1. Okathi awiixutti a Yesu yaathukumana aya, nikhaliheryo xeeni yaavahiwe aya nto xeeni naari aya nootthuneya?

NUUMALA ohihimuxiwa Yesu, awiixutti awe yaahithukumana wira alipihane mukina ni mukhwaawe. Awo yaahiwala mikhora sa nipuro nle, mwaha wa owoova anyokhani aya. Masi awo yahimalamaliha woova waya okathi Yesu aakhumelenle awe khwaahimeerya so: “Mwakhele [munepa wottela]!”. (Mmusome Yohani 20:19-22.) Nuuvira okathi awiixutti ale yaahitthikela othukumana, nto mukwaha ola Yehova aahiwiitthela munepa wootteela. Nto eyo yaahaalipiha wira awerye ovara muteko woolaleerya waavahiwe!​—Mat. 2:1-7.

2. (a) Moota xeeni Yehova onnilipiha awe, ni xeeni vanitthuneya ahu olipihiwa? (b) Xeeni Omulompa Muluku Vatthokoni oryaaya wootthuneya? (Nwehe enoota ni ekaaxa eni “ Omulompa Muluku Vatthokoni”).

² Olelo-va, hiyo nookhalana muxankiho mmosaru waarina aya annihu ale a eseekulu yoopacerya. (1 Ped. 5:9) Okathi mukina, anamunceene a hiyo anniwoova apinaatamu. Wira hiyo nivikanihe okhala oolipa murima okathi onilaleerya ahu nintthuneya okhaliheriwa ni Yehova. Nto Yehova onninlipiha orumeelaka mithukumano sa mmulokoni. Mahiku manli a khula esumana, nookhalana eparakha ya orowa owiriyana mithukumano iya: Mwaha wa Atthu Otheene ni Yoosoma ya Owehaweha, nave mithukumano sa eriyari ya esumana siniitthaniwa: Okumi ni Orummwa Ahu wa eKristau. * Nookhalana-tho mithukumano mixexe sa khula mwaakha: Muthukumano wa Muttetthe, asembeleya anli a esirkwiitu, ni Wuupuwela Okhwa wa Kristu. Xeeni varyaaya vootthuneya hiyo orowa owiriyana mithukumano iyo? Sipacenrye sai mithukumano sahu mahiku ala? Nto moonelo ahu mithukumano iyo onooniherya exeeni?

3, 4. Exeeni Muluku enaavekela awe atthu awe? Nvahe ntakiheryo.

³ Okhuma khalai, Yehova onnaatumererya atthu awe wira athukumaneke ni amukokhoreleke. Mwa ntakiheryo, mwaakha wa 1513 AEC, Yehova aahaavaha aIsarayeli ikano sawe, nto ikano iyo saahela muhina esaabadu ya khula esumana, wira khula emusi emukokhoreleke, ni wiixutta ikano sawe. (Otum. 5:12; 6:4-9) Okathi aIsarayeli yaattharihela aya nlamulo nla, itthoko saya saanikhala soolipa ni nloko notheene naanikhala nooloka ni noolipa momunepani. Okathi nloko nle naahiya aya otthara Ikano iyo, ahinarowa omuthukumanoni, ni ohimukokhorelaka Yehova, Muluku aanaanyanyala.​—Onam. 10:11; 26:31-35; 2 Wah. 36:20, 21.

 ⁴ Vano muthokorerye ntakiheryo Yesu aavanhe awe. Owo aahipaka okhala yoolema awe, orowa osinagoga, khula esumana iSaabadu sotheene. (Luk. 4:16) Nuumala wiiviwa ni ohihimuxiwa Yesu, awiixutti awe yaahivikaniha othukumana khula esumana, nnaamwi marehereryo a eSaabadu yaamalamanle. (Mit. 1:6, 12-14; 2:1-4; aRom. 14:5; aKol. 2:13, 14) Mithukumano iyo, sanaaphwanyiha maKristau a eseekulu yoopacerya okathi wa wiixutta, olipihana, ni onvuwiha Muluku okathi wa mavekelo, ovaha ikomentaario, ni masipo.​—aKol. 3:16; aHéb. 13:15.

5. Xeeni hiyo vanitthuneya ahu orowaka omuthukumanoni khula sumana ni iye sa vamwaakhani ntoko asembeleya ni muthukumano wa muttetthe? (Nwehe-tho ekaaxa eni: “ Mithukumano Sinipakiwa Khula Mwaakha Seiyo Siniwuuraanyiha Atthu a Muluku”).

⁵ Vamosaru, vaavo ninrowa ahu omuthukumanoni khula esumana, ni iye sa khula mwaakha, ntoko asembeleya, muthukumano wa muttetthe, ninnooniherya wira ninnikhaliherya Omwene wa Muluku, olipihiwa ni munepa awe wootteela, ni waalipiha akina mwaha wa nroromelo nahu. Etthu yootepexa otthuneya eniphwanya ahu, okhala wira hiyo ninnimukokhorela Yehova okathi wa mavekelo, ikomentaario, ni isipo siniipa ahu. Ekeekhai wira mithukumano sinipaka ahu olelo-va, sinnivirikana niiye saapaka aya aIsarayeli ni sa maKristau a eseekulu yoopacerya, masi efaita aya, enoolikana. Masi mithukumano sahu sa mahiku ala, sipacenrye sai?

6, 7. (a) Yoolakela xeeni sirinaaya mithukumano sahu? (b) Xeeni ipakeliwo sa mithukumano saakhala aya sovirikana khula egrupu?

⁶ Vaavo Munna Charles Taze Russell aapacenrye awe ophavelasa ekeekhai mu Nunuulumo na Muluku, aahoona wira vaamureera othukumana ni atthu yaarina yoolakela emosaru yaarina awe. Mwaakha wa 1879, Russell aalempe so: “Miyo, ni atthu akina, oPittsburgh, noolokiherya ni ninnithukumana khula esumana wira  nithokoreryeke Soolepa, khula ettiminku. Atthu otheene yaale yaasoma erevista Zion’s Watch Tower yaanitumereriwa orowa omithukumanoni, nto mwaakha wa 1881, saanipakiwa mithukumano oPittsburgh, oPennsylvania, khula ettiminku ni namararu. Erevista Watch Tower ya Novembro 1895 yaahihimya yoolakela ya mithukumano iyo eriki “anna ahaana okhala oowataana, oophentana ni oowiiraana”, nave saanikumiherya eparakha wa ale yaari-vo wira alipihaneke mukina ni mukhwa awe.​—Mmusome aHéberi 10:24, 25.

⁷ Mwa iyaakha sinceene, ipakeliwo sa mithukumano iyo saanivirikana, eyo piiyo, khula egrupu ya Alipa-oomusoma Biibiliya yaapaka moota aya. Mwa ntakiheryo, epaphelo emosa yaalempwale ni egrupu wEstados Unidos mwaakha wa 1911, yaahimya so: “Hiyo naanipaka mithukumano mithanu khula esumana”. Awo yaapaka mithukumano iyo eSegunda, Namararu, Namathanu ni ikwaha piili eSaabado. Epaphelo ekina, yaalempwale ni egrupo ya wAfrika, mwaakha wa 1914, yaahimya so: “Hiyo nimpaka mithukumano ikwaha piili khula mweeri, nipaceryaka Namathanu mpakha Ettiminku”. Nto, muhoolo mwaya yaahikumiheriwa enamuna yooloka ya ipakeliwo sa mithukumano sahu. Nrowe nithokorerye ipacereryo sa khula muthukumano.

8. Miru xeeni sikina wa myaha sa atthu otheene saapakiwa khalai?

⁸ Muthukumano wa Atthu Otheene. Mwaakha wa 1880, eyaakha emosa nuumala munna Russell opacerya okumihera erevista Zion’s Watch Tower, owo aahipacerya otthara ntakiheryo na Yesu, nto khupacerya ovara muteko woolaleerya. (Luk. 4:43) Vakhaani-vakhaani, munna Russell aahitikitherya ntakiheryo na ele olelo-va eniitthana ahu Muthukumano wa Atthu Otheene. Elaleyaka mukwaha owo woweetteetta, erevista Watch Tower yaahimya wira Russell “aaniphavela olavula mwaha wa atthu otheene waarina muru oni ‘Ithu Sinivarihana ni Omwene wa Muluku’”. Mwaakha wa 1911, noomala otikittheriwa miloko ilapo sinceene; khula muloko wahitumereriwa waroiha anna oophwanelela mittetthe sikina sookhuveela wira alavuleke myaha sa ipantte 6 saarina muru ntoko iya: ophukela ni yowoopola. Wuukuseryani wa khula mwaha, naanihimmwa nsina na munna onirowa olavula mwaha onitharelana, ni muru wa mwaha owo.

9. Moota xeeni mapakeliwo a Muthukumano wa atthu otheene aturukiwe aya, nto nyuwo munrowa okhaliherya sai muthukumano ala?

⁹ Mwaakha wa 1945, erevista ya The Watchtower yaahilaleya wira olumwenku wotheene waarowa opakiwa ekampaanya ya Myaha sa Atthu Otheene seiyo saahela muhina miru 8 saavarihana ni “mixankiho sa okathi ole”. Mwa iyaakha sinceene, alipa oolavula myaha oweemereriwa khiyaalavula myaha seiye saakumiheriwe ni murumeyi oororomeleya paahi, masi awo yaanilavula myaha sikina yaalempe aya mmansaya. Okhuma mwaakha wa 1981, alipa oolavula myaha otheene yaahitumereriwa orumeela myaha soolempwa saaruuhiwe khula muloko. * Mpakha mwaakha wa 1990, myaha sikina sa atthu otheene saavekela wira alipa-oowiriyana yaakhuleke makoho, ekhaleke yoowoniherya; masi mwaakha yoole yaahivahiwa malakiheryo wira myaha iyo khisaatthuneya opakiwaka makoho  wala sowooniherya. Marukunuxo makina apakiwe mweeri wa Janero 2008, nto mwaha wa atthu otheene wahivukuliwa okathi aya okhuma minutu 45 khukhala minutu 30. Nnaamwi sipakiwe mirukunuxo sinceene, nlelo mwaha wa atthu othene woolokiheriwa saana onnaalipiha atthu a Muluku ororomela Nuulumo na Muluku, ni onniwiixuttiha inamuna soovirikana sa Omwene wa Muluku. (1 Tim. 4:13, 16) Niireke nyuwo munnaalattula mooluttuweliwa ale anaaxukurya anyu, vamosa ni atthu akina ahikhanle Anamoona, wira yawiriyane myaha iyo sinimutthokiherya Biibiliya?

10-12. (a) Marukunuxo xeeni apakiwe a Yoosoma ya Owehaweha? (b) Makoho xeeni anireerela anyu wiikoha?

¹⁰ Yoosoma ya Owehaweha. 1922, Mwaakha wa 1922, aana yaale yaasuweliwa okhala maperegrino, yaawo yaarummwa ni Watch Tower Society wira yalavule myaha mmilokoni ni wira yahooleleke muteko woolaleerya, yaahitumererya wira sipakiweke mithukumano khula esumana wira ethokoreriweke yoosoma ya erevista Owehaweha. Malakiheryo ale yahitthariwa, nto wanipacerya yoosoma ya Owehaweha yaanipakiwa eriyari ya esumana wala Ettiminku.

¹¹ Erevista Watchtower ya 15 a Junyo, 1932, yaahivaha malakiheryo makina voohimya sa moota yoosoma ele yaarowa aya opakiwaka. Nthariwaka ntakiheryo na oBetheli, muru wa khula esumana wahaana othokoreriwa ohooleliwaka ni munna. Anna araru yahaana okilaathi vatribuna wira aranttelaneke osoma ittima. Okathi ole miru sa yoosoma khisarwaana makoho, nto munna ole aahoolela aahaana waavekela alipa-oowiriyana wira apakeke makoho anivarihana ni yoosoma ele. Nuumala-vo, owo aaninvekela mutthu mwa alipa-oowiriyana wira aakhuleke makoho awo. Nto vaatthuneyaka wiwanyeihiwa saana eponto emosa, ole aahoolela aanitumereriwa “otthokiherya mookhweya ni mowaakuveya”.

¹² Wanipacerya, khula muloko aaheemereriwa othanla mwaha wa murevistani waasivela anamunceene, wira nto othokoreriwe.  Masi erevista ya 15 a Abril 1933, yaahilakiherya wira miloko sotheene sithokoreryeke mwaha mmosaru. Mwaakha wa 1937, yaahiruuhiwa malakiheryo yaahimya wira yoosoma eyo epakiweke Ettiminku paahi. Olokiheriwa okina voohimya sa mithukumano okumihenrye ele enisuwela ahu vano waahikhumela murevistani ya Watchtower ya 1 a Outubro 1942. Etthu yoopacerya, erevista ele yaahimmye wira makoho yaarowa ophwanyaneyaka vathi va khuta epaaxina ya yoosoma, ni wira makoho awo yahaana orumeeliwa. Yaahihimya-tho wira muthukumano wa yoosoma wahaana opakiwa muhina mwa ewoora emosa. Yaahitumereriwa-tho, ale yaarowa waakhulaka makoho wira “arumeeleke moolumo aya” ohiya osoma ele eri mparagrafuni. Yoosoma ya Owehaweha teri ekaruma yoopacerya enirumeela awe murumeyi ororomeleya wira ovahe yoolya ya omunepani ya okathi wooreerela. (Math. 24:45) Nto khula mmosa a hiyo ohaana wiikohaka so: ‘Niireke miyo kinnilokiherya saana yoosoma ya Owehaweha khula esumana? Kinniimananiha wira kivahe ekomentario khula okathi oniweryaka’?

13, 14. Epacerihiwe sai Yoosoma ya Biibiliya ya Muloko, ni etthu xeeni eniwiirihani osiveliwa muthukumano ola?

¹³ Yoosoma ya Eliivuru ya Muloko. Eriyari ya iyaakha sa 1890, nuumala olempwa ivulume sinceene sa Aurora do Milênio, Munna H. N. Rahn, yoowo Aamusoma Biibiliya epooma ya Baltimore, Maryland, EUA, aahihimya wira vaanireerela “opaka igrupo sa omusoma Aurora do Milênio”. Wanipacerya mithukumano iyo saapakiwa mmaitthokoni sa anna, nto waari weererya paahi. Mweeri wa Setembro 1895, igrupo iye sa omusoma Aurora do Milênio saanikhumela saana mittetthe sinceene sa wEstados Unidos. Erevista Watch Tower ya mweeri yoole, yaahilakiherya wira atthu otheene aniixutta ekeekhai ahaana opaka mutthukumano owo khula nipuro anikhala aya. Yaahihimya wira munna onihoolela muthukumano ola ohaana okhala yoole oniwerya osoma saana. Owo ahaana osoma esentensa emosa nto khiyaawehererya atthu wira akomentari. Nuumala osoma ni otthokorerya khula esentensa ya ettima yotheene, owo ahaana waavya soolepa sotheene siromoliwe wira osome. Wuukiseryani wa khula muru, khula mutthu mwa alipa-oowiriyana ahaana wuuluula ovahaka ekomentaario yoohipisa sa muru owo.

¹⁴ Nsina na muthukumano ola nooturukiwa ikwaha sinceene. Wookhala okathi yiireliwa aya Nikhuuru na aBereya na Yoosoma ya Biibiliya yaatakihiwa atthu a eseekulu yoopacerya yaakhala oBereya yaawo yaatokosa saana Soolepa. (Mit. 17:11) Nuuvira okathi naahiturukiwa nsina nlo khukhala Yoosoma ya Eliivuru ya Muloko. Mahiku ahu ala eniireliwa Yoosoma ya Biibiliya ya Muloko, ni muloko wotheene onnithukumana Empa ya Omwene, ohiya siiriwa aya khalai vaathukumaniwa aya mmaithokoni mwa anna. Mwa iyaakha miloko sinceene sivinre, soosommwa illivuru soovirikana, ibroxuura, hata miru sa erevista Owehaweha saanirumeeliwa wira epakiwe yoosoma eyo. Okhuma wuupaceryani, yaanitumereriwa atthu otheene yaarwa owiriyana wira avaheke ikomentaario saya.  Muthukumano owo woonikhaliherya vanceene omwiiwexexa Biibiliya. Nto niireke nyuwo munniilokiherya saana wira mwawerye ovaha ekomentaario yooloka?

15. Yaavara muteko xeeni Exikola ya Orummwa wa Muluku?

¹⁵ Exikola ya Orummwa wa Muluku. Munna Carey Barber, yoowo aarumeela oSeedi Mundial oBrooklyn, Nova York, onihimya so: “Nihiku nimosa esegunda-feira ohiyu 16 a Feverero 1942, alopwana otheene yaakhala oBetheli ya oBrooklyn yaahitumereriwa wiilepiha ele olelo-va enisuwela ahu okhala Exikola ya Orummwa wa Muluku”. Munna   Barber, yoowo muhoolo mwaya aari mmosa a Nikhuuru Noolamulela ohimyaka exikola eyo aalavunle so “ele yaari enamuna yootepexa wooneya ya moota Yehova onaakhapelela awe atthu awe mahiku ahu ala”. Kursu ole aapacenrye eyaakha ya 1943, aahakhaliherya anna olokiherya inamuna saya sa wiixuttiha ni olaleerya; ni yaahikumiheriwa efolyeeto Course in Theocratic Ministry (kurso a exikola ya orummwa wa Muluku) yeeyo muhoolo mwaya yaaphwanyayewa miloko sotheene. Erevista Watchtower ya 1 a Junyo 1943 yaahimyale wira: Exikola ya Orummwa wa Muluku  epakeliwe waakhaliherya atthu a Muluku okhala “ntoko namuteko ohinuleliwa muru muteko awe, onlaleya vophwanela”, Omwene.—2 Tim. 2:15.

16, 17. Niireke Exikola ya Orummwa wa Muluku yiixuttiha enamuna ya olavula paahi? Mutthokiherye.

¹⁶ Wanipacerya, anamunceene yaanoona ovila olavula ohoolo wa atthu anceene. Clayton Woodworth, Jr., yoowo apapawe yaatthukiwe voohintthowa vamosa ni Munna Rutherford ni anna akina mwaakha wa 1918, onnihimya moota woonenle awe ekwaha yoopacerya iirenle awe olavula mwaha mwaakha wa 1943. Munna Woodworth onihimya so: “Miyo nkaawerya olavula mwaha. Vakhala ntoko wira nlumi naka naroothololowa, iyano saka khuuma, nave nsu naka khiniiweha saana”. Okathi munna Claytoni aapacenrye awe olimalela olavula, aaniwerya olavula myaha sinceene sa atthu otheene. Exikola ele yaahimwiixuttiha itthu sinceene ohiya inamuna sa olavula paahi. Yaahimwiixuttiha otthuneya waya okhala owiiyeviha ni omuroromela Yehova. Owo onihimya so: “kaahoona wira mulipa-oolavula mwaha, ntoko mutthu khahiyo etthu. Masi aakhala wira onnilokiherya saana ni omuroromela  Yehova, owo onoowiriyaniwa moohakalala nto atthu aninwiriyana animwiixutta etthu yooloka”.

¹⁷ Mwaakha wa 1959, arokora yaahemereriwa okela exikola. Murokora Edna Bauer, onnupuwela okathi aiwale awe elaleiwaka osembeleyani. Owo onihimya so: “Kinnuupuwela moota masu ale yaavihinhe aya mirima sa arokora anceene. Nto naahoona wira vano waahiphiya okathi ahu”. Mwa iyaakha sinceene, anna ni arokora anceene annittottela mureerelo Exikola ya Ourmmwa wa Muluku wira yiixuttihiweke ni Yehova. Olelo-va, ninnivikaniha wiixuttihiwa ni mithukumano sa eriyari ya esumana.​—Mmusome Yesaya 54:13.

18, 19. (a) Malakiheryo xeeni oovareleya muteko nnaakhela ahu vano wira nivareke saana muteko woolaleerya? (b) Xeeni hiyo vaniipa ahu isipo omuthukumanoni wahu? (Nwehe ekaaxa eni “ Isipo sa Ekeekhai”.)

¹⁸ Muthukumano wa Orummwa. Ohinatthi ophiya mwaakha wa 1919, saanipakiwa mithukumano sa orowa olaleerya. Okathi ole, khahiyo wira atthu otheene yaneemereriwa orowa muthukumano ole, yeemereriwa yaari yaale paahi yaavara muteko wa okawa iliivuru. Mwaakha wa 1923, Muthukumano wa Orummwa waanipakiwa ekwaha emosa va mweerini, nto yaahilattuliwa atthu otheene a mmulokoni. Nto mwaakha wa 1928, miloko sahitumereriwa wira sipakeke Muthukumano wa Orummwa khula esumana, ni mwaakha wa 1935, erevista The Watchtower yaahitumererya miloko sotheene wira okathi wa Muthukumano wa Orummwa avariheleke muteko malakiheryo yaakumiheriwa ni Director (muhoolo mwaya iireliwa Informante nto khusuweliwa okhala Orummwa Ahu wa Omwene.) Muthukumano owo waahipacerya wiirela mpantta eprograma ya mithukumano ya khula muloko.

¹⁹ Olelo-va, mithukumano sa eriyari ya esumana sinninivaha malakiheryo a moota woovara saana muteko woolaleerya. (Math. 10:5-13) Vakhala wira nyuwo munnaakhela Ekadernu Enirumeeliwa Omuthukumanoni niireke nyuwo munnisoma ni ovarihela muteko malakiheryo anivahiwa anyu okathi onilaleerya anyu?

20-22. (a) Xeeni vanuupuwela ahu okhwa wa Yesu? (b) Mireerelo xeeni siniphwanya ahu mwaha wa orowa owiriyana mwaha wa Wuupuwelela Okhwa wa Yesu khula mwaakha?

²⁰ Yesu aahaaleela atthareli awe wira yuupuweleke okhwa wawe mpakha owo orwa. Ntoko siisaale saatthapeliwa awe Paasikha, Niira na Wuupuwelela Okhwa wa Yesu nnipakiwa ekwaha emosa khula mwaakha. (1 aKor. 11:23-26) Muthukumano ola annoorwa atthu imilyau sinceene khula mwaakha. Eyo enniwuupuxerya maKristau oowoottihiwa eparakha aya ya orowa olamulela Momweneni. (aRom. 8:17) Nave ipwittipwitthi sikina, sinnooniherya omuttittimiha waya wuulupale ni omuroromela waya Mwene a Omwene wa Muluku.​—Yoh. 10:16.

²¹ Munna Russell ni axaapara awe, yaanoona otthuneya waya wuupuwelela Yoolya ya Ohiyu ya Apwiya, ni aanisuwela wira eyo yaahaana opakiwa ekwaha emosa khula mwaakha. Erevista ya Watch Tower ya Abril 1880 yaahimya so: “Mwa iyaakha sinceene atthu anceene aalimalela oPittsburgh nno . . . Omuupuwelela Paasikha [Yowuupuxerya] ni okhuura ithoonyeryo sa erutthu ni ephome  ya Pwiya”. Moohipisa mithukumano sa muttetthe siiriwa vamosa ni yowuupuwelela. Nto mukwaha waapacenrye aya olempwa nummuru na atthu yaarwenle muthukumano ole waari mwaaha wa 1889, nto yaahirwa atthu 225, nave yaahibatiziwa atthu 22.

²² Olelo-va, khannipaka Yowuupuxerya, okathi wa muthukumano wa muttetthe, masi ninnaalattula atthu a mmuttettheni mwahu, wira arwe yuupuwelele ni hiyo niira nlo, Empa ya Omwene, wala nipuro nikina nowaalugariwa. Mwaakha wa 2013, atthu anivikana imilyau 19 yaahirwa wuupuwelela okhwa wa Yesu. Tthiri ti voohakalaliha ohiya hiyo orowa niira nle paahi, masi waatumererya-tho atthu akina okhala ni hiyo, ohiyu ole wa vameekhaaya! Niireke wira nyuwo munnalattula atthu mooluttuweliwa wira arowe wuupuwelela khula mwaakha?

23. Nyuwo munoonela sai mithukumano sahu?

²³ Arumeyi oororomeleya a Yehova, khanoona mithukumano, okhala muritthi woolemela. (aHéb. 10:24, 25; 1 Yoh. 5:3) Mwa ntakiheryo, mwene Davidi vaanimusivela okokhorela Mpaani mwa Muluku. (Esal. 27:4) Owo vaanimusivela opaka eyo vanceenexa oryeene ni atthu akina yamphenta Muluku. (Esal. 35:18) Muupuwele ntakiheryo na Yesu. Okhuma enamwane awe, vaanimusivela vanceene orowa empa ya Tiithi awe wira amukokhorele.​—Luka 2:41-49.

24. Okathi onirowa ahu omuthukumanoni, iparakha xeeni sinikhalana ahu?

²⁴ Vaavo hiyo nnirowa ahu omuthukumanoni, ninnooniherya omphenta wahu Yehova ni yootthuna ahu ya waalipiha annihu. Hiyo nave ninnooniherya ophavela wahu wiixutta makhalelo a atthu a Omwene wa Muluku, okhala wira eyo tekhanle yoolakela yoopacerya ya mithukumano sahu sa mmulokoni, asembeleya ni mithukumano sa muttetthe. Ohiya-vo, mithukumano sahu sinniniphwanyiha osuwela ni olipa onitthuneya wira nivikanihe ovara muteko wootepexa otthuneya onivariwa ni Omwene wa Muluku mahiku ala, eyo piiyo, waalaleerya ni owiixutthiha atthu voohimya sa Omwene wa Yesu Kristu. (Mmusome Matheyo 28:19, 20.) Voohaniherya, osiveliwa wahu orowa omuthukumanoni onnooniherya wira ninnoona Omwene wa Muluku okhala wekeekhai mweekumini mwahu. Tthiri hiyo nihaana ovaha efaita yuulupale mithukumano sahu!