1. Ngesikhatsi bafundzi bahlangene ndzawonye, nguluphi lusito labalutfola, futsi kungani bebaludzinga?

 NGEMUVA nje kwekuvuswa kwaJesu ekufeni, bafundzi bahlangana kute bakhutsatane. Nanobe kunjalo, ngenca yekutsi bebesaba titsa tabo, bakhiya iminyango. Kodvwa kufanele kutsi kwesaba kwabo kwaphela ngekushesha ngesikhatsi Jesu avela emkhatsini wabo futsi atsi: “Yemukelani umoya longcwele.” (Fundza Johane 20:19-22.) Ngekuhamba kwesikhatsi, labafundzi baphindze bahlangana, futsi Jehova watfululela umoya wakhe longcwele kubo. Batfola emandla lamakhulu ekwenta umsebenti wekushumayela lobewuseta.​—Imis. 2:1-7.

2. (a) Jehova usiniketa njani emandla, futsi kungani siwadzinga? (b) Yini leyenta Kukhonta Kwemndeni kubaluleke kangaka? (Fundza umbhalo lochazako kanye nelibhokisi lelitsi “ Kukhonta Kwemndeni,” ekhasini 175.)

² Natsi sihlangabetana netinkinga letifanana netebazalwane betfu lebebaphila ngetikhatsi tebaphostoli. (1 Phet. 5:9) Ngaletinye tikhatsi, labanye kitsi bangahlushwa kwesaba bantfu. Kuze sikwati kubeketela emsebentini wekushumayela, sidzinga emandla lavela kuJehova. (Ef. 6:10) Jehova usiniketa emandla lamanyenti ngemihlangano yetfu. Kwanyalo, kunemihlangano lemibili yeliviki ngalinye lesizuzisako, lokuyinkhulumo Yawonkhe wonkhe, Sifundvo se-Sicongosekulindza kanye nemihlangano lesemkhatsini neliviki lokutsiwa Kuphila KwemaKhristu Nemsebenti Wawo. a Siphindze sijabulele naleminye imihlangano lemine lebalulekile​—umhlangano wesifundza, imihlangano lemibili yesigodzi kanye neSikhumbuto sekufa kwaKhristu. Kungani kubalulekile kutsi sibe khona kuyo yonkhe lemihlangano? Imihlangano lesiba nayo lamuhla, yacala njani? Simo sengcondvo lesinaso ngemihlangano yetfu, sivetani ngatsi?

3, 4. Yini Jehova lafuna kutsi bantfu bakhe bayente? Shano tibonelo.

³ Sekusikhatsi lesidze Jehova solo afuna kutsi bantfu bakhe bahlangane ndzawonye kute bamkhonte. Nasi sibonelo: Nga-1513 B.C.E., Jehova waniketa sive sema-Israyeli uMtsetfo, futsi lomtsetfo bewuhlanganisa neliSabatha lebeliba khona maviki onkhe, kute umndeni ngamunye ukhonte Nkulunkulu uphindze ufundze uMtsetfo. (Dut. 5:12; 6:4-9) Ngesikhatsi ema-Israyeli awulalela lomtsetfo, imindeni beyicina futsi sonkhe sive besihlanteka ebuhlotjeni baso naNkulunkulu siphindze sibe nemandla. Kodvwa ngesikhatsi sive sehluleka kugcina loMtsetfo  futsi singasayinaki imfuneko yekuhlangana njalo kute kukhontwe Jehova, salahlekelwa ngumusa waNkulunkulu.​—Lev. 10:11; 26:31-35; 2 Khr. 36:20, 21.

⁴ Cabanga nangesibonelo lesabekwa nguJesu. Bekanemkhuba wekuya esinagogeni maviki onkhe ngeliSabatha. (Luk. 4:16) Ngemuva kwekufa kwaJesu nekuvuswa kwakhe, bafundzi bakhe bachubeka bahlangana ndzawonye ngaso sonkhe sikhatsi nanobe besebangekho ngephansi kwemtsetfo weliSabatha. (Imis. 1:6, 12-14; 2:1-4; Rom. 14:5; Khol. 2:13, 14) Kuleyo mihlangano, emaKhristu angesikhatsi sebaphostoli bewangagcini ngekutfola sicondziso nesikhutsato, kodvwa bewaphindze ente imihlatjelo yekudvumisa Nkulunkulu ngemithantazo yawo, timphendvulo nangetingoma.​—Khol. 3:16; Heb. 13:15.

5. Kungani siya emihlanganweni leba khona maviki onkhe, nasemihlanganweni lemincane nalemikhulu? (Fundza nelibhokisi lelitsi “ Imibutsano Yaminyaka Yonkhe Lehlanganisa Bantfu BaNkulunkulu,” ekhasini 176.)

⁵ Ngendlela lefanako, nasiya emihlanganweni yetfu yamaviki onkhe, emihlanganweni yetfu lemincane nalemikhulu, sikhombisa kusekela kwetfu uMbuso waNkulunkulu, sitfola emandla ngemoya longcwele futsi sikhutsata labanye ngekuveta kukholwa kwetfu. Lokubaluleke kakhulu kutsi sitfola litfuba lekukhonta Jehova ngemithantazo yetfu, timphendvulo kanye nangetingoma. Kungenteka kutsi indlela imihlangano yetfu layakhiwe ngayo yehlukile kuleyo yema-Israyeli neyemaKhristu angesikhatsi sebaphostoli, kodvwa lemihlangano ibaluleke ngendlela lefanako. Imihlangano yetfu yesikhatsi salamuhla, yacala njani?

6, 7. (a) Iyini injongo yemihlangano yetfu? (b) Imihlangano beyingafani njani emacenjini lehlukahlukene?

⁶ Ngesikhatsi uMzalwane Charles Taze Russell acalisa kufuna kwakhe liciniso eVini laNkulunkulu, wabona sidzingo sekuhlangana nalabanye bantfu labanemgomo lofana newakhe.  Nga-1879, Russell wabhala: “Mine nalabanye labasePittsburg sihlela siphindze sichube likilasi lelibhayibheli kuze sihlolisise imiBhalo, futsi sihlangana njalo ngemaSontfo.” Bafundzi be-“Zion’s Watch Tower” bakhutsatwa kutsi bahlangane ndzawonye, futsi nga-1881, bese kubanjwa imihlangano ePittsburgh, ePennsylvania njalo ngemaSontfo nangaboLesitsatfu. Sicongosekulindza saNovember 1895, satsi injongo yalemihlangano kwakha “buhlobo bebuKhristu, lutsandvo nebunye,” kanye nekuveta litfuba lekutsi labo labakulemihlangano bakhutsatane.​—Fundza Hebheru 10:24, 25.

⁷ Kwendlula iminyaka leminyenti kwakheka kanye nelizinga imihlangano lechutjwa ngayo kungafani emacenjini lehlukahlukene eBafundzi BeliBhayibheli. Sibonelo saloko kutsi incwadzi levela ecenjini lebeliseMelika leyabhalwa nga-1911, yatsi: “Tsine sichuba imihlangano yetfu tikhatsi letingaba sihlanu ngeliviki.” Bebachuba lemihlangano ngeMsombuluko, ngaLesitsatfu, ngaLesihlanu bese bayichuba kabili ngeLisontfo. Lenye incwadzi lebeyivela ecenjini lelise-Afrika, leyabhalwa nga-1914 yatsi: “Sihlangana tikhatsi letimbili ngenyanga, kusukela ngaLesihlanu kuze kube Lisontfo.” Nanobe kunjalo, ngekuhamba kwesikhatsi imihlangano yacala kuchutjwa ngendlela lesenta ngayo lamuhla. Ase sicoce kafishane ngemlandvo wemhlangano ngamunye.

8. Ngutiphi letinye tihloko tetinkhulumo telinyenti tasekucaleni?

⁸ Umhlangano Wenkhulumo Yelinyenti. Nga-1880, lokungumnyaka uMzalwane Russell lacala ngawo kushicilela i-“Zion’s Watch Tower”, walandzela sibonelo saJesu futsi wacalisa luhambo lwekushumayela. (Luk. 4:43) Kuleso sikhatsi, uMzalwane Russell wacalisa simiso lesagcine sibe yimihlangano yetfu yeNkhulumo Yelinyenti. Ngesikhatsi simemetela loluhambo lwakhe, Sicongosekulindza satsi Russell “bekatakujabulela kubeka tinkhulumo telinyenti letikhuluma ‘Ngetintfo letimayelana nembuso waNkulunkulu.’” Nga-1911, ngemuva kwekutsi sekucaliswe emakilasi nobe emabandla emaveni lamanyenti, libandla ngalinye lakhutsatwa kutsi litfumele tikhulumi letifanelekako, tiye etindzaweni letisedvute kute tetfule luchungechunge lwetinkhulumo letisitfupha letikhuluma ngetihloko tekwehlulelwa kanye nangenhlawulo. Ekupheleni kwenkhulumo ngayinye, bekumenyetelwa libito lesikhulumi kanye nesihloko senkhulumo seliviki lelitako.

9. Umhlangano weNkhulumo Yelinyenti ushintje njani kuleminyaka leyendlulile, futsi ungawusekela njani lomhlangano?

⁹ Nga-1945, Sicongosekulindza samemetela kucala kwemkhankaso wemhlaba wonkhe weluchungechunge lwetiNkhulumo teLinyenti letisiphohlongo letikhuluma “ngetinkinga letiphutfumako tangaleso sikhatsi.” Kwaphela iminyaka leminyenti tikhulumi letabelwe tingagcini ngekubeka tinkhulumo letihlelwe sisebenti lesetsembekile, kodvwa tiphindze tibeke tinkhulumo letitihlelele tona. Nanobe kunjalo, nga-1981, tonkhe tikhulumi tacondziswa kutsi tisekele tinkhulumo tato etinhlakeni lebetinikwe emabandla. b Kuze kwaba ngu-1990, lapho tinkhulumo telinyenti betihlanganisa kucoca netilaleli nobe imiboniso; kodvwa ngaloyo mnyaka ticondziso tashintjwa, futsi kusukela ngaleso  sikhatsi tinkhulumo telinyenti betiba yinkhulumo kuphela. Lolunye lushintjo lolukhulu lwenteka ngaJanuary 2008, lapho sikhatsi setinkhulumo telinyenti sincishiswa sisuka emizuzwini lengu-45 siya emizuzwini lengu-30. Nanobe kuye kwentiwa lolushintjo lolungaka, tinkhulumo telinyenti letilungiselelwa kahle tisachubeka takha kukholwa eVini laNkulunkulu, futsi tisifundzisa ngetincenye letehlukahlukene teMbuso waNkulunkulu. (1 Thim. 4:13, 16) Ubamema ngenkhutsalo yini labo lobuyela kubo kuze ucoce nabo ngeliBhayibheli kanye nalabanye bantfu labangasibo BoFakazi, kutsi nabo bete batewulalela letinkhulumo letibalulekile letisekelwe eBhayibhelini?

10-12. (a) Nguluphi lushintjo lolwenteke eSifundvweni Se-Sicongosekulindza? (b) Ngumiphi imibuto lokufanele utibute yona?

¹⁰ Sifundvo Se-Sicongosekulindza. Nga-1922, bazalwane lebebabitwa ngekutsi ngema-pilgrims​—lokutikhonti lebetitfunywa yi-Watch Tower Society kutsi tiyobeka tinkhulumo emabandleni nekutsi tihole emsebentini wekushumayela—​tancoma kutsi imihlangano lechutjwa njalo ihlanganise sifundvo se-Sicongosekulindza. Lokuncoma kwemukelwa, futsi ekucaleni sifundvo se-Sicongosekulindza besichutjwa emkhatsini weliviki nobe ngeLisontfo.

¹¹ Sicongosekulindza saJune 15, 1932, sakhipha lesinye sicondziso lebesikhuluma ngendlela lomhlangano lokufanele uchutjwe ngayo. Le-Sicongosekulindza sasebentisa njengesibonelo indlela lesifundvo lebesichutjwa ngayo eBethel, futsi satsi kufanele kube nemzalwane lochuba lomhlangano. Bekufanele kube nebazalwane labatsatfu labahlala ngaphambili, bese bashintjana ekufundzeni tigaba. Tihloko lebetifundvwa ngaleso sikhatsi betite imibuto, ngako umchubi watjelwa kutsi kufanele acele tilaleli kutsi tisho imibuto lehambisana nesihloko lesifundvwako. Ngemuva kwaloko, bekacela tilaleli kutsi tiphendvule lemibuto. Nangabe kudzingeka inchazelo leyengetiwe, umchubi bekacondziswa kutsi asho inchazelo “lemfisha futsi lecacile.”

 ¹² Ekucaleni, libandla ngalinye belivumelekile kutsi likhetse magazini linyenti labo lelifisa kuwufundza. Nanobe kunjalo, Sicongosekulindza sa-April 15, 1933, satsi onkhe emabandla kufanele asebentise magazini lofundvwa ngaleso sikhatsi. Nga-1937, kwakhishwa sicondziso sekutsi lesifundvo kufanele sichutjwe ngeLisontfo. Kucengwa lokwabangela kutsi imihlangano ichutjwe ngendlela lechutjwa ngayo lamuhla, kwashicilelwa ku-Sicongosekulindza sa-October 1, 1942. Kwekucala, lomagazini wamemetela kutsi imibuto beyitawuvela ekugcineni kwelikhasi ngalinye lesihloko lesifundvwako, futsi leyo mibuto bekufanele isetjentiswe. Ngemuva kwaloko, lomagazini watsi lomhlangano bekufanele utsatse li-awa linye. Waphindze wakhutsata labo labaphendvulako kutsi bangafundzi ngalokucondzile esigabeni, kodvwa baphendvule “ngemavi abo.” Sifundvo se-Sicongosekulindza solo singumhlangano loyinhloko lapho sisebenti lesetsembekile sisinika kudla lokuvela kuNkulunkulu ngesikhatsi lesifanele. (Mat. 24:45) Ngamunye wetfu wenta kahle kutibuta kutsi: ‘Ngiyasilungiselela yini sifundvo se-Sicongosekulindza liviki ngalinye? Ngiyatimisela yini kutsi ngiphendvule nangabe ngikwati?’

13, 14. Ngumuphi umlandvo weSifundvo SeliBhayibheli Selibandla, futsi yini loyitsandzako ngalomhlangano?

¹³ Sifundvo SeliBhayibheli Selibandla. Emkhatsini wabo-1890, ngemuva kwekukhululwa kwemiculu lembalwa ye-“Millennial Dawn,” uMzalwane H. N. Rahn, lobekanguMfundzi weliBhayibheli lobekahlala edolobheni laseBaltimore, eMaryland, eMelika, wancoma kutsi kuhlanganiswe emacembu ebantfu lebebatadisha liBhayibheli (“Dawn Circles”). Ekucaleni, lemihlangano lebeyivame kuchutjelwa emakhaya ebazalwane, beyimane yentelwe kuhlolwa kutsi iyasebenta yini. Nanobe kunjalo, ngaSeptember 1895, lamacembu ekutadisha liBhayibheli besewahlangana ngemphumelelo emadolobheni lamanyenti aseMelika. Ngako, Sicongosekulindza saleyo nyanga satsi bonkhe bafundzi beliciniso bekufanele babe naleyo mihlangano. Sakhipha sicondziso sekutsi loyo loyichubako kufanele akwati kufundza kahle. Bekufanele afundze umusho bese alindza labo labakhona kutsi baphendvule. Ngemuva kwekufundvwa kwayo yonkhe imisho esigabeni futsi yaphendvulwa, umchubi bekufanele afundze imibhalo lekhonjiwe. Ekupheleni kwesehluko, nguloyo naloyo etilalelini bekufanele asho lokutsite lokubuketa indzaba lecociwe.

¹⁴ Ligama lalomhlangano lashintja tikhatsi letinyentana. Ngaleso sikhatsi lomhlangano bewatiwa ngekutsi ngemaCembu EbaseBheriya Ekutadisha LiBhayibheli, lobekucondziswe kubaseBheriya lebebaphila ngesikhatsi sebaphostoli futsi lebebayihlolisisa ngekucophelela imiBhalo. (Imis. 17:11) Ngekuhamba kwesikhatsi, leligama lashintjwa kwatsiwa Sifundvo Sencwadzi Selibandla. Nyalo lomhlangano sewubitwa ngekutsi Sifundvo SeliBhayibheli Selibandla, futsi lonkhe libandla lihlangana eHholweni leMbuso kunekutsi lihlangane ngemacembu emakhaya ebazalwane. Kuyo yonkhe leminyaka lendlulile,  kulomhlangano bekusetjentiswa tincwadzi letehlukahlukene, tincwajana ngisho netihloko letiku-Sicongosekulindza. Kusukela ekucaleni, bonkhe lebebaba khona kulemihlangano bebakhutsatwa kutsi babe nencenye kuwo. Lomhlangano usisite kakhulu kutsi sandzise lwati lwetfu ngeliBhayibheli. Uyawulungiselela yini lomhlangano ngaso sonkhe sikhatsi futsi utimisele kuba nencenye kuwo ngalokusemandleni akho?

15. Umhlangano weSikolwa Semsebenti WemaKhristu bewentelwe yiphi injongo?

¹⁵ Sikolwa Semsebenti WemaKhristu. Carey Barber, lobekakhonta endlunkhulu leseBrooklyn, eNew York ngaleso sikhatsi, uyakhumbula: “NgeMsombuluko ebusuku, ngaFebruary 16, 1942, bonkhe bazalwane labangemalunga emndeni waseBethel eBrooklyn, bamenywa kutsi babhalise esikolweni lesagcine satiwa ngekutsi Sikolwa Semsebenti WemaKhristu.” UMzalwane Barber, lowaba lilunga leSigungu Lesibusako ngekuhamba kwesikhatsi, wachaza lesikolwa ngekutsi “ngulenye yetindlela letihamba embili Jehova lasebentelane ngayo nebantfu bakhe kuletikhatsi talamuhla.” Lesikolwa saphumelela kakhulu ekusiteni bazalwane kutsi batfutfukise emakhono abo ekufundzisa  nekushumayela, kangangekutsi kusukela nga-1943, bhukwana lotsi “Course in Theocratic Ministry” kancane kancane watfolakala emabandleni lasemhlabeni wonkhe. Sicongosekulindza saJune 1, 1943, satsi Sikolwa Semsebenti WemaKhristu besentelwe kusita bantfu baNkulunkulu “kutsi baticeceshe kuze babe bofakazi labancono ekumemeteleni uMbuso.”​—2 Thim. 2:15.

16, 17. Sikolwa Semsebenti WemaKhristu besifundzisa likhono lekukhuluma kuphela yini? Chaza.

¹⁶ Ekucaleni, bazalwane labanyenti bakutfola kwetfusa kakhulu kukhuluma embikwebantfu labanyenti. Clayton Woodworth, Jr., babe wakhe lowaboshwa ngalokungakafaneli neMzalwane Rutherford kanye nalabanye nga-1918, ukhumbula indlela labetiva ngayo ngesikhatsi asandza kubhalisa kulesikolwa nga-1943. UMzalwane Woodworth watsi: “Bekumatima kakhulu ngami kutsi ngibeke tinkhulumo. Lulwimi lwami belubambeka, umlomo wami bewuvele wome futsi livi lami belingakhoni kuphuma kahle.” Kodvwa njengobe likhono laClayton belikhula, watfola tabelo letinyenti tekubeka tinkhulumo. Lesikolwa asizange sigcine ngekumfundzisa likhono lekukhuluma kuphela. Samfundzisa nekubaluleka kwekutfobeka nekwetsembela  kuJehova. Watsi: “Ngabona kutsi sikhulumi asikabaluleki. Kodvwa nangabe silungiselela kahle futsi sibeka litsemba laso kuJehova, bantfu batakujabulela kusilalela futsi batawufundza lokutsite enkhulumeni yaso.”

¹⁷ Nga-1959, bodzadze bamenywa kutsi babhalise kulesikolwa. Dzadze Edna Bauer ukhumbula eva lesimemetelo emhlanganweni laya kuwo. Watsi: “Ngiyakhumbula kutsi bodzadze bajabula kakhulu nabeva lesimemetelo. Nyalo bese bavulekelwe ngematfuba lamanyenti.” Ngisho nobe ungudzadze nobe ungumzalwane, ulisebentisile yini lelitfuba lekutsi ubhalise eSikolweni Semsebenti WemaKhristu futsi ufundziswe nguJehova?​—Fundza Isaya 54:13.

18, 19. (a) Nguyiphi indlela uMhlangano Wemsebenti lebewuchubeka uyilandzela? (b) Kungani sihlabela emihlanganweni yetfu? (Fundza libhokisi lelitsi “ Kuhlabela Liciniso.”)

¹⁸ Umhlangano Wemsebenti. Kusukela nga-1919, kwaba nemihlangano lebeyentelwe kuhlela umsebenti wekushumayela. Ngaleso sikhatsi, bekungasibo bonkhe ebandleni lebebabakhona kulemihlangano—bekuba khona kuphela labo labahlanganyela ngalokucondzile ekusakateni tincwadzi. Cishe ngemnyaka wa-1923 wonkhe, Umhlangano Wemsebenti bewuchutjwa kanye ngenyanga futsi bonkhe ebandleni bekufanele babe khona. Nga-1928, emabandla akhutsatwa kutsi achube Umhlangano Wemsebenti liviki ngalinye, futsi nga-1935 Sicongosekulindza sakhutsata onkhe emabandla kutsi asekele Umhlangano Wemsebenti ekwatisweni lobekushicilelwa ku-“Director” (leyagcine ibitwa ngekutsi yi-“Informant” futsi leyabese ibitwa ngekutsi ngu-Msebenti Wetfu WeMbuso). Ngekushesha, lomhlangano waba yincenye leba khona njalo eluhlelweni lwelibandla ngalinye.

¹⁹ Namuhla sitfola ticondziso tendlela tekwenta umsebenti wetfu wekushumayela emhlanganweni lesiba nawo ekhatsi neliviki. (Mat. 10:5-13) Nangabe ufaneleka kutfola ikhophi yencwajana letsi Kuphila KwemaKhristu NemsebentiWawo, uyayidadisha yini futsi usebentise lokubhalwe kuyo emsebentini wekushumayela?

20-22. (a) Yini lesenta sikhumbule kufa kwaJesu? (b) Uzuzani ngekuba khona eSikhumbutweni umnyaka ngamunye?

²⁰ Jesu watjela balandzeli bakhe kutsi bakhumbule kufa kwakhe adzimate afike. Njengemkhosi weliPhasika, Sikhumbuto sekufa kwaKhristu kufanele sigujwe kanye ngemnyaka. (1 Khor. 11:23-26) Kuba netigidzi letinyenti tebantfu kulomhlangano umnyaka ngemnyaka. Lomhlangano ukhumbuta labagcotjiwe ngelilungelo labanalo lekuba tindlalifa teMbuso. (Rom. 8:17) Lomhlangano wenta letinye timvu tiyihloniphe kakhulu iNkhosi yeMbuso waNkulunkulu futsi tetsembeke kuyo.​—Joh. 10:16.

²¹ UMzalwane Russell kanye nalabo lebebabambisene naye bakubona kubaluleka kwekukhumbula Sidlo SeNkhosi Sakusihlwa, futsi bebati kutsi kufanele sigujwe kanye ngemnyaka. Sicongosekulindza sa-April 1880, satsi: “Sekwendlule iminyaka letsite linyenti letfu lapha ePittsburgh linemkhuba . . . . wekugubha liPhasika [Sikhumbuto], futsi sidla tintfo letifanekisela umtimba nengati yeNkhosi yetfu.” Ngekushesha imihlangano  lemikhulu yacondzaniswa neSikhumbuto. Lirekhodi lekucala lelagcinwa laloyo mhlangano belinga-1889, kuloyo mhlangano bekunebantfu labangu-225, futsi kwabhajatiswa labangu-22.

²² Lamuhla, Sikhumbuto asisabi yincenye yeluhlelo lwemhlangano wesifundza, kodvwa siyabamema bonkhe labahlala kunobe ngumuphi ummango kutsi bahlanganyele natsi eHholweni leMbuso nobe kulenye indzawo lesiyicashile. Nga-2013, batigidzi letingetulu kwa- 19 lababa khona eSikhumbutweni sekufa kwaJesu. Kulilungelo lelikhulu kitsi hhayi nje kuba khona eSikhumbutweni kuphela, kodvwa nekukhutsata labanye kutsi bahlanganyele natsi kulobusuku lobungcwele. Njalo ngemnyaka, uyatimisela yini kutsi umeme bantfu labanyenti kutsi babe khona eSikhumbutweni?

23. Unasiphi simo sengcondvo ngekuhlangana kwetfu ndzawonye?

²³ Tinceku taJehova letetsembekile atisitsatsi njengalesingumtfwalo sicondziso sekutsi tihlangane ndzawonye. (Heb. 10:24, 25; 1 Joh. 5:3) Nasi sibonelo: INkhosi Davide beyikutsandza kuya endlini yaJehova kuze imkhonte. (Hla. 27:4) Loko beyikujabulela kukwenta ikakhulukati nayinalabanye bantfu labatsandza Nkulunkulu. (Hla. 35:18) Cabanga ngesibonelo saJesu. Ngisho nangesikhatsi asemncane, waba nesifiso lesikhulu sekuba sendlini yaBabe wakhe yekukhontela.​—Luk. 2:41-49.

24. Ngumaphi ematfuba lesiba nawo nangabe siya emihlanganweni?

²⁴ Nasibakhona emihlanganweni, siveta lutsandvo lwetfu ngaJehova kanye nesifiso setfu sekwakha emakholwa lesikanye nawo. Siphindze sivete kulangatelela kwetfu kufundza indlela yekuba tikhonti teMbuso waNkulunkulu, ngobe ngalokuyinhloko kuceceshwa lokunjalo sikutfola emihlanganweni yetfu, lemincane nalemikhulu. Ngetulu kwaloko, imihlangano yetfu isinika likhono kanye nemandla lesiwadzingako ekwenta umsebenti lobaluleke kakhulu lofezwa nguMbuso waNkulunkulu lamuhla​—lokukwenta bafundzi beNkhosi Jesu Khristu, kanye nekubacecesha. (Fundza Matewu 28:19, 20.) Akungabateki kutsi bukhulu besifiso setfu sekuhlangana ndzawonye bembula kutsi uMbuso waNkulunkulu uyintfo sibili kangakanani kitsi. Shengatsi singachubeka siyitsatsa njengalebalulekile imihlangano yetfu!