1. Ki yudansa e discipelnan a haya ora nan a reuni, y dicon nan tabatin mester di dje?

 UN POCO despues di e resureccion di Hesus, su discipelnan a reuni pa anima otro. Pero e portanan di e luga caminda nan tabata reuni tabata gelock, ya cu nan tabatin miedo di nan enemigonan. Nan miedo sigur a kita ora Hesus a presenta meymey di nan y bisa nan: “Ricibi spirito santo.” (Lesa Juan 20:19-22.) Mas despues, e discipelnan a bolbe reuni, y Jehova a drama su spirito santo riba nan. Esey sin duda a fortalece nan pa haci e trabou di predica cu tabatin nan dilanti.—Echo. 2:1-7.

2. (a) Con Jehova ta duna nos fortaleza, y dicon nos tin mester di dje? (b) Dicon e areglo di Adoracion Como Famia ta asina importante? (Wak e nota y e cuadro “ Adoracion Como Famia.”)

² Nos ta confronta casi e mesun retonan cu nos rumannan di e prome siglo. (1 Ped. 5:9) Tin biaha algun di nos por tin miedo di hende, y nos tin mester di e fortaleza cu Jehova ta duna pa nos por persevera den e trabou di predica. (Efe. 6:10) Nos ta haya e fortaleza ey mediante nos reunionnan. Actualmente, nos tin e oportunidad di asisti na dos reunion instructivo tur siman: E Reunion Publico y e Estudio di Toren di Vigilancia y tambe e reunion den siman cu yama Nos Bida y Sirbishi Cristian. a Tambe nos ta disfruta di cuater evenemento anual: un congreso regional, dos asamblea di circuito y Conmemoracion di e morto di Cristo. Dicon ta asina importante pa nos asisti na tur e reunionnan ey? Kico ta e historia di nos reunionnan? Y kico nos actitud relaciona cu e reunionnan ta revela?

3, 4. Kico Jehova ta rekeri di su pueblo? Duna algun ehempel.

³ Semper tabata un rekisito di Jehova pa su pueblo reuni pa ador’e. Por ehempel, na 1513 prome cu Cristo, Jehova a duna su Ley na e nacion di Israel. Segun e Ley ey, nan mester a warda un sabbat semanal, ya asina cada famia por a adora Jehova y siña tocante e Ley. (Deu. 5:12; 6:4-9) Ora e Israelitanan a sigui e mandamento ey, esey a fortalece famianan, y e nacion den su totalidad a keda limpi y fuerte den sentido spiritual. Ora e nacion a keda sin sigui e Ley—neglishando por ehempel e rekisito di reuni regularmente pa adora Jehova—nan a perde e aprobacion di Dios.—Lev. 10:11; 26:31-35; 2 Cro. 36:20, 21.

 ⁴ Pensa tambe riba e ehempel cu Hesus a pone. E tabatin custumber di bay sinagoga tur siman riba sabbat. (Luc. 4:16) Despues di su morto y resureccion, su discipelnan a sigui cu e custumber di reuni regularmente maske nan no tabata bou di e ley di sabbat mas. (Echo. 1:6, 12-14; 2:1-4; Rom. 14:5; Col. 2:13, 14) Na e reunionnan ey, e cristiannan di e prome siglo no solamente a haya instruccion y animacion sino tambe nan a ofrece sacrificio di alabanza na Dios mediante nan oracion-, comentario- y canticanan.—Col. 3:16; Heb. 13:15.

5. Dicon nos ta asisti na reunionnan semanal y na asamblea- y congresonan anual? (Wak tambe e cuadro “ Reunionnan Anual Cu Ta Uni e Pueblo di Dios.”)

⁵ Esey ta conta pa nos tambe. Ora nos ta asisti na nos reunionnan semanal y na nos asamblea- y congresonan anual, nos ta demostra cu nos ta apoya e Reino di Dios, nos ta ricibi fortaleza for di Dios su spirito santo y nos ta anima otro rumannan cu nos expresionnan di fe. Mas importante ainda, nos tin e oportunidad di adora Jehova. Con? Mediante nos oracion-, comentario- y canticanan. Kisas e manera cu nos ta tene nos reunionnan ta un poco diferente for di e manera cu e Israelitanan y e cristiannan di e prome siglo tabata haci esey, pero nan tin e mesun importancia. Laga nos ban wak e historia di nos reunionnan.

6, 7. (a) Kico ta e meta di nos reunionnan? (b) Con e reunionnan tabata varia di un grupo pa otro?

⁶ Ora Ruman Charles Taze Russell a cuminsa busca e berdad cu tin den e Palabra di Dios, el a mira cu tabata necesario pa reuni cu otro hende cu tabatin e mesun meta. Na 1879, Russell a skirbi: “Ami, den compania di mas hende di Pittsburgh,  a organisa un klas di Bijbel pa investiga e Scritura. Nos ta reuni tur diadomingo.” Lectornan di E Toren di Vigilancia tambe a ser anima pa reuni, y na 1881, nan tabata tene reunion tur diadomingo y diaranson na Pittsburgh, Pennsylvania. E Toren di Vigilancia di november 1895 a bisa cu e meta di e reunionnan ey tabata pa anima “cristiannan pa asocia cu otro y stima otro” y pa duna esnan presente oportunidad pa encurasha otro.—Lesa Hebreonan 10:24, 25.

⁷ Pa hopi aña, e manera di organisa e reunionnan di e Studiantenan di Bijbel tabata varia di un grupo pa otro. Tambe e cantidad di biaha cu nan tabata reuni tabata varia. Por ehempel, un carta cu a keda publica na 1911, di un grupo na Merca, a bisa: “Nos ta tene por lo menos cinco reunion tur siman.” Nan tabata tene e reunionnan ey riba dialuna, diaranson, diabierna y dos biaha riba diadomingo. Anto un carta cu a keda publica na 1914, di un grupo na Africa, a bisa: “Nos ta tene reunion dos biaha pa luna, di diabierna pa diadomingo.” Pero cu tempo nos a haya mas instruccion tocante con mester tene e reunionnan. Laga nos repasa brevemente e historia di cada reunion.

8. Kico tabata algun topico cu nan a trata den e prome discursonan publico?

⁸ Reunion Publico. Na 1880, un aña despues cu Ruman Russell a cuminsa publica E Toren di Vigilancia, el a imita e ehempel di Hesus y a cuminsa cu un gira di predicacion. (Luc. 4:43) Durante e tempo ey, Ruman Russell a establece e patronchi pa loke a bira awor nos Reunion Publico. E Toren di Vigilancia cu a anuncia e gira, a bisa cu gustosamente Russell “lo duna discurso tocante ‘Asuntonan Relaciona cu e Reino di Dios’ durante reunionnan publico.” Na 1911, despues cu a forma varios klas, of congregacion, den diferente pais, cada congregacion a ser anima pa manda oradornan capacita na areanan den bisindario pa duna un serie di seis discurso riba topiconan manera huicio y e rescate. Na final di cada discurso, nan tabata anuncia tanto nomber di e orador como tema di e discurso di e siguiente siman.

9. Con e Reunion Publico a cambia a traves di añanan, y con bo por mustra aprecio pa e reunion aki?

⁹ Na 1945, E Toren di Vigilancia a anuncia cu ta bay cuminsa cu un campaña mundial cu lo presenta un serie di ocho discurso biblico cu lo trata “problemanan urgente di nos era” den e Reunion Publico. Pa hopi decada, oradornan asigna a uza no solamente e topiconan cu e esclavo fiel a prepara sino tambe nan a duna discursonan cu nan mes a traha. Pero na 1981, tur orador a haya instruccion pa basa nan discursonan riba e boskehonan cu e congregacionnan a ricibi. b Te cu 1990, algun di e boskehonan pa discurso publico a inclui participacion di auditorio of demostracion; pero e aña ey a ahusta e instruccionnan, y djey pa dilanti discursonan publico no a inclui niun di  e cosnan ey mas. Na januari 2008 tabatin un ahuste mas ora cu a reduci discurso publico di 45 minuut pa 30 minuut. Aunke a traves di añanan tabatin varios cambio, discursonan publico bon prepara ta sigui edifica fe den e Palabra di Dios y educa nos tocante varios aspecto di e Reino di Dios. (1 Tim. 4:13, 16) Con abo por mustra aprecio pa e reunion aki? Door di invita e hendenan cu bo ta rebishita y otro personanan cu no ta testigo di Jehova pa bin tende e discursonan importante ey basa riba Bijbel. Bo ta haci esey cu entusiasmo?

10-12. (a) Con e Estudio di Toren di Vigilancia a cambia a traves di tempo? (b) Kico ta bon pa nos puntra nos mes?

¹⁰ Estudio di Toren di Vigilancia. Na 1922, ruman hombernan cu e tempo ey nan tabata yama peregrino a recomenda pa tene un reunion regularmente pa studia E Toren di Vigilancia. Peregrinonan tabata sirbidornan manda pa Sociedad Watch Tower pa duna discurso na e congregacionnan y pa dirigi e trabou di predica. E organisacion a acepta e sugerencia aki, y na cuminsamento e rumannan tabata tene e estudio di E Toren di Vigilancia tur siman, sea meymey di siman of riba diadomingo.

¹¹ E Toren di Vigilancia di 15 di juni 1932 a uza e estudio cu nan ta tene na Cas di Betel como ehempel pa duna mas instruccion tocante con mester a dirigi e reunion aki. A base di esey e articulo a bisa cu ta un ruman homber mester dirigi e reunion. Tres ruman homber por a sinta dilanti den e sala di reunion y lesa e paragrafnan beurt pa beurt. E tempo ey, e articulonan no tabatin pregunta, pues e conductor a haya instruccion pa pidi esnan presente haci pregunta tocante e informacion cu nan tabata analisa. Despues di esaki, e conductor tabata duna esnan den auditorio oportunidad pa contesta e preguntanan ey. Si ainda tabata falta mas clarificacion, e conductor mester a duna un splicacion “kort maar krachtig.”

 ¹² Na principio, cada congregacion tabatin mag di scoge cua revista e mayoria kier a studia. Pero E Toren di Vigilancia di 15 di april 1933 a sugeri pa tur congregacion uza e edicion actual. Na 1937, nan a haya instruccion pa tene e estudio riba diadomingo. E Toren di Vigilancia di 1 di october 1942 a publica otro cambio cu nan mester a haci na e reunion. E prome cambio cu e revista a anuncia ta cu awor lo tin pregunta na final di cada pagina di e articulonan di estudio y cu mester uza e preguntanan ey. Despues, e revista a bisa cu e reunion mester dura un ora. Tambe el a anima e rumannan cu ta duna contesta pa expresa nan mes “cu nan propio palabra” en bes di lesa for di e paragraf. Esaki ta e manera cu ainda nos ta tene e reunion aki. Y te awe e Estudio di Toren di Vigilancia ta e reunion principal cu e esclavo fiel ta uza pa percura cuminda spiritual na e debido tempo. (Mat. 24:45) Ta bon pa cada un di nos puntra nos mes: Mi ta prepara tur siman pa e estudio di E Toren di Vigilancia? Mi ta haci esfuerso pa duna comentario?

13, 14. Conta e historia di Estudio di Bijbel di Congregacion, y menciona kico abo ta gusta di e reunion aki.

¹³ Estudio di Bijbel di Congregacion. Meymey di e decada di 1890, despues cu a publica varios volumen di e serie Millennial Dawn, Ruman H. N. Rahn, un Studiante di Bijbel cu tabata biba na Baltimore (Maryland, Merca), a sugeri pa organisa grupo pa studia Bijbel y yama nan “Dawn Circles” (Grupo di Aurora). Na prome instante, nan kier a wak si e reunionnan ta bay bon. Hopi biaha tabata tene esakinan den casnan priva. Pero ya pa september 1895 tabata tene e Dawn Circles cu exito den un gran cantidad di stad na Merca. Pesey E Toren di Vigilancia di e luna ey a sugeri pa tur studiante di e berdad tene e reunionnan ey. E articulo a bisa cu e ruman cu ta dirigi e reunion mester ta un bon lesador. E mester a lesa un frase y despues duna esnan presente oportunidad pa comenta of haci pregunta. Despues cu el a lesa tur e frasenan di un paragraf y a analisa nan, e mester a busca e textonan biblico menciona y lesa nan. Na final di e capitulo, cada persona presente mester a duna un resumen breve di e informacion.

¹⁴ E nomber di e reunion aki a cambia varios biaha. E tabata conoci como Gruponan di Berea pa Estudio di Bijbel, referiendo na e hendenan di Berea di e prome siglo, kendenan a analisa e Scritura cuidadosamente. (Echo. 17:11) Cu tempo e nomber a bolbe cambia y a bira Estudio di Buki di Congregacion. Awor e yama Estudio di Bijbel di Congregacion, y henter e congregacion ta reuni na Salon di Reino, en bes di den grupo na casnan priva. A traves di decadanan, nos a uza varios buki, foyeto y hasta articulo di E Toren di Vigilancia durante e estudio ey. For di cuminsamento a anima tur esnan presente pa participa den e reunion. E reunion aki a yuda nos haya un  conocemento mas profundo di Bijbel. Abo ta prepara regularmente pa e reunion aki y ta haci bo best pa participa den dje?

15. Kico tabata e proposito di e Scol di Ministerio Teocratico?

¹⁵ Scol di Ministerio Teocratico. Carey Barber, kende e tempo ey tabata sirbi na e oficina principal na Brooklyn, New York, a bisa: “Dialuna anochi, 16 di februari 1942, tur ruman homber cu tabata miembro di e famia di Betel di Brooklyn a haya invitacion pa inscribi den loke despues a bira conoci como e Scol di Ministerio Teocratico.” Ruman Barber, kende hopi tempo despues a bira un miembro di Cuerpo Gobernante, a bisa cu e scol ta “un di e provisionnan mas valioso di Jehova pa su pueblo den tempo moderno.” E curso tabata un exito rotundo y a yuda e rumannan bira mas capacita pa siña hende y pa predica. Pesey, cuminsando na 1943, e foyeto Course in Theocratic Ministry a bira gradualmente disponibel pa tur congregacion rond mundo. E Toren di Vigilancia di 1 di juni 1943 a bisa cu e  proposito di e Scol di Ministerio Teocratico ta pa yuda e pueblo di Dios “entrena nan mes pa nan ta mihor predicador di e Reino.”—2 Tim. 2:15.

16, 17. E Scol di Ministerio Teocratico ta siña nos solamente con pa duna discurso? Splica.

¹⁶ Na principio, mayoria di ruman tabatin masha dificultad pa papia dilanti di un publico grandi. Clayton Woodworth, Jr., kende su tata a ser encarcela inhustamente hunto cu Ruman Rutherford y otro rumannan na 1918, ta corda con el a sintie ora el a participa pa prome biaha den e scol na 1943. Ruman Woodworth a conta: “Tabata masha dificil pa mi duna parti. Mi lenga tabata bira pisa, mi boca tabata bira seco seco y mi stem tabata tembla.” Pero segun cu Clayton a bira mas habil, el a haya hopi oportunidad pa duna discurso publico. E scol a siñ’e mas cu solamente con pa duna discurso. E scol a siñ’e e balor di humildad y e importancia di confia den Jehova. El a bisa: “Mi a bin realisa cu e orador mes no ta importante.  Loke ta importante ta pa e prepara bon y pone tur su confianza den Jehova. E ora ey e oyentenan lo scuch’e cu placer y siña algo.”

¹⁷ Na 1959, ruman muhernan a haya invitacion pa inscribi den e scol. Ruman Edna Bauer a tende e anuncio na asamblea. Y el a conta: “Mi ta corda con emociona e ruman muhernan tabata. Mas oportunidad a habri pa nan awor.” A traves di e añanan, hopi ruman homber y ruman muher a inscribi den e Scol di Ministerio Teocratico pa laga Jehova siña nan. Awe nos ta sigui haya e tipo di entrenamento ey na nos reunion den siman.—Lesa Isaias 54:13.

18, 19. (a) Con nos ta haya yudansa practico pa e trabou di predica den nos tempo? (b) Dicon nos ta canta na nos reunionnan? (Wak e cuadro “ Canta Tocante e Berdad.”)

¹⁸ Reunion di Sirbishi. Ya for di 1919 e rumannan tabata tene reunion pa organisa e trabou di predica. E tempo ey, no ta tur hende den congregacion tabata asisti na e reunionnan aki; solamente esnan cu tabata directamente envolvi den distribucion di literatura. Na aña 1923 nan a cuminsa tene un Reunion di Sirbishi un biaha pa luna, y henter e congregacion mester a asisti. Na 1928, congregacionnan a ser anima pa tene e Reunion di Sirbishi tur siman. Na 1935, E Toren di Vigilancia a anima tur congregacion pa basa nan Reunion di Sirbishi riba e informacion cu tabata sali den e Director (cu anteriormente nan a yama Informant y despues Nos Ministerio di Reino). Poco despues, e reunion aki a bira parti di e programa di reunion di tur congregacion.

¹⁹ Awe nos ta haya guia practico na nos reunion den siman pa nos por cumpli cu e trabou di predica. (Mat. 10:​5-⁠13) Si bo ta bin na remarca pa haya un copia di tarea pa reunion, bo ta haci bon uzo di dje? Bo ta studi’e y pone e sugerencianan cu tin den dje na practica den sirbishi?

20-22. (a) Dicon nos ta conmemora e morto di Hesus? (b) Ki beneficio bo ta haya door di asisti tur aña na e Conmemoracion?

²⁰ Hesus a instrui su siguidornan pa conmemora su morto te na su yegada. Mescos cu e celebracion di Pasco Hudiu, ta un biaha pa aña ta tene e Conmemoracion, of Memorial, di e morto di Hesus. (1 Cor. 11:23-26) Tur aña miyones di hende ta asisti na e Conmemoracion. E reunion aki ta recorda e unginan cu nan tin e privilegio di ta heredero di e Reino hunto cu Cristo. (Rom. 8:17) Den caso di e otro carnenan, e reunion aki ta yuda nan haya un respet profundo pa e Rey di e Reino di Dios y keda leal na dje.—Juan 10:16.

²¹ Ruman Russell cu su compañeronan a reconoce e importancia di conmemora e Cena di Señor, y nan tabata sa cu mester ten’e un biaha pa aña so. E Toren di Vigilancia di april 1880 a bisa: “Ya pa varios aña hopi di nos aki na Pittsburgh tin e custumber di ... conmemora e Pasco Hudiu (Memorial) y come  e pan y bebe e biña cu ta simbolisa e curpa y sanger di nos Señor.” Poco despues di esey, e Conmemoracion a bira parti di e programa di congreso. E prome biaha cu a tene registro di e ocasion ey tabata na 1889, ora cu 225 hende a asisti y 22 a batisa.

²² Awe, nos no ta tene Memorial mas como parti di un programa di congreso, pero si nos ta invita tur hende, sin importa unda nos ta biba, pa reuni cu nos na un Salon di Reino local of na un luga cu nos ta huur. Na 2013, mas cu 19 miyon hende a conmemora e morto di Hesus. Pues, nos tin e gran privilegio di no solamente asisti na e Conmemoracion sino tambe di anima otro hende pa reuni cu nos riba e anochi di mas sagrado aki. Bo ta haci bo maximo esfuerso pa tur aña bo invita mas tanto hende posibel pa bin Memorial?

23. Con abo ta mira nos reunionnan?

²³ Sirbidornan leal di Jehova no ta considera e instruccion pa reuni hunto como un carga. (Heb. 10:24, 25; 1 Juan 5:3) Rey David, por ehempel, tabata gusta bay e cas di Jehova pa rindi adoracion, specialmente den compania di hende cu tambe tabata stima Dios. (Sal. 27:4; 35:18) Anto pensa tambe riba e ehempel di Hesus. For di jong, e tabatin un deseo profundo di ta den e cas di adoracion di su Tata.—Luc. 2:41-49.

24. Ora nos ta asisti na reunion, nos tin oportunidad di haci kico?

²⁴ Ora nos ta asisti na reunion, nos ta demostra nos amor pa Jehova y nos deseo pa edifica nos rumannan den fe. Tambe esey ta mustra cu nos kier siña con pa biba como ciudadano di e Reino di Dios, pasobra ta principalmente na nos reunionnan, asambleanan y congresonan nos ta haya e entrenamento ey. Ademas, nos reunionnan ta fortalece nos y capacita nos pa persevera den un di e actividadnan di mas importante cu e Reino di Dios ta efectuando awe, esta, e trabou di haci hende discipel di Rey Hesucristo y duna nan e entrenamento necesario. (Lesa Mateo 28:19, 20.) E echo cu nos ta gusta bay nos reunionnan ta mustra con real e Reino di Dios ta pa cada un di nos. Laga nos semper duna nos reunionnan nan debido balor.