1. Tera te ibuobuoki ae a karekea taan rimwini Kristo ngke a ikotaki, ao bukin tera ngkai a kainnanoa buokaia?

TEUTANA te tai imwini mangautin Iesu, ao a a ikotaki taan rimwina bwa a na kaungaunga i marenaia. Ma a rokani mataroa bwa a maakuia taani kairiribai nakoia. Ma e bua maakuia ngke e a kaoti Iesu i buakoia ao e taku: “Butimwaea te taamnei ae raoiroi”! (Wareka Ioane 20:19-22.) Imwina riki ao a a manga ikotaki naba taan rimwini Kristo ao e a kabwaroa te taamnei ae raoiroi Iehova i aoia. Ai rianakora te korakora are a karekea ibukin te mwakuri n uarongorongo are mena imwaia!—Mwa. 2:1-7.

2. (a) E kangaa Iehova n anganira korakorara, ao bukin tera ngkai ti kainnanoa te korakora anne? (b) E aera ngkai e rangi ni kakawaki te babaire ibukin te Taromauri n Utu? (Nora te kabwarabwara mai nano ao te bwaoki ae “ Te Taromauri n Utu”.)

² Ti kaaitara naba ma aeka ni kangaanga ake a kaaitarai tarira n te moan tienture. (1Bet. 5:9) N tabetai ao a kona n rotakibuaka tabeman i buakora ni maakakia aomata. Ao ti kainnanoa te korakora are e anga Iehova ngkana ti na nanomwaaka n te mwakuri n uarongorongo. (IEbe. 6:10) E anganga te korakora ae rangi ni bati Iehova rinanon ara bobotaki. Ti a kona ni kaei botaki aika uoua n te wiki aika kakaongora n aron te Botaki Ibukia Aomata Nako ma te Reirei n te Taua-n-Tantani, ao ara botaki are i nukan te wiki ae aranaki bwa Maiura ni Kristian ao Ara Mwakuri ni Minita. * Ti kimwareirei naba n ara bobotaki aika aua n te ririki n aron te bwabwaro ibukin te aono, taian runga n aono aika uoua, ao Kauringaani mateni Kristo. E aera ngkai e kakawaki bwa ti na kaei botaki aikai ni kabane? Tera rongorongon ara bobotaki ae ti kakaraoia ma ngkoa ni karokoa ngkai? Ao tera arora ae oti ni kaineti ma iangoan taiani bobotaki iroura?

3, 4. Tera ae e tangiria Iehova bwa a na karaoia ana aomata? Aanga taiani katoto.

³ E a maan Iehova n tangira ae a na kaai ni bobotaki ana aomata bwa a na taromauria. N te katoto, n 1513 B.C.E. ao Iehova e anga ana Tua nakon te natannaomata ae Iteraera, ao iai naba n te Tua anne taekan te Bongi n Taabati ni katoa wiki, bwa a aonga ni kona utu n tatabeua nako n taromauria ao a na reireinaki n te Tua. (TuaKau. 5:12; 6:4-9) Ngke a kakairi tibun Iteraera n te tua aei, ao a kakorakoraaki iai utu nako ao e teimatoa n itiaki ao ni korakora te natannaomata aei ni kaineti ma te onimaki. Ngke e kabwaka te natannaomata ni maiuakina te Tua aei, n aroia  n aki tabe ma kaetieti ake iai n aron ae te katoatai n taromauria Iehova, a kabuaa iai akoaia iroun te Atua.—NakIbo. 10:11; 26:31-35; 2Rong. 36:20, 21.

⁴ Iangoa naba te katoto are e kateia Iesu. Iai ana katei bwa te nanako n te tinakoka ni katoa wiki n te Bongi n Taabati. (Ruka 4:16) Imwini maten Iesu ao mangautina, ao a a kateimatoa te katei aei taan rimwina ae te kaai ni bobotaki e ngae ngke a aikoa mena i aan te tua ibukin te Bongi n Taabati. (Mwa. 1:6, 12-14; 2:1-4; IRom 14:5; IKoro. 2:13, 14) A aki tii karekei reireiaia ao kaungaakia Kristian n te moan tienture ni bobotaki akanne, ma a anga naba aia karea n nebonebo nakon te Atua n aia tataro, n aia kaekaeka, ao n aia anene.—IKoro. 3:16; Ebera 13:15.

5. E aera ngkai ti kaakaei ara botaki ake ni katoa wiki ma ara runga n aono ao ara bwabwaro ake ni katoa ririki? (Nora te bwaoki ae “ Taiani Botaki ni Katoa Ririki Aika Katiteuanaia Ana Aomata te Atua”.)

⁵ Ngaira naba ngkana ti kaakaei ara botaki ake ni katoa wiki ma ara runga n aono ao ara bwabwaro ake ni katoa ririki, ti a boutokaa iai ana Tautaeka n Uea te Atua, ti karekei iai korakorara rinanon te taamnei ae raoiroi, ao ti kaungaia iai tabemwaang ni kaotiotan ara onimaki. Ma ae kakawaki riki, e a reke iai ara tai n taromauria Iehova rinanon ara tataro, ara kaekaeka, ao ara anene. E bae ni kaokoro tein ara bobotaki ma botaki ake a kaakaei tibun Iteraera ao Kristian n te moan tienture, ma titeboo kakawakia. Tera rongorongon ara bobotaki ae ti kakaraoia ma ngkoa ni karokoa ngkai?

6, 7. (a) Tera bukin ara bobotaki aikai? (b) E kangaa ni kakaokoro tein te botaki n te kurubu teuana ma teuana?

⁶ Ngke e a ukera te koaua man ana Taeka te Atua Brother Charles Taze Russell, ao e nora kainnanoan te kaai ni bobotaki ma tabemwaang ake titeboo tiaia ma ngaia. E korea ae kangai Russell n 1879: “Ngai ma tabemwaang i Pittsburgh, ti bairea  ao ti kateimatoa te reirei ibukin ukeran kanoan te Baibara, ao ti botaki ni katoa Taabati.” A kaungaaki taani wareka te Zion’s Watch Tower bwa a na kaai ni bobotaki, ao a booaki botaki i Pittsburgh i Pennsylvania n 1881 ni katoa Taabati ao Katenibong. E taekinaki n te Taua-n-Tantani ae bwain Nobembwa 1895 bwa bukin taiani botaki akanne boni karekean “te iraorao ni Kristian, te tangira, ao te kaai n iango,” ao e na karekea naba aia tai naake a kaea n ikaungaunga i marenaia.—Wareka Ebera 10:24, 25.

⁷ I nanon ririki aika bati ao e kakaokoro tein ao mwaitin te bobotaki irouia kaain te kurubu teuana ma teuana, aika Taan Reirei n te Baibara. N te katoto, e boreetiaki n 1911 aia reta kaain te kurubu teuana n te United States ae kangai: “Ti kakaraoi botaki aika aki kee i aan nimaua ni katoa wiki.” A karaoi botaki akanne n te Moanibong, Katenibong, Kanimabong, ao uatai n te Taabati. E boreetiaki te reta teuana riki n 1914 mairouia kaain te kurubu teuana i Aberika ae kangai: “Ti kakaraoi botaki uatai n te namwakaina, ni moanna man te Kanimabong ao n toki n te Taabati.” Ma imwina riki ao e a kaoti te babaire ibukin ara bobotaki ae ti a kakairi naba iai ni boong aikai. Ti na rinanon taekan te botaki teuana ma teuana n taai aika nako.

8. Baikara atun taian reirei tabeua rimoa?

⁸ Te Botaki Ibukia Aomata Nako. N 1880 ae te ririki are imwini boreetian te Zion’s Watch Tower irouni Brother Russell, ao e a kakairi n te katoto are e kateia Iesu ao e a moana karaoan mwanangana n uarongorongo. (Ruka 4:43) Ni karaoan anne, e a katea iai te katoto Brother Russell ae ti a kakaraoia ngkai n ara Botaki Ibukia Aomata Nako. Ni katanoataan te mwananga anne, e taekinaki n te Taua-n-Tantani bwa “e na boni kukurei [Russell] ni kairi botaki ibukia aomata nako ni kaineti ma ‘Bwaai aika irekereke ma ana tautaeka n uea te Atua.’” N 1911 imwin teini kurubu ke ekaretia n aaba tabeua, ao a kaungaaki kurubu n tatabeua nako bwa a na kanakoia taani kabwarabwara aika tau nakon aono ake a uakaan, bwa a na anga taian reirei aika rereitaki aika onoua i aon taian atu n reirei n aron te motikitaeka ao te kaboomwi. Ni banen te kabwarabwara teuana ma teuana, ao e a katanoataaki aran te tia kabwarabwara ao atun te kabwarabwara ibukin te wiki are imwina.

9. E kangaa ni bibitaki te Botaki Ibukia Aomata Nako ni waakinakon taian ririki, ao ko na kangaa ni boutokaa te botaki aei?

⁹ N 1945 ao e katanoataaki n Te Taua-n-Tantani moanakin te mwakuri ae okoro ni katobibia te aonnaba ibukin te Botaki Ibukia Aomata Nako, ae irekereke ma reirei aika wanua man te Baibara aika rereitaki aika kaineti ma “kangaanga aika kakaiaki n taai akanne.” I nanon irabwi ma irabwi te ririki ao a aki tii kabonganai reirei aika karaoaki iroun te toro ae kakaonimaki taani kabwarabwara aika mwiokoaki, ma a karaoi naba kabwarabwara ake a boni katauraoi. Ma n 1981 ao a baireaki taani kabwarabwara ni kabane bwa a na kabotoi aia kabwarabwara i aoni bwaai ni kabwarabwara ake a katauraoaki ibukia ekaretia. * Ni karokoa 1990 ao tabeua taiani kabwarabwara ibukia aomata  e kainnanoaki iai aia kaeka kaain te botaki ke taiani kaotioti. Ma a a manga bitaki n te ririki anne taiani kaetieti, ao man te tai anne a a kakaraoaki taiani kabwarabwara ibukia aomata nako n aron ae bon tii taiani kabwarabwara. E a manga katamaroaaki riki n Tianuare 2008 ngke a a kauarerekeaki maanin taiani kabwarabwara man 45 te miniti nakon 30 te miniti. E ngae ngke a bitaki teia ma a bon teimatoa naba n riki kabwarabwara aika katauraoaki raoi bwa kakorakoraan onimakinan ana Taeka te Atua, ao n reireinira taekan nako ana Tautaeka n Uea te Atua aika kakaokoro. (1Tim. 4:13, 16) Ko ingainga ni kaoia naake ko okiokiriia ao naake tiaki taani Kakoaua bwa a na ongora ni kabwarabwara aika kakawaki aikai, aika boto i aon te Baibara?

10-12. (a) Baikara bitaki n teini karaoan te Reirei n te Taua-n-Tantani? (b) Baikara titiraki aika ko wanawana ngkana ko titirakiniko iai?

¹⁰ Te Reirei n te Taua-n-Tantani. N 1922 ao a a tuatua bwa e na katoatai riki te reirei ibukin Te Taua-n-Tantani, taari mwaane ake a kinaaki bwa taiani pilgrims, ake taari ake a kamwanangaaki man te Watch Tower Society bwa a na kabwarabwara n taian ekaretia ao ni kaira te mwakuri n uarongorongo. E a kabwaataki te iango anne, ao n te moantai e a karaoaki te reirei n te Taua-n-Tantani i nukan te wiki ke n te Taabati.

¹¹ E a manga katauraoaki te kaetieti riki ni kaineti ma aroni kairan te botaki aei n te Taua-n-Tantani ae bwain Tun 15, 1932. E kabonganaaki iai kairan te reirei n te Auti ni Betaera bwa te bwai ni kairiri, ao e taekinaki n te kaongora bwa e riai te tari te mwaane ni kaira te botaki. A kona n tekateka i moa taari mwaane aika teniman ao ni kabuta warekan taiani barakirabe. Akea titiraki n taiani kaongora n te tai anne, ngaia are e tuangaki te tia kaira te reirei bwa e na tuangia taan ongora bwa a na tabeki titiraki i aon te kaongora are rinanoaki. Imwin anne ao e na manga tuangia taan ongora bwa a na kaekai titiraki. Ngkana e kainnanoaki riki te kamataata, e baireaki te tia kaira te reirei bwa e na anga te kabwarabwara ae “kimototo ma ni mataata.”

 ¹² N te moantai ao e kariaiakaki te ekaretia teuana ma teuana bwa e na rinea te maekatin are a kan reirei iai angia kaaina. Ma e baireaki n te Taua-n-Tantani ae bwain Eberi 15, 1933, bwa a riai ekaretia ni kabane ni kabongana te maekatin are e a tibwa otinako. N 1937 ao e a baireaki bwa e riai ni booaki te reirei aei n te Taabati. A a manga boreetiaki taekani katamaroa riki tabeua n te Taua-n-Tantani ae bwain Okitobwa 1, 1942, are e a manga oneaki iai teini karaoan te botaki aei nakon te aekaki ae ti a kakaraoia ni boong aikai. Te moanibwai, e katanoataaki bwa a nang kaoti titiraki mai nano n te reirei n te iteraniba teuana ma teuana, ao a riai ni kabonganaaki titiraki aikai. Imwina ao e taekinaki bwa e riai n teuana te aoa maanin te botaki aei. E kaungaia naba naake a kaekaeka bwa a na taekin “oin aia taeka” n oneani mwin are a na wareka mwakoron te barakirabe. E teimatoa te Reirei n te Taua-n-Tantani n riki bwa te botaki ae kakawaki, ike e a katauraoi iai amwarake n taamnei te toro ae kakaonimaki n taina ae riai. (Mat. 24:45) Ti wanawana ngkana ti titirakinira ni kangai: ‘I kakatauraoa au reirei n Te Taua-n-Tantani ni katoa wiki? Ao I karaoa au kabanea ni konaa bwa N na kaekaeka?’

13, 14. Tera aroni ngkoa te Reirei n te Baibara n te Ekaretia, ao tera ae ko kimwareirei iai n te botaki aei?

¹³ Te Reirei n te Baibara n te Ekaretia. N nukan 1890 tabun, imwin otinakon tabeua taiani volume n te boki ae te Millennial Dawn, ao e a tuatua Brother H. N. Rahn, ae temanna i buakoia Taan Reirei n te Baibara ae e maeka n te kaawa ae Baltimore, i Maryland n te U.S.A., bwa e na kabonganaaki te boki ae te “Dawn Circles” ibukin te reirei n te Baibara. N te moantai ao e kakatai te aba ni karaoani botaki aikai, ake a karaoaki n angiin te tai n taiani mwenga. Ma n Tebetembwa 1895 ao e a nakoraoi kairan te reirei n te boki ae te Dawn Circles ni kaawa aika rangi ni bati n te United States. E taekinaki ngkanne n te Taua-n-Tantani ae bwain te namwakaina anne bwa a karaoi botaki aikai taari ni kabane. E baireaki bwa e riai n raoiroi ana wareware te aomata are kairia. E na wareka te kibuntaeka teuana ao e na tataningaa aia kaeka naake a roko. Imwini warekan te kibuntaeka teuana ma teuana n te barakirabe ao ni maroroakini, e na nori kiibu ake a kaotaki ao ni wareki. Ni banen te mwakoro teuana, e riai temanna ma temanna n anga ana kaeka ae kimototo ni kauringa iai kanoan te reirei.

¹⁴ E bibitaki aran te botaki aei tabeua te tai. E aranaki ngkoa bwa te Berean Circles for Bible Study, ae irekereke ma kaaini Beroia n te moan tienture ake a ukeuke raoi n te Koroboki ae Tabu. (Mwa. 17:11) Imwina riki ao e a bitaki te ara aei nakon te Reirei n te Boki n te Ekaretia. E a aranaki ngkai bwa te Reirei n te Baibara n te Ekaretia, ao a a ikotaki ni kabane iai kaain te ekaretia n te Tabo n Taromauri ao ai tiaki ni kurubu n taiani mwenga. I nanon tatabebwi te ririki ao a a tia ni kabonganaaki ibukin te reirei booki aika kakaokoro, boroutia, ao ai kaongora ake n te Taua-n-Tantani. Ni moa mani boong ake rimoa ao a kaungaaki  naake a roko n te botaki bwa a na bane n anga aia ibuobuoki. E a kananoaki riki ara atatai i aon te Baibara n te botaki aei. Ko katoatai ni katauraoi ibukin te botaki aei ao ni karaoa am kabanea ni konaa bwa ko na anga am ibuobuoki iai?

15. Tera bukini katean te Kuura ni Kataneiai Ibukia Taan Uarongorongo?

¹⁵ Te Kuura ni Kataneiai Ibukia Taan Uarongorongo. E ururing ni kangai Carey Barber are beku n te tai anne ni kautun ara botaki i Brooklyn i New York: “N tairikin te Moanibong ae Beberuare 16 n 1942, ao a bane ni kaoaki mwaane n te utu ni Betaera i Brooklyn bwa a na karina araia n te kuura ae e a aranaki imwina riki bwa te Kuura ni Kataneiai Ibukia Taan Uarongorongo.” E kabwarabwaraa te kuura aei Brother Barber, are e a riki bwa kaain te Rabwata n Tautaeka imwina riki, bwa bon “teuana mai buakon taian rikirake aika rianako ni kaineti ma aron Iehova n reitaki ma ana aomata ni boong aikai.” E rangi n nakoraoi te reirei aei bwa e buokiia taari ni karikirakea aroia n angareirei ao rabakauia n uarongorongo, ngaia are ni moan 1943  ao a anganaki ekaretia nako ni katobibia te aonnaba te boki ae te Course in Theocratic Ministry. E taekinaki n te Taua-n-Tantani ae bwain Tun 1, 1943, bwa e kateaki te Kuura ni Kataneiai Ibukia Taan Uarongorongo, bwa e na buokiia ana aomata te Atua ni “kataneiaia bwa a na riki bwa taani kakoaua aika rabakau riki n tataekina te Tautaeka n Uea.”—2Tim. 2:15.

16, 17. Te koaua bwa e tii reke te rabakau ni kabwarabwara n te Kuura ni Kataneiai Ibukia Taan Uarongorongo? Kabwarabwaraa.

¹⁶ N te moantai ao a bati aika noria bwa e rangi ni kangaanga te kabwarabwara i mataia aomata aika bati. E uringa ana namakin Clayton Woodworth, Jr. ngke e moani kaaina te kuura n 1943, are e kabureaki ngkoa tamana ma Brother Rutherford ao tabeman riki n te aro n ribuaka n 1918. E taku Brother Woodworth: “E rangi ni kangaanga irou bwa N na kabwarabwara. E taraa n ae e a ananau neweu, ao e a rangi ni bwatakataka wiu, ao bwanaau kaanga e a biribiri i marenan ae e too i eta ao e bwanaakee.” Ma ngke e a rikirake ana konabwai Clayton, ao e a kakabwaiaaki n reken ana kabwarabwara aika bati. E bati riki  ae e reiakinna n te kuura nakon ae tii te rabakau ni kabwarabwara. E reireinaki iai manenan te nanorinano ao kakawakin ae ko na onimakina Iehova. E taku: “I a tibwa ataia ae e aki kakawaki te tia kabwarabwara. Ma ngkana e katauraoi raoi ao n onimakina Iehova, ao e na bon nakoraoi te ongora irouna ao e na reke reireiaia taan ongora.”

¹⁷ N 1959 ao a a kaoaki taari aine bwa a na karina araia n te kuura. E uringa ongoraean te katanoata anne Sister Edna Bauer n te runga n aono are e kaea. E taku: “I uringa ingaingaia taari aine. E a bati riki ngkai mwiokoaia.” Ni waakinakon taian ririki ao a bati taari mwaane ma aine ake a karin araia n te Kuura ni Kataneiai Ibukia Taan Uarongorongo ao n reireinaki iroun Iehova. Ti teimatoa ni boong aikai ni karerekei aeka ni kataneiai akanne n ara botaki are i nukan te wiki.—Wareka Itaia 54:13.

18, 19. (a) Ti kangaa ngkai ni karekea te kairiri ae manena ibukini karaoan ara mwakuri ni minita? (b) E aera ngkai ti anenene n ara bobotaki? (Nora te bwaoki ae “ Anenean te Koaua.”)

¹⁸ Te Botaki Ibukin te Uarongorongo. E a kamani waakinaki karaoani botaki ibukini bairean te uarongorongo man 1919. N te tai anne ao a aki bane n iriri n te botaki aei kaain te ekaretia, ma tii naake a baireaki bwa a na tibwaa te boki. N angiin te ririki ae 1923 ao e kakaraoaki te Botaki Ibukin te Uarongorongo te taina n te namwakaina, ao a na kaea kaain te kuura ni kabane ke te ekaretia. N 1928 ao a kaumakaki ekaretia bwa a na booa aia Botaki Ibukin te Uarongorongo ni katoa wiki, ao n 1935 a a kaungaaki ekaretia ni kabane n Te Taua-n-Tantani bwa a na kabotoa te Botaki Ibukin te Uarongorongo i aoni baike a boreetiaki n te Director (arana imwina riki te Informant ao imwina riki Ara Mwakuri ni Minita). E waekoa n riki te botaki aei bwa kanoan ana kaetieti te ekaretia teuana ma teuana ae katoatai ni kaoti.

¹⁹ Ni boong aikai ti a karekei kairiri aika manena ibukini karaoan ara mwakuri ni minita rinanon ara botaki are i nukan te wiki. (Mat. 10:5-13) Ngkana ko a tau ni butimwaea katoton ara boki n reirei, ko kakaraoa am ukeuke n reirei iai ao ni kakabonganai baike a kaotaki iai n am tai ni karaoa te mwakuri ni minita?

20-22. (a) E aera ngkai ti kakauringa maten Iesu? (b) Tera te kakabwaia ae ko karekea mani kaean te Kauring ni katoa ririki?

²⁰ E tuangia taan rimwina Iesu bwa a na kakauringa matena ni karokoa rokona. E kakaraoaki ni katoa ririki Kauringaani mateni Kristo n aroni bukamaruan naba te Toa ae te Riao. (1Kor. 11:23-26) A katikaki aomata aika mirion ma mirion ni katoa ririki n te botaki aei. A kauringaki iai taani kabiraki kakabwaiaaia ae rikia bwa taan uaia ni bwaibwai n te Tautaeka n Uea. (IRom 8:17) Ao ibukia tiibu tabemwaang, a kairaki iai bwa e na korakora irouia karinean te Uea n ana Tautaeka n Uea te Atua ao te kakaonimaki ni koaua nakoina.—Ioa. 10:16.

²¹ A ataa kakawakini kauringaan ana Katairiki te Uea Brother Russell ma raona ni beku, ao a ataia bwa e riai ni karaoaki te taina ni katoa ririki. E taekinaki ae kangai n te Taua-n-Tantani ae  bwain Eberi 1880: “E bati i buakora ae e a bon riki bwa aia katei ikai i Pittsburgh i nanon ririki aika bati . . . ururingan te Toa ae te Riao [Te Kauring] ao kanakin taiani banna ake rabwatan ao raraan ara Uea.” A karaoaki naba ngkekei bwabwaro n raonaki ma te Kauring. Te moantai are e tauaki iai mwin te botaki aei bon 1889, are e kaeaki irouia 225 ao a bwabetitoaki iai 22.

²² Ni boong aikai ao ti a aki karaoa te Kauring n tain te bwabwaro, ma ti a kaoia aomata nako ake n ara tabo bwa a na raonira ni karaoia n ara Tabo n Taromauri ke n te tabo ae ti kabooa tangoana. N 2013 ao e riaon 19 te mirion ake a karaoa kauringaani maten Iesu. Ai kakabwaiaakira ngaira ngkai ti aki tii kaea te Kauring ma ti kaungaia naba tabemwaang bwa a na raonira n te tairiki ae te kabanea n tabu aei! Ko ingainga ni kaoia aomata aika bati nakon te Kauring ni katoa ririki?

23. Tera am iango n te kaai ni bobotaki?

²³ A aki iangoa te kaetieti ibukin te kaai ni bobotaki ana toro Iehova bwa te bwai ni karawawata. (Ebera 10:24, 25; 1Ioa. 5:3) N te katoto, e tangira te kan nanako n ana auti Iehova te Uea ae Tawita bwa e na taromauri iai. (TaiAre. 27:4) Ao ai moarara riki ngkana e raonaki irouia te koraki aika tangira te Atua. (TaiAre. 35:18) Ao iangoa ana katoto Iesu. E ngae ngke e ataei ma e korakora tangiran te kani memena n ana auti Tamana are tataromauriaki iai.—Ruka 2:41-49.

24. Ngkana ti kaakaei botaki, baikara baika ti karekei iai?

²⁴ Ngkana ti kaakaei botaki, ti kaota iai tangiran Iehova ao tangirani kani kaungaaia raora n te onimaki. Ti kaota naba ingaingara ni kan riki bwa ana aomata ana Tautaeka n Uea te Atua, bwa a moanibwaiaki karekean reirei aikai n ara bobotaki, n ara runga n aono, ao n ara bwabwaro. Irarikin anne, ti karekea te rabakau ao te korakora man ara bobotaki ake ti kainnanoi bwa ti aonga n nanomwaaka n te beku teuana ae moan te kakawaki, ae e kairaki karaoana iroun ana Tautaeka n Uea te Atua ni boong aikai, ae taekani karekeaia ao kataneiaakia taan rimwin ara Uea ae Iesu Kristo. (Wareka Mataio 28:19, 20.) Akea te nanououa bwa e oti ni korakoran nanora ni kani kaai ni bobotaki bwa ti onimakina raoi ana Tautaeka n Uea te Atua n tatabemanira nako. A bia teimatoa ni kakawaki ara bobotaki iroura!