakejj wakichtʼastanti, ukat ukan arstʼañatakejj chʼamachasiraktanti?

15. Diosan Arunakap Yatiyañatak Escuelajja, ¿kuna amtampis wakichasiwayi?

 ¹⁵ Diosan Arunakap Yatiyañatak Escuela. Brooklyn (Nueva York) markan utjki uka Betel utan irnaqtʼkäna Carey Barber sat jilatajj akham sänwa: “Febrero 16, 1942 marana, mä lunes arumaw taqe jilatanakarojj mä escuelan qellqtʼayasiñatak Betel utan invittʼapjjetäna. Jichhajja, uka escuelajj Diosan Arunakap Yatiyañatak Escuela sasin uñtʼatäjjewa” sasa. Mä qawqha tiempotjja, Barber jilatajj Oraqpachan Jilïr Irpirinak taypinwa irnaqtʼjjäna. Jupajj akham saskakïnwa: ‘Uka escuela toqew Jehová Diosajj jichhürunakan markapar sum yatichaski’ sasa. Bibliat yatichapjjañapataki ukat Diosan arunakap yatiyapjjañapatakiw uka escuelajj jilatanakar wal yanaptʼäna. Ukatwa 1943 marat aksarojja, Curso en el Ministerio Teocrático sat folletojj taqe aka Oraqpachankir tamanakar apayasïna. Yatiyañataki octubre 15, 1943 maran mistkäna uka revistajj akham sänwa: ‘Diosan Arunakap Yatiyañatak Escuela sat tantachäwejja, Reinon yatichäwinakap sum yatichapjjañapatakiw Diosan servirinakapar yanaptʼi’ sasa (2 Tim. 2:15).

16, 17. Diosan Arunakap Yatiyañatak Escuelajj janiw kunjamsa arstʼasiñapa ukak yatichkänti, ¿kunatsa ukham sistan?

¹⁶ Qalltanjja, jaqenak nayraqatan arstʼañajj walja jilatanakatakejj chʼamänwa. Clayton Woodworth (yoqa) sat jilatajj 1943 maran uka escuelar qellqtʼayaskäna ukhajja, kunjamsa jikjjatasïna uk akham sasaw qhanañchäna: “Jaqenak nayraqatan arstʼañajj nayatakejj wali chʼamapunïnwa. Jachʼa lajjranïkiristsa ukhamwa amuyasiyäta. Lakajas qʼal wañkatiri. Awisajj wali jachʼata jan ukajj juchʼus arumpiw parlirïta” sasa. Ukampis jukʼamp sum arstʼañ yateqjjäna ukhajja, jachʼa tantachäwinakan arstʼañapatakiw uka jilatar invittʼapjjäna. Uka escuelanjja, janiw kunjamsa sum arstʼaspa ukak yateqkänti, jan ukasti, altʼat chuymanïñasa ukat Jehová Diosar confiyañas kunja askisa ukwa jilatajj yateqarakïna. Jupajj akham sänwa: “Taman khitis arstʼakispawa. Ukampis mä arstʼiritï sum wakichtʼaschi ukat Jehová Diosar taqe chuyma confiychi ukhajja, istʼirinakajj sumwa istʼapjjani ukat arstʼäwipatsa yateqapjjarakiniwa” sasa. Uka jilatan awkipajja, ina chʼusat juchañchatäsaw 1918 maran Rutherford sat jilatampi ukat yaqha jilatanakamp chikajj carcelan jistʼantat uñjasïna.

¹⁷ Khä 1959 maranjja, kullakanakaruw uka escuelar qellqtʼayasipjjañapatakejj invittʼasjjarakïna. Jachʼa tantachäwin ukajj yatiyaskäna ukhajja, kunjamsa jikjjatasïna uk akham sasaw Edna Bauer kullakajj qhanañchi: “Kullakanakajj kunja kusisitas jikjjatasipjjerïta uk janipuniw armaskti. Jichhajja, kullakanakajj wakichtʼasipjjarakisapänwa” sasa. Cheqas walja jilat kullakanakaw Jehová  Diosamp yatichayasiñatakejj Diosan Arunakap Yatiyañatak Escuelarojj qellqayasiwayapjje. Jichhürunakanjja, semanan apaski uka tantachäwi toqejj Diosajj wakichtʼaskakistuwa (Isaías 54:13 liytʼañataki).

18, 19. 1) Diosan arunakap sum yatiyañatakejja, ¿kunjamsa Diosajj yatichaskakistu? 2) ¿Kunatsa tantachäwinakan qʼochtanjja? (“ Cheqa yatichäwinakat qʼochuña” siski uka recuadro uñjjattʼäta.)

¹⁸ Yatiyañataki Tantachäwi. 1919 maratwa yatiyir sarañatakejj tantachäwinakajj apasjjäna. Uka maranjja, Bibliat apstʼat qellqatanak lakirapkäna ukanakakiw uka tantachäwir sarapjjäna. 1923 maranjja, Yatiyañataki Tantachäwejj phajjsin mä kutikiw apasïna, ukarojj tamankir taqpach jilat kullakanakaw sarapjjañapäna. 1928 maranjja, ‘sapa semanaw uka tantachäwejj apasiñapa’ sasaw yatiyasïna. Ukat 1935 maran Yatiyañataki sat revistajj mistkäna ukanjja, Director sat qellqatarjamaw Yatiyañataki Tantachäwejj apasiñapa sasaw tamanakar chʼamañchtʼasïna (qhepatjja uka qellqatajj Informador ukat Diosan Apnaqäwipat Yatiyañataki sutinakamp uñtʼatäjjänwa). Mä qawqha tiempotjja, taqe tamanakanwa uka tantachäwi toqejj yatichasjjäna.

¹⁹ Jichhürunakanjja, ukhamarakiw Diosan arunakap sum yatiyañatakejj semanan apaski uka tantachäwi toqejj Diosajj sum yatichistu (Mat. 10:5-13). Jumatï Tantachäwin yatjjatañataki sat qellqata katoqstajja, ¿wakichtʼastati, ukat ukan utjki uka ewjjtʼanakarjam yatiyañatakejj chʼamachasiraktati?

20-22. 1) ¿Kunatsa Jesusan jiwäwip amtanjja? 2) Jesusan jiwäwipa amtañatak sapa mara tantachasiñajja, ¿kunjamsa yanaptʼtamjja?

²⁰ Jesusan arkirinakapajj jutañapkamaw jupan jiwäwip amtapjjañapäna. Kunjamtï Pascua fiestajj sapa marajj amtaskäna, ukhamarakiw Criston jiwatapajj amtasiñapäna (1 Cor. 11:23-26). Sapa maraw uka tantachäwirojj millón millón jaqenakajj sarapjje. Ajllit cristianonakajja, Jesucristomp chik apnaqaniñatak mä suytʼäwinïpjjatapwa uka tantachäwin amtapjje (Rom. 8:17). Ukatjja, yaqha uwijanakjam uñtʼatäpki ukanakarojja, Diosan uttʼayat Reyir jan jitheqtas servipjjañapataki ukat jupatakjam sarnaqañatakiw yanaptʼaraki (Juan 10:16).

²¹ Russell jilatasa yanapirinakapasa, Santa Cena amtañajj wali wakiskirïtapwa amuyapjjäna, ukat ‘maran mä kutikiw amtasiñapa’ sasaw sapjjarakïna. Yatiyañataki abril 1880 maran mistkäna uka revistajj akham sänwa: “Pittsburgh markanjja, walja maranakaw [...] Pascua [jan ukajj Jesusan jiwäwip] amttanjja ukat tʼantʼa manqtʼapjjta vino umtʼapjjarakta, ukanakajj Tatitusan jañchipa ukat wilapa sañwa muni” sasa. Mä qawqha tiempotjja, kuna uruntï Criston jiwäwipajj amtasiñapäkäna uka urutakiw jachʼa tantachäwinak apañ amtapjjarakïna. Uka tantachäwinakat  mayajja, 1889 maranwa apasïna, ukarojj 225 jaqenakaw sarapjjäna ukat 22 jilat kullakanakaw bautisasipjjarakïna.

²² Jichhürunakanjja, Jesusan jiwäwipajj janiw jachʼa tantachäwinakan amtasjjeti. Ukampis utas jakʼan jakapki ukanakaruw uka tantachäwir sarapjjañapatak invitʼtanjja, ukajj Tantachasiñ Utanakana jan ukajj alquilat yaqha utanakanwa apasispa. 2013 maranjja, 19 millonats jilaw Jesusan jiwäwip amtañatak tantachasiwaytanjja. Cheqas Jesusan jiwäwip amtañatak tantachäwir sarañasa ukat uka tantachäwir sarapjjañapatak yaqhanakar invittʼañasa, jiwasatakejj wali askiwa. Ukhamajj uka tantachäwiru jutapjjañapatakejja, ¿taqe jaqenakar invittʼañatak chʼamachasisktanti?

23. ¿Kunjamsa tantachäwinak uñjtan?

²³ Jehová Diosan servirinakapajja, tantachäwinakar sarañajj janiw wali chʼamäkaspasa ukham uñjktanti (Heb. 10:24, 25; 1 Juan 5:3). David reyejja, Jehová Diosar yupaychañatakiw templor wal sarañ munäna (Sal. 27:4). Cheqas Diosar munasipkäna ukanakamp chikaw Diosar yupaychañ munäna (Sal. 35:18). Jesusat amuytʼarakiñäni. Jiskʼäskäna ukhatpachaw kawkintï Awkipar yupaychapkäna uka utar wal sarañ munäna (Luc. 2:41-49).

24. Tantachäwinakar sarasajja, ¿kunsa uñachtʼaytan?

²⁴ Tantachäwinakar sartan ukhajja, Jehová Diosar wal munasitasa ukat jilat kullakanakar chʼamañchtʼañ munataswa uñachtʼaytanjja. Ukatjja, kunjamsa Diosan Reinopatakjam sarnaqsna uk yateqañ munataswa uñachtʼayaraktanjja, cheqas tantachäwinakanwa ukanak jilpach yateqtanjja. Janiw ukakïkiti, Jesucristo Reyin arkiriparu jaqenakar tukuyañataki ukat jupanakar wakichtʼañatakiw uka tantachäwinakajj yanaptʼistu ukat chʼam churarakistu, Diosan Reinopaw uk lurañatakejj jichhürunakan wal yanaptʼaski (Mateo 28:19, 20 liytʼañataki). Cheqansa, kunjamsa Diosan Reinopar uñjtan ukwa tantachäwinakar wal sarañ munatasajj uñachtʼayi. Ukhamajja, ¡tantachäwinakas wali askit uñjasipkakiñäni!