1. Han nagkatirok an mga disipulo, ano nga bulig an ira nakarawat, ngan kay ano nga kinahanglan nira ito?

KATAPOS banhawon hi Jesus, nagkatirok an mga disipulo basi magdinasigay. Kondi tungod ha kahadlok ha kaaway, gintrangkahan nira an purtahan. Sigurado nga nawara an ira kahadlok han magpakita ha ira hi Jesus ngan nagsiring: “Karawata niyo an baraan nga espiritu.” (Basaha an Juan 20:19-22.) Waray pag-iha, nagkatirok utro an mga disipulo, ngan ginbuboan hira ni Jehova han baraan nga espiritu. Naghatag gud ito ha ira hin daku nga kusog para ha pagsangyaw nga ira pagbubuhaton!—Buh. 2:1-7.

2. (a) Paonan-o hi Jehova naghahatag ha aton hin kusog, ngan kay ano nga kinahanglan naton ito? (b) Kay ano nga importante an Pagsingba han Pamilya? (Kitaa an footnote ngan an kahon nga “ Pagsingba han Pamilya,” ha pahina 175.)

² Naatubang gihap kita hin kakurian nga pariho han gin-atubang han kabugtoan han siyahan nga siglo. (1 Ped. 5:9) May mga panahon nga an iba ha aton naabat hin kahadlok ha tawo. Salit basi makagpadayon ha pagsangyaw, kinahanglan naton an kusog tikang kan Jehova. (Efe. 6:10) Kadak-an hito nga kusog iya igintatagana pinaagi han mga katirok. Yana, lima an aton katirok—Pahayag Publiko, Pag-aram han Barantayan, Pag-aram ha Biblia han Kongregasyon, Teokratiko nga Eskwelahan ha Ministeryo, ngan Katirok ha Pag-alagad. * May-ada liwat kita upat nga tinuig nga katirok—regional nga kombensyon, duha nga sirkito nga asembleya, ngan Memoryal han kamatayon han Kristo. Kay ano nga importante an pagtambong hito ngatanan? Ano an mga pagbag-o ha mga katirok? Ano an iginpapakita han aton pagtagad ha mga katirok mahitungod ha aton?

3, 4. Ano an iginsugo ni Jehova ha iya katawohan? Paghatag hin ehemplo.

³ Maiha na nga iginsugo ni Jehova ha iya katawohan an pagkatirok ha pagsingba ha iya. Pananglitan, han 1513 B.C.E., iginhatag ni Jehova an iya Balaud ha nasud han Israel, kaupod hito an sinemana nga Sabbath basi an kada pamilya makagsingba ha iya ngan matutdoan han Balaud. (Deut. 5:12; 6:4-9) Han ginsunod han mga Israelita ito nga sugo, an mga pamilya naparig-on ngan an nasud nagpabilin nga limpyo ngan himsog ha espirituwal. Kondi han gintalapas nira an Balaud, sugad han regular nga pagkatirok ha pagsingba kan Jehova, nawara nira an pag-uyon han Dios.—Leb. 10:11; 26:31-35; 2 Kron. 36:20, 21.

 ⁴ Kumusta man hi Jesus? Ano nga susbaranan an iya iginpakita? Kada semana nakadto hiya ha sinagoga kon Sabbath. (Luc. 4:16) Han mamatay na hiya ngan nabanhaw, iginpadayon han iya mga disipulo an regular nga pagkatirok bisan kon diri na hira ilarom han balaud han Sabbath. (Buh. 1:6, 12-14; 2:1-4; Roma 14:5; Col. 2:13, 14) Hito nga mga katirok, an mga Kristiano ha siyahan nga siglo diri la nakarawat hin instruksyon ngan pagdasig, kondi naghahalad liwat hin mga pagdayaw ha Dios pinaagi hin pag-ampo, komento, ngan kanta.—Col. 3:16; Heb. 13:15.

5. Kay ano nga natambong kita ha sinemana nga katirok ngan ha tinuig nga asembleya ngan kombensyon? (Kitaa liwat an kahon nga “ Tinuig nga mga Katirok nga Nagbubugkos han Katawohan han Dios,” ha pahina 176.)

⁵ Ha pariho nga paagi, kon natambong kita ha sinemana nga katirok ngan tinuig nga asembleya ngan kombensyon, iginpapakita naton an suporta ha Ginhadian han Dios, nakarawat hin kusog tikang ha baraan nga espiritu, ngan nakakadasig ha iba pinaagi han mga kapahayagan han aton pagtoo. Labaw pa hito, nagkakaada kita higayon ha pagsingba kan Jehova pinaagi han aton mga pag-ampo, pagkomento, ngan pagkanta. An kahikayan han aton mga katirok yana bangin iba ha mga katirok han mga Israelita ngan han mga Kristiano ha siyahan nga siglo, kondi an mga katirok hadto ngan yana pariho importante. Ano an mga pagbag-o ha aton mga katirok ha moderno nga panahon?

6, 7. (a) Ano an katuyoan han aton mga katirok? (b) Paonan-o nagkaiba-iba an kahikayan ngan eskedyol han mga katirok hadto ha tagsa nga grupo?

⁶ Han nagtikang mamiling hi Bugto Charles Taze Russell han kamatuoran ha Pulong han Dios, nasantop niya an pagkaimportante han pakigkatirok upod han mga may pariho nga tumong. Han 1879, hiya nagsurat: “Ako, upod an iba ha  Pittsburgh, nag-organisar ngan regular nga nagdumara hin klase basi usisahon an Kasuratan, kada Domingo.” An mga magbarasa han Zion’s Watch Tower gin-aghat nga magkatirok, ngan pag-abot han 1881, may katirok na ha Pittsburgh, Pennsylvania, kada Domingo ngan Mierkoles. An Watch Tower han Nobyembre 1895 nagsiring nga an katuyoan han mga katirok amo an pagkultibar han “Kristiano nga pagminagburugto, gugma ngan pagbinuligay” pati pagdinasigay.—Basaha an Hebreo 10:24, 25.

⁷ Ha damu ka tuig, iba-iba an kahikayan ngan eskedyol han mga katirok ha tagsa nga grupo han mga Estudyante han Biblia. Pananglitan, usa nga surat tikang ha usa nga grupo ha Estados Unidos ngan iginpublikar han 1911, an nagsiring: “Lima an amon katirok kada semana.” Gindudumara nira ito ha Lunes, Mierkoles, Biernes, ngan duha ka beses ha Domingo. Usa pa nga surat tikang ha usa nga grupo ha Aprika ngan iginpublikar han 1914, an nagsiring: “Duha ka beses ha usa ka bulan an amon katirok, tikang ha Biernes tubtob ha Domingo.” Kondi paglabay han panahon, nabag-o an pormat han mga katirok. Paghisgotan naton hin madaliay an kasaysayan han tagsa nga katirok.

8. Ano an pipira nga topiko nga ginhisgotan han mga diskurso hadto?

⁸ Pahayag Publiko. Han 1880, usa ka tuig katapos tikangan ni Bugto Russell an pagpublikar han Zion’s Watch Tower, iya ginsubad hi Jesus ngan gintikangan an pagbiyahe basi magsangyaw. (Luc. 4:43) Hito nga mga pagbiyahe, natikangan niya an programa nga ha urhi gintawag nga Pahayag Publiko. Iginpahibaro han Watch Tower ito nga mga pagbiyahe ngan nagsiring nga hi Russell “malilipay pagpahayag ha publiko mahitungod ha ‘Mga butang may kalabotan ha ginhadian han Dios.’ ” Han 1911, han maestablisar na an mga klase o kongregasyon ha damu nga nasud, gin-aghat an tagsa hito nga magpadara hin kwalipikado nga mamumulong ha kahigrani nga mga lugar basi magpahayag han serye nga may unom nga diskurso mahitungod ha mga topiko sugad han paghukom ngan lukat. Katapos han tagsa nga diskurso, iginsusumat an ngaran han mamumulong ngan an tema han diskurso han sunod nga semana.

9. Paonan-o nabag-o an Pahayag Publiko ha paglabay han mga tuig, ngan paonan-o mo masusuportahan ini nga katirok?

⁹ Han 1945, iginpahibaro han The Watchtower an pagtikang han bug-os-kalibotan nga kampanya han Pahayag Publiko ha serye nga may walo nga Kasuratanhon nga diskurso nga naghihisgot han “dagku nga problema ha aton panahon.” Ha mga dekada, gawas han mga outline nga tikang ha matinumanon nga uripon, ginamit liwat an mga mamumulong hin mga outline nga hira an nagsurat. Pero han 1981, ginsidngan hira nga an ira pahayag ibasar la ha outline nga iginpadara ha mga kongregasyon. * Tubtob han 1990, may mga outline han pahayag nga may pasundayag o pakigbahin han mamarati. Kondi hito nga tuig, ginbag-o ito, ginkuha an mga bahin, ngan iginpresenta an mga  outline sugad nga diskurso. Han Enero 2008, nagkaada dugang nga pagbag-o. An 45 minutos nga pahayag publiko ginhimo nga 30 minutos. Bisan han mga pagbag-o, an inandam hin maopay nga pahayag padayon nga nakakagparig-on han pagtoo ha Pulong han Dios ngan nakakagtutdo mahitungod han iya Ginhadian. (1 Tim. 4:13, 16) Maduruto ka ba ha pag-imbitar han imo mga ginbabalik-bisita ngan ha mga diri Saksi nga mamati han importante ngan iginbasar ha Biblia nga mga pahayag?

10-12. (a) Paonan-o nagbag-o an pormat han Pag-aram han Barantayan? (b) Ano nga mga pakiana an maopay nga igpakiana naton ha aton kalugaringon?

¹⁰ Pag-aram han Barantayan. Han 1922, an mga pilgrim, o ministro nga iginpadara han Watch Tower Society basi magpahayag ha mga kongregasyon ngan manguna ha pagsangyaw, nagsuhestyon hin regular nga katirok ha pag-aram han The Watch Tower. Ginkarawat ito nga suhestyon, ngan ha tinikangan, ito nga pag-aram ginhimo ha butnga han semana o ha Domingo.

¹¹ An Hunyo 15, 1932, nga Watchtower naghatag hin dugang nga instruksyon kon paonan-o dudumarahon ini nga katirok. Pinaagi hin usa nga grupo, gindumara ha Bethel Home an usa nga pag-aram. An artikulo nagsiring nga usa nga bugto nga lalaki an mangunguna han katirok. Tulo nga bugto nga lalaki an malingkod ha prente ngan magsusurosaliwan ha pagbasa han mga parapo. Hadto, an mga artikulo waray nakaimprinta nga pakiana, salit an konduktor an maghahangyo ha mamarati ha pagbangon hin mga pakiana basado ha gin-aadman. Katapos, matawag hiya ha mamarati hin mabaton. Kon kinahanglan an dugang nga pagpatin-aw, an konduktor maghahatag hin “halipot ngan klaro” nga esplikasyon.

¹² Ha tinikangan, an tagsa nga kongregasyon mahimo pumili hin isyu han magasin nga karuyag adman han kadam-an. Kondi an Abril 15, 1933, nga Watchtower nagsuhestyon ha ngatanan  nga kongregasyon nga an bag-o nga isyu an gamiton. Katapos han 1937, iginhatag an instruksyon nga sadang ito dumarahon ha Domingo. Ngan iginpagowa han Oktubre 1, 1942, nga Watchtower an dugang nga pag-uray nga nagbag-o hini nga katirok ngadto ha pormat nga aton ginagamit tubtob yana. Iginpahibaro hito nga magkakaada na mga pakiana ha ubos han kada pahina han aradman nga artikulo ngan ini an gagamiton. Nagsiring liwat ito nga an katirok kukobrehan ha usa ka oras. Gin-aghat gihap hito an mabaton nga diri magbasa ha parapo, kondi bumaton “ha ira kalugaringon nga mga pulong.” An Pag-aram han Barantayan nagpapadayon nga nangunguna nga programa nga ginagamit han matinumanon nga uripon ha pagtagana hin espirituwal nga pagkaon ha husto nga panahon. (Mat. 24:45) Salit maopay nga pakianhan an aton kalugaringon: ‘Nangangandam ba ako para ha pag-aram han An Barantayan kada semana? Nangangalimbasog ba ako nga makagkomento?’

13, 14. Paonan-o naorganisar an Pag-aram ha Biblia han Kongregasyon, ngan ano an imo naruruyagan hini nga katirok?

¹³ Pag-aram ha Biblia han Kongregasyon. Ha kabutngaan han dekada han 1890, katapos mairelis an mga volume han Millennial Dawn, hi Bugto H. N. Rahn, usa nga Estudyante han Biblia ha syudad han Baltimore, Maryland, E.U.A., an nagsuhestyon ha pagdumara hin “Dawn Circles” basi pag-adman an Biblia. Ha tinikangan, eksperimento la ini nga mga katirok ngan gindudumara ha pribado nga mga balay. Kondi han Septyembre 1895, gindumara na ini ha damu nga syudad han Estados Unidos, ngan nagmalampuson. Salit, iginsuhestyon han Watch Tower hito nga bulan nga an tanan nga estudyante han kamatuoran magdumara hini. Nagsiring ito nga an konduktor kinahanglan maopay magbasa. Magbabasa hiya hin usa nga sentence ngan huhulaton nga magkomento an mga tinambong. Katapos hisgotan an bug-os nga parapo, babasahon niya an gin-unabi nga mga teksto. Kahuman pag-adman an kapitulo, an tagsa nga mamarati magkukomento hin halipot sugad nga repaso.

¹⁴ Pipira ka beses ginbag-o an ngaran hini nga katirok. Gintawag ini nga Berean Circles for Bible Study, nga iginbasar ha siyahan-siglo nga mga taga-Berea nga nag-usisa hin maopay han Kasuratan. (Buh. 17:11) Katapos, ginliwanan ini hin Pag-aram ha Libro han Kongregasyon. Yana, gintatawag na ini nga Pag-aram ha Biblia han Kongregasyon nga gindudumara ha Kingdom Hall upod han bug-os nga kongregasyon, imbes hin mga grupo la ha pribado nga mga balay. Mga dekada na nga iba-iba nga libro, brosyur, ngan artikulo ha Watch Tower an ginagamit para hini. Tikang pa hadto, gin-aaghat na an ngatanan nga makigbahin. Nakabulig gud ini ha pagpahilarom han aton kahibaro ha Biblia. Regular ka ba nga nangangandam para hini nga katirok ngan nangangalimbasog nga magkaada maopay nga pakigbahin?

15. Ano an katuyoan han Teokratiko nga Eskwelahan ha Ministeryo?

 ¹⁵ Teokratiko nga Eskwelahan ha Ministeryo. “Han Lunes han gab-i, Pebrero 16, 1942,” nahinumdom hi Carey Barber, nga hito nga panahon nag-aalagad ha headquarters ha Brooklyn, New York, nga “gin-aghat an ngatanan nga kalalakin-an nga membro han Brooklyn Bethel nga magpaenrol ha eskwelahan nga ha urhi gintawag nga Teokratiko nga Eskwelahan ha Ministeryo.” Hi Bugto Barber nga ha urhi nagin membro han Nagmamando nga Lawas, naghulagway han eskwelahan sugad nga “usa han pinakamakatirigamnan nga pag-uswag tungod han paggiya ni Jehova ha iya katawohan ha moderno nga panahon.” Nakabulig gud ini ha kabugtoan nga kalalakin-an nga mapauswag an ira abilidad ha pagtutdo ngan pagsangyaw salit tikang han 1943, an mga kongregasyon ha bug-os nga kalibotan kinarawat han bokleta nga Course in Theocratic Ministry. An Hunyo 1, 1943, nga Watchtower nagsiring nga an katuyoan han Teokratiko nga Eskwelahan ha Ministeryo amo an pagbulig ha katawohan  han Dios “nga mabansay basi magin mas maopay nga mga testigo ha pagpasamwak han Ginhadian.”—2 Tim. 2:15.

16, 17. An abilidad la ba ha pagyakan an igintututdo han Teokratiko nga Eskwelahan ha Ministeryo? Isaysay.

¹⁶ Ha siyahan, damu an nakurian pagpahayag ha atubangan han damu nga tawo. Hi Clayton Woodworth, Jr., nga an tatay waray hustisya nga napriso kaupod ni Bugto Rutherford ngan han iba pa han 1918, nagsumat mahitungod han iya siyahan nga bahin ha eskwelahan han 1943. “Nakurian ako ha pagpahayag. Baga hin nauutal ako, nagmamara an akon tutunlan, ngan an akon tingog nadaku ngan natipli.” Kondi samtang nag-uuswag hiya, kinarawat hiya hin damu nga pribilehiyo ha pagpahayag. Diri la mahitungod ha maopay nga pagpahayag an iya hinbaroan ha eskwelahan. Gintutdoan liwat hiya hito han bili han pagkamapainubsanon ngan pagsarig kan Jehova. Hiya nagsiring: “Nasantop ko nga diri an mamumulong an importante. Kondi kon nangangandam gud hiya ngan bug-os nga nasarig kan Jehova, malilipay an mamarati ngan may mahibabaroan.”

 ¹⁷ Han 1959, gin-aghat an kabugtoan nga kababayin-an nga magpaenrol ha eskwelahan. Hinbatian ni Bugto Edna Bauer ito nga pahibaro ha asembleya. Hiya nagsiring: “Nahinunumdoman ko an kalipay nga gin-abat han kabugtoan nga kababayin-an. Yana, mas naghaluag an ira oportunidad.” Lalaki ka man o babaye, ginsasalingabot mo ba an higayon nga magpaenrol ha Teokratiko nga Eskwelahan ha Ministeryo ngan matutdoan ni Jehova?—Basaha an Isaias 54:13.

18, 19. (a) Ano nga kahikayan an padayon nga ginsusunod ha Katirok ha Pag-alagad? (b) Kay ano nga nagkakanta kita ha aton mga katirok? (Kitaa an kahon nga “ An Pagkanta Mahitungod han Kamatuoran.”)

¹⁸ Katirok ha Pag-alagad. Tikang pa han 1919, nagdudumara na hin katirok para ha pag-organisar han pagsangyaw. Hito nga panahon, an direkta la nga nananaltag hin literatura an natambong hito nga katirok, diri an ngatanan ha kongregasyon. Han 1923, gindudumara an Katirok ha Pag-alagad usa ka beses ha usa ka bulan, ngan gin-aaghat pagtambong an ngatanan ha klase o kongregasyon. Han 1928, ginsagda an mga kongregasyon nga magkaada Katirok ha Pag-alagad kada semana, ngan han 1935, gin-aghat han The Watchtower an ngatanan nga kongregasyon nga an ira Katirok ha Pag-alagad ibasar ha impormasyon ha Director (ha urhi gintawag nga Informant, kondi An Aton Ministeryo ha Ginhadian na yana). Waray pag-iha, nagin regular nga bahin na ini nga katirok ha mga katirok han kongregasyon.

¹⁹ An Katirok ha Pag-alagad padayon nga nagsusunod han susbaranan han Kristo pinaagi ha pagtagana hin praktikal nga giya ha aton pagsangyaw. (Mat. 10:5-13) Kon kwalipikado ka ha pagkarawat hin kopya han An Aton Ministeryo ha Ginhadian, pakianhi an imo kalugaringon, ‘Gin-aadman ko ba ngan gin-aaplikar an mga suhestyon hito ha akon ministeryo?’

20-22. (a) Kay ano nga ginsasaurog naton an kamatayon ni Jesus? (b) Ano nga kapulsanan an imo nakakarawat ha pagtambong ha Memoryal kada tuig?

²⁰ Ginsugo ni Jesus an iya mga sumurunod nga isaurog an iya kamatayon tubtob ha iya pag-abot. Pariho ha pagsaurog han Paskua, an Memoryal han Kamatayon han Kristo usa nga tinuig nga okasyon. (1 Cor. 11:23-26) Minilyon an natambong hini. Para ha mga dinihogan, nagpapahinumdom ini han ira pribilehiyo nga magin kaupod nga manurunod han Ginhadian. (Roma 8:17) Para ha iba nga karnero, nag-aaghat ini hin hilarom nga pagtahod ngan pagkamaunungon ha Hadi han Ginhadian han Dios.—Juan 10:16.

²¹ Ginkikilala ni Bugto Russell ngan han iya mga kaupod an importansya han pagsaurog han Panihapon han Ginoo, ngan maaram hira nga sadang ito isaurog makausa la ha usa ka tuig. An Abril 1880 nga gowa han Watch Tower nagsiring: “Mga tuig na nga nabatasan han damu ha amon dinhi ha Pittsburgh an . . . pagsaurog han Paskua [Memoryal], ngan pakigbahin ha mga emblema han lawas ngan dugo han aton Ginoo.” Katapos han  Memoryal, nagkakaada hin kombensyon. Siyahan nga nairekord an sugad nga okasyon han 1889, diin 225 an tinambong ngan 22 an nabawtismohan.

²² Yana, diri naton ginsasaurog an Memoryal sugad nga bahin hin kombensyon, kondi nangingimbitar kita ha ngatanan ha aton lugar nga magsaurog kaupod ha aton ha lokal nga Kingdom Hall o ginpletehan nga pasilidad. Han 2013, sobra 19 ka milyon an nagsaurog han kamatayon ni Jesus. Daku gud nga pribilehiyo diri la an pagtambong ha Memoryal kondi pati an pag-aghat ha iba nga umupod ha aton hinin pinakasagrado nga gab-i! Nangingimbitar ka ba para ha Memoryal kada tuig tubtob han imo mahihimo?

23. Paonan-o mo gintatagad an aton urosa nga pagkatirok?

²³ Para ha maunungon nga mga surugoon ni Jehova, diri mabug-at an iya sugo nga mag-urosa ha pagkatirok. (Heb. 10:24, 25; 1 Juan 5:3) Pananglitan, hi Hadi David, naruruyag pagkadto ha balay ni Jehova basi magsingba. (Sal. 27:4) Ngan labi nga nalilipay hiya ha pagbuhat hito kaupod han iba nga nahigugma ha Dios. (Sal. 35:18) Kumusta man hi Jesus? Bata pa hiya, hingyap na niya nga kumadto ha balay han iya Amay.—Luc. 2:41-49.

24. Ano nga mga higayon an nagigin posible kon natambong kita ha mga katirok?

²⁴ Kon natambong kita ha katirok, naipapakita naton an gugma kan Jehova ngan an hingyap nga maparig-on an aton igkasi-tumuroo. Naipapahayag liwat naton an hingyap ha paghibaro kon paonan-o magkikinabuhi sugad nga sakop han Ginhadian han Dios. Ha aton mga katirok, asembleya, ngan kombensyon nakakarawat naton an sugad nga pagbansay. Nabulig liwat ito ha aton ha pagkultibar hin abilidad ngan kusog basi makagpadayon ha usa han pinakaimportante nga buruhaton han Ginhadian han Dios yana—an paghimo ngan pagbansay hin mga sumurunod han Hadi, hi Jesu-Kristo. (Basaha an Mateo 28:19, 20.) Oo, an hilarom nga hingyap nga magkatirok nagpapakita nga tinuod gud ha kada usa ha aton an Ginhadian han Dios. Hinaot pirme naton pabilhan an aton mga katirok!