1. Йесойы ахуыргӕнинӕгтӕ куы ӕрӕмбырд сты, уӕд сӕ Йегъовӕ йӕ сыгъдӕг тыхӕй цӕмӕн схайджын кодта?

 ЙЕСО куы райгас, уымӕй гыццыл фӕстӕдӕр йӕ ахуыргӕнинӕгтӕ ӕрӕмбырд сты, цӕмӕй кӕрӕдзи бафидар кодтаиккой. Се знӕгтӕй кӕй тарстысты, уый тыххӕй сӕ дуӕрттӕ сӕхгӕдтой. Фӕлӕ Йесо сӕ астӕу куы ’рлӕууыд ӕмӕ сын куы загъта, зӕгъгӕ, «схайджын ут Хуыцауы сыгъдӕг тыхӕй», уӕд сӕ тас цыдӕр фӕци. (Бакӕс Иоанны 20:19–22.) Фӕстӕдӕр та йӕ ахуыргӕнинӕгтӕ ногӕй куы ӕрӕмбырд сты, уӕд сӕ Йегъовӕ йӕ сыгъдӕг тыхӕй схайджын кодта. Ныр уыцы тыхы фӕрцы цӕттӕ уыдысты адӕмӕн хорз хабар хъусын кӕнынмӕ (Хъуыд. 2:1–7).

2. а) Йегъовӕ нын хъарутӕ куыд ратты ӕмӕ ӕнӕ уымӕй нӕ бон цы нӕ уаид? ӕ) Бинонты ахуыр ахсджиаг цӕмӕн у? (Кӕс фиппаинаг ӕмӕ рамкӕ « Бинонты ахуыр».)

² 1 ӕнусы не ’фсымӕртӕ цы зындзинӕдтыл ӕмбӕлдысты, мах дӕр ахӕм зындзинӕдтыл ӕмбӕлӕм (1 Пет. 5:9). Иуӕй-иу хатт афтӕ дӕр вӕййы, ӕмӕ адӕмӕй фӕтӕрсӕм. Ӕмӕ махӕн дӕр Йегъовӕ хъарутӕ куы нӕ дӕттид, уӕд нӕ бон нӕ уаид азӕй-азмӕ хъусын кӕнын (Еф. 6:10). Йегъовӕ нын бирӕ хъарутӕ ратты фембӕлдты уылты. Алы къуыри дӕр нын вӕййы дыууӕ фембӕлды – ӕргом раныхас ӕмӕ «Хъахъхъӕнӕн мӕсыджы» ахуыр кӕм вӕййы, уыцы фембӕлд ӕмӕ, «Нӕ чырыстон цард ӕмӕ нӕ лӕггад» чи хуыйны, уыцы фембӕлд a. Уымӕй уӕлдай ма нын алы аз дӕр вӕййы цыппар ахсджиаг фембӕлды – регионалон конгресс, дыууӕ районон конгрессы ӕмӕ Чырыстийы мӕлӕт Ӕрымысӕн изӕр. Ацы фембӕлдтӕй алкӕцымӕ дӕр цӕмӕн хъӕуы цӕуын? Нӕ рӕстӕджы фембӕлдтӕ уадзын куыд райдыдтам? Ӕмӕ нӕ фембӕлдтӕм цы цӕстӕй кӕсӕм, уымӕ гӕсгӕ махӕй алкӕй тыххӕй дӕр цы ис базонӕн?

3, 4. Йегъовӕ йӕ адӕмӕй цы домы? Ӕрхӕсс цӕвиттонтӕ.

³ Рагӕй фӕстӕмӕ дӕр Йегъовӕ йӕ адӕмӕй домы, цӕмӕй иумӕ ӕмбырд кӕной. Зӕгъӕм, н. э. размӕ 1513 азы Йегъовӕ Израилы адӕмӕн радта Закъон. Уыцы Закъонмӕ гӕсгӕ-иу хъуамӕ алы бинонтӕ дӕр алы сабаты дӕр Хуыцауӕн иумӕ куывтаиккой ӕмӕ Закъон ахуыр кодтаиккой (Дык. з. 5:12; 6:4–9). Израилӕгтӕ афтӕ куы кодтой, уӕд-иу бинонтӕ бафидар  сты, ӕмӕ уый фӕрцы ӕнӕхъӕн адӕм дӕр уыдысты фидар ӕмӕ сӕхи мӕнг хуыцӕуттӕн кувынӕй хызтой. Фӕлӕ Закъон куы не ’ххӕст кодтой, уӕд та-иу Йегъовӕйы хорзӕхӕй ӕнӕхай фесты (Лев. 10:11; 26:31–35; 2 Аз. 36:20, 21).

⁴ Ӕркӕсӕм Йесойы цӕвиттонмӕ дӕр. Йесо ахуыр уыди алы къуыри дӕр сабаты ӕмбырдгӕнӕнмӕ цӕуын (Лук. 4:16). Ӕмӕ, уӕлӕрвтӕм куы аздӕхт, уӕд йӕ ахуыргӕнинӕгтӕ дӕр, куыд ахуыр уыдысты, афтӕ дарддӕр иумӕ ӕмбырд кодтой, кӕд сӕ сабатбоны закъон ӕххӕст кӕнын нал хъуыди, уӕддӕр (Хъуыд. 1:6, 12–14; 2:1–4; Ром. 14:5; Кол. 2:13, 14). Уыцы фембӕлдты Хуыцау чырыстӕтты ахуыр кодта, стӕй-иу кӕрӕдзийы ныфсыл ныфс бафтыдтой. Фӕлӕ ма-иу уымӕй уӕлдай уыцы фембӕлдты Хуыцауӕн кады нывӕндтӕ дӕр хастой: куывтой-иу, сӕ хъуыдытӕ-иу дзырдтой ӕмӕ-иу зарджытӕ зарыдысты (Кол. 3:16; Дзут. 13:15).

5. Фембӕлдтӕм ӕмӕ конгресстӕм цӕмӕн фӕцӕуӕм? (Ноджыдӕр кӕс рамкӕ « Ӕрвылазон конгресстӕ ӕнгомдӕр кӕнынц Хуыцауы адӕмы».)

⁵ Абон мах дӕр фембӕлдты ӕмӕ конгрессты куы вӕййӕм, уӕд уымӕй равдисӕм, Хуыцауы Паддзахады фарс кӕй лӕууӕм. Уым нын Йегъовӕ йӕ сыгъдӕг тыхы фӕрцы хъарутӕ ратты, ӕмӕ нӕ уырнындзинадӕй иннӕтӕн дӕр сӕ ныфсыл ныфс бафтауӕм. Ноджы ахсджиагдӕр та уый у, ӕмӕ, нӕ фембӕлдты иумӕ кӕй скувӕм, дзуаппытӕ кӕй фӕдӕттӕм ӕмӕ кӕй фӕзарӕм, уымӕй фӕлӕггад кӕнӕм Йегъовӕйӕн. Кӕй зӕгъын ӕй хъӕуы, раджы заманты израилӕгты ӕмӕ 1 ӕнусы чырыстӕтты фембӕлдтӕ куыд цыдысты, абон махӕн нӕ фембӕлдтӕ бынтон афтӕ нӕ фӕцӕуынц. Фӕлӕ уӕд куыд ахсджиаг уыдысты, афтӕ ахсджиаг сты абон дӕр. Нӕ рӕстӕджы фембӕлдтӕ уадзын куыд райдыдтам?

6, 7. а) Нӕ фембӕлдтӕн сӕ нысан цы у? ӕ) Бирӕ азты дӕргъы Библииртасджытӕ алы рӕтты фембӕлдтӕ куыд уагътой?

⁶ Ӕфсымӕр Расселл рӕстдзинад агурын куы райдыдта, уӕд уайтагъд бамбӕрста, рӕстдзинад ма ноджыдӕр чи агуры, уыдонимӕ ӕмбырд кӕнын кӕй хъӕуы. Ӕмӕ 1879 азы ныффыста: «Ӕз Питтсбурджы иннӕтимӕ скодтон Библи ахуыргӕнӕн кълас, цӕмӕй Фыстад арф иртасӕм. Фембӕлӕм алы хуыцаубоны дӕр». «Сионы хъахъхъӕнӕн мӕсыг» йӕ кӕсджыты разӕнгард кодта, цӕмӕй иумӕ ӕмбырд кодтаиккой. Ӕмӕ 1881 азмӕ Питтсбурджы (штат Пенсильвани) ӕмбырдтӕ цыди алы хуыцаубоны ӕмӕ ӕртыццӕджы дӕр. 1895 азы «Хъахъхъӕнӕн мӕсыджы» дзырд цыд, зӕгъгӕ, уыцы фембӕлдтӕн сӕ нысан уый у, цӕмӕй «чырыстӕттӕ кӕрӕдзимӕ ӕнгомдӕр кӕной, кӕрӕдзи тынгдӕр уарзой ӕмӕ се ’хсӕн хӕлардзинады тӕгтӕ фидардӕр кӕной», стӕй цӕмӕй, ӕмбырдмӕ чи ’рбацӕуы, уыдонӕн фадат уа кӕрӕдзийы ныфсыл ныфс бафтауынӕн. (Бакӕс Дзуттӕгтӕм 10:24, 25.)

⁷ Бирӕ азты дӕргъы Библииртасджытӕ алы рӕтты фембӕлдтӕ куыд уагътой, уымӕн иу ӕгъдау нӕ уыд. Зӕгъӕм, 1911 азы мыхуыргонд ӕрцыди Иугонд Штаттӕй иу къорды писмо. Фыст дзы уыд: «Алы къуыри дӕр нын вӕййы ӕппынкъаддӕр фондз фембӕлды». Фембӕлдтӕ сын-иу уыди къуырисӕры, ӕртыццӕджы, майрӕмбоны ӕмӕ хуыцаубоны дыууӕ хатты. 1914 азы та мыхуыргонд ӕрцыд Африкӕйӕ иу къорды писмо. Уым та уыд ахӕм ныхӕстӕ: «Фембӕлдтӕ нын вӕййы мӕй дыууӕ хатты. Фембӕлд райдайы майрӕмбоны ӕмӕ суанг хуыцаубонмӕ ахӕссы». Фӕлӕ фӕстӕдӕр ӕгас дунейы дӕр фембӕлдтӕ уадзын райдыдтой, абон сӕ куыд уадзӕм, афтӕ. Уӕдӕ, алы фембӕлд дӕр куыд фӕзынд, ууыл цыбыртӕй аныхас кӕнӕм.

8. Фыццаг ӕргом раныхӕстӕй иуӕй-иуты дзырд цӕуыл цыди?

⁸ Ӕргом раныхас. 1880 азы ӕфсымӕр Расселл, «Сионы хъахъхъӕнӕн мӕсыг» мыхуыр кӕнын куы райдыдта, уымӕй иу азы фӕстӕ, Йесойау уацамындон балцы араст (Лук. 4:43). Ӕмӕ уыцы рӕстӕг Расселл бындур сӕвӕрдта, ӕргом раныхас кӕм вӕййы, уыцы фембӕлдӕн. Уыцы балцы тыххӕй «Хъахъхъӕнӕн мӕсыджы» уыди хъусинаг ӕмӕ дзы фыст уыд, зӕгъгӕ, Расселл «ӕхсызгонӕй радзурдзӕн ӕргом раныхас ахӕм фарстайыл – „Хуыцауы паддзахады хабӕрттӕ“». 1911 азмӕ кълӕстӕ, ома ӕмбырдтӕ, фӕзынд бирӕ бӕстӕты, ӕмӕ уыцы аз алы кълас дӕр разӕнгард кодтой, зӕгъгӕ, дзырдарӕхст ӕфсымӕрты хӕстӕг рӕттӕм арвитут, цӕмӕй-иу ӕхсӕз раныхасы радзурой, зӕгъӕм, тӕрхоны тыххӕй ӕмӕ Чырыстийы нывонды тыххӕй. Алы раныхасы кӕрон дӕр-иу фехъусын кодтой, иннӕ къуыри раныхас кӕмӕн уыдзӕн ӕмӕ цавӕр темӕйыл дзурдзӕн, уый тыххӕй.

9. а) Ӕргом раныхас кӕм вӕййы, уыцы фембӕлд куыд ивта? ӕ) Ацы фембӕлдӕн кӕй аргъ кӕныс, уый дӕ бон куыд у равдисын?

 ⁹ 1945 азы «Хъахъхъӕнӕн мӕсыджы» фехъусын кодтой, ӕнӕхъӕн дунейы дӕр уадзын кӕй райдайдзысты, ӕргом раныхас кӕм уыдзӕн, ахӕм фембӕлдтӕ, ӕмӕ дзы кӕй уыдзӕн аст раныхасы, «адӕмӕн ӕнцой чи нӕ дӕтты, ахӕм фарстатыл». Ахӕм раныхӕстимӕ-иу кӕй арвыстой, уыцы ӕфсымӕртӕн бирӕ азты дӕргъы сӕ раныхӕстӕ уыдысты, ӕууӕнкджын цагъар-иу сын кӕй бауынаффӕ кодта, уыцы темӕтыл. Стӕй-иу сӕхӕдӕг дӕр ӕрхъуыды кодтой раныхӕстӕ. Фӕлӕ 1981 азы ӕмбырдтӕм ӕрцыд раныхӕсты конспекттӕ, ӕмӕ ӕфсымӕртӕ се ’ппӕт дӕр хъуамӕ сӕ раныхӕстӕ арӕзтаиккой уыцы конспекттӕм гӕсгӕ b. 1990 азы онг ӕргом раныхӕсты конспекттӕй иуӕй-иутӕ афтӕ арӕзт уыдысты, ӕмӕ-иу бацӕттӕ кӕнын хъуыди равдыстытӕ дӕр, стӕй-иу ӕфсымӕр хъуамӕ ныхасмӕхъусджытӕм фарстатӕ раттаид, ӕмӕ йын уыдон та дзуапп лӕвӕрдтаиккой. Фӕлӕ уыцы аз ӕрцыд ног разамынд, ӕмӕ уӕдӕй фӕстӕмӕ раныхӕсты нал вӕййы равдыстытӕ ӕмӕ фарстатӕ. 2008 азы январы ма ӕрцыд ноджыдӕр иу ивындзинад: ӕргом раныхӕстӕ 45 минуты нал уыдысты, фӕлӕ 30 минуты. Кӕд ахӕм ивындзинӕдтӕ ӕрцыд, уӕддӕр раныхӕстӕ ныр дӕр хӕссынц стыр пайда. Хорз цӕттӕ куы вӕййынц, уӕд уый фӕрцы Хуыцауы Ныхасыл ноджы тынгдӕр баууӕндӕм ӕмӕ Хуыцауы Паддзахады тыххӕй алыхуызон хабӕрттӕ хуыздӕр бамбарӕм (1 Тим. 4:13, 16). Зӕрдиагӕй фӕархайыс, цӕмӕй ӕргом раныхӕстӕм фылдӕр адӕмы фӕхонай, зӕгъӕм, цалдӕр хатты кӕй абӕрӕг кодтай, уыдоны, стӕй иннӕты дӕр?

10–12. а) «Хъахъхъӕнӕн мӕсыджы» ахуыр уагъд куыд цыди, уый куыд ивта? ӕ) Цавӕр фарстатыл дӕ хъӕуы ахъуыды кӕнын?

¹⁰ «Хъахъхъӕнӕн мӕсыджы» ахуыр. Хъахъхъӕнӕн Мӕсыджы Ӕхсӕнад-иу ӕфсымӕрты арвыста, цӕмӕй-иу ӕмбырдты раныхӕстӕ радзырдтаиккой ӕмӕ хъусын кӕныны  хъуыддаджы разамынд лӕвӕрдтаиккой. Хуыдтой сӕ пилигримтӕ. Гъемӕ 1922 азы пилигримтӕ уынаффӕ бахастой, цӕмӕй ӕмбырдты алы къуыри дӕр иу фембӕлды ахуыр кӕной «Хъахъхъӕнӕн мӕсыг». Ӕфсымӕртӕ уыцы уынаффӕйыл сразы сты, ӕмӕ райдианты «Хъахъхъӕнӕн мӕсыджы» ахуыр уагътой кӕнӕ къуырийы астӕу, кӕнӕ та хуыцаубоны.

¹¹ 1932 азы 15 июны «Хъахъхъӕнӕн мӕсыджы» хуыздӕр бамбарын кодтой, уыцы фембӕлд уагъд куыд хъуамӕ цӕуа, уый. Статьяйы фыст уыд, зӕгъгӕ, уыцы ахуыр Вефилы куыд уадзынц, афтӕ йӕ ӕмбырдты дӕр хъуамӕ уадза ӕфсымӕр. Ӕртӕ ӕфсымӕры та хъуамӕ ӕмбырды разӕй бадтаиккой ӕмӕ абзацтӕ радыгай кастаиккой. Уыцы азты ахуыргӕнӕн статьятӕм фарстатӕ нӕ уыд, ӕмӕ-иу уымӕ гӕсгӕ, ахуыр чи уагъта, уыцы ӕфсымӕр хъуамӕ адӕмы бафарстаид, цы ӕрмӕг ӕвзарӕм, уымӕ цавӕр фарстатӕ ис раттӕн, зӕгъгӕ. Стӕй та хъуамӕ иннӕтӕн загътаид, цӕмӕй уыцы фарстатӕн дзуапп радтаиккой. Кӕд ма дзы исты ноджы фӕбӕлвырддӕр кӕнын хъуыди, уӕд та-иу ӕй ӕфсымӕр йӕхӕдӕг хъуамӕ цыбыртӕй бамбарын кодтаид.

¹² Раздӕр-иу алы ӕмбырдӕн дӕр йӕ бон уыди равзарын, кӕцы номыр ахуыр кӕндзысты – ахуыр-иу кодтой, сӕ фылдӕры кӕцы фӕндыд, уыцы журнал. Фӕлӕ 1933 азы 15 апрелы «Хъахъхъӕнӕн мӕсыджы» фыст уыди, цӕмӕй ӕппӕт ӕмбырдты дӕр алы мӕй дӕр ахуыр кӕной уыцы мӕйы номыр. Уый фӕстӕ 1937 азы лӕвӕрд ӕрцыд ахӕм разамынд, цӕмӕй уыцы фембӕлд уагъд цӕуа хуыцаубоны. 1942 азы 1 октябры «Хъахъхъӕнӕн мӕсыджы» та фыст уыд ӕндӕр ивындзинӕдты тыххӕй. Ӕмӕ йӕ уыцы ивындзинӕдты фӕстӕ куыд райдыдтой уадзын, абон дӕр афтӕ фӕцӕуы. Журналы фехъусын кодтой, ныр ахуыргӕнӕн статьяты алы фарсыл дӕр бынӕй кӕй уыдзӕн фарстатӕ ӕмӕ ахуыр уыцы фарстатӕм гӕсгӕ кӕй хъӕудзӕн уадзын. Ноджыдӕр дзы дзырд цыд, фембӕлд иу сахат кӕй хъуамӕ цӕуа. Стӕй ма ӕфсымӕрты ӕмӕ хоты разӕнгард кодтой, цӕмӕй дзуапп дӕтгӕйӕ, абзацы цы фыст ис, уый кӕсгӕ ма кодтаиккой, фӕлӕ сӕ хъуыдытӕ «сӕхи ныхӕстӕй» дзырдтаиккой. Абоны онг дӕр нын ӕууӕнкджын цагъар сӕйраджыдӕр «Хъахъхъӕнӕн мӕсыджы» ахуыры уылты дӕтты уырнындзинад фидаргӕнӕн хӕринаг йӕ афоныл (Матф. 24:45). Уымӕ гӕсгӕ алкӕй дӕр хъӕуы ахъуыды кӕнын: «Алы къуыри дӕр „Хъахъхъӕнӕн мӕсыджы“ ахуырмӕ мӕхи бацӕттӕ кӕнын? Мӕ бон куы вӕййы, уӕд бацархайын, цӕмӕй дзуапп радтон?»

13, 14. а) Библийы ахуыр ӕмбырдимӕ чи хуыйны, уыцы фембӕлд куыд фӕзынд? ӕ) Ацы фембӕлд дӕ зӕрдӕмӕ цӕмӕй цӕуы?

¹³ Библийы ахуыр ӕмбырдимӕ. 1890-ӕм азты ӕмбисы, чиныг «Миназы райдиан»-ӕй цалдӕр томы куы рацыд, уый фӕстӕ, ӕфсымӕр Ран горӕт Балтиморӕй (штат Мэриленд,  АИШ) уынаффӕ бахаста, зӕгъгӕ, дам, Библи ахуыр кӕнынӕн кружоктӕ скӕнӕм. Уыцы фембӕлдтӕ арӕхдӕр уагътой кӕмӕдӕр хӕдзары. Райдианты сӕ фӕндыди фенын, куыд рауайдзысты, уый. Фӕлӕ 1895 азы сентябрмӕ ахӕм кружоктӕ ӕнтыстджынӕй уагъд цыдысты Иугонд Штатты бирӕ горӕтты. Уымӕ гӕсгӕ уыцы мӕй «Хъахъхъӕнӕн мӕсыджы» ныффыстой, цӕмӕй, рӕстдзинад чидӕриддӕр иртасы, уыдон уыцы фембӕлдтӕ уадзой. Журналы ма ноджыдӕр фыст уыд, зӕгъгӕ, уыцы фембӕлд чи уадза, уый хъуамӕ кӕсын хорз зона. Ӕфсымӕр-иу хъуамӕ иу хъуыдыйад бакастаид ӕмӕ стӕй банхъӕлмӕ кастаид, цӕмӕй, фембӕлды чи уыд, уыдон сӕ хъуыдытӕ загътаиккой. Ӕмӕ афтӕ хъуамӕ равзӕрстаиккой абзацы алы хъуыдыйад дӕр. Уый фӕстӕ та хъуамӕ бакастаид, абзацы цы стихтӕ уыд, уыдон. Ӕмӕ ӕнӕхъӕн сӕр куы равзӕрстаиккой, уӕд-иу алчидӕр хъуамӕ цыбыртӕй радзырдтаид, дзырд дзы цӕуыл цыди, уый.

 ¹⁴ Ацы фембӕлдӕн йӕ ном цалдӕр хатты аивта. Фыццаг ӕй хуыдтой вериаг кружок Библи ахуыр кӕнынӕн – 1 ӕнусы Фыстад лӕмбынӕг чи иртӕста, уыцы вериӕгтӕм гӕсгӕ (Хъуыд. 17:11). Цасдӕры фӕстӕ йӕ схуыдтой ӕмбырды чиныгахуыр. Абон та йӕ хонӕм Библийы ахуыр ӕмбырдимӕ. Ныр хӕдзӕртты гыццыл къордтӕй нал ӕмбырд кӕнӕм, фӕлӕ ӕнӕхъӕн ӕмбырд дӕр иумӕ Паддзахады залы ӕрӕмбырд вӕййы. Ацы фембӕлд куы фӕзынд, уӕдӕй фӕстӕмӕ дзы ӕвзӕрстам алыхуызон чингуытӕ, брошюрӕтӕ ӕмӕ ма статьятӕ «Хъахъхъӕнӕн мӕсыг»-ӕй дӕр. Фембӕлды-иу чи уыди, уыдоны алкӕддӕр разӕнгард кодтой дзуапп дӕттынмӕ. Ацы фембӕлды фӕрцы Библийӕ бирӕ цыдӕртӕ хуыздӕр бамбӕрстам. Ды йӕм алы хатт дӕр дӕхи бацӕттӕ кӕныс ӕмӕ дзы зӕрдиагӕй фӕархайыс?

15. Хуыцауы Ныхас хъусынгӕнджыты скъолайӕн йӕ нысан цы уыд?

¹⁵ Хуыцауы Ныхас хъусынгӕнджыты скъола. «1942 азы 16 февралы къуырисӕры изӕрӕй, Бруклины Вефилы чи  лӕггад кодта, уыцы ӕфсымӕртӕн се ’ппӕтӕн дӕр загътой, цӕмӕй сӕхи ныффыстаиккой, фӕстӕдӕр Хуыцауы Ныхас хъусынгӕнджыты скъола кӕй схуыдтой, уыцы скъоламӕ»,– радзырдта ӕфсымӕр Кэри Барбер (уыцы рӕстӕг лӕггад кодта Йегъовӕйы Ӕвдисӕнты сӕйраг хайады Бруклины, фӕстӕдӕр та уыди Разамонӕг советы). Ӕфсымӕр Барбер ацы скъолайӕ загъта, зӕгъгӕ, уый у, «Йегъовӕ абон йӕ адӕмӕн цы диссаджы хъуыддӕгтӕ аразы, уыдонӕй сӕ иу». Ацы скъола ӕфсымӕртӕн стыр ӕххуыс фӕци Хуыцауы Ныхас амонынӕн ӕмӕ хорз хабар хъусын кӕнынӕн. Ӕмӕ уымӕ гӕсгӕ 1943 азӕй фӕстӕмӕ ӕгас дунейы ӕмбырдтӕн ӕрвитын райдыдтой брошюрӕ «Хуыцауы Ныхас хъусынгӕнджыты курс». 1943 азы 1 июны «Хъахъхъӕнӕн мӕсыджы» фыст уыди, зӕгъгӕ, Хуыцауы Ныхас хъусынгӕнджыты скъолайӕн йӕ нысан у, цӕмӕй Хуыцауы адӕм ахуыр кӕной «Хуыцауы Паддзахады тыххӕй хуыздӕр хъусын кӕнын» (2 Тим. 2:15).

16, 17. Хуыцауы Ныхас хъусынгӕнджыты скъолайы фӕрцы-иу адӕймагӕн ӕрмӕст йӕ дӕсныдзинад фӕхуыздӕр? Бамбарын ӕй кӕн.

¹⁶ Ӕфсымӕртӕн-иу сӕ зыр-зыр цыди, бирӕ адӕмы раз сӕ раныхас дзурын кӕй хъӕудзӕн, уымӕй. 1918 азы ӕфсымӕр Рутерфордимӕ кӕй ӕрцахстой, уыцы ӕфсымӕртӕй сӕ иуы фырт, Клейтон Вудворт, радзырдта, 1943 азы йын Скъолайы фыццаг хатт хӕслӕвӕрд куы уыди, уӕд куыд тынг тыхсти, уый тыххӕй. «Раныхас радзурын мын тынг зын уыди,– загъта Клейтон.– Ме ’взаг-иу мӕ дзыхы нал арӕхст, мӕ ком-иу ныххус, ӕмӕ-иу куы хъӕрӕй райдыдтон дзурын, куы та – лыстӕг хъӕлӕсӕй». Фӕлӕ Клейтон дзурынмӕ хуыздӕр арӕхсын куы райдыдта, уӕд ын бирӕ раныхӕстӕ бахӕс кодтой. Скъолайы фӕрцы ӕрмӕст йӕ дӕсныдзинад нӕ фӕхуыздӕр. Уый ма бамбӕрста, адӕймаг сӕрныллӕг кӕй хъуамӕ уа ӕмӕ йӕ ныфс Йегъовӕйыл кӕй хъуамӕ дара. Клейтон загъта: «Бамбӕрстон ӕй, раныхасы чи рацӕудзӕн, уый сӕйраг кӕй нӕу. Сӕйраг у, цӕмӕй йӕхи дзӕбӕх бацӕттӕ кӕна ӕмӕ йӕ ныфс ӕгасӕй дӕр Йегъовӕйыл дара. Уӕд ӕм адӕм зӕрдиагӕй хъусдзысты ӕмӕ йӕ раныхасӕй сӕхицӕн зондӕн цыдӕр райсдзысты».

¹⁷ 1959 азы хотӕн дӕр фӕзынди фадат, цӕмӕй ацы Скъолайы сӕхи ныффыстаиккой. Хо Эднӕ Бауэр радзырдта, конгрессы уый тыххӕй куы фехъусын кодтой, уӕд хотӕ куыд цин кодтой: «Хотӕ фырцинӕй зӕххыл нал лӕууыдысты. Ныр уыдонӕн дӕр ноджы фылдӕр фадӕттӕ фӕзынд». Хуыцауы Ныхас хъусынгӕнджыты скъола куы фӕзынд, уӕдӕй фӕстӕмӕ дзы бирӕ хотӕ ӕмӕ ӕфсымӕртӕ ахуыр кодтой. Ахуыр сӕ кодта Йегъовӕ. Абон та нӕ афтӕ ахуыр кӕны, «Нӕ чырыстон цард ӕмӕ нӕ лӕггад» чи хуыйны, уыцы фембӕлды. (Бакӕс Исайы 54:13.)

18, 19. а) Куыд хъуамӕ хъусын кӕнӕм, уый фӕдыл абон хорз уынаффӕтӕ кӕм хъусӕм? ӕ) Фембӕлдты цӕмӕн фӕзарӕм? (Кӕс рамкӕ « Зарӕм „рӕстдзинады ныхӕстӕ“».)

¹⁸ Хъусын кӕныны фембӕлд. Хъусын кӕныны хъуыддаджы чи ӕххуыс кодта, ахӕм фембӕлдтӕ уадзын райдыдтой 1919 азы. Фӕлӕ уыцы рӕстӕг уыцы фембӕлдтӕм  ӕфсымӕртӕ ӕмӕ хотӕ се ’ппӕт нӕ цыдысты. Уырдӕм-иу ӕрбацыдысты, литературӕ чи парахат кодта, ӕрмӕстдӕр уыдон. 1923 азӕй Хъусын кӕныны фембӕлд уагътой мӕй иу хатт ӕмӕ уыцы фембӕлдмӕ цӕуын райдыдтой, къласы, ома ӕмбырды, чидӕриддӕр уыди, уыдон. 1928 азы ӕмбырдтӕм разамынд ӕрцыд, цӕмӕй уыцы фембӕлд уагътаиккой алы къуыри дӕр. 1935 азы та «Хъахъхъӕнӕн мӕсыджы» фыст уыд, Хъусын кӕныны фембӕлды кӕй хъуамӕ ӕвзарой, «Разамынд»-ы цы ӕрмӕг цӕуы мыхуыргонд, уый (фӕстӕдӕр ӕй схуыдтой «Информатор», цасдӕры фӕстӕ та – «Нӕ хъусын кӕныны хъуыддаг»). Ӕмӕ уый фӕстӕ ацы фембӕлд алы къуыри дӕр уадзын райдыдтой ӕппӕт ӕмбырдты дӕр.

¹⁹ Куыд хъуамӕ хъусын кӕнӕм, уый фӕдыл абон хорз уынаффӕтӕ фехъусӕм, «Нӕ чырыстон цард ӕмӕ нӕ лӕггад» чи хуыйны, уыцы фембӕлды (Матф. 10:5–13). Кӕд дӕуӕн дӕр уыцы фембӕлды «Кусӕн тетрад» раттынц, уӕд ӕм лӕмбынӕг ӕркӕсыс ӕмӕ дзы цы уынаффӕтӕ вӕййы, уыдонӕй уацамынды спайда кӕныс?

20–22. а) Чырыстийы мӕлӕты бон цӕмӕн бӕрӕг кӕнӕм? ӕ) Алы аз дӕр Ӕрымысӕн изӕрмӕ кӕй ӕрбацӕуыс, уый дын цы пайда хӕссы?

²⁰ Йесойы фӕдылдзӕуджытӕн загъд уыди, цӕмӕй йын йӕ мӕлӕты бон бӕрӕг кӕной, цалынмӕ не ’рцӕуа, уӕдмӕ. Дзуттӕгтӕ Куадзӕн алы аз куыд бӕрӕг кодтой, афтӕ Ӕрымысӕн изӕр дӕр бӕрӕг кӕнӕм алы аз (1 Кор. 11:23–26). Ацы ахсджиаг фембӕлдмӕ алы аз дӕр ӕрбацӕуы милуантӕ. Сӕрст чырыстӕттӕн уыцы бон сӕ зӕрдыл ӕрлӕууын кӕны, цы стыр кад сӕм ӕрхауд, уый – Чырыстиимӕ иумӕ сты Хуыцауы Паддзахады бындартӕ (Ром. 8:17). Ӕндӕр фыстӕ та уыцы ахсджиаг боны фӕрцы сӕ Паддзахӕн ноджы тынгдӕр аргъ кӕнынц ӕмӕ йыл сты иузӕрдион (Иоан. 10:16).

²¹ Ӕфсымӕр Расселл ӕмӕ йе ’ввахс ӕмбӕлттӕ дӕр ӕмбӕрстой, Хицауы ӕхсӕвӕр бӕрӕг кӕнын ӕнӕмӕнг кӕй хъӕуы. Стӕй зыдтой, афӕдз ӕй ӕрмӕстдӕр иу хатт кӕй хъӕуы бӕрӕг кӕнын, уый дӕр. 1880 азы апрелы «Хъахъхъӕнӕн мӕсыджы» фыст уыд: «Махӕй бирӕтӕм ныр цалдӕр азы ахӕм ӕгъдау ис, ӕмӕ ам Питтсбурджы... ӕрӕмбырд вӕййӕм, цӕмӕй Куадзӕн [ома Ӕрымысӕн изӕр] сбӕрӕг кӕнӕм ӕмӕ, нӕ Хицауы буар ӕмӕ тугмӕ чи амоны, уыцы нысӕнттӕй саходӕм». Цасдӕры фӕстӕ Ӕрымысӕн изӕры рӕстӕджы райдыдтой конгресстӕ дӕр уадзын. Ахӕм конгрессы цал адӕймаджы уыд ӕмӕ донаргъуыд цалӕй райстой, уый тыххӕй фыццаг хатт фыст ӕрцыд 1889 азы. Уӕд конгрессы уыди 225 адӕймаджы, 22 та дзы донаргъуыд райстой.

²² Абон Ӕрымысӕн изӕры рӕстӕг конгресстӕ нал фӕуадзӕм. Фӕлӕ уӕддӕр нӕ алыварс цӕрӕг адӕмы фӕхонӕм,  цӕмӕй уыцы ахсджиаг бон немӕ иумӕ сбӕрӕг кӕной Паддзахады залы кӕнӕ, кӕй баххуырсӕм, ахӕм ран. 2013 азы Чырыстийы мӕлӕт сбӕрӕг кодтой 19 милуан адӕймагӕй фылдӕр. Афӕдзы мидӕг ӕппӕты ахсджиагдӕр бон сбӕрӕг кӕнынмӕ кӕй ӕрбацӕуӕм ӕмӕ иннӕты дӕр кӕй фӕхонӕм, уый мах нӕхицӕн стыр кадыл нымайӕм! Ды дӕр адӕмы Ӕрымысӕн изӕрмӕ зӕрдиагӕй фӕхоныс?

23. Нӕ фембӕлдтӕм цы цӕстӕй кӕсыс?

²³ Йегъовӕйы иузӕрдион лӕггадгӕнджыты иумӕ ӕмбырд кӕнын кӕй хъӕуы, уый уаргъыл нӕ нымайынц (Дзут. 10:24, 25; 1 Иоан. 5:3). Зӕгъӕм, паддзах Давид уарзта, Йегъовӕйӕн кӕм куывтой, уырдӕм цӕуын, уӕлдайдӕр та, уыйау Хуыцауы чи уарзта, уыдонимӕ иумӕ (Пс. 27:4; 35:18). Ӕрхъуыды-ма кӕнӕм Йесойы дӕр. Гыццылӕй дӕр-иу ӕй тынг фӕндыди, цӕмӕй, йӕ Фыдӕн кӕм куывтой, уыцы хӕдзары уыдаид (Лук. 2:41–49).

24. Фембӕлдты нын цавӕр фадат вӕййы?

²⁴ Фембӕлдтӕм куы ’рбацӕуӕм, уӕд уымӕй равдисӕм, Йегъовӕйы кӕй уарзӕм ӕмӕ нӕ кӕй фӕнды нӕ хотӕ ӕмӕ не ’фсымӕрты бафидар кӕнын. Уымӕй уӕлдай нӕ Йегъовӕ сӕйраджыдӕр фембӕлдты ӕмӕ конгрессты ахуыр кӕны, Хуыцауы Паддзахады дӕлбар цӕрӕг адӕмӕн куыд ӕмбӕлы, афтӕ цӕрын. Ӕмӕ сӕм кӕй цӕуӕм, уымӕй ӕвдисӕм, зӕрдиагӕй нӕ кӕй фӕнды ууыл ахуыр кӕнын. Стӕй ма фембӕлдты фӕрцы кӕнӕм арӕхстджындӕр ӕмӕ нӕ хъарутыл хъарутӕ бафты. Ӕмӕ уый фӕрцы нӕ бон у, абон Хуыцауы Паддзахадӕн ӕппӕты ахсджиагдӕр чи у, уыцы хъуыддаджы архайын – нӕ Паддзах Йесо Чырыстийӕн ахуыргӕнинӕгтӕ цӕттӕ кӕнын. (Бакӕс Матфейы 28:19, 20.) Иумӕ ӕмбырд кӕнын нӕ куыд тынг фӕнды, уымӕй бӕрӕг уыдзӕн, Хуыцауы Паддзахад кӕй архайы, уый бӕлвырдӕй уынӕм ӕви нӕ. Цӕй уӕдӕ нӕ фембӕлдтӕн алкӕддӕр аргъ кӕнӕм!