1. Indu ovahongewa tji va worongana pamwe, ombatero yatjike ndji va muna nu ongwaye tjaave i hepa?

 OUSUPI kombunda yombendukiro yaJesus, ovahongewa ve va wongara pamwe kutja ve yanḓiparisasane. Owo va pata omivero mena rokutira ovanavita na wo. Owo ngahino kava ri nemuma rukwao indu Jesus tje yekukurama mokati kawo na tja: “Kambureye Ombepo Ondjapuke”! (Lesa Johanes 20:19-22.) Kombunda, ovaapostele va wongara pamwe rukwao nu Jehova we ve pa ombepo ondjapuke. Owo tjiri va muna omasa kutja ve ungure oviungura vyokuzuvarisa mbya kongorera ko!—Oviung. 2:1-7.

2. (a) Jehova u tu yanḓiparisa vi nu ongwaye tji tu hepa omayanḓiparisiro we? (b) Ongwaye ondyero yOmerikotameneno wEṱunḓu tje ri ondyero onanḓengu tjinene nao? (Tara komambo wokehi na kokaongo nga “ Omerikotameneno wEṱunḓu,” pomukuma 175.)

² Eṱe ndino wina tu muna omauzeu tjimuna inga owovakambure ovakwetu veserewondo 1. (1 Petr. 5:9) Povikando tjiva, eṱe mape ya atu tira ovandu. Nu matu hepa omasa Jehova nge yandja kutja tu panḓere po moviungura vyokuzuvarisa. (Ef. 6:10) Jehova u tu pa omasa ngo okupitira mozombongarero zetu zombongo. Nai tu nondjingonekero yokuyenda kozombongarero 5 otjivike atjihe. Ozombongarero tjimuna Ehungi rOmbeibela, Omakonḓononeno wOkambo kOruhungu, Omakonḓononeno wOmbeibela wOmbongo, Oskole yOviungura vyOkuzuvarisa nOmbongarero yOviungura vyOkuzuvarisa. a Nu wina tu kara novitjitwa 4 ovinene mombura aihe, tjimuna Omaworonganeno wotukondwa, Omaworonganeno 2 worukondwa, nOmariro Omayapuke waMuhona. Ongwaye tje ri ohepero ku eṱe okukara pozombongarero azehe nḓo? Ozombongarero zetu ndino za uta vi? Nu ongaro ndji matu raisa ohunga nozombongarero nḓo i raisa tjike ohunga na eṱe?

3, 4. Jehova u undjira tjike kovakarere ve? Yandja ovihorera.

³ Okuza ku rukuru Jehova aa undjire ko kutja ovakarere ve ve woronganene pamwe okurikotamena ku ye. Okutara kotjihorera, mombura ndji 1513 Komurungu waKristus, Jehova wa yandja Etwako kotjiwaṋa tjaIsrael nu Etwako ndo aari kamburire mo okuzemburuka Esabata otjivike atjihe, kokutja eṱunḓu arihe ri yenene okurikotamena ku ye nokuhongwa okuza mOmatwako. (Deut. 5:12; 6:4-9) Indu Ovaisrael tjaave yandja ombakatwi kerakiza ndo, omaṱunḓu wawo ya yanḓiparisiwa nu otjiwaṋa atjihe tja ri noupanga oukohoke nu oupame kuna Jehova. Nungwari indu otjiwaṋa tjaatji nakaura Etwako ndo noviṋa mbyaavi undjirwa ku wo tjimuna okuworonganena pamwe aruhe kutja ve rikotamene ku Jehova,  owo va pandjara ondjingonekero yaMukuru.—Lev. 10:11; 26:31-35; 2 Ekuruh. 36:20, 21.

⁴ Wina tara kotjihorera Jesus tje tu pa. Eye aai kondjuwo yomaworonganeno wombongo otjivike atjihe mEsabata. (Luk. 4:16) Kombunda yonḓiro yaJesus nombendukiro ye, ovahongewa ve va kayenda komurungu okuworonganena pamwe aruhe nandarire kutja owo kava ri kehi yetwako rokuzemburuka Esabata. (Oviung. 1:6, 12-14; 2:1-4; Rom. 14:5; Kol. 2:13, 14) Pozombongarero nḓo, Ovakriste veserewondo 1 kaave pewa omirari nokuyanḓiparisiwa uriri, nungwari wina aave yandja ozombunguhiro zondangero ku Mukuru okupitira mozongumbiro zawo, omaziriro ngaave yandja nomaimburiro.—Kol. 3:16; Hebr. 13:15.

5. Ongwaye tji tu yenda kozombongarero zombongo zotjivike atjihe na komaworonganeno omanene na inga owotukondwa nge tjitwa mombura aihe? (Wina tara kokaongo nga “ Omaworonganeno wombura aihe nge waneka ovakarere vaMukuru.”)

⁵ Momuano otjingewo, indu tji matu i kozombongarero zetu otjivike atjihe na komaworonganeno omanene na inga owotukondwa wombura aihe, tu raisa kutja tu yandja oruvara kOuhona waMukuru, tu kayanḓiparisiwa mombepo nu tu tunduuza varwe momuano mbu tu raisa ongamburiro yetu. Otjiṋa tjarwe otjinanḓengu tjinene, tji tu ri pozombongarero nḓa, tu kara noruveze rwokurikotamena ku Jehova okupitira mozongumbiro zetu, momaziriro ngu matu yandja nomaimburiro. Omuano mbu tu kayendisa ozombongarero zetu mape ya wa panguka kaṱiṱi ku imbwi mbwaau kayendisiwa i Ovaisrael nOvakriste veserewondo 1, nungwari ozombongarero zetu ozonanḓengu tjinene tjimuna inḓo tji zari. Ozombongarero zetu ndino za uta vi?

6, 7. (a) Ondando yozombongarero zetu oyatjike? (b) Ozombongarero zombongo za pangukire vi otja kovimbumba momahi pekepeke?

⁶ Indu Mbuti Charles Taze Russell tja uta okupaha ouatjiri okuza mEmbo raMukuru, eye wa muna kutja okuworongana pu novakwao mbe nondando tjimuna oye tja ri otjiṋa otjinanḓengu tjinene.  Mombura ndji 1879, Mbuti Russell wa tjanga kutja, “Ami novakwetu varwe moPittsburgh, twa rongerisa nokuzikamisa otjimbumba tjomahongero wOmbeibela tji tji worongana Osondaha aihe okukonḓonona Omatjangwa.” Ovalese vokambo nga Zion’s Watch Tower va tunduuzwa kutja ve worongane pamwe, nu mombura ndji 1881 pa uta okutjitwa ozombongarero zombongo moPittsburgh, tjaPennsylvania mOsondaha nOritjatatu arihe. Okambo nga o-Watch Tower kaTjikukutu 1895 ka tja, ondando yozombongarero nḓo ya ri okutunga “oupanga wOvakriste, orusuvero nombwaneno” nokuyandja oruveze ku imba mbe ya kombongarero okuyanḓiparisasana.—Lesa Ovaheberi 10:24, 25.

⁷ Oure wozombura ozengi, omuano otjimbumba atjihe tjOvakonḓonone vOmbeibela mwaa tji kayendisa ozombongarero zombongo wa pangukire kovimbumba varwe vyOvakonḓonone vOmbeibela. Okutara kotjihorera, orutuu ndwa zire kotjimbumba tjimwe mOmahi Omakutasane waAmerika ndwa pitisiwa mombura ndji 1911, rwa tja: “Eṱe tu kara nozombongarero zombongo ape 5 motjivike atjihe.” Owo aave kara nozombongarero nḓo mOmandaha, Oritjatatu, Oritjatano novikando 2 mOsondaha. Orutuu rwarwe ndwa zire kotjimbumba tjarwe moAfrika nu ndwa pitisiwa mombura ndji 1914, rwa tja: “Eṱe tu kara nozombongarero zombongo povikando 2 momueze nu ze uta mOritjatano nga kOsondaha.” Nungwari kombunda omuano ozombongarero zetu zombongo mu ze kayendisiwa nai ombwa uta okuungurisiwa. Ngatu tare ousupi kekuruhungi rombongarero aihe.

8. Omahungi ngaaye yandjwa mozombura ozonguru ya ri nomapu yeṋe?

⁸ Ombongarero yEhungi rOmbeibela. Mombura ndji 1880, ombura yokombunda ya indu Mbuti Russell tja uta okupitisa okambo nga Zion’s Watch Tower, eye wa kongorera otjihorera tji tja yandjwa i Jesus na utu okukazuvarisa ombuze momahi warwe. (Luk. 4:43) Momuano mbwi Mbuti Russell wa uta ombongarero nambano ndji tjiukwa otjombongarero yEhungi rOmbeibela. Okutjivisa ohunga nouyenda we mbwi, okambo nga o-Watch Tower ka tja Mbuti Russell “ma kara nonyuṋe okuhungira ku novandu ohunga ‘nOviṋa mbi mavi tjama nouhona waMukuru.’” Mombura ndji 1911, indu ozombongo tji za za nokuzikwa momahi pekepeke, ombongo aihe ya tunduuzwa okuhinda ovahungire va nawa kotukondwa ongondoroka kutja ve kayandje omahungi 6 ohunga nomapu tjimuna ombanguriro notjisuta tjonguturiro. Pomaandero wehungi arihe, aape tjivisiwa ena romundu ngu ma yandja ehungi otjivike tji matji kongorere ko nepu rehungi ndi ma yandja.

9. Ombongarero yEhungi rOmbeibela ya yenda amai runduruka vi otja ozombura tjaaze kayenda, nove mo yenene vi okuyandja oruvara kozombongarero nḓo?

⁹ Mombura ndji 1945, okambo nga The Watchtower ka tjivisa ohunga nomaṋangero wapeke kombongarero youye auhe yEhungi rOmbeibela ndi mari zikama momahungi 8 wOmbeibela ngu maye ṱunu “kouzeu mbwa ri po oruveze ndwo.” Oure wozombura ozengi, omukarere omuṱakame aa yandja omapu womahungi ovayandje vomahungi mba toororwa ngaave sokukayandja, nungwari wina aave yandja omahungi ngu va rongerisa oveni. Posi yokutja mombura ndji 1981, ovayandje vomahungi avehe aave sokuzikamisira omahungi wawo kombapira yehungi ndji yandjwa kozombongo. b Okuza koruveze ndwo nga mombura ndji 1990, ozombapira tjiva zomahungi  aaze undjire kovapuratene okukara norupa mehungi poo okuyandja ovihorera vyovitjitwa, nungwari mombura ndjo omirari vyomayandjero womahungi vya rundururwa nu okuza koruveze ndwo omahungi aaye yandjwa otjehungi uriri. Omarundurukiro warwe ya tjitwa mu Rozonḓu 2008 indu ozominute zokuyandja ehungi tji za hendururwa okuza 45 nga 30. Nandarire kutja pa tjitwa omarundurukiro komuano ehungi mu ra sokuyandjwa, omahungi nga rongerisiwa nawa ngamba ye yanḓiparisa ongamburiro yetu mEmbo raMukuru nokutuhonga ohunga noviuṋe pekepeke vyOuhona waMukuru. (1 Tim. 4:13, 16) Ove u ṋanga ovandu avehe mbu wa kavarura na varwe mbe he ri Ovahongonone nonḓero kutja ve yekuzuva omahungi omananḓengu ngo nga zikamena kOmbeibela poo indee?

10-12. (a) Omuano Omakonḓononeno wOkambo kOruhungu maaye kayendisiwa wa runduruka momiano viṋe? (b) Omapuriro yeṋe ngu mo sokuripura omuini?

¹⁰ Omakonḓononeno wOkambo kOruhungu. Mombura ndji 1922, ovarumendu ovakambure mbaave tjiukwa otjovazuvarise mbaave hindwa i o-Watch Tower Society okukayandja omahungi kozombongo nokuhongorera oviungura vyokuzuvarisa, va yandja ondunge yokutja aruhe pe kare ombongarero yokukonḓonona okambo nga The Watch Tower. Ondunge ndji ya yakurwa nu rutenga omakonḓononeno wOkambo kOruhungu aaye tjitwa mokati kotjivike poo mOsondaha.

¹¹ Okambo nga o-Watchtower komayuva 15 ku Ngarano 1932 ka yandja ondjivisiro yokomurungu kutja okambo nga make sokukonḓononwa vi. Okuungurisa omuano womakonḓononeno mbu tjitwa pObetel otjotjihorera, okambo nga ka raisa kutja omurumendu omukambure ongu ma sokuhongorera omakonḓononeno ngo. Ovarumendu 3 aave yenene okuhaama komurungu kutja ve pasane oruveze rwokulesa ozoparagrafa. Otupa twomakonḓononeno oruveze ndwo katwa ri nomapuriro, okutja ingwi ngu ma hongorere omakonḓononeno aa sokupura ovapuratene kutja ve pure omapuriro ohunga noviṋa mbi mave konḓonona. Okuzambo, eye aa ningire ovapuratene kutja ve zire omapuriro nga purwa. Ndovazu  aape hepa omakahururiro wokomurungu, ingwi ngu ma hongorere omakonḓononeno aa sokuyandja omakahururiro “omasemba nu ousupi.”

¹² Rutenga ombongo aihe aai pewa ouyara wokutoorora kutja okambo keṋe otjingi tjovandu ku mave vanga okukonḓonona. Nungwari, okambo nga o-Watchtower komayuva 15 ku Kozonyanga 1933 ka raisa kutja ozombongo azehe ze sokuungurisa okambo inga okape. Mombura ndji 1937, pa yandjwa omurari wokutja omakonḓononeno nga ye sokukara mOsondaha. Okambo nga o-Watchtower keyuva 1 ku Seninaṋi 1942, ka yandja omirari vyokomurungu ohunga nokutja omakonḓononeno nga ye sokukayendisiwa vi nu omuano mbwo ombu kayendisiwa ndino. Rutenga, okambo nga ka tjivisa kutja mape utu okukara omapuriro kehi yehongwa arihe ndi mari konḓononwa nu omapuriro ngo ongu maye sokuungurisiwa. Okuzambo ake raisa kutja omakonḓononeno nga ye sokukara oure woiri imwe. Oko wina ka tunduuza imba mbu mave ziri kutja ave ha lese oviṋa okuza moparagrafa uriri nungwari ve zire “momambo wawo oveni.” Omakonḓononeno wOkambo kOruhungu ngamba oombongarero onanḓengu omukarere omuṱakame me tu pa ovikurya vyombepo moruveze ndu ri ro. (Mat. 24:45) Auhe wetu ma sokuripura omuini kutja, ‘Ami mbi ri rongerera Omakonḓononeno wOkambo kOruhungu otjivike atjihe poo indee? Nu mbi kondja okuzira indu tji me yenene?’

13, 14. Omakonḓononeno wOmbeibela wOmbongo ya uta vi, nu otjikeṋa tji tji tjata kove ohunga nombongarero ndji?

¹³ Omakonḓononeno wOmbeibela wOmbongo. Mokati kozombura nḓa 1890, kombunda yomambo omengi nga Millennial Dawn tji ya pitisiwa, Mbuti H. N. Rahn, ngwa ri Omukonḓonone wOmbeibela nu ngwa turire moBaltimore tjaMaryland mOmahi Omakutasane waAmerika, wa yandja ondunge yokutja pe ute oumbumba wokukonḓonona Ombeibela. Rutenga, ozombongarero nḓa, tjinene nḓaaze tjitirwa pozonganda zovandu za ri otjiṋa tjokutara uriri kutja maze ungura poo indee. Posi yokutja, mu Ndengaṋi 1895, oumbumba mbwi aau tjitwa nondoṋeno movihuro ovingi mOmahi Omakutasane waAmerika. Kunao, okambo nga o-Watch Tower komueze mbwo ka tja ovakonḓonone avehe vouatjiri ve sokukara nozombongarero nḓo. Oko ka raisa kutja ingwi ngu ma hongorere ombongarero ndjo ma sokurira omulese omuwa. Eye aa sokulesa omuhewo okuzambo a undju kutja imba mbe ri mbo ve zire. Tja zu nokulesa omihewo avihe moparagrafa nokuhungirira ku vyo, eye ma sokutara nokulesa omatjangwa aehe nga raisiwa mbwo. Kombunda yekondwa arihe, auhe aa sokuzira ousupi kutja we rihongo tjike.

¹⁴ Ena rombongarero ndji ra runduruka povikando ovingi. Oyo ya uta okuisanewa Berean Circles for Bible Study, okuisira kovature vaBerea veserewondo 1 mbaave konḓonona Omatjangwa nawa. (Oviung. 17:11) Kombunda, ena ndo ra rundururirwa ku indi Congregation Book Study. Nambano i isanewa Omakonḓononeno wOmbeibela wOmbongo, nu ombongo aihe i woronganena pamwe pEtuwo rOmerikotameneno nungwari ka pozonganda zovandu rukwao. Moure wozombura, omambo pekepeke, nokambo nga o-Watch Tower aaye ungurisiwa pomakonḓononeno nga. Okuza korukuru, avehe mbaave i kombongarero aave tunduuzwa kutja ve kare norupa  mombongarero. Ombongarero ndji ye tu vatera tjinene mokukurisa ondjiviro yetu yOmbeibela. Ove hapo u rirongerera ombongarero ndji otjivike atjihe nokukondja kutja u kare norupa mu yo poo indee?

15. Oskole yOviungura vyOkuzuvarisa ya ungurirwa okutuvatera okutjita tjike?

¹⁵ Oskole yOviungura vyOkuzuvarisa. Mbuti Carey Barber ngwaa ungura pomberoo ohongora moBrooklyn tjaNew York oruveze ndwo u zemburuka kutja, “Mongurova yaMandaha tji ya ri 16 ku Tengarindi 1942, ovarumendu avehe veṱunḓu rObetel yaBrooklyn va ningirwa kutja ve ritjangise koskole kombunda ndja katjiukwa otjOskole yOviungura vyOkuzuvarisa.” Mbuti Barber, kombunda ngwa ka rira okaṋepo kOrutu Orunane, wa tja oskole ndjo ya ri “otjiraisiro tjimwe tjomekuriro wapeke nge notjiṋa nomuano Jehova mbwe tjinda ovakarere ve ndino.” Oskole ndji ya vatera ovarumendu ovakambure ovengi kutja ve rire ovahonge ovawa nokuvevatera okurundurura omiano vyawo vyokuzuvarisa ngandu indu okambo nga Course in Theocratic Ministry tji kapitisiwa kozombongo mouye auhe okuza momautiro wombura ndji 1943. Okambo nga  o-Watchtower 1 raNgarano 1943, ka tja Oskole yOviungura vyOkuzuvarisa ya ungurirwa okuvatera ovakarere vaMukuru “okurirongerisa oveni nawa kutja ve rire ovahongonone ovasemba vombuze yOuhona.”—2 Tim. 2:15.

16, 17. Oskole yOviungura vyOkuzuvarisa i honga ovandu omiano omisemba vyokuhungira uriri poo indee? Kahurura.

¹⁶ Kotjirutenga, ovengi aave tira okuyandja omahungi komurungu wovandu ovengi. Mbuti Clayton Woodworth, Jr., omuatje womurumendu omukambure ngwa ri mondeko puna Mbuti Rutherford novakambure varwe mombura ndji 1918, u zemburuka omuano eye mbwa ri nondjoroka indu tje ritjangisa koskole ndji otjikando 1 mombura ndji 1943. Mbuti Woodworth wa tja: “Ya ri ouzeu ku ami okuyandja omahungi. Ee rimunu aayo eraka randje ra rire ere, otjinyo tjandje tja uta okukukuta nu eraka randje ari utu okuposa aayo meṱina.” Nungwari, otja omuano waClayton wokuhonga tjaau runduruka eye wa uta okupewa ouyara wokuyandja omahungi omengi. Oskole ndji ye mu honga omiano omisemba vyokuhungira. Oyo ye mu honga ounanḓengu wokurisusuparisa nokuṱaṱera ku Jehova. Eye wa tja: “Ami mba uta okumuna kutja omuyandje  wehungi kamunanḓengu tjinene. Otjiṋa otjinanḓengu tjinene eendu tje rirongerisa nawa na ṱaṱere ku Jehova, nu otji ma zuvakwa nawa nu ovapuratene mave rihongo po otjiṋa.”

¹⁷ Mombura ndji 1959, ovakazendu wina va ṋangwa kutja ve ritjangise koskole ndji. Sisi Edna Bauer, u zemburuka indu tja zuva omatjivisiro ngo pomaworonganeno omanene. Eye wa tja: “Me zemburuka ondjoroka ndja ri mokati kovakazendu Ovakriste.” “Nambano va muna oruveze rwokuungura ovingi.” Kutja oove omurumendu poo oove omukazendu, ove wa rora okuungurisa oruveze rwoye kutja u ritjangise kOskole yOviungura vyOkuzuvarisa nu u hongwe i Jehova?—Lesa Jesaja 54:13.

18, 19. (a) Ombongarero yOviungura vyOkuzuvarisa ngamba i tjitwa momuano uṋe? (b) Ongwaye tji tu imbura pozombongarero zetu zombongo? (Tara kokaongo nga “ Omaimburiro wouatjiri.”)

¹⁸ Ombongarero yOviungura vyOkuzuvarisa. Okuza kombura ndji 1919, aape kara ozombongarero zoviungura vyokuzuvarisa. Oruveze ndwo, kavandu avehe mombongo mbaave i kozombongarero nḓo, nungwari owomba mba ri norupa mokuhandjaura oumbo porwawo. Okuza mombura ndji 1923, Ombongarero yOviungura vyOkuzuvarisa aai tjitwa rumwe momueze, nu avehe mombongo aave sokukara mbo. Mombura ndji 1928, ozombongo aaze tunduuzwa kutja ze kare nOmbongarero yOviungura vyOkuzuvarisa otjivike atjihe nu mombura ndji 1935, okambo nga The Watchtower ka tunduuza ozombongo kutja ze ungurise ondjivisiro ndji ri mokambapira nga Director (Kombunda kaake tjiukwa otjo-Informant nu nambano ku ke tjiukwa otjokambapira kOviungura vyEtu vyOuhona) indu tji ve nombongarero ndji. Ombongarero ndji tjimanga ya rira orupa rwozombongarero zombongo nḓe tjitwa aruhe.

¹⁹ Ombongarero yOviungura vyOkuzuvarusa ngamba i tjitwa momuano mbwa zikamisiwa i Kristus, mbu yandja omuhunga mbu tu vatera okurira ovapyuke moviungura vyokuzuvarisa. (Mat. 10:5-13) Ndovazu wa uta okupewa okambapira kOviungura vyEtu vyOuhona, u kekonḓonona nawa nokuungurisa omapu nge ri mo indu tji mo kazuvarisa?

20-22. (a) Ongwaye tji tu zemburuka onḓiro yaJesus? (b) Okukara pOmariro Omayapuke waMuhona ombura aihe ku tu etera ouwa watjike?

²⁰ Jesus wa rakiza ovemukongorere kutja ve zemburuke onḓiro ye ngandu tja kotoka. Tjimuna omazemburukiro wOpaska tji ya ri otjitjitwa tjombura aihe, Omazemburukiro wonḓiro yaKristus wina ye tjitwa mombura aihe. (1 Kor. 11:23-26) Mombura aihe ovandu omangete ve kara pombongarero ndji. Oyo i zemburukisa imba ovatwirisiwa ohunga nondjingonekero yawo yokurira ovarumate va pamwe na Kristus vOuhona. (Rom. 8:17) Nu kozonḓu inḓa ozarwe i kuna ondengero nouṱakame kOmbara yOuhona waMukuru.—Joh. 10:16.

²¹ Mbuti Russell novakwao mbaave ungura pamwe va muna ounanḓengu wokuzemburuka Omariro Omayapuke waMuhona nu aave tjiwa kutja owo ye sokutjitwa rumwe mombura. Okambo nga o-Watch Tower ka Kozonyanga 1880 ka tja: “Oure wozombura, ovengi poPittsburgh aave zemburuka Opaska [Omariro Omayapuke waMuhona] nu aave ri oviṋa mbi kuramena po orutu nombinḓu yOmuhona wetu.” Nu tjimanga omaworonganeno omanene ya uta okutjitwa moruveze rumwe nOmazemburukiro wonḓiro yaJesus.  Otjikando otjitenga indu tji pa ri ondjivisiro ohunga nomaworonganeno ngo ya ri mombura ndji 1889, indu tji pa ri ovandu 225 na pe papitisiwa ovandu 22.

²² Kundino, katu zemburuka Omariro Omayapuke waMuhona pomaworonganeno omanene rukwao, nungwari tu ṋanga ovandu avehe momaturiro aehe mu tu ri okuyekuzemburuka eyuva ndi puna eṱe pOmatuwo wOmerikotameneno poo pomatuwo womaworonganeno ngu tu yazema. Mombura ndji 2013, pomazemburukiro wonḓiro yaJesus pa ri ovandu vokombanda omangete 19. Tjiri indji ondjingonekero onene kutja katu i kOmariro Omayapuke uriri nungwari wina tu kara norupa rwokuṋanga ovandu kongurova yapeke ndji! Ove hapo u kara nonḓero yokuṋanga ovandu ovengi kOmariro Omayapuke mombura aihe?

23. Ove u noumune uṋe ohunga nokurikotamena ku Jehova pu novakambure ovakweṋu?

²³ Ovakarere vaJehova ovaṱakame kave vara erakiza rokuworonganena pamwe otjotjiṋa otjizeu. (Hebr. 10:24, 25; 1 Joh. 5:3) Okutara kotjihorera, Ombara David ya suverere okuyenda kondjuwo yaJehova okukerikotamena ku ye. (Eps. 27:4) Eye tjinene wa ri nonyuṋe okurikotamena ku Jehova pu novakwao mba suvera Mukuru. (Eps. 35:18) Nu ripurira kotjihorera tjaJesus. Eye nandarire ngunda a ri omuṱiṱi, wa ri nonḓero yokukara mondjuwo yaIhe yomerikotameneno.—Luk. 2:41-49.

24. Indu tji twa i kozombongarero zombongo, tu noruveze rwokutjita vi?

²⁴ Tji matu i kozombongarero zombongo, tu raisa orusuvero rwetu ku Jehova nu tu raisa kutja tu nonḓero yokutunduuza ovakambure ovakwetu. Wina tu raisa kutja tu zera okurihonga okuhupa otjovandu mbe riwisa kehi yOuhona waMukuru, orondu omahongero ngo tjinenenene tu ye muna pozombongarero zetu zombongo, pomaworonganeno omanene nomaworonganeno wotukondwa. Tjarwe, ozombongarero zetu zombongo ze tu pa ondjiviro nomasa wokuyenena okupanḓera po tji tu ri motjiungura otjinanḓengu tjinenenene tji tji kayendisiwa kehi yOuhona waMukuru ndino. Otjiungura ho otjokuisapo ovandu ovahongewa vOmbara Jesus Kristus nokuvehonga. (Lesa Mateus 28:19, 20.) Nokuhina omakeyakeyero onḓero yetu yokuvanga okukara pozombongarero zombongo pu novakambure ovakwetu, ondji raisa kutja Ouhona waMukuru ounanḓengu pu pe ṱeki pi ku eṱe. Aruhe ngatu vare ozombongarero zetu zombongo otjoviṋa ovinanḓengu tjinene!