1. Ana ŵakulijiganya ŵa Yesu ŵapocele cikamucisyo camtuli ali asongene pampepe, soni ana ligongo cici ŵasosecelega cikamucisyoci?

 PANYUMA pakuti Yesu ajimwice ku ŵawe, ŵakulijiganya ŵakwe ŵasongene pampepe kuti alimbikasyane. Pandaŵiji jemanjaji ŵawugele matanga pakwajogopa acimmagongo ŵawo. Yesu paŵakopocele pasikati pawo, ŵasalile kuti, “Apocele msimu weswela.” Ŵandumetumeŵa ali apikene yeleyi woga wawo wanandipe. (Aŵalanje Yohane 20:19-22, NW.) Mkupita kwandaŵi ŵakulijiganyaŵa, ŵasongenesoni pampepe. Pandaŵiji Yehofa ŵapele jemanjaji msimu weswela. Msimu weswelawu wakamucisye kuŵa ŵakulimbangana pamasengo gaŵasosekwaga kuti agatende.—Mase. 2:1-7.

2. (a) Ana Yehofa akusatukamucisya camtuli, soni ligongo cici tukusasosecela cikamucisyoci? (b) Ana ligongo cici Kulambila kwa Peŵasa kuli kwakusosekwa mnope? (Alole maloŵe gamwiŵanda soni libokosi lyakuti “Kulambila kwa Peŵasa,” peji 175.)

² M’wejisoni tukusasimana ni yakusawusya yakulandana ni yaŵasimanaga nayo abale ŵetu ŵa m’yaka 100 yandanda. (1 Pet. 5:9) Ndaŵi sine ŵane ŵetuwe tukusalaga ni kwajogopa ŵandu. M’yoyo, tukusosekwa macili ga Yehofa kuti tupakombole kupilila patukukamula masengo getu gakulalicila. (Aef. 6:10) Yehofa akusatupa macili gelaga kupitila m’misongano jetu. Tukwete upile wakusimanikwa pa misongano jiŵili jatukusakolaga wiki jilijose. Wandanda uli Msongano wa Ngani ja Wosope ni Sanja ja Mlonda, soni Waŵili msongano wakolanjidwa kuti Undumetume ni Umi Wetu wa Ciklistu. a Kupwatika pelepa, tukwetesoni misongano mcece jajikusatendekwa caka cilicose. Misonganoji jili msongano waupande, misongano jiŵili jamkuli, soni msongano wakumbucila ciwa ca Yesu. Ana ligongo cici tukusosekwa kusimanikwa pamisonganoji? Ana misongano jetu ja masiku aganoji jatandite mwamtuli? Soni ana mwatukusajiwonela misonganoji yikusalosya cici?

3, 4. Ana Yehofa akusajembeceyaga cici kwa ŵandu ŵakwe? Apelece yisyasyo.

³ Kutandila kalakala, Yehofa akusasaka kuti ŵandu ŵakwe asonganeje pampepe kuti amlambileje jwalakwe. Mwacisyasyo, m’caka ca 1513 B.C.E., Yehofa ŵawupele mtundu wa Aisalaeli Cilamusi. M’Cilamusici, mwapali lilamusi lyakuti asunjeje Sabato kuti liŵasa lililyose limlambileje jwalakwe pa lisikuli soni kulijiganya Cilamusici. (Det. 5:12; 6:4-9) Aisalaeli paŵakuyaga lilamusili, maŵasa gawo gajendaga cenene soni mtundu wosope waŵaga weswela soni wakulimba mwausimu. Nambo mtunduwu pawulepele kukuya lilamusili mwakukana kusongana pampepe kuti amlambileje Yehofa, yakuyicisya  yakwe yaliji yakuti nombe najo Yehofa ŵawulekaga mtunduwu.—Lef. 10:11; 26:31-35; 2 Mbi. 36:20, 21.

⁴ Kwende tulole cisyasyo caŵalosisye Yesu pangani jakusongana. Wiki jilijose, jwalakwe jwakwete cisyoŵe cakwawula ku nyumba jakulambilila pa lisiku lya Sabato. (Luk. 4:16) Panyuma pakuti Yesu awile soni kwimuka kuŵawe, ŵakulijiganya ŵakwe ŵapitilisye kusongana pampepe mwakutamilicika atamose kuti jemanjaji nganaŵasoni pasi pa lilamusi lya Sabato. (Mase. 1:6, 12-14; 2:1-4; Alo. 14:5; Akolo. 2:13, 14) Aklistu ŵa mu yaka 100 yandandaŵa, nganagambaga kusongana kuti alijiganye soni kulimbikasyanape, nambo ŵapelekagasoni mbopesi syakumcimbicisya Mlungu mwakupopela, kupeleka ndemanga, soni kwimba nyimbo.—Akolo. 3:16; Aheb. 13:15.

5. Ana ligongo cici tukusatenda misongano jampingo, jamkuli soni jaupande? (Alolesoni libokosi lyakuti “Misongano ja Pacaka Jajikusakamulanya Ŵandu wa Mlungu, peji 176.)

⁵ Mwakulandana ni yeleyi, kusimanikwa kwetu pamisongano jampingo, jamkuli soni jaupande kukusalosya kuti tuli ku mbali ja Ucimwene wa Mlungu. Pamisonganoji msimu weswela ukusatulimbikasya. Patusimanikwe pamisonganoji tukusitwalimbikasya ŵane mwakukambilana nawo yindu yausimu soni mwakupeleka ndemanga syasikusalosya cikulupi cetu. Cakusosekwa mnope, cili cakuti patuli pamisongano tukusakola upile wakumlambila Yehofa kupitila m’mapopelo getu, ndemanga soni nyimbo syatukusajimbaga. Yisyene kuti katende ketu ka misongano masiku agano nganikaŵa kalandene ni muŵatendelega Aisalaeli soni Aklistu ŵa mu yaka 100 yandanda, nambo cakulinga cakwe cili cakulandana. Ana misongano jetu ja masiku agano jatandite camtuli?

6, 7. (a) Ana cakulinga ca misongano jetu cili cici? (b) Ana misongano jalekanganaga camtuli pasikati pa Ŵakulijiganya Baibulo kalakala?

⁶ M’bale Charles Taze Russell pajwatandite kuwungunya usyesyene kutyocela m’Maloŵe ga Mlungu, jwakuweni kusosekwa kwa  kusongana yalumo ni ŵandu ŵane ŵaŵakwete cakulinga cakulandana ni cakweci. Mu 1879, Russell jwalembile kuti, “ Une ni acimjangu ŵane mumsinda wa Pittsburgh, twalinganyisye yakuti tusonganeje Lyamlungu lililyose kuti tulijiganyeje Baibulo.” Ŵandu ŵiŵaŵalangaga magasini ga Zion’s Watch Tower, ŵalimbikasyaga kuti asonganejesoni pampepe. Pakwika m’caka ca 1881, misongano jaliji jili mkutendekwa Lyamlungu ni Lyatatu lililyose mu msinda wa Pittsburgh soni Pennsylvania. Sanja ja Mlonda ja November 1895, jasasile kuti cakulinga ca misonganoji caliji kulimbikasya “Mkamulano wa Ciklistu ni cinonyelo” soni kupeleka upile wakuti ŵandu ŵasongenewo alimbikasyaneje.—Aŵalanje Ahebeli 10:24, 25.

⁷ Kwa yaka yejinji, makuga ga Ŵakulijiganya Baibulo gatendaga misonganoji mwakulekanganalekangana. Mwacisyasyo, cikalata cacalembedwe ni likuga lya Ŵakulijiganya Baibulo ku United States, cacawandisidwe mu 1911 casasile kuti, “Tukusatendaga ciŵandika misongano msano wiki jilijose.” Ŵatendega misonganoji Lyakulemba, Lyatatu, Lyamsano soni maulendo gaŵili Lyamlungu. Cikalata cine cacatyocele ku likuga lya Ŵakulijiganya Baibulo ku Africa, cacawandisidwe mu 1914 casasile kuti, “Tukusatenda misongano kaŵili pa mwesi. Tukusatenda Lyamsano kundanda kwa mwesi ni Lyamlungu kumbesi kwa mwesiwo.” Nambope mkupita kwandaŵi, katende ka misongano kacenjile. Mwakata kwende tulole mujatendecelaga misonganoji.

8. Ana ngani sya wosope syandanda syasalaga yakwamba cici?

⁸ Ngani ja Wosope. Mu 1880, panyuma pakuti M’bale Russell atandite kuwandisya magasini ga Zion’s Watch Tower, jwatandite kulinganya ulendo wakupita mcilalicila pakujigalila cisyasyo caŵapelece Yesu. (Luka 4:43) Pa ulendowu, M’bale Russell jwatandisye katende ka msongano watukusawukolanga masiku agano kuti Ngani ja Wosope. Pakulondesya ya ulendowu, Sanja ja Mlonda jasasile kuti Russell “caŵe jwakusangalala kuŵeceta ngani sya wosope syakwamba ya ‘yindu yakamulana ni ucimwene wa Mlungu.’” Mu 1911, palinganyidwe yakuti m’yilambo yine panyuma pamisongano, mpingo uliwose ŵawulimbikasyaga kuti asaguleje abale ŵakuŵajilwa kuti aŵeceteje ngani 6 syakola mitwe jakwamba ya kwelusya ni ciwombolo m’mipingo ja mumkuli mwawo. Pambesi panganiji ŵasalaga mtwe wangani soni lina lya m’bale jucaciŵeceta nganijo mu wiki jakuyicisya.

9. Ana msongano wa Ngani ja Wosope uŵele mkucenga camtuli, soni ana mpaka tulosye camtuli kukamucisya msonganowu?

⁹ Mu 1945, Sanja ja Mlonda jasasile yakutanda kwa masengo gakwaŵilanjila ŵandu kumsongano wa Ngani ja Wosope pacilambo cosope. Ŵalinganyisye yakuti paŵe ngani 8 sya Baibulo syakusala “yakusawusya yekulungwa yayipali pandaŵijo.” Kwa yaka yejinji, abale nganagambaga kuŵeceta ngani syasipelecedwe ni kapolo jwakulupicikape nambosoni ŵaŵecetaga ngani sine syaŵalinganyaga acimsyene. Nambo mu 1981, yindu yacenjile. Likuga lyasalile abale kuti aŵeceteje ngani syasipelecedwe ku mipingo kutyocela kwa kapolo jwakulupicika ni jwalundape. b Ngani sya wosope sine, syakolaga mbali jakambilana ni ŵakupikanila soni yilosyo. Nambo  mu 1990, yindu yacenjile mwamti nganisi nganisikolaga yilosyo soni mbali jakambilana ni ŵakupikanila. Kucenga kwine kwatendekwesoni mu January 2008. Nganisi ŵasijipiye kutyoka pa maminisi 45 kwika pa maminisi 30. Atamose kuti kapanganye ka nganisi kaŵele mkucenga, nambope cakulinga cakwe nganicicenga. Nganisi siŵele mkulimbisya cikulupi cetu pa Maloŵe ga Mlungu soni kutujiganya mbali syakulekanganalekangana sya Ucimwene wa Mlungu. (1 Tim. 4:13, 16) Ana ŵandu ŵatukusitwajendelaga pa maulendo gakuwilisya soni ŵane ŵanganaŵa Ŵamboni, tukusitwaŵilanjilaga kuti apikanile nawo ngani sya m’Baibulosi?

10-12. (a) Ana kalinganye ka Sanja ja Mlonda kaŵele kali mkucenga camtuli? (b) Ana ni yiwusyo yapi yakusosekwa kuliwusya?

¹⁰ Lijiganyo lya Sanja ja Mlonda. Mu 1922, Abale ŵaŵatumidwaga ni likuga lya Watch Tower Society kuti aŵeceteje ngani ku mipingo soni kulongolela masengo gakulalicila, ŵasasile kuti mpaka yiŵe cenene kulijiganyaga Sanja ja Mlonda mwakutamilicika. Nganisyo syelesi syatandite kukamula masengo mwamti kundanda kwene msongano Sanja ja Mlonda watendekwaga mkati mwa wiki kapena Lyamlungu.

¹¹ Sanja ja Mlonda ja June 15, 1932, jasasile mucatendeleje msonganowu. Pakujigalila muŵatendelaga lijiganyoli pa Beteli, ngani ja mu Sanjaji jasasile kuti m’bale ni jwakusosekwa kulongolela msonganowu. Abale ŵatatu ŵatamaga kusogolo ni kuŵalangaga ndime mwakucenganacengana. Pandaŵiji, ngani syakulijiganya nganisikolaga yiwusyo yakulembedwa. M’yoyo jwakutendesya lijiganyo jwaŵendaga ŵakupikanila kuti awusye yiwusyo kutyocela pa ngani jakulijiganyajo kaneko ŵaŵendaga ŵandu ŵane pasikati pa ŵakupikanilawo kuti ajanje yiwusyoyo. Naga ŵandu nganajanga cenene, jwakutendesya lijiganyojo jwasosekwaga “kusala mwakata soni mwakupikanika cenene” ciwundoco.

¹² Kundanda, mpingo wuliwose ŵawukundaga kusagula ngani mu Sanja ja Mlonda jele ŵandu ŵajinji ŵasakaga kuti alijiganye.  Nambope Sanja ja Mlonda ja April 15, 1933, jasasile kuti mipingo josope jikusosekwa kukamulicisyaga masengo Sanja ja Mlonda jasambano. Mu 1937, kapolo jwakulupicika jwasasile kuti msonganowu utendekweje Lyamlungu. Sanja ja Mlonda ja October 1, 1942, jasasile yakucenga kwekulungwa kwa msonganowu kwakukutendekwape mpaka apano. Candanda, Sanjaji jasasile kuti mtwe wakulijiganya ciwukoleje yiwusyo pasi pa peji jilijose ja nganijo yakuti ayikamulicisyeje masengo pakukambilana. Kaneko jasasile kuti msonganowu wutendekweje kwa awala jimo. Jalimbikasisyesoni ŵandu kuti ajanjeje “m’maloŵe gawogawope” m’malo mwakwanga ali mkuŵalanga pa ndime. Lijiganyo lya Sanja ja Mlonda likupitilisyape kuŵa msongano wakusosekwa wele kapolo jwakulupicika akusapelecela cakulya causimu pandaŵi jakwe. (Mat. 24:45) Jwalijose jwetuwe akusosekwa kuliwusya kuti, ‘Ana ngusakosecelaga lijiganyo lya Sanja ja Mlonda wiki jilijose? Soni ana ngusaŵa jwakusacilila kupeleka ndemanga naga yili yakomboleka?

13, 14. Ana Lijiganyo lya Baibulo lya Mpingo liŵele lili mkucenga mwamtuli, soni ana ni cici cakusasangalala naco ni msonganowu?

¹³ Lijiganyo lya Baibulo lya Mpingo. M’ma 1890, panyuma pakuti mabuku ga Millennial Dawn gakopwece, M’bale H. N. Rahn, Jwakulijiganya Baibulo jwa mumsinda wa Baltimore, mu upande wa Maryland m’cilambo ca United States, jwasasile yakutandikasya “tumakuga” twalijiganyo lya Baibulo pakamulicisya masengo mabuku ga Millennial Dawn. Misonganoji kundanda jatendecelaga m’nyumba sya ŵandu ŵakuŵalanjika. Nambo pakwika mu September 1895, misongano ja mtumakugatu jatendekwaga m’misinda jejinji mu United States. Sanja ja Mlonda ja mwesi wa September welewu jasasile kuti ŵakulijiganya wosope ŵa usyesyene akusosekwa kutendaga msonganowu. Sanjaji jasasilesoni kuti jwakutendesya lijiganyoli akusosekwa kuŵa jwakombola kuŵalanga cenene. Jwasosekwaga kuŵalanga msele umo ni kwembeceya kuti ŵakupikanila apelecelepo ndemanga. Panyuma pakuŵalanga msele uliwose mu ndime ni kukambilana, jwakutendesyaju jwasosekwaga kuŵalanga malemba gagali mu ndimemo. Kumbesi kwa mtwewu, jwalijose jwasosekwaga kusala mwakata yalijiganyisye.

¹⁴ Lina lya msonganowu liŵele lili mkucengacenga. Msonganowu ndaŵi jine wamanyikagasoni kuti kakuga ka Beleya kakulijiganya Baibulo. Linali ŵalijigele pakujigalila lina lya a Beleya ŵa m’yaka 100 yandanda ŵaŵawungunyaga mwakusamala Malemba. (Mase. 17:11) Kaneko msonganowu wacenjile kuŵa Lijiganyo lya Buku lya Mpingo. Masiku agano msonganowu ukusamanyika kuti Lijiganyo lya Baibulo lya Mpingo. Pamsonganowu, mpingo wosope ukusasongana m’Nyumba sya Ucimwene, m’malo mwa tumakuga tutwasonganaga m’nyumba sya ŵandu. Kwa yaka yejinji mabuku, mabulosha, nambosoni ngani sya mu Sanja ja mlonda siŵele mkukamula masengo pa lijiganyoli. Kutandila kalakala, ŵandu ŵaŵasimanikwaga pamsonganowu ŵalimbikasyaga kujigala mbali. Msonganowu utukamucisye kujimanyilila cenene Baibulo. Ana akusakosecela mwakutamilicika soni kujigala mbali pamsonganowu mwakamulana ni muyiŵelele yindu paumi wawo?

15. Ana msongano wa Sukulu ja Undumetume wa Mlungu ŵawulinganyisye ni cakulinga camtuli?

 ¹⁵ Sukulu ja Undumetume wa Mlungu. M’bale Carey Barber, juŵatumicilaga ku likulu lya Mboni ku Brooklyn mumsinda wa New York, pakumbucila yiyatendekwe lisiku line jwasasile kuti, “Cilo ca Lyakulemba, pa February 16, 1942, acalume wosope ŵaŵatumicilaga mu liŵasa lya Beteli lya Brooklyn, ŵaŵendile kuti alembesye mena gawo mu msongano watukuwukolanga masiku agano kuti Sukulu ja Undumetume wa Mlungu.” M’bale Barber, jwele kaneko jwaŵele mu Likuga Lyakulongolela, jwasasile kuti sukuluji jili “cindu cimo cakumanyika mnope cacikulosya kuti Yehofa akwalongolela ŵandu ŵakwe masiku agano.” Kutandila mu caka ca 1943, mipingo pacilambo cosope japocelaga kabuku kakuti Course in Theocratic Ministry kakamulicisya masengo pamsonganowu. Msonganowu wakamucisye ŵakutumicila ŵa Mlungu kongolela kajiganye kawo soni masengo gawo gakulalicila. Sanja ja Mlonda ja June 1, 1943, jasasile kuti msongano wa Sukulu ja Undumetume wa Mlungu jalinganyidwe kuti jakamucisyeje ŵandu ŵa Mlungu  “kulijiganya kuŵa ŵakamula mtima pa masengo gakutendela umboni ya Ucimwene wa Mlungu.”—2 Tim. 2:15.

16, 17. Ana msongano wa Sukulu ja Undumetume wa Mlungu wagambaga kwajiganya ŵakutumicila ŵa Mlungu kola lunda lwakuŵeceta cenene ngani? Alondesye.

¹⁶ Kundanda, ŵandu ŵajinji yasawusyaga kuti aŵecete pameso pa ŵandu ŵajinji. M’bale Clayton Woodworth, jwele babagwe ŵataŵidwe mwangali cilungamo yalumo ni M’bale Rutherford ni abale ŵane mu 1918, pakumbucila muŵapikanile ali ajinjile kandanda sukuluji mu 1943, jwasasile kuti, “Yaliji yakusawusya kuti mbeceteje ngani. Mwamti nayiwonaga mpela lulumi lwangu lugumbele mkamwa. Pakamwa pangu pajumulaga, soni nagumilaga mwamti maloŵe gangu gapikanikaga mwamasenene.” Nambope umanyilisi wakuŵeceta ngani uli ukusile, M’bale Clayton jwakolaga upile wakuŵeceta ngani syakulekanganalekangana pameso pa ŵandu. Sukuluji jamkamucisye yindu yejinji ngaŵa kumanyililape kuŵeceta cenene ngani. Jamkamucisye kuŵa jwakulinandiya soni kusosekwa kwakumdalila Yehofa. Jwalakwe jwatite, “Namanyilile kuti jwakuŵeceta ngani pajikape nganaŵa jwakusosekwa. Nambo naga  akukosecela cenene, soni kumdalila Yehofa, ŵandu mpaka asangalale ni nganijo soni kulijiganya kandu kane.”

¹⁷ Mu 1959, alongo ŵaŵendile kulembesya nawo mu sukuluji. Mlongo Edna Bauer, pakumbucila cimanyisyo cicapelecedwe pamsongano wamkuli, jwatite, “Ngukumbucila yiŵatite alongo kusangalala ni cimanyisyoci, sambano alongo akwete upile wakonjecesya undumetume wawo.” Kwa yaka yejinji, abale ni alongo ŵajinji aŵele ali mkuwuwona kuŵa upile wawo kulembesya mu Sukulu ja Undumetume wa Mlungu kuti ajiganyidweje ni Yehofa. Masiku agano tukupitilisya kupocela majiganyo gelega kupitila mu msongano wamkati mwa wiki.—Aŵalanje Yesaya 54:13.

18, 19. (a) Ana masiku agano tukusapocela camtuli cikamucisyo pa masengo getu gakulalicila? (b) Ana ligongo cici tukusajimbaga nyimbo pamisongano jetu? (Alole libokosi lyakuti “Kwimba Nyimbo sya Usyesyene.”)

¹⁸ Msongano wa Undumetume. Kutandila ca m’ma 1919, misongano jakosecela undumetume wa mumgunda jatendekwaga. Pandaŵiji, ŵandu ŵaŵajigalaga nawo mbali pa masengo gakugaŵila mabuku gakusala ya m’Baibulo ni ŵaŵasimanikwaga pa misonganoji ngaŵa mpingo wosope. Kutandila m’caka ca 1923, Msongano wa Undumetume watendekwaga kamo pa mwesi soni mpingo wosope wasimanikwagapo. Ca m’ma 1928, mipingo ŵajisalile kuti jitendeje Msongano wa Undumetumewu wiki jilijose. Mu 1935, Sanja ja Mlonda jalimbikasisye mipingo josope kuti jitendeje msonganowu pakamulicisya masengo kabuku kaŵakakolangaga kuti Director, kele kaneko kakolanjidwaga kuti Informant, soni kaneko kakolanjidwaga kuti Undumetume wa Ucimwene. Msonganowu mwangacelewa waŵele mbali ja msongano wakutamilicika wa mpingo.

¹⁹ Masiku agano msongano wamkati mwa wiki ukusatukamucisya kuti tupakomboleje kutenda undumetume wetu. (Mat. 10:5-13) Naga akusapocela nawo kabuku ka Yakutendekwa Pamsongano wa Undumetume ni Umi Waciklistu, ana akusakaŵalanga soni kukamulicisya masengo yiwundo yakwe pali mu undumetume?

20-22. (a) Ana ligongo cici tukusatendaga Cikumbucilo ca ciwa ca Yesu? (b) Ana kusimanikwa kwawo pa Cikumbucilo caka cili cose kukusikwakamucisya camtuli wawojo?

²⁰ Ŵakulijiganya ŵa Yesu ŵasalile kuti akumbucileje ciwa ca Yesu mpaka ndaŵi jakwika kwakwe. Mpela mwacatendecelaga cisangalalo ca Pasaka, Cikumbucilo ca ciwa ca Klistu cikusatendekwa kamo pacaka. (1 Akoli. 11:23-26) Ŵandu mamiliyoni gejinji akusasimanikwa pamsonganowu caka cilicose. Msonganowu ukusiwakumbusya ŵasagulwe ya upile wawo wakuja kulamulila mu Ucimwene. (Alo. 8:17) Kwa ŵa ngondolo sine, msonganowu ukusiwakamucisya kumcimbicisya mnope soni kuŵa ŵakulupicika kwa Mwenye jwa Ucimwene wa Mlungu.—Yoh. 10:16.

²¹ M’bale Russell ni acimjakwe ŵamanyilile kusosekwa kwa kumbucila Cakulya Caligulo ca Ambuje. Ŵamanyililesoni kuti cikusosekwa kutendekwa kamo pa caka. Sanja ja Mlonda ja April 1880 jasasile kuti, “Kwa yaka yejinji, ŵajinji ŵetuwe akuno ku Pittsburgh, tuŵele . . . mkukumbucila Pasaka [Cikumbucilo] soni kulya yimanyilo ya cilu ni miyasi ja Ambuje ŵetu.” Mwangacelewa misongano jaupande jaŵele mkutendekwa mundaŵi ja Cikumbuciloci.  Msongano wandanda watendekwe mu 1889. Pamsonganowu, ŵandu 225 ŵasongene soni 22 ŵabatiswe.

²² Masiku agano, Cikumbucilo nganiciŵa mbalisoni ja msongano waupande. Nambope kulikose kwatuli tukusitwaŵilanjilaga ŵandu ku mwambowu kuti tusongane yalumo m’Nyumba sya Ucimwene kapena pamalo galigose gagalinganyidwe. Mu 2013, ŵandu ŵakupunda 19 miliyoni ŵasimanikwe pa mwambo wakumbucila ciwa ca Yesu. Uli upile wetu wekulungwa kusimanikwa pa Cikumbuciloci, nambosoni kwalimbikasya ŵane kuti asimanikwe pa cilo capajikaci. Ana akusaŵa ŵakusacilila kwaŵilanjila ŵandu ŵajinji mwampaka akombolele kuti asimanikwe nawo pa Cikumbuciloci caka cilicose?

23. Ana tukusosekwa kujiwonaga camtuli misongano?

²³ Ŵakutumicila ŵakulupicika ŵa Yehofa ngakusajiwonaga misongano kuŵa cindu cakusitopesya. (Aheb. 10:24, 25; 1 Yoh. 5:3) Mwacisyasyo, Mwenye Daudi jwanonyelaga kwawula ku nyumba ja Yehofa kukulambila. (Sal. 27:4) Jwalakwe jwasangalalaga mnope pakulambila Yehofa yalumo ni ŵandu ŵaŵamnonyelaga Mlungu. (Sal 35:18) Soni aganicisye ya cisyasyo ca Yesu. Atamose pandaŵi jiŵaliji jwacinandipile, Yesu jwasangalalaga mnope kusimanikwa m’nyumba jakupopelela ja Yehofa.—Luka 2:41-49.

24. Putukusimanikwa pa misongano tukusakola upile wamtuli?

²⁴ Kusimanikwa kwetu pamisongano kukusalosya kuti tukusamnonyela mnope Yehofa soni kuti tukusaŵa ŵakusacilila kwalimbikasya ŵakulupilila acimjetu. Nambosoni pamisongano ni patukusalosya kusacilila kwetu kulijiganya mwampaka tuŵele ŵandu ŵakutamilicika mu Ucimwene wa Mlungu, ligongo pamisongano jampingo, jamkuli soni jaupande ni patukusalijiganya mwampaka tutendele yeleyi. Nambosoni misonganoji jikusatukamucisya soni kutupa macili kuti tupakomboleje kupilila pa masengo gakusosekwa mnope. Masengoga gali kupanganya soni kwajiganya ŵandu kuti aŵe ŵakulijiganya ŵa Mwenye Yesu Klistu. (Aŵalanje Mateyu 28:19, 20.) Yili yangakayikasya kuti kusacilila kwetu kusimanikwa pa misongano kukusalosya kuti jwalijose jwetuwe akusawuwonaga Ucimwene wa Mlungu kuŵa usyesyene. Kwende ndaŵi syosope tujiwoneje misongano kuŵa jakusosekwa.