1. ¿Kʼusi koltael la staik li yajchankʼoptak Jesus kʼalal la stsob sbaike xchiʼuk kʼu yuʼun tun yuʼunik?

 KʼALAL mu toʼox jaluk slajel li Jesuse la stsob sbaik li yajchankʼoptak sventa tspatbe sba yoʼontonike. Akʼo mi jech, bajalik ta na la spasik, yuʼun chiʼtaik li yajkontratakike. Ta melel, tsatsub yoʼontonik kʼalal te kʼot Jesus li bu oyike xchiʼuk ti xi albatike: «Ichʼik chʼul espiritu» (kʼelo Juan 20:19-22). Ta mas tsʼakal xtoke la stsob sbaik, vaʼun akʼbatik chʼul espiritu yuʼun li Jeovae, ti jaʼ tsatsubtasbat tajek yoʼontonik sventa spas li yabtel akʼbilik ti jaʼ li xcholel mantale (Ech. 2:1-7).

2. 1) ¿Kʼuxi chakʼ kiptik li Jeovae xchiʼuk kʼu yuʼun chtun kuʼuntik? 2) ¿Kʼu yuʼun toj tsots skʼoplal li Akʼobal sventa Yichʼel ta Mukʼ Jeova ta Kutsʼ Kalaltike? (Kʼelo tsʼib ta yok vun xchiʼuk li rekuadro « Yichʼel ta mukʼ Jeova ta kutsʼ kalaltik».)

² Li avi eke chkil jvokoltik jech kʼuchaʼal la snuptanik li kermanotaktik ta baʼyel sigloe (1 Ped. 5:9). Oy van bakʼintik ti chijxiʼ yuʼun li krixchanoetike, jaʼ yuʼun chtun onoʼox kuʼuntik ti chakʼ kiptik li Jeovae (Efes. 6:10). Li bu mas ta jta li kiptike jaʼ li ta tsobajeletike. Li avie jtaoj jmotontik ti ch-echʼ kuʼuntik chib tsobajel ta jujun xemanae: Mantal sventa Skotol Krixchanoetik, Xchanel Li Jkʼel osil ta toyole xchiʼuk Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj. a Jech xtok, ch-echʼ kuʼuntik chanib tsobajeletik ti tsotsik skʼoplale: jun asamblea rejional, chib asamblea ta sirkuito xchiʼuk li Snaʼobil slajel Kristoe. ¿Kʼu yuʼun toj tsots skʼoplal ti xijbat ta skotol li tsobajeletike? ¿Kʼu toʼox yelan ch-echʼ ta voʼne li jtsobajeltaktik avie? ¿Kʼusi chakʼ ta ilel ti kʼu yelan chkiltik li tsobajeletike?

3, 4. ¿Kʼusi tskʼanbe steklumal li Jeovae? Albo jayibuk skʼelobil.

³ Li Jeovae yalojbe onoʼox steklumal ti akʼo stsob sbaik sventa xichʼik ta mukʼe. Jech kʼuchaʼal liʼe, li ta 1513 kʼalal maʼuk toʼox jkʼakʼaliltike, laj yakʼbe Smantal jteklum Israel li Jeovae, vaʼun te laj yalbe utsʼ alaliletik ti skʼan xichʼik ta mukʼ Jeova li ta jujun savadoe xchiʼuk ti skʼan xichʼik chanubtasel ta Mantale (Deut. 5:12; 6:4-9). Kʼalal chchʼunik j-israeletik li mantal taje tstsatsub li utsʼ alaliletike, vaʼun lek tsots xchiʼuk sak ta mantal sjunul li jteklume. Pe kʼalal muʼyuk chchʼunik mantal xchiʼuk muʼyuk tspasik ti kʼusitik chkʼanbatik ti te tsakal skʼoplal ti tstsob sbaik sventa chichʼik  ta mukʼ Jeovae muʼyuk xa lek ch-ilatik (Lev. 10:11; 26:31-35; 2 Crón. 36:20, 21).

⁴ Jnopbetik skʼoplal xtok li skʼelobil laj yakʼ ta ilel li Jesuse. Li stuke nopem onoʼox xaʼi chkʼotilan jujun savado li ta nail tsobobbaile (Luk. 4:16). Kʼalal chamem xchiʼuk chaʼkuxiem xaʼoxe, akʼo mi mu xa persauk chchʼunik smantal Moises li yajchankʼoptake nopajtik onoʼox tstsob sbaik (Ech. 1:6, 12-14; 2:1-4; Rom. 14:5; Kol. 2:13, 14). Li vaʼ tsobajeletik ta baʼyel sigloe maʼuk noʼox te tstaik chanubtasel xchiʼuk spatobil yoʼontonik li yajtsʼaklomtak Kristoe, yuʼun chakʼbeik smoton Dios ti chlokʼ ta yeik kʼalal tspasik orasion, chal sloʼilik xchiʼuk kʼalal chkʼejinike (Kol. 3:16; Evr. 13:15).

5. ¿Kʼu yuʼun chijbat ta jujun xemana ta jtsobajeltik xchiʼuk ta asamblea ta jujun jabile? (Kʼelo xtok li rekuadro « Tsobajeletik ta jujun jabil ti tspas ta jun li steklumal Diose».)

⁵ Jaʼ jech ek kʼalal chijbat ta jujun xemana li ta jtsobajeltik xchiʼuk ta asamblea ta jujun jabile, te chkakʼtik ta ilel ti ta jkoltatik li Ajvalilal yuʼun Diose, chkichʼ kiptik yuʼun chʼul espiritu xchiʼuk ta jpatbetik yoʼonton yantik kʼalal chkakʼ jloʼiltik ti jech xvinaj xchʼunel koʼontontike. Li kʼusi mas tsots skʼoplale jaʼ ti xuʼ xkichʼtik ta mukʼ Jeova kʼalal ta jpastik orasione, ti chkal jloʼiltike xchiʼuk ti chijkʼejine. Manchuk mi jelel xa kʼu yelan ch-echʼ tsobajeletik kʼuchaʼal tspasik toʼox li j-israeletike xchiʼuk li yajtsʼaklomtak Kristo ta baʼyel sigloe jech-o tsotsik skʼoplal. ¿Kʼu yelan jel tal li kʼu yelan ch-echʼ li jtsobajeltik avie?

6, 7. 1) ¿Kʼusi sventa ti ta jtsob jbatike? 2) ¿Kʼu yelan jeltos ch-echʼ toʼox yuʼunik tsobajel li ta jujun grupoe?

⁶ Kʼalal lik saʼ kʼusi melel ta Skʼop Dios li ermano Charles Taze Russelle laj yakʼ venta ti skʼan stsob sbaik xchiʼuk li buchʼutik  tskʼan tsaʼik kʼusi melel eke. Xi la stsʼiba ta 1879: «Ta jtsob jbakutik xchiʼuk yan krixchanoetik ta Pittsburgh sventa jchapankutik xchiʼuk ti xuʼuk x-echʼuk-o jun chanun ti bu chichʼ chanel Vivlia ta jujun domingoe». Li buchʼutik tskʼelik Li Jkʼel osil ta toyole albatik ti akʼo stsob sgrupoike, vaʼun li ta 1881 lik echʼuk tsobajeletik ta jujun mierkoles xchiʼuk ta domingo li ta Pittsburgh (Pensilvania, Estados Unidos). Li Jkʼel osil ta toyole ta noviembre ta 1895, laj yal ti jaʼ chtun sventa «chchiʼin sbaik, tskʼan sbaik xchiʼuk oyuk xchʼunel yoʼontonik kʼuchaʼal yajtsʼaklom Kristo» li vaʼ tsobajeletike xchiʼuk ti xuʼ spatbe sba yoʼontonike (kʼelo Evreos 10:24, 25).

⁷ Jelav epal jabil ti jelel kʼu yelan ch-echʼ xchiʼuk ti kʼu sjalil tsjelubtasik tsobajel li jeltos grupoetik yuʼun Jchanolajeletik ta Vivliae. Jech kʼuchaʼal liʼe, xi laj yal skarta jun grupo ta Estados Unidos ti laj yichʼ pukel ta 1911: «Te onoʼox van voʼobuk velta ta xemana mi toj jutuk ta jtsob jbakutike». Oy stsobajelik ta lunes, mierkoles, viernes xchiʼuk chib velta ta domingo. Yan karta ti la stakik tal jun grupo ta África xchiʼuk ti laj yichʼ pukel ta 1914, xi laj yale: «Ta jtsob jbakutik chib velta ta u ti chlik ta viernes xchiʼuk ti jaʼ to chlaj ta domingoe». Akʼo mi jech, kʼalal echʼem xaʼox kʼuk sjalile lik yichʼ pasel jech kʼuchaʼal ch-echʼ kuʼuntik avie. Jchanbetik skʼoplal jlikeluk ti kʼu toʼox yelan ch-echʼ jujun tsobajele.

8. ¿Kʼusitik laj yalbe skʼoplal jayibuk mantal sventa skotol krixchanoetik ti lik jelavuk ta baʼyele?

⁸ Mantal sventa Skotol Krixchanoetik. Ta 1880, kʼalal oy xaʼox jun jabil ti lik slokʼes ermano Russell Li Jkʼel osil ta toyole lik xchanbe li kʼusi la spas Jesuse, vaʼun lokʼ xchol mantal ek (Luk. 4:43). Kʼalal jech yakal tspase, la slikes li tsobajel: Mantal sventa Skotol Krixchanoetik ti jech xkojtikintik-o li avie. Kʼalal laj yal ti chlokʼ batel ta cholmantal li ermano Russelle laj yal ta revista Li Jkʼel osil ta toyole ti «oy tajek ta yoʼonton chal ta yeloval krixchanoetik skʼoplal li ‹Kʼusitik sventa Ajvalilal yuʼun Diose›». Ta 1911, kʼalal oy xaʼox tsobobbailetik ta jayibuk lumetike, tijbat yoʼontonik ti stakik batel ta lumetik te noʼox nopolik li buchʼutik xtojobike sventa sjelubtasik jayibuk mantaletik ti te tsakal skʼoplal li chapanel xchiʼuk li pojelale. Vaʼun kʼalal chnel jujun mantale chalik kʼusi sbi li buchʼu la sjelubtase xchiʼuk chalik kʼusi sbi li mantal chjelav ta yan xemanae.

9. Li ta Mantal sventa Skotol Krixchanoetike, ¿kʼusi jelemik tal? ¿Kʼuxi xuʼ jkolta jbatik sventa li tsobajel taje?

⁹ Ta 1945, Li Jkʼel osil ta toyole laj yal ti chlik jun kampanya ta spʼejel Balumil sventa xjelav vaxakib mantaletik ti chalbe skʼoplal «vokoliletik ta jkʼakʼaliltik» li ta Mantal sventa Skotol Krixchanoetike. Jelav epal jabil ti maʼuk noʼox tstunesik mantaletik ti chakʼ tukʼil mosoil li buchʼutik tsjelubtasik mantale; tsjelubtasik mantaletik xtok ti xchapanoj stukike. Pe li ta 1981 albatik ti jaʼ skʼan stunesik li mantaletik chichʼik akʼbel li tsobobbailetike. b Kʼalal 1990 xaʼoxe, oy toʼox jlom mantaletike chal ti skʼan xal  sloʼilik li buchʼutik te oyike o ti x-echʼ skʼelobile, pe li ta jabil taje laj yichʼ alel ti mu xa jechuk xichʼ pasele. Oy to kʼusi jel li ta enero ta 2008, jaʼ xa noʼox 30 minuto chjalij li mantal ti 45 minuto toʼox chjalij ta baʼyele. Akʼo mi jelem xa li kʼu yelan ch-echʼe, ta stsatsubtas-o xchʼunel koʼontontik ta Skʼop Dios li mantaletik ti lek chapanbilike xchiʼuk chakʼ jchantik jeltos kʼusitik sventa li Ajvalilale (1 Tim. 4:13, 16). ¿Mi ta sjunul koʼontontik chkalbetik ti xbat xchikintaik mantaletik ti tsotsik skʼoplal ti lokʼemik ta Vivlia li buchʼutik ta jchaʼvulaʼantik o li buchʼutik maʼukik stestigotak Jeovae?

10-12. 1) ¿Kʼusitik jelem tal li ta Xchanel Li Jkʼel osil ta toyole? 2) ¿Kʼusi ti sta-o jakʼbe jbatike?

¹⁰ Xchanel Li Jkʼel osil ta toyole. Ta 1922, laj yalik ti xichʼuk chanel ta jun tsobajel Li Jkʼel osil ta toyole ti jech laj yalik li ermanoetik ti peregrino ojtikinbilike ti jaʼ jcholmantaletik ti takbilik batel yuʼun Sociedad Watch Tower ta tsobobbailetik sventa chalik mantaletik xchiʼuk tsbeiltasik li cholmantale. Taje laj yichʼ chʼamel, ta slikebal toʼoxe kʼalal chichʼ chanel Li Jkʼel osil ta toyole oy ch-echʼ ta oʼlol xemana o moʼoje ta domingo.

¹¹ Li Jkʼel osil ta toyole ta 15 yuʼun junio ta 1932, laj yalbe to mas yaʼyejal kʼuxi xuʼ xichʼ jelubtasel li tsobajel taje. Ta skoj ti jech chichʼ jelubtasel ti kʼu yelan chichʼ pasel ta Betele, laj yichʼ alel ti skʼan jun noʼox ermano sjelubtas li tsobajele. Xuʼ xchoti oxvoʼ ermanoetik te ta yeloval li bu ch-echʼ tsobajele, vaʼun tsjelilan sbaik sventa tskʼelik li parafoetike. Li xchanobiltake muʼyuk toʼox yichʼoj tal sjakʼobiltak, jaʼ yuʼun yichʼoj albel li buchʼu tsjelubtas ti akʼo skʼanbe buchʼutik te tsobolik ti akʼo yalik tal kʼusitik xuʼ xichʼ jakʼel ta sventa li kʼusi yakalik xchanele, ta tsʼakale chalbe li buchʼutik te ta tsobajel ti akʼo stakʼik tal li kʼusitik chichʼ jakʼele. Vaʼun mi skʼan to albel mas skʼoplale, xuʼ xal jlikel sloʼil li buchʼu tsjelubtase xchiʼuk ti lekuk jamal chale.

 ¹² Ta slikebale xuʼ toʼox stʼujik kʼusi revistail tskʼan chchanik jutuk mu skotolikuk li ta tsobobbaile. Akʼo mi jech, li ta 15 yuʼun avril ta 1933, Li Jkʼel osil ta toyole laj yal ti skʼan stunesik li revista ti jaʼo jmoj sfechail xchiʼuk li stsobajelike. Ta 1937, laj yichʼ alel ti skʼan ta domingo x-echʼ xchanel li revistae. Ta mas tsʼakale laj to yichʼ alel ta revista Li Jkʼel osil ta toyole ta 1 yuʼun oktuvre ta 1942 ti chjel kʼu yelan ch-echʼ li tsobajele, ti jaʼ xa jech kom kʼuchaʼal xkojtikintik avie. Li kʼusi baʼyel laj yichʼ alele jaʼ ti oy xa sjakʼobil chtal li xchanobiltake, ti te chtal ta yok pajinae xchiʼuk ti jaʼ skʼan stunesik kʼalal chchanike. Laje laj yichʼ alel ti skʼan jun ora xjalij li tsobajele. Jech xtok, albatik li ermanoetik «ti akʼo yalik ta skʼop stukik» kʼalal chal sloʼilike, maʼuk ti tskʼelik tal ta parafoe. Li Xchanel Li Jkʼel osil ta toyole jaʼ onoʼox li tsobajel mas tsots skʼoplal sventa tsmakʼlinutik ta mantal ta yorail noʼox li tukʼil xchiʼuk pʼijil mosoile (Mat. 24:45). Lek ti xi jakʼbe jbatik ta jujuntale: «¿Mi ta jchapan jba jujun xemana ta sventa li Xchanel Li Jkʼel osil ta toyole? ¿Mi chkakʼ persa ta yalel jloʼil mi xuʼ chkile?».

13, 14. ¿Kʼu toʼox yelan li Xchanel Vivlia ta Tsobobbaile, xchiʼuk kʼusi ti mas lek chavaʼi sventa li tsobajel taje?

¹³ Xchanel Vivlia ta Tsobobbail. Te van ta 1895 batele, kʼalal lokʼem xaʼox jayibuk svolumenal Millennial Dawn (La Aurora del Milenio), li ermano H. N. Rahn ti jaʼ jun Jchanolajel ta Vivlia ti te nakal ta Baltimore (Maryland, Estados Unidos), laj yal ti xuʼ xichʼ chanel Vivlia li ta tsobajeletik ti Círculos de la Aurora la sbiine. Li tsobajeletik taje jutuk mu skotoluk velta ta naetik ch-echʼ yuʼunik, tspasik preva kʼu yelan. Akʼo mi jech, li ta septiembre ta 1895, lek tajek ch-echʼ ta jayib lumetik ta Estados Unidos li tsobajeletik ti Círculos de la Aurora sbie. Jaʼ yuʼun, Li Jkʼel osil ta toyole ti lokʼ li ta u taje laj yal ti akʼo echʼuk yuʼunik tsobajel skotolik li buchʼutik tsaʼik kʼusi melele. Skʼan ti xtojobuk lek ta skʼelel vun li buchʼu tsjelubtas li tsobajel taje. Kʼalal tskʼel jujuchol tsʼibe tsmala akʼo yal sloʼilik li buchʼutik te oyike; kʼalal laj xaʼox xchanik sjunul li parafoe skʼan saʼik xchiʼuk skʼelik li tekstoetik te taleme. Kʼalal lajem xaʼox li kapituloe, ta jujuntal chalik ta jaypʼeluk noʼox kʼop li kʼusi la xchanike.

¹⁴ Ep ta velta jel sbi li tsobajele. La sbiin Círculos Bereanos para Estudios Bíblicos, ti jaʼ te la slokʼesik tal ta stojolal li jbereaetik ti la skʼelbeik lek smelolal li Tsʼibetike (Ech. 17:11). Ta mas tsʼakale la sbiin Xchanel Livro yuʼun Tsobobbail. Li avie jaʼ xa Xchanel Vivlia ta Tsobobbail, maʼuk xa chichʼ pasel ta jujun grupo, te xa ch-echʼ kuʼuntik ta jkotoltik li ta Salon sventa Tsobobbaile. Ti sjaylajunebal jabil jelavem tale, li ta tsobajel taje yichʼoj tunesel epal livroetik, foyetoetik xchiʼuk mantaletik li ta revista Li Jkʼel osil ta toyole. Ta slikebal onoʼoxe yichʼoj tijbel yoʼontonik sventa xal sloʼil skotolik li buchʼutik chkʼotike. Li tsobajel taje skoltaojutik ta yaʼibel mas smelolal li Vivliae. Ta skoj taje, ¿mi  nopolik noʼox chachapan aba xchiʼuk chavakʼ aloʼil ti bu kʼalal xuʼ avuʼune?

15. ¿Kʼusi sventa toʼox li Chanob vun sventa Kabteltik yuʼun Diose?

¹⁵ Chanob vun sventa Kabteltik yuʼun Dios. Xi chvul ta sjol li Carey Barber ti te toʼox chtun ta smeʼ snail abtelal ta Brooklyn (Nueva York) li vaʼ kʼakʼale: «Ta 16 yuʼun fevrero ta 1942, ta jun akʼobal lunes, laj yichʼ albel skotolik li ermanoetik ta Betel ti stsak sbiik li ta Chanob vun sventa Kabteltik yuʼun Dios la sbiin ta tsʼakale». Ta mas tsʼakal li ermano Barbere lik tunuk li ta Jtsop Jbeiltasvaneje xchiʼuk laj yal ti «jaʼ jun abtejebal ti ep sbalil yakʼojbe steklumal Jeova ta jkʼakʼaliltik» li chanob vun taje. Toj lek tajek la stojobtas ermanoetik sventa xchanubtasvanik xchiʼuk xcholik mantal li chanob vune, yuʼun ta slikebaltik 1943 kʼunkʼun lik lokʼuk sventa tsobobbailetik ta spʼejel Balumil li foyeto Curso en el Ministerio Teocrático (Chanubtasel sventa Kabteltik yuʼun Dios). Li Jkʼel osil ta toyole ta 1 yuʼun junio ta 1943, laj yal  ti laj yichʼ pasel Chanob vun sventa Kabteltik yuʼun Dios ti tskolta steklumal Dios sventa «xkʼotik ta lekil testigoetik ta xcholbel skʼoplal li Ajvalilale» (2 Tim. 2:15).

16, 17. ¿Mi jaʼ noʼox chchanubtasvan toʼox ta sjelubtasel mantal li Chanob vun sventa Kabteltik yuʼun Diose? Albo smelolal.

¹⁶ Ta slikebale, solel toj echʼ xa noʼox tsots chaʼiik ti chalik mantal ta yeloval krixchanoetike. Clayton Woodworth, ti jaʼ nichʼonile, ti muʼyuk smul tikʼat ta chukel stot xchiʼuk li ermano Rutherford xchiʼuk yantik ta 1918, chvul ta sjol kʼu yelan laj yaʼi sba kʼalal la stsak sbi li ta chanob vun ta 1943. Xi chale: «Toj tsots tajek chkaʼi sjelubtasel mantaletik. Koʼol xchiʼuk chnatub chkaʼi li kokʼe, li jnukʼ xtoke jech noʼox xchʼereret xchiʼuk xmaklajet». Akʼo mi jech, kʼalal mas xa tojobaj li ermano Claytone akʼbat mas smoton ta sjelubtasel mantaletik ta yeloval krixchanoetik. Maʼuk noʼox chchanubtasvan ta sjelubtasel mantal li chanob vune, akʼbat xchanik xtok ti oy sbalil ti bikʼit chakʼ sbaike xchiʼuk ti tsots skʼoplal skʼanbeik koltael li Jeovae. Xi laj yale: «Laj kakʼ  venta ti maʼuk tsots skʼoplal li buchʼu chal mantale. Li kʼusi mas tsots skʼoplale jaʼ ti chchapan sba lek xchiʼuk tspat tajek yoʼonton ta stojolal Jeovae. Mi jech tspase jun yoʼonton chchikintaik mantal xchiʼuk oy kʼusi chchan yuʼun li buchʼutik chchikintaike».

¹⁷ Ta 1959, laj yichʼ alel ti xuʼ stsak sbiik ta chanob vun li ermanaetik eke. Xi tsvules ta sjol ermana Edna Bauer kʼalal laj yaʼi ta asamblea li aʼyej taje: «Solel mu xchʼay ta jol kʼu to yelan xmuyubajik li ermanaetike. Yuʼun epaj xa li kʼusitik xuʼ spasike». Ta epal jabiletik xa onoʼox tale, epal ermanoetik xchiʼuk ermanaetik laj yichʼik chanubtasel yuʼun Jeova li ta Chanob vun sventa Kabteltik yuʼun Dios kʼalal la stsak sbiike. Li avie, chchanubtasutik-o Jeova li ta tsobajeletik ta jujun xemanae (Kʼelo Isaías 54:13.)

18, 19. 1) Kʼuxi chkichʼtik koltael avi sventa lekuk jcholtik batel li mantale? 2) ¿Kʼu yuʼun chijkʼejinutik kʼalal ta jtsob jbatike? (Kʼelo li rekuadro « Skʼejintael li kʼusi melele».)

¹⁸ Tsobajel sventa Tunelal. Kʼalal 1919 xaʼoxe, ch-echʼ xa yuʼunik tsobajeletik sventa chchapanik li cholmantale. Li vaʼ kʼakʼale mu skotolikuk chbatik ta tsobajel, jaʼ noʼox chbatik li buchʼutik tspukik vunetike. Ti te lik tal ta 1923, jun velta ta u ch-echʼ yuʼunik li Tsobajel sventa Tunelale ti skʼan xkʼot skotolik li buchʼutik ta tsobobbaile. Ta 1928, albatik ti skʼan x-echʼ yuʼunik jujun xemanae, vaʼun li ta 1935, Li Jkʼel osil ta toyole laj yalbe skotol tsobobbailetik ti akʼo slokʼesik ta Director (ti Informador la sbiin toʼoxe, ta mas tsʼakale Kabteltik sventa Dios la sbiin) li kʼusitik chchanik ta Tsobajel sventa Tunelale. Kʼalal mu toʼox jaluk jelavem taje kʼot ta jvokʼ chanubtasel ti tsots skʼoplal ta tsobobbailetik li Tsobajel sventa Tunelale.

¹⁹ Li ta tsobajel ta yutil xemanae te chkichʼtik beiltasel sventa jnaʼtik xcholel mantal (Mat. 10:5-13). Mi cha-akʼbat xa jlikuk li vun Jprograma xchiʼuk bu chijtsʼibaj sbie, ¿mi chachan xchiʼuk chatunes ta cholmantal li kʼusitik chale?

20-22. 1) ¿Kʼu yuʼun ta jpastik li Snaʼobil slajel Jesuse? 2) ¿Kʼuxi ta jbalintik ti chijbat li ta Snaʼobil slajel Kristo jujun jabile?

²⁰ Li Jesuse laj yalbe yajchankʼoptak ti akʼo spasbeik-o snaʼobil slajel jaʼ to mi vule. Jech kʼuchaʼal jkoj ta jabil chichʼ toʼox pasel kʼin Koltaele, jaʼ jech chichʼ pasel ek li Snaʼobil slajel Kristoe (1 Kor. 11:23-26). Ta smiyonal noʼox krixchanoetik chkʼotik jujun jabil li ta tsobajel taje. Te chvulesbat ta sjolik ti staoj smotonik ti tsta sparteik sventa Ajvalilal li buchʼutik tʼujbilike (Rom. 8:17). Jech xtok, chkʼot ta yoʼonton yan chijetik ti chichʼik ta mukʼ xchiʼuk ti tukʼ chakʼ sbaik ta stojolal li Ajvalil yuʼun Ajvalilal yuʼun Diose (Juan 10:16).

²¹ Li ermano Russell xchiʼuk xchiʼiltake laj yakʼik venta ti tsots skʼoplal xichʼ pasel li Snaʼobil slajel Kristoe xchiʼuk ti skʼan jkoj noʼox ta jabil xichʼ pasele. Xi laj yal Li Jkʼel osil ta toyole ta avril ta 1880: «Oy xa jayibuk jabil ti epunkutik ti nopem xkaʼikutik ta jpaskutik kʼin Koltael [Snaʼobil slajel Kristo] ta Pittsburgh [...], xchiʼuk ti ta jlajeskutik li skʼelobiltak sbekʼtal xchiʼuk xchʼichʼel li Kajvaltike». Kʼalal mu toʼox jaluk yechʼel taje lik echʼuk  asambleaetik ti jmoj sfechail xchiʼuk li Snaʼobil slajel Kristoe. Li baʼyel velta echʼ ti laj yichʼ tsakel ta vun li tsobajeletik taje jaʼ ta 1889, ti kʼotik 225 xchiʼuk ti 22 laj yichʼik voʼe.

²² Li avie muʼyuk xa jmoj ch-echʼ kuʼuntik li Snaʼobil slajel Kristo xchiʼuk junuk asambleae, pe buyuk noʼox ti nakalutike, ta jtaktik ta ikʼel skotol jlakʼnatik sventa jmoj jtsob jbatik ta junuk Salon sventa Tsobobbail o chichʼ chʼamunel jpʼejuk na. Ta 2013, oy van mas ta 19 miyon ti la jvules ta joltik li slajel Jesuse. Maʼuk noʼox jtaoj jmotontik ti xuʼ xijbate, yuʼun xuʼ jtijbetik yoʼonton yantik sventa jmoj jtsob jbatik li ta chʼul akʼobal taje. ¿Mi xijmuyubaj ta jtaktik ta ikʼel bu kʼalal xuʼ kuʼuntik sventa xbatik yantik li ta Snaʼobil slajel Kristo ta jujun jabile?

23. ¿Kʼusi chakʼ ta ilel jtalelaltik ta sventa li tsobajeletike?

²³ Maʼuk jun ikatsil chkiltik ti ta jtsob jbatik li yajtunelutik Jeova ti tukʼ kakʼoj jbatike (Evr. 10:24, 25; 1 Juan 5:3). Jech kʼuchaʼal li ajvalil Davide, tskʼupin tajek chbat yichʼ ta mukʼ Jeova li bu chichʼik ta mukʼe, mas to tskʼupin kʼalal jaʼ xchiʼuk li buchʼutik skʼanojik Dios eke (Sal. 27:4; 35:18). Jnopbetik skʼoplal li kʼusi la spas Jesuse. Akʼo mi bikʼit toʼox, oy tajek ta yoʼonton chbat li bu chichʼik ta mukʼ li Stote (Luk. 2:41-49).

24. ¿Kʼusi xuʼ jpastik kʼalal chijbat ta tsobajeletike?

²⁴ Kʼalal chijbat ta tsobajeletike chkakʼtik ta ilel ti jkʼanojtik li Jeovae xchiʼuk ti oy ta koʼontontik ta jtsatsubtastik ta mantal li kermanotaktike. Jech xtok, chkakʼtik ta ilel ti oy tajek ta koʼontontik ti jchantik xijkuxi jech kʼuchaʼal li buchʼutik chichʼik ventainel yuʼun li Ajvalilal yuʼun Diose, li bu mas ta jtatik chanubtasele jaʼ li ta tsobajeletike xchiʼuk li ta asambleaetike. Jech xtok, li tsobajeletike tstojobtasutik xchiʼuk chakʼ kiptik ti chtun kuʼuntik sventa spas kuʼuntik li jtos abtelal mas tsots skʼoplal ti yakal tspas li Ajvalilal avie: ti xichʼ pasel ta yajchankʼop Ajvalil Jesukristo li krixchanoetike xchiʼuk ti xichʼik tojobtasel ti bu kʼalal chtun yuʼunike (kʼelo Mateo 28:19, 20). Ta melel, ti kʼu to yelan oy ta koʼontontik ta jtsob jbatike jaʼ chakʼ ta ilel mi jchʼunojtik ti oy ta melel li Ajvalilal yuʼun Diose. ¡Tsotsuk-o me skʼoplal xkiltik li jtsobajeltike!