1. Musi vhafunziwa vho kuvhangana vhoṱhe, vho wana thuso ifhio, nahone ndi ngani vho vha vha tshi i ṱoḓa?

 MUSI Yesu a tshi kha ḓi tou bva u vuswa, vhafunziwa vho kuvhangana hu u itela u ṱuṱuwedzana. Naho zwo ralo, vho hoṋa mahothi nga nṱhani ha u ofha maswina avho. Nyofho dzavho dzi nga vha dzo fhela musi Yesu a tshi bvelela vhukati havho a ri: “Ṱanganedzani muya mukhethwa.” (Vhalani Yohane 20:19-22.) Nga murahu, vhafunziwa vho dovha vha kuvhangana nahone Yehova a vha shululela muya mukhethwa. Ndi nungo khulwane lungafhani dze vha ṋewa dzone dza u ita mushumo wa u huwelela we wa vha u tshee phanḓa!—Mish. 2:1-7.

2. (a) Yehova u ri ṋea nungo nga nḓila-ḓe, nahone ndi ngani ri tshi dzi ṱoḓa? (b) Ndi ngani Vhurabeli ha Muṱa vhu ha ndeme nga u rali? (Sedzani ṱhaluso i re magumoni a siaṱari na bogisi “ Vhurabeli Ha Muṱa,” siaṱari 175.)

² Ri sedzana na khaedu dzi fanaho na dze vhahashu vha ḓanani ḽa u thoma ḽa miṅwaha vha sedzana nadzo. (1 Pet. 5:9) Nga zwiṅwe zwifhinga, vhaṅwe vhashu ri nga kha ḓi vha na thaidzo ya u ofha vhathu. Ri ṱoḓa uri Yehova a ri ṋee nungo uri ri kone u bvela phanḓa ri tshi ita mushumo wa u huwelela. (Vhaef. 6:10) Yehova u ri ṋea vhunzhi ha dzenedzo nungo a tshi shumisa miṱangano yashu. Zwino ri na zwibuli zwa u ya kha miṱangano miṱanu ya vhege iṅwe na iṅwe—Muṱangano wa Khagala na Pfunzo ya Tshiingamo na muṱangano washu wa vhukati ha vhege une wa pfi Vhutshilo Na Vhuḓinḓa Hashu Ha Vhukriste. a Ri dovha ra ḓiphina nga zwiitea zwiṋa zwa ṅwaha muṅwe na muṅwe—buthano ḽa dzingu, maguvhangano mavhili a ḽiisela na Tshihumbudzo tsha lufu lwa Kristo. Ndi ngani zwi zwa ndeme u ya kha yeneyo miṱangano yoṱhe? Miṱangano yashu ya musalauno yo thoma hani? Nḓila ine ra dzhia ngayo miṱangano yashu i dzumbulula mini nga ha riṋe?

3, 4. Yehova u ṱoḓa vhathu vhawe vha tshi ita mini? Ṋeani tsumbo.

³ Ndi kale Yehova a tshi ṱoḓa vhathu vhawe vha tshi kuvhangana u itela u mu gwadamela. Sa tsumbo, nga 1513 B.C.E., Yehova o ṋea lushaka lwa Isiraele Mulayo wawe, nahone wonoyo Mulayo wo vha wo katela Sabatha ya vhege iṅwe na iṅwe uri muṱa muṅwe na muṅwe u mu gwadamele na u funzwa wonoyo Mulayo. (Doit. 5:12; 6:4-9) Musi Vhaisiraele vha tshi tevhela yeneyo ndaela, miṱa yo vha i tshi khwaṱhiswa nahone lushaka lwoṱhe lwo vha lu tshi dzula lwo kuna na u khwaṱha muyani. Musi lwonolwo lushaka lu tshi kundwa u shumisa wonoyo Mulayo, lwa litshelela ṱhoḓea dzi ngaho u ṱangana tshifhinga tshoṱhe u itela u gwadamela Yehova, Mudzimu ho ngo tsha lu tonda.—Lev. 10:11; 26:31-35; 2 Koron. 36:20, 21.

 ⁴ Ṱhogomelani na tsumbo ye Yesu a i vhea. O vha o ḓowela u ya sinagogoni vhege iṅwe na iṅwe nga Sabatha. (Luka 4:16) Nga murahu ha lufu lwa Yesu na mvuwo yawe, vhafunziwa vhawe vho bvela phanḓa na nḓowelo ya u kuvhangana tshifhinga tshoṱhe naho vho vha vha si tsha vha fhasi ha mulayo wa Sabatha. (Mish. 1:6, 12-14; 2:1-4; Vharoma 14:5; Vhakol. 2:13, 14) Kha yeneyo miṱangano, Vhakriste vha ḓanani ḽa u thoma ḽa miṅwaha vho vha vha sa wani ngudo na ṱhuṱhuwedzo fhedzi, fhedzi vho vha vha tshi dovha vha ṋekedza zwiṱhavhelo zwa thendo kha Mudzimu nga u rabela, u fhindula na u imba.—Vhakol. 3:16; Vhaheb. 13:15.

5. Ndi ngani ri tshi ya miṱanganoni ya vhege iṅwe na iṅwe, maguvhanganoni a ṅwaha muṅwe na muṅwe na mabuthanoni? (Sedzani na bogisi “ Maguvhangano A Ṅwaha Muṅwe Na Muṅwe Ane A Ṱanganya Vhathu Vha Mudzimu,” siaṱari 176.)

⁵ Na musi ri tshi ya miṱanganoni yashu ya vhege iṅwe na iṅwe, maguvhanganoni na mabuthanoni a ṅwaha muṅwe na muṅwe, ri vha ri tshi khou sumbedza u tikedza Muvhuso wa Mudzimu, muya mukhethwa u ri ṋea nungo nahone ri ṱuṱuwedza vhaṅwe nga phindulo dzashu dzine dza sumbedza uri ri na lutendo. Zwa ndeme vhukuma ndi uri ri wana tshibuli tsha u gwadamela Yehova nga u rabela, u fhindula na u imba. Nḓila ye miṱangano yashu ṋamusi ya dzudzanywa ngayo i nga kha ḓi vha yo fhambana na ye Vhaisiraele na Vhakriste vha ḓanani ḽa u thoma ḽa miṅwaha vha vha vha tshi ya khayo, fhedzi u kuvhangana hashu hu kha ḓi vha ha ndeme. Miṱangano yashu ya musalauno yo thoma hani?

6, 7. (a) Ndivho ya miṱangano yashu ndi ifhio? (b) Miṱangano yo vha yo fhambana hani u ya nga zwigwada?

⁶ Musi Wahashu Charles Taze Russell a tshi thoma u ṱoḓa ngoho Ipfini ḽa Mudzimu, o vhona zwi tshi ṱoḓea u kuvhangana na vhaṅwe vha re na tshipikwa tshi fanaho na tshawe. Nga 1879, Russell o ṅwala uri: “Nṋe, na vhaṅwe fhano Pittsburgh, ro dzudzanya u dzula ri tshi fara kilasi ya bivhili Swondaha iṅwe na iṅwe u itela u ṱoḓisisa Maṅwalo.” Vhavhali vha magazini une wa pfi Zion’s Watch Tower vho  ṱuṱuwedzwa uri vha kuvhangane nahone nga 1881, miṱangano yo vha i tshi vho farwa henefho Pittsburgh, Pennsylvania, Swondaha iṅwe na iṅwe na Ḽavhuraru ḽiṅwe na ḽiṅwe. Magazini une wa pfi Watch Tower wa November 1895 wo amba uri ndivho ya yeneyo miṱangano yo vha i u ṱahulela “vhukonani ha Vhukriste, lufuno na vhuthihi” na u ṋea vha re hone tshibuli tsha uri vha ṱuṱuwedzane.—Vhalani Vhaheberu 10:24, 25.

⁷ Lwa miṅwaha yo vhalaho, nḓila ye miṱangano ya vha yo dzudzanywa ngayo na uri i farwa lungana, zwo vha zwi tshi fhambana u ya nga zwigwada zwa Vhagudi vha Bivhili. Sa tsumbo, vhurifhi vhu bvaho kha tshiṅwe tsha zwigwada ngei United States ho gandiswaho nga 1911, ho ri: “Ri fara miṱangano i swikaho miṱanu vhege iṅwe na iṅwe.” Vho vha vha tshi fara yeneyo miṱangano nga Musumbuluwo, Ḽavhuraru, Ḽavhuṱanu, na luvhili nga Swondaha. Vhuṅwe vhurifhi vhu bvaho kha tshigwada tsha Afurika ho gandiswaho nga 1914 ho ri: “Ri fara miṱangano luvhili nga ṅwedzi, u thoma nga Ḽavhuṱanu u swika nga Swondaha.” Naho zwo ralo, nga u ya ha tshifhinga miṱangano yashu yo mbo ḓi thoma u farwa nga nḓila ra i fara ngayo ṋamusi. Ṱhogomelani nga u tou pfufhifhadza ḓivhazwakale ya muṱangano muṅwe na muṅwe.

8. Ndi zwifhio zwiṅwe zwiṱoho zwa nyambo dza khagala dza u thoma?

⁸ Muṱangano wa Khagala. Nga 1880, nga murahu ha ṅwaha Wahashu Russell o no thoma u gandisa magazini une wa pfi Zion’s Watch Tower, o tevhela tsumbo ye ya vhewa nga Yesu nahone a thoma fulo ḽa u fara nyendo dza u huwelela. (Luka 4:43) Musi e kha ḽeneḽo fulo, Wahashu Russell o thoma maitele ane ṋamusi ra a ḓivha sa Muṱangano wa Khagala. Musi magazini une wa pfi Watch Tower u tshi ḓivhadza lwonolwo lwendo wo amba uri Russell, u “ḓo takalela vhukuma u amba kha miṱangano ya khagala nga ha tshiṱoho tshine tsha ri ‘Zwithu zwine zwa tshimbidzana na muvhuso wa Mudzimu.’” Nga 1911, musi ho no dzudzanywa dzikilasi kana zwivhidzo mashangoni o vhalaho, kilasi iṅwe na iṅwe yo ṱuṱuwedzwa u rumela zwiambi zwi faneleaho zwivhidzoni zwa tsini uri zwi ṋekedze nyambo dza rathi dzi re na zwiṱoho zwi ambaho nga ha khaṱulo na tshirengululi. Magumoni a nyambo iṅwe na iṅwe, ho vha hu tshi ḓivhadzwa tshiambi na tshiṱoho tsha nyambo ine tshenetsho tshiambi tsha ḓo i ṋekedza nga vhege i tevhelaho.

9. Muṱangano wa Khagala wo shanduka hani miṅwahani yo fhiraho, nahone ni nga tikedza hani wonoyu muṱangano?

⁹ Nga 1945, magazini une wa pfi The Watchtower wo ḓivhadza u thomiwa ha fulo ḽa shango ḽoṱhe ḽa Muṱangano wa Khagala une wa katela mutevhe wa nyambo dza Bivhili dza malo dzine dza amba nga ha “thaidzo dzo ṱavhanyiswaho dza tshino tshifhinga.” Lwa mahumi a miṅwaha o vhalaho, zwiambi zwe zwa vha zwo avhelwa nyambo zwo vha zwi sa shumisi zwiṱoho zwo rumelwaho nga mulanda o fulufhedzeaho fhedzi, fhedzi zwo vha zwi tshi dovha zwa ṋekedza nyambo dze zwa tou ḓiitela dzone. Naho zwo ralo, nga 1981, zwiambi zwoṱhe zwa livhiswa uri zwi ṋekedze nyambo dzine dza vha kha mabammbiri a nyambo e a rumelwa zwivhidzo. b U swika nga 1990, maṅwe mabammbiri a nyambo dza khagala o vha a tshi ṱoḓa uri vhathetshelesi vha shele mulenzhe nahone nyambo dzo vha dzi na misumbedzo; fhedzi nga wonoyo ṅwaha ho mbo ḓi itwa tshanduko kha honoho vhulivhisi,  nahone nyambo dza khagala dza thoma u ṋekedzwa sa nyambo dzi songo katelaho zwiṅwe zwithu. Ho dovha ha itwa iṅwe tshanduko nga January 2008, musi nyambo dza khagala dzi tshi fhungudzwa uri dzi ṋekedzwe nga mimunithi ya 30 nṱhani ha ya 45. Naho ho itwa tshanduko dzo raloho, nyambo dza khagala dzo lugiselelwaho zwavhuḓi dzi bvela phanḓa dzi tshi fhaṱa lutendo lwashu kha Ipfi ḽa Mudzimu na u ri gudisa nga ha masia o fhamba-fhambanaho a Muvhuso wa Mudzimu. (1 Tim. 4:13, 16) Naa ni a ramba nga u fhisea vhane na vhuyelela khavho na vhaṅwe vhane vha si vhe Dziṱhanzi uri vha ḓe vha thetshelese dzenedzo nyambo dza ndeme dzo thewaho Bivhilini?

10-12. (a) Ndi tshanduko dzifhio dze dza itwa malugana na Pfunzo ya Tshiingamo? (b) Ndi mbudziso dzifhio dzine na nga dzi vhudzisa?

¹⁰ Pfunzo ya Tshiingamo. Nga 1922, vhahashu vhe vha vha vha tshi ḓivhiwa sa vha-pilgrim—vhaḓinḓa vhe vha vha vha tshi rumiwa nga Watch Tower Society u ṋekedza dzinyambo zwivhidzoni na u ranga phanḓa mushumoni wa u huwelela—vho eletshedza uri hu vhe na muṱangano wa tshifhinga tshoṱhe wa u guda magazini une wa pfi The Watch Tower. Yeneyi nyeletshedzo yo shumiswa, nahone u thomani pfunzo dza magazini une wa pfi Watch Tower dzo vha dzi tshi farwa vhukati ha vhege kana nga Swondaha.

¹¹ Magazini une wa pfi Watchtower wa ḽa 15 June, 1932, wo ṋea vhulivhisi ho engedzeaho ha nḓila ine wonoyu muṱangano wa fanela u farwa ngayo. Thero ya wonoyo magazini yo shumisa tsumbo ya nḓila ine yeneyi pfunzo ya farwa ngayo Hayani ha Bethele, ya amba uri wonoyo muṱangano u fanela u farwa nga wahashu wa tshinnani. Hu nga dzula vhahashu vhararu phanḓa nahone vha vhala dziphara nga u tou sielisana. Thero dza tshenetsho tshifhinga dzo vha dzi si na dzimbudziso, nga zwenezwo mufari wa muṱangano o vha o ṋewa vhulivhisi ha uri a humbele vhathetshelesi uri vha takuse mbudziso malugana na mafhungo ane a khou ṱolisiswa. Nga murahu ha zwenezwo, o vha a tshi humbela vhathetshelesi uri vha fhindule dzenedzo mbudziso. Arali hu na zwine zwa tea u bviselwa khagala, mufari wa pfunzo o vha a tshi fanela u ṋea ṱhalutshedzo “pfufhi yo livhaho.”

 ¹² U thomani tshivhidzo tshiṅwe na tshiṅwe tsho vha tshi tshi tendelwa u khetha magazini une vhunzhi ha vhathu vha takalela u u guda. Naho zwo ralo, magazini une wa pfi Watchtower wa ḽa 15 April, 1933, wa ṋea nyeletshedzo ya uri zwivhidzo zwoṱhe zwi shumise magazini une wa kha ḓi tou bva u gandiswa. Nga 1937, ha ṋewa vhulivhisi ha uri yeneyi pfunzo i farwe nga Swondaha. Dziṅwe tshanduko dzo itaho uri wonoyu muṱangano u vhe nga nḓila ine wa vha ngayo ṋamusi, dzo gandiswa kha magazini une wa pfi Watchtower wa ḽa 1 October, 1942. Tsha u thoma, wonoyo magazini wo ḓivhadza uri hu ḓo vha na mbudziso dzine dza tea u vhudziswa dzine dza ḓo vha dzi magumoni a siaṱari ḽiṅwe na ḽiṅwe ḽa thero dzi gudwaho. Wa amba na uri wonoyo muṱangano u fanela u vha awara nthihi. Wo dovha wa ṱuṱuwedza vhane vha fhindula uri vha ambe nga “maipfi avho,” nṱhani ha u tou vhala kokotolo zwo ṅwalwaho kha phara. Pfunzo ya Tshiingamo i kha ḓi vha muṱangano wa ndeme vhukuma une ngawo mulanda a fulufhedzeaho a ri ṋea zwiḽiwa zwa muya nga tshifhinga tsho teaho. (Mat. 24:45) Zwi nga vha zwavhuḓi uri muṅwe na muṅwe washu a ḓivhudzise uri: ‘Naa ndi a lugiselela pfunzo ya Tshiingamo vhege iṅwe na iṅwe? Naa ndi a fhindula arali ndi tshi kona?’

13, 14. Pfunzo ya Bivhili ya Tshivhidzo yo thoma hani nahone ndi mini zwine na zwi takalela nga wonoyu muṱangano?

¹³ Pfunzo ya Bivhili ya Tshivhidzo. Vhukati ha vho-1890, nga murahu ha u bviswa ha volumu dzo vhalaho dza bugu Millennial Dawn, Wahashu H. N. Rahn, Mugudi wa Bivhili we a vha a tshi dzula Baltimore, Maryland, U.S.A., o eletshedza uri hu farwe muṱangano wa pfunzo ya Bivhili une wa vhidzwa “Zwigwada zwa Dawn.” U thomani, yeneyi miṱangano ye ya vha i tshi anzela u farelwa mahayani a vhathu yo vha i ya u itela u vhona arali zwi tshi nga shuma. Naho zwo ralo, nga September 1895, wonoyu muṱangano une wa vhidzwa Zwigwada zwa Dawn wo tshimbila zwavhuḓi musi u tshi farwa ḓoroboni dzo vhalaho ngei United States. Nga zwenezwo, magazini une wa pfi Watch Tower wa wonoyo ṅwedzi wa eletshedza uri vhagudi vhoṱhe vha ngoho vha fare yeneyo miṱangano. Wa ṋea vhulivhisi ha uri muthu ane a fara yeneyo pfunzo u fanela u vha e muvhali-makone. O vha a tshi fanela u vhala mutaladzi nahone a lindela vhathetshelesi uri vha ṱalutshedze. Nga murahu ha u vhala na u haseledza mutaladzi muṅwe na muṅwe u re kha phara, o vha a tshi fanela u vhala maṅwalo o sumbedzwaho. Magumoni a ndima, muṅwe na muṅwe a re hone o vha a tshi fanela u ṋea mvusuluso pfufhi ya zwe zwa gudiwa kha eneo mafhungo.

¹⁴ Dzina ḽa wonoyu muṱangano ḽo shandulwa lwo vhalaho. Wo ḓivhiwa sa Zwigwada zwa Vhaberea zwa Pfunzo ya Bivhili, dzina ḽe ḽa dzhiiwa kha Vhaberea vha ḓanani ḽa u thoma ḽa miṅwaha vhe vha vha vha tshi ṱolisisa Maṅwalo nga vhuronwane. (Mish. 17:11) Nga u ya ha tshifhinga, ḽeneḽo dzina ḽo mbo ḓi shandulwa ḽa vha Pfunzo ya Bugu ya Tshivhidzo. Zwino wonoyu muṱangano u vho vhidzwa Pfunzo ya Bivhili ya Tshivhidzo nahone tshivhidzo tshoṱhe tshi ṱangana Holoni ya Muvhuso nṱhani ha u ṱangana nga zwigwada mahayani a vhahashu. Mahumini a miṅwaha o fhiraho, ho shumiswa bugu dzo fhamba-fhambanaho, bugwana na thero dza magazini une wa pfi Watch Tower kha wonoyu muṱangano. U bva kale, ho vha hu tshi ṱuṱuwedzwa  vhoṱhe vhane vha vha hone uri vha shele mulenzhe kha wonoyu muṱangano. Wonoyu muṱangano wo ri thusa vhukuma uri ri vhe na nḓivho yo dzikaho ya Bivhili. Naa ni a lugiselela wonoyu muṱangano tshifhinga tshoṱhe na u fhindula u ya nga hune na nga kona ngaho?

15. Tshikolo Tsha Vhuḓinḓa ha lwa Ṱaḓulu tsho vha tsho itelwa mini?

¹⁵ Tshikolo tsha Vhuḓinḓa ha lwa Ṱaḓulu. Carey Barber we a vha a tshi shuma ofisini khulwane dza Ṱhanzi dza Yehova ngei Brooklyn, New York o amba zwi tevhelaho: “Nga madekwana a Musumbuluwo wa ḽa 16 February, 1942, vhahashu vhoṱhe vha tshinnani vha Muṱa wa Bethele wa Brooklyn vho rambiwa uri vha ḓiṅwalise kha tshikolo tshine hu si kale tsha ḓo vhidzwa Tshikolo tsha Vhuḓinḓa ha lwa Ṱaḓulu.” Wahashu Barber, we nga murahu a vha muraḓo wa Tshigwada tshi Langaho, o ṱalusa tshenetshi tshikolo sa “iṅwe ya mvelaphanḓa dzi swayeaho vhukuma dza nḓila ine Yehova a shumisana ngayo na vhathu vhawe musalauno.” Khoso yeneyo yo thusa vhukuma vhahashu uri vha khwinise vhutsila havho ha u funza na u huwelela lwe u thoma nga 1943, tshibugwana Course in Theocratic Ministry tsha thoma  u wanala zwivhidzoni shangoni ḽoṱhe nga zwiṱuku nga zwiṱuku. Magazini une wa pfi Watchtower wa ḽa 1 June, 1943, wo amba uri Tshikolo tsha Vhuḓinḓa ha lwa Ṱaḓulu tsho itelwa u thusa vhathu vha Mudzimu “uri vha ḓigudise u vha ṱhanzi dzi faneleaho u huwelela nga ha Muvhuso.”—2 Tim. 2:15.

16, 17. Naa Tshikolo tsha Vhuḓinḓa ha lwa Ṱaḓulu tshi funza vhutsila ha u ṋekedza nyambo fhedzi? Ṱalutshedzani.

¹⁶ U thomani, vhanzhi vho pfa zwi tshi vha konḓela u amba phanḓa ha vhathu vhanzhi. Clayton Woodworth, Jr, we khotsi awe vha valelwa dzhele zwi songo tea na Wahashu Rutherford u katela na vhaṅwe nga 1918, u elelwa nḓila ye a ḓipfa ngayo musi a tshi dzhenela tshikolo lwa u tou thoma nga 1943. Wahashu Woodworth o ri: “Zwo vha zwi tshi nkonḓela vhukuma u ṋekedza dzinyambo. Ndo vha ndi sa koni u amba, mare o vha a tshi fhela mulomoni nahone ipfi ḽanga ḽo vha ḽi tshi shandu-shanduka ḽa gonyela nṱha ḽa dovha ḽa tsela fhasi.” Naho zwo ralo, musi Clayton a tshi khou ḓi khwinisa vhukoni hawe, o ṋekedza nyambo nnzhi dza khagala. Tshikolo a tsho ngo mu gudisa u sokou ṋekedza nyambo fhedzi. Tsho mu gudisa nḓila ine zwa vha zwa ndeme ngayo u ḓiṱukufhadza na u ḓitika nga Yehova.  O ri: “Ndo mbo ḓi zwi ṱhogomela uri tshiambi a si tsha ndeme nga u tou ralo. Fhedzi arali tsha lugiselela zwavhuḓi nahone tsha fulufhela Yehova tshoṱhe, vhathetshelesi vha ḓo takalela u tshi thetshelesa nahone vha ḓo guda zwithu zwa ndeme.”

¹⁷ Nga 1959, vhahashu vha tshisadzini vho rambiwa uri na vhone vha ḓiṅwalise kha tshenetsho tshikolo. Wahashu Edna Bauer u elelwa nḓivhadzo yo itwaho guvhanganoni ḽe a vha o ya khaḽo. O ri: “Ndi kha ḓi humbula nḓila ye vhahashu vha tshisadzini vha vha vho takala ngayo. Zwino vho vha vho vulelwa nga zwibuli zwinzhi.” Miṅwahani yo fhiraho, vhunzhi ha vhahashu vha tshinnani na vha tshisadzini vho ḓiṅwalisa kha Tshikolo tsha Vhuḓinḓa ha lwa Ṱaḓulu nahone vha funzwa nga Yehova. Ṋamusi, ri bvela phanḓa ri tshi gudiswa muṱanganoni washu wa vhukati ha vhege.—Vhalani Yesaya 54:13.

18, 19. (a) Ri livhiswa hani zwino uri ri kone u ita vhuḓinḓa? (b) Ndi ngani ri tshi imba miṱanganoni yashu? (Sedzani bogisi “ U imba Nga Ha Ngoho.”)

¹⁸ Muṱangano wa Tshumelo. U thoma nga 1919, ho vha hu tshi farwa miṱangano hu u itela u dzudzanya tshumelo ya tsimu. Nga tshenetsho tshifhinga, a si vhoṱhe tshivhidzoni vhe vha vha vha tshi vha hone kha yeneyo miṱangano—ho vha hu tshi ḓa vhe vha vha vha tshi tshimbidza khandiso fhedzi. Nga ṅwaha woṱhe wa 1923, Muṱangano wa Tshumelo wo vha u tshi farwa luthihi nga ṅwedzi, nahone vhoṱhe kilasini kana tshivhidzoni, vho vha vha tshi tea u vha hone. Nga 1928, zwivhidzo zwo ṱuṱuwedzwa u fara Muṱangano wa Tshumelo vhege iṅwe na iṅwe nahone nga 1935, magazini une wa pfi The Watchtower wo ṱuṱuwedza uri zwivhidzo zwoṱhe zwi thee Muṱangano wa Tshumelo kha mafhungo o gandiswaho kha Director (ye nga murahu ya vhidzwa Informant nahone ya dovha ya vhidzwa Vhuḓinḓa Hashu ha Muvhuso). Zwivhidzo zwoṱhe zwo mbo ḓi thoma u fara wonoyu muṱangano tshifhinga tshoṱhe.

¹⁹ Ṋamusi ri ṋewa vhulivhisi vhu shumaho ha nḓila ine ra nga ita ngayo vhuḓinḓa hashu muṱanganoni washu wa vhukati ha vhege. (Mat. 10:5-13) Arali ni tshi fanelea u wana kopi ya tshibugwana tsha muṱangano, naa ni a tshi guda nahone na shumisa nyeletshedzo dzi re ngomu hatsho musi ni vhuḓinḓani?

20-22. (a) Ndi ngani ri tshi fanela u humbula lufu lwa Yesu? (b) Ni vhuyelwa nga mini nga u vha hone Tshihumbudzoni ṅwaha muṅwe na muṅwe?

²⁰ Yesu o vhudza vhatevheli vhawe uri vha humbule lufu lwawe a vhuye a swike. Tshihumbudzo tsha lufu lwa Kristo ndi tshiitea tsha ṅwaha muṅwe na muṅwe u fana na vhuṱambo ha Paseka. (1 Vhakor. 11:23-26) Hu ḓa vhathu vha dzimilioni kha wonoyu muṱangano ṅwaha muṅwe na muṅwe. Wonoyu muṱangano u humbudza vhaḓodzwa nga ha ndugelo ine vha vha nayo ya u vha maḽaifa a Muvhuso. (Vharoma 8:17) U ita uri vha dziṅwe nngu vha ṱhonifhe vhukuma na u fulufhedzea kha Khosi ya Muvhuso wa Mudzimu.—Yoh. 10:16.

²¹ Wahashu Russell na khonani dzawe vho ṱhogomela ndeme ya u humbula Tshilalelo tsha Murena nahone vho vha vha tshi zwi ḓivha uri tshi fanela u humbulwa luthihi fhedzi nga ṅwaha. Magazini une wa pfi Watch Tower wa April 1880 wo amba zwi tevhelaho: “Ho no fhela miṅwaha yo vhalaho i nḓowelo ya vhunzhi hashu fhano Pittsburgh u . . . humbula Paseka [Tshihumbudzo] na u ḽa zwiga zwa muvhili na malofha zwa Murena washu.” Zwi sa athu ya ngafhi, mabuthano o  mbo ḓi farwa nga tshifhinga tsha Tshihumbudzo. Lwa u tou thoma musi hu tshi vhalwa vhathu vhe vha vha vha tshi vha hone kha tshenetsho tshiitea ho vha hu nga 1889, nga tshenetsho tshifhinga ho vha na vhathu vha 225 nahone ha lovhedzwa vha 22.

²² Ṋamusi, Tshihumbudzo a tshi tsha vha tshipiḓa tsha mbekanyo ya buthano, fhedzi ri ramba vhathu vhoṱhe hu sa londwi hune vha dzula hone uri vha ṱanganele na riṋe kha tshenetshi tshiitea Holoni ya Muvhuso kana fhethu he ha tou hiriwa. Nga 2013, vhathu vha fhiraho milioni dza 19 vho humbula lufu lwa Yesu. Ndi ndugelo khulwane lungafhani ine ra vha nayo ya u vha hone Tshihumbudzoni na u ṱuṱuwedza vhaṅwe uri vha vhe na riṋe nga honovhu vhusiku vhukhethwa-khethwa! Naa ni a fhisetshela u ramba vhathu vhanzhi nga hune na nga kona uri vha ḓe Tshihumbudzoni ṅwaha muṅwe na muṅwe?

23. Ni dzhia hani u kuvhangana hashu roṱhe?

²³ Vhashumeli vha Yehova vha fulufhedzeaho a vha dzhii ndaela ya u kuvhangana vhoṱhe i muhwalo. (Vhaheb. 10:24, 25; 1 Yoh. 5:3) Sa tsumbo, Khosi Davida o vha a tshi funa u ya nḓuni ya Yehova uri a mu gwadamele. (Ps. 27:4) O vha a tshi takalela u ita zwenezwo zwihuluhulu e na vhane vha funa Mudzimu. (Ps. 35:18) Humbulani na nga ha tsumbo ya Yesu. Na musi a tshee muṱuku, o vha a tshi tama nga mbilu yoṱhe u vha nḓuni ya Khotsi awe uri a mu gwadamele.—Luka 2:41-49.

24. Ri vha na zwibuli zwifhio musi ri tshi vha hone miṱanganoni?

²⁴ Musi ri tshi ya miṱanganoni, ri vha ri tshi khou sumbedza uri ri funa Yehova na u tama u fhaṱa vhatendi nga riṋe. Hafhu ri vha ri tshi khou sumbedza uri ri ṱulutshelwa u guda nḓila ine ra nga tshila ngayo sa vhavhusiwa vha Muvhuso wa Mudzimu, ngauri ndi miṱanganoni, maguvhanganoni, na mabuthanoni ashu hune ra nga gudiswa zwenezwo. Zwiṅwe hafhu, miṱangano yashu i ri ṋea vhutsila na nungo zwine ra zwi ṱoḓa uri ri konḓelele musi ri tshi ita muṅwe wa mishumo ya ndeme vhukuma ine ya khou itwa nga Muvhuso wa Mudzimu ṋamusi—mushumo wa u ita vhafunziwa vha Khosi Yesu Kristo na u vha gudisa. (Vhalani Mateo 28:19, 20.) A zwi timatimisi uri u tama hashu u kuvhangana roṱhe zwi dzumbulula nḓila ine Muvhuso wa Mudzimu wa vha wa vhukuma ngayo kha riṋe nga muthihi nga muthihi. U nga ri ri nga dzula ri tshi dzhia miṱangano yashu i ya ndeme!