1. Ovahongwa ova li va kwafelwa ngahelipi eshi va li va ongala pamwe, nomolwashike va li va pumbwa ekwafo la tya ngaho?

 KONIMA ashike eshi Jesus a nyumunwa, ovahongwa vaye ova li va ongala pamwe va twaafane omukumo. Ova li ve lipatela mongulu omo va li va ongala molwaashi ova li va tila ovatondi vavo. Nopehe na omalimbililo, outile wavo owa li wa kana po eshi Jesus e va holokela mongulu omo va li ndele ta ti: “Tambuleni Omhepo Iyapuki”! (Lesha Johannes 20:19-22.) Lwanima, ovahongwa ovo ova ka ongala vali oshikando shimwe ndele Jehova te va tilile omhepo iyapuki. Osho kasha li tuu she va pameka va longe oilonga yokuudifa oyo ve lineekelelwa! — Oil. 2:1-7.

2. (a) Jehova ohe tu pameke ngahelipi kunena, nomolwashike twe shi pumbwa? (b) Omolwashike Elongelokalunga lOukwaneumbo la fimana? (Tala eshangelo lopedu nosho yo oshimhungu “ Elongelokalunga lOukwaneumbo,” epandja 175.)

² Nafye ohatu shakeneke omashongo a yukila kwaao a li a shakenekwa kovamwatate vomefelemudo lotete. (1 Pet. 5:9) Omafimbo amwe otashi dulika tu kwatwe koumbada wokutila ovanhu, notwa pumbwa okupula Jehova e tu pameke opo tu dule okulididimikila eenghalo notu twikile okuudifa. (Ef. 6:10) Jehova ohe tu pameke unene tuu okupitila mokwoongala. Kunena otu na oufembanghenda wokukala pokwoongala kwopavali oshivike keshe: Okwoongala kwomOipafi nEkonakono lOshungonangelo nosho yo okwoongala kwomokati koshivike oko haku ifanwa Onghalamwenyo yopaKriste noilonga yokuudifa. a Natango ohatu hafele eemhito dopane de likalekelwa omudo keshe: oshoongalele shoshitukulwa, oyoongalele ivali yopashikandjo, nosho yo Edimbuluko lefyo laKristus. Omolwashike sha fimana okukala peemhito adishe odo dokwoongala? Omalunduluko elipi a ningwa po shi na sha nokwoongala kwetu? Oikala yetu i na sha nokwoongala ohai holola shike kombinga yetu?

3, 4. Jehova okwa teelela oshiwana shaye shi kale hashi ningi shike? Yandja oshihopaenenwa.

³ Okudja nale, oshiwana shaJehova osha kala hashi ongala nelalakano shi mu longele. Pashihopaenenwa, mo 1513 K.O.P., Jehova okwa li a pa oshiwana shaIsrael Omhango, oyo ya li ya popya shi na sha nokwoongala kwokoshivike mefiku lEshabata opo oukwaneumbo keshe u dule oku mu longela nou hongwe Omhango oyo. (Deut. 5:12; 6:4-9) Ngeenge Ovaisrael va li tava dulika komhango oyo, omaukwaneumbo avo okwa li haa pamekwa pamhepo noshiwana ashishe osha li hashi kala sha koshoka nosha  pama pamhepo. Mepingafano naasho, ngeenge sha li itashi dulika koiteelelwa yOmhango, ngaashi okwoongala pandjikilile nelalakano lokulongela Jehova, okwa li he shi efele momupya. — Lev. 10:11; 26:31-35; 2 Omaf. 36:20, 21.

⁴ Tala yo koshihopaenenwa osho sha tulwa po kuJesus. Oshivike keshe, okwa li ha i koshinagoga mefiku lEshabata. (Luk. 4:16) Konima yefyo nenyumuko laJesus, ovahongwa vaye ova twikila okukala hava ongala pamwe pandjikilile nonande kava li vali koshi yomhango yEshabata. (Oil. 1:6, 12-14; 2:1-4; Rom. 14:5; Kol. 2:13, 14) Ovakriste vomefelemudo lotete eshi va li hava ongala, kava li ashike have shi ningi nelalakano lokuhongwa nokutuwa omukumo, ndele ova li yo hava yandje omahambeleloyambo oo a kwatela mo okwiilikana, okuyandja omatyekosha nosho yo okwiimbila Jehova. — Kol. 3:16; Heb. 13:15.

5. Omolwashike sha fimana okukala pokwoongala kwokoshivike nosho yo poyoongalele yokomudo? (Tala yo oshimhungu “ Okwoongala kwokomudo oko haku hanganifa oshiwana shaKalunga,” epandja 176.)

⁵ Sha faafana, nafye kunena ngeenge hatu ongala oshivike keshe nokukala poyoongalele yokomudo, ohatu yambidida Ouhamba waKalunga nohatu pewa eenghono okupitila momhepo iyapuki nohatu tu vamwe omukumo eshi hatu hepaulula moipafi eitavelo letu. Osho sha fimanenena oshosho kutya, otu na oufembanghenda wokulongela Jehova eshi hatu kufa ombinga pokwoongala, okwiilikana noku mu imbila. Nonande okwoongala kwetu otashi dulika inaku unganekwa monghedi ya faafana nokwoongala kwOvaisrael nosho yo kwOvakriste vomefelemudo lotete, elalakano nefimano lokwoongala ola faafana. Okwoongala oko hatu ningi kunena okwa unganekwa ngahelipi?

6, 7. (a) Elalakano lokwoongala olashike naanaa? (b) Ongahelipi okwoongala kweengudu dOvakonakoni vOmbibeli kwa li haku kala kwa yoolokafana?

⁶ Eshi omumwatate Charles Taze Russell a hovela okukonga oshili mEendjovo daKalunga, okwa li a didilika kutya okwa  pumbwa okwoongala pamwe naavo yo ve na elalakano la faafana. Mo 1879, Russell okwa li a shanga a ti: “Fye navakwetu muPittsburgh, otwe liunganeka tu kale hatu ningi otundimbibeli nelalakano lokukonakona Omishangwa, naasho ohatu shi ningi eshi hatu ongala Osoondaxa keshe.” Ovaleshi vo-Zion’s Watch Tower ova li va tuwa omukumo va kale hava ongala pamwe, nokudja mo 1881, muPittsburgh, shomuPennsylvania, omwa li hamu ningwa okwoongala Osoondaxa nEtitatu keshe. Oshungonangelo yOshiingilisha yaNovemba 1895 oya popya kutya elalakano lokwoongala olo okukaleka po “oukumwe, ohole neendafano lOvakriste,” noku li omhito iwa yokutwaafana omukumo kwaavo hava kala po. — Lesha Ovaheberi 10:24, 25.

⁷ Oule womido, Ovakonakoni vOmbibeli ova kala hava ningi okwoongala kwa yoolokafana she likolelela keengudu. Pashihopaenenwa, mo 1911, ongudu imwe yokOilongo ya Hangana oya li ya shanga onhumwafo ya ti: “Ohatu ongala lutano oshivike keshe.” Ova li hava ongala Omaandaxa, Etitatu, Etitano nosho yo luvali mOsoondaxa. Onhumwafo imwe vali ya dja kongudu yomuAfrika, ya shangelwe mo 1914, oya ti: “Ohatu ongala ashike luvali momwedi, hatu hovele mEtitano nokumanifa mOsoondaxa.” Mokweendela ko kwefimbo, okwoongala okwa ka hovela okuningwa naanaa monghedi oyo haku ningwa kunena. Tala pauxupi kondjokonona i na sha nokwoongala keshe.

8. Oipalanyole imwe ilipi ya li hai kundafanwa moipopiwa yomoipafi pefimbo lonale?

⁸ Okwoongala kwomOipafi. Mo 1880, konima eshi pa pita omudo umwe okudja eshi omumwatate Russell a hovela okunyanyangida o-Zion’s Watch Tower, okwa li a shikula oshihopaenenwa shaJesus shoku ka udifila keenhele da yoolokafana. (Luk. 4:43) Mokweendela ko kwefimbo, omumwatate Russell okwa li a tota po okwoongala oko paife haku ifanwa Okwoongala kwomOipafi. Oshungonangelo oya li ya popya shi na sha nolweendo laye ya ti kutya “okwa teelela nodjuulufi okukundafana pokwoongala kwomoipafi ‘oinima ya pamba Ouhamba waKalunga.’” Konima eshi pa totwa eengudu ile omaongalo moilongo ihapu, omaongalo oo okwa li a ladipikwa mo 1911, opo a tume ovapopi va pyokoka va ye koitukulwa yopoushiinda va kale hava ka yandja oshipopiwa shomoipopiwa ihamano oyo tai kundafana oipalanyole ngaashi, etokolo nekuliloyambo. Konima yoshipopiwa keshe, okwa li haku shiivifwa edina laau ta ka yandja oshipowa oshivike sha landula ko noshipalanyole shoshipopiwa shaye.

9. Okwoongala kwomOipafi okwa enda ngahelipi taku lunduluka, nongahelipi to dulu oku ku yambidida?

⁹ Oshungonangelo yOshiingilisha yomo 1945 oya li ya shiivifa shi na sha noshikonga shokushiva ovanhu kOkwoongala kwomOipafi opo kwa li tapa kala hapa yandjwa oipopiwa ihetatu yopaMbibeli kooshimwe, oyo tai kundafana kombinga “yomaupyakadi a kwata moiti oo a palamena ovanhu kunena.” Oule womido omilongo, ovapopi kava li ashike hava yandje oipopiwa oyo ya longekidwa komupiya omudiinini, ndele ova li yo hava yandje oyo va tota vo vene. Ashike okudja mo 1981, ovapopi aveshe ova li va ladipikwa va kale hava yandje oipopiwa ye likolelela koipopiwadutilo  oyo va pewa kehangano. b Okuxulila mo 1990, oipopiwadutilo imwe yomoipafi oya li tai pula ovapwilikini va kufe ombinga, ile ya kwatela mo omauliko; ashike momudo oo tuu oo osho osha li sha xulifwa po, nokudja opo oipopiwa yomoipafi oya li hai yandjwa ashike sha yukilila. Natango muJanuali 2008 opa li pa ningwa elunduluko limwe vali, kokutya oipopiwa yomoipafi kai na vali okukwata oule wominute 45, ndele ominute 30. Nonande pa ningwa elunduluko li na sha nomudutilo woipopiwa yomoipafi, otai twikile okupameka eitavelo letu mEendjovo daKalunga noku tu honga kombinga yoinima ihapu oyo ya pamba Ouhamba waKalunga. (1 Tim. 4:13, 16) Oho shivi ngoo ovatalelwapo voye nosho yo vamwe vali ovo vehe fi Eendombwedi ve uye va pwilikine koipopiwa yopaMbibeli oyo ya fimana?

10-12. (a) Omalunduluko ashike a ningwa po shi na sha nEkonakono lOshungonangelo? (b) Omapulo elipi atusheni hatu dulu okulipula?

¹⁰ Ekonakono lOshungonangelo. Mo 1922, ovamwatate ovaenditalelipo, ovo va li va tumwa kehangano lo-Watch Tower va ka yandje oipopiwa momaongalo nokukwatela komesho oilonga yokuudifa, ova li va ninga eetepo pa totwe okwoongala kwekonakono lOshungonangelo. Eetepo olo ola li la tulwa moilonga, ndele pehovelo ekonakono lOshungonangelo ola li hali ningwa mokati koshivike ile mOsoondaxa.

¹¹ MOshungonangelo yOshiingilisha yo 15 Juni 1932 omwa li mwa nyanyangidwa ouyelele wa wedwa po u na sha nanghee okwoongala oko kwa li ku na okuningwa. Oshungonangelo oyo oya tile kutya okwoongala oko naku kale haku kwatelwa komesho komumwatate ngaashi ashike moukwaneumbo waBetel. Oya li yo ya ninga eetepo kutya ovamwatate vatatu otava dulu okukala omutumba komesho pokwoongala tave lipe omalufo okulesha outendo. Oitukulwa yokukonakonwa kaya li hai kala i na omapulo, nomolwaasho omumwatate oo ta kwatele komesho okwa li e na okupula ovapwilikini va pule omapulo a pamba oshikundafanwa. Opo nee ta yandje omhito kwaavo va hala okunyamukula  omapulo oo. Ngeenge opa pumbiwa kwa li omayefilo a wedwa po, omukwatelikomesho okwa li ha “yelifa pauxupi.”

¹² Pehovelo, eongalo keshe ola li tali dulu okuhoolola oshifo osho ovanhu vahapu va hala okukonakona. Ndele Oshungonangelo yOshiingilisha yo 15 Aprili 1933 oya li ya popya kutya omaongalo aeshe oku na okulongifa oshifo osho opo sha piti. Opa li yo pa yandjwa elombwelo mo 1937 kutya ekonakono olo nali kale hali ningwa mOsoondaxa. Omalunduluko amwe vali a ka ningwa po e na sha nonghedi omo okwoongala oko haku ningwa fiyo okunena okwa li a yelifwa mOshungonangelo yOshiingilisha ye 1 Oktoba 1942. Tete, Oshungonangelo oya li ya popya kutya omapulo oo e na okulongifwa otaa ka kala haa holoka pedu lepandja keshe loshitukulwa shokukonakonwa. Oya ti yo kutya okwoongala oku na okukwata oule wovili. Oya ladipika yo ovakufimbinga vaha leshe ashike osho sha shangwa moutendo, ndele ove na okunyamukula tashi di komutima “noitya yavo vene.” Fiyo okunena, omupiya omudiinini ohe tu pe eendja dopamhepo pefimbo lado unene tuu okupitila mekonakono lOshungonangelo. (Mat. 24:45) Atusheni ohatu dulu okulipula kutya: ‘Ohandi lilongekidile ngoo ekonakono lOshungonangelo oshivike keshe? Ohandi kendabala ngoo okuninga omatyekosha pokwoongala?’

13, 14. Ekonakonombibeli lEongalo ola li la hovela ngahelipi, noshike ho hafele pokwoongala oko?

¹³ Ekonakonombibeli lEongalo. Lwopokati komido 1890 nasha, konima eshi pa nyanyangidwa omambo onhumba o-Millennial Dawn, omumwatate H. N. Rahn, Omukonakoni wOmbibeli womoshilando Baltimore, shomuMaryland, mOilongo ya Hangana yaAmerika, okwa li a ninga eetepo ku totwe eengudu dokukonakona Ombibeli taku longifwa omambo oo o-Millennial Dawn. Ovamwatate ova li va hetekela okukala hava ningi okwoongala oko, oko luhapu kwa li haku ningilwa momaumbo. MuSeptemba 1895, okwa li kwa didilikwa kutya okwoongala oko okwa li taku ende nawa moilando ihapu yomOilongo ya Hangana. Onghee hano, Oshungonangelo yomwedi oo oya li ya ladipika Ovakonakoni vOmbibeli aveshe va kale hava ningi okwoongala kwa tya ngaho. Oya ti yo kutya ou ta kwatele komesho oku na okukala omuleshi omunekeka. Okwa li e na okulesha etumbulo ndele ta yandje omhito kwaavo ve li po va ninge omatyekosha avo. Konima eshi a lesha omatumbulo aeshe mokatendo noku a kundafana, okwa li e na okulesha omishangwa odo di li mokatendo. Pexulilo letukulwa, keshe umwe oo e li pokwoongala okwa li e na okungonga pauxupi kombinga yaasho va kundafana.

¹⁴ Edina lokwoongala oko ola kala nokulundululwa lwoikando. Okwa li kwa lukwa Ongudu yEkonakonombibeli lOvaberea, metwokumwe noshihopaenenwa shOvaberea vomefelemudo lotete ovo va li hava konakona noukeka Omishangwa. (Oil. 17:11) Lwanima, edina ola li la lunduluka ndele tali ningi Ekonakono lEmbo lomEongalo. Paife ohaku ifanwa Ekonakonombibeli lEongalo, noihaku ongalwa vali meengudu momaumbo, ndele ponhele yaasho, eongalo alishe ohali ongala mOlupale lOuhamba.  Oule womido omilongo, omambo e lili noku lili, oumbo nosho yo oitukulwa yomEeshungonangelo oya li hai longifwa pekonakono olo. Okudja nale, aveshe ovo have uya pokwoongala oko ova li hava ladipikwa va kufe ombinga. Okwoongala oko okwe tu kwafela neenghono tu hapupalife eshiivo letu lOmbibeli. Oho kendabala ngoo okulilongekidila okwoongala kwa tya ngaho nokukufa ombinga muko?

15. Ofikola yOkudeula Ovaudifi oya li ya totwa po nelalakano lashike?

¹⁵ Ofikola yOkudeula Ovaudifi. Omumwatate Carey Barber, oo a li ta longele keembelewa detu da kula koBrooklyn moNew York pefimbo opo, okwa popya shi na sha naasho sha li sha ningwa po a ti: “MOmaandaxa konguloshi, 16 Februali 1942, ovalumenhu aveshe ovo va li oilyo youkwaneumbo waBetel moBrooklyn ova li va lombwelwa ve lishangife meetundi odo da ka shiivika nedina Ofikola yOkudeula Ovaudifi.” Omumwatate Barber, oo lwanima a ka ninga oshilyo shOlutuwiliki, okwa li a popya shi na sha nofikola oyo a ti kutya oi li “omukalo umwe wa denga mbada oo Jehova ta longifa okuhonga oshiwana shaye kunena.” Ehongo olo  ola li la kwafela ovamwatate va xwepopaleke ounghulungu wavo wokuhonga nokuudifila vamwe, nokudja mo 1943, okalongifwambo kedina Course in Theocratic Ministry oka li ka tuminwa komaongalo mounyuni aushe. Oshungonangelo yOshiingilisha ye 1 Juni 1943 oya ti kutya Ofikola yOkudeula Ovaudifi oya nuninwa okukwafela oshiwana shaKalunga shi “lideule opo shi kale eendombwedi dinekeka mokuudifa Ouhamba.” — 2 Tim. 2:15.

16, 17. Mbela Ofikola yOkudeula Ovaudifi oya li ashike hai kwafele ovanhu va kale ve na ounghulungu wokupopya? Shi yelifa.

¹⁶ Pehovelo, vahapu ova li hava mono shidjuu okuyandja oipopiwa moipafi. Clayton Woodworth, oo xe a li modolongo pamwe nomumwatate Rutherford navakwao mo 1918, okwa li ta dimbuluka nghee a li e udite eshi a li e lishangifa mofikola oyo mo 1943. Okwa ti: “Osha li shidjuu neenghono kwaame okuyandja oipopiwa. Elaka lange ola li hali kala la fa la kula, okanya kange okwa li haka kukuta filufilu nondaka yange oya li hai lunduluka, nda popi pombada, nda popile pofingo.” Eshi Clayton a enda ta xwepopala, okwa kala he lineekelelwa oufembanghenda wokuyandja oipopiwa luhapu. Ofikola oye mu kwafela e lihonge  shihapu shihe fi ashike ounghulungu wokupopya. Oye mu honga shi na sha nanghee sha fimana okukala omulininipiki nokulineekela Jehova. Okwa ti: “Onde ke shi didilika mo kutya omupopi haye a fimana. Ashike ngeenge okwe lilongekida nawa nokwe lineekela Jehova, ovapwilikini otava ka hafela oipopiwa yaye nokulihonga mo sha.”

¹⁷ Mo 1959, ovamwameme ova li va lombwelwa kutya otava dulu okulishangifa mofikola. Omumwameme Edna Bauer ota dimbuluka eshi eshiivifo olo la li la ningwa poshoongalele. Okwa ti: “Ohandi dimbulukwa nghee ovamwameme va li va tunhukwa omolweshiivifo olo. Okudja opo omhito oya li ye va yeulukila.” Ovamwatate novamwameme vahapu ova kala ve na oufembanghenda wokukufa ombinga mOfikola yOkudeula Ovaudifi, oule womido, opo va hongwe kuJehova. Nokunena ohatu pewa edeulo pokwoongala kwomokati koshivike. — Lesha Jesaja 54:13.

18, 19. (a) Okwoongala kwoPailonga okwa li haku ningwa metwokumwe noshihopaenenwa shilipi? (b) Omolwashike hatu imbi pokwoongala kwetu? (Tala oshimhungu “ Okwiimba kombinga yoshili.”)

¹⁸ Okwoongala kwoPailonga. Okudja mo 1919, opa kala hapa ningwa okwoongala ku na sha nelongekido lokuya moukalele. Omafimbo amwe haaveshe meongalo va li hava kala pokwoongala oko, ndele ovovo ashike va li ve na oshinakuwanifwa shokuyandja oileshomwa. Mo 1923, Okwoongala kwoPailonga okwa li haku ningwa lumwe momwedi, naaveshe mongudu ile meongalo ova li hava teelelika va kale po. Mo 1928, omaongalo okwa li a ladipikwa a kale haa ningi Okwoongala kwoPailonga oshivike keshe, nomo 1935 Oshungonangelo yOshiingilisha oya li ya yandja elombwelo komaongalo aeshe opo a kanghekele Okwoongala kwoPailonga kouyelele oo wa nyanyangidwa mokafo oko ka li haka ifanwa Director (oko lwanima ka kala haka ifanwa Informant, nolwanima oka ka kala haka ifanwa Oukalele Wetu wOuhamba). Okwoongala kwa tya ngaho paife ohaku ningwa pandjikilile momaongalo aeshe.

¹⁹ Kunena, ohatu pewa omayele taa longo, pokwoongala kwomokati koshivike, e na sha nanghee tu na okuudifa. (Mat. 10:5-13) Ngeenge owa wana okukala ho pewa okafo kokulongifwa pokwoongala, oho ka konakona ngoo nokutula moilonga omaetepo oo e li mo e na sha nokuudifa?

20-22. (a) Omolwashike hatu dimbulukwa efyo laJesus? (b) Ouwa ulipi to ka mona ngeenge owa kala ho ongala pEdimbuluko omudo keshe?

²⁰ Jesus okwa li a lombwela ovashikuli vaye va kale hava dimbulukwa efyo laye fiyo e uya. Ngaashi ashike edano lOpaasa, Edimbuluko lefyo laKristus oli na okuningwa lumwe omudo keshe. (1 Kor. 11:23-26) Pokwoongala kwa tya ngaho ohapa kala ovanhu omamiliyona omudo keshe. Ohaku dimbulukifa ovavaekwa shi na sha noufembanghenda oo ve na woku ka fyuulula Ouhamba. (Rom. 8:17) Shi na sha needi dimwe, ohaku di dimbulukifa di kale da lenga Ohamba yOuhamba waKalunga nokukala didiinini kuyo. — Joh. 10:16.

²¹ Omumwatate Russell novaendi pamwe naye ova li va mona kutya osha fimana okudimbulukwa Ouvalelo wOmwene nova li yo ve shii kutya oshi na okuningwa lumwe omudo keshe.  Oshungonangelo yOshiingilisha yaAprili 1880 oya ti: “Kuvahapu vomufye muPittsburgh osha kala onghedindjikilile . . . okudana Opaasa [Edimbuluko] nokulya omadidiliko olutu nohonde yOmwene wetu.” Ovamwatate ovo ova li va hovela okukala hava ningi oyoongalele pefimbo lEdimbuluko. Oshoongalele shotete osho omivalu dasho da li da tuvikilwa osha ningwa mo 1889, nopa li ovanhu 225 nopa ninginifwa 22.

²² Kunena Edimbuluko ihali danwa vali mumwe noshoongalele, ndele ponhele yaasho, ohatu shivi ovanhu vomoitukulwa yetu ve uye tu ongale pamwe mOmalupale Ouhamba ile meenhele odo twa hiila. Mo 2013, pEdimbuluko opa li ovanhu ve dulife pomamiliyona 19. Kau fi tuu oufembanghenda munene okukala pEdimbuluko nokuladipika vamwe ve tu waimine monguloshi oyo iyapuki elela! Oho hafele ngoo okushiva ovanhu vahapu ngaashi tashi shiiva ve uye kEdimbuluko omudo keshe?

23. Owa tala ko ngahelipi okwoongala kwetu?

²³ Ovapiya vaJehova ovadiinini ihava tale ko omalombwelo e na sha nokwoongala e li omutengi. (Heb. 10:24, 25; 1 Joh. 5:3) Pashihopaenenwa, ohamba David oya li i hole okuya kongulu yaJehova i ke mu longele. (Eps. 27:4) Oya li hai hafele neenghono okulongela Kalunga pamwe naavo ve mu hole yo. (Eps. 35:18) Diladila yo koshihopaenenwa shaJesus. Ofimbo a li munini, okwa li a hokwa okukala mongulu yaXe yeilikano. — Luk. 2:41-49.

24. Okukala pokwoongala ohaku tu pe omhito yokuninga shike?

²⁴ Ngeenge hatu i kokwoongala, ohatu ulike kutya otu hole Jehova notwa halelela okutunga ovamwatate pamhepo. Ohatu ulike yo kutya otwa hala okuhongwa nghee tu na okulihumbata tu li ovapangelwa vOuhamba waKalunga. Ehongo olo tali tu kwafele tu ninge ngaho ohatu li pewa unene tuu pokwoongala nopoyoongalele. Kakele kaasho, okwoongala ohaku tu pameke noku tu nongopaleka opo tu dule okupondola moilonga ya fimanenena oyo tai wanifwa po kOuhamba waKalunga yokuninga ovanhu ovahongwa vOhamba Jesus Kristus noku va deula. (Lesha Mateus 28:19, 20.) Nopehe na omalimbililo, okukala twa halelela okukala pokwoongala pandjikilile otaku ulike kutya otwa itavela shili kutya Ouhamba otau pangele. Natu kaleni alushe twa lenga okwoongala kwetu.